أيوه إحنا المصريين مختلفين عن الآخرين

المصري هو اللّي

ممكن يعدي التلاتين ولسه عايش مع أمه وأبوه وماعندهومش مشكلة

بيفهم في الطب ويشخص المرض ويوصفلك الدوا وبيفهم في النقاشة والكهربا وتصليح العربيات والطبيخ والسياسة والكورة وهو أبيض ياورد

بيحط الريموت كونترول في كيس بلاستيك كعادة فرعونية

يقف يتكلم على الباب نص ساعة بعد إنتهاء الزيارة والسلام

لمّا تفتح نملية المطبخ هتلاقي عنده عشرين برطمان بتاع مربى فاضي بقالهم سنين ومازال مُصِر على جمع المزيد

ييجي بعد معاده بساعتين ويفتكر إن ده عادي

لسه عنده إصرار إنه يتكلم بصوت عالي في التليفون لما تكون المكالمة دولية عشان التاني يسمعه

بيعتبر نفسه أفضل واحد في الشرا والفصال وبعد كده يكتشف إن الحاجة في المحل اللي جنبه أرخص من غير فصال

بيحتفظ بأكياس محلات اللبس والأحذية وورق الهدايا تحت مرتبة السرير لسنوات ومابيستخدمهاش

عنده صينية مكسرات متقسمة لتلات او أربع أقسام لزوم المزاج وعمره ماإستخدمها

بيشتري قبل الفطار في رمضان مواد إستهلاكية أصلا موجود عنده في البيت لسه ماستخدمهاش

بيكون عنده شواية لزوم الرحلات أقصى استخدام لها كان مرة واحدة في العيد

بيشيل طابع البريد من على الظرف لو الختم ماكانش عليه

بيفتكر إن أي حد بيشتغل في الخليج بيغرف فلوس من غير حساب

لسه بيخلط بين أغنية بوس الواوا والواوا أح ، وبيفتكرهم أغنية واحدة

بيكون مشغول بقيمة التيبس أو البقشيش طول العشا ياترى ربع جنيه ولا نص جنيه

برده بيتخانق ساعة دفع الحساب بحرارة شديدة على إنه هو اللي لازم يدفع

سرقوا منه العربية بس مشكلته هي المايتي زينجر

بيفرش ملاية سرير على طقم الأنتريه عشان يفضل نضيف لما ييجي ضيوف ومابيشيلهاش لما ييجوا

والأهم إنه اللي بيحب يسخر من نفسه ومن بلده وحكامه بس مايطيقش حد تاني يسخر منهم ، وساعتها بيفرش له الملاية
--------------------------

تحديث : تم نشر هذه التدوينة في منتدي روايات نت

تحديث : وجدتها منشورة في موقع سلالة بهي الدين

تحديث : وجدتها منشورة في منتدي بورسعيد اونلاين ومنتدي صداقة القديسين
تحديث : وجدتها منشورة في جروب ام اس ان طبيب 84 ومنتدي ماكس
تحديث : وجدتها منشورة في مدونة في العمق وقد أشار صاحب المدونة انه وصلته عن طريق الإيميل

--------------------------

إهئ إهئ ... وأخيرا وصلتني عن طريق الإيميل مع الألاف بالرغم من إني صاحبها

--------------------------

تحديث : ُنشرت في جريدة المصري اليوم في مقالة فصل الخطاب مع تعليق من كاتب المقال
That's How Egyptians Operate تحديث : علّق عليها مؤمن في
تحديث : نشرها أفندينا في مدونته المصري اليوم على مكتوب وأشار إلى المصدر

بوست إستثنائي

منذ بضعة أيام إتكعبلت في مدونًة سعودية إسمها سوالف أحمد وبالتحديد في تدوينة إسمها ماذا يحدث في مصر فكرت أكثر من مرة قبل أن أعرض ماكتبه هنا ، ولكن ماإستفزني أكثر ردا من إحدى المدونات السعوديات عليه بصورة لم تخفى فيها رائحة شماتة

