Monday, December 26, 2005


أيها الرجال .. قليل من الحياء



لماذا لايستحي الرجال من الرجال ؟


المشهد الاول
كنا شلة قاعدين فى كوفى شوب .. وفجأه ظهرت ريحة خبيثة قاتلة لاتخطأها أى أنف ، فى مثل تلك الأحوال لا أبادر بالتعليق حتى يبدأ شخصا فى التعليق وذلك تبعا للمبدأ أن أول من يشتكى غالبا مايكون هو المصدر
أنا : ياعم اللورد الرحمة مش كده
هو : مين أنا ؟
أنا : أيوه إنت .. إيه .. إنت واكل إيه ؟ جيفة ؟
هو والله ماأنا .. طب شمني كده
أنا : جتك القرف .. أشمك إيه مش محتاجة ، أقطع دراعي إنك إنت
وأمام إصراري
هو : أيوه أنا .. أعملك إيه ياعنى .. هى بطني هاتساع الدنيا
أنا : يأخي لا دنيا ولا أخرة .. ماعندك حمام تعمل اللى إنت عايزه ، هو إنت متغدي إيه ؟
هو : أبدا ده كرنب
يبدو أن خبيث آخر إنتهز الفرصة بعد ثبوت التهمة على صاحبنا وعمل عملته هو كمان
هببت واقفا .. وقلت لصاحبنا التاني .. إفف وإنت كمان أنا ماشي
الخبيث القصير : تعال ياأحمد .. هاها أصل أنا كنت معزوم عنده
جاتكوا القرف

الجملة الإعتراضية الشهيرة : إيه المشكلة .. ماإحنا رجالة فى بعض؟

المشهد الثاني
بسبب بعض الحياء أتجنب دخول الحمامات فى الأماكن العامة زى الكوفي شوب أو المطاعم إلا فى حالات الضرورة لشعورى كأني أقف عاريا داخل مصعد
بينما أنا بالداخل على الوضع الموجود بالصورة اللى فوق بالبوست أتجنب النظر يمينا ويسار وأحاول إنهاء مهمتي سريعا جدا
وأنا بهذا الحال اشعر إن اللي جنبي بيبصلى جامد .. وبعدين بيقولى يخرب بيتك إزيك يا كوكو .. إكتشفت إنه صديق قديم ماشفتوش من فترة طويلة ، مش معقولة مين ناجى ..!!؟
ناجى أصر أن على يسلم على باليد ويقبلني وأنا على هذا الوضع ، طبعا كانت مشكلة تركت بعض الآثار على وهو ماعندوش مشكلة ، أصر ناجى على الحديث معي على هذا الوضع
ناجي : إنت بتكتب إيه ياأحمد وإنت واقف كده ؟
أنا : إزاي يعنى .. مش فاهم
ناجي : يعني أنا مثلا باكتب إسمي
أنا : اااه فهمت .. لأ أنا باعمل خمسات
ناجي يصر على الحديث والكلام على هذا الوضع بل أصر على أن يحكي لي نكتة جنسية بذيئة مصرا على تسمية الأشياء والأفعال بأسماءها الحقيقة بصوت عال في وجود جار لنا ثالث لاأعرفه ولم ينسى ان يضحك بصوت عال فى نهايتها .. وجهي أصبح أحمر زى الدم ومافهمتش حاجة من النكتة خصوصا إنى من النادر إني اضحك على النكت .. لأفاجأ بجارنا سعيد جدا ويضحك على النكتة
جاتكوا القرف

الجملة الإعتراضية الشهيرة : إيه المشكلة .. ماإحنا رجالة فى بعض؟

المشهد الثالث

الراجل فى مكتبه محترم يتحدث عن خطة العمل للربع الأول ورايح جاي فى المكتب لحد مادخت وفي عز كلامه والكل ينظر له ومركز معاه ، يقف الراجل وهو بيتكلم فى نص الغرفة ويفتح حزام البنطلون والسوستة وينزل البنطلون وهو بيتكلم ، يبدو أنه يريد أن يهندم ملابسه الداخلية .. أخد راحته على الأخر كأنه فى حمام بيتهم .. وإبتدأ الجميع يتابع مايفعل وهو بيتكلم وإنشغلوا داخليا بتقييم الأداء الوظيفي لما يفعله السيد المحترم لدرجة أنهم ممكن يعطوك وصف تفصيلي عن كل حاجة من ناحية الشكل واللون
فتح عم مصطفى الغرفة وشاهد هذا الوضع فأسرع وأغلق الباب دون ان يتكلم
ياترى كنت بتفكر في إيه ياعم مصطفى ؟
جاتكوا القرف

