Thursday, June 01, 2006

لقطات من حياتي


عام 1977
وبالتحديد يوم 30 مارس
إصحوا ياولاد إنتوا لسه نايميين
إيه بس ياماما ماإحنا لسه بدري
قوموا .. عبد الحليم حافظ مات
إيه .. ده كان في لندن بيتعالج وقالوا امبارح إن صحته اتحسنت
لاحول ولاقوة إلا بالله

عام 1978
الراجل ده باين عليه إتجنن .. ده هايروح إسرائيل فعلا
ماهوا مش معقول يكون هو صح وكل الدول العربية دي غلط .. ده كلهم هايقطعوا علاقتهم معانا
لأ ووزير الخارجية إستقال .. واضح فعلا إنه إتجنن

عام 1979
مدرسة الملك الكامل الثانوية بالمنصورة
انت في فصل إيه ياأحمد
أنا في اولى رابع
إنت عارف مين رئيس إتحاد الطلبة
واحد في سنة تالتة إسمه أيمن نور

عام 1980
أنا : مش عارف اعمل إيه ؟
أسامة : يابني انت بقالك أربع شهور بتمشي وراها كل يوم الصبح وإحنا رايحين المدرسة والسنة قربت تخلص
عادل : هيا ياأحمد بصراحة هالة بتاعت الثانوية بنات دي جميلة ، بس انا اسمعت إنها بتتكلم بالثاء
أنا : مش مشكلة، بس أناخايف أكلمها ، أنا كتبتلها جواب
ولم اكلمها ولم أعطيها الجواب

عام 1981
رأس البر وأنا في البحر
أحمد أخرج من المية ... نتيجة الثانوية العامة طلعت
وأنا جبت كام ؟
87 % جبنهالك من مجلس مدينة رأس البر
لم أخرج من الماء وهندسة اخدت يوميها من مجموع 80 % فقط

عام 1982
أول محاضرة .. في المدرج
دكتور عبده إبراهيم دكتور التكنولوجيا : عايز اقول لكم ياولاد إني بكيت مرتين في حياتي .. مرة لما ابويا مات والتانية لما إديت لطالب عندي جيد جدا
تقديرات دكتور عبده إبراهيم لاتخرج عن تقدير مقبول

عام 1983
بعد أسبوع من تكوين مايسمي في ذلك الوقت بالأسر الجامعية
إجتماع
هاني : ياجماعة إحنا كنا قررنا إن إسم الأسرة يكون الفايكينج، بس إحنا لازم نغير الإسم ده
محمد : ليه بأه
هاني : إمبارح نادي السينما عرض فيلم إسمه الفايكينج وطلعوا شوية حرامية وقراصنة
عصام : نسميها الإسم الأولاني .. أسرة الرحالة
أنا : نجوي فؤاد ليها رقصة بالأسم ده بتقول فيها رحالة ياناس رحالة
وظل الإسم الرحالة حتى التخرج

عام 1984
دقات والدي على غرفتي ويقول لي من خلف الباب
تعال ياأحمد إتفرج على التليفزيون .. المسلسل جه
أنا باذاكر يابابا
ماهوشوف بأه .. انا مابحبش التفوق .. يعني عايزك عادي لاخايب ولا تطلع الأول .. خليك حلو كده إحنا كلنا كنا في عيليتنا عاديين

عام 1985
في رحلة الأقصر وأسوان ، في الديسكوتيك بتاع الوينتر بالاس
أنا :أخدت بالك ياناجي والبت النمساوية بتولعلي السيجارة وإحنا بنرقص
ناجي : أيوه ياسيدي واخدتلك صورة كمان ، هو الجدع الصعيدي اللي معاهم ع الترابيزة ده كان بيقولك إيه
أنا : أبدا ميل عليا وقاللي جوم لاأضربك

عام 1986
في إستديو 42 إذاعة الخاص بالبرنامج الأوربي
كنت باسجل حلقة من برنامج ميوزك ماشين مع طارق شرارة ومحمد شبل بالإنجليزي
تدخل امال شعلان وتستأذن سريعا أنا ياجماعة مش هاقدر اقعد معاكوا لان معايا فلانة الفلانية تحت في استراحة دخول ماسبيرو
أنا : معقولة هيا معاكي طيب ليه مش بتطلع ؟ ( كنت أعرفها قبل كده بالمراسلات فقط ).ا
آمال : عشان ماتعاملش ليها تصريح
أنا : يعني إنتي متاكدة انها تحت دلوقتي
آمال : ايوه .. بتجري رايح فين؟
نزلت لقيت واحدة زي القمر ، وكانت أول مرة أرى فيها زوجتي

عام 1987
بعد عام من الصداقة لم اعترف لها بشئ
فلانة الفلانية : أحمد أنا عايزة أقولك حاجة .. فاكر مرة لما سألتني إني مرتبطة ولا لأ
أيوه : عشان كنت عايز اعرف أرآئك كانت نابعة عن تجربة شخصية ولا رؤية عامة وقولتيلي لأ بس ده كان من سنه ، بس إيه اللي فكرك ؟
هي : أبدا بس .. أنا ماكنتش ساعتها بقول الحقيقة
أنا : نعم .. إنتي بتتكلمي جد
هي : ايوه .. هو فيه إيه ؟ ماكنتش فاكرة إن الموضوع هايفرق معاك كده
أنا : إنتي مش فاهمة حاجة
هي : بس أرجو إن إحنا نفضل أصدقاء .. أنا باستريح في الكلام معاك دايما
أنا : إممم .. أكيد طبعا
ولم نتكلم لمدة عام

عام 1988
أصبحت أحمل لقب مهندس
القاهرة .. شارع بورسعيد
أنا : إنت متاكد إن هو ده الشارع
هاني : أيوه يابني .. ماليافطه أهي
أنا : أهوه ده رقم عمارتها .. يعني هيا فوق دلوقتي في المكان ده ، ياترى بتعمل إيه ؟
هاني : بقالنا ساعة ماشيين عشان في الآخر نشوف عمارتها .. طب وبعدين
أنا : عايزني أعمل إيه .. كفاية احس إني موجود في مكان قريب منها كده

