ياللي بتحبوا الحياة
![](http://photos1.blogger.com/blogger/226/1438/400/SINK.jpg)
دعوة جميلة تلقيتها من تارا وغادة وفهرنهايت للإجابة على سؤال ملخصه أنا بحب الحياة إمتى .. بس انا غيرته وخليته بدل إمتى يكون ليه ؟؟
بحب الحياة عشان وعدتنا بحياة تانية يقدر المظلوم فيها يلاقي العدل اللي إفتقده
بحب الحياة عشان لسه فيها واحد فقط محترم له ثقله قادر يقف قدام إسرائيل في عصر العهر السياسي إسمه حسن نصر الله
بحب الحياه عشان لينا أصبح ليها أخيرا إسم ثلاثي وهو لينا أحمد الفيشاوي ، وليذهب والديها للجحيم فالطفلة ليس لها أي ذنب في أنها نتاج هذه الحثالة
بحب الحياة عشان متوسط قيمة الصوت الإنتخابي عندنا حوالي أربعمائة جنيها في حين انه وصل في الكويت لخمسمائة دينار كويتى حوالي عشرة آلاف جنيه على حسب ماجاء في جريدة السياسة الكويتية
بحب الحياة عشان لسه فيه ناس مابتعاملكش على إنك كيس جوافة
بحب الحياة لأنها احيانا بتكون زي روتانا سينما مابتخليكش تغمض عنيك وتوريك اللي عمرك ماشفته
بحب الحياة عشان كمال الشاذلي ماقدرش يحقق أمنيته في إنه يكون مذيع تيلفزيوني لو ماكانش برلماني أثري زي ماقال لمنى الشاذلي في العاشرة مساء
بحب الحياة عشان فشلت إني أحب شرب السجاير بالرغم من إني باشرب شيشة
بحب الحياة عشان إكتشفت بالصدفة من خلال محرك البحث ياهوو إن بوست ليه .. ليه موجود بالحرف في أكتر من مائة منتدى وموقع بالرغم من عدم وجود أي إشارة للعبد الفقير لأ ومرة سمعته في نجوم إف إم
بحب الحياة عشان بوسي سمير بقالي شهر ماشفتهاش ، على التلفزيون طبعا
بحب الحياة عشان اخيرا لقيت حرف الذال ع الكيبورد في الكومبيوتر الجديد بعد أربعة وعشرين ساعة من البحث المضني .. لقيته جنب الإسبيس زرار المسافة.. انا مبسوط جدا حتى شوفوا .. ذ ذ ذ ذ ذ ذ
بحب الحياة عشان قدرت ماأقولش لأي واحدة في حياتي كلمة بحبك إلا للي حبيتها بجد .. مراتي
بحب الحياة عشان إكتشفت إني بعد ماركبت العربية الهامر للتجربة فقط ، إنها عربية عادية جدا لاتزيد شيئا عن العربية زووكا بتاعة ليلو
بحب الحياة عشان ادتني فرص نادرة زي مثلا انى مسكت كأس العالم الحقيقي الذهب الي مسكه بيليه ومارادونا وزيدان واتصورت معاه كمان وزي مثلا لما لقيت نفسي بعرف يسرا إزاي ترقص على أغنية ووك لايك آن إيجيبشيان للبانجلز في فيلم للراحل محمد شبل وشفت انور السادات ع الحقيقة قبل مقتله بيومين وكتير كتير
وأخيرا ... بحب الحياة عشان ناس حلوة إفتكرتني في التاجنج ده ، وناس جميلة زي الي بيقروا البوست ده
وأخيرا ... بحب الحياة عشان ناس حلوة إفتكرتني في التاجنج ده ، وناس جميلة زي الي بيقروا البوست ده
حبها اوى
ReplyDeleteبلاش اقولك على ميت سبب يخلوك تكرهها
:)
I guess you had a very rich life, nice post.
