لقطات من حياتي

عام 1977
وبالتحديد يوم 30 مارس
إصحوا ياولاد إنتوا لسه نايميين
إيه بس ياماما ماإحنا لسه بدري
قوموا .. عبد الحليم حافظ مات
إيه .. ده كان في لندن بيتعالج وقالوا امبارح إن صحته اتحسنت
لاحول ولاقوة إلا بالله

عام 1978
الراجل ده باين عليه إتجنن .. ده هايروح إسرائيل فعلا
ماهوا مش معقول يكون هو صح وكل الدول العربية دي غلط .. ده كلهم هايقطعوا علاقتهم معانا
لأ ووزير الخارجية إستقال .. واضح فعلا إنه إتجنن

عام 1979
مدرسة الملك الكامل الثانوية بالمنصورة
انت في فصل إيه ياأحمد
أنا في اولى رابع
إنت عارف مين رئيس إتحاد الطلبة
واحد في سنة تالتة إسمه أيمن نور

عام 1980
أنا : مش عارف اعمل إيه ؟
أسامة : يابني انت بقالك أربع شهور بتمشي وراها كل يوم الصبح وإحنا رايحين المدرسة والسنة قربت تخلص
عادل : هيا ياأحمد بصراحة هالة بتاعت الثانوية بنات دي جميلة ، بس انا اسمعت إنها بتتكلم بالثاء
أنا : مش مشكلة، بس أناخايف أكلمها ، أنا كتبتلها جواب
ولم اكلمها ولم أعطيها الجواب

عام 1981
رأس البر وأنا في البحر
أحمد أخرج من المية ... نتيجة الثانوية العامة طلعت
وأنا جبت كام ؟
87 % جبنهالك من مجلس مدينة رأس البر
لم أخرج من الماء وهندسة اخدت يوميها من مجموع 80 % فقط

عام 1982
أول محاضرة .. في المدرج
دكتور عبده إبراهيم دكتور التكنولوجيا : عايز اقول لكم ياولاد إني بكيت مرتين في حياتي .. مرة لما ابويا مات والتانية لما إديت لطالب عندي جيد جدا
تقديرات دكتور عبده إبراهيم لاتخرج عن تقدير مقبول

عام 1983
بعد أسبوع من تكوين مايسمي في ذلك الوقت بالأسر الجامعية
إجتماع
هاني : ياجماعة إحنا كنا قررنا إن إسم الأسرة يكون الفايكينج، بس إحنا لازم نغير الإسم ده
محمد : ليه بأه
هاني : إمبارح نادي السينما عرض فيلم إسمه الفايكينج وطلعوا شوية حرامية وقراصنة
عصام : نسميها الإسم الأولاني .. أسرة الرحالة
أنا : نجوي فؤاد ليها رقصة بالأسم ده بتقول فيها رحالة ياناس رحالة
وظل الإسم الرحالة حتى التخرج

عام 1984
دقات والدي على غرفتي ويقول لي من خلف الباب
تعال ياأحمد إتفرج على التليفزيون .. المسلسل جه
أنا باذاكر يابابا
ماهوشوف بأه .. انا مابحبش التفوق .. يعني عايزك عادي لاخايب ولا تطلع الأول .. خليك حلو كده إحنا كلنا كنا في عيليتنا عاديين

عام 1985
في رحلة الأقصر وأسوان ، في الديسكوتيك بتاع الوينتر بالاس
أنا :أخدت بالك ياناجي والبت النمساوية بتولعلي السيجارة وإحنا بنرقص
ناجي : أيوه ياسيدي واخدتلك صورة كمان ، هو الجدع الصعيدي اللي معاهم ع الترابيزة ده كان بيقولك إيه
أنا : أبدا ميل عليا وقاللي جوم لاأضربك

