Sunday, December 11, 2005



الأربعة .. لأ لأ .. الأربعين



هناك إختلاف بين الرجل والمرأة أحيانا يمكن ملاحظته وغالبا يصعب إدراكه .. عند ماكينة الصرف الآلى أو الإيه تي إم يمكن تحديد الإختلافات .. ومافيناش من زعل

الرجل

واحد : يسوق العربية لغاية ماكينة البنك
إثنين : يضع الكارت
ثلاثة : يكتب الرقم السري والمبلغ المطلوب
أربعة : يأخذ الكارت والإيصال والفلوس

الست

واحد : تقود السيارة للبنك
إثنين : تتاكد من الميك أب فى مراية العربية
ثلاثة : ترش رشة برفان ع السريع
أربعة : تسرح شعرها بإيدها
خمسة : تحاول تركن العربية .. عملية فاشلة
ستة : تركن العربية تاني .. عملية فاشلة
سبعة : تركن العربية تالت .. عملية ناجحة
ثمانية : تدور على الكارت فى شنطة اليد
تسعة : تضع الكارت بالماكينة .. الكارت مرفوض
عشرة : تحط كارت النادى فى الشنطة وتطلع كارت الماكينة
حداشر : تحط الكارت في الماكينة
إتناشر : تيت تيت .. العملية مرفوضة .. الرقم خطأ
تلاتاشر : فين الزفت .. الرقم السري تدور عليه فى المحفظة
أربعتاشر : تدخل الرقم الصحيح
خمستاشر : دقيقتين تقرأ تعليمات وخطوات التشغيل .. مش فاهمة حاجة
ستاشر : تضعط على مفتاح إلغاء فى وسط العملية بدون أى سبب
سبعتاشر : إدخال الكارت والرقم مرة أخرى
تمنتاشر : عبارة الرقم غير صحيح تظهر على الشاشة
تسعتاشر : تسحب الكارت وتدخل الرقم من الورقة مرة أخرى
عشرين : تدخل رقم المبلغ المطلوب
واحد وعشرين : العملية ملغاة لأنها كتبت 7 جنيها بدلا من 700 .. الماكينة تتعامل بالقرش
إتنين وعشرين : تعيد العملية وتكتب المبلغ المطلوب
تلاتة وعشرين : العملية ملغاة لأن المبلغ المطلوب كبير، كتبت 70000 جنيها
أربعة وعشرين : تنظر لمن ينتظر خلفها وتشخط فيه .. ثانية واحدة مش معقول كده .. بالرغم من إنه ماكلمهاش
خمسة وعشرين : تدخل الرقم مرة أخرى والرقم المطلوب
ستة وعشرين : رسالة الرصيد لايسمح
سبعة وعشرين : تعيد إدخال الرقم وتكشف على الرصيد
تمانية وعشرين : تنظر للرجل خلفها بقرف وتستغفر ربنا بصوت عالى
تسعة وعشرين : تكتب المبلغ المظبوط
تلاتين : تأخذ النقود من الماكينة وتذهب إلى السيارة
واحد وتلاتين : بعد عشرة أمتار يناديها شخص لأخذ الإيصال والكارت
إتنين وتلاتين : تذهب للسيارة وتدير المحرك
تلاتة وتلاتين : تتأكد من المكياج فى مراية السيارة
أربعة وتلاتين : ترمى الكارت على الكرسي الخلفي والإيصال على التابلوه
خمسة وتلاتين : فرامل جامدة من السيارة خلفها .. لم تنظر فى المراية عند إنطلاقها بالسيارة
ستة وتلاتين : هى كمان تدوس على الفرامل
سبعة وتلاتين : تقف عند المركز التجارى
تمانية وتلاتين : تصرف الفلوس كلها
تسعة وتلاتين : تحجز قطعة ملابس بالمبلغ المتبقى معها
أربعين : تعود للخطوة رقم واحد

18 comments:

  1. الستات بتوعك لا يطاقوا يا ابو حميد

    ReplyDelete
  2. هاهاها...
    على الرغم من شعارات العدل و المساواة بين الشعوب و المجاميع و الاجناس, و معاداتي لل sterotypes إلا انني اجد نفسي مضطرا للضحك بينما اهز راسي موافقا!!
    لسبب لا اعلمه فان الكثير من النساء ليسوا "technology competable" على الرغم من وجود عدد لا يستهان به من النساء في المعسكر الاخر.
    (معسكر؟ انتو حتحاربو خلاص؟)
    خالد*

    ReplyDelete
  3. كلاااام فارغ

    يمكن دة بيحصل فى الطلعة الأولى بس
    يعنى لما نكون لسه بنجرب نسوق
    أو نسحب

    لكن بعد كدة ربنا بيسهل
    وبنبقى
    competable
    جدا جدا

    انتو بس ادونا الفرصة

    ReplyDelete
  4. انت كده دخلت حقل الالغام برجليك طريقك مفقود مفقود يا ولدي ربنا يجعل كلامنا خفيف عليهم دول قادرين
    :)

    ReplyDelete
  5. تدري

    وانا اقرأ مت من الضحك في الدوام

    لو كنت راجل كانت حتجيني نوبة قلبية من الست ديه..