ماكتبه المدون السعودي كان

ربما لا توجد دولة شهدت تراجعاً مخيفاً في كل المجالات الانسانية خلال خمسة عشراً عاماً تقريباً كما هو الحال في أم الدنيا مصر ، فالمتأمل لأحوال مصر سيرى العجب العجاب ، فبعد أن كانت في القمة في مجالات كثيرة أصبحت تتأخر يوماً بعد يوم حتى أضحت في المقاعد الأخيرة
ففي مجال الإعلام مثلاً توجد أكثر من 15 قناة مصرية 100% أخبروني عن برنامج شدكم فيها أو حتى لفت انتباهكم ، تأملوا في نوعية الكاميرات وطريقة عمل الاستديوهات وأساليب المقدمين ، بل انظروا كيف قفزت كل القنوات العربية تقريباً خلال الأعوام الخمسة الماضية لتجاري القنوات العالمية ، أصبح وجود المذيع المصري فيها مستحيلاً وكأن بلدأ تجاوز سكانه الـ 70 مليون عاجز عن تقديم مذيع أخبار يملى الشاشة
في الصحافة الورقية .. هل تتذكرون أسماء صحف الإهرام والجمهورية .. اقرأوها الآن وقارنوا بما يطرح في أضعف الأحوال بالصحف السعودية أو الكويتية ، لا تنسى بكل تأكيد تنظيف يديك وغسلها لأن جودة الصحف المصرية هي الأسوأ بلا جدال
في الفن كانت مصر في القمة لسنوات وسنوات ، انظروا الآن ساحتها الفنية ، كما مطرباً يستحق السماع وكم من أغنية مصرية تستحق التأمل ، كلهم أصبحوا كبعضهم البعض وتحول الطرب المصري إلى ( أغاني هايفة وأي كلام )
في الرياضة ، بربكم من هو اللاعب الذي نجحت مصر في تقديمه للأضواء في السنوات الخمس الماضية .. لا أحد ، بل تابعوا الدوري المصري وشاهدوا مستوى اللعب والتعليق ، قطر الدولة الصغيرة أصبح دوريها أكثر متعة ، تونس أصبحت تخطف كل الأضواء ، السعودية رغم السلبيات إلى أن المجال الرياضي لازال في الطليعة .. أين مصر من الخريطة الرياضية ربما باستثناء بطولة أفريقيا الماضية
هل تريدون الحديث عن مواقع الانترنت ، اكتبوا موقعاً مصرياً ( عليه العين ) تخيلوا مواقع سعودية وكويتية واماراتية تتألق وتستقطب الزوار والاعلانات .. أين مصر من الساحة .. هل عجز المصريون عن تقديم مواقع انترنت عربية بكفاءة واحترافية ؟في رأيي أن من يتجول في المدونات المصرية سيجد بعضاً لهذه التساؤلات ، فالمجتمع المصري ( هاوي كلام )
وأعتقد أن الحكومة المصرية نجحت في إبعاد الأضواء والانتقادات عنها بفتح أبواب الأحزاب والجماعات والهيئات ، عراك ومظاهرات حول جمعية الصحفيين ، اعتصام أمام بوابة هيئة المهندسين ، خلافات لا تنتهي مع نقابة الفنانيين .. الخ الخ من الخلافات والنقاشات التي لا تنتهي والتي تمنع كل أبواب التقدم والانطلاق إلى الأمام
كلنا نحب مصر ونتأمل أن تواصل مسيرة التقدم كما هو حال العديد من الدول العربية ، لا أخفيكم بأني أخشى أن تكون مصر هي المحطة التالية للأسى العربية ، لأني أحس بأنها ستنفجر من الداخل فالمعيشة أصبحت صعبة جداً في ظل وقوف عجلة التقدم

إنتهى كلام المدون

وكان من بين التعليقات السعودية

مصر لاأدري ماأصابها وماذا حل بها !! بدأت تتحول الى مدينه جائعه لشعب جائع ليس همه إلا كيف يأكل ليعيش بعيدا عن التحضر من الشارع الى العلم

أعجبني تعليق عبد الرحمن أوعبده باشا عنده وكذلك تعليق بيلا المصرية

إذا كان هناك ماإستفزك أو لديك تعليق فأ ُفضل أن يكون عنده ، لذلك أستسمحكم في إلغاء التعليقات هنا

--------------------------------
تحديث

جدو ، آدم المصري ، أسد ، ماس ، يحيى عياش ، سمعان ، تمر حنة ، شادي ، أحمُس ،عبد الرحمن جادو ، أُم العيال ، رومانتيك روز ، بنت مصرية تحية واجبة لكل منهم لمشاركتهم الإيجابية بالرد ، وتحية خاصة ل دكترة اللي خصص بوست أيضا لهذا الموضوع

والبقية تأتي
---------------------------

تحديث

شادي مرة أخرى ، أدهم ، هوميروس ، غير معروف ، حاول تفتكرني ، حلم ، تحية خاصة لمشاركتهم الإيجابية ، ونبيل شرف الدين الذي شارك صاحب المدونة أفكاره ، وأدهم مرة أخرى ، وتحية خاصة لصاحب المدونة لسعة صدره وتقبله الرأي الآخر بكل شجاعة
وأيضا زهرة على تعليقها المتميز جدا وإن كنت لم اجد لها مدونة خاصة

في مدونة إرتباك كانت هناك وجهة نظر حول هذا الموضوع
في مدونة ماجد شافعي هناك وجهة نظر أخرى حول هذا الموضوع

---------------------------

يوم ويكيبيديا العربية الأول

هابي بيرث

سنة كاملة بالتمام والكمال مرت على بلوج حكاوي آخر الليل ، يوم 17 أغسطس سنة 2005 كان أول مرة أقرأ أول بلوج على الإطلاق وكان للمدونة بنت مصرية وكان بما يشبه المجلة النصف شهرية وفي نفس اليوم انشئت بلوج حكاوي ويمكن ده السر اللي خلاني طلعت بإسمي ماكنتش لسه عارف إن الواحد المفروض بيطلع بإسم مستعار بس بعد ما إكتشفت كده ماغيرتوش
أول تدوينة ليا في نفس اليوم كانت بعنوان همومك وكانت حاجة قريتها قبل كده عاجبتني وكانت مجرد تست ، أول تعليق جالي على الإطلاق كان على التدوينة التالتة من مدونِة سوريِّة إسمها لُبنى قفلت مدونتها وكان التعليق الوحيد
يوم 20 أغسطس 2005 كان أول إعلان عن المدونة في تدوينة الشامل بعد إيميل بعته لرامي صاحب مدونة لنتعد الطبيعي
وصل عدد التدوينات على مدار العام في مدونة حكاوي 67 تدوينة ونضارة 8 وصور 171 وعدد الزوار في مدونتي حكاوي وصور اتنين وأربعين ألف وسبعمائة منهم سبعة وتلاتين ألف لمدونة حكاوي وترتيب الزوار حسب الدول 41 في المية من مصر تليها السعودية ثم الولايات المتحدة وفي المركز الرابع الكويت تليها الإمارات وكندا في الثامن وبريطانيا في التاسع وأخيرا الأردن بنسبة أربعة في المية
أكثر عدد زوار في يوم واحد كان يوم 26 يونيو 2006 وكان 398 زائر
في بداية هذا العام فوجئت إن ميندونا في مدونتها ترفشخنات إختارت أحسن عشر تدوينات من وجهة نظرها في عام 2005 كان من بينهم تدوينة حوار مع نفسى – لقاء جيلين اللي نشرتها في 15 سبتمبر 2005
طوال العام لم أحذف أي تعليق بإستثناء تعليقات الإسبام أو التعليقات المكررة بالخطأ ، ولكني حذفت تعليقين لي في مدونات أخري واحد في مدونة هيرا طفاية سجاير والآخر كان في مدونة إبن مصر لأسباب
أكثر عدد من التعليقات كان في تدوينة لقطات من حياتي ونشرت في شهر يونيو 2006 وبلغ عدد التعليقات 64 تعليق منهم تعليق واحد لي عبارة عن رد على التعليقات ، وإن كان العدد وصل 66 في قصة ليلة رأس السنة في مدونة نضارة شمس منهم 3 تعليقات لي
لم أتقابل مع أي مدون على الإطلاق وإن كنت على إتصال ببعضهم

