Saturday, August 19, 2006


هابي بيرث


Shokeir - Happy Birthday




سنة كاملة بالتمام والكمال مرت على بلوج حكاوي آخر الليل ، يوم 17 أغسطس سنة 2005 كان أول مرة أقرأ أول بلوج على الإطلاق وكان للمدونة بنت مصرية وكان بما يشبه المجلة النصف شهرية وفي نفس اليوم انشئت بلوج حكاوي ويمكن ده السر اللي خلاني طلعت بإسمي ماكنتش لسه عارف إن الواحد المفروض بيطلع بإسم مستعار بس بعد ما إكتشفت كده ماغيرتوش
أول تدوينة ليا في نفس اليوم كانت بعنوان
همومك وكانت حاجة قريتها قبل كده عاجبتني وكانت مجرد تست ، أول تعليق جالي على الإطلاق كان على التدوينة التالتة من مدونِة سوريِّة إسمها لُبنى قفلت مدونتها وكان التعليق الوحيد
يوم 20 أغسطس 2005 كان
أول إعلان عن المدونة في تدوينة الشامل بعد إيميل بعته لرامي صاحب مدونة لنتعد الطبيعي
وصل عدد التدوينات على مدار العام في مدونة حكاوي 67 تدوينة ونضارة 8 وصور 171 وعدد الزوار في مدونتي حكاوي وصور اتنين وأربعين ألف وسبعمائة منهم سبعة وتلاتين ألف لمدونة حكاوي وترتيب الزوار حسب الدول 41 في المية من مصر تليها السعودية ثم الولايات المتحدة وفي المركز الرابع الكويت تليها الإمارات وكندا في الثامن وبريطانيا في التاسع وأخيرا الأردن بنسبة أربعة في المية
أكثر عدد زوار في يوم واحد كان يوم 26 يونيو 2006 وكان 398 زائر
في بداية هذا العام فوجئت إن
ميندونا في مدونتها ترفشخنات إختارت أحسن عشر تدوينات من وجهة نظرها في عام 2005 كان من بينهم تدوينة حوار مع نفسى – لقاء جيلين اللي نشرتها في 15 سبتمبر 2005
طوال العام لم أحذف أي تعليق بإستثناء تعليقات الإسبام أو التعليقات المكررة بالخطأ ، ولكني حذفت تعليقين لي في مدونات أخري واحد في مدونة هيرا
طفاية سجاير والآخر كان في مدونة إبن مصر لأسباب
أكثر عدد من التعليقات كان في تدوينة
لقطات من حياتي ونشرت في شهر يونيو 2006 وبلغ عدد التعليقات 64 تعليق منهم تعليق واحد لي عبارة عن رد على التعليقات ، وإن كان العدد وصل 66 في قصة ليلة رأس السنة في مدونة نضارة شمس منهم 3 تعليقات لي
لم أتقابل مع أي مدون على الإطلاق وإن كنت على إتصال ببعضهم


--------------------------


بشكر
بعدك على بالي وإبيتاف وزبادي ونوران وآخرين على دعوتهم ليا في التاج اللي ألفته حلم والخاص بالتدوين واللّي لقيته مناسب للبوست

ـــ هل أنت راض عن مدونتك شكلاً وموضوعاً؟
الصبح باكون راضي وباليل لأ

ـــ هل تعلم أسرتك الصغيرة بأمر مدونتك؟
لأ طبعا ولما تلاقوا المدونة إتقفلت إعرفوا إنهم عرفوا

ـــ هل تجد حرجاً فى أن تُخبر صديقاً عن مدونتك؟ هل تعتبرها أمرا خاصا بك؟
آه

ـــ هل تسببت المدونات بتغيير إيجابى لأفكارك؟ اعطنى مثال فى حالة الاجابة نعم
طبعا أنا كنت باحب المشمش دلوقتي بموت في المنجة

ـــ هل تكتفى بفتح صفحات من يعقبون بردود فى مدونتك أم تسعى لاكتشاف المزيد؟
المزيد لغاية مادُخت وماعدتش مِلاحق ، دلوقتي بقا فيه مدونة كل سبعة وعشرين ثانية

