Friday, October 27, 2006

كفانا تهويل - السعار الجنسي


لصالح من ؟


بعد حالة الغليان وضغط الدم والغيظ والغضب التي أصابتني بعدما قرأت ماكتبه
مالك وشركاه ، أعدت بهدوء وبعقلانية قراءة الموضوع مرة أخرى بتمعن ، إكتشفت أن الموضوع به كثيرا من التهويل ، والصور كفكرة تم توظيفها جيدا كدليل على صحة كل ماجاء بالرغم من أن من يتمعن فيها يكتشف أنها تحاول ان تعطي فقط ظلالا تؤكد ماتم مبالغته من كاتب الموضوع الملئ بالمتناقضات والمبالغة وتعبيرات لاتستطيع أن تتجاهل فيها روح إثارة العاطفة
فاللعب على هذه المنطقة من الإثارة مضمون النتيجة مثلما إندرج تحته كثير من المدونيين مدفوعين بعاطفتهم وعقولهم لثقتهم الكاملة في كل ماتم نقله

رجاء من المدونين لاتنساقوا تحت هذا النوع من التهويل المبالغ فيه لأغراض أخرى

----------------

أعتقد ان هذا التحقيق أقرب نوعا ما للحقيقة


----------------

تحديث

أشار عبد الرحمن مصطفى في تغطيته لموقع إيلاف وموقع أمان عن هذا الرأي

----------------

تحديث

سؤال برئ : بعد وقفة نقابة الصحفيين يوم الخميس الإحتجاجية لماذا كانت اللافتات بالإنجليزية ؟

Noura Younis Photo
الصورة من مدونة نورا يونس

هل كانت الوقفة للإعتراض أمام الشعب المصري والحكومة المصرية أم لشعوب وحكومات لاتفهم إلا الإنجليزية؟

Thursday, October 26, 2006

أحلى عشرة الساعة عشرة


Shokeir - Business



إلحقني ياأبوحميد بنصايحك عندي إنترفيو بكرة الساعة عشرة لوظيفة في -
شركة كبيرة
حظك والله حلو يابني ، انت أ ُمك داعيالك إنك قابلتني ألف مبروك -
شوف ياأبو الشباب -

أولا : لازم تحسسه إن الشركة دي مش كبيرة قول له أنا مش فاهم إنتو بتعملوا إيه في الشركة دي؟

ثانيا : لازم تديله برستيجه ، قول له إنما إنت ليه مش في وظيفة أحسن من كده ؟

ثالثا : عرفه إنك بار بوالديك وإساله هو التأمين الصحي بيشمل الوالدين ولا لأ ؟

رابعا : لازم يحس إنك طموح وأكّد له إن هدفك على الأمد القصير إنك تحل محله


خامسا :
لازم يعرف ان وقتك ثمين وإطلب منه ان المقابلة تكون على الواقف

سادسا :
لازم يكون ليك أسرارك وإساله إنت ليه بتسأل على الريفرانسز بتاعتي؟

سابعا :
لازم يعرف ان عندك إنتماء قول له إنهم لو عيّنوك في الوظيفة هاترسم لوجو الشركة تاتّو على دراعك

ثامنا :
فهمه إنك مهتم بسياسة الشركة وإسأله إذا كانت سياسة الشركة بتسمح بسلفة من الشهر الأول

تاسعا :
لازم يعرف انك راجل مريح وقوله إنك ممكن تاخد أجازة في أي وقت

عاشرا :
لازم يعرفوا إنك راجل مش هايف وقول لهم إن سبب تركك الشغل القديم إنك قلبت الترابيزة على مديرك


أنا متشكر جدا ياأستاذ أحمد -
أي خدمة ياأبوالشباب ألف مبروك ومتنساش بس في دعوة حلوة -
إيه رأيك أنا عايز أعزمك بكرة عند عزت باي باي ؟ -
إممممم .. طيب ماتخليها النهاردة أحسن -


