Thursday, October 27, 2005

عن ابن عباس، عن النبي صلى الله عليه وسلم قال‏:‏ ‏‏عمرة في رمضان تعدل حجة‏‏‏
رواه البخارى ومسلم

إن شاء الله كمان ساعات قليلة هاكون هناك فى عمرة سريعة .. إدعولى

Tuesday, October 25, 2005


أنا والمدير ورمضان



أنظر فى ساعة الموبايل .. متأخر كالعادة أكتر من نصف ساعة ، ولسه فاضل كمان عشر دقايق لغاية ماوصل الشغل .. أدخل المكتب ليقابلنى عم مصطفى بإبتسامه خبيثة كبيرة ..أعرف منها إن فيه مصيبة .. المدير سأل عليك مرتين النهارده يأستاذ أحمد وعايزك فى المكتب ، أمال المجموعة فين ؟؟ يجيب عم مصطفى ماهمه كلهم فى إجتماع عنده من الصبح .. أرد عليه : الصبح أمال إحنا إيه ؟؟

صباح الخير ياباشا
صباح الخير يابوحميد .. ناموسيتك كحلى
لأ أبدا .. دى صلاة التهجد .. إنت عارف بأه العشر الأواخر
هأه .. التهجد .. طيب ماتنسناش من دعواتك ياحاج
من غير ماتقول ياباشا
إيه أخبار الخطة ؟ خلصتها ؟
خطة !!؟؟ خطة إيه ؟
أحمد وحياة أبوك صحصح معانا شويه .. البيزنس بلان ياأخى عشان نقفل مخصصات ألفين وسته
أه .. تمام فاضل بس الماركتنج كالندر
يعنى ماعملتش حاجة .. إنت بتهرج ياأحمد
أتوشوش مع عصام زميلى .. هوه ماله ع الصبح كده ؟؟
هاقولك بعدين
بقولك إيه ياعصام .. هى غادة قدمت الخطة بتاعتها ؟
لأ ولا حتى سألها
خلاص .. يبقى المرة الجايه لازم أجيله لابس جيبه
غادة : بتتوشوشوا على إيه ؟
أبدا بقول له رمضان كريم

وبعد كلام نص ساعة مالوش لازمة إنتهى الإجتماع، أسال عصام هو ماله مقفل كده النهارده ؟
مانت يأحمد مش واخد بالك ، إحنا داخلين على أواخر رمضان ولسه ماعزمناهوش ولا لمحنا ليه كمان
آه آه .. عندك حق .. طب إيه رأيك بكرة .. بس نعزمه فين .. كارينوز مثلا .. ولا حاجة كده زى الحسين
بقولك إيه ياباشا .. إنت فاضى بكرة ؟
ليه ؟
كنا عازمينك ع الفطار
ماشى .. بس فين ؟؟
الحسين ..ولو عايز حته تانيه مافيش مانع
خلااص أوكى .. بس أهم حاجة نخلص بدرى
ليه .. إشمعنى يعنى ؟؟
عشان أنا متابع آل شمشون .. بتشوفها يأحمد ؟
أنا .. ؟؟ لا لا .. أنا باتفرج على الست أصيلة

----------------------------------------------------------------

أخر الكلام


فى برنامج المسابقات على إحدى القنوات الخليجية
المذيع للمتسابق : أمامك ياأبوخالد عدد أربعة وستين مربع إختار منهم أى مربع
أبو خالد بعد تفكير عشرين ثانية : المربع إثنين وثمانين

Sunday, October 23, 2005





Seven things I plan to do:
سبعة أشياء أخطط لعملها
أمشى تحت المطر .. بس الشتا ييجي
أبطل شيشة .. حلم طبعا
أنزل أضرب جارنا اللى تحت
أكل أيس كريم .. باسكن روبنز .. صايم
أستعمل فرامل اليد
أحلق شنبي .. مش عشان حاجه والله
أصلح إطار العربية الإحتياطي .. بايظ منذ شهر

Seven things I can’t do:
سبعه أشياء لا أستطيع عملها

أستحمى بماء بارد
أخرج من البيت بالبيجاما
أشرب قهوة .. عكس المدام
أشتغل بالهندسة .. أنا خريج هندسة
أسمع راغب علامة ، أو أشاهد فاروق الفيشاوى
أعاكس بنت الجيران .. عشان عيب
ألبس أسود على لون بني

Seven things I say most often:
سبعه أشياء عادة أقولها


هو فين البتاع ؟
ماشى ياجميل . اوكيه ياجميل .. حتى لو شبه محمد نجم
إرحمني
باشا
آه ياني يامه
زيد وعبيد ونطاط الحيط
أنا تعباااان