ـــ ماذا يعنى لك عداد الزوار.. هل تهتم بوضعه فى مدونتك؟
أكيد بس اللي بيهمني أكتر أعرف اللّي وصل من عن طريق مواقع البحث وصل بكلمات إيه ، النتيجة الصراحة مسخرة

ـــ هل حاولت تخيل شكل اصدقائك المدونين؟ اعترف
أكيد ، لقيتهم تشكيلة من براد بيت على محمد نجم ومن أنجلينا جولي على حبة من عبلة كامل


ـــ هل ترى فائدة حقيقية للتدوين؟
أيوه التدوين ده زي الدوا فيه منه أقراص وفيه منه غرغرة وفيه منه مرهم وفيه منه لامؤاخذة لبوس


ـــ هل تشعر أن مجتمع المدونين مجتمع منفصل عن العالم المحيط بك أم متفاعل مع احداثه؟
منفصل إيه ؟ هو فيه حاجة بيسيبها ، أفتكر مرة كنت باتفرج على العاشرة مساء الحلقة بتاعت آلاء طالبة أولى ثانوي الي عايزين يسقطوها عشان موضوع التعبير وكان لسه الموضوع ماتعرفش ودمي إتحرق بصحيح من رد وكيل الوزراة في البرنامج سبت البرنامج وهو لسه شغال من فرستي وقعدت على النت لقيت لستو ادري كتبت عن الحلقة وهيا لسه شغّالة


ـــ هل يزعجك وجود نقد بمدونتك ؟ أم تشعر انه ظاهرة صحية؟
لأ هو ظاهرة صحية لما يكون الواحد عنده إمساك


ـــ هل تخاف من بعض المدونات السياسية وتتحاشاها؟ هل صدمك اعتقال بعض المدونين؟
لأ لأن علاء والشرقاوي وأكرم إعتقلوا عشان مظاهرات أمام نادي القضاة وخلفيات أخرى مش عشان هما مدونين الوحيد اللي إعتقل عشان التدوين كان خالد الذكر عبد الكريم وبصراحة كان أول مرة أحب أمن الدولة


ـــ هل فكرت فى مصير مدونتك حال وفاتك؟
بيتهيألي هاتفضل موجودة عند آخر تدوينة وهايجيلها زوار من خلال مواقع البحث

ـــ آخر سؤال : ما الاغنية التى تحب وضع اللينك الخاص بها فى مدونتك؟
أحسن أعمل لينك على
أعز الناس

ـــ اكتب أسماء خمسة مدونين ليقوموا بهذا الاستقصاء بعدك
كل اللي في السايد بار ولسه ماعملوش

كفاية كده دوشتكوا بالكلام عن نفسي ومتشكرّين لكل اللي قدر يصمد لنهاية البوست وهابي بيرث

32 comments:

  1. كل سنة وانت طيب وعقبال السنة الجاية وانت بتحتفل بمدونتك بمرور عامين
    :)

    ReplyDelete
  2. eh kol el statistics deh :S

    ma 3alena.. kol sana w 7akawy tayba,,, w 3o2bal el 70000 post keda isA (ydena w ydek tolt el 3omr)

    :D

    ReplyDelete
  3. حلو التقرير السنوى عن المدونة ده
    ايه ياعم احنا فى مجلس الشعب هههه

    لا بس فكرة الاحتفال بمرور عام على المدونة بالشكل ده جديد

    على العموم عقبال اليوبيل الدهبى
    واقدر اقول إن نبؤتى أتحققت بعد مرور عام ههههههههههههه

    ReplyDelete
  4. كل سنة و انت طيب و ربنا يبعد عنك الهموم يا رب

    ReplyDelete
  5. كل سنة و انت طيب ..عقبالي كده لما اكمل سنة بس على شرط أكون لقيت خلال السنة عريس ووقعته و اتجوزته كمان ..إدعيلي

    ReplyDelete
  6. kol sana o inta 6ayyib, o inshalla ti7tifil bil 3eed il tani o inta ben ahlak o 2a7babak fi ma9r :)

