Friday, May 26, 2006


ياللي بتحبوا الحياة




دعوة جميلة تلقيتها من تارا وغادة وفهرنهايت للإجابة على سؤال ملخصه أنا بحب الحياة إمتى .. بس انا غيرته وخليته بدل إمتى يكون ليه ؟؟

بحب الحياة عشان وعدتنا بحياة تانية يقدر المظلوم فيها يلاقي العدل اللي إفتقده

بحب الحياة عشان لسه فيها واحد فقط محترم له ثقله قادر يقف قدام إسرائيل في عصر العهر السياسي إسمه حسن نصر الله

بحب الحياه عشان لينا أصبح ليها أخيرا إسم ثلاثي وهو لينا أحمد الفيشاوي ، وليذهب والديها للجحيم فالطفلة ليس لها أي ذنب في أنها نتاج هذه الحثالة

بحب الحياة عشان متوسط قيمة الصوت الإنتخابي عندنا حوالي أربعمائة جنيها في حين انه وصل في الكويت لخمسمائة دينار كويتى حوالي عشرة آلاف جنيه على حسب ماجاء في جريدة السياسة الكويتية

بحب الحياة عشان لسه فيه ناس مابتعاملكش على إنك كيس جوافة

بحب الحياة لأنها احيانا بتكون زي روتانا سينما مابتخليكش تغمض عنيك وتوريك اللي عمرك ماشفته

بحب الحياة عشان كمال الشاذلي ماقدرش يحقق أمنيته في إنه يكون مذيع تيلفزيوني لو ماكانش برلماني أثري زي ماقال لمنى الشاذلي في العاشرة مساء

بحب الحياة عشان فشلت إني أحب شرب السجاير بالرغم من إني باشرب شيشة

بحب الحياة عشان إكتشفت بالصدفة من خلال محرك البحث ياهوو إن بوست ليه .. ليه موجود بالحرف في أكتر من مائة منتدى وموقع بالرغم من عدم وجود أي إشارة للعبد الفقير لأ ومرة سمعته في نجوم إف إم

بحب الحياة عشان بوسي سمير بقالي شهر ماشفتهاش ، على التلفزيون طبعا

بحب الحياة عشان اخيرا لقيت حرف الذال ع الكيبورد في الكومبيوتر الجديد بعد أربعة وعشرين ساعة من البحث المضني .. لقيته جنب الإسبيس زرار المسافة.. انا مبسوط جدا حتى شوفوا .. ذ ذ ذ ذ ذ ذ

بحب الحياة عشان قدرت ماأقولش لأي واحدة في حياتي كلمة بحبك إلا للي حبيتها بجد .. مراتي

بحب الحياة عشان إكتشفت إني بعد ماركبت العربية الهامر للتجربة فقط ، إنها عربية عادية جدا لاتزيد شيئا عن العربية زووكا بتاعة ليلو

بحب الحياة عشان ادتني فرص نادرة زي مثلا انى مسكت كأس العالم الحقيقي الذهب الي مسكه بيليه ومارادونا وزيدان واتصورت معاه كمان وزي مثلا لما لقيت نفسي بعرف يسرا إزاي ترقص على أغنية ووك لايك آن إيجيبشيان للبانجلز في فيلم للراحل محمد شبل وشفت انور السادات ع الحقيقة قبل مقتله بيومين وكتير كتير

وأخيرا ... بحب الحياة عشان ناس حلوة إفتكرتني في التاجنج ده ، وناس جميلة زي الي بيقروا البوست ده

42 comments:

  1. حبها اوى
    بلاش اقولك على ميت سبب يخلوك تكرهها
    :)

    ReplyDelete
  2. I guess you had a very rich life, nice post.