ReplyDeleteيخرب بيتك يا جدع انت جبت الكلام دة منين
ReplyDeleteاكيد انت كنت ساكت دة كلة عمال بتظبط لنا فى الكلام دة
كلام جميل مقدرش اقول حاجة عنو
طبعاً كلنا بنحب الحياة بس مش فى مصر 2006
بنحب الحياة فى مصر قبل ما يحصل اللى انت حكيت علية وحصل فى المنصة وخليها فى سرك علشان العلوج ما يفهموش
طول ما نفر سيدا كلام
ReplyDeleteواجد عشق زين
طول ما نفر علي بابا كبير
دايما فكر
اكل ما في
كلام ما في
سوي ترتيب زين
الله يحب انت
نفر واجد يحب حياه
فكرتني بأغنية فريد الحياة حلوة بس نفهمها
ReplyDelete
ReplyDeleteالسلام عليكم
حمدا لله على السلامة
بالنسبة لموضوع ليه اللى انت ذكرته فى الحقيقة لقيته فى احد المنتديات و كنت رديت فيه هنا فى بلوجك على فكرة بس كنت متردد اذكر فى المنتدى انه منقول من البلوج بتاعك لانى مكنتش عارف اذا كنت انت اصلا تقله و للا من تأليفك , عموما حاقوم بالواجب و اكتب انه منقول من بلوجك طالما انك انت صاحب الفكرة من اساسه.
بالنسبة لجزئية تحقيق العدالة فى الحياة الاخرى ,, ممممممم مش عارف ... بس دا نفسه ظلم انك تتظلم و تستنى بعد لما تموت و بعدييييييييييين تتنصف تانى .
بعد ايه ؟
ياريت تكلمنا عن موضوع كاس العالم و رؤيتك للسادات .
حاموت يابوحميد و اجرب الهامر انا شخصيا اعشق سيارات الدفع الرباعى .
كلمة اخيرة واقفة فى حلقى و معلش اقبلها منى .
انا قريت موضوعك انك حجيت , مش شايف ان افكار بعض الصور فى صور طريفة اوفر شوية ؟
اخوك مؤمن
الزميل الرائع شقير
ReplyDeleteأولا أحب أشكرك عل التنوية بتاع البلوج الجديد و كأنك ناقص تكتب تحته wanted
أو مثلا خلوا بالكم من الست دى و أهدرنا دمها و مالو ماهو لما لقيت صورتى منورة عندك و أرتفع مؤشر الأدرينالين عندى ( مع الأعتذار لضميرى) خليتنى أحب الحياة لدقائق
القصد - انت عارف ان حسن نصر الله ده راجل كده و مش من نوعية نظمى بالمرة ده (يمكن هو و نجاد بتاع ايران ) يكونو من الأسباب القوية فعلا لحب الحياه - فاهماك يا شوقير
- بالنسبة لموال الست هند و اخونا أحمد فدول ليا معاهم ليالى طويلة لأنى فعلا وصلت بسبب هند و أبوها الأستاذ نفيسه لقمة التذمر و السخط على مجتمعنا الذى يقينا سوف تندثر فيه أى معانى راقية أو تعاليم دينية بسبب أمثالهم - وحيات أبوك يا شيخ سيبنى كاتمه فقلبى و هفوق للى خلفو أهاليهم فى الرواقة
- أما بخصوص الفاضلة بوسى سمير يا ظالم فالسيدةكل غلطتها يعنى انها طلبت تطلع فوق الروف !!!!! هو ده جزاتها الولية كانت عايزه تأكل الفراخ و بالمرة تحط النقط معرفش فين
ماتسيبوا اللى يحط النقط يحطها مطرح ماهو عايز- مش أحسن ماتحطها فى الطريق العام و يبقى فعل فاضح - الله ماتسيبيه يمسكها يا فوزية
- على فكرة انت لقيت حرف الذال لما دفعت آخر قسط للحاسوب أنا كانو قاطعين عنى حرف ال ح بالرغم من أهميته فى حياتى و رجعوه لما دفعت آخر كمبياله - يعنى مش صدفة و ادفعوا اللى عليكو
بحب الحياه عشان لينا أصبح ليها أخيرا إسم ثلاثي وهو لينا أحمد الفيشاوي ، وليذهب والديها للجحيم فالطفلة ليس لها أي ذنب في أنها نتاج هذه الحثالة
ReplyDeleteاى والله الاتنين زباله
انا بقترح يا شقير اننا نضرب الست ام برقع دى وما نخليهاش تدخل عندنا اصلها باين عليها قريبة ابو الليل
ReplyDeleteوممكن تخلع على سهوة زية
بحب الحياة عشان قدرت ماأقولش لأي واحدة في حياتي كلمة بحبك إلا للي حبيتها بجد .. مراتي
ReplyDeleteياريت كل الناس زيك..متوازن.. و مش منافق، واضح ومحدد... اعتقد كل دى مقومات تؤهلك للقدرة على حب الحياة، مؤهلات ربما باتت نادرة وغير متوفرة فى هذا الزمن ...تحياتى وحمد الله على السلامة .. البلوج نور
شكرا على الاستجابة
ReplyDeleteعيش حياتك ياريس
وعقبال مانمسك كاس العالم جميعا باذن الله
.....