    ReplyDelete
  7. بو شهاب
    عقبال
    52498325761000548962
    سنه
    و كلنا فخر بان مدون نفسك نزين به قوائم مدوناتنا الكويتية
    تقبل فائق التحية
    اخوك اللي مش حايسبك
    ولازم يشوفك
    برمضان ان شاء الله

    ReplyDelete
  8. alf mabrooook ya bashmohandesss. ma3a enaha teban akbar mn kedda bekteeer.
    el rak 3ala el shattara w al osloob al monfared(7elwa monfared dee!!)
    ma shaa allah.

    ReplyDelete
  9. هدية عيد ميلاد البلوج
    http://www.enter-q8.com/Shokeir.gif
    شعار ليه

    ReplyDelete
  10. موافقون ؟
    موافقه
    و الآن عوده الى جدول الأعمال .....

    ReplyDelete
  11. مدونتك من المدونات القليلة جدا اللى بحب اتابعها يمكن بشكل يومي ولو انى مكتشفتهاش الا بتعليق على مدونتى وعجبني جدا انى اقعد اقرا حاجات من الارشيف عندك لفترات طويلة

    اجمد حاجة في التاج موتتني من الضحك فعلا لما بتقول ان اعتقال كريم كانت اول مرة تحب فيها امن الدولة .. جامدة

    ReplyDelete
  12. كل سنة وانت طيب .. والله يا أحمد انت خليت للتدوين طعم ولون
    وحلوة قوي تصنيف المدونات علي أنها دواء حبوب وغرغرة وووو حقن
    وكل سنة وانت طيب

    ReplyDelete
  13. كل سنة و انت طيب يا باشمهندس

    والله فعلا انت من اكتر الناس اللي عرفتها ع النت إحتراما..أنا أحترم كتاباتك جدا جدا ..و يوم مابتعلق عندي بحس اني فعلا كاتبة حاجه كويسة

    عقبال مليون سنة

    ReplyDelete
  14. كل سنه وانت طيب والمدونه تكبر


    لبقي زورني في مدونت اللي مفيش حد بيعبرها اشكرك

    ReplyDelete
  15. tab Happy Birthday ba2a
    w 3ou2bal 99 sana 2al blog ya rab!!

    :D

    KAN MA3KOM Epi..Mn el cyber cafe lol

    ReplyDelete
  16. العزيز شقير

    كالعادة متميز فى اختيارك للاحتفال بهذه الطريقة... تؤرخ.. ترصد وتحلل..

    كل سنة وانت طيب وعقبال مليون سنه تكون سببا فى ميلاد مدونات كثيرة شجعت أصحابها قولا وفعلا كما فعلت معى..

    تحياتى وشكرا على التاج..

    ReplyDelete
  17. مبروك امتى حتشيل الترمومتر وطقية التلج
    علشان تخرج معنا نعزمك فى حتة على اكلة تشينيس ترم عضمك ـ كل سنة وانت طيب

    ReplyDelete
  18. هابي بيرث داي تو "حكاوي"
    هابي بيرث داي تو "حكاوي"
    هابي بيرث داي تو "كيكا" .. هابي بيرث داي تو "حكاوي" :)

    عقبال 100 سنة اشراق و خفة روح و تكوين اصدقاء .. و يا ما حد يعرف ف اسرتك ان ليك مدونة :)

    علي فكرة يا أحمد .. لو زهقت من شغلتك دلوقتي .. أرشحك بجدارة للعمل في التعداد و المساحة و الرصد و المتابعة :)

    ReplyDelete
  19. هابي بيرز تو يو يو
    هو انا اغيب 6 ايام اصيف ارجع الاقي حجات كتيرة حصلت
    بص انا هنزلها ف النشرة هيه هيه عندي اخبار كتير ف النشرة انتظرونا

