الموظف المثالي

يبدو إن حكاية النصائح الذهبية .. مطلوبة جامد ، صديق تانى جالى وقاللى أحمد باشا عندى مشكلة فى الشغل الجديد وعايز رأيك ؟ مشكلتى إنهم بيقولوا على مابشتغلش بالرغم من إنى باخلص شغلى كله .. ودى برده كانت مشكلتى فى شغلى القديم
قلت له شوف يابنى .. أنا هاديك خلاصة تجربتي بس ده هايكلفك واحد زنجر كومبو .. بس سبايسي يامان ، وبعدين نحبس بحجرين سلوم
بعد النفس الأول قلت له شوف يابوب

أولا : إوع تمشى فى الطرقة بتاعة الشركة أبدا وإيدك فاضية لازم يكون فيها ورق شغل ومن وقت للتانى تبص فيه ، لو مش معاك حاجة ده معناه إنك فاضى ومستهتر ورايح الكافيتريا فى مواعيد العمل ولو ماسك جرنال فده معناه إنك رايح الحمام وده معناه برده إنك إنسان مريح بتشديد الحاء على الآخر

ثانيا : وإنت مروح خد معاك برده بعض الورق فى إيديك لأن ده معناه إنك مالحقتش تخلص الشغل المتلتل اللى عليك وهاتكمله في البيت لأن شغل القسم كله على إكتافك

ثالثا : الكومبيوتر مهم جدا .. الواحد وهو رايح وجاى على مكتبك ويبص عليك يلاقيك عينيك مابتشالش من الكومبيوتر بيديله إيحاء بأنك بتحل مشكلة جامدة على الكومبيوتر ، وطبعا إنت بأه ممكن تتبادل الإيميلات الخاصة بتاعتك مع الأخرين وتبعت صور ونكت ولقطات فيديو مضحكة وكده يعنى ، وكمان عندك السولتير على الكومبيوتر فيه ناس دلوقتى بيلعبوها وهما مغمضين ومتنساش تقتح فايل إكسل وفايل وورد عشان لو حصلت كبسة عليك ، تعمل واحد ماكسيميز ليهم وإشتغل

رابعا : لازم يبقى قدامك كومة كبيرة من الورق والملفات على المكتب ، لو ماعندكش ورق كفاية عندك ورق شغل السنة اللى فاتت هو نفسه شغل السنة دى حطه أمامك ومحدش فاهم حاجة ، رصص وعرض ولو حد جايلك حط ورق الموضوع فى نص الورق وطلعه من وسط الورق لما يجيلك ده بيدى إنطباع إنك عارف كل ورقة فيها إيه

خامسا : حاول بهدوء ترسم ملامح على وجهك قدام مديرك إنك متضايق ودماغك فى الشغل ده بيخليه عارف إنك مشغول ولو فيه شغل زيادة يوزعه على حد غيرك

سادسا : حاول تظهر دايما فى الأوقات المتأخرة عن مواعيد العمل وخصوصا لو مديرك موجود ولو مش واخد باله إنك لسه موجود ، إعمل قلق يعنى إمشى بالموبايل وإتكلم فيه وإتحرك أمام مكتبه وقول أى كلام شبه الشغل بس ماتنساش تعمله على السيلانت أو الصامت عشان لو رن الموبايل وهو على ودانك هاتتكشف ياحلو

سابعا : حاول تستخدم شوية مصطلحات أجنبية حديثة وإنت بتتكلم مع الناس أو مديرك ده بيديهم إحساس إنك أكبر كتير من الوظيفة اللى إنت فيها ، وممكن تجيب المصطلحات دى من الإعلانات اللى بتكون فى أى مجلة كومبيوتر أجنبية

ثامنا : وده الأهم إوع يكون مديرك بيقرأ مدونات لأنى ناوى أنشر النصائح دى

نظر لي صديقى نظرة كلها إمتنان وعينيه تكاد تذرف بالدموع على تلك النصائح وبيسلم على وبيقولى أحمد باشا أنا مش عارف أقولك إيه ؟ ده إنت سيادتك كنز
قولته لالا ماتقولش كده ، ده أنا تحت أمرك أى حاجة كلمنى على طول .. بس المرة الجاية إعمل حسابك على واحدة سوبرسوبريم من بيتزاهت حجم كبير ومتنساش الإضافات تكون فواكه البحر
----------------------------------------------------------

تحديث : أعتذر عن عدم إستطاعتى متابعة التدوينات والتعليقات خلال الأيام السابقة وحتى الآن 1 ديسمبر

إنتظروني قريبا جدا