Tuesday, August 23, 2005

يوميات زهقان
صباح الخير

صحيت النهارده متأخر كالعاده .... فتحت التلفزيون على قناه العربيه وانا بالبس هدومى .. لقيت المذيعه فى برنامج صباح العربيه ( حاجه كده زي صباح الخير يامصر ) بتقول العنوان الرئيسي لإحدى الجرائد المصريه بعنوان إتفضل شاى ياريس انتبهت كده وحسيت ان ريقى جرى وحبيت اشرب شاى، قلت خلاص بأه يابنى اشربه فى المكتب انت إتأخرت


نزلت وركبت العربيه ويادوبك لسه خارج من أول الشارع وواحد من عفاريت الأسفلت ساب الشارع كله وجه رمى الميكروباص عليه ، شكله كده كان بيلم الاجره لسه هافتح الإزاز وأشتم لقيته بيضحك وبيقول صباحك فل ياعسل لامؤاخذه ياباشا ...بصراحه هديت وضحكت وسكت
شغلت راديو العربيه لقيت أغنيه جديده لإيهاب توفيق وبيقول فيها ( ..... هيا ناقصاك انت كمان ... كنت فاكرك بحر أتاريك عطشان ...... ) قفلت الراديو
دخلت المكتب ولسه هاقول ياهادى التليفون الداخلى بيرن .....
رديت-أيوه
صوت رجالى هادى ومستحمى ومتفائل جدا بيقول –صباح الخير استاذ رفعت ولا استاذ رأفت معايا؟
رديت -لا ده ولا ده
إتغير الصوت من حاله التفاؤل لحاله الجد –اسف النمرةغلط
رن التليفون تانى ونفس الصوت - صباح الخير استاذ رفعت ولا استاذ رأفت معايا
يافتاح ياعليم يارزاق ياكريم –فيه ايه ياحضرت ماقلنالك
إتغير الصوت –خلاص أسفين بالراحه ماتزقش
بعد ماقفل السماعه افتكرت إن اسمى فيه رفعت ومراتى فيه رأفت
ياترى عايزإيه.... ومين ... وليه متفائل كده ؟
قلت أفتح الميل وأبص عليه ..لقيت ميل من (بلوج اكسبلوجن) والله الناس دى محترمه انا كلمتهم امبارح ولأحت البلوج بتاعى عليهم عشان يضيفوه عندهم ، ناس محترمه الرد على طووول لقيت عنوانه إعتذار بكل أدب بيعتذروا عن عدم استضافه البلوج بتاعى .. طب ليه ياعم الحاج ماإنت مستضيف مليون بلوج اشمعنى بتاعى ياعنى .. قال إيه باللغه العربيه وهمه ماعندهمش استعداد دلوقتى ونظام (سي يو لاتر) لأ ناس محترمه بجد ، وبعدين لقيت ميل تانى من الجماعه بتوع الفياجرا والحاجات بتعات الإنلارجمنت والتطويل وكده فكرت فى شويه وقلت وقلت لأ مش وقته ..يس وحوالى
الساعه 12 اتصل محمد صاحبى على الموبايل
بيقول-صباح الخير يأحمد
رديت -صباح الخير ياحماده
سألنى-شفت دريم امبارح ؟
قصدك حلم ولا قناه دريم
رد على -برنامج العاشرة مساء ياأحمد
جاوبته -لأ من ساعه حلقه أحمد الصباحى وأنا حرمت ...... ليه؟
قاللى -كانوا جايبين أسامه شلتوت
سألته باستغراب وقرف -أسامه شلتوت مين؟
رد على -واحد من المرشحين ... بس رغاى اوى بيقول انه شريف
ضحكت -ماكلهم بيقولوا كده .. يعنى عايز يقول انه حرامى
ضحك وقال -لألأ شريف من الأشراف... يعنى من سلاله الرسول صلى الله عليه وسلم
رديت -عليه الصلاه والسلام
قاللى -بيقول ان الصوفيين هاينتخبوووه
أنا بقرف -والنبى اعمل معروف ياحماده أنا قدامى 100 عفريت بيتنططوا دلوقتى إقفل الخط دلوقتى
الساعه واحده الضهر نفسي جابتنى اكل طعميه ... رحت محل الفول وقطعت بون بإتنين طعميه سندوتشين يعنى إديت البون للراجل وهو واقف مابيعملش حاجه استنيت دقيقه وقلتله ماتخلص ياباشا انت مستنى ايه؟ . من غير مايبص لى قالى اصبر! قلته هو فيه ايه بالضبط ، قالى مافيش عجينه .... قلت فى بالى ومافيش عجينه ليه وماعملش حسابه ليه من باليل وكل واحد مابيعملش شغله صح ليه ؟ ولسه هاسأله رحت مرجع الفلوس وماشى
ركبت العربيه بابص من الشباك لقيت يافطه مكتوب عليها الحاج / حسين مش عارف ايه عبد اللطيف يقول نعم لحسنى مبارك ، قلت فى بالى هوه مش موضوع نعم ولأ ده بأه خلاص إنتهى وبأه فيه اكتر من مرشح هى الناس مش فاهمه ولا ايه ؟
شغلت الراديو لقيت إيهاب توفيق بيقول .... ( ..... هيا ناقصاك انت كمان ... كنت فاكرك بحر أتاريك عطشان ...... ) قفلت الراديو

7 comments:

  1. إنما أيه حكايه الإنلارجمنت دى .ده أنا قعدت نص ساعه لغايه مافهمتها
    لكن بصراحه يوميات لذيذه ياريت تكتر منها شويه

    ReplyDelete
  2. الأخ : مش لاقى شبشبى
    ميرسى على مرورك وتعليقاتك بس الحقيقه انا ماركزتش فيها أوى أصل بصراحه من اول ماشوفتك وانا دماغى عماله تفكر ياترى الشبشب راح فين حتى مش لاقى البلوج بتاعك
    عموما ماتغيبش علينا

    ReplyDelete
  3. استمتعت بالقراءة. أتمنى لك أن تسمع أغنية تجعلك تفتح الرّاديو، من دون أن تقدر على إقفاله.
    شكراً على تعليقك بخصوص المدونات اللبنانية. ونحو المزيد من البوستات :)

    ReplyDelete
  4. يوميات معبرة


    جدا

    ReplyDelete
  5. ممتعة .. و ربنا يعوض عليك فى الطعمية

    ReplyDelete
  6. السلام عليكم ازيك يا استاذ احمد
    انت ممكن متعرفنيش وانا كمان معرفكش بس انا حابب انى اتعرف عليك انت ضفت فى سبيسي تعليق وحبيت ادردش وياك شوية يعني حابب حقيقى انى اكلمك
    انا ايميلاتي اهيه
    specialman19@hotmail.com
    islam_panseh_2000@yahoo.com

    ReplyDelete