    ReplyDelete
  3. يخرب بيتك يا جدع انت جبت الكلام دة منين
    اكيد انت كنت ساكت دة كلة عمال بتظبط لنا فى الكلام دة
    كلام جميل مقدرش اقول حاجة عنو
    طبعاً كلنا بنحب الحياة بس مش فى مصر 2006
    بنحب الحياة فى مصر قبل ما يحصل اللى انت حكيت علية وحصل فى المنصة وخليها فى سرك علشان العلوج ما يفهموش

    ReplyDelete
  4. طول ما نفر سيدا كلام

    واجد عشق زين

    طول ما نفر علي بابا كبير

    دايما فكر

    اكل ما في

    كلام ما في

    سوي ترتيب زين

    الله يحب انت

    نفر واجد يحب حياه

    ReplyDelete
  5. فكرتني بأغنية فريد الحياة حلوة بس نفهمها

    ReplyDelete

  6. السلام عليكم

    حمدا لله على السلامة

    بالنسبة لموضوع ليه اللى انت ذكرته فى الحقيقة لقيته فى احد المنتديات و كنت رديت فيه هنا فى بلوجك على فكرة بس كنت متردد اذكر فى المنتدى انه منقول من البلوج بتاعك لانى مكنتش عارف اذا كنت انت اصلا تقله و للا من تأليفك , عموما حاقوم بالواجب و اكتب انه منقول من بلوجك طالما انك انت صاحب الفكرة من اساسه.

    بالنسبة لجزئية تحقيق العدالة فى الحياة الاخرى ,, ممممممم مش عارف ... بس دا نفسه ظلم انك تتظلم و تستنى بعد لما تموت و بعدييييييييييين تتنصف تانى .

    بعد ايه ؟

    ياريت تكلمنا عن موضوع كاس العالم و رؤيتك للسادات .

    حاموت يابوحميد و اجرب الهامر انا شخصيا اعشق سيارات الدفع الرباعى .

    كلمة اخيرة واقفة فى حلقى و معلش اقبلها منى .

    انا قريت موضوعك انك حجيت , مش شايف ان افكار بعض الصور فى صور طريفة اوفر شوية ؟

    اخوك مؤمن


    ReplyDelete
  7. الزميل الرائع شقير
    أولا أحب أشكرك عل التنوية بتاع البلوج الجديد و كأنك ناقص تكتب تحته wanted
    أو مثلا خلوا بالكم من الست دى و أهدرنا دمها و مالو ماهو لما لقيت صورتى منورة عندك و أرتفع مؤشر الأدرينالين عندى ( مع الأعتذار لضميرى) خليتنى أحب الحياة لدقائق
    القصد - انت عارف ان حسن نصر الله ده راجل كده و مش من نوعية نظمى بالمرة ده (يمكن هو و نجاد بتاع ايران ) يكونو من الأسباب القوية فعلا لحب الحياه - فاهماك يا شوقير
    - بالنسبة لموال الست هند و اخونا أحمد فدول ليا معاهم ليالى طويلة لأنى فعلا وصلت بسبب هند و أبوها الأستاذ نفيسه لقمة التذمر و السخط على مجتمعنا الذى يقينا سوف تندثر فيه أى معانى راقية أو تعاليم دينية بسبب أمثالهم - وحيات أبوك يا شيخ سيبنى كاتمه فقلبى و هفوق للى خلفو أهاليهم فى الرواقة
    - أما بخصوص الفاضلة بوسى سمير يا ظالم فالسيدةكل غلطتها يعنى انها طلبت تطلع فوق الروف !!!!! هو ده جزاتها الولية كانت عايزه تأكل الفراخ و بالمرة تحط النقط معرفش فين
    ماتسيبوا اللى يحط النقط يحطها مطرح ماهو عايز- مش أحسن ماتحطها فى الطريق العام و يبقى فعل فاضح - الله ماتسيبيه يمسكها يا فوزية
    - على فكرة انت لقيت حرف الذال لما دفعت آخر قسط للحاسوب أنا كانو قاطعين عنى حرف ال ح بالرغم من أهميته فى حياتى و رجعوه لما دفعت آخر كمبياله - يعنى مش صدفة و ادفعوا اللى عليكو

    ReplyDelete
  8. بحب الحياه عشان لينا أصبح ليها أخيرا إسم ثلاثي وهو لينا أحمد الفيشاوي ، وليذهب والديها للجحيم فالطفلة ليس لها أي ذنب في أنها نتاج هذه الحثالة

    اى والله الاتنين زباله

    ReplyDelete
  9. انا بقترح يا شقير اننا نضرب الست ام برقع دى وما نخليهاش تدخل عندنا اصلها باين عليها قريبة ابو الليل
    وممكن تخلع على سهوة زية