عام 1986
في إستديو 42 إذاعة الخاص بالبرنامج الأوربي
كنت باسجل حلقة من برنامج ميوزك ماشين مع طارق شرارة ومحمد شبل بالإنجليزي
تدخل امال شعلان وتستأذن سريعا أنا ياجماعة مش هاقدر اقعد معاكوا لان معايا فلانة الفلانية تحت في استراحة دخول ماسبيرو
أنا : معقولة هيا معاكي طيب ليه مش بتطلع ؟ ( كنت أعرفها قبل كده بالمراسلات فقط ).ا
آمال : عشان ماتعاملش ليها تصريح
أنا : يعني إنتي متاكدة انها تحت دلوقتي
آمال : ايوه .. بتجري رايح فين؟
نزلت لقيت واحدة زي القمر ، وكانت أول مرة أرى فيها زوجتي

عام 1987
بعد عام من الصداقة لم اعترف لها بشئ
فلانة الفلانية : أحمد أنا عايزة أقولك حاجة .. فاكر مرة لما سألتني إني مرتبطة ولا لأ
أيوه : عشان كنت عايز اعرف أرآئك كانت نابعة عن تجربة شخصية ولا رؤية عامة وقولتيلي لأ بس ده كان من سنه ، بس إيه اللي فكرك ؟
هي : أبدا بس .. أنا ماكنتش ساعتها بقول الحقيقة
أنا : نعم .. إنتي بتتكلمي جد
هي : ايوه .. هو فيه إيه ؟ ماكنتش فاكرة إن الموضوع هايفرق معاك كده
أنا : إنتي مش فاهمة حاجة
هي : بس أرجو إن إحنا نفضل أصدقاء .. أنا باستريح في الكلام معاك دايما
أنا : إممم .. أكيد طبعا
ولم نتكلم لمدة عام

عام 1988
أصبحت أحمل لقب مهندس
القاهرة .. شارع بورسعيد
أنا : إنت متاكد إن هو ده الشارع
هاني : أيوه يابني .. ماليافطه أهي
أنا : أهوه ده رقم عمارتها .. يعني هيا فوق دلوقتي في المكان ده ، ياترى بتعمل إيه ؟
هاني : بقالنا ساعة ماشيين عشان في الآخر نشوف عمارتها .. طب وبعدين
أنا : عايزني أعمل إيه .. كفاية احس إني موجود في مكان قريب منها كده

عام 1989
ع التليفون
فلانة الفلانية : إزيك ياأحمد .. إيه الغيبة الطويلة دي
أنا : غصب عني .. إنت ماتعرفيش إنتي غالية عليا أد إيه
هي : إيه بس اللي محيرك .. تعرف اغنية لفايزة أحمد إسمها حيران
أنا : لا والله .. أول مرة أسمع عنها
هي : ممكن طيب أغنيهالك ؟
صوتها حلو بالمناسبة
أنا : ياريت

حيران

حيران كده ليه يا حبيبي

زعلان

زعلان من إيه يا حبيبي

ولا تزعل ولا تحتار

وحياتك ليل ونهار

حبك أقوى من النار

صدقني صدقني صدقني

أنا : بحبك
هي : حمد حقيقي وأنا كمان .. ماعرفش إزاي انا ماكنتش واخدة بالي منك

عام 1990
ع التليفون من مصر لوالدي في المنصورة
أنا : بابا فيه بنت عاجباني ، وقالتلي إنها مش بتخبي حاجة عن مامتها ومامتها قالتلها إنها عايزة تشوفني ، فإحتمال يكون فيه حاجة
بابا : هيا حلوة ؟
انا : جدا ، هي في كلية الطب وباباهاومامتها تربويين وأخوها مهندس زي .. هما زينا يعني كده
بابا : روح ولايهمك .. وخليك واثق من نفسك انا وراك .. بس إنت عارف لو ماكنتش بيضة وحلوة لاإنت إبني ولا اعرفك
اول مرة يراها أبي كان يوم إحتفال قراءة الفاتحة ، قالي لو ماعجبتنيش مش هاأخبي
عندما رآها أبي إبتسم لي وضم يده ورفع الإبهام وقاللي طالع لأبوك .. سمعونا الفاتحة ياجماعة

