Sunday, October 16, 2005



مين حافظ ..؟


أول إمبارح الدنيا إتقلبت في الجامع ساعة صلاه التراويح ، الإمام بسم الله ما شاء الله عليه قاعد يومين بيقرأ فى سورة البقرة ياولداه من غير ولا غلطه في حرف أو تشكيل أو حكم من أحكام التلاوة ، لغايه ماوقع وغلط وفى أسهل آيه من السورة آخر آيه اللى كل المسلمين حافظينها وهات يازعيق وياصريخ للتصحيح للأمام المجرم ، أنا بصراحة ماأخدتش بالى إلا لما الناس صرخت وألاقي اللى جنبي وكنا غالبا فى الصف الخمستاشر وشبه بره المسجد بيزعق بعلو صوته للإمام يصلح له ، مش عارف إمام مين اللي هايسيب العالم دى كلها ويسمع لواحد في الصف الخمستاشر وبعدين لما ركزت معاه لقيته بيقول غلط ، وطبعا التركيز راح والخشوع راح وده بسبب إنه كله عايز يبين مقدرته إنه حافظ القران وفى إيه .. فى أواخر سورة البقرة اللى كلنا حافظينها ، طب ورينا شطارتك بأه فى بقيه السورة .. وإحنا خارجين من الجامع لقيت جارى ده بيقول لصاحبه شفت المسخرة كله عايز يبين إنه حافظ
-----------------------------------------------------------------
ومن الصدف النادرة إمبارح كان جارى فى نفس المكان هو نفس الشخص وكله كان تمام لغايه ركعه الوتر الأخيرة والدعاء ..اللهم إرحمنا فى القبور... وإذا بنحيب وعويل بصوت عالى من جاري لدرجه إننى إتخضيت إيييييه عييييييييييييييي هيييييييييييي إهئ إهئ إهئ .. مش ممكن تكون دى هيه دموع خشيه الله عز وجل .. إيه ياعم هوه إنت إيه الذنوب الى مرتكبها بالظبط إييييييييييه إهئ إهئ إهئ وطبعا التركيز راح والخشوع راح
وأنا خارج من الجامع قلت لمحمد صاحبى .. بكرة إنشاء الله هانصلى فى الجامع اللى جنب البيت
إقرأ المسلمون الجدد ل شادى
---------------------------------------------------------------
أخر الكلام
صاحبى المتدين حديثا : أحمد إنت بتشوف قناه إقرأ الساعة حداشر باليل؟
أنا : إشمعنى ...؟؟
صاحبى المتدين حديثا : بتشوف عمر موسى ؟؟
أنا : إسمه ... عمرو خالد

18 comments:

  1. لوووووووووووول طب لما واحد يصلح للامام يبقى ايه لازمة الباقي يصلحولوا كمان هو ده اللي بيسموا الرياء يعني تصلي وتعبد ربنا عشان الناس تشوفك وتقول عليك متدين.
    عمرو موسى مش ده بتاع جامعة الدول العربية والا بتاع ايه مش فاكرة؟؟؟

    ReplyDelete
  2. أعجتني القصة الاولى .. للاسف ، الجميع يظهر للناس انه تقي و حافظ القران ولكن بينه و بين ربه اللهم لا حسد و لا شماته ...
    و على فكرة
    يوجد الكثير منهم في عالمنا هذا

    ReplyDelete
  3. ما انت فاهم رمضان بقى وكل سنة وانت طيب دا انت لو تيجى تشوف اللى بيحصل عندنا والله مساخر
    كنا بنصلى المغرب والامام راجل زى ما تقول شفناه محترم فقدمناه وهو للامانة كان باين انه تعبان وجاى من الشغل ولا حاجة فضغطو عليه المهم نسى ركعة طبعا الدين بيقوللك انت تابع للامام وهون اللى شايل ذنب الصلاة وهاتك على اللى حصل واحد يقوله ياعم الشيخ باقى ركعة فى قلب الصلاة وواحد يزعق وواحد اتفلحص وقال يا جماعة الصلاة باظت وبما انى اعرف ان انا اتبع الامام واخرى لما يغلط اقولله سبحان الله قلتلهم يا جماعة الصح كان كده منتهى المخ الواقف واللى يبص من تحت لتحت واللى يسيبك ويمشى مسخرة يا راجل المشكلة انا لسه واقع مع امام مسجد من فترة قريبة والله فكرتنى اكتب عنها ( بس بينى وبينه مشردتوش) بس هو اللى شردنى بقى !!!!!!!!!!!!!!!!