ايه ياريس بس الغيبة الطويلة دي؟ .. حمد الله ع السلامة ... على فكرة بوست ليه دة يستاهل بجد
عارف ياأحمد أنا باحب كلامك لية ؟ علشان كلامك بسيط وفيه عمق كبير قوي لما بتضحكنا.. بتكون علي مواقف عدت علينا كتير ولا كنا واخدين بالنا .. ولما بتتكلم جد برضة بتكون مواقف مش واخدين بالنا منها برضة
ReplyDeleteيعني ببساطة احنا بنكون طال عمرك كيس جوافة في الحالتين
تحياتي
to be honest i also thought i saw the whole "leh leh" post before
ReplyDeletebut i got it over email and it was in english, i though you got it from somewhere else. didn't know that you were the one who thought it up
glad you're back to blogging
we missed you mr shokeir
but we need another sunglasses story soon to feed our addictions
keep it up
عارف يا احمد
ReplyDeleteانت روحي روحي روحي
وانت سبب من الاسباب اللي بتخليني احب الحياة بجد
الا صحيح مين حسن نصر الله ده
قريبك
بس ماقلتلناش ازاي مسكت كأس العالم وفين؟ وازاي علمت يسرا رقصة الكذا كذا على أغنية مش فاكرة اسمها
ReplyDeleteولا قلت لنا ازاي شفت السادات الله يرحمه قبل المنصة...
ع العموم، ربنا يحلي الحياة في عينيك أكتر وأكتر
أسبابك جميلة وشقية وفيها حتة سخرية على مسحة رومانسية
يا ماما أنتى سيبتى كل الاسباب و ماسكه فى الجملة بتاعت شوقير:بحب الحياة عشان قدرت ماأقولش لأي واحدة في حياتي كلمة بحبك إلا للي حبيتها بجد .. مراتي
ReplyDeleteطبعا انتى مولعه و مفروسة زى كل الستات اللى هتقرا الجمله دى
فكك بقى من موضوع محدد و معين و متوازى مستطيبلات انا عارفه انك من ساعتها مابطلتيش عياط
يارب يا نظمى أشوفك لازق فى عمود نور عريان و النطرة تمطر عليك و تشعلل كده و أنا أقف فى البلاكونه أشرب سيجارة و ابقى آخر استكياف
بطل بقى يا شوقير هى المشرحه ناقصة قتلا
حمد الله عالسلامة باغالي
ReplyDeleteأنا بدأت أكره الحياه
ReplyDeleteعلشان خاطرك و بالعند فيك
ايوة خدامة:
ReplyDeleteطيب بالزمة و غلاوة نظمى عندك ما اتفرستيش من الجملة دى؟؟ بقى الواحد عاش و قرب يخرج من الدنيا ومش لاقى حد يقولها له، عاوزانى اشوف واحد محترم طلعها بصدق من قلبه ومقعدش يتننك ويحسبها تمنيات واربعات و يد2 كب الف 4 والادهى انه اعتبر كلمته عهد لها وفقط ومش عاوزانى اتفرس (لامؤاخذه ياشقير مش بحسد طبعا وربنا يهنيكم ببعض.
تعرفى لو اتخانقوا حنبقى احنا السبب..
ومعلش ياشقير قلبناها شات..
ربنا يصلحلك الحال و يحلي ايامك كمان و كمان يا أحمد ..
ReplyDeleteبس يا رب نقدر نشوف نسبة جمال الدنيا اكبر من نسبة الظلم و الفُحش يا رب !!