عام 1991
يوم 17 يناير 1991
عسكري السكرتارية : حضرت الظابط أحمد
أنا : أيوه فيه إيه ؟
العسكري : حضرت الظابط إيهاب بيقولك إحتمال مايكونش فيه نزول النهاردة
أنا : ليه باه إنشاء الله ؟ ده النهارده حفل خطوبتي وحجزنا الباخرة وبعتنا الدعوات
إيهاب : ماأنا عشان كده بقولك .. إحتمال كبير تكون الحرب النهارده من حفر الباطن ، والجيش كله على اهبة الإستعداد
أنا : الله يخرب بيتك ياصدام .. طيب إحنا هنا في مصر والحرب في الكويت ، نقعد نعمل إيه بس ؟
وزوغت ورحت الفرح وقامت الحرب وأنا في الكوشة ودبلنا مكتوب عليها حتى الآن هذا التاريخ

عام 1992
أثناء تجهيز الشقة ، بعد كتب الكتاب وقبل الدخلة
هي : إنت ياأحمد ليه مصر إن إحنا نروح نودي الدولاب بتاع المطبخ في العربية بتاعت الشغل بتاعك باليل
أنا : عشان فرد الامن في الوقت ده مابيكونش موجود لانه لو موجود هايشيل هو معايا الدولاب ولازم اديله جنيه على الأقل وأنا ماعدش فيه في جيبي غير ربع جنيه بس
هي : بحبك

عام 1993
دار الحرب الإلكترونية
الرائد مجدي : القاعة لسه جديدة وده تاني فرح .. أنا معجب بيكم جداوعشان كده الليلة الأولى هاتقضوها عندي في جناح شهر العسل ..جناح فخم جدا .. والفرقة ومغني ومغنية من عندي كمان مجانا ، بس أنا ليا طلب
أنا : إنت تأمر
الرائد مجدي : ممكن نسمي تصميم الكوشة اللي إنتو إختارتوها على إسم العروسة ؟
في الكوشة
أنا : إسمه إيه المنولوجست الجامد ده اللي إنتو جايبينه ده ؟
هي : إسمه عادل الفار

عام 1994
يوم 30 مارس 1994
هي : أحمد إصحى .. أنا حاسة إني هاولد دلوقتي .. الطلق إبتدي
أنا : إيه .. يعني إيه .. أعمل إيه؟
هي : إهدى مافيش حاجة .. انا هاقوم البس وإنت كمان ويالا بينا ع المستشفى

مستشفى النزهة
الدكتور : هي فعلا على وشك الولادة ، قدامها حوالي ساعتين عموما إحنا هانتصل بالدكتور بتاعها
أنا : أعمل إيه ؟
هي : مالك مافيش حاجة إنت بس روح بالعربية هات ماما
في الطريق مع حماتي للمستشفى وهي وحيدة هناك .. كانت المذيعة تقول سوف نقضئ الساعة القادمة مع أغاني عبد الحليم حافظ بمناسبة ذكرى رحيله التى تحل اليوم
في المستشفى
مبروك جالك ولد .. هاتسميه إيه ؟
أشوفها بس الاول
أنا : مبروك .. جبتي ولد
هي : شكله حلو ؟
أنا : أيوه .. إيه رأيك نسميه عبد الحليم
هي : تهز راسها بالموافقة وتبتسم

عام 1995
في الشغل
المدير : أحمد أنا شايف إن عندك موهبة في التسويق عالية .. إيه رأيك تسيب الهندسة وتنضم لقسم البيع والتسويق وإنت عارف إنه أقوي من قسم الصيانة والجودة والحاجات دي
أنا : موافق
باي باي ... هندسة

عام 1996
هي : أنا زهقت .. أنا قرفت ... أنا مستحملة بس عشان العيال
أنا : ياعني أنا اللي مازهقتش .. ده كان يوم منيل .. انا هاسيب البيت وأغور في ستين داهية

عام 1997
هو : تحبي نروح تسهر في خيمة رمضانية ؟
هي : أيوه والنبي آه بس يكون فيها محمد فؤاد
أنا : خلاص نروح الخيمة بتاعت مركز التجارة العالمي
في الخيمة
هي : احمد مش إنت قلت إن فيها محمد فؤاد بس ، أمال إيه اللي جاب هشام عباس وعمر دياب وفارس ؟
أنا : ماعرفش أنا دافع على إنه محمد فؤاد بس .. تيجي نتصور مع عمرو دياب ؟
هي : ياللا

