Monday, November 28, 2005


الموظف المثالي




يبدو إن حكاية النصائح الذهبية .. مطلوبة جامد ، صديق تانى جالى وقاللى أحمد باشا عندى مشكلة فى الشغل الجديد وعايز رأيك ؟ مشكلتى إنهم بيقولوا على مابشتغلش بالرغم من إنى باخلص شغلى كله .. ودى برده كانت مشكلتى فى شغلى القديم
قلت له شوف يابنى .. أنا هاديك خلاصة تجربتي بس ده هايكلفك واحد زنجر كومبو .. بس سبايسي يامان ، وبعدين نحبس بحجرين سلوم
بعد النفس الأول قلت له شوف يابوب

أولا : إوع تمشى فى الطرقة بتاعة الشركة أبدا وإيدك فاضية لازم يكون فيها ورق شغل ومن وقت للتانى تبص فيه ، لو مش معاك حاجة ده معناه إنك فاضى ومستهتر ورايح الكافيتريا فى مواعيد العمل ولو ماسك جرنال فده معناه إنك رايح الحمام وده معناه برده إنك إنسان مريح بتشديد الحاء على الآخر

ثانيا : وإنت مروح خد معاك برده بعض الورق فى إيديك لأن ده معناه إنك مالحقتش تخلص الشغل المتلتل اللى عليك وهاتكمله في البيت لأن شغل القسم كله على إكتافك

ثالثا : الكومبيوتر مهم جدا .. الواحد وهو رايح وجاى على مكتبك ويبص عليك يلاقيك عينيك مابتشالش من الكومبيوتر بيديله إيحاء بأنك بتحل مشكلة جامدة على الكومبيوتر ، وطبعا إنت بأه ممكن تتبادل الإيميلات الخاصة بتاعتك مع الأخرين وتبعت صور ونكت ولقطات فيديو مضحكة وكده يعنى ، وكمان عندك السولتير على الكومبيوتر فيه ناس دلوقتى بيلعبوها وهما مغمضين ومتنساش تقتح فايل إكسل وفايل وورد عشان لو حصلت كبسة عليك ، تعمل واحد ماكسيميز ليهم وإشتغل

رابعا : لازم يبقى قدامك كومة كبيرة من الورق والملفات على المكتب ، لو ماعندكش ورق كفاية عندك ورق شغل السنة اللى فاتت هو نفسه شغل السنة دى حطه أمامك ومحدش فاهم حاجة ، رصص وعرض ولو حد جايلك حط ورق الموضوع فى نص الورق وطلعه من وسط الورق لما يجيلك ده بيدى إنطباع إنك عارف كل ورقة فيها إيه

خامسا : حاول بهدوء ترسم ملامح على وجهك قدام مديرك إنك متضايق ودماغك فى الشغل ده بيخليه عارف إنك مشغول ولو فيه شغل زيادة يوزعه على حد غيرك

سادسا : حاول تظهر دايما فى الأوقات المتأخرة عن مواعيد العمل وخصوصا لو مديرك موجود ولو مش واخد باله إنك لسه موجود ، إعمل قلق يعنى إمشى بالموبايل وإتكلم فيه وإتحرك أمام مكتبه وقول أى كلام شبه الشغل بس ماتنساش تعمله على السيلانت أو الصامت عشان لو رن الموبايل وهو على ودانك هاتتكشف ياحلو

سابعا : حاول تستخدم شوية مصطلحات أجنبية حديثة وإنت بتتكلم مع الناس أو مديرك ده بيديهم إحساس إنك أكبر كتير من الوظيفة اللى إنت فيها ، وممكن تجيب المصطلحات دى من الإعلانات اللى بتكون فى أى مجلة كومبيوتر أجنبية