ايه يا احمد باشا زى ما بتحب اى حد يقوهالك ايه الغيبه الطويله دى وحشنتا ولله انا كل مره ادخل علشان اشوف البلوج بتاعك ملقيش فيه جديد ازعل ولله وعلى فكره انا مبحبش الحياه علشان اخدت كل حاجه حلوه فى حياتى واتمنى انك دينا الجديد كل يوم واشطات عليك اخوك شلاطه
ReplyDeleteواضح انك غاوى نقار
ReplyDeleteبدليل فرحتك الغير عادية بتمر حنة
هى بجد خلت الدنيا مختلفة بدل الرتابة الفظيعة اللى احنا فيها
المهم
اسبابك كلها لحب الحياة تستحق الاحترام
ولو انى شايفة حاجات كتير تخلينا نهرب من مجرد التفكير فى الاجابة
على فكرة حمدالله على السلامة
مااحنا ماوراناش حاجة غير نقولهالك كل شوية
عمل ممتاز يا احمد
ReplyDeleteبس يا رب تكون كده على كول
وتكون احسن
انا هستنا منك الاحسن
ربنا معاك
هى أسباب زى كده اللى مخليانا فعلاً لسه عايشين... أهى حجج بنتمسك بيها فى الحياة
ReplyDeleteأدينا بندى نفسنا أمل عشان نعيش
بوست جميل ، وميرسى انك بتقارن زووكا بالهامر! دى مقارنة مش منصفة للهامر
:)))))))))
تروح ايه فى زووكا الهامر
:p
على فكرة أنا بعت زووكا لناس ولاد حلال أوى بيراعوها زيى تمام، وجبت لاننوونا، ربنا يطول عمرها
الحياة حلوة بس نفهمها, وأحلى بس تفهمنا
ReplyDeleteالمشكلة أننا نستعصى على الفهم أحياناً يا صديقي
وانا بحب الحياة لأن فيها ناس نفسك يا بو شهاب
ReplyDeleteلاحظ اني لسه مصمم على ابو شهاب
أخوك خالد
اجاباتك أكثر من حلوة كما عودتنا
ReplyDeleteبس أنا قربت أيأس من تحديث مدونتك و رؤية بوست جديد
الحمد لله على سلامتك
طبعا عجبتني فقرة كلمة (بحبك)
:)
"بحب الحياة عشان وعدتنا بحياة تانية يقدر المظلوم فيها يلاقي العدل اللي إفتقده" هي دي...
ReplyDeleteجيت متأخر مووووووت!
ReplyDeleteمعلش بقى المواصلات وكده..
شكرا يا فندم لتلبية الدعوة، إيه بقى موضوع كاس العالم ده بقى...هه؟
هو انت اللي كاتب ليه ليه؟
ReplyDeleteأنا كنت فاكراك مترجمه لأني قريته أيام ما شوفته عندك في مجلة مصرية من اللي بيطبعوا بالانجليزي
حب يا عم ولا يهمك
استاذ يا احمد واللة
ReplyDeleteاحييك على كلامك الرائع وموضوعاتك الاروع
وحمدا للة على السلامة
انا بحب الحياة اكتر واكتر كل لما اشوفك كاتب حاجة واي حاجة
ReplyDeleteفخلينا دايما نحبها واكثر من كتاباتك
ايه الحلاوة دى
ReplyDeleteاستاذ كلام و الله
بس عملتلك ايه بوسى
ما تسيبها..عاملة جو
و الناس شقيانة
لالالالالالا
ReplyDeleteدا انت كان لازم تبقي كاتب مشهور
ايه الموهبه الفظيعه دي
جبتلنا اسباب الواحد منها كافي لكي نحب الحياه برغم ما فيها
علي فكرة أنا عايزاك تبخر نفسك لحسن القر جامد أوي هناوخصوصا علي كلمه (بحب الحياه عشان قدرت ماقولش لأي واحده بحبك غير للي حبينها بجد مراتي)
أصل الأخلاص ده أصبح عمله نادرة ومفيش حد بيفضل يحب مراته وفاكر انها كانت حبه الوحيد ايامها وخاصه بعد السنين دي
ربنا يخليكوا لبعض ويبعد عنكم العين وتفضل تحبها علي طول
أصل أنا فخورة بيك أوي لأنك نادر هذه الأيام
Sarwa
ReplyDeleteمش محتاج تقوليلي على أسباب كرهها ماأنا عارفها ، بس المهم إنها ماتأثرش فينا
anonymous
كلامك صح
asadma7bos