عام 1998
أنا : يعني إيه نبطشية في رعاية الطفولة بالليل ؟
هي : ده قرار جديد كل واحدة تاخد نبطشية يوم
أنا : هو إنتي بتاخدي كام ؟
هي : مية تسعة وستين جنيه
أنا : آه مش تقولي كده يادكتورة

عام 1999

هي : بصراحة بصراحة انا مش مستريحالك ومسيرك هاتقع ياأحمد وساعتها هاثبت للدنيا إني كان عندي حق

عام 2000
ليلة العمر
هضبة الهرم .. الإحتفال بالميلينيوم الحدث العالمي نمنا ع الارض مع آلاف من جنسيات مختلفة على موسيقى جان ميشيل جار وروحنا على صلاة الفجر .. يادوبك لحقنا علبة الزبادي .. كان رمضان

عام 2001
أغسطس - إستاد القاهرة - ماتش الاهلى وريال مدريد
أنا : مين ده اللي معاه الكورة ؟
مجدي : ده هييرا ياعم
أنا : الواد الأسود ده لعيب اوي هو اللي فيهم
مجدي : ده روبيرتو كارلوس
أنا : زيدان ده يامجدي ماعملش حاجة من اول الماتش ، مين اللي لعب الكورة بالراس ده
مجدي : راؤول جونزاليس
جووووووول ... الاهلي جاي جوول
أنا : هو ده المدرب بتاع الاهلى ؟
مجدي : أيوه لسه جاي مبقالوش أسبوع إسمه مانويل جوزيه
أنا : وماله عامل كده ليه ، ده شكله زي اللي بيلموا سجاير من الأرض

عام 2002
حازم صاحبي : تاريخ النهارده مافيكركش بحاجة؟
أنا : لأ إيه يعني ؟ النهاردة واحد وعشرين ستة ..إيه بالظبط ؟
هو : عيد جوازك يازفت

عام 2003
كأس العالم
في إحتفال بوصول كاس العالم الحقيقية 13 كيلو دهب ، حضره نجوم الكرة كنت اعرف بتوع زمان منهم زي فتحي مبروك ، طه بصري ، مجدي عبد الغني ، سمير زاهر ، حسام وإبراهيم حسن ، شوبير ، فاروق جعفر
إتصورت مع الكاس وشيلته .. وكان جنبي في صورة فاروق جعفر وفي التانية فتحي مبروك والتالتة حسام وإبراهيم
اللعيبة الجداد ماعرفهمش آخر عهدي بالنجوم كان حسام وإبراهيم لما كانوا أشبال وبيلعبوا جنب الخطيب

عام 2004
رسالة على الموبايل : أحمد وريت صورتك لأصحابي بيقولوا عليك أمور .. هو إنت فعلا كده ؟


عام 2005
أنا لمحمد صاحبي : فيه حاجة بقالي كام مرة عمال أقرا عنها إسمها مدونات أو بلوجز .. تعرف حاجة عن الموضوع ده

محمد : لأ

يوم آخر
أنا : بقولك إيه .. إنتي عندك بطاقة إنتخابية؟
هي : بطاقة إنتخابية ... لأ ماعنديش
أنا : طيب بكره تروحي القسم تطلعي بطاقة
هي : احمد إطلع من نافوخي الله يكرمك

عام 2006
على التليفون
أنا : تعرفي إنك جميلة أوي اوي اصلي كنت باشوف صورتك دلوقتي ع الكومبيوتر
هي : لو نعرف إن السعودية هاتخليك تقول الكلام الحلو ده ، كنا بعتناك هناك من زمااان

هاني صاحبي بتاع الجامعة ع التليفون من الكويت : فاكر يامنيل أيام الكلية والاقصر وأسوان وشارع بورسعيد ده إنتا
دوختنا

---------------------------------------------------
هذه كانت فلاشات عشوائية لسنوات عمر تعدت الاربعين .. إمبارح كان عمري عشرين