الجملة الإعتراضية الشهيرة :
إيه المشكلة ماإحنا رجالة فى بعض ؟


بصراحة لاتعجبني تصرفات بعض الرجال فى وجود الرجال ، تخيلوا وجود إمرأة فى أى من المشاهد السابقة أعتقد أن المشهد سوف يتغير

29 comments:

  1. بص يا إبنى أنا لازم أعترف إنك أكتر المدونين إستقراراً نفسياً بالرغم من إنك بتهيس ساعات
    مش قصدى بتهيس فى البوست ده
    البوست ده زى العسل
    وانا موافقك لو فيه ست فى الموقف
    كانو الناس حيلمو الدور

    ReplyDelete
  2. اييييييييييييييعع..
    صدقت: جاتكوا القرف.

    انا يستحيل اغير ملابسي في حضور رجل اخر... لما كنت رياضي - ايام الشباب- غرفة تبديل الملابس كانت من الفقرات المؤلمة نفسيا لي حيث يضطر الجميع ان يخلع الجينز و يرتدي الشورت, و البديل عن ان تفعل هذه العمليه بوجود الفريق هو ان تفعلها بالملعب امام الجمهور. خياران احلاهما مر كما ترون, فكانت من اللحظات المزعجة فعلا فاتخذ كل الاجراءات الممكنة لاعطاء نفسي بعض ال "خصوصية".
    الشباب الذين يسكنون مع بعض لفترات طويله, احيانا تزول بينهم الحواجز حتى انهم يتشاركون في لبس الملابس الداخلية مثلا. جاتكوا القرف.
    و هناك ايضا من الرجال -كما تعلمون جميعا من واقعكم اليومي ايها القراء المحترمون- من لا يجد غضاضة في حك او تعديل موقع اشياء معينة امام الاصدقاء, ناهيك عن انزال البنطلون و تعديل الملايس الداخلية.
    جاتكوا القرف.
    حقيقة هناك نقص في الحياء.
    المشكلة انك حين تشيح ببصرك عن المنظر تجد احدهم يعترض!! و يتهمك بالخجل الانثوي او يبادرك مدافعا: ما احنى كلنا رجاله!
    طيب ما انا راجل و احتاج مثلكم جميعا للحك او التعديل!! لكن شويه حياء يا جماعه!

    ملاحظة: ابتكرت هذا البلوجر بروفايل الان حتى لا ينزل التعليق باسمي المعتاد هاها:))

    ReplyDelete
  3. لا بس الاستاذ ناجى اصر يسلم عليك ويبوسك كمان على هذا الوضع
    اسمحلى وضع غريب جداً
    انا لو كنت دخلت الحمام ده ولقيتكم كنت قفلت الباب دوغرى ذى ما عمل عم مصطفى بالظبط

    ReplyDelete
  4. اسمحلى

    انا لا استخدم المبولة الا اذا لم اجد حمام له باب و ممكن استنى يفضى براحته

    عارف الانيل ايه ؟ انك تلاقى واحد مد رقبته و بيشوف انت بتعمل ايه

    طب تصدق مره فى مكان و مكانش فيه حاج فى النص و الناس مش فارقه معاها!!!

    عايز الانيل ؟ اللى بيخرج من غير ما يغسل ايده!

    ReplyDelete
  5. بتعرف ياحمد تخلي تعليقاتك باقية في نافوخي لفترة طويلة لانك بتعرف تخلق الموقف وتعرف تعبر عنه .. أما حكاية الخمسات فعلا حكاية تراود كل منا في هذا الموقف . بس الخوف لو قلبت علي .. تمانيات .. تحياتي وكلامك عسل

    أما بالنسبة للكرنب .. أنا والله مش باحبه خالص يا عمو .. ومش باعمل شقاوة

    ReplyDelete
  6. لا تعليييييييييييييييييييييق

    ReplyDelete
  7. أنا معنديش مشكلة في موضوع الطرطرة في الفضاء.