--------------------------

بشكر بعدك على بالي وإبيتاف وزبادي ونوران وآخرين على دعوتهم ليا في التاج اللي ألفته حلم والخاص بالتدوين واللّي لقيته مناسب للبوست

ـــ هل أنت راض عن مدونتك شكلاً وموضوعاً؟
الصبح باكون راضي وباليل لأ

ـــ هل تعلم أسرتك الصغيرة بأمر مدونتك؟
لأ طبعا ولما تلاقوا المدونة إتقفلت إعرفوا إنهم عرفوا

ـــ هل تجد حرجاً فى أن تُخبر صديقاً عن مدونتك؟ هل تعتبرها أمرا خاصا بك؟
آه

ـــ هل تسببت المدونات بتغيير إيجابى لأفكارك؟ اعطنى مثال فى حالة الاجابة نعم
طبعا أنا كنت باحب المشمش دلوقتي بموت في المنجة

ـــ هل تكتفى بفتح صفحات من يعقبون بردود فى مدونتك أم تسعى لاكتشاف المزيد؟
المزيد لغاية مادُخت وماعدتش مِلاحق ، دلوقتي بقا فيه مدونة كل سبعة وعشرين ثانية

ـــ ماذا يعنى لك عداد الزوار.. هل تهتم بوضعه فى مدونتك؟
أكيد بس اللي بيهمني أكتر أعرف اللّي وصل من عن طريق مواقع البحث وصل بكلمات إيه ، النتيجة الصراحة مسخرة

ـــ هل حاولت تخيل شكل اصدقائك المدونين؟ اعترف
أكيد ، لقيتهم تشكيلة من براد بيت على محمد نجم ومن أنجلينا جولي على حبة من عبلة كامل


ـــ هل ترى فائدة حقيقية للتدوين؟
أيوه التدوين ده زي الدوا فيه منه أقراص وفيه منه غرغرة وفيه منه مرهم وفيه منه لامؤاخذة لبوس


ـــ هل تشعر أن مجتمع المدونين مجتمع منفصل عن العالم المحيط بك أم متفاعل مع احداثه؟
منفصل إيه ؟ هو فيه حاجة بيسيبها ، أفتكر مرة كنت باتفرج على العاشرة مساء الحلقة بتاعت آلاء طالبة أولى ثانوي الي عايزين يسقطوها عشان موضوع التعبير وكان لسه الموضوع ماتعرفش ودمي إتحرق بصحيح من رد وكيل الوزراة في البرنامج سبت البرنامج وهو لسه شغال من فرستي وقعدت على النت لقيت لستو ادري كتبت عن الحلقة وهيا لسه شغّالة


ـــ هل يزعجك وجود نقد بمدونتك ؟ أم تشعر انه ظاهرة صحية؟
لأ هو ظاهرة صحية لما يكون الواحد عنده إمساك


ـــ هل تخاف من بعض المدونات السياسية وتتحاشاها؟ هل صدمك اعتقال بعض المدونين؟
لأ لأن علاء والشرقاوي وأكرم إعتقلوا عشان مظاهرات أمام نادي القضاة وخلفيات أخرى مش عشان هما مدونين الوحيد اللي إعتقل عشان التدوين كان خالد الذكر عبد الكريم وبصراحة كان أول مرة أحب أمن الدولة


ـــ هل فكرت فى مصير مدونتك حال وفاتك؟
بيتهيألي هاتفضل موجودة عند آخر تدوينة وهايجيلها زوار من خلال مواقع البحث

ـــ آخر سؤال : ما الاغنية التى تحب وضع اللينك الخاص بها فى مدونتك؟
أحسن أعمل لينك على أعز الناس

ـــ اكتب أسماء خمسة مدونين ليقوموا بهذا الاستقصاء بعدك
كل اللي في السايد بار ولسه ماعملوش

كفاية كده دوشتكوا بالكلام عن نفسي ومتشكرّين لكل اللي قدر يصمد لنهاية البوست وهابي بيرث

سيدة الحفلة

تعترف أميرة بينها وبين نفسها أن تلك السيدة كانت تفوقها جمالا وأناقة ساحرة وجاذبية خاصة
سيدة الحفلة .. قصة جديدة في

يوم في الغربة

الثامنة والنصف صباحا
أخرج من مصعد العمارة أقابل بكير حارس العمارة الإندونيسي الشاب ببسمته المعهودة
جود مورنينج سير
جود مورنينج بكير ، كيفك ؟ جوود ؟
طيب سير ، سير أنا فيه أقول مافي ُحرمة ييجي ؟
أقول في نفسي لو سمعتك بتقول ُحرمة عمرها ماهاتيجي