عام 1989
ع التليفون
فلانة الفلانية : إزيك ياأحمد .. إيه الغيبة الطويلة دي
أنا : غصب عني .. إنت ماتعرفيش إنتي غالية عليا أد إيه
هي : إيه بس اللي محيرك .. تعرف اغنية لفايزة أحمد إسمها
حيران
أنا : لا والله .. أول مرة أسمع عنها
هي : ممكن طيب أغنيهالك ؟
صوتها حلو بالمناسبة
أنا : ياريت

حيران
حيران كده ليه يا حبيبي
زعلان
زعلان من إيه يا حبيبي
ولا تزعل ولا تحتار
وحياتك ليل ونهار
حبك أقوى من النار
صدقني صدقني صدقني

أنا : بحبك
هي : حمد حقيقي وأنا كمان .. ماعرفش إزاي انا ماكنتش واخدة بالي منك

عام 1990
ع التليفون من مصر لوالدي في المنصورة
أنا : بابا فيه بنت عاجباني ، وقالتلي إنها مش بتخبي حاجة عن مامتها ومامتها قالتلها إنها عايزة تشوفني ، فإحتمال يكون فيه حاجة
بابا : هيا حلوة ؟
انا : جدا ، هي في كلية الطب وباباهاومامتها تربويين وأخوها مهندس زي .. هما زينا يعني كده
بابا : روح ولايهمك .. وخليك واثق من نفسك انا وراك .. بس إنت عارف لو ماكنتش بيضة وحلوة لاإنت إبني ولا اعرفك
اول مرة يراها أبي كان يوم إحتفال قراءة الفاتحة ، قالي لو ماعجبتنيش مش هاأخبي
عندما رآها أبي إبتسم لي وضم يده ورفع الإبهام وقاللي طالع لأبوك .. سمعونا الفاتحة ياجماعة

عام 1991
يوم 17 يناير 1991
عسكري السكرتارية : حضرت الظابط أحمد
أنا : أيوه فيه إيه ؟
العسكري : حضرت الظابط إيهاب بيقولك إحتمال مايكونش فيه نزول النهاردة
أنا : ليه باه إنشاء الله ؟ ده النهارده حفل خطوبتي وحجزنا الباخرة وبعتنا الدعوات
إيهاب : ماأنا عشان كده بقولك .. إحتمال كبير تكون الحرب النهارده من حفر الباطن ، والجيش كله على اهبة الإستعداد
أنا : الله يخرب بيتك ياصدام .. طيب إحنا هنا في مصر والحرب في الكويت ، نقعد نعمل إيه بس ؟
وزوغت ورحت الفرح وقامت الحرب وأنا في الكوشة ودبلنا مكتوب عليها حتى الآن هذا التاريخ

عام 1992
أثناء تجهيز الشقة ، بعد كتب الكتاب وقبل الدخلة
هي : إنت ياأحمد ليه مصر إن إحنا نروح نودي الدولاب بتاع المطبخ في العربية بتاعت الشغل بتاعك باليل
أنا : عشان فرد الامن في الوقت ده مابيكونش موجود لانه لو موجود هايشيل هو معايا الدولاب ولازم اديله جنيه على الأقل وأنا ماعدش فيه في جيبي غير ربع جنيه بس
هي : بحبك

عام 1993
دار الحرب الإلكترونية
الرائد مجدي : القاعة لسه جديدة وده تاني فرح .. أنا معجب بيكم جداوعشان كده الليلة الأولى هاتقضوها عندي في جناح شهر العسل ..جناح فخم جدا .. والفرقة ومغني ومغنية من عندي كمان مجانا ، بس أنا ليا طلب
أنا : إنت تأمر
الرائد مجدي : ممكن نسمي تصميم الكوشة اللي إنتو إختارتوها على إسم العروسة ؟
في الكوشة
أنا : إسمه إيه المنولوجست الجامد ده اللي إنتو جايبينه ده ؟
هي : إسمه عادل الفار

عام 1994
يوم 30 مارس 1994
هي : أحمد إصحى .. أنا حاسة إني هاولد دلوقتي .. الطلق إبتدي
أنا : إيه .. يعني إيه .. أعمل إيه؟
هي : إهدى مافيش حاجة .. انا هاقوم البس وإنت كمان ويالا بينا ع المستشفى

مستشفى النزهة
الدكتور : هي فعلا على وشك الولادة ، قدامها حوالي ساعتين عموما إحنا هانتصل بالدكتور بتاعها
أنا : أعمل إيه ؟
هي : مالك مافيش حاجة إنت بس روح بالعربية هات ماما
في الطريق مع حماتي للمستشفى وهي وحيدة هناك .. كانت المذيعة تقول سوف نقضئ الساعة القادمة مع أغاني عبد الحليم حافظ بمناسبة ذكرى رحيله التى تحل اليوم
في المستشفى
مبروك جالك ولد .. هاتسميه إيه ؟
أشوفها بس الاول
أنا : مبروك .. جبتي ولد
هي : شكله حلو ؟
أنا : أيوه .. إيه رأيك نسميه عبد الحليم
هي : تهز راسها بالموافقة وتبتسم

عام 1995
في الشغل
المدير : أحمد أنا شايف إن عندك موهبة في التسويق عالية .. إيه رأيك تسيب الهندسة وتنضم لقسم البيع والتسويق وإنت عارف إنه أقوي من قسم الصيانة والجودة والحاجات دي
أنا : موافق
باي باي ... هندسة

عام 1996
هي : أنا زهقت .. أنا قرفت ... أنا مستحملة بس عشان العيال
أنا : ياعني أنا اللي مازهقتش .. ده كان يوم منيل .. انا هاسيب البيت وأغور في ستين داهية

عام 1997
هو : تحبي نروح تسهر في خيمة رمضانية ؟
هي : أيوه والنبي آه بس يكون فيها محمد فؤاد
أنا : خلاص نروح الخيمة بتاعت مركز التجارة العالمي
في الخيمة
هي : احمد مش إنت قلت إن فيها محمد فؤاد بس ، أمال إيه اللي جاب هشام عباس وعمر دياب وفارس ؟
أنا : ماعرفش أنا دافع على إنه محمد فؤاد بس .. تيجي نتصور مع عمرو دياب ؟
هي : ياللا

