Tuesday, December 13, 2005



ليه .. ليه



ليه لما نيجى نمشى فى المطر لظروف إستثنائية بنروح رافعين أكتافنا لفوق ؟ هاتعمل إيه يعنى
ليه لما نحس إن إحنا دخلنا طريق غلط وإحنا سايقين العربية بنخفض صوت الكاسيت أو راديو السيارة ؟
ليه لما بتكون بطارية الريموت شبه فاضية ، بنضغط على الزراير جامد ؟
ليه لما حد بيهادينا قلم جديد .. أول حاجة وإحنا بنجربه بنكتب إسمنا ؟
ليه بنقول هدية مجانية ..؟ مش المفروض إن الهدية تكون مجانية
ليه لما نكون جوه المنزل والسماء بتمطر بنسأل هو الجو بيمطر بره ؟ هى عمرها مطرت جوه
ليه لما واحد يقولنا خلى بالك الحائط لسه الطلاء مانشفش مانصدقوش ونمد صباعنا نتأكد ؟
ليه الخدمة بتكون سريعة لما المطعم يكون مزدحم أكتر من لما يكون نص نص ؟
ليه لما الواحد بيركن السيارة فى موقف فاضى اللى جاى وراك بيركن جنبك ؟
ليه دايما لما حد بيجري يلحق الأتوبيس تلاقيه مبتسم أو بيضحك ؟
ليه بنفتكر إن لما ندوس على زرار الأسانسير كتير هاييجى بسرعة ؟ أو مثلا ليه لو واحد جه بعديك وأنت مستنى الأسانسير بيدوس على زرار الأسانسير ولا كأنك موجود ؟
ليه لما بنخبط على الباب بإيدنا دايما بنخبط ثلاث مرات ؟
ليه وإحنا بنأكل الطفل الصغير فى فمه بالملعقة .. بنفتح فمنا ؟
ليه فى الأفلام لما يكون واحد ماسك شمعة فى الضلمة بنشوف ظل الشمعة ؟ تيجي إزاى
ليه دايما عندنا إستعداد تام إننا نصدق أى حد بيكلمنا فى ودانا .. بيوشوشنا ؟
ليه لما بنتصل بالتليفون .. دايما النمر الغلط مابتكونش مشغولة ؟ وليه دايما لوحة أرقام التليفون أو الموبايل بتكون عكس لوحة أرقام الآلة الحاسبة أو حتى أرقام الكيبورد ؟ وبمناسبة التليفون ليه لما واحد يعطيك رقم تليفونه بيقوله بسرعة ؟ وليه عمرنا ماإستمتعنا بالموسيقى فى التليفون لما نكون على الإنتظار ؟
ليه لما بنصحى من النوم دايما بنحس إن كمية النوم ناقصها عشر دقايق ؟
ليه الشخص اللى بيشخر وهو نايم دايما بينام الأول ؟
و .. ليه دايما وإحنا بنقرأ البوست بنضحك وساعة مانيجى نكتب الكومنت بنكون مش عارفيين هانعلق نقول إيه؟

41 comments:

  1. Visitor for first timeDecember 13, 2005 2:25 PM

    hahaha :):)

    very smart questions ..... u'll answer later?


    Waiting

    ReplyDelete
  2. جميلة بجد

    ه لنتا اللى يعاشرك هينتحر بدرى

    ههههههه

    ReplyDelete
  3. masha2allah ... el 7agat de min dema3'ak ya bashmonades ahmad ??

    ReplyDelete
  4. أسئلة وجيهة فعلاً بس نصيحة مني ماتتعبش نفسك و تفكر في أجوبة لأنك مش هتلاقي.و نصيحة تانية متتعاملش معاهم على إنهم أسئلة تعامل معاهم على إنهم معلومات كدة أريح

    ReplyDelete
  5. وليه افترضت اننا لازم نسيب كومنت..؟

    ReplyDelete
  6. في الحقيقة الأسئله وجيهه بس مش لازم يعني يكون فيه اجابه.. لكن بقى لما حاولت أدور على اجابه لقيت أنه العقل الباطن وعقد النقص ليها ليها دور كبير

    ReplyDelete
  7. 2allah yegaazeek ya Ahmed....