    أغرب مبولة شفتها في حياتي فهي كانت في في مزار سياحي في كانتربري حيث هي عبارة عن لوح ألومنيوم طويل بعرض الحائط و يرتفع من الأرض حتى الصدر تقريبا، بلا حواجز و لا أي حاجة خالص، وله مجرى على الأرض و ينهمر الماء من قمته و بكامل عرضه كل فترة تلقائيا (لترشيد الاستهلاك).

    ReplyDelete
  8. هو ايه جاتكوا القرف جاتكوا القرف
    وانت ليه داخل علي الناس وحاطت علي مناخيرك مانديل كلينكس
    ماحلينا هي برضه ملاحظة حلوة
    بس انا كمان معنديش مشكلة اطرطر في الهوا واعمل خمسات وقلب ونجوم

    ReplyDelete
  9. اذا لم تستحى. فأفعل ما شئت

    انا متأكد ان الناس اللى زى دول ما بيبقوش اتيكيت و ديليكاه الا مع الناس الغريبة بس يعنى الله يكون فى عون زوجاتهم اكيد قرفانين من اشكالهم.

    ReplyDelete
  10. تسلم عزيزى على المشاركة القيمة


    والعرض الطيب


    وفقنا الله لما فية الخير


    مع خالص تحياتى

    ReplyDelete
  11. يع الله يقرفهم....

    جاتكوا القرف مليتوووووو البلد @!@

    ======

    والله المواقف اللي ذكرتهم ذهلت وانا اقرأهم.....لان صدقني بالظبط بتحصل مع مجموعه من البنات...@!@

    وتخيل البنت الناعمه بتعمل كده ....

    يع يع يع...

    استغفر الله


    شكرا...:)

    ReplyDelete
  12. هههههههههههههههههههههههههههههههههههههههههههههههههههههههههههههههههههههههههههههههههههههههههههههههههههههه
    باشا دا بقى روتين
    دا حتى الجزء بتاع التحرير اللى تحت الكوبرى على الكورنيش كانت ريحتها لا تطاق
    ذكريات
    المهم جددوها وحطو صورة الريس
    مش عارف حسيت ليه ان الريحة كانت ارحم

    ربنا يعلى مزاجك دايما

    ReplyDelete
  13. ايه الجمال ده يا عم أحمد

    لأ بجد

    يعني مثلاً لازم الفضايح دي كل مره

    طيب أعملها وانت ساكت

    لأ ومبسوط التاني وبياخدك بالحضن

    مره اتزنقت قوي ودخلت حمام بالشكل ده

    وتني واقف على انه فيه حاجة تنزل

    مفيش

    وفين لما لقيت عيادة دكتور

    وعملت حركة من بتوع مدام عنايات حاجزة هنا يا حضرت

    طبعاً لأ

    امل راحت فين يا ربي

    وأنا خارج

    طيب تسمح لي يا استاذ ادخل الحمام

    ReplyDelete
  14. مساء الخمسات والدواير يا عم حمد

    هي الدنيا اوسع ولا بطني

    الدنيا طبعاً

    ReplyDelete
  15. ان عارف ان دي بعيدة عن الموضوع بس ان شفت في التلفزيون مرة برنامج الكاميرا الخفية المكسيكي عبارة عن مبولة اما يجي الواحد يعمل فيها زي الناس المبولة تلف زي المروحة
    ايووووه علي الضحك اللي انا ضحكته
    الناس طبعا بتتخض واللي يعيني يجري واللي يعملها علي الارض
    :))))))))))))))

    ReplyDelete
  16. فى مثل تلك الأحوال لا أبادر بالتعليق حتى يبدأ شخصا فى التعليق وذلك تبعا للمبدأ أن أول من يشتكى غالبا مايكون هو المصدر
    أنا : ياعم اللورد الرحمة مش كده
    هو : مين أنا ؟

    tab enta 3alla2t leeh el awel ?? .. kan momken tesbat 3aleek ya basha law kan el lord elly asdak 3aleh motamasek showayya ??! kont 7ate3mel eh sa3etha law kan 2allak ..