عام 1998
أنا : يعني إيه نبطشية في رعاية الطفولة بالليل ؟
هي : ده قرار جديد كل واحدة تاخد نبطشية يوم
أنا : هو إنتي بتاخدي كام ؟
هي : مية تسعة وستين جنيه
أنا : آه مش تقولي كده يادكتورة

عام 1999

هي : بصراحة بصراحة انا مش مستريحالك ومسيرك هاتقع ياأحمد وساعتها هاثبت للدنيا إني كان عندي حق

عام 2000
ليلة العمر
هضبة الهرم .. الإحتفال بالميلينيوم الحدث العالمي نمنا ع الارض مع آلاف من جنسيات مختلفة على موسيقى جان ميشيل جار وروحنا على صلاة الفجر .. يادوبك لحقنا علبة الزبادي .. كان رمضان

عام 2001
أغسطس - إستاد القاهرة - ماتش الاهلى وريال مدريد
أنا : مين ده اللي معاه الكورة ؟
مجدي : ده هييرا ياعم
أنا : الواد الأسود ده لعيب اوي هو اللي فيهم
مجدي : ده روبيرتو كارلوس
أنا : زيدان ده يامجدي ماعملش حاجة من اول الماتش ، مين اللي لعب الكورة بالراس ده
مجدي : راؤول جونزاليس
جووووووول ... الاهلي جاي جوول
أنا : هو ده المدرب بتاع الاهلى ؟
مجدي : أيوه لسه جاي مبقالوش أسبوع إسمه مانويل جوزيه
أنا : وماله عامل كده ليه ، ده شكله زي اللي بيلموا سجاير من الأرض

عام 2002
حازم صاحبي : تاريخ النهارده مافيكركش بحاجة؟
أنا : لأ إيه يعني ؟ النهاردة واحد وعشرين ستة ..إيه بالظبط ؟
هو : عيد جوازك يازفت

عام 2003

كأس العالم
في إحتفال بوصول كاس العالم الحقيقية 13 كيلو دهب ، حضره نجوم الكرة كنت اعرف بتوع زمان منهم زي فتحي مبروك ، طه بصري ، مجدي عبد الغني ، سمير زاهر ، حسام وإبراهيم حسن ، شوبير ، فاروق جعفر
إتصورت مع الكاس وشيلته .. وكان جنبي في صورة فاروق جعفر وفي التانية فتحي مبروك والتالتة حسام وإبراهيم
اللعيبة الجداد ماعرفهمش آخر عهدي بالنجوم كان حسام وإبراهيم لما كانوا أشبال وبيلعبوا جنب الخطيب

عام 2004
رسالة على الموبايل : أحمد وريت صورتك لأصحابي بيقولوا عليك أمور .. هو إنت فعلا كده ؟


عام 2005
أنا لمحمد صاحبي : فيه حاجة بقالي كام مرة عمال أقرا عنها إسمها مدونات أو بلوجز .. تعرف حاجة عن الموضوع ده
محمد : لأ
يوم آخر
أنا : بقولك إيه .. إنتي عندك بطاقة إنتخابية؟
هي : بطاقة إنتخابية ... لأ ماعنديش
أنا : طيب بكره تروحي القسم تطلعي بطاقة
هي : احمد إطلع من نافوخي الله يكرمك

عام 2006
على التليفون
أنا : تعرفي إنك جميلة أوي اوي اصلي كنت باشوف صورتك دلوقتي ع الكومبيوتر
هي : لو نعرف إن السعودية هاتخليك تقول الكلام الحلو ده ، كنا بعتناك هناك من زمااان

هاني صاحبي بتاع الجامعة ع التليفون من الكويت : فاكر يامنيل أيام الكلية والاقصر وأسوان وشارع بورسعيد ده إنتا
دوختنا
---------------------------------------------------
هذه كانت فلاشات عشوائية لسنوات عمر تعدت الاربعين .. إمبارح كان عمري عشرين

58 comments:

  1. دا رد اى كلام كدا عشان ابقى اول حد يرد بس ,,
    راجعة تانى
    ربنا يسامحك
    ولاء ,,
    لسة عمرى عشرين

    ReplyDelete
  2. كان نفسى اكون أول حد يعلق بس دايما القدر (لا يمنحنى دائما ما اتمناه حتى فى الاشياء البسيطه ..ماعلينا)... مش عارفة ليه اول ماقريت البوست افتكرت بيت شعر لفؤاد حداد مش فاكرة من اى قصيدة كان بيقول فيها " بس أنا اللى عجزت، وفرحت لما افتكرت انى حارجع زى زمان طفل صغير أتوه وأسال عن مطرح البيت الفيروزى البحرى..علمته بعصفوره ونخلة وحبل وجلاليب زرق ...." ياااااه جميل انك تعمل فلاش باك على سنين فاتت، على زكريات جميلةو أخرى فاصله، أشياء بسيطه وربما ساذجة، لحظات حزن وفرح وشجن، لحظات مهمه وأخرى عابره ولكنها بتفضل محفورة جوانا دايما....
    الجميل انك قدرت تستدعيها بكل طزاجتها و نضارتها، خلتنا كإننا كنا عايشين معاك فى اللحظة والزمن نفسه وكإننا كنا تحت نفس السما، وطبعا ده مش جديد عليك...
    أحمد تفتكر بجد العمر اتسرق غصب عننا يعنى فى غفله مننا ولا برضه بمزاجنا؟؟؟
    لسه بسال زيك .. مانا برضه امبارح كان عمرى عشرين ... من زمااااااااان...
    تحياتى ياباشمهندس وربنا يهون الغربه ويلم الشمل وياريت تفتكر تكتر من الكلام الحلو فى الغربه، وبعد ماترجع كمان...