في العربية
سعودي بسيارته يقترب مني ويحرك يده بمامعناه أفتح الزجاج
كيف الأحوال يالحبيب ؟ عساك طيب
أنا ؟ أنا آه طيب ، أقصد الحمد لله
وين شارع المكرونة ؟
أصف له الشارع وأعيد النظر له فلقد لفت إنتباهي شيئ ، أكتشف أنه يضع قدمه اليسرى على التابلوه من دون حذاء بجوار فتحة التكيف ، أكيد بيبرد جسمه

الساعة الثانية ظهرا يدخل جورج زميلي اللبناني
سيد أحمد وين بدك تتغدي اليوم ؟
إبن حلال أنا جعان ، إيه رأيك النهاردة ناكل أكل صيني ؟
أوكي شو رأيك في الفوود كورت بالصيرفي موول
ماشي

في العربية مع جورج يتصل بزوجته ببيروت
كيفكم شو الأخبار اليوم
.......
ماشي الحال ، مافي قصف بجوار البناية
.......
مافيكي تنزلي ....... ديروا بالكم على حالكم

في الفوود كورت ، يقترب فرد الأمن
يالغالي هنا ممنوع الجلوس ، ممكن تجلسوا في هذا المحل
ليه ؟
هذا خاص بالعائلات ، وإنتم عزاب
بس أنا متجوز
جورج : خلاص ياأحمد مافينا نجلس هون ، تعال نجلس هونيك
هونيك .. هونيك ، هانعمل إيه يعني
هناك
تعرف ياجورج الأكل الصيني ده جميل أوي
آه .. منيح

في الرجوع للعمل وعلى كوبري التحلية يوني بول إعلان كبير مكتوب عليه نورت مصر
أنظر إلى مؤشر درجة الحرارة بالشارع الحرارة تلاتة وأربعين ، إذاعة بانورما إف إم بالراديو وإعلان عن السياحة يقول إستمتعوا بصيف السعودية
أذهب لمحطة البنزين يقابلني عامل أسيوي : خلاص مافي داحين ، َسّكر صلاة

تأتيني ماسدج من مراتي ، شفت ولادك ناموا إمبارح الساعة تلاتة ونص كانوا بيتفرجوا على فيلم وإسلاماه وكانوا مبسوطين جدا
أرد عليها واقول لها : جهاد .. إنتي فين ياجهاد

قبل نهاية العمل ، زميلي شريف المصري
هاتعمل إيه بالليل ؟
مش عارف
خلاص تعال نروح الكوفي شوب
أوكي الساعة عشرة بس أنا ماليش في البلياردو
إبقى هات اللاب توب معاك فيه هناك واي فاي

أتصفح جريدة الحياة
يلفت نظري تحقيق عن المدونين والبلوجرز اللبنانين وتأثير المدونات أثناء الحرب
صفحة أخرى كاملة إعلان يقول قبيلة قريش تجدد البيعة وترحب بالملك في الطائف

في الطريق للمنزل أقرر الذهاب ل جيان هايبر ماركت للشراء ، أرى إعلانا بالطريق يقول
تشرب ماتشرب .. عنك ماشربت ... الحكاية حكاية مزااااج
أتعجب ممن أعلن عن مشروب يسمى مزاج بهذه الطريقة اللبقة

في جيان ماركت ، في ركن الكتب والمجلات أجد كتاب شفرة دافينشي بسعر ثلاثين ريال وجميع أعمال دان براون
أتذكر فاروق حسني وأعضاء المجلس الموقرين ، ربنا يحميهم

في المنزل أفتح النت على مدونتي نضارة شمس لأفاجأ بأقصر تعليق على القصة الاخيرة المرآه من دكترة ، التعليق عبارة عن نقطة فلوستوب

الساعة التاسعة والنص مع شريف على التليفون
شريف كانسل معاد الليلة
ليه
عندي مغص جامد وبطني مقلوبة ع الآخر
ليه إنت إتغديت إيه ؟

أحلام

نمت ساعة العصاري والتليفزيون يدور على قناة الجزيرة وقصف بيروت والجنوب اللبناني وبعض المدن والقرى لأول مرة أسمع بإسمها لأستيقظ بعد فترة على مجموعة من الأحلام ، لم أستطع تفسيرها لأفرك عيني على إجتماع وزراء الخارجية العرب ليعلن لي أحدهم انها أحلام وردية وقبل ان استمتع بالتحليل فاجاني آخر أنها أحلام شيطانية

وبسبب هذا الإختلاف سوف يتم دعوة القمة العربية للإنعقاد العاجل لبحث إذا كان دعم المقاومة اللبنانية أحلام وردية أم أحلام شيطانية

أحلام إيه وزفت إيه ... بأه ده اسمه كلام ياعالم

لقد غرقنا في المهانة والذل وعواصمنا تدمر ، منذ ثلاث أعوام ومازال صوت المذيع يرن في أذني قصف العاصمة العراقية بغداد واليوم نفس المذيع جمال ريان بنفس الصوت الرخيم يقول قصف العاصمة اللبنانية بيروت

وبين هذا وذاك مازالنا مختلفين هل أحلامنا وردية أم شيطانية
------------------------------------

بحب الحياة عشان لسه فيها واحد فقط محترم له ثقله قادر يقف قدام إسرائيل في عصر العهر السياسي إسمه حسن نصر الله