    ReplyDelete
  20. الغالى بألأوى شوكير
    يا سيدى كل سنة و انت طيب و ربنا يطمنا عليك دايما
    يعنى تفتكر انت فغربة و قاعد متكتك و لابس الكوفية و ملفوف فملاية و مناخيرك بتنور و تطفى كده و هنسيبك ؟؟ يبقى عيب علينا
    عدى علينا و أنا هعملك طبق شوربة فراج بالمستكة و الحبهان و ورق اللورى ترم عضمك و تطلع البرد من جتتك- تلاقيك ياحبة عينى اتهريت من أكل المطاعم و بالذات الصينى اللى بيقلبلك بطنك ده
    انت جميل يا شووووكير

    ReplyDelete
  21. كل سنة و انت و مدونتك طيبين :)) و عقبال الزائر المليون

    ReplyDelete
  22. كل سنة وانت طيب
    عايزة اقوللك حاجة
    مهمة
    على الاقل لى
    انت بجد دعمتنى فى وقت كنت فيه لوحدى جدا
    وقت قررت فيه الغى احلام واطير لوحدى بعيد
    مستخبية
    بس ردك رجعنى لحاجات حلوة كتير

    بس

    التاج كان حلو عندك
    ميرسى يا شقير جدا

    ReplyDelete
  23. كل سنة وانته طيب يا عمو احمد
    عقبال ما نطفي الشمعه الميه

    *^_________^*
    وايد حلو التقرير اللي مسويه

    :P

    ReplyDelete
  24. عمل رائع... كل سنة وانت طيب والى الأمام دائما

    ReplyDelete
  25. عايزة اعلق على التوبيكس الجديدة اللى فوق خالص ومش لاقية مكان

    فكرة براندنيو

    جميلة
    وسريعة ومقتضبة

    ReplyDelete
  26. الف مبروك يا باشا و لو انها متأخرة شويه لدواعى السفر

    ReplyDelete
  27. كل عام وانتة بألف خير

    !!! الاحصائيات فظيعة

    :)

    ReplyDelete
  28. كل سنة و انت و حكاويك و نظارتك و صورك بخير و ألف صحة و سلامة

    ReplyDelete
  29. كل سنه و انت طيب يا احمد و عقبال 10000000 سنه

    شكرا على سؤالك علينا
    ربنا يخليك

    ReplyDelete
  30. Abdou Basha
    وتكون معانا السنة الجاية انشاءالله

    Lasto-adri *Blue
    وإنتي طيبة وطولة العمر ليكي انشاء الله

    shady
    وهو مجلس الشعب فيه احصائيات برده ، مانت سيد العارفين

    change destiny
    آمين ، وانتي كمان يارب

    wanna b a bride
    لما تكملي سنة اكيد هاتغيري اسمك ، سميه ساعتها واحدة متجوزة
    قولي يارب

    MAKSOFA
    وانتي طيبة

    khalid jarrar
    يسمع منك ربنا يارب وانت كمان ياخالد

    Enter-Q8
    ربنا يكرمك ياخالد ، بس ايه السنين دي كلها بتتنطق إزاي ؟
    ربنا يبلغنا رمضان وانشاءالله نتقابل

    Rania
    كتير عليا ده يارانيا ، عقبالك انتي كمان بس ياريت لو ليكي مدونة توقليلي ع الرابط بتاعها

    Enter-Q8
    بصراحة جميلة جدا ، فنان ياخالد والله

    Maxxed`ouT
    خلاص انتقلنا الى جدول الاعمال
    عجبتني تدوينتك بتعات الروائح

    Abd El Rahman
    تسلملي ياعبد الرحمن حقيقي انبهرت عند بتدوينة رحلة داخل مصر روعة

    زبادي
    وحشتنا ياراجل ياترى أجازتك خلصت ولا لسه؟
    شكرا على كلاك الحلو

    دعاء غريب
    وانتي طيبة يادعاء ونحتفل بمرور سنة على مدونتك كمان

    soosa el-mafroosa
    فعلا انتي ياسوسة كتابتك متميزة ولاحظت كده من اول بوست ليكي
    اسرع مدونة ظهرت واتنشر لها بوست في الجرائد