    2ana ba2eet barakkez fee kol 7aga ba3melha wa3odd 2a2ool 2ana leah ba3mel kedda ???!!!!!!

    2ana 3agbaanee 2awee 7ekayet el sham3aa dee .... teegee 2ezzay sa7ee7 ???!!!!!.... :-)

    ReplyDelete
  8. المشكلة أن الواحد ياعم احمد لازم ياخد كل فكره من اللى انت قولتهم كوبى وبعدين يعلق عليها لوحدها يعنى نعمل موضوع على موضوعك
    بالنسبة لحكاية اكتب اسمى وانا بجرب القلم ما حصلتش قبل كده بكتب مصر التى الحج بيكتب هذه ليلتى وحلم حياتى
    الموضوع ده بس اللى مختلف عندى
    حكاية الشخير دى انا ابصم عليها بالعشره بس انا لاحظت ان اللى بيشخروا تخان يعنى غالباً بيدوسوا فى العشا جامد فبيكبس على نفسهم
    و يناموا بسرعه

    ReplyDelete
  9. هأعلق بس على
    عينة عشوائية اخترتها لأنه على رأى شادى
    كل فكرة محتاجة موضوع
    وأنا اليومين دول فى مود فلسفة
    وهادوشك لو قعدت أحلل

    ليه لما بنصحى من النوم دايما بنحس إن كمية النوم ناقصها عشر دقايق ؟

    دة أهم سؤال فى رأيى
    لأن حتى خبراء الموبايل النوكيا لما اخترعوه عرفوا الحكاية دى
    وعملوا لك
    snooze
    لمدة عشر دقايق
    ليييييه

    إنها بديهيات الحياة يا أخ أحمد
    ثم أن حتى سى عبدو الوهاب
    قاللك من غير ليه

    :)


    ما ينفعش ترحمنا من الوورد فريفيكاشن دى
    اللى بتخلينى امشى ولماارجع للصفحة الاقيها واقفة لسه مستنيانى

    :)

    ReplyDelete
  10. وليه اول ما نفتح البلوج بتاعك بنبقى مبتسمين اوي حتى قبل ما نقرى البوست الجيديد
    .
    .
    .
    البوست جميل جدا :)

    ReplyDelete


  11. السلام عليكم



    اسمحوا لى انى اشارك بالتعليق فى هذه المدونة الرائعة و ارجو ان تقبلونى كعضو جديد



    بصراحة استفزتنى هذه الاسئلة وحسيت انى اعرف بعض الاجابات عنها



    ساعة المطر بنرفع اكتافنا لفوق و نفس الحركة بنعملها تحت الدش لو الميه ساقعة شوية كحركة لا إرادية لمنع سقوط الماء البارد على اجسامنا الدافئة



    عادة الصوت العالى يؤثر على مراكز الاتزان الموجودة فى الاذن و هى حركة بنعملها و احنا بنركن , لكن لما ندخل شارع غلط فهى تحدث فقط لاى شخص معتاد على التحرك وفق القواعد و الاصول فيشعر ان دخوله فى شارع خطاء ضد مبادئه فيسبب له نوع من عدم الاتزان النفسى فيخفض صوت الكاسيت لا اراديا , اما اخوانا اللى واخدنها عافيه فالامر سيان لديهم



    بالنسبة للريموت فهى مسئلة تعود منذ الصغر على افراغ محتويات اى شىء حتى اخره , نفس الشخص اللى بيرفع باكو الشيبسى الى فمه ليلتقط الفتات و يضغط على باكت الكاتشب حتى اخر قطرة هو نفسه من يضغط على الريموت يعنى من الآخر عاوز يحقق اقصى منفعة ممكنة من اللى معاه و مش عاوز يشترى حجارة جديدة = انسان بخيل و شحيح



    موضوع القلم الجديد ده ملحوظة لذيذة و هى مرتبطة بشىء اسمه الإسقاط النفسى على الورق – انا شخصيا أضع علامة صح فى حالة الرضا عن النفس و علامة خطاء فى حالة النرفزة , البعض يوقع لاحساسه بانه نفسه يوقع على شيكات او عقود و من يكتب اسمه عنده الأنا عالية شوية



    - الهدية المجانية !!! الفلوس اصبحت اهم من العلاقات الانسانية و اى هدية تشعرك ان وراها مصلحة اما كلمة مجانية تعطيك احساس انك مش حتدفع فلوس و دى بتاثر فى الناس دلوقتى اكتر



