Tuesday, November 08, 2005


العمرة



كانت المسافة بينى وبين الحجر الأسود أربع أو خمس صفوف فى بداية الطواف ، وقلت كل طواف أنتقل صف للداخل وبكده أوصل للحجر فى الطواف الرابع أو الخامس وكان الحال أن إنتهى بي الطواف السابع وأنا شبه خارج الحرم .. حجر أسود مين ياأبو حميد ، فى الحج بأه وعليك خير
بعد الطواف كان هناك السعي بين الصفا والمروة .. دخلت الصفا فإذا بالناس شبه ساكنة لاتتحرك ، لا يوجد موضع لقدم . محمد صاحبى قال ياأحمد يمكن فيه دور ثان زى الطواف مايكونش زحمة كده .. قلت له بلهجة وكأنى مفتى الإسلام الأول بعد أن رفعت حاجبى الأيمن .. يامحمد السيدة هاجر لما سعت كانت بين الجبلين يعنى على الأرض .. إزاى يبقى فيه دور ثانى.. الطواف لازم يكون على الأرض.. طيب والعمل .. ندخل وخلاص
بعد حوالى خمسة متر حسيت إن رجلى إرتفعت من على الأرض والناس هى اللى بتحركني ،إحساس خطير إنك تحس إنك طاير ، محمد صاحبى يختفى رويدا رويدا ، لا أنسى أن أقول له إنه يجب أن يهرول بين العلامتين الى لونهم أخضر أعتقد إنى لمحت منه نظرة كلها غيظ
بدأت الوسوسة تعمل عندى فى بداية الشوط الثانى من السعي .. جالي إحساس إنى فقدت فوطة الإحرام السفلية ، ومش عارف أنزل إيدى أتأكد من الزحمة .. فضلت كده لغاية نهاية الشوط الثانى ، الحمد لله كله كان تمام
بعد إنتهاء العمرة بالصلاة خلف مقام سيدنا إبراهيم ، جلست مع محمد صاحبى نستريح ونحن ننظر إلى الكعبة وإبتدت أسئلة من نوع غريب

أنا : هو مفتاح الكعبة فين ؟
محمد صاحبى : مفتاح الكعبة ..!! إنت عايز إيه ؟
أنا : حاسس إنى عايز أدخل جوه
محمد صاحبى : سمعت إن المفتاح بيكون دايما مع بني شيبة
أنا : بنى شيبة ولا بني عبد الدار ؟
محمد صاحبي : إسكت ياأحمد

بعد فترة صمت

أنا : محمد .. معاك آلة حاسبة ؟
محمد صاحبى : آلة حاسبة .. إنت بتهرج .. عايزها ليه؟
أنا : مش يامحمد النافلة فى رمضان تعادل فرض والفرض بسبعة ، والصلاة فى الحرم بمائة ألف صلاة .. يعني الصلاة الواحدة بسمعمائة ألف صلاة وليلة القدر بألف شهر عبادة يعنى اكتر من ثلاثة وثمانين سنه عبادة .. يبقى الصلاة فى الحرم ليلة القدر بكام ؟
محمد صاحبي : إسكت ياأحمد

فى اليوم التالى .. محمد قالى تعال نطلع الدور التاني نصلى ونشوف المنظر من فوق ، أول ماطلعنا لقينا فيه الصفا والمروة فوق كانت أقل زحاما كثير وأعرض كثيرا .. نظر لي محمد نظرة قبل ان يكملها قلت له : شوف يامحمد منظر الكعبة من هنا جميل أد إيه ..!!؟

12 comments:

  1. لوووووووووووووووووول
    لو كنت مكان صاحبك محمد كنت ........ والا على ايه حرام يروح ثواب
    العمرة بتاعته .
    دماغي وجعتني من كتر الحسبات بس اخيرا وصلت لنتيجة بس مش
    متاكدة منها:)
    بوست جميل جدا :)

    ReplyDelete
  2. واضح انها كانت عمرة زى العسل اللى كلها مقالب (مش مقصودة طبعا ) والله يكون فى عون صاحبك

    ReplyDelete
  3. لووووول شكله محمد كان نفسو يضربك

    عمره مقبوله ان شاء الله...:)

    ReplyDelete
  4. hahahaha:)))
    i love your writting style very much:)
    khalid*

    ReplyDelete
  5. على فكره الاسئله دي بتشغل تفكيري انا كمان
    عمره مقبوله و كل سنه و انت طيب

    ReplyDelete
  6. LOL
    عندك قدرة عجيبة لتحويل حتى اكثر المواضيع جدية الى موضوع.... يجنن!!
    الحمد لله على السلامة.

    ReplyDelete
  7. تقبل الله منك يا عم احمد

    ReplyDelete
  8. عمرة مقبولة بإذن الله يا أحمد

    بس على ما أتذكر إن الصلاة عند مقام إبراهيم بتبقى بعد الطواف مش بعد السعي !!!

    تقبل الله منا ومنكم صالح الأعمال
    اللهم آمين

    ReplyDelete
  9. أسكت يا أحمد


    وراعو مشاعر الناس اللي بتبلبس نظارة


    في الوورد فاريفيكشن

    ReplyDelete
  10. ربنا يتقبل منك إن شاء الله، بس فعلاً الصلاة عند حجر إبرهيم بيكون بعد الطواف مش بعد السعي.. أنا سبقتك ورحت في النص الأول من رمضان والحمد لله كانت عمرة ممتعة جداًوسهلة جداً جداً كنا حاسين إننا برضه طايرين بس مش الزحام. كنا طايرين في حب الله ورسوله صلى الله عليه وسلم...
    أما اللي حصل لك ده فهو نفس اللي حصل لي السنة اللي فاتت لأني رحت في النص التاني من رمضان وكانت بهدلة وإنت عارف طبعاً تلاحم قوى الشعب بتكون عاملة هناك إزاي.. بس برضه كانت جميلة وربنا ما يحرمنا منها أبداً ويرزقنا ثوابها إن شاء الله

    ReplyDelete
  11. فعلا .. كلام الاخوة المفتيات طلع مظبوط وطلع إن الركعتين ورا حجر إبراهيم عقب الطواف مباشرة .. ممكن تفتونا ينفع العمرة زى ماعملتها كده ولا لأ

    Chatter box
    هاهاها ..محمد أكيد هايخش الجنة بسببي

    Taher
    فعلا زى ماقلت بالظبط .. مافيش حاجة مقصودة

    Khalid Jarrar
    شكرا على المجاملة الرقيقة

    bosbos
    الحمد لله ماطلعتش أنا لوحدي

    Aunt Najma
    مانتيش ناوية تفتحى الكومنتس عندك ؟

    Smile
    منا ومنكم ياسمايل .. نورتنا

    طعمة
    كلامك مظبووط .. برافو إكتشافك

    نون النساء
    مش أنا اللى باحط الوورد فارفيكاشن .. أنا كمان وأنا باكتب كومنت عندى بأبعته أكتر من مرة عشان الوورد فافيكاشن

    amira
    فينك من زمان
    عمرة مقبولة منك وتقبل الله .. كلامك صح بخصوص النصف الأول اكيد أروع بكتير

    ReplyDelete
  12. ان شاء الله هانعرف سوى اذا كان ربنا تقبل منك العمرة واداك الثواب اللى حسبته بالالة الحسبة ولا فيه كلام تانى ؟.
    وكلها خمسين او ميت سنة اول ...وهنتقابل فى يوع العرض

    ReplyDelete