    ReplyDelete
  3. جمييييل أوى يا أحمد
    ربنا يسعدك كمان وكمان

    ReplyDelete
  4. Time is on your side ..
    Go on ..
    :)

    ReplyDelete
  5. "ماهوشوف بأه .. انا مابحبش التفوق .. يعني عايزك عادي لاخايب ولا تطلع الأول .. خليك حلو كده إحنا كلنا كنا في عيليتنا عاديين"

    يخرب عقل حضرتك
    خفة الدم وراثة بقى في العيلة

    رائعة التدوينة الفلاشية
    رغم اني زعلان من موضوع باي باي هندسة.. الناس هتاحد عنا فكرة وحشة .. خللي الموضوع بينا يا اكسلانس

    تحياتي يا ابو عبدالحليم

    ReplyDelete
  6. بجد بوست تحفة
    من أجمل الحاجات في حياة الإنسان الذكريات
    إنت عارف أنا و بسبس كمان قعدنا فترة نتدرب في مبنى التلفزيون دة بحكم إن إحنا متخرجين من آداب قسم إعلام
    بجد ربنا يسعدك و يكرمك و يخليلك مراتك و ولادك و يخليك ليهم

    ReplyDelete
  7. بدايه أحب أهنيك علي البلوج الرااائع ده
    أنا ما قدرتش أكمل باقي البوستات السابقه لأن البوست ده خلاني لازم اهنيك الأول علي ذاكرتك وطريقه سردك الرائعه دي
    فكرة هايله وتعتبر مذكراتك
    الجميل فيها انها رجعتنا معاك لورا رغم اني لم أعاصر كل هذه الأحداث بس لنت نسيتني أنا عندي كام سنه وكبرتني معاك رغم اني لسه يادوب حامشي من سن العشرينات
    بس برضه باقول زيك امبارح كان عمري عمري عشرين وهو فعلا امبارح
    فكرتني ايه بس

    ReplyDelete
  8. بجد تدوينة رائعة وموحية جدا وبافكر اقلدك ممكن.

    ما اقدرتش اقرا الباقي قبل ما اكتب تعليق عالتدوينة المتنوعة الحلوة دي. ورغم اني فاضلي حبة صغيرين عالاربعين لكن ممكن اتامل حياتي واعمل فلاشات كده.

    ReplyDelete
  9. البوست ده حلو بجد
    بس مش عارف إنت إزاى فاكر التواريخ كده

    ReplyDelete
  10. العمر مش بالسن يا عم أحمد
    ربنا يديك الصحه والروح الحلوه دى على طول
    بس أنا عرفت السر فى روحك الحلوة دى والدك هى دى فعلاً الأبهات اللى تدى أمل فى الحياه
    لاقوم ذاكر ولا سيب الأتارى
    قوم يابنى شوف التمثليه يا سلام كده يطلع الواحد طبيعى
    اه ولا الجواز لازم العروسه تبقا بيضه وحلوه هى دى الناس الصح صحاب المزاج
    مش أبويا يابنى سيبك من الحلاوه الحلاوه مش كل حاجه
    أمال ايه كل حاجه المش أبو دوده
    أبهات تخنق يا جدع

    روح يا شيخ ربنا يكرمك

    ReplyDelete
  11. WAW..Thankyou..was very good snapes
    I live in USA for 20 years.and i miss my roots in Cairo but you bring nice memories
    thanks again
    leew27st@yahoo.com

    ReplyDelete
  12. بعد ان قرأت كلامك الجميل
    تمنيت جدا ان يصير عمري اربعين الان
    واكون قد انجزت في حياتي مثلك


    وان اتزوج من امرأة بيضا وجميلة


    واتخرج م الهندسة وابقي مهندس كبير

    وان ادخل الجيش صف ضابط علشان البهدلة

    واني اشتغل بمرتب كبير

    واسافر السعودية

    بساكتر حاجة عايزها تتحقق حكاية الجواز
    وخصوصا لو بيضا وزي القمر

    بسقولي سنة 99
    كان فيه حاجة تانية بجد ؟
    ولا هي اللي شكت كده

    ReplyDelete
  13. Very nice post, I like this blog very much

    ReplyDelete
  14. راجع لك تاني يا ملك

    ReplyDelete
  15. اجمل حاجة فى البوست ده يا احمد هو انه بيورى ازاى لازم الانسان يقدر يسترجع اللحظات او الفلاشات المهمة فى حياته
    فالانسان بدون ذكريات لا شىء
    اهنيك بشدة على البوست
    و ربنا يسعدك فى حياتك كمان و كمان

    ReplyDelete
  16. من البلوجات النادرة التى تستمتع بقراءة البوست وتستكمل المتعة بقراءة الردود على نفس البوست
    ظاهرة تتكرر مع احمد شقير فقط ومع
    عجبتنى اوى سنة ستة وتسعين
    واقعى جدا على الاخر

    ReplyDelete
  17. أشكرك على مشاركة اللحظات دى معانا

    ReplyDelete
  18. الجميل فيك يأحمد أنك عارف أزاي تصنع ذكرياتك يعني بتعرف تسجل اللحظة وتتمتع بيها لان بعد شوية خلاص هتبقي وراك .. كتير لما أون انا في لحظة حلوة أفكر نفسي وأقول أنا دلوقتي جوة الكادر يعني في الحدث نفسة تصدق انها بتفرق كتير بعد كدة وتلاقي نفسك فعلا شايف كل حاجة حلوة
    بالك ساعات تيجي الذكريات علي بال الواحد كدة في ليلة وهو قاعد مع أم العيال ونفضل نتكلم ونحكي .. وبتبقي ليلة زي الفل .. كلها كلام .. بس مش مهم
    تحياتي وتقديري

    ReplyDelete
  19. rabena yekhaleeko le ba3d dayman


    i like the 2 fights/doubting flashbacks

    i also liked the dr abdo one

    my father once told me about a doctor X (i don't remeber his real name)

    he used to say

    - el imteyaz lelah wa7do
    - dr X (himself) yegeeb gayed gedan
    -el talib el motafawek 3andy yegeeb gayed
    -el talib el kewayes yegeeb ma2bool

    gamda mesh keda?