    - مسألة الشتا بره و جوه ( على فكرة انا اسكندرانى و عادة نقول الدنيا بتشتى بكسر التاء ) فكونك جوه فأنت فى الأمان و بعيد عن بهدلة الشتا



    موضوع البوية و غيرها فقد اصبحت اى معلومة من الغير مصدر شك و ريبة الى ان يثبت العكس , مسألة عدم ثقة متبادلة بين الناس لتفشى الكذب



    الخدمة فى المطاعم سريعة فى حالة الزحمة لانه عاوز يخلص من العدد الكبير المرصوص امامه علشان يرجع يحكى حواديت مع زمايله و مش عاوز مدير المطعم او المتر يسمعه كلمتين و فى الغالب بيكون الاكل نص سوا و متكروت



    موضوع الركن ده سببه نقص الاحساس بالامان يعنى لو عربية واقفة لوحدها ممكن تتسرق لكن لو اثنين فالفرصة واحد الى اثنين ان تسرق عربيتك , و لو راكن فى الممنوع فوقوفك بجوار سيارة اخرى برضه راكنه فى الممنوع احساس بفرض واقع و ان الونش لو مر ممكن يسيب عربيتك لانك مش واقف لوحدك



    اللى بيضحك و هو بيجرى ورا الاتوبيس فى الغالب محصلهوش و بيضحك علشان يدارى خيبته قدام الناس و لو حصله عاوز يقول " هيييه انا جدع و باجرى بسرعة !! "



    تاكد من ان الشخص اللى بيدوس على زراير الاسانسير كتير هو نفس الشخص اللى بيضرب كلاكس عمال على بطال فى اشارة واقفة و ده عنده حته كده ناقصة فى شخصيته . عاوز يقول " انا مهم و مستعجل وورايا حاجات لا يمكن ان تنتظر " فى الغالب عاوز يدخل الحمام بسرعة قبل ما ينفضح قدام السكان



    اكتفى بهذا القدر من الاجابات علشان محدش يضربنى , على فكرة انا عارف اجابات بقية الاسئلة



    اخوكم مؤمن



    ReplyDelete
  12. :)أسئلة حلوة
    أضيف لها سؤال واحد لو تسمح : أنا ليه برن للموبايل من الالة الحاسبة لما أكون مش فاكرة حطيت الموبايل فين؟ و أعد أضغط على (=) و برده ميرنش؟
    LOL

    ReplyDelete
  13. :)

    you made me laugh in a deep depression mode, well done :)

    ReplyDelete
  14. معلش يا أبو حميد التعليق المرة دى طويل شوية ,, و هو عبارة عن رد على كل الأسئلة أللى أنت سألتها
    _________________________________

    ليه لما نيجى نمشى فى المطر لظروف إستثنائية بنروح رافعين أكتافنا لفوق ؟
    علشان برفع كتافنا بنخبـّى قفانا , و أنت عارف القفا أهم حاجة فى البلد دى .
    ________________________________


    ليه لما نحس إن إحنا دخلنا طريق غلط وإحنا سايقين العربية بنخفض صوت الكاسيت أو راديو السيارة ؟
    علشان بنستعد أننا نسأل أى واحد فى الشارع عن الطريق الصحيح , و طبعا ً لازم نعرف نسمعة لما يدلنا على الطريق
    ________________________________

    ليه لما بتكون بطارية الريموت شبه فاضية ، بنضغط على الزراير جامد ؟
    تعبير عن حالة من الغيظ و الحقد على الريموت و البطاريات .
    ________________________________

    ليه لما حد بيهادينا قلم جديد .. أول حاجة وإحنا بنجربه بنكتب إسمنا ؟
    علشان الذاتية أللى موجودة عند كل أنسان ,, بيكون عايز يعرف شكل أسمة بخط القلم ده أيه .
    ________________________________

    ليه بنقول هدية مجانية ..؟ مش المفروض إن الهدية تكون مجانية
    مش شرط ,, فى الزمن ده مافيش حاجة ببلاش غير حاجة واحدة بس ,,,,,, خليها فى سرّك.
    _________________________________