    ReplyDelete
  4. علي فكرة مشاهدة عمرو موسي والاستماع اليه في التلفاز تتعتبر من الكبائر والله اعلم

    ReplyDelete
  5. هههههه
    نفس القصة حصلت عند شيخ من الشيوخ الكبار ف إسكندرية
    و خمسة ردوا وراه ما كانش فيهم واحد صح
    دخل أوضته ف الجامع و طلع خلاهم يصلوا وراه جزئين
    يعني أدب اللي ف الجامع كلهم

    ReplyDelete
  6. عمرو موسى ههههههههههههههههههههه
    الحمد لله انه مقلش ممدوح موسى

    ReplyDelete
  7. يعنى كلهم حافظيين ؟؟ المصيبة بقى أن فيه كتير منهم مش حافظين ولا حاجة بس بيرددوا مع اللى حافظين و بيقولوا معاهم بس علشان يعملوا أنهم حافظين
    يا عم أحمد ده مرض و نقص و ده ناتج عن ان الناس فى البلد دى حاسيين أنهم ولا حاجة لأنهم مالهمش أى رأى فى حياتهم خاااااااااالص مع الأسف الشديد
    الأمراض الأجتماعية و كده
    ويجعله عامر
    KING TOOOT

    ReplyDelete
  8. ههههههه

    آه ده حافظ أوي..

    وليه كل ده ما ياخد الامام بعد الصلاة ويبلغوا ان حصل كده وكده

    مش كده قدام الناس


    --------

    اما صاحبك المتدين أو المسلمون الجدد

    عاملين زحمة على غير فايده

    ReplyDelete
  9. أحمد يشرفني ان اطل بمدونتك الجميله والخفيفه

    مقالة جميله

    وكان أخر جزء منها يحكي لب الموضوع

    يسلم فمك

    ورمضان كريم

    ReplyDelete
  10. بص يا سيدى انت لازم تقدر جوانب النقص الفظيعة فى الشخصية المصرية وتشترى دماغك

    ReplyDelete
  11. كل مره بكتب لك تعليق اطيح على بلوقك وانا مشغوله مره
    واقول بعدين ارجع واعلق
    لكن بكتب اللي يطلع معي وبسرعه
    :)

    وش فيها الامام اذا غلط او نسى؟؟
    بس مشكلتنا اللي دايم انا اقولها
    الناس تنظر للمتدين انه ملاك يا ويله لو يغلط غلط صغير
    يعني لسبيل المثال
    عمرو خالد انا اشوفه متدين ولو عنده شوي تجاوزات بس على الاقل ارحم من شباب اليوم
    لكن الناس تنتقده لانه مو ملتحي
    نسوا كل اللي سواه ووقفوا على اللحيه


    راح ارجع بوقت ثاني
    سلام

    ReplyDelete
  12. do you know, They all show how smart and good they are but they will be mostly stuck if you ask them a single simple question like "we we pray 5 times?" and they will spend long time trying to move the old machine called the mind to come up with an answer!!