جملة قلتها يوما ما في تدوينة ليه باحب الحياة في شهر مايو

تقرير شقير النصف سنوي

لو عرفنا نجمع شعب مصر في قرية صغيرة عددها مائة فرد سوف تكون الصورة كالاتي

عدد 51 فرد رجل والباقي نساء
عدد 23 فرد من القاهرة و8 من اسكندرية و9 من المنصورة
عدد 9 أفراد يملكون تليفون محمول منهم 7 كارت مدفوع مقدما
عدد 11 فرد مسيحي والباقي مسلم
عدد 4 أشخاص إخوان
عدد 11 شخص يشاهدون كأس العالم منهم 9 بطريقة غير شرعية
عدد 3 أفراد في سن العمل عاطلين عن العمل (إقرأ التحديث) آخر التقرير
عدد 23 فرد أمي يجهل القراءة والكتابة
عدد 6 أفراد يمتلكون 59% من ثروة المائة فرد
عدد 8 أفراد يمتلكون كومبيوتر منهم 6 يستخدمون الإنترنت
عدد 16 فرد شاهدو فيلم بوحة منهم 3 أفراد شاهدوه أكتر من مرة
عدد 9 أشخاص أدلوا بصوتهم في إنتخابات الرئاسة الأخيرة
عدد 4 أفراد مهندسين من تخصصات مختلفة
عدد 6 أفراد يعملون بالخارج
عدد 6 أفراد يمتلكون سيارة
عدد 18 فرد مدخن منهم 3 أفراد يدخنون شيشة
عدد 29 إمراة محجبة
عدد 20 فرد يعيشون تحت خط الفقر منهم 13 من صعيد مصر
عدد 5 نساء تخطين سن الزواج وأصبحن فوق ال35 عاما
عدد 1 إمراة مطلقة
عدد 1 إمراة حامل وآخر على وشك الوفاة
عدد 5 أفراد مثليين مابين رجال ونساء
عدد 1 فرد يعرف إسم وزير التعليم
عدد 18 فرد يعرفون إسم حارس مرمى الأهلي
عدد 8 أفراد أكلوا من ماكدونالدز
عدد 39 فرد عاصروا رئيس جمهورية واحد فقط
عدد 2 فرد يقرأ الجرائد اليومية بصورة منتظمة
عدد 34 أهلاوي و23 زملكاوي والباقي مالوش في الكورة
عدد 61 فرد لم يروا أهرامات الجيزة
--------------------------------------

المصدر جهاز شقير للتعبئة العامة والإحصاء : تقرير 2006 النصفي

--------------------------------------

تحديث : بناء على طلب الجماهير تم مراجعة عدد العاطلين وبعد فحص ومحص وتمحيص تم إكتشاف عدد ثلاث عاطلين أخريين متخفيين ليكون إجمالي العدد 6 أفراد ولايمكن الزيادة عن ذلك

رسالة إلى زوجتي العزيزة

بالنيابة عن جميع الأزواج عشاق كرة القدم أقدم هذه الرسالة إلى زوجاتهم

زوجتي العزيزة

إسمحي لي أن أقول لك ان كأس العالم دخل في الجد إعتبارا من اليوم فلم يعد هناك سوى أربعة أيام فقط اليوم 4 وغدا 5 يوليو ويوم 8 يوليو وأخيرا يوم 9 يوليو وبهذه المناسبة تقبلي تحياتي واليك التوجهيات الآتية

واحد : يجب أن تعرفي جيدا موقف الفرق الأربعة وظروف وصولهم وإن كانت معلوماتك ضعيفة فهناك صفحات الرياضة بالصحف ومواقع الإنترنت يجب ان تكوني على دراية كاملة إذا كنتي تريدين ان تدخلي في حوار معي لأن أي حوار آخر أو حوار ذو معلومات ضعيفة لن يجدي وسوف يقابل باللامبالة التامة ، ممنوع الشكوى

إتنين : خلال تلك الأيام التلفزيون لي وحدي وكل الوقت وليس وقت المباريات فقط بدون أي استثناء وأي محاولة لأخذ الريموت سوف تقابل بكل حزم ، ممنوع الهزار

ثلاثة : خلال المبارة مسموح بالمرور أمام التلفزيون طالما أنه سوف يكون بسرعة وفي مرات محدودة ، ويجب أن تعلمي ان هذا الوقت غير مناسب بتاتا لأي علاقات زوجية خاصة فتلك الدقائق سوف تكون عصيبة على الجميع

أربعة : خلال المباريات أنا مابسمعش ومابشوفش غير الماتش ومابتكلمش إلا إذا كنت عايز بيبسي واحد لتر ، فلا داعي للأحاديث العامة عن الاهل والأصدقاء والجيران واللي حصل في الشغل ، جرس التليفون والموبايل والباب من مسؤلياتك الكاملة خلال تلك الأيام

خمسة : فكرة جيدة ان تكون هناك في الثلاجة المشروبات الغازية والعصائر ولامانع من بعض الشيبسي والذي منه ، مافيش داعي لنظرات وايماءات بالوجه سواء إيجابية أو سلبية فهي بالنسبة لي سوف تكون كلها سلبية في المقابل سوف يمكنك استخدام التليفزيون في تلك الايام في الفترة من الواحدة صباحا وحتى السادسة صباحا شرط عدم وجود برامج رياضية في تلك الفترة

سته : أرجوكي ارجوكي أرجوكي لو شفتيني متضايق عشان أي فريق باشجعه ، من فضلك ممنوع التعليقات من نوعية ماتضايقش نفسك دي مجرد لعبة أو هما برده لعبوا كويس ، عشان لو قلتي كلام زي سوف تكون نتيجته زيادة كمية غضبي وضيقي أكتر ، وتذكري أنك لا تعرفي كرة أكثر مني