    ليه لما نكون جوه المنزل والسماء بتمطر بنسأل هو الجو بيمطر بره ؟ هى عمرها مطرت جوه
    طبعا ً ,, ناس كتير غلابة السما بتمطر عليهم جوه و المياة بتوصلهم من السقف رغم أنها مش واصله من المواسير
    ________________________________

    ليه لما واحد يقولنا خلى بالك الحائط لسه الطلاء مانشفش مانصدقوش ونمد صباعنا نتأكد ؟
    علشان أحنا واخدين على أننا نكذب على بعض
    ________________________________

    ليه الخدمة بتكون سريعة لما المطعم يكون مزدحم أكتر من لما يكون نص نص ؟
    علشان بيضطروا يشتغلوا بضمير و من غير كسل
    ________________________________

    ليه لما الواحد بيركن السيارة فى موقف فاضى اللى جاى وراك بيركن جنبك ؟
    ده سلوك القطيع بقى ربنا ما يحكم على حد .
    _______________________________

    ليه دايما لما حد بيجري يلحق الأتوبيس تلاقيه مبتسم أو بيضحك ؟
    بيكون فرحان أنه قدر ياخد حق من حقوقة كمواطن ,, أنه يركب المواصلات . حسبى الله و نعم الوكيل .
    _______________________________

    ليه بنفتكر إن لما ندوس على زرار الأسانسير كتير هاييجى بسرعة ؟ أو مثلا ليه لو واحد جه بعديك وأنت مستنى الأسانسير بيدوس على زرار الأسانسير ولا كأنك موجود ؟
    دى ثقافتنا المميزة و هى أن أنا بأفهم و الباقى أغبياء تماما ً ولا يستطيعوا أن يستوعبوا أتفه الأمور و بالتالى فأنا لازم أعمل كل حاجة بنفسى ,, قال يعنى حايطلّع صواريخ القمر .
    _______________________________

    ليه لما بنخبط على الباب بإيدنا دايما بنخبط ثلاث مرات ؟
    علشان الثالثة تابته
    _______________________________

    ليه فى الأفلام لما يكون واحد ماسك شمعة فى الضلمة بنشوف ظل الشمعة ؟ تيجي إزاى
    المخرج عايز كده .
    _______________________________

    ليه دايما عندنا إستعداد تام إننا نصدق أى حد بيكلمنا فى ودانا .. بيوشوشنا ؟
    علشان بنحس لما بيوشوشنا أنه بيهتم بينا بشكل شخصى ,, عقد نقص يعنى .
    _______________________________

    ليه لما بنتصل بالتليفون .. دايما النمر الغلط مابتكونش مشغولة ؟
    علشان لو مشغولة مش حانعرف أنها غلط
    _______________________________

    وليه دايما لوحة أرقام التليفون أو الموبايل بتكون عكس لوحة أرقام الآلة الحاسبة أو حتى أرقام الكيبورد ؟
    ده بقى شغل هندسة يا باشا
    _______________________________

    وبمناسبة التليفون ليه لما واحد يعطيك رقم تليفونه بيقوله بسرعة ؟
    علشان يتنطط عليك و يوريك أنه حافظ رقم بيتهم .
    ________________________________

    وليه عمرنا ماإستمتعنا بالموسيقى فى التليفون لما نكون على الإنتظار ؟
    علشان عادة ً ما بتكونش موسيقى ,, بتكون فى الغالب أعلانات تجيب العصبى
    ________________________________

    ليه لما بنصحى من النوم دايما بنحس إن كمية النوم ناقصها عشر دقايق ؟
    ده بقى أللى أسمة الوخـم .
    ________________________________

    ليه الشخص اللى بيشخر وهو نايم دايما بينام الأول ؟
    علشان بيكون باله مرتاااااااااااااح .
    ________________________________

    و .. ليه دايما وإحنا بنقرأ البوست بنضحك وساعة مانيجى نكتب الكومنت بنكون مش عارفيين هانعلق نقول إيه؟
    من جمال البوست أللى بنكون قرأناه ما بنعرفش نعبر عن أللى جوانا بسهولة .
    ________________________________
    حاجات كتير بتحصل من غير سبب
    مع أن لو فكرنا نلاقيها آخر عجب
    بس ده الأنسان و طبيعته نساية
    يفتكر آخر كلام و ينسى كل أللى أنكتب
    و عـجـبـى
    ________________________________
    KING TOOOT

