Wednesday, January 25, 2006


الحج ... وجهة نظر أخرى


الحج عبادة لاتكتشف أنها عبادة غير عقلانية بالمرة إلا عند ممارستها ، فلا يوجد أي حكمة تكتشفها إلا حكمة واحدة سأقولها لاحقا ..وإلا بما تفسر حكمة وجود الناس بالملايين على صعيد عرفات من كل البقاع من طلوع الشمس حتى الغروب فى مكان واحد بيدعوا وبيقروا قرآن وبعد كده كله عمال يبص على كله ولو حد مشي قبل الغروب بخمس دقايق مثلا لا يصح الحج بتاعه


الإسلام حرم عبادة الأصنام والأحجار .. ونذهب للبيت الحرام ونطوف حواليه سبع مرات ونقاتل بعض عشان نلمس حجر ولو حصل وقدرنا نبوسه يكون حاجة نتكلم عنها العمر كله .. ليه كده
ننزل مزدلفه ننام على الأرض من العشا للفجر نلتحف السماء كل واحد سايب بلاده وحياته وشغله عشان ييجي صحرا ينام على الارض من العشا للفجر ويبص للسما
دكتور فى جامعة جورج تاون وقته بالدقيقة محاضراته متابعة فى جميع جامعات العالم ، تاخد ميعاد منه قبلها بست شهور ساب كل ده وجه مزدلفة بالليل وقعد يحفر فى الأرض بيلم حصى عشان يروح يرميه تاني يوم .. حجر هايرمي بيه حجر ومحدش فاهم فيه إيه وبيعمل إيه ؟ وليه ؟
المهم تلتزم بكل ده فى الوقت والمكان المحددين وترجع بلدك وإنشاء الله ترجع كما ولدتك أمك ذنبك مغفور

إيه بأه الموضوع ... الحكمة ببساطة هو الإمتثال لأوامر الله في أمور لاتعقلها وأنك تنفذها ليس لأي حكمة سوى الطاعة فقط بدون أى مناقشة وده أقوى انواع الإيمان ، من الممكن أن تدرك هذا المعنى ولكن إقتناعك التام به لايتم إلا بممارسته الفعلية وتنفيذه ، الوقت والزمان والمكان هما السبيل لذلك

قال تعالى : ( ومن يعظم شعائر الله فإنها من تقوى القلوب ) صدق الله العظيم .. الحج 32

------------------------------------------------------------------------

وللحج مواقف أخرى

23 comments:

  1. This comment has been removed by a blog administrator.

    ReplyDelete
  2. أنا لسة دلوقتي قارية البوست في الأول قولت إيه دة إيه اللي هو كاتبه دة هو الغياب عمل فيه إيه؟
    بس في الآخر فهمت
    welcome back

    ReplyDelete
  3. يا شيخ قلقتنا عليك ده احنا كان فاضل ننزل ندور عليك في الشوارع او ننشر اعلان في الجرنال
    مش تقول على الاقل كنا قلنالك ادعيلنا


    انا وانا بقرا اول البوست اتخضيت بصراحه قلت ده مش كلام احمد خالص بس
    اطمنت لما خلصته

    حمدالله على السلامه يا احمد وكل سنه وانت طيب مقبوله انشاءالله
    هنيالك وعقباااااالي يا رب وكل اللي محجوش لسه

    ReplyDelete
  4. 7amdela 3al salama, w mabrook. bas you should have told us ya3ni..kont 3ayza da3weten keda :)) One of your best posts.

    ReplyDelete
  5. سعيدة برجوعك

    و تقبل الله طاعاتك

    ReplyDelete
  6. احمد باشا
    حمدالله على السلامة
    حج مبرور وذنب مغفور انشاء الله

    ReplyDelete
  7. يااااه
    حج مبرور

    وعقبالى يارب... نقسى بجد اشوف هناك

    ReplyDelete
  8. ايوة طبعا انت عمال تدعي في عرفات و سايبنا هنا نقشر بصل و نقول يا ولاد الحلال مين يدلنا عليه . ماشي خلاص الله يسامحك مع انك مدعتليش

    ألف حمد الله عالسلامة . حج مبرور و ذنب مغفور . عقبالنا جميعا

    ReplyDelete
  9. حج مبرور ياعم الحج أحمد
    فكرتنى بالحصى لما كنت أروح ألمه وأنا صغير(5سنين) لبويا علشان حيرمى بالنيابه عن الحريم وكانوا يقولوالى انها لازم تبقى صغيره وانا كل مره اختارها كبيره وانا مستعجب حتعمل ايه الحصوات الصغيره دى فى الشيطان لازم أخترها كبيره