    بس للأمانة انا مابعملش كده

    هو صحيح اعدل الحجاب

    واشوف شكلي عامل ازاي

    ومااركنش السيارة إلا بعد فترة

    وأحط الكارت بالمقلوب

    :P

    وأدور على الرقم السري داخل الموبايل

    وأقرأ التعليمات بدون أي عمليات فاشلة

    :P


    يعني ما توصلش لخمس عشر خطوة


    هههههههههههه

    ReplyDelete
  6. شوفوا مش أنا بنت أهو، بس بصراحة الكلام ده فى جزء حقيقى... صحيح فيه مبالغة شوية بس فعلا الستات عندهم مشكلة شوية فى التعامل مع أى مكنة.. وأولهم العربيااااااااااات!! بس أنا مش منهم، قصدى مش من الستات اللى مابتعرفش تسوق يعنى
    :p
    ربنا يكفيكوا شر سواقة الستات فى مصر
    بس ماهو الرجالة فى حاجات تانية بتلبخهم وتخليهم يعكوا، زى الأطفال الرضع أوشرا لوازمهم هما الشخصية من المحلات
    أنا أبويا من ساعة ماتجوز ماشتراش لنفسه شراب حتى
    :D

    ReplyDelete
  7. lazem el wa7ed ye3teref....sa7ee7 el banaat bardoo mot3been shewayya kotaar...bass bardoo bene7taass men gheerhom..... :-)

    ReplyDelete
  8. الست متستتا من يومها بأستمتاع
    مالهاش فى شغل المَـكَن الألى ولاّ بتاع
    دايما ً تلاقيها واقفه ع السحب مستعجله
    مع أنها عمرها ما راحت تحط أيداع
    و عجبى
    KING TOOOT

    ReplyDelete
  9. هههههههههههههه .. وحشتنا قفشاتك الحلوه يا احمد .. بس انت علي جانب من الصواب و لو انك بتبالغ .. و اتمني انك تلتمسلنا العذر ف موضوع الماكينه ده .. لان انت حكيت علي رجل اعمال نزل من العربيه سحب الفلوس و ركب و روح ف السريع .. ووقعت ف ست "متأنتكه" و "بتخانق دبان وشها" و رايحه تتعارك مع الماكينه مش تسحب منها فلوس ........

    أسألك العدل و الموضوعيه يا باشا ..

    ReplyDelete
  10. لووووووووول
    ضحكتني موووووت
    خصوصا لما تنظر لمن ينتظر خلفها وتشخط فيه وهو اساسا ما قلهاش حاجة
    دي بتحصلي كتير اوييي

    ReplyDelete
  11. حرام عليكوا
    خلاص بقا الراجل هو المعجزة الإلهية لإنقاذ البشرية ,الوفي الذكي اللماح
    و الست هي الخاينة و المعقدة و كمان غبية
    طب أنا بقا عاوزاك تكتب يوميات راجل و ست دخلوا المطبخ مش هقلك يطبخوا لأ يقلوا بيضة و مش هيبقوا أربعين لأ هيبقوا مية.1
    مع إننا برضوه لو إتكلمنا بموضوعية ممكن نكمل الأربعين للراجل اللي بيسحب الفلوس يعني هي الست حاطة الكارت في الشنطة و الراجل مش حاطه في محفظة , و الست سرحت شعرها و الراجل مش هيولع سيجارة , و الست واقفة مش عارفة تدخل الكارت و الراجل مش هيقف يعاكس البنت اللي واقفة وراه...إلخ
    إحنا ساكتين للرجالة بمزاجنا بس لو حبينا نكتبلهم هنكتبلهم و أرجوك يا أحمد فرحني مرة

    ReplyDelete
  12. قال بتزعق وهى بتركن قال
    طب انا بجد مع احترامى لكل الستات اللى بتعرف تركن ههههههههههههههه فيه واحدة عندنا فى المنطقة والله لازم وهى بتركن او لسه طالعه تخبط فى الرصيف الاول ( بدل ما ترجع تطلع ) وبعد كده تيجى تدور بالعربية تخبد فى الرصيف اللى فى الجهة التانية
    عل فكرة الشارع عندنا مش بيدخله ميكروبااصات ولا اوتوبيسات يعنى فاضى تقريبا وعرضه حوالى 10 متر او يزي وهى عربيتها 3 او اكثر قليلا 127 امال لو شارع رئيسى حتعمل ايه
    والله بحب اتفرج عليها يوميا علشان اضحك
    بس فى الجامعة فيه بنات صايعة ( مش قصدى صايعة صايعة ) فى السواقة وتشحيط وخمسات
    يعنى من الاخر يا باشا كلامك عن مواليد ما قبل 75 مش كده ولا ايه؟
    بالمناسبة كنت عاوز تقول دعوه لايه؟!!!!!!!!!!!!!!!!!!!!!!!!!!!!!

    ReplyDelete
  13. هاهاااااااي

    العملية ملغاة لأنها كتبت 7 جنيها بدلا من 700 ..