    ReplyDelete
  15. هههههههههههههههههههه

    والله نسيت انا عايزه اعلق على ايه هههههههههههههههه

    بالزبط زي ما قوووولت ههههههههههههههههههههههه


    بس والله ظحكت من قلب هههههههههه

    صنكيوووو يا عم

    ReplyDelete
  16. ليه لما بتكون بطارية الريموت شبه فاضية ، بنضغط على الزراير جامد ؟


    لووووووووووووووووووووووول


    يعني نبي نقنع نفسنا انه راح يشتغل اذا ضغطنا جاامد لووووووووووووول


    شكرا

    ReplyDelete
  17. و الله يا حمد زي ما قولت بالظبط بنضحك لما بنقرا البوست و لما نيجي نعلق منعرفش نعلق على ايه ولا ايه

    عموما احب اضيف سؤال
    ليه موقف احمد شكيرضد الستات رغم انه متزوج منهم بقاله فتره مش قليله؟؟

    ReplyDelete
  18. بالظبط يا ياشوكير انا كنت داخلة أجاوبك على الاسئلة بس توت ريحنى من الإجابة
    وعموما البوست حلو اوى بجد
    وميرسىى انك خليتنى افكر فى حاجات مكنتش واخدة بالى منها

    ReplyDelete
  19. أنا ضحكت كتير فعلاً بس أكتر حاجة ضحكتنى هى تعليق توت
    *******
    ليه دايما لما حد بيجري يلحق الأتوبيس تلاقيه مبتسم أو بيضحك ؟
    بيكون فرحان أنه قدر ياخد حق من حقوقة كمواطن ,, أنه يركب المواصلات . حسبى الله و نعم الوكيل
    ******
    قعدت أضحك وأنا فى الشغل لما زمايلى قالوا البنت اتهبلت
    :)))))))
    آه يا بلد

    ReplyDelete
  20. هو المفروض انى اضحك
    وانا اساسا من محبى الضحك جدا
    بس كل اما اقرالك بوست ياباشا دماغى بتولع تفكير
    والله مابذاكر كده ياعم

    ReplyDelete
  21. ليه لما نحس إن إحنا دخلنا طريق غلط وإحنا سايقين العربية بنخفض صوت الكاسيت أو راديو السيارة ؟


    ليه لما بتكون بطارية الريموت شبه فاضية ، بنضغط على الزراير جامد ؟




    :P

    بعملها كتير
    ليه ؟؟؟


    صراحة أحمد
    صج ضحكتنا بس هم بعد خليتنا نفكر باشياء بسيطه ونعملها دايما بس ما تاخدج اهتمامنا لدرجة نكتب فيها بوست



    حركات

    ReplyDelete
  22. ههههههههه حلوة

    إلا صحيح .. ليه الناس تدور أرقام حلوة للموبايل مع إنك حتسجل الرقم عندك بإسمه و تدور عليه بإسمه و مش حتفتكر الرقم خالص ؟!

    ReplyDelete
  23. احمد يا شووووووكري
    مش ادره اواف ضحك
    دم شرباااااات خالس
    تفكرني في الدكتور ابراهيم الفقي

    I love your blog

    ReplyDelete
  24. ليه عاملين الدوشه دي كلها


    الجيران اللي فوق مش راضيين يسكتو

    ليه
    ليه
    ليه
    ليه
    ليه
    ليه
    ليه
    ليه
    ليه
    ليه
    ليه
    ليه
    ليه


    والله ما رادد على حد إن شا الله يتفلقو


    إقفل السكة يا بني


    النمره غلط يا استاذ

    ReplyDelete
  25. ايه يا بو حميد اللي بيجري ورا الاتوبيس بيضحك ليه ؟ بيضحك علي خيبته طبعا... بس انت مسألتش السؤال الازلي...مين بيحط الغماص في عيوننا واحنا نايمين؟...اموت واعرف

    ReplyDelete
  26. ليه لما بنصحى من النوم دايما بنحس إن كمية النوم ناقصها عشر دقايق ؟

    باتفق معاك بعنف عنيف!