ثامنا : وده الأهم إوع يكون مديرك بيقرأ مدونات لأنى ناوى أنشر النصائح دى

نظر لي صديقى نظرة كلها إمتنان وعينيه تكاد تذرف بالدموع على تلك النصائح وبيسلم على وبيقولى أحمد باشا أنا مش عارف أقولك إيه ؟ ده إنت سيادتك كنز
قولته لالا ماتقولش كده ، ده أنا تحت أمرك أى حاجة كلمنى على طول .. بس المرة الجاية إعمل حسابك على واحدة سوبرسوبريم من بيتزاهت حجم كبير ومتنساش الإضافات تكون فواكه البحر
----------------------------------------------------------
تحديث : أعتذر عن عدم إستطاعتى متابعة التدوينات والتعليقات خلال الأيام السابقة وحتى الآن 1 ديسمبر
إنتظروني قريبا جدا

28 comments:

  1. فييين نصايحك دي من زمااان .. الله لا يحرمنا من كدا نصايح .. و لو عند سعاتدك وقت كتر نصايح و لك مني عزومة على كشري جحا

    ReplyDelete
  2. يا ريت يا أحمد تعملي موضوع نصايح خايص جدا
    النصايح دي علشان أقنع أهلي بإن الجواز فكرة فاشلة من أساسها
    :)

    وهابقى أعزمك على واحد رز بلبن
    :P

    ReplyDelete
  3. انت جبت الخبره المكتبيه البيروقراطيه دى منين ...انت منهم

    ReplyDelete
  4. فعلا نعم الموظف المثالى
    ربنا ما يحرمك مننا

    ReplyDelete
  5. هي دي النصايح والا بلاش :)
    بس انا ابتديت اخاف منك

    ReplyDelete
  6. هههههههههههههه

    يالنصااااااب هههههههه

    مرة ثانية اطلب وجبه للعائله كلها خخخخخخ

    ReplyDelete
  7. هههههههههه عسل
    بس أنا بقى هبعت نداء إلى كل مديرى العالم وهديهم عنوان البوست وأقولهم إنك أنت المحرض على انحراف الموظفين البيروقراطيين الهاديين المؤدبين
    وبالمرة يبقوا يدرسوا البوست ده فى كليه تجارة ادارة الأعمال

    ReplyDelete
  8. يا سلام نصايحك يا احمد
    انا هنفذها و ربنا يستر

    ReplyDelete
  9. dee wallahee nasaye7 gamdaa geddan ya Ahmed bashaa...bass tefteker law 2et2afasht 7aye3meloo feyya 2eah ???!!!! :-)

    ReplyDelete
  10. If my boss read this text he will certainly fire me :)

    ok, if he don't fire me, i will go to the army and he won't have this chance :D

    ReplyDelete
  11. ظلمة يا راجل فعلا اللي بيقولو عليك مابيشتغلش

    :)

    ReplyDelete
  12. الورأه اللي عالمكتب مكتوب عليها
    URL
    غلط
    :p
    :))
    ممكن في بوست قادم تكتبلنا نصائح ذهبية لكسب قلوب العذارى؟:))
    هاها:)

    ReplyDelete
  13. أحمد باشا طيب اللى ما عندهوش شغل اساساً يعمل ايه ياريت نصايحك ليا ولتمنيه مليون من عينتى وما تخافش حعزمك على حلة بتاع من اللى انت بتقول عليه ده

    ReplyDelete
  14. This comment has been removed by a blog administrator.

    ReplyDelete
  15. إيه دة (: بجد دي نصايح مهمة جداً و أقسم و أجزم إن هو دة اللي ينفع في بلدنا . أقولك بأمانة أنا عملت كوبي من البوست بتاعك و إحتفظت بيه أنا واثقة إني هستفيد منه إن شاء الله لما أبقى ألاقي شغل
    بجد من كل قلبي ربنا يوفقك و يكرمك

    ReplyDelete
  16. كلام صح للأسف
    هو أنت دا أسلوبك فى الشغل فعلاً يا أحمد
    وأنا أقول بتجيب وقت تكتب البلوج منين
    :p

    ReplyDelete
  17. بص يا أحمد انت جبت المفيد
    لأن كله محصل بعضه
    بس اسمح لى اضيف حاجة


    ممكن أزود شوية نصائح للستات

    إياكِ ثم إياكِ التورط فى علاقة صداقة مع بنات تانيين فى العمل ..
    وإن كان ولابد تبقى اللقاءات فى مكتب بعيد عن مجال رؤية الزملاء والرؤساء فى القسم
    ويا حبذا لو كان فى الحمام