    ReplyDelete
  13. chatterbox
    تعريفك صح هو ده الرياء .. وأصعب شيئ إن الرياء يكون مع الله

    frankom
    المشكله مش فى وجودهم .. المشكلة فى زيادتهم

    taher
    ده الموضوع منتشر جامد بأه .. بس حكاية موضوع اللى يسيبك ويمشي دى

    sonofegypt
    حلوة الإفتاءة دى .. وخصوصا فى رمضان

    وش مكرمش
    هاها .. خلاهم يصلوا وراه جزئين .. عامل زى المدرس اللي بيخليك تعيد كتابه الواجب عشر مرات كعقاب

    shady
    وأحسن إنه ماخلاهاش عمرو دياب

    king tooot
    حلو تحليلك إن الناس مهمشه وبتحاول تثبت نفسها فى أى حاجه

    نون النساء
    ده المفروض .. بس مين يعقل
    اللى عاملين زحمه دوول من المسلمين الجدد ربنا يكرمهم بس اهم حاجه إنهم يواصلوا عبادتهم من غير مايدخلوا فى سلوكيات الاخرين لغايه مايعرفوا الدين كويس ..

    enter-q8
    أخدت باللك فعلا إن المقصود من آخر الكلام هو تلخيص الموضوع

    Happy girl 4ever
    شكرا وأنا حليت الواجب فى البوست القادم

    ketaba
    كتابه .. ماأعتقدش غن فيه حد مشترى دماغه زيي بصراحة

    -se3loah-
    إنتي جبتى من الأخر .. المهم الجوهر مش المظهر

    Free soul
    I do agree, but for sure not all of them

    riyadhawi
    واضح إن الموضوع منتشر جدا.. وتحياتى لكل الرياض

    grandson
    حفظ القران ليس المشكلة , المشكلة في العمل بالقران
    الله ينور

    ReplyDelete
  14. موضوع التصحيح ده مشكلة دائمة يمكن رياء او منظرة

    لكن مع احترامى ليك انا مش عاجبانى الصورة ابدا

    ReplyDelete
  15. Tub, bas ma3na as-sura dee huwa innu al-azhar saab ad-deen wi ba'a lil-sulTa wil al-filoos ya3ni huwa mish HaTTiT as-sura dee 3alaa al-blog bitaa3u 3ashaan bitDaHHak wa bas.
    -Khalid

    ReplyDelete
  16. بيبيو .. خالد فعلا وصل قريب من معنى الصورة .. وهى إن فيه بعض الناس متدينه أى تمارس الصلاه بالشكل ولكن الجوهر متناقض تماما كما يظهرهم اللبس .. وده تقريبا موضوع البوست .. الدين بالجوهر مش بالمنظر

    ومش مقصود أى نوع من الإستهزاء إطلاقا .. علما بأنى فكرت فترة قبل وضع الصورة .. وخصوصا أنا أفضل دايما إن تكون الصورة طريفة .. وفى الأخر قررت إن لو حد علق عليها هاقول وجهة نظرى

    ReplyDelete
  17. عاوزين الحق .. الصلاه الجماعه لازم تكون وراء امام انت بتثق فيه و بتقتنع بطريقته في التلاوه و حفظه للقرءان .. و علشان كده لو غلط بيكون معروف لرواد المسجد ان اللي بيبلغ عنه لبقية المصليين هو بس اللي بيصححله .. و لو المصلي مش مقتنع بالامام يبقي يصلي لوحده علشان ما يلخبطش غيره و كفي الله المؤمنين شر القتال ..

    احكيلكم قصه تحفه .. الشيخ اللي كنت بصلي معاه القيام ممتاز و صوته زي الحذيفي و ما شاء الله عليه .. المهم .. يوم كده غلط و اذا بالحاجه اللي جنبي بتصلي بمصحف فشافت انه غلط راحت عامله "توتوتوتوتوتوتو" و شويه و راح غلط تاني .. راحت برضه "توتوتوتوتوتوتو " و شويه و غلط تالت .. راحت قافله المصحف و قايلاله "يخرب بيتـــــــــــــــك" و طبعا بعد الصلاه انا انهرت من الضحك و الست ما سلمتش من النقد و الستات اتخانقوا مع بعض و كانت ليله .. و يجعلو عامر !!

    ReplyDelete