    يابني أنا باجي عندك استجمام والله.. ربنا يديم عليك روحك الحلو دي
    :)

    ReplyDelete
  27. ايه بتقول أيه
    ممكن تعلى صوتك شوية لو سمحت علشان مش سامعك
    شكراً

    ReplyDelete
  28. يا بني انا حتي مش هحاول أجاوبك
    بس هو سؤال واحد اللي مجانني دلوقتي
    "
    ليه بتسأل الاسئلة ديه كلها!؟

    ReplyDelete
  29. كينج توت قام بالواجب و زيادة

    :0)

    ReplyDelete
  30. ممكن اسأل سؤال
    احنا ليه فعلا ممكن ننشغل بالاسئلة دى ؟

    ReplyDelete
  31. vistor fot first time
    نورتنا .. زورونا تجدوا مايسركم

    froggy
    فينك من زماان

    Mr-Biboooo
    كتير عملوها من زمان وإنتحروا

    Ahmad El-Saeed
    بصراحة الحمامة اللى بتطير ى هاتجنني .. هى رايحة فين بالظبط

    taty
    أتعامل معاها على إنها معلومات عامة ؟ والله فكرة على الأقل تضاف لبقى المعلومات اللى مالهاش فايدة

    nora
    أهلا بيكى .. إنتى نورا يونس ..؟ على فكرة أنا بقرأ البلوج بتاعك من زمان بالرغم إنى ماعلقتش قبل كده عندك
    برافوا عليكى جزء منها بتكون عقد نقص على عقل باطن على شوية زبادي


    mohamed yousef
    لأ يا حمام .. لو إنت قعدت تفكر في كل حاجة كده كلها يوم والتانى وهنلاقيك منور هناك .. عارف فين طبعلا ؟

    shady
    حبيبي والله .. بأه أول حاجة بتكتبها بالقلم الجديد مصر .. طيب إيه أول كلمة نطقتها أول ماإبتديت الكلام ؟ إوع تكون الحزب الوطني
    نظريتك عن الشخير مظبوطة مية المية

    حلم
    والله فعلا ملحوظة كويسة جدا على العشر دقايق فعلا كل المنبهات والألارم بيبقى فيها سنووز على عشر دقايق .. أخدتى بالك منها إزاي دى ؟
    مبروك عليكى مش أنا لغيت الوورد فرفيكاشن .. عقبال البلوج كمان هاها

    chatterbox
    والله وأنا أول ماشوف صورة البروفايل بتاعك .. بافتكر الكتكوتة اللى عندك ولسه مش ناسي أول يوم حضانة ليها

    Anonymous
    مؤمن
    سعيد بزيارتك جدا .. وفعلا إجاباتك منطقية جدا .. أنا بصراحة ماأخدتش وقت طويل كده لمحاولة الإجابة عليها
    بس فعلا عجبني ردك على موضوع الباركنج وكتابة الإسم بالهدية
    نتمنى نشوفللك مدونة قريبا


    change destiny
    بتتصلى بالموبايل من الالة الحاسبة .. يبقى لازم هاتكلمى البنك

    free soul
    ليه الإحباط اللى عندك ده ياماجد .. الدنيا كلها حاجات محبطة .. ياعم ولايهمك

    king Tooot
    بصراحة ردك حكاية ماكنتش عارف إنك ساخر كده .. والله إنت ردك أقوى من البوست ذات نفسه .. ضحكتنى فعلا وأنا صعب إن حد يضحكنى .. فعلا ردك لوحده ينفع بوست ساخر محترم

    q8tya
    ربنا يكرمك .. أنا كمان نسيت أنا كنت هاقولك إيه

    المحامية
    والله شرفتينا .. وشكلنا كده هانحتاجلك قريبا جدا

    bosbos
    أنا لي موقف ضد الستات .. لعلمك بأه مافيش حد بيعزهم أدى

    hera
    فعلا ياهيرا .. توت قام بالواجب وزيادة بالمناسبة آخر تعليق سمعته عنك إنك مش طفاية سجاير ده إنتي ولاعة سجاير

    lilli
    على الضحك فى المكتب كتير .. بيخللى باقي الزملا ياخدوا فكرة مش مظبوطة أهمها إنهم ممكن يفتكروا إن الشخص خلل

    taher
    حلوة حكاية إن دماغك بتولع تفكير أنا عن نفسي بتولع كتاكيت

    نون النساء
    واضح إن حكاية الريموت دى ظاهرة عالمية
    مبروك إعادة فتح البلوج ياسعاد