    ReplyDelete
  10. حمد لله علي السلامة يا احمد تصدق يا اخي كان قلبي حاسس.......... مبروك تاني

    ReplyDelete
  11. ولكم باك أحمد
    حمدالله على سلامتك
    تقبل الله طاعتك


    تدري لما رحت الحج
    فكرت بهالاشياء
    أنا ليش قاعده امشي بالصفا والمروة
    ذهاب وإياب

    وليش اطوف بالكعبه مع انها حجر
    انا ما ألوم الغير مسلمين اذا قالو عنا وثنيين نعبد الكعبه ههههههههه
    لان هذا اللي اهم يشوفونه
    ومايدرون ان احنا نقوم بما امرنا الله


    يمكن من المرض والإنفلونزا بديت أخرف وقتها وخصوصا بمزدلفه وانا قاعده أجمع الحصى مت من الضحك على نفسي


    بس مثل ما قلت كله امتثالا وطاعه لله تعالى
    نبغي بها رضاه ورحمته وبالتأكيد المغفرة من الذنوب ..

    ان شاء الله نكون من المغفورين الذنب
    جميعا

    ReplyDelete
  12. يااااااااااااه

    خضيتني يا أخي
    أنا قلت هو بقى منهم ولا إيه

    حمد الله على سلامتك
    و حمد الله على سلامتي

    ReplyDelete
  13. هناك علم يسمى بقاصد الشريعة .. يفسر لك هذه الأعمال الغامضة المفهوم .. لكن الحج كله أركان عظيمة لو قرأت عنها و تفكرت .. و المشاعر التي تأتيك و يمينك ينام بروفوسور على الأرض عليه قطعتين و يسارك ينام رجل بالكاد يجد قوت يومه .. لو تفكرتم بالمواقف و قرأتم تتغير النظرة .. لذلك تجد من يبكي هناك و يخشع و من ينتظر إنتهاء الوقت !

    ReplyDelete
  14. أنا سمعت وجهة نظر لعمرو خالد ف موضوع الحج و مناسكه "و قد تكون مجرد تقريبيه و ليست تطابقيه مع الحقيقه او مقاصد الشريعه" .. ان الزحام في الوقوف بعرفه اشبه ما يكون بالمحاكي لوقفة الحساب يوم القيامه ..

    و الطواف و الزحام فيه اختبار لاخلاق المسلمين .. من لديه رحمه بالصغير او المرأه الضعيفه و توقير للكبير و من لديه ايثار لاخيه المسلم و من لديه اخلاص في نيته للحج .. هل سيشعر بالضجر من الزحام و قد ينفلت منه السباب او ما هو اكثر من ذلك احيانا ..

    المهم يا حج .. بعد كده مفيش خيانه و طاعات قوية كده من غير اشعار مسبق من طرفكم .. علشان كنا هنمليك دعوات تدعيهالنا قصاد الكعبه .. و هنيالك يا حج .. ربنا يرزقنا ياااااااا رب و نروح احنا كمان .. و حمد لله علي سلامتك مره تانيه ..

    ReplyDelete
  15. حج مبرور وذنب مغفور

    حمدا لله على السلامة

    ReplyDelete
  16. بالمرة كنت اوز اسالك دعتلى بعد ماقالولك
    عفوا لقد نفذ دعائكم يرجى الانتظار للحج القادم
    ولا نسيييييييييييييت
    يا خوفى يا حاج متكونش دعيت

    ReplyDelete
  17. تقبل الله منكم صالح الأعمال
    أنت تستاهل كل خير يا حاج أحمد

    ReplyDelete
  18. أشرب القهوة يا بابا
    عقبال ما نشرب شرباتك
    و أنت راجع م الحجاز
    يارب
    يا حااااااج
    هههههههههههههههه
    حج مبرور و ذنب مغفور إن شاء الله يا باشا
    KING TOOOT

    ReplyDelete
  19. عندنا في البلد لما واحد يكون راجع من الحج بيقعدو يغنو له كتير ويعملو هيصة علشان ربنا أكرمة بالزيارة

    ونيابة عن أهالي القرية
    أغني لك

    حجنا يا حجنا
    يارب سلم حجنا

    حجنا رايح يزور
    زار الكعبة والرسول
    يارب يسلم حجنا


    وألف مبروك يا حج أحمد
    وتقبل الله

    ReplyDelete
  20. تقبل الله طاعتك...:)