    الحديث فى الموبايل يجب ان يقتصر أمامهم على دقيقة أو اتنين مرة او مرتين فى اليوم
    وبعدها ممكن تاخدى الموبايل الى الحمام برضه ورنى للى طلبك يا حلوة

    لا مانع من الهزار الخفيف القليل جدا والا هيقولوا عليك غلسة ويحاولوا يأسفنوكى
    علشان يرتاحوا
    والشطارة انك تفتحى باب التهريج وتخرجى وتسيبى الزملا متورطين فى الضحكات

    حاولى التقليل من تناول المشروبات والمأكولات فى المكتب
    وإلا هيعتبروك ست بيت لا تصلح للعمل ولكن تصلح للكيكات والساليزونات

    احذرى من التواجد فى منافسة حقيقية فى العمل مع زميل رجل
    لأنك هتكونى خسرانة خسرانة ..ليه ؟ لأنه راجل وابن راجل واللى بيحكم بينكم اكيد راجل

    لا تفرحى كثيرا لو رئيستك امرأة ف "شر السيدات المديرات" .. وحاولى تجنبها قدر الأمكان
    ولا تجاريها ابدا فى طريقة لبسها ..ولا تفعلى العكس فتحرجيها

    حاولى ان يكون لبسك عااادى.. غير "مستفز" للسيدات وغير "منبه" للرجال
    ليظن رؤسائك انك ياحرام لا تجدين الوقت حتى لعمل اى شوبنج

    ________

    يارب تنفع نصايحى للبنات

    على فكرة منتظرة رأيك فى قصتى الجديدة

    ReplyDelete
  18. يا نصايحك يا شقير ... فينك يا عمرو خاااااااااالد تتفرج و تسمع نصايح احمد شقير ...

    بس هطلب منك طلب شبه طلب طعمه .. بس علي النقيض .. اعملي انا بقي نصايح تقنع اهلي بان الجواز اهم شئ للبنت و ان القطر لو فاتها هتقعد ف ارابيزهم و ان البطران اخرته قطران .. ممكن ؟

    ReplyDelete
  19. لا تفرحى كثيرا لو رئيستك امرأة ف "شر السيدات المديرات" .. وحاولى تجنبها قدر الأمكان

    اسأليني أنا يا حلم :(

    ReplyDelete
  20. هههههههههههههههه
    نسيت اقول ان دا بالنسبة للقطاع الخاص اما القطاع الحكومى فمن حق الموظف الاتى
    1- حل الكلمات المتقاطعة المملة جداانشاء الله ياخد فيها اليوم كله
    2-الدنيا مش حتطير والى مش عاجبه يخبط دماغه فى الحيط
    3- طول مانت مظبط رئيسك فى الشغل اعمل اللى انت عاوزه يك تروح ساعة رضاعة
    4-الستات واخده معاها شغل البيت من كرمب وبتنجان وخضار وملوخية وكله شغال بيساعد
    5-مش محتاجين يروحو الحمام علشان يتكلمو لان كده كده الكوسه ماينفعش تتاور فى الحمام
    6-تمشى من الشغل الساعة واحدة وفوت علينا بكرة تقولها للتخين
    7-لو انت مدرس حسس الموجه انك مستبيع وينعل ابو التعليم علىاللى فيه ومش مشكلة انك تغيب انشاء الله من الامتحانات وجمد قلبك وخليك على طبيعتك ( خد معاك ديو وانت رايح
    8-محدش يعمل كده احنا مش ناقصين خراب

    ReplyDelete
  21. إخربها كمان يا عم أحمد ماهى ناقصه

    ReplyDelete
  22. hi ahmad,
    great post... v. funny
    it reminded me of dilbert's comics... read the books if u haven't yet... or look'em up on line

    ReplyDelete
  23. مساعد
    والله يامساعد .. عزومة كشرى جحا دى ممكن تديك نصايح بس هاتبقى عايزة كمالة