سبعة : مرحبا بك بالجلوس بجانبي خلال المبارة ومن الممكن أن تتحدثي معي خلال الإستراحة طالما أنه ليس هناك تحليل فني وطالما كانت نتيجة وأداء الشوط الأول مرضية بالنسبة لي ودائما تذكري أن وقت المبارة ليس مناسب تماما لفكرة قضاء وقت ممتع معا

تمانية : إعادة الأهداف مهمة جدا بالنسبة لي حتى لو إتعادت ألف مرة فلا يهم كم مرة شاهدتها فأنا أريد ان أشاهدها ثانيا وثالثا ورابعا ، بعد المبارة البرنامج الرياضي مهم جدا تماما مثل المباريات وهما بيعيدوا اللقطات المهمة ، همهمات من نوعية مش خلاص الماتش خلص أو مش إنت شفت الحاجات دي ، سوف تكون له آثار سلبية عليا وعليكي وعلى البيت

تسعة : مبارة تحديد المركز الثالث بالرغم إنها بين فرقتين مهزومتين وتحصيل حاصل إلا انها مهمة بالنسبة لي أهمية المبارة النهائية

عشرة : مع نهاية اليوم الأخير لا أريد سماع كلمات حمد وشكر من الله ان البطولة خلصت أو الحمد لله أن كأس العالم كل أربع سنين لأني سوف اكون في حالة مزاجية سيئة ، ولا تنسي أن بطولات أفريقيا للأندية على الأبواب

وختاما أتمنى لك وقتا ممتعا ، شاكرين حسن تعاونك معنا

المخلص للأبد

زوجك الغالي

---------------------

تحديث1

أندريا بيرلو والهدف الأول الدقيقة 119

أليساندرو ديل بيرو والهدف الثاني الدقيقة 121

والله وعملوها الرجالة ... الماتش اتسرق في آخر دقيقتين 119 ، 121 حيث لايمكن التعويض بصراحة الألمان كانوا زبالة بس شوفوا الجمهور مش مصدق .. والصورة بتتكلم

Yahoo الصور من
Copyright : Reuters

شكرا على الإفادة عن ظهور الصور من عدمها
------------------------------

تحديث2

فرنسا في النهائي بهدف زيدان من ضربة جزاء

----------------------------------------

آخر تحديث 9 يوليو 2006

شكرا زوجتي العزيزة تقدري دلوقتي تاخدي الريموت ، بس معلش هو ميت حتة

Hard Luck Barthez

Fabio Gross and the last goal along with the cup

مبروك إيطاليا

عايز تعرف مين اللي هاياخد كأس العالم؟

تعالى نحسبها

سنة 1994 أخدتها البرازيل وآخر سنة اخدتها قبل كده كانت سنة 1970
لو جمعنا 1970 + 1994 يطلع المجموع 3964

سنة 1986 أخدتها الأرجنتين وآخر سنة أخدتها قبل كده كانت سنة 1978

لو جمعنا 1978 + 1986 يطلع المجموع 3964

سنة 1990 أخدتها ألمانيا وآخر سنة أخدتها قبل كده كانت سنة 1974
لو جمعنا 1974 + 1990 يطلع المجموع 3964

وده يوصلنا إلى اللي حصل عليها سنة 2002

نطرح 3964 - 2002 يطلع الفرق 1962

يعني اللي حصل عليها سنة 1962 هو اللي اخدها سنة 2002

حصلت عليها البرازيل سنة 1962 وبالتالي عليها سنة 2002

معنى كده لو طرحنا 3964 - 2006 يطلع الفرق 1958
يعني الي حصل عليها سنة 1958 هو اللي هايحصل عليها سنة 2006

مين بأه اللي حصل عليها سنة 1958 ؟

.

.

.

.

البرازيل

--------------------------

إحكيها لعشرة عشان يجيللك خير وتسمع خبر حلو ، وإوعى ماتحكيهاش وتهملها عشان بيتك ممكن يتخرب والنار هاتولع فيه

--------------------------

تحديث السبت الساعة 11:55 مساءا : ههههههه منك لله ياتيري هنري
البرازيل خرجت

يافضيحتك ياشيخ علام

دافينشي كود



النسخة العربية

للتحميل نسخة أدوبي 14.2 ميجا إضغط هنا بس بالراحة

للتحميل نسخة أصلية باللغة الإنجليزيه أدوبي 1.38 ميجا إضغط هنا بس جامد

إسفوخس ع الرجالة

إسفوخس ع الرجالة ، هو الراجل له إيه غير كلمته ، الراجل طالع إمبارح بيحلف عليا الطلاق بالتلاتة مانا مرشح نفسي تاني مهما حصل وبيحلف بأغلظ الايمان إنه مش هايتنازل عن قراره تاني ، لدرجة ولدت عندي احساس انه إتجنن وبيتكلم بجد من كتر الحزق إنه مش هايرحش نفسه ورغم اقتناعي بأنها تمثيلية إلا أن الراجل أجاد الدور لدرجة إني شككت إني ممكن اصدقه ولكن قبل مرور ساعات وقف يحيي الجمهور الذي شجعه أثناء التمثيلية ويقولهم ياللا يالا منك له المسرحية خلصت إنتوا عايزين تحكموا ولا إيه ؟ يارعاع ده ماعملهاش الكبارة بتاعنا اللي قاعد هناك في أم الديمقراطيه قصدي في أم الدنيا يبقى عايزيني أنا أعملها .. ياللا ياأهبل منك له