Seven people I want to pass this tag to:
سبع مدونين أرسل لهم هذه الأسئله للإجابه عليها

خجل
شادي
ميندونا
تارا
كنج توووت
نيرو
وإنت أو إنتي ....
-------------------------------------------------------------

SMS أخر الكلام

الآن أفضل شبكة إستقبال فى مصر .. شبكة نادى الزمالك

Sunday, October 16, 2005



مين حافظ ..؟


أول إمبارح الدنيا إتقلبت في الجامع ساعة صلاه التراويح ، الإمام بسم الله ما شاء الله عليه قاعد يومين بيقرأ فى سورة البقرة ياولداه من غير ولا غلطه في حرف أو تشكيل أو حكم من أحكام التلاوة ، لغايه ماوقع وغلط وفى أسهل آيه من السورة آخر آيه اللى كل المسلمين حافظينها وهات يازعيق وياصريخ للتصحيح للأمام المجرم ، أنا بصراحة ماأخدتش بالى إلا لما الناس صرخت وألاقي اللى جنبي وكنا غالبا فى الصف الخمستاشر وشبه بره المسجد بيزعق بعلو صوته للإمام يصلح له ، مش عارف إمام مين اللي هايسيب العالم دى كلها ويسمع لواحد في الصف الخمستاشر وبعدين لما ركزت معاه لقيته بيقول غلط ، وطبعا التركيز راح والخشوع راح وده بسبب إنه كله عايز يبين مقدرته إنه حافظ القران وفى إيه .. فى أواخر سورة البقرة اللى كلنا حافظينها ، طب ورينا شطارتك بأه فى بقيه السورة .. وإحنا خارجين من الجامع لقيت جارى ده بيقول لصاحبه شفت المسخرة كله عايز يبين إنه حافظ
-----------------------------------------------------------------
ومن الصدف النادرة إمبارح كان جارى فى نفس المكان هو نفس الشخص وكله كان تمام لغايه ركعه الوتر الأخيرة والدعاء ..اللهم إرحمنا فى القبور... وإذا بنحيب وعويل بصوت عالى من جاري لدرجه إننى إتخضيت إيييييه عييييييييييييييي هيييييييييييي إهئ إهئ إهئ .. مش ممكن تكون دى هيه دموع خشيه الله عز وجل .. إيه ياعم هوه إنت إيه الذنوب الى مرتكبها بالظبط إييييييييييه إهئ إهئ إهئ وطبعا التركيز راح والخشوع راح
وأنا خارج من الجامع قلت لمحمد صاحبى .. بكرة إنشاء الله هانصلى فى الجامع اللى جنب البيت
إقرأ المسلمون الجدد ل شادى
---------------------------------------------------------------
أخر الكلام
صاحبى المتدين حديثا : أحمد إنت بتشوف قناه إقرأ الساعة حداشر باليل؟
أنا : إشمعنى ...؟؟
صاحبى المتدين حديثا : بتشوف عمر موسى ؟؟
أنا : إسمه ... عمرو خالد