    ReplyDelete
  10. بحب الحياة عشان قدرت ماأقولش لأي واحدة في حياتي كلمة بحبك إلا للي حبيتها بجد .. مراتي

    ياريت كل الناس زيك..متوازن.. و مش منافق، واضح ومحدد... اعتقد كل دى مقومات تؤهلك للقدرة على حب الحياة، مؤهلات ربما باتت نادرة وغير متوفرة فى هذا الزمن ...تحياتى وحمد الله على السلامة .. البلوج نور

    ReplyDelete
  11. شكرا على الاستجابة
    عيش حياتك ياريس
    وعقبال مانمسك كاس العالم جميعا باذن الله
    .....
    ايه ياريس بس الغيبة الطويلة دي؟ .. حمد الله ع السلامة ... على فكرة بوست ليه دة يستاهل بجد

    ReplyDelete
  12. تصدق انا معدي عنك و انا مكتئب و متنيل بستين نيله بص و الله ابوست ده خلاني احسن كتير الف شكر يا باشا علي العلاج و افزيته هاتوصللك
    عندك دفع بالفيزا كارد

    ReplyDelete
  13. عارف ياأحمد أنا باحب كلامك لية ؟ علشان كلامك بسيط وفيه عمق كبير قوي لما بتضحكنا.. بتكون علي مواقف عدت علينا كتير ولا كنا واخدين بالنا .. ولما بتتكلم جد برضة بتكون مواقف مش واخدين بالنا منها برضة
    يعني ببساطة احنا بنكون طال عمرك كيس جوافة في الحالتين
    تحياتي

    ReplyDelete
  14. to be honest i also thought i saw the whole "leh leh" post before

    but i got it over email and it was in english, i though you got it from somewhere else. didn't know that you were the one who thought it up


    glad you're back to blogging

    we missed you mr shokeir

    but we need another sunglasses story soon to feed our addictions


    keep it up

    ReplyDelete
  15. عارف يا احمد
    انت روحي روحي روحي
    وانت سبب من الاسباب اللي بتخليني احب الحياة بجد
    الا صحيح مين حسن نصر الله ده
    قريبك

    ReplyDelete
  16. بس ماقلتلناش ازاي مسكت كأس العالم وفين؟ وازاي علمت يسرا رقصة الكذا كذا على أغنية مش فاكرة اسمها
    ولا قلت لنا ازاي شفت السادات الله يرحمه قبل المنصة...

    ع العموم، ربنا يحلي الحياة في عينيك أكتر وأكتر
    أسبابك جميلة وشقية وفيها حتة سخرية على مسحة رومانسية

    ReplyDelete
  17. يا ماما أنتى سيبتى كل الاسباب و ماسكه فى الجملة بتاعت شوقير:بحب الحياة عشان قدرت ماأقولش لأي واحدة في حياتي كلمة بحبك إلا للي حبيتها بجد .. مراتي
    طبعا انتى مولعه و مفروسة زى كل الستات اللى هتقرا الجمله دى
    فكك بقى من موضوع محدد و معين و متوازى مستطيبلات انا عارفه انك من ساعتها مابطلتيش عياط
    يارب يا نظمى أشوفك لازق فى عمود نور عريان و النطرة تمطر عليك و تشعلل كده و أنا أقف فى البلاكونه أشرب سيجارة و ابقى آخر استكياف
    بطل بقى يا شوقير هى المشرحه ناقصة قتلا

    ReplyDelete
  18. حمد الله عالسلامة باغالي

    ReplyDelete
  19. أنا بدأت أكره الحياه
    علشان خاطرك و بالعند فيك

    ReplyDelete
  20. ايوة خدامة:
    طيب بالزمة و غلاوة نظمى عندك ما اتفرستيش من الجملة دى؟؟ بقى الواحد عاش و قرب يخرج من الدنيا ومش لاقى حد يقولها له، عاوزانى اشوف واحد محترم طلعها بصدق من قلبه ومقعدش يتننك ويحسبها تمنيات واربعات و يد2 كب الف 4 والادهى انه اعتبر كلمته عهد لها وفقط ومش عاوزانى اتفرس (لامؤاخذه ياشقير مش بحسد طبعا وربنا يهنيكم ببعض.
    تعرفى لو اتخانقوا حنبقى احنا السبب..
    ومعلش ياشقير قلبناها شات..