    مساعد
    فعلا .. ملحوظة مظبوطة .. الناس فعلا بتدوخ على رقم تليفون مميز وتدفع فيه فلوس والآخر الإتصال بيكون بالإسم
    بالمناسبة أنا رقمي فيه خمسة أرقام متشابهة ورا بعض
    مشكلتى إنى أكلم أى واحد منه لأول مرة أضيع نص دقيقة فى كلام من نوعية إيه الأرقام الحلوة دى ياعم .. جبته إزاى .. إلخ

    smile
    كده برده .. بأه أنا بافكرك بإبراهيم الفقى .. عموما أنا وسيم عنه كتير

    أبو شنب
    نورت المدونة .. بصراحة إسمك خضنى وخوفني وكمان وإنت بتسأل ليه ليه ليه
    تخيلتك بتضحك بطريقة نيييههههاهاها
    مع إن عندى شنب أنا كمان
    ملحوظة : باهزر لأحسن تكون بتزعل

    sonofegypt
    اللى بتحطه فى عينينا وإحنا نايمين هايكون مين غير حبيبة القلب
    أما اللى بيضحك ورا الأتوبيس .. فأنا قصدى إن اللي دايما مابيحصلوش

    ghada
    شكلك من النوع اللي بيموت فى النوم الصبح زيي . أنا أسهر كتير ودايما أصحى متأخر
    ماتنسيش لو صحيتي بدرى بكرة تصحيني لحسن تروح عليا نومة

    كتابة
    مش سامعني .. طبعا مإنت ماسك السماعة بالمقلوب

    وش مكرمش
    وزيادة وزيادة وزيادة

    هانيبال
    على رأيك .. نوجع دماغنا ليه .. هى ناقصة

    أحمد فوزى
    بنشغل نفسنا ليه بالأسئلة دى؟ .. عالم فاضية تقول إيه إنت ..
    على فكرة البوست بتاع مديحة كامل اللى كنت كاتبه من فترة كان جميل جدا

    ReplyDelete
  32. وايه يعني لما ازعل يا بشمهندس

    ازعل شويه

    وبعد كده افتح مدونتك

    ونياه نيههههاا

    وهاتك يا متعة بأحلى كلام

    ReplyDelete
  33. :))
    كانت فين المدونه دى من زمان

    ReplyDelete
  34. This is the best post I've ever read since I was introduced to Blogs.

    ReplyDelete
  35. بصراحه الردود و الاجابات رهيييييييييييييبة و مقننننننننننننعه

    ممكن تقولى ليه لما تخبط على باب بيتكم و حد يفتحلك اول سؤال يسألهولك : ايه دة انت جيت؟؟

    لية اول لما تصحى من النوم تلاقى اللى يسالك ايه دة انت صحيت؟؟؟

    لما تكون نايم و فى سابع نومة و قافل الباب و النور تلاقى اللى جاى يصحيك و يقولك انت نايم؟؟
    دة اللى انا بسميها بديهيات تحرق الدم

    ReplyDelete
  36. والله موضوع رائع, وانا عايز اجاوب علي سؤالين او تلاتة
    ليه لما نيجى نمشى فى المطر لظروف إستثنائية بنروح رافعين أكتافنا لفوق ؟
    علشان المطر ميخشش في ظهرنا, وكمان تقليل المساحة المعرضة للماء
    ليه لما بنخبط على الباب بإيدنا دايما بنخبط ثلاث مرات ؟
    لان ايدينا بتوجعنا بعد تلات خبطات فبنضطر نريح شوية ولو محدش فتح نقوم نديها كمان ثلاث خبطات
    ليه الشخص اللى بيشخر وهو نايم دايما بينام الأول ؟
    ده شيء بديهي, لان انت سامعه بيشخر فأكيد هو راح في سابع نومة وانت عليك تستمتع بالنعاس علي خلفية سيمفونيته الشخيرية

    ReplyDelete
  37. انا قريت جزء من الأسئلة دي في بلوجر تاني اسمه ام المريلة الكحلي

    ReplyDelete
  38. دنيتي

    ياريت ترجعي تاريخ البوست بتاعها وتاريخ نشر البوست ده

    ReplyDelete