Sunday, October 09, 2005

أول يوم صيام ... الإنتقام


Ahmed Funny Pics


عم مصطفى .. هذا الساعي اللعين .. ينظر لى من تحت لتحت وهو رايح وهو جاى ، وعلى وجهه إبتسامه واسعه كلها شماته ، وليه لأ ماهو عارف إنى أنا صايم ومش هاقدر أقرفه بطلباتى فأنا أطلب منه مالا يقل عن عشرين مشروب يوميا مابين شاى وشاى بحليب ونسكافيه ، صحيح أنا لا أشرب معظمها ولكن هو لايستطيع أن يتكلم .. عم مصطفى هو أقرب إنسان أقدر أنفث فيه جام غضبى عندما يحدث مايثيرنى فأشخط فيه لأى سبب
ياعم مصطفى .. فين أم الشاى اللى طلبته ؟
ماهو قدامك أهوه يابيه
أنظر إلى الكوب فلا أجد ماأقوله حتى إن الكوب ساخن فلا أستطيع أن أتحجج بأن الشاى بارد
ومين قال إنى عايز شاى ساده ..؟؟ أنا عايز شاى بحليب
شاى بحليب الساعة تلاته الظهر يابيه.. وبعد الغدا ؟؟
إنت شريكي ياأخي أنا حر
وأنا صايم .. عم مصطفى رايح جاى زى النحله وعليه نشاط يهد جبل وعمال يبص على ويبتسم .. أمال لما بنعوزه فى الأيام العاديه بندوخ عليه ليه؟
مافيش غير محمد صاحبى .. أطلب من محمد فى التليفون الداخلى يجيى عندى المكتب ، وأبادره عندما يدخل المكتب
شايف الزفت اللى إسمه عم مصطفى .. هايجننى الراجل مصر إن هو يغيظنى
إيه ياعم أحمد هو الصيام ضرب معاك بدرى كده ولا إيه ؟
الصيام مالوش دعوه .. بس أنا تعبان
مالك .. جعان ..؟
لأ
عطشان ..؟
برده لأ
وإنت مابتشربش سجاير يعنى مش خرمان
أيوه صح أنا خرمان .. هاجنن عايز أشرب شيشه
شيشه .. بس إنت عمرك ماشربت شيشه الصبح كده
هى طلبت معايا كده بأه .. أنا تعبان
هدى نفسك كده يابوحميد
طيب يالله ننزل
على فين بس ؟؟
نسلى صيامنا .. تعال نشترى طرشى وحاجات كده لغايه المدفع
مدفع إيه ياأحمد هانشترى طرشى من الساعه عشرة ونص الصبح لغايه المغرب
ماهو أنا مش هاقعد وشى فى وش النيله مصطفى ده وهو عمال يغيظنى
أشخط بأعلى صوتى ..عم مصطفى .. ياعم مصطفى
أيوه يأستاذ أحمد أى خدمه ؟
عايزين ننقل المكتب والدولاب ده من الجنب ده للجنب ده .. نادى كل السعاه علشان يساعدوك ونادى الكهربائى ينقل وصله التليفون والكومبيوتر ، ونادى إبراهيم يصلح قفل الدرج المخروب ده .. ولما تخلص تيجى تلمع الإزاز المنيل ده هو إيه ياعنى مش هانشتغل عشان رمضان ولا إيه .. ؟ ده حتى يبقى حراام

Sunday, October 02, 2005


سلوكيات

Ahmed Funny Pics



في طابور العيش

زبون 1 : إنت ياأستاذ .. ما تقف في الطابور زي بقيت الخلق ، ماكلنا واقفين أهوه
زبون 2 : يعنى إنت مش عاجبك الناس اللي واقفه دى ؟؟
هو : دوول خمس أرغفة بس يا جماعه
أنا : طيب مأنا أهوه بقالي نص ساعة في الطابور ، عشان خمس أرغفة
بعد خمس دقائق
البائع موجها حديثه لي : عايز كام يا حضرت ؟؟
أنا : خمسه وعشرين رغيف

في السوبر ماركت

المرأة : هات كيسين مكرونة ريجينا
الرجل : خليها مكرونة مصريه احسن ، ماهى زي الريجينا بالظبط
المرأة : هاتفرق إيه يا عبده ؟؟
الرجل : عشرين قرش فى الكيس الواحد
عند الكاشير
زبون آخر : إنتو ليه مابتجيبوش جربر بالمانجه ؟؟ .. الولد عندي مابيكلش إلا جربر بالمانجه

أمام التليفزيون

الزوج : مالك .. واقفه عامله كده ليه ؟
الزوجه : أصل عايزه أروح الحمام
الزوج : طيب ماتروحى
الزوجه : مستنيه الفاصل
الزوج : لا حول ولا قوة إلا بالله
الزوج يضغط على زرار إيقاف الصورة الحديث في التليفزيون الجديد تكنولوجيا

في المدرسة الإعدادي

يدخل مدرس الرياضيات الجديد وسط هرج ومرج
المدرس : بس يابنى .. بس يا حبيبي
هرج ومرج
المدرس : بس يابن الناس الكويسه
هرج ومرج
المدرس : بس يابن الحلوة
هرج ومرج
المدرس : بس يابن الوسخة .. منك له
صمت تام
المدرس : ما هو إحنا شعب كده .. تقوله يابن الحلوة .. ولا كأنك بتكلمه ..تديله بالجزمه .. يسمع الكلام


في المطقم

أنا :أما أنا شفت النهارده حته منظر فى المقطم .. فضيحة !... واحده قفشت جوزها مع واحده تانيه فى المقطم
هى : إيه اللى حصل ..؟
أنا : أبدا .. بتزعق بعلو صوتها .. بأه هى دى اللى مخلياك متغير ومش طايق البيت .. هى دى اللى قالبه كيانك .. طب إستنضف .. مالقيتش غير المعفنه دى ؟؟ يازباله .. يارمه .. يابن الكلب .. صحيح ديل الكلب عمره ماينعدل
هى : أحمد .. وإنت إيه اللى وداك المقطم ؟؟
---------------------------------------------------------------

أخر الكلام

هذه النكته جت لي رساله على الموبايل من زوجتى حالا قبل نشر هذا البوست

ولد بيسأل أبوه هى الحمير بتتجوز .. قاله يابنى أصلا مابيتجوزش غير الحمير