بعد إذنكواأنا داخل الحمام أعمل زي الناس

-----------------------------

كتبت التعليق ده رداعلى تدوينة كذب رؤسانا .. وإن وعدوا في مدونة بصراحة ثم فضلت نشره هنا

يعقوبيان مدونا

على هامش فيلم رواية عمارة يعقوبيان تستطيع أن تكتشف الفرق بين عالم المدونين وبين والنقاد والصحفيين
فأنا أستمتع أكثر بقراءة المدونين حيث أجدها أكثر واقعية وغير تقليدية وزوايا كتابتهم متنوعة وأحيانا متفرده وغالبا متحررة عن الشكل النقدي التقليدي
في التدوين سوف تجد الإنطباعات التلقائية التالية

هى :هو الحشيش مش حرام ؟
هو :لا مش حرام...... استغفر الله ...هو لو حرام كنت شربته

من تدوينة ليتل مو... عمارة يعقوبيان كلاكيت تاني مرة


وامي مش قادره تغمض عينيها اتى الفاصل اللعين .. وكان الفاصل في البرنامج هو اعلان عن فيلم عمارة يعقوبيان .. وبدأت امي تتابع باهتمام .. وقلت خير .. لسه هاستجمع شجاعتي وافتح بقي واقولها "انا رايحة اتفرج عليه يوم السبت اللي جاي" مع اصدقائي وبدون اي شنب من العائلة خالص وقعدت اجهز خطبة عصماء مفادها اني كبرت واني امرأة حرة مستقلة واطالب بالاستقلال التام وحقي الدستوري في الذهاب إلى السينما بدون محرم
وقبل ما انبري في الخطبة .. وجدتها فجأة تقول تعليقا على الاعلان (ايه القرف ده؟؟؟ ازاي يجيبوا الحاجات دي كده؟؟
فانهارت كل صنوف المقاومة التي اعددتها بعد ان اكتشفت عبثية محاولاتي المسكينة

من تدوينة بلو ستون... شغل البتنجان للوصول لليعقوبيان


فمن الظلم أن نسمى هذا المسخ السينمائى باسم هذه الرواية الجيدة ، لم أكن أريد أن أقارن بين الفيلم والرواية وقد دخلت الفيلم بالفعل وأريد أن أشاهده كعمل مستقل عن الرواية ، ولكن ليس بيدى

من تدوينة أمير... عمارة يعقوبيان


حاجة جديدة : طريقة تصوير عادل امام أثناء استيقاظه من النوم شاعرا بدوار , أول مرة تحصل فى السينما المصرية - بجد مش هزار- طريقة معروفة عالميا و لكن أول مرة أشوفها فى فيلم مصرى

من تدوينة محمود... يعقوبيان فيلما


و بدأ عصر الفساد من خلال الطبقة البرجوازية الطفيلية التى ظهرت فجأة و سكنت العمارة و لا يدرى أحد من أين أتت ثرواتها و لكنها تملك الكثير من المال و السلطة الذى يمكنها من سكنى العمارة و الصعود لقمة المجتمع و إخفاء قذارتهم بغلاف دينى و إجتماعى أنيق

Egyptian Beauty - من تدوينة ميشو ... عمارة يعقوبيان

دي بلدنا واحنا عارفينها كويس...هذه الكلمة جاءت على لسان يوسف داوود المحامي وهو يشرح لزكي الدسوقي وكريستين الفرنسية عن وضع القانون والقضاء في البلد....لكم المتني هذه الكلمة فعلا...دي بلدنا واحنا عارفينها...عارفين انها بلد زبالة...وانها "مش عاوزة مهندسين...البلد دلوقتي عاوزة صيع"...عارفين انها بلد القوادين والشواذ

من تدوينة محمد محرز .. إحنا في زمن المسخ


الفيلم كان وايد رائع و حلو رغم انه الرقابه مشلخته و يستحق المشاهده و لكن انصح قراءة القصه علشان تعرفون اللي طافكم من الرقابه الموسيقى التصويريه كانت روعه

من تدوينة بلا نيلة ... عمارة يعقوبيان


الفيلم جامد كفيلم عربى كان معايا من اعز اصحابى محمد واخته منار( بلوجر منورة ) ومحمود و ثروة ( بلوجر عايشة وخلاص ) اللى بتوحشنا فى كل فترة بتغيب وترجع

من تدوينة محمد ياسر ... عمارة يعقوبيان


هند صبرى كانت بتمثل ويسرا كانت بتتصور ، هند صبرى كانت انفعالاتها أوفر أوى ، مفيش انفاعلات حقيقيه اوى كده ياختى ، و يسرا كانت عايشه ف دور النجمه ضيفه الشرف كانت جايه على انها "الممثله يسرا" خنقتنى الكام مشهد اللى ظهرت فيهم

من تدوينة ثروة ... عمارة يعقوبيان

فيه جمل كتير جامدة جدا ومعبرة جدا .. ومضحكة جدا
اما لو حضرتك سالتنى عن اجمد دور فى الفيلم فهو بلا شك يستحق اتنين ممثلين جامدين والباقى اغلبه كان بيلعب ادوار مش جديدة عليه الا هند صبرى
خالد صالح - خالد الصاوى
لتحميل ملف عمارة يعقوبيان اضغط على اللينك اللى تحت ياباشا .. اى خدمة
هنا الرواية