    ReplyDelete
  21. ربنا يصلحلك الحال و يحلي ايامك كمان و كمان يا أحمد ..

    بس يا رب نقدر نشوف نسبة جمال الدنيا اكبر من نسبة الظلم و الفُحش يا رب !!

    ReplyDelete
  22. ايه يا احمد باشا زى ما بتحب اى حد يقوهالك ايه الغيبه الطويله دى وحشنتا ولله انا كل مره ادخل علشان اشوف البلوج بتاعك ملقيش فيه جديد ازعل ولله وعلى فكره انا مبحبش الحياه علشان اخدت كل حاجه حلوه فى حياتى واتمنى انك دينا الجديد كل يوم واشطات عليك اخوك شلاطه

    ReplyDelete
  23. واضح انك غاوى نقار
    بدليل فرحتك الغير عادية بتمر حنة

    هى بجد خلت الدنيا مختلفة بدل الرتابة الفظيعة اللى احنا فيها

    المهم

    اسبابك كلها لحب الحياة تستحق الاحترام
    ولو انى شايفة حاجات كتير تخلينا نهرب من مجرد التفكير فى الاجابة

    على فكرة حمدالله على السلامة
    مااحنا ماوراناش حاجة غير نقولهالك كل شوية

    ReplyDelete
  24. عمل ممتاز يا احمد
    بس يا رب تكون كده على كول
    وتكون احسن
    انا هستنا منك الاحسن
    ربنا معاك

    ReplyDelete
  25. استاذ كالعاده
    تنويه
    انا بحب الحياه
    بال اسباب ولا تفسيرات
    بحبها عشان هى حياتى بكل حاجه فيها

    وبعدين فيها ايه يا جماعه لما واحد يقول للانسانه اللى بيحبها بحبك
    والله انا شايفاها عادى يعنى ولا ايه

    بس بجد
    بهنيك من كل قلبى بس انت كنت غايب كتير جدا قلقتنا عليك ياراجل
    ايوه كده
    وتحياتى على مدونتك الاكثر من رائعه

    ReplyDelete
  26. هى أسباب زى كده اللى مخليانا فعلاً لسه عايشين... أهى حجج بنتمسك بيها فى الحياة
    أدينا بندى نفسنا أمل عشان نعيش

    بوست جميل ، وميرسى انك بتقارن زووكا بالهامر! دى مقارنة مش منصفة للهامر
    :)))))))))
    تروح ايه فى زووكا الهامر
    :p
    على فكرة أنا بعت زووكا لناس ولاد حلال أوى بيراعوها زيى تمام، وجبت لاننوونا، ربنا يطول عمرها

    ReplyDelete
  27. الحياة حلوة بس نفهمها, وأحلى بس تفهمنا

    المشكلة أننا نستعصى على الفهم أحياناً يا صديقي

    ReplyDelete
  28. يا سلام وكدا انا احب الحياه طب ماتستنى لما ناده لبقيت المعتقلين والفقراء والعمال والفلاحين اللى مش لاقين ياكلوا ولا اقولك احنا نعمل مزاد لعيالنا علشان نشوف الحياه دى تمنها كام

    ReplyDelete
  29. وانا بحب الحياة لأن فيها ناس نفسك يا بو شهاب

    لاحظ اني لسه مصمم على ابو شهاب

    أخوك خالد

    ReplyDelete
  30. اجاباتك أكثر من حلوة كما عودتنا

    بس أنا قربت أيأس من تحديث مدونتك و رؤية بوست جديد
    الحمد لله على سلامتك

    طبعا عجبتني فقرة كلمة (بحبك)
    :)

    ReplyDelete
  31. صدقنى مدونه جميله

    ادتنى امل انى ممكن احب الحياه لاى سبب
    طلاما الحب موجود بين الناس حتى لو قرب انو يختفى بس ده كافى اوى انى احب الحياه
    وانا اتمنى انى الاقى اسباب كتير زيك كده علشان احبها واتمسك بها اكتر


    وياريت نكون اصدقاء

    ReplyDelete
  32. ana aslan lamma etsa2alt el so2al da , ma3reftesh agaweb a2ol eh .. ana aslan mish ba7eb el 7ayaha asasan , wa7ed mohandes hayro7 zabet fe el gesh , ha7eb eh fe el 7ayah ya3ny ?!