--------------------------


لمزيد من النصائح يُرجى مراجعة التدوينات السابقة

الموظف المثالي ، الوصايا الثماني الذهبية

Monday, October 09, 2006

أستغفر الله العظيم



Shokeir - Prayer


إستووا .. إعتدلوا .. إستقيموا يرحمكم الله
الله أكبر

الله أكبر .. أحمد ركز بأه في الصلاة وبلاش تسرح ، طيب خلاص ، إمممم .. هو الراجل اللي جنبي ده صوابع رجليه عاملة كده ليه ؟ صباعه الكبير ده كبير أوي ، أه بمناسبة الصوابع هي صوابع زينب دي اللي هيا إيه ؟ بيتهيألي دي اللي عاملة زي الزلابية ، زلابية ؟؟ زلابية إيه بس وبتاع إيه
الله أكبر
أحمد ركز ياأحمد ، طيب ماأنا مركز أهوه ، مركز إيه طيب إنت قريت سورة إيه ؟ أنا قريت سورة اللهب شفت بأه أنا مركز إزاي ؟ لألأ دي كانت سورة الفيل
سمع الله لمن حمده
ربنا ولك الحمد ، أنا جعت ، بس مش عارف أفطر إيه النهاردة ؟ آه المطعم الجديد اللي كانوا بيتكلموا عنه إمبارح ، بيقولوا عليه أكله حلو ، بس هو في شارع إيه ؟ لما أخلص صلاة أتصل بالتليفون أعرف العنوان
الله أكبر
هيا الساعة كام دلوقتي زمانها أربعة وخمسة ، على فكرة هيا الساعة التانية الجلد كنت حطيتها فين ؟ آه ياإما في الدرج ياإما في الدولاب ، دولاب ايه بس ياأحمد ركز ياأحمد إنت بتصلي ، أستغفر الله
الله اكبر
أهوه أنا مركز أهوه ، إنظر لمكان السجود وركز في الأيات اللي بيقولها الإمام
الله أكبر
الشيطان ده أعوذ بالله بيخلي الواحد يسرح ، مش هو الشيطان بيتسلسل في رمضان ، يعني بيتسلسل تلاتين يوم ، أيوه بس هو رمضان ده تسعة وعشرين ولا تلاتين ؟ هو إبتدى إمتى ؟ تعالى نحسبها كده هو كان يوم السبت وفي مصر الأحد غريبة أوي الحكاية ؟ طيب لو واحد على الحدود ورجل بره ورجل جوه يصوم ولامايصومش ؟ أحمد شفت أهوه إنت رجعت تسرح تاني
الله أكبر
هو إحنا في الركعة الكام ؟ يعني هانقوم ولا هانقرأ التشهد ؟ لا دي التانية ، طيب أقولك إتأخر شوية وشوف الي جنبك هايقوم يقف ولا يقعد يقرأ التشهد
الله أكبر
أيوه دي الركعة التانية ، شفت بأه عشان سعادتك عمال تسرح ، لأ خلاص أعوذ بالله من الشيطان الرجيم
الله أكبر
السجادة دي مريحة ولونها حلو ، هيا سجادة ولا موكيت ، لاموكيت بنسيج السجاد ، آه على فكرة إبقى إفتكر تكنس السجادة اللي في البيت بالمكنسة ، بس لازم أنضف كيس المكنسة عشان بقالي مده مانضفتوش
الله أكبر
الراجل اللي جنبي ده ، رجليه بتزق في رجلي ، طيب أحرك رجلي شوية ، الله ده بيلزقها فيا تاني ، أستغفر الله
الله أكبر
فيه صوت موبايل ، الناس دي ليه مش بتقفل الموبايل ساعة الصلاة مش عارفين ان ممكن ده يخلي الواحد مايركزش في الصلاة مع إن فيه يافطة محطوطة على الباب مكتوب عليها إغلق الجوال من فضلك وعليها صورة موبايل عليه علامة إكس بس هو الموبايل ده كان نوعه إيه ؟ بيتهيألي سيمنس هيا إيه الرنة دي ؟ آه أنا عايز أبقى أغير الرنة ، فاكر الموضوع اللي كتبته عن رنات الموبايل
.
.
.
.
الله أكبر
الراجل اللي جنبي ده عمال يتحرك كتير ، أستغفر الله مافيش خشوع خالص ، أنا أهوه مش باتحرك
السلام عليكم ورحمة الله ، السلام عليكم ورحمة الله
إيه هيا الصلاة خلصت ؟
السلام عليكم ورحمة الله ، السلام عليكم ورحمة الله

أستغفر الله العظيم

ملحوظة : مش أنا اللي في الصورة

--------------------------------


هذه التدوينة أعادت نشرها المواقع التالية دون الإشارة إلى صاحبها

منتدي دي في دي فور أراب ، مدونة فوضى الحواس ، منتدى عيني عينك ، مندي صُناع الحياة ، منتدى مزكوني ، منتدى عمر خالد ، منتدى محبي الحبيب ، منتدى قمر العين ، منتدى شباب الإسلام ، منتدى الطلبة ، منتدى ليالي لبنان ، منتدى الضحى ، منتدى فرسان الحق ، منتدى كاش

............. وكفاية كده