من تدوينة عبد الرحمن جادو ...عمارة يعقوبيان أكشن اول مرة


انت عارف ايه اللى بجد حرام حرام خالص يعنى ودى مافيهاش جدال الزنا .... أيوه الزنا ، إن راجل ينام مع واحده ست مش مراته وهى تكون متجوزه واحد تانى وتخلف من الاولانى وتنسبه لجوزها ، والزنا بقى حرام عشان منع إختلاط الانساب لكن إحنا حرام ليه ؟ ... الرجاله مابتخلفش ياعبده
أستاذ حازم(خالد الصاوى) ل عبد ربه(سقط منى اسم الممثل عفوا) فى محاوله من استاذ حازم(الشاذ جنسيا) بإقناع عبد ربه بأنه لايفعل شيئا يغضب الله

من تدوينة أم المريلة كحلي ... نظره - عمارة يعقوبيان

الشيخ صالح بيقول

عندما أعلنت قناة دريم عن برنامج في الممنوع مع الشيخ صالح كامل مش عارف ليه حاسيت إني هالاقي البرنامج مشفر، المهم في البرنامج الشيخ صالح كامل كان بيقول كلام غريب جدا بيخلي الواحد مش فاهم حاجة

الشيخ صالح بيقول

حقوق البث للعالم كان لشركة أنا مساهم فيها بنسبة عشرين في المائة قيمتها تلات آلاف مليون وكانت حصة مصر لإذاعة الماتشات تمنتاشر مليون يورو يعني مائة وستة وعشرون مليون جنيه

فيه عشرة مليون حرامي في مصر ولبنان من المقابر للأحياء الراقية بيتفرجوا بإسلوب غير شرعي

أنا قلت لمحمود سعد في البيت بيتك خليهم يبطلوا سرقة وأنا أرخص السعر

البورصة نظام طفيلي كان الغرض من تسييل أموال ، فيه شركة سعودية قيمتها كلهاخمسين مليون ريال وصل قيمتها في البورصة خمسة آلاف مليون وسبب كده الناس المغفلين

قارن نسبة الشيوخ اللي بيطلعوا من مصر بالنسبة للشيوخ السعوديين وإنت تعرف توجه قناة إقرأ

أنا فتحت قنواتي للفنانات المحجبات ولا أدري لماذا تمنع القنوات الأخرى ظهور المذيعات المحجبات

انا أكره كلمة إحتكار – ردا على سؤال مجدي مهنا ليه قناة إقرا بتحتكر عمرو خالد

أنا قدمت تليفزيون الواقع خمسة أيام في موسم الحج بدلا من السلوكيات الغير جيدة التي تتم على تلفزيون الواقع لبعض القنوات – مش برده قناة ع الهوا سوا بتاعت الإي أر تي هي أول من أذاع تلك السلوكيات

يظل الاعلام المصري هو القوي والمسيطر – مجدي مهنا حقنة قاطعه وقاله مسيطر على إيه؟

لا أعتقد أن هناك من يبيع دنيته بآخرته .- مجدي مهنا مافوتهاش قاله لأ فيه كتير

بتحب النادي إدفعله أنا قلبي ع النادي – ردا علي تشفير مباريات الدوري المصري

ياناس إدفعوا

عمري ماحسبت أموالي من كترها ومن عدم إهتمامي بها

------- حد فاهم حاجة -------

عموما انا باكتب البوست ده وأنا باتفرج على ماتش السعودية وأوكرانيا في البيت بالألماني على قناة إس إف تو ، بس مش عارف ده شرعي ولا حرام ، ربنا يكرمك ياشيخ إتفرجنا على ماتش السعودية بالألماني

رنات .. لوجوهات .. إتصل الآن

أحيانا يمكن معرفة شخصية الآخرين من شكل توقيعاتهم وأحيانا من ألوان ملابسهم وأحيانا أخرى من أنواع طعامهم فهل يمكن معرفة ذلك من رنات المحمول

لي صديق إكتشفت أن رنة الرسالة عنده صوت الرسالة المميز وعليه صوت أقرب لصوت فطوطة يقول ماسيدج .. جالك ميتين أم ماسدج ولست في حاجة أن أقول أنه دائما متوتر لايحب المفاجات ، وآخر شخصية رزلة تقليدية لايضحك للرغيف السخن بالرغم من انه يحمل أحدث الموبايلات إلا أن رنته هي الرنة السخيفة لتليفون البيت زمان ترن ترن .. ترن ترن ولا يغيرها أبدا حاجة تخنق، والآخر رنته عشرة بلدي بتاعت سهير زكي وهو بصراحة رجل مسخرة دايما تأتيه الرنة أثناء الإجتماعات الهامة علما بأن شكله جد جدا وأقرع وبشنب وملامحه قاسية جدا ، وهناك الرايق الصديق الدائم لإتصل الآن لتحصل على أحدث النغمات الذي من خلال جواله تستطيع أن تعرف التوب تونتي فهو كل يوم بنغمة فهذه مروة والأخرى هيفا والتالتة ماريا والرابعة بيلا والخامسة يالا بينا يالا، وهناك اللي عايز يتوب ومش عارف وده دايما حاطط سامي يوسف ، وهناك الصامت بطبيعته اللي عامله سايلنت على طول من غير فايبريشن وحتى الآن لاأدري كيف يعرف ان هناك مكالمة له عندما يخرج الموبايل من جيبه ليتحدث ، وهناك الناقم دائما وهذا فوجئت بأن رنته هي بلادي بلادي قبل أن يبدلها بأغنية شكله عامل عملة لإيهاب توفيق بعد الإنتخابات الأخيرة

وأخيرا سمعت نغمة سألت صاحبها عن إسمها قاللي دي حمادة يلعب ، هل لأحدكم تفسير عن شخصيته ؟

المرآه

بالرغم من أنها كانت تقف شبه عارية أمام مرآتها إلا أنها ليست على إستعداد أن تتعرى أمام نفسها

المرآه : قصة جديدة في نضارة شمس