    3omoman ed3elna rabbena ye2admelna elly feh el kher isA

    btw,
    بحب الحياة عشان لسه فيه ناس مابتعاملكش على إنك كيس جوافة

    بحب الحياة عشان قدرت ماأقولش لأي واحدة في حياتي كلمة بحبك إلا للي حبيتها بجد .. مراتي

    i liked both of them ! :-)

    ReplyDelete
  33. "بحب الحياة عشان وعدتنا بحياة تانية يقدر المظلوم فيها يلاقي العدل اللي إفتقده" هي دي...

    ReplyDelete
  34. جيت متأخر مووووووت!
    معلش بقى المواصلات وكده..
    شكرا يا فندم لتلبية الدعوة، إيه بقى موضوع كاس العالم ده بقى...هه؟

    ReplyDelete
  35. هو انت اللي كاتب ليه ليه؟

    أنا كنت فاكراك مترجمه لأني قريته أيام ما شوفته عندك في مجلة مصرية من اللي بيطبعوا بالانجليزي

    حب يا عم ولا يهمك

    ReplyDelete
  36. استاذ يا احمد واللة
    احييك على كلامك الرائع وموضوعاتك الاروع
    وحمدا للة على السلامة

    ReplyDelete
  37. انا بحب الحياة اكتر واكتر كل لما اشوفك كاتب حاجة واي حاجة
    فخلينا دايما نحبها واكثر من كتاباتك

    ReplyDelete
  38. ايه الحلاوة دى
    استاذ كلام و الله
    بس عملتلك ايه بوسى
    ما تسيبها..عاملة جو
    و الناس شقيانة

    ReplyDelete
  39. لالالالالالا
    دا انت كان لازم تبقي كاتب مشهور
    ايه الموهبه الفظيعه دي
    جبتلنا اسباب الواحد منها كافي لكي نحب الحياه برغم ما فيها
    علي فكرة أنا عايزاك تبخر نفسك لحسن القر جامد أوي هناوخصوصا علي كلمه (بحب الحياه عشان قدرت ماقولش لأي واحده بحبك غير للي حبينها بجد مراتي)
    أصل الأخلاص ده أصبح عمله نادرة ومفيش حد بيفضل يحب مراته وفاكر انها كانت حبه الوحيد ايامها وخاصه بعد السنين دي
    ربنا يخليكوا لبعض ويبعد عنكم العين وتفضل تحبها علي طول
    أصل أنا فخورة بيك أوي لأنك نادر هذه الأيام

    ReplyDelete
  40. Sarwa
    مش محتاج تقوليلي على أسباب كرهها ماأنا عارفها ، بس المهم إنها ماتأثرش فينا

    anonymous
    كلامك صح

    asadma7bos
    لعلمك باه الكلام ده انا كتبته وجه في بالي ساعة ماإبتديت اكتب البوست ، ومن اللي مايفهمش يالورد ماكله فاهم

    أبو شنب
    اللغة العربي الهندي دي هاتوديك في داهية
    إنت فيه واحد نفر مصري مايسوى جرجر هندي

    taty
    أعز الناس .. دايما كده الأمور دايما جايبة معاكي بأغاني

    مؤمن
    أولا شكرا عل المبادرة بموضوع ليه ليه
    ثانيا بالنسبة لموضوع الظلم .. لأ مش ظلم طبعا لأنه هاياخد حقه بصورة هايتمنى ساعتها إنه كان أخد جرعات اكبر من الظلم
    ثالثا: موضوع كأس العالم في البوست التالي وحكاية السادات هاحكيها اكيد مرة
    رابعا : ماليش في العربيات خالص عشان كده مافرقتش معايا الهامر .. لكن أجيبهالك لو عايز
    خامسا : فكرت في موضوع الصور ده كتير وده يدل إن معاك حق .. بس عموما ماظهر كان أخفهم