    ReplyDelete
  20. ....بوست حلو حلو حلو حلو حلو حلو

    و ما ممكن اقول اي شي ثاني

    ReplyDelete
  21. اشطات عليك يا باشمهندس استمرررررررررررررررررررررررررررررررررررررررررررررررررررررررررررر

    ReplyDelete
  22. سلاما يا أحمد
    عموما انبسطت بمدونتك الظريفة، لكن اسمح لي بملاحظة في خصوص تدوينة الفلاشات هذه: الفكرة طريفة، لكن أستغرب من أمر واضح وهو غياب علاقتك (وأنت في سن تناهز الأربعين، وهو سن النبوة)بأحداث جسام. فما دمت تستحضر بعض ما عشته سنة 1978 في خصوص زيارة السادات إلى اسرائيل، فكيف غابت عنك انتفاضة الأقصى وانطلاقتها سنة 2000 وحادثة اغتيال محمد الدرة التي جابت العالم أجمع. أو ماعاشته فلسطين سنة 2002 على يد قوات شارون من اجتياح ومجازر وتدمير وحصار، والشارع المصري كان أكثر الشوارع العربية اهتياجا وانفعالا وتفاعلا مع هذه الأحداث؟ طيّب، وسنة 2003 التي عاش فيه العرب والعالم أجمع غزو العراق وما تبعه من مجازر ما تزال جارية إلى اليوم.
    هل بتقدمك في العمر صرت أقل اهتماما بما يجري حاوليك من أحداث جسام؟ أم ماذا؟
    مع التحية
    جُحَا.كُمْْ

    ReplyDelete
  23. حلو خالص الغوص في حياة واحد
    حسيت بالدفء وانا بشوف نضالك للحياة

    ReplyDelete
  24. ذكريات نختزنها للعمر الآتى
    ونتشبث بها رغم عدم احساسنا بقيمتها

    ReplyDelete
  25. الساعة دلوقت 3 وتلت بعد منتصف ليل يوم السبت..أو 3 وتلت من صباح يوم الأحد..

    الجو حرّ والبال أحر والفكر مولع ومش عارفة أنام والناس نيام... وعملت كل الحيل لأخفف حرارة الجو والجوف ومفيش فايدة.. بس عارف... بعد ما قرأت البوست الهايل والجميل و..و...و..و..و..و...إلخ ده بذكرياته اللي مليانة حنين، حسيت إني خدت دش -تاني- بس ساقع ومتلج بجد وبانفض المية عن شعري والهوا بيوصلني من البلكونة يتخللني وينعشني

    تصبح على خير بقى
    دلوقت هاعرف أنام

    (((:

    ReplyDelete
  26. الغالى شوقير
    تهنئة من القلب عشان انت من القلائل اللى نفدوا من مرض الألزهايمر اللعين
    كده بقى انا عارفاك من 1977 يعنى كونت أنا و الزملاء خطوط عريضة عن حياتك من أول ماكان عندك تقريبا حداشر اتناشر سنة
    اللى فهمتو انك من بيت طيب - حبيب
    قديم من أولى ثانوى و من المنصورة
    بتحب البحر و الموسيقىو عبد الحليم الكبير و الصغير و أخوه و بتحب مراتك شفت - بقينا عشرة عمر ازاى
    أوعدك بيقولوا اكتشفوا دوا جديد للزهايمر فى المانيا ان شاء الله لما يشتغل معايا هاحاول أعمل فلاشات زيك بس و النبى ادعيلى
    أنت جميــــل يا شوقير

    ReplyDelete
  27. بوست جميل يا احمد كالعاده

    بس انت عملت ايه شككتها فيك اكيد مش هتشك من نفسها كده؟

    باباك و مراتك شكلهم سكر قوي ربنا يخليهوملك

    ReplyDelete
  28. بسمه رقيقه اتحطت علي شفايفي و انا بتخيل حالتك و انت بتفتكر بالتاريخ و اليوم اول مره شفت مراتك و انت بتوصف جمالها و رقتها من يوم ما عرفتها و لحد بعد ما رُحت السعوديه .. و هعمل نفسي ماخدتش بالي من السنه اللي قطعتوا فيها ولا الخناقه بتاعة كان يوم اسود و انا هغور ف داهيه و الكلام الفاضي ده لان دي بهارات الحياه .. ربنا يديم سعادتكم يا رب ..

    لما انت اخدت ث ع انا كنت لسه بيبي عمري ايام .. بس انت بقيت مهندس و انا بقيت مهندسه .. ليا الشرف أكيد اني بقيت زيك ف حاجه ..

    كنت زميل أيمن نور و غني ف فرحك عادل الفار و شلت كأس العالم .. محطات لذيذه و مميزه ..

    خاااااالص تحياااااااااتي يا باشمهندس !

    ReplyDelete
  29. ياااه
    الفلاشات و الذكريات دى كلها
    الواحد يتمنى انه يعيشها بجد
    خليت الحياه حلوة فعلا يا شقير
    جميله جميله جميله
    بجد ربنا يسعدك اكتر و اكتر

    ReplyDelete
  30. أحمد

    نادرا
    ونادرا جدا
    ما تجد انسانا قانعا حامدا شاكرا نعم ربه
    لهذا تجد هذه الصفحة وقد امتلات لك بالدعوات
    ليديم الله عليك نعمة حب الأسرة والرضا عن العمل

    أكثر ما كتبت تصديقاً ورقة فى نفس الوقت علاقتك بزوجتك, وأكثره غرابة انك قلت للهندسة
    باى باى
    بكل سهولة
    أشعر انها لعنة لا يمكن الخلاص منها ولا حتى بالتسويق

    آخر حاجة

    عايز تفهمنا ان ابنك اسمه عبد الحليم

    احلف
    :)

    ReplyDelete
  31. باشا صباح الفل
    1980
    1986
    1987
    1988
    صورة كربون

    لسه 89 فى الطريق انشاء الله
    مع اختلاف الاحداث طبعا

    بس سؤال برئ ليه من 1996 وانت جاى فى الطريق محدش شافك متنرفذ مرة

    بالمناسبة اخبار البت النمساوية ايه؟

    ReplyDelete
  32. تدوينة رائعة .. بتفكرني برؤوف توفيق ومحمد خان في فيلم زوجة رجل مهم .. واستخدم الاتنين في الفيلم دة نظام الفلاشات الزمنية اللي انت عملته دة.. بس استخدام سينمائي بحيث يكون كل فلاش من دول مترتب على التاني ..