    صارت معايا انا واختي وكنا في مصر وكنا عايزين نسحب 700 جنيه وبالغلط اختي حطت 7 هههههههههههههههههه


    طبيت فينا طب يا احمد خخخخخخخخخ

    ReplyDelete
  14. shady
    ماهو لو كانوا طبعيين مكناش كتبنا عنهم

    khalid Jarrar
    المساوة بين الناس ده غير طبيعي لأن دخل بيخش فى دائرة التعميم ، ةالتعميم نظرية أثبتت فشلها من زمان مافيش حد زى التانى ، ده الواحد نفسه مش على شكل واحد على طووول
    على رأى محمود عبد العزيز . أنا مش أنا يادكتور

    حلم
    الطلعة الاولى بس .. المشكلة إن الطلعة الاولى دى بتستمر مع بعض الناس سنين كتيرة
    بس فيه بنات شديدة فى السواقة .. لسه واحدة النهارده إدتني غرزتين ولما ضربت كلاكس وقلبت النور معترض .. عملت بإيدها حركة قلة أدب من الشباك وطلعت تجرى

    sonofegypt
    حقل الألغام ماأنا دخلته من زمان .. وخلاص اخدنا مناعة .. أنا بعون الله أحسن واحد يعرف يتعامل مع الستات

    نون النساء
    والله إنجاز كبير الغختصار حتى 15 خطوة ، اهم خطوة لازم تتلغى الخطوة 38 وإرجعي وشوفى لو لغتيها .. يبقى كله تمام

    lilli
    أنا مبسوط منك كده وإنتى بتقولي الحق .. ولعلمك بأه بوست بتاعك قبل كده هوه اللى فكرني بموضوع السواقة ده
    اما إحنا الرجالة .. طبعا خيبة فى المطبخ ده انا عندى حته صورة هاحطها قريب فى صور طريقة عن راجل جوه المطبخ

    mohammed yousef
    طبعا الإعتراف بالحق فضيلة فعلا بنحتاس من غيرهم .. وأحيانا بيهم كمان

    king tooot
    ياربعياتك ياكنج .. والله إنت اخدت بالك من حاجة مهمة جدا .. كله سحب سحب .. مافيش مرة إيداع

    romantic rose
    هاها .. آه الراجل طالع إيه حاجة محترمة مهم ومش فاضى وعارف هوه بيعمل إيه وجد .. وهى بتقول ياشر إشتر ولبخة وحوسة ومدهولة على عينها
    بس عموما زى ماقلت كله مش زى بعضه

    chatterbox
    اللى فكرنى بحاجة زى كده كنت ماشى بالعربية وتاكسي وقف قدامى يركب واحد وواحدة ويظهر كان معاهم شوية شنط على الرصيف عمالين يجروا ويجيبوها .. وأنا مستني وساكت وهى بتنقل الحاجات فى المرة التانية لقيتها نظرت لى وبتزعقلى وتقولى إيه .. الصبر هوه خلاص مافيش صبر خالص .. وأنا أصلا ماتكلمتش

    mr-bibooo
    يعنى يابيبو البنات ماقالوهاش .. وتيجي إنت تقولى يامفترى ده إحنا برده فى الاخر من نفس النوع

    taty
    هاأعمل إيه .. غلبتينى .. تحليلك فيه جزء كبير من الصح
    بس بالراحة ماتزقيش كده
    عموما ياتاتي هافرحك قريب جدا .. تحياتى لبسبس

    taher
    ليلي كانت مرة كاتبة عن سواقة البنات .. وطبعا تحت 75 حاجة تفقع بس على رأيك الجديد منه مستوى تانى خالص لسه كاتب فوق فى التعليق ده عن موقف حصللي منهم
    أما بالنسبة للدعوة فكنت اقصد إنها دعوة للخناق وليس النقاش

    q8tya
    طيب كويس وشهد شاهد من اهلها
    نفس الموقف حصل .. يعني أحمد برئ يارجالة

    ودى كانت نهاية فرقة عبده جمبرى
    جمبرى مين ؟
    واحد صاحبي ماتعرفوش

    ReplyDelete
  15. لا نهايه عصابه حمادة وتوتو

    ههههههههههههههههه

    ReplyDelete
  16. حلوة حكاية الست اللى زعقتلك وبتقولك الصبر دى مع إنك ماتكلمتش
    الناس أصلها أعصابها تعبانة يا أحمد وبتخانق دبان وشها
    هى عارفة أنها معطلاك فاقالت كولوهم بالصوت
    أو يمكن لا سمح الله يعنى ظهر على وشك تعبير امتعاض ولا تذمر
    ماهو انت بردو غلطان
    المفروض تبقى الابتسامة عريضة على وشك، بعدين يا راجل مش تنزل تشيل معاها بدل مانتا قاعد فى العربية فاضى
    :p
    آآآآآآه من المدامات الغشيمة آآآه
    احفظنا يا رب

    ReplyDelete
  17. والله عندك حق انا مره وقفت وراء نفس الست دي (اللي هي في الحقيقة كلهم) لكن الحق لله
    هي اخدت الكارت والوصل قبل ماتركب العربية تاني

    ReplyDelete