    تمر حنة
    إنتي بأه موالك موال .. إسكتي مش إكتشفت إن بوسي سمير طلعت شريفة وكنت ظالمها بعد ماسمعت أغنية إسمها واوا أف باين ولا واوا أح .. دي طلعت رحمة .. على فكرة بس من غير زعل انا قريت حقيقي عنها إنها فعلا قبل ماتغني كانت خدامة

    شادي
    مش الإتنين بس اللي زبالة لأ وأهاليهم كمان

    asadma7bos
    فكرتني بأبو الليل .. بس تمر حنة عشان تخلع لازم ترفع قضية خلع الأول

    ماما
    أعتقد إن المؤهلات دي موجودة ومتوفرة في ناس كتير حوالينا بس إحنا أحيانا مش بنعرف نكتشفها
    بس مش عارف كنت حاسس انك ممكن تقفي عند الجملة دي ليه

    فهرنهايت
    إحنا اللي متشكرين إنك إفتكرتنا بالتاج ده

    Haybaaaan
    الخوف بس لا الفيزيتا اللي هاتدفعها تخليك تكتئب ولا حاجة .. خليها على حسابنا عشان تيجي تاني

    زبادي
    ربنا يكرمك يامعلم وبعدين كيس جوافه إيه بأه .. هاها ده أنا لقيتها في الدانوب ماركت بتمانية ريال

    kareemfromegypt
    شكرا على تعليقاتك المتميزة
    بالنسبة لنضارة شمس أنا فعلا فيه كام فكرة قصة ناوي انزلهم قريب
    بالنسبة لموضوع ليه ليه هو بتاعي يمكن فقرة او إتنين بس هما اللي شفتهم في موقع اجنبي وهما اللي اوحولي بالبوست وغالبا فقرة الريموت .. المشكلة إن كل المنتديات نزلتها بنفس الصياغة بتاعتي
    على فكرة هنومة طلعت لذيذة جدا بعد ماعرفتها أصل انا كنت زعلان إنك مقعدني معاها وسايب هيرا ونيرو

    geronimo
    ده عشان ماتفهمش غلط .. كنت خليت بوستاتك من احد أسباب حبي للحياة وخصوصا بوست حلم عايش في خيالي ، أد إيه بيرسم صورة جميلة وبيلغي الماديات من حياتنا

    doaa samir
    كروان .. انا حكيت حكاية كاس العالم في البوست التالي اما حكاية السادات وحكاية يسرا ممكن في بوستات جاية ، وشكرا على دعواتك واقول جمعا إنشاء الله

    تمر حنة
    بصراحة ماقدرتش أمسك نفسي من الضحك على تعليقك وإنتي واقفة لماما ع الواحدة كده .. عموما خلاص انا هاسكت خالص ، امال لوشفتي البوست الجاي هاتعملي إيه ؟

    هوميروس
    الله يسلمك انت ياغالي .. بس أنا لسه مسافر

    islam yousef
    ليه بس كده ..هو الجيش عامل شغله معاك ولا إيه؟

    ماما
    هاها .. ماكنتش فاكر إن الموضوع يفرس كده ، وشكرا على وصف محترم ده ربنا يكرمك ياهبة

    romantic rose
    أنا متأكد إنك إنتي بالذات تقدري تشوفيها حلة ببرائتك الغير معتادة

    anonymous
    لو عشنا دايما في إحساس إن الحياة أخدت كل حاجة حلوة ، لازم هانكرها ، إيه رأيك نعاندها ونحاول نشوف فيها أي حاجة حلوة ونحبها بالعافية .. مش كده ولا إيه ياأخويا ياشلاطة

    حلم
    الله يسلمك .. مش مسألة غاوي نقار بس أنا فعلا لقيت فيها إختلاف
    وسيبك من الأسباب اللي تخلينا نهرب من الحياة أصل لو فكرنا فيها هانكتئب أكتر ومافيش حاجة هاتتحل