    ReplyDelete
  33. تدوينه جامده موووووووووووووووووت
    ممكن بس اعرف فرق السن بينك و بين مراتك ؟ و هل فرق السن ممكن يسبب مشاكل؟
    فى انتظار المزيد

    ReplyDelete
  34. رائع يا احمد انت عرفت تلملم المواضيع دى ازاى على بعضها كدة مرة واحدة
    احيييك واللة

    ReplyDelete
  35. جامدة بجد
    انت تحفة

    ReplyDelete
  36. يخرب بيتك يا صدام




    مت عليها من الضحك
    *^___^*



    الله يعطيك طولة العمر وتكتب عما بعد الأربعين

    :P

    ReplyDelete
  37. يعني أبوك عايزك عادي, يعم ابعت أبوك عندنا شوية يقنعه بلا تعليم بلا وجع دماغ
    ==
    ألا من الحق إنتا طلعت منصوري زي حالاتي

    تعيش المنصورة نعيش تعيش

    ReplyDelete
  38. التمانينات دى من اروع العقود التى مرت فى حياتى وده مش كلامى ده كل العالم بيقول كده ده حتى فى امريكا بيسموها ليجند اوف ايتيز..شكرا رجعتنا لايام حلوه/هيثم

    ReplyDelete
  39. salam Mr Ahmed!

    a wonderful post indeed!

    Life goes on with it's rejoices and bitterness...yet we have to have control over it!!

    Thanks for your comment on my blog..wishing to be in contact!!

    :)

    ReplyDelete
  40. yaaaah , begad mosh 3aref a2ool eih, 7abeet elblog, awy, ana mawaleed 83 bas bardo faker in ibn 3amety kan betgawez 17th jan 1991 , we same time ibn 3amy mat fi iraqi army , ba3d 3 seneen ma ne3rafsh 3anoh 7aga
    thanks for the blog

    ReplyDelete
  41. أنا مش هأقدر أضيف كلام أكتر من الناس الحلوين قالوه..بس طبعا لازم أقول أنه بوست عبقري عبقري من هنا للسعودية!
    وبصراحة اتبسطت قوي أنك ياأستاذ أحمد طلعت منصوري.. أنا برضه قلت خفة الدم والمخ الحلو ده لازم يكون من بلدنا تحياتي وربنا يهون عليك غربتك وترجع لها ولهم ولنا كلنا بألف سلامة

    ReplyDelete
  42. أنا محمد هشام اللي كاتب التعليق اللي فوق ده.. مش عارف المدونة بتاعتك مش راضية تخليني أكتب اسمي ليه مع أننا بلدياتي والله!

    ReplyDelete
  43. مدونة تحفففففففففة ... رائعة رائعة رائعة .. من اجمل المدونات اللي شوفتها على الاطلاق بجد
    رائع فعلا ان الواحد يفتكر ذكرياته .. وتبدأ الذاكرة ترجع بيه لايام الطفولة وبعدين يتدرج كدا على كل المراحل
    كل التحية ليك على المدونة الهايلة دي

    ReplyDelete
  44. شقير وحائل منصوراوية..




    زيييييييييييي!

    ReplyDelete
  45. ذكريات جميلة جدا .
    تسلم إيديك .

    ReplyDelete
  46. موش خايف الناس تحسدك يااحمد؟

    ReplyDelete
  47. حلو قوي البوست ما تيجي تعمله تاج
    كنت عايز استعير شخصيتك الافتراضية عشان ماتش بين المدونين ولما فكرت في الحكم ما لقيتش غيرك ياريت توافق؟

    ReplyDelete
  48. anonymous
    يارا
    قلتي راجعة تاني وفات أسبوع ولا حس ولاخبر

    بعدك على بالي
    جميل بيت فؤاد حداد أوي ، إستعداء تلك الفلاشات لم يكن صعبا فهي دائما حاضرة ، العمر ماتسرقش ولاحاجة فهو لايقاس بالزمن بقدر مايقاس بالحظات الحلوة فيه وإذا كانت قليلة فطالما في العمر بقية نقدر نخلق لحظات جميلة بس لازم نصر على كده

    nefertiti
    فكرة الفلاشات دي جت ليا مرة واحدة فجأة وكتبتها بدون أي تعديل خالص

    lilli
    إنتي اللي جميلة وأفكار بلوجاتك بتعجبني كمان

    change destiny
    فعلا زي مابتقولي ، الوقت في صالحنا وإسمك المستعار بيدل كمان على التحدي ده

    النوبي
    إحنا بصراحة مبسزطين إن جمهورية أسوان عجبها الفلاشات دي .. شد حيلم وإعمل لنا حاجة زيها

    who walks alone
    بصراحة تعليقك عن الوالد خلاني أفكر في بوست للطرائف بتاعته بصراحة أصل مواقفه لاتعد وماذكرته كان القليل جدا
    متشكرين جدا على التنويه على التدوينة دي في محرك تدوين بصراحة انا كنت سعيد جدا وكفاية إن تدوين دوت كوم أول مكان أعلنت فيه عن مدونتي
    صدقني لم أندم على باي باي هندسة

    taty
    موضوع الإذاعة ده موال لوحده إحساس جميل أنك تتكلمي في الأستدويو أما الميكروفون حدث هذا معي في بنامجين بالبرنامج الأوربي واحد إسمه ميوزك ماشين والتاني إسمه كلوب تونتي وان .. كانت أيام جميلة

    goga
    ماكنتش متوقع إن فكرة الإستعادة للماضي بطريقة الفلاشات هاتحوز الغعجاب زي ماحازت إعجابك وفعلا ماكنتش متوقع إنها ممكن تخليكي تعيشي معاها
    سعيد بزيارتك وإعجابك ولنا في مدونتك لقاء

    hanouma
    صديقتي من التقيت بها في الإجتماع التخيلي بتاع كريم ، صدقيني فكرة حلوة وطالما أنك قريبة من هذا العمر فأكيد لديك زخيرة جيدة من الفلاشات ممكن استعادتها