    فى إيه يا عم , إنت هتمثل ؟؟ شكلك إنت اللى عاملها طالما إتنرفزت كده !!

    ReplyDelete
  17. هى هى
    انا مش لايقه بنات معلقه
    اوك. مانت ياكوكو حشرتنا فى المشهد اهوه وغصب عنى كملته
    كله يهون عشان عيونك ياجميل
    حتى الريحه الوحشه
    يييييييييع

    ReplyDelete
  18. شوف يا احمد
    انبارح وانا ماشي لقيت بنوتة صغيرة بتاعت ابتدائي كده بتقول لزمايلها

    الواد احمد دا لو معاه قلم رصاص وولد عايزها وبنت عيزاها
    هيروح يديها للبنت ومش هيديها للولد
    عشان
    هما كده

    ====

    ReplyDelete
  19. هو أنا برده كنت بستغرب أحيانا ليه الرجالة الحياء ما بينهم منعدم بينما البنات أحيانا في بينهم حدود مهما كان

    بس اكتشفت دلوقتي انها حالة مش عامة
    :)

    ReplyDelete
  20. حلو يا احمد
    ده اسمه الضرب تحت الحزام
    سيبك انت
    انا مش غايظنى الا اللى داخليين يقولوا يع دول
    ايه مبيعملوهاش ولا ايه ؟؟؟

    ReplyDelete
  21. هههههه .. با شا انت والله يا ابو حميد
    فكرتنى بايام الكشف الطبى بتاع الجيش .. لما الدكتور قال كله يقلع هدومه ... كل واحد قعد يبص ع اللى حواليه .. وكانه بيطمئن على حالته الذكورية .... مسخرة

    ReplyDelete
  22. ياااااااااااااااى
    وبين البنات بردو بس الصراحه موش للدرجه دى
    البوست ده بجد مقرف اوى,موش قصدى
    قصدى يدعو الى الارف
    بس للاسف واقعى
    وانا اللى كنت متضايقه من بوس الرجاله لبعضيهم,ده البوس طلع قمه الادب
    ألا صحيح مفيش تعليقات أنثويه ليه,مع أنه يتنافى مع طبيعه البنت البلوجاويه

    ReplyDelete
  23. معجبة اوي بصراحتك في العرض،
    بس عايزة اقول انه بين الجنس الناعم برضه انعدم الحياء في الكلام علي الجنس ... كله بيتقال و كله بيتحكي

    ReplyDelete
  24. كتابة
    هاها .. لقب جديد .. أكثر المدونين إستقرارا نفسيا
    شهادة أعتز بها ياكتابة

    7afartali
    بصراحة يبدو أننا متشابهون فى حاجات كتيرة .. لدرجة إني إقتبست بعض من تعليقك وعدلت بيه فى البوست
    وتعبناك معانا في إنك إضطريت تنشأ بروفايل جديد عشان تعلق وعموما أناغيرت خاصية التعليق عشان الجميع
    وعجبي

    shady
    ماذكرته عن الأستاذ ناجي فى البوست هو قليل من كثير .. شخصية لوحده محتاجة بوست كامل

    mohammed sameer
    بصراحة شرفت المدونة . وكنت أتمنى بصراحة إنك تشرفها فى بوست أحسن من كده ، أما اللي بيبص يمين وشمال فبصراحة إنت تفكرني بكنتاكي وسط البلد .. وأشكرك على إضافة مدونتي فى تحديثات المدونات عندك

    mfm
    فيه فعلا حاجات كتير بنعملها من غير ماناخد بالنا بس ناجي خلانا ناخد بالنا عشان بيفكر بصوت عالي
    ومش كل من أكل كرنب نفساني على فكرة

    change destiny
    حاسس بيكي

    ألف
    برده كان نفسي تنونا فى بويت أحسن من كده .. أما مبولة كانتربري .. فكانفيه في نادى هليوبوليس حاجة كده