لعلمك باه الكلام ده انا كتبته وجه في بالي ساعة ماإبتديت اكتب البوست ، ومن اللي مايفهمش يالورد ماكله فاهم
أبو شنب
اللغة العربي الهندي دي هاتوديك في داهية
إنت فيه واحد نفر مصري مايسوى جرجر هندي
taty
أعز الناس .. دايما كده الأمور دايما جايبة معاكي بأغاني
مؤمن
أولا شكرا عل المبادرة بموضوع ليه ليه
ثانيا بالنسبة لموضوع الظلم .. لأ مش ظلم طبعا لأنه هاياخد حقه بصورة هايتمنى ساعتها إنه كان أخد جرعات اكبر من الظلم
ثالثا: موضوع كأس العالم في البوست التالي وحكاية السادات هاحكيها اكيد مرة
رابعا : ماليش في العربيات خالص عشان كده مافرقتش معايا الهامر .. لكن أجيبهالك لو عايز
خامسا : فكرت في موضوع الصور ده كتير وده يدل إن معاك حق .. بس عموما ماظهر كان أخفهم
تمر حنة
إنتي بأه موالك موال .. إسكتي مش إكتشفت إن بوسي سمير طلعت شريفة وكنت ظالمها بعد ماسمعت أغنية إسمها واوا أف باين ولا واوا أح .. دي طلعت رحمة .. على فكرة بس من غير زعل انا قريت حقيقي عنها إنها فعلا قبل ماتغني كانت خدامة
شادي
مش الإتنين بس اللي زبالة لأ وأهاليهم كمان
asadma7bos
فكرتني بأبو الليل .. بس تمر حنة عشان تخلع لازم ترفع قضية خلع الأول
ماما
أعتقد إن المؤهلات دي موجودة ومتوفرة في ناس كتير حوالينا بس إحنا أحيانا مش بنعرف نكتشفها
بس مش عارف كنت حاسس انك ممكن تقفي عند الجملة دي ليه
فهرنهايت
إحنا اللي متشكرين إنك إفتكرتنا بالتاج ده
Haybaaaan
الخوف بس لا الفيزيتا اللي هاتدفعها تخليك تكتئب ولا حاجة .. خليها على حسابنا عشان تيجي تاني
زبادي
ربنا يكرمك يامعلم وبعدين كيس جوافه إيه بأه .. هاها ده أنا لقيتها في الدانوب ماركت بتمانية ريال
kareemfromegypt
شكرا على تعليقاتك المتميزة
بالنسبة لنضارة شمس أنا فعلا فيه كام فكرة قصة ناوي انزلهم قريب
بالنسبة لموضوع ليه ليه هو بتاعي يمكن فقرة او إتنين بس هما اللي شفتهم في موقع اجنبي وهما اللي اوحولي بالبوست وغالبا فقرة الريموت .. المشكلة إن كل المنتديات نزلتها بنفس الصياغة بتاعتي
على فكرة هنومة طلعت لذيذة جدا بعد ماعرفتها أصل انا كنت زعلان إنك مقعدني معاها وسايب هيرا ونيرو
geronimo
ده عشان ماتفهمش غلط .. كنت خليت بوستاتك من احد أسباب حبي للحياة وخصوصا بوست حلم عايش في خيالي ، أد إيه بيرسم صورة جميلة وبيلغي الماديات من حياتنا
doaa samir
كروان .. انا حكيت حكاية كاس العالم في البوست التالي اما حكاية السادات وحكاية يسرا ممكن في بوستات جاية ، وشكرا على دعواتك واقول جمعا إنشاء الله
تمر حنة
بصراحة ماقدرتش أمسك نفسي من الضحك على تعليقك وإنتي واقفة لماما ع الواحدة كده .. عموما خلاص انا هاسكت خالص ، امال لوشفتي البوست الجاي هاتعملي إيه ؟
هوميروس
الله يسلمك انت ياغالي .. بس أنا لسه مسافر
islam yousef
ليه بس كده ..هو الجيش عامل شغله معاك ولا إيه؟
ماما
هاها .. ماكنتش فاكر إن الموضوع يفرس كده ، وشكرا على وصف محترم ده ربنا يكرمك ياهبة
romantic rose
أنا متأكد إنك إنتي بالذات تقدري تشوفيها حلة ببرائتك الغير معتادة
anonymous
لو عشنا دايما في إحساس إن الحياة أخدت كل حاجة حلوة ، لازم هانكرها ، إيه رأيك نعاندها ونحاول نشوف فيها أي حاجة حلوة ونحبها بالعافية .. مش كده ولا إيه ياأخويا ياشلاطة