    ماشي الطريق
    التواريخ مؤثرة جدا في حياتي واللحظات الحقيقية لايمكن نسيان وقت حدوثها

    shady
    أنا باتذكر له مواقف مستغربها لغاية دلوقتي ، بصراحة متذكر له حاجات زي إني افجا وأنا وأصحابي في الأودة مثلا بيخبط عليا وألاقيه عامل لينا شاي مثلا أو مثلا بيخبط عليا ويرش عليا بارفان ويقول عشان ريحتك وسط اصحابك تكون حلوة

    ahmedalsaeed
    الله يبارك فيك أنا فعلا إتخضيت لما قلت إنه هو توشيبا لدرجة إني شكيت في اللي جانبي في الكوفي شوب وبصيتله وكنت عايز أقوله إطلع من دوول ياسيد ياكرع إنت احمد السعيد
    لأ بصراحة عرفت منين
    كمان إنت بتديني إحساس جميل لما اعرف إن فيه حد بياخد باله من الكتابة بتاعت تعريف المدونة ، كل مابيجي على بالي حاجة باكتبها
    هو إنت في الجيش شد حيلك يامعلم وخليك كنجي أحسن إو تكون برنجي
    أما موضوع البنت فبصراحة أشك يعني جاي دلوقتي تقول بعد ماسافرت

    ali ... usa
    إحنا اللي متشكرين على مرورك .. عشرين سنة في أمريكا ياراجل .. وقدرت عموما خليك هناك كل ماكلم حد دلوقتي يقوللي إوع ترجع الستارة سودا

    mohammed
    عندك حق الكلام الحلو زي مابتقول بقى زي المية

    sha3'af
    والله ماعرف حاجة عن المسابقة بتاعت أول واحد يعلق عموما الجايزة هاتكون بوسة اما نشوف مين هايعلق الاول بعد كده
    خلتيني آخد بالي إن الفلاشات متنوعة الحالات فعلا ، وخلتيني كمان من كوكب المريخ
    فقرة 84 دي كانت نوع من أنواع الإشفاق من والدي عليا في المذاكرة وده من كتر حبه لي

    admalmasry
    شكرا على تعليقك بس أنا على فكرة كنت ظابط مش صف ظابط الصف ظابط ده بيكون الأومباشي والشاويش والصول
    أما سنة 99 فامفيش دخان من غير نار

    abdelhalim
    شكرا على مرورك وتعليقك ، على فكرة إسمك حلو أوي

    abo shanab
    مارجعتش تاني ولا حاجة ، مع إن العنوان مايتوهش

    hesham
    كلامك مظبوط وأتفق معاك فيه يالله شد حيلك وجمع فلاشاتك

    أم المريلة كحلي
    فلاشاتي فلاشاتك الفلاشات دي بتاعتنا كلها
    شكرا على مرورك والجماعة زي مابتقولي كده

    adhm
    تعليقكم أخجل تواضعنا ، أشكرك على هذا الإثناء .. وسنة99 كانت فعلا كده

    maxxed' out
    وأنا أشكر مرورك .. وبصراحة اكيد عندك حكاوي كتير من باريس أنا لو مكانك مابطلش كتابة على اللي باشوفه

    صباحك سكر
    ماتفكرنيش ده كان يوم .. الإنذار لصدام كان نهايته يوم خمستاشر يناير والحرب ياكانت ستاشر ياسبعتاشر وطلعت سبعتاشر والجيش حالة طوارئ عشان الأستاذ صدام .. هههه كان شكله عايز يفركش الجوازة

    زبادي
    إنت جبت المفيد إزاي الواحد وهو بيعيش اللحظة الحلوة مايمرش عليها مرور الكرام وإزاي ياخد باله منها ده بيدي لحياته طعم ومعنى كبير

    kareemfromegypt
    عجبني وقوفك عند الخناقة والشك .. حاجات زي دي ماتعديش عليك انا عارف دايما بتمسك حاجات مستخبية ، اما دكتور إكس ده فبصراحة يعقد
    الإمتياز لله وحده ، بصراحة عنده حق

    tara
    بصراحة يادكتورة تارا إنتي اللي حلوة بجد

    anonymous
    إشطات عليك إنت يالورد

    johacom
    بصراحة ماذكرته عندك حق عن جنين والدرة وغيره بس أنا مدونتي يمكن لها طبع ساخر إجتماعي شوية وماذكرته اعتقد ان هنا ليس مجاله ولكن هناك مواقع اخر تناقش ذلك بتعمق ومتنساش إن جبت سيرة السياسة سنة تمانية سبعين في موت السادات وسنة الفين وخمسة عن الإنتخابات أما اللحظات السياسية فدي ممكن تكون فكرة لتدوينة اخرى إيه رايك تكون عندك ؟
    شكرا لمرورك

    كوم الضبع قرية مصرية
    إحساسك بالدفأ أسعدني ولو إن الحرارة إتنين وأربعين النهاردة
    شكرا لتعليقك

    أبو أمل
    الجملتين بتوعك في الصميم ولخص الهدف من التدوينة .. المختصر المفيد

    doaa samir
    تعليقك بصراحة كما هو معتاد منك غير تقليدي أسعدني جدا جدا وأحلام سعيدة يادعاء وتصبحي على خير

    تمر حنة
    صدقيني مافيش أحلى منك يادكتورة ، واستخلاصك في محله ، قال حبيب قال ربنا يسامحك عموما عندي دوا للزهايمر يجنن سيبك من بتاع ألمانيا الدوا ده هاينسيكي الدنيا وساعتها هاتقدري تكتبي أحلى فلاشات

    bosbos
    يعني إنتي سيبتي كل السنين وجيت على موضوع الشك ده ، عموما قلب النساء دليلهم وماقدرش أقول أكتر من كده

    romantic rose
    فعلا أجمل لحظات الحب هي بدايتها وأول مرة تم الإعتراف بيها ولايزال الإثنان يتبادلان الحب طالما بعد سنوات مازالا يسترجعا تلك الذكريات
    أما ماقلتيه عن الخلاف فهو فعلا بهارات الحياة
    أول مرة أعرف إنك مهندسة أصل بتوع هندسة بصراحة مش بالرقة بتاعتك

    manora
    كتير أوي عليا إنك تقولي إن الفلاشات دي تخلي الواحد يحب الحياة ، شكرا يامانورا وشكرا على إضافة لينك المدونة