    بروميثيوس
    ماتزعلش ياعم .. إنت بالذات إعمل اللي إنت عايزه .. بس تعمل قلوب بصراحة جديدة

    ملك
    طبعا ديليكاه خالص في وجود المرأه بس طبعا مش زوجته

    tamer
    بصراحة تعليقك حيرني جدا ومش إنت بتتريق ولا بتتكلم جد أصلك بتشكرني على العرض الطيب والمشاركة الطيبة
    اوكي ليوفقنا الله لما فيه الخير

    q8tya
    حلوة مليتوا البلد دي .. أنا كنت فاكر إن الموضوع محدود .. بس باين عليه مشكلة دولية
    بس برده البنات أرحم

    taher
    إيه يامعلم .. إوع تكون من بتوع تحت الكوبري دوول .. وكمان حطوا صورة الريس .. ده إنت متابع بأه ، بس أكيد المكان أصبح مزدحم بعد التطوير

    أبو شنب
    هو إنت بتاع مدام عنايات .. أنا بتاع الإستاذ حلمي
    مين قال ‘ني كنت مبسوط وهو بياخدني بالحضن ده أنا أعتقد إن أثاري سابت علامات عنده

    أبو أمل
    شرفتنا حقيقي .. بس خمسات ودواير أحسن من إن الواحد يكتب إسمه

    sonofegypt
    المشكلة إنه فى موقف زى ده لما يشوف الكاميرا يضحك ويقوله ذيع .. مش عارف نفسه الناس تتفرج على إيه بالظبط

    Ahmad El-Saeed
    يابوحميد ماتظلمنيش .. أنا إكتفيت إني قلت إن أول المشكتين هو غالبا المصدر ومنها يفهم إن أول الحوار كان هو بيشتكى بس ماكتبتهاش وأنا رديت عليه باقى الحوار اللي فى البوست

    hera
    لأ فيه بنات كمان معلقة قبليكي وفيه كمان بعدك .. ماتقلقيش ولا إنت عاوزانا كمان في التعليقات نقول ماحنا رجالة فى بعض

    حائر في دنيا الله
    شوف ياأخي البنت من صغرها واخدة بالها بس يمكن المشكلة عشان الواد إسمه أحمد

    Se3loah
    شكرا على التشجيع

    mindonna
    فعلا الرسالة اللي بين السطور إنها حالة مش عامة وفيه برده رجالة عندهم حياء ويتضرروا

    Geronimo
    فعلا هوه ضرب تحت الحزام وفكرت فيه قبل مانشره كام مرة .. بس الحمد لله جت سليمة
    هاها لأ كله بيعملها

    mahmoud zidan
    المشكلة فى الكشوف الطبية الجماعية بتاعة الجيش اللى بيشكل ده لما تلاقى واحد مثار بضم الميم

    sarwa
    هى جت على بو س الرجالة لبعضيهم بس .. فعلا دي طلعن كده قمة الأدب
    وفيه بنات كتير معلقين على فكرة

    egiziana
    هلا بالإسكندرية .. فعلا الموضوع صريح شوية وفكرت شوية قبل مانشره .. أما كله بيتقال وكله بيتحكي فأنا أتفق معاكى

    ReplyDelete
  25. بص يا احمد ده اول بوست اقراهولك بس عجبنى مووووووت اصل انا بحب اوى الطريقة الكوميدية !!! بس انا رايى
    لو حد بصلك و انت فى الحمام قوله
    " غض بصرك ,بقى انت ترضاها لابوك او اخوك"

    ReplyDelete
  26. لم أعلم بهذا الكم من الحرية بين الرجال

    أما عالم النساء فيمتاز بالتقيد الشديد بالآداب العامة

    ربما في مجتمعي فقط

    سوى نقطة واحد

    المواضيع الجنسية!!

    ReplyDelete
  27. Sorry i have no arabic in this keyboard .. first time to read your blog and i liked this one so much .. it IS a problem that's growing between guys .. I know it happens between girls also .. There is no shame between same sexes in our society coz we don't have a homosexual culture , in my opinion that's why it's common .. Ma7adesh 2al2an men 7agah .. kolena regalah fe ba3d

    ReplyDelete