    المهدي
    شكرا يالورد وجايلك حالا

    Epitaph
    هو انتي بتكتبي من سايبركافيه؟
    ده انا حاسس انك ع النت اربعة وعشرين ساعة
    خمسة وخميسة
    عقبالك بمدونتك المتميزة

    ســكون
    وانتي طيبة المشكلة في الشهرين والتلات ايام دول

    Rose
    من اول يوم وانا كنت مهتم اهتمام شخصي بتدويناتك لانها فعلا كانت متميزة وفيها روح صدق واحساس عالي صعب إغفاله
    وان كنت حزنت لحذف بعض البوستات عندك في ايام الحب والحماقة باعتبرها من اروع ماكتبتي

    بعدك على بالى
    بصراحة انتي مدونة من النوع الاحترافي ، القراءة عندك محتاجة تركيز وتدقيق
    باشكرك عل دعوتي للتاج

    جدو
    هاها شيلت خلاص الترمومتر ودلوقتي باولع في نفسي بجاز ، شفت بأه كده اريح
    تشينيز تاني ياجدو حرام عليك انت لسه فاكر

    Romantic Rose
    ميرسي يارومانتيك روز ، كده برده اخرتها اشتغل في التعداد والاحصا
    هاها حرام عليكي
    هانشوفلك مدونة شخصية امتى بأه؟

    Nouran
    مجنونة ده انتي تنزلتيها في النشرة بجد
    عقبالك لما نحتفل بشمعة جدة ونشرتها المتميزة

    تمر حنه
    تسلميلي والله من غير مبالغة كده كلامك عن الاكل للي يرم العضم ده جرى ريقي ومش عارف حسيت من كلامك ان الواحد باه زي الحصان
    ربنا يخليكي ووعد الحر دين عليه
    هاتعزميني ع الاكلة دي يعني هاتعزميني

    Nerro
    وانتي طيبة ، الزائر المليون ده اتمنى انه يكون انتي
    يديني ويديكي ربنا طولة العمر

    حــــــلــم
    كلامك فاجئني عن حكاية الدعم دي بصراحة اخجلتم تواضعنا ،
    وفجئتيني بانك كنتي ناوية تلغي كتاباتك
    حررام عليكي
    قصصك بصراحة بتعجبني
    والتاج اللي الفتيه اعتقد انه اكثر تاج حقق نجاحا وانتشارا
    برافو على اسئلتك

    نون النساء
    وعقبالك انتي كمان واشعارك الجميلة والصعبة برده
    بس ايه حكاية عمو دي
    طيب نوران وبتقولها وعديناها
    خايف لاتكون ظاهرة
    انا أعيل منكوا

    Anonymous
    شكرا على تمنياتك بس ياريت كنت اعرف انت مين ؟

    حــــــلــم
    مش عارف تقصدي التوبيكي اللي هيا الكوتس الجديدة فوق تحت البروفايل
    بصراحة كنت بقابل اقوال بتعجبني وماكنتش عارف احطها عندي ازاي مش معقولة اعمل بوست على كل قول يعجبني عشان كده جت لي الفكرة دي

    ensan
    الله يبارك فيك يالورد ، انت غيرت النيك نيم بتاعك لانسان بيحس
    عموما حلو برده زيك كده

    Tara
    وانتي طيبة ياتارا
    فظيعة دي يعني حاجة حلوة ولا وحشة؟
    اكيد حلوة انتي مايجيش منك حاجة وحشة ابدا

    taty
    وانتي طيبة ياتاتي
    اخيرا ظهرتي أول مرة كنتي تغيبي كده افتقدناكي بصراحة

    bosbos
    وانتي طيبة يابسبس
    وحمدالله على السلامة من الاجازة ياريت تكتبيلنا عنها

    كل سنة وانتوا طيبين

    ReplyDelete
  31. هل تسببت المدونات بتغيير إيجابى لأفكارك؟ اعطنى مثال فى حالة الاجابة نعم
    طبعا أنا كنت باحب المشمش دلوقتي بموت في المنجة


    حلوه و ملعوبه

    ReplyDelete