    حلم
    هاها .. والله إسمه عبد الحليم
    تاثرت بكلامك عن دعوات الاخرين لي بصراحة حاجة مؤثرة جدا ان يجد الواحد هذا الحب عندكم .. ششكرا ليكم كلكم
    ومنتظرين فلاشاتك

    taher
    مادام سنين الكلية كوبي وباست يبقى مبروك هاتجوز واحدة بيضا وحلوة
    بتتكلم عن النرفزة لعلمك أنا عصبي جدا بالرغم من أنه يبدو غير ذلك
    أما البت النمساوية فلسه فاكرها كان إسمها إنكا وكان كتلة جمال .. منه لله الواد الصعيدي اللي كان معاها

    قلم جاف
    رؤوف توفيق ومحمد خان حتة واحدة
    عموما ملاحظة أشكرك عليها ياكبير . انا ماخدتش بالي إلا لما قلت

    anonymous
    بتسألني فرق السن ممكن يعمل مشاكل بين الزوجين ، ردي إلا حد كبير آه إلا إذا كان بينهما تفاهم وحب كبير وتقارب في أشياء تانية كتيرة ، عموما أنا الفرق بيني وبين زوجتي كبير خالص واكيد باين من التواريخ .. هاجيب من الآخر هما أربع سنين بس

    rubyaldaly
    شكرا على تهنئتك ، عرفت ألمها لأني عايشها دايما ومش بانساها

    geronimo
    ميرسي ياسمسنة .. بس ماقلتليش تحفة إزاي يعني ؟

    نون النساء
    كل يبكي على ليلاه .. إنتي كمان وقفتي عند موضوع صدام .. اهو ربنا إستجاب وخرب بيته ومتوله عياله وسجنه وصوروه بالأندر وير عايزة إستجابة اكتر من كده إيه

    حائر في دنيا الله
    على اد مالواحد بيحب مصر في الغربة على أد ماأنا بحب المنصورة .. لسه لغاية دلوقتي لما بازورها باروح أمشي عند مدرستي الإبتدائي

    anonymous
    فعلا التمانينات أحلى فترات حياتي حتى في البروفايل بقول إني باحب أحلي اغاني التمانينات أو الجولدن إيتيز

    epitaph
    شكرا على كلامك الرقيق ومرورك .. اعجبني جدا ردك في نضارة شمس وسوف اعلق عليه بالتفصيل
    دايما متواصلين

    سيد العارفين
    شكرا لمرورك ، وتأثرت لموضوع إبن عمتك لأني كان ممكن اكون بداله
    تحياتي وشكرا لمرورك

    anonymous
    محمد هشام
    مش عارف ليه مش عارف تكتب إسمك بدل الانينوموس بس عموما شرفت المدونة ياجميل ومتشكر كلامك الحلو

    &heba&
    الكلام ده كبير أوي ياهبة عليا ، انا فعلا متشكر ليكي جدا ونتواصل دايما

    قلم جاف
    مش شقير وحائل بس اللي من المنصورة إنت لو دورت هاتلاقي كتير

    abdoubasha
    تسلم إيدك إنت وسفره دايما .. وهنيا يامعلم

    sarwa
    هاهاها .. ربنا موجود هو اللي بيحمي ياثروة

    هوميروس
    أنا موافق ومن هنا دعوة لجميع المدونين لكتابة فلاشات عن حياتهم بأي طريقة تحلو لهم ونحكم في الآخر


    أشكر الجميع على مشاركتهم في التعليق وخصوصا إني بعد ماكتبته ماكنتش ناوي أنشره لما فيه من خصوصيات ولكني فكرت وقررت النشر ولم أتوقع هذا السيل الجميل من التعليقات الحافلة بالحب
    تحياتي

    ReplyDelete
  49. اعزائي المدونين انا مدونه جديده
    خذو بيدي و النبي

    ReplyDelete
  50. قطعة من الأدب التلقائي الجميل اندمجت فيها حتى النخاع

    أحيانا تخونني الكلمات فلا يمكنني التعبير عما أشعر به

    ولكني رأيت لمحات من حياتي في حياتك


    د.أحمد عمارة
    اسكندرية

    ReplyDelete
  51. كل سنة وانت طيب

    ReplyDelete
  52. جميل.. رائع.. عبقري.. غير عادي
    كل سنه و انت طيب

    ReplyDelete
  53. باشمهندس : عجبني الكلام جدا
    يمكن لاني نفس السن وتقربيا الاحداث اللي بتمر علينا بنتفاعل معاها بنفس الطريقة
    انا كنت في تانية اعدادي لما مات عبد الحليم وكان صدمة ولميت الصور والبوستر اللي فيها اغانية ومحدش كان قادر يكلمني اكن حد من العايلة راح.
    والدنيا مرت والسنة الجاية 30 سنة تمر
    علي ذكري عبد الحليم .... عمر واللة

    علي فكرة انا اول مرة اكتب في الاختراع دة ....بس كلامك بيعجبني

    هبة الله

    ReplyDelete
  54. عجبني قوي موضوع الجوازة لاني من عشاق الحب من اول نظرة

    ReplyDelete
  55. أستاذ أحمد .. إسمحلي أقولك أستاذ أحمد :) .. دي تاني مرة بصراحة أدخ المدونة بتاعتك ..و أنا بجد سعيد إني عرفت حد زيك .. حلوة قوي التدوينة دي ربنا يخليلك الزاكرة

    ReplyDelete
  56. آآه و نسيت أقوللك إنك لسة عمرك عشرين .. :)

    ReplyDelete
  57. روعة

    I'm overwhelmed with emotions & memories now.

    Thanks

    ReplyDelete
  58. انت طلعت رومانسي اوي

    انت صحيح سميت ابنك عبد الحليم

    ReplyDelete