حلم
الله يسلمك .. مش مسألة غاوي نقار بس أنا فعلا لقيت فيها إختلاف
وسيبك من الأسباب اللي تخلينا نهرب من الحياة أصل لو فكرنا فيها هانكتئب أكتر ومافيش حاجة هاتتحل
إبن الشارع
شكرا على تعليقك وإحنا كمان في إنتظار الأحسن منك
أم المريلة كحلي
جميل أوي قولك إنك بتحبي الحياة بلا أسباب .. تصدى إن فعلا أجمل حب في الدنيا اللي بيكون من غير أسباب .. انا وقفت عند جملتك البسيطة دي كتير فعلا يعني الحب من غير أسباب بيكون اقوى لأن زوال الاسباب كفيل بالقضاء عليه .. أنا هنا باتكلم عن الحب بمفهومه العام
lilli
إنتي جبتي الخلاصة هي فعلا حاجات وحجج بنتمسك بيها عشان تدينا أمل في حب الحياة .. بس الجميل باه إننا نجح في كده
ومبروك على اللانوس .ز بس أنا عايز لفة بيها ، ممكن ؟
حائر في دنيا الله
اللي فهمته من كلامك إن المشكلة فينا وانا أتفق معاك إن ده صحيح في بعض الأحيان
savior
مش عارف إنت كئيب ليه كده ؟؟
معتقلات وفقر ومزاد نبيع فيه العيال .. إيه ياجميل هو فيه إيه بالظبط ؟ عيال إيه اللي هانبيعهم بس
أنا باهزر على فكرة
enter-q8
خالد حبيبي
أبو شهاب .. أنا عرفت السر
وانا هنا في السعودية واحد قالي في آخر الكلام أبو شهاب .. إفتكرتك ساعتها وقلتله إستنى إيه حكاية أبو شهاب دي ؟ قالي إنه دايما بيقولوا للي إسمه احمد ابو شهاب .. بس ياترى خالد يبقى أبو إيه ؟
tara
شكرا على التاج ياجميل .. بس أنا شفت خبر في العربية عن إنقطاع الكهرباء في بغداد كتير لدرجة إنه وصل في بعض الأحيان لعشرين ساعة فى اليوم .. ربنا معاكي .. مادام وقفتي عند فقرة بحبك يبقى انتي أكيد رومانسية بجد
النوبي
الأسباب موجودة ودايما بتكون في حاجات صغيرة .. وشكرا على الرابط وديما أصدقاء
ahmad al-saeed
هاها .. مهندس وداخل الجيش ظابط .. أقولك على حاجة تغيظك أنا لما خلصت الهندسة انا اللي طلبت إنى أدخل ظابط
وربنا يقدملك اللي فيه الخير ياحضرة الظابط أحمد
nerro
عاملة زي أكتر حاجة أكرها في الدنيا الظلم
ghada
أنا فعلا إستغربت يعني إنتي اللي عاملالي التاكينج وماتجيش ، عموما إبقي خدي صلاح سالم أحسن لو جايو من مصر الجديدة
موضوع كاس العالم في البوست التالي
change destiny
وفي مجلة كمان ولاد الحرامية
بس حلوة حب ولايهمك دي .. ماشي ياقمر
rubyeldaly
الله يسلمك وشكرا على كلامك الحلو
daktara
وأنا كمان بحب أشوفك دايما .. ياترى كملت قراءة الكتب اللي كنت شاريها من المعرض؟ أما هند صبري فانا أختلف معاك في توقعك
hesham
المشكلة فعلا في بوسي سمير إن الناس الشقيانة دي بعد ماتشوفها وماتطولش حاجة مابتقباش عارفة تحت النقط فوق الحروف .. هاها بتحطها تحت
goga
أنا فعلا مبسوط بتعليقك ده وأحب إنك تكوني منورانا دايما ، ومش عارف ليه أي بنت بتقف عن فقرة بحبك دي ..بحس إنها بنت فعلا تستحق تتحب بجد
شكرا للجميع
هي الحياة بحلوها ومرها لازم تتعاش وتتحب ... واهي ماشية
ReplyDeleteبحييك جدا جدا .. بجد كلام رائع
والحياة هتتحب طول ما فيها ناس مخلصين كدا ومش منافقين وعارفين هما عايزين ايه
تحياتي ليك
جميلة جدا أجاباتك والتي تدل علي شخصيتك الساخرة
ReplyDelete