    طعمة
    عزومة الرز بالبن .. دى تنفع مع نصائح تربية الأطفال

    islam yousef
    من عاشر القوم ياإسلام

    taher
    تسلملنا دعواتك ياطاهوور

    chatter box
    تخافى منى ؟ ليه بس دا أنا غلبااان

    q8tya
    فعلا فكرة الفاميلي سايز دى صح .. نطلب حجم عائلي المرة الجاية عشان الكل ينبسط

    hera
    لو هاتدى عنوان البوست للمديرين .. أرجو إنك تشوفى لى شغلة معاكي

    bosbos
    نفذى إنتي ومالكيش دعوة .. وبكرة تشوفي النتيجة

    mohamed yousef
    نورت المدونة يامحمد .. لو إتفقشت ولا أعرفك يامعلم

    free soul
    ومين قاللك إنه مابيعملش كده هوه كمان؟

    mindonna
    لعلمك بأه أنا أكتر واحد بيشتغل فى البلد دى

    khalid Jarrar
    صح .. إسم الموقع غلط .. وكمان التاريخ غلط يعني يوم 27 كان يوم أحد مش إتنين .. والسبب واضح فى الصورة إنى أنا جعان
    ولو تلاحظ كمان الإيميلات اللى فى الصورة .. الراجل بيصرخ وبيقول إن البضاعة ماوصلتش

    shady
    فعلا عندك حق ده أنا نسيت العواطلية فعلا اللى مالهومش شغل أساسا
    معذرة .. والحلة دى خليها عليا أنا لغاية مالحزب يلاقي شغل

    taty
    بأه هاتحتفظي بنسخة من البوست ده معاكي لغاية ماتلاقي شغل .. طيب خللي بالك لتبعتيه غلط مكان ال سي في

    lilli
    ده بس جزء من تكتيك العمل .. طبعا إنتى عارفة إن كل عمل وله تكتيك

    حلم
    هاها .. ده إنتي حكاية
    أول مرة اعرف إن ممكن تكون فيه نصايح حريمي .. بس بنصايحك ديه هايبقى العمل بالنسبة لينا ممل جدا .. وجود الست برده فى العمل بيطرى القعدة وبيخلينا كده واخدين بالنا من نفسنا وكلامنا وتصرفاتنا .. شكلى كده أنا اللى هاعزمك على السوبر سوبريم
    أنا هاخلص وأعدى على بلوجك

    romantic rose
    شاكللك كده عايزة تتجوزى .. وإنت لسه صغيرة والعائلة معترضة صح؟
    عموما ليكى عندي وسائل جهنمية تجنن
    بس هوه العشا إيه ؟

    طعمة
    فعلا وماأدراك ما إدارك المرأة ؟؟

    taher
    فعلا أعتقد إن هى دى التقاليد التمانية الأساسية بالعمل الحكومي .. أصلى للأسف شاهدته ولم أعمل به
    بس الفكرة بأه إن جميع موظفى القطاع العام والحكومة بينفذوها كلها بلا إستثتاءوبمنتهى الدقة كأنهم واخدين فيها دورة

    خجل
    هاها .. طيب خليها جيد جدا

    أيوب
    يعنى هى جت علي أنا .. ماهى خربانة خربانة على رأيك

    saudieve
    الحقيقة ماقراتش لديلبرتس قبل كده بس شوفت دى له لقيتها فعلا شبه

    http://carbon.cudenver.edu/public/physics/xcsz/Dilberts.gif

    kazmawy
    الله يعافيك .. شد حيلك كده ونفذ المطلوب

    ReplyDelete
  24. اية الجمال ده
    انا نزلت شغل من شهر و بسبب الشغل دخلت اليوم و كتبت في جوجل كلمه
    مديرك
    لاعلم كيف اتصرف مع المدير و الزمايل
    هناك احصائية ان الموضف المصري يعمل دقيقتين و نصف يوميا
    لم اصدقها حتى نزلت الميدان

    ReplyDelete
  25. علي فكره النصائح ليست فقط للموظفين المصريين ، فالأمر لايختلف كثيرا خارج مصر ، أقصد بالطبع في البلاد العربية
    بس كانت تبقي أحلي لو أنك كملتها لتكون الوصايا العشر

    ReplyDelete