    إبن الشارع
    شكرا على تعليقك وإحنا كمان في إنتظار الأحسن منك

    أم المريلة كحلي
    جميل أوي قولك إنك بتحبي الحياة بلا أسباب .. تصدى إن فعلا أجمل حب في الدنيا اللي بيكون من غير أسباب .. انا وقفت عند جملتك البسيطة دي كتير فعلا يعني الحب من غير أسباب بيكون اقوى لأن زوال الاسباب كفيل بالقضاء عليه .. أنا هنا باتكلم عن الحب بمفهومه العام

    lilli
    إنتي جبتي الخلاصة هي فعلا حاجات وحجج بنتمسك بيها عشان تدينا أمل في حب الحياة .. بس الجميل باه إننا نجح في كده
    ومبروك على اللانوس .ز بس أنا عايز لفة بيها ، ممكن ؟

    حائر في دنيا الله
    اللي فهمته من كلامك إن المشكلة فينا وانا أتفق معاك إن ده صحيح في بعض الأحيان

    savior
    مش عارف إنت كئيب ليه كده ؟؟
    معتقلات وفقر ومزاد نبيع فيه العيال .. إيه ياجميل هو فيه إيه بالظبط ؟ عيال إيه اللي هانبيعهم بس
    أنا باهزر على فكرة

    enter-q8
    خالد حبيبي
    أبو شهاب .. أنا عرفت السر
    وانا هنا في السعودية واحد قالي في آخر الكلام أبو شهاب .. إفتكرتك ساعتها وقلتله إستنى إيه حكاية أبو شهاب دي ؟ قالي إنه دايما بيقولوا للي إسمه احمد ابو شهاب .. بس ياترى خالد يبقى أبو إيه ؟

    tara
    شكرا على التاج ياجميل .. بس أنا شفت خبر في العربية عن إنقطاع الكهرباء في بغداد كتير لدرجة إنه وصل في بعض الأحيان لعشرين ساعة فى اليوم .. ربنا معاكي .. مادام وقفتي عند فقرة بحبك يبقى انتي أكيد رومانسية بجد

    النوبي
    الأسباب موجودة ودايما بتكون في حاجات صغيرة .. وشكرا على الرابط وديما أصدقاء

    ahmad al-saeed
    هاها .. مهندس وداخل الجيش ظابط .. أقولك على حاجة تغيظك أنا لما خلصت الهندسة انا اللي طلبت إنى أدخل ظابط
    وربنا يقدملك اللي فيه الخير ياحضرة الظابط أحمد


    nerro
    عاملة زي أكتر حاجة أكرها في الدنيا الظلم

    ghada
    أنا فعلا إستغربت يعني إنتي اللي عاملالي التاكينج وماتجيش ، عموما إبقي خدي صلاح سالم أحسن لو جايو من مصر الجديدة
    موضوع كاس العالم في البوست التالي

    change destiny
    وفي مجلة كمان ولاد الحرامية
    بس حلوة حب ولايهمك دي .. ماشي ياقمر

    rubyeldaly
    الله يسلمك وشكرا على كلامك الحلو

    daktara
    وأنا كمان بحب أشوفك دايما .. ياترى كملت قراءة الكتب اللي كنت شاريها من المعرض؟ أما هند صبري فانا أختلف معاك في توقعك

    hesham
    المشكلة فعلا في بوسي سمير إن الناس الشقيانة دي بعد ماتشوفها وماتطولش حاجة مابتقباش عارفة تحت النقط فوق الحروف .. هاها بتحطها تحت

    goga
    أنا فعلا مبسوط بتعليقك ده وأحب إنك تكوني منورانا دايما ، ومش عارف ليه أي بنت بتقف عن فقرة بحبك دي ..بحس إنها بنت فعلا تستحق تتحب بجد


    شكرا للجميع

    ReplyDelete
  41. هي الحياة بحلوها ومرها لازم تتعاش وتتحب ... واهي ماشية
    بحييك جدا جدا .. بجد كلام رائع
    والحياة هتتحب طول ما فيها ناس مخلصين كدا ومش منافقين وعارفين هما عايزين ايه
    تحياتي ليك

    ReplyDelete
  42. جميلة جدا أجاباتك والتي تدل علي شخصيتك الساخرة

    ReplyDelete