    ReplyDelete
  21. حمد الله عالسلامة يا حاج شوكير ;)

    إنطباعاتك اللي أخدتها في الحج صادقة جداً ،فعلاً المفروض لو الواحد مستعد يؤمن بالإسلام ميجادلش في شرائعها كتير

    و حتي مع الزمن هيكتشف ان لا جدال فيها :)

    ReplyDelete
  22. حمد لله ع السلامة
    حج مبرور وذنب مغفور يا حج شقير

    تقبل الله

    ReplyDelete
  23. taty
    شكرا ياتاتي .. فعلا ان كنت قاصد أكتب البوست بالطريقة الغريبة دي .. ومتوقع غن ده يكون رد الفعل الأول

    bosbos
    الله يسلمك وعقبالك كده يارب إنشاء الله
    حلوة تنزلزا دوروا عليا فى الشارع بس المشكلة إنتو ماتعرفوش شكلي عموما أنا فيا شبه من توم كروز على كيفين كوستنر على شاكيرا

    nerro
    شكرا على التهنئة وإن شاء الله هانقول المرة الجاية
    شكرا على رأيك فى البوست

    tara
    منا ومنكم وإن شاء الله تعمليها إنتي كمان

    taher
    الله يسلمك وإن شاء الله يكتبهالك

    rose
    شكرا على قلقكم عليا .. حقيقي حاجة تفرح لما الواحد يختفي ويلاقي حد بيسأل عنه وقلقان عليه
    طبعا مشاعر رهيبة وغريبة وإنتي بتشوفي نفس الأماكن اللي كان إبتدأ الرسول بيها الدعوة .. حقيقي مشاعر داخلية غريبة جدا

    lasto adry
    إن شاء الله تروحيها .. حاجة تانية خالص وجو تاني ومشاعر تانية وروحانيات عالية جدا

    change destiny
    مين قال بس إني مادعيتلكومش والله دعيت ليكم .. وبعدين بتقشري بصل إزاي أنا المفروض سايبكم بتاكلم لحمة

    shady
    ده إنت طلعت حاج قديم أهوه ، أنا كنت فاكر إن العواطلية مابيحجوش
    الحصى فعلا لازم يكون صغير زي حبة البسلة كده .. لكن لو غحنا عايزين نرجم الشيطان فى مصر جبل المقطم مش هايكفي

    wa7d mn el e5wat
    الله يسلمك ، هاها بداية البوست قالتلك آه ده باين عليه ياعم لادع بأه وبيتفزلك وهايخرف
    عموما كانت مقصودة

    إبن مصر
    كان قلبك حاسس إن إختفائي ده سببه الحج
    أنا كده إبتديت أقلق منك .. مابحبش اللي بيقراني بسهولة

    نون النساء
    أول مرة أعرف أنك حاجة .. بعد كده هاسميك بدل من سعاد حسني الحاجة نون
    فعلا هيا الاسئلة دي جت في بالي وفكرت فيها وكانت الإستنتاج زي ماقولته في البوست وأنا هناك فكرت إني أكتبه في بوست

    وش مكرمش
    الله يسلمك .. وحشتنا ياعم اللورد .. مش عارف ليه كنت لسه فاكر الراجل بتاع الأتوبيس إللى إنت حكيت عنه من كام شهر .. جه على بالي جامد

    مساعد
    فعلا أكيد الأمور دي ليها تفاسير معينة بس انا فسرتها ببساطة من وجهة نظري الشخصية

    صباحك سكر
    صباحك زي العسل
    وكل سنة وإنتي طيبة وعقبالك

    romantic rose
    ربنا يكرمك وتروحي هناك حج أو حتى عمرة
    طبعا هذه الأمور يمكن الإجتهاد في مقاصدها الشرعية .. بس مش عارف أنا ليه إستقريت أكتر على الفكرة اللي كتبتها
    قوللي لي إنتي بس على الدعوات وإن شاء الله ربنا يتقبل
    ومافيش خيانة ياستي خلاص .. بس إنتي إيه اللي عرفك

    حلم
    الله يسلمك .. عقبالك

    mfm
    ربنا يكرمك ياباشا وعقباللك
    على فكرة إم إف إم يعني 2 رجالة وواحدة ست

    king toot
    ربنا يكرمك ياكنج والله وحشتنا رباعياتك

    أبو شنب
    شكرا ياعم اللورد على الأغنية الجميلة والهيصة الجامدة دي .. عقبال مارندهالك يوم فرحك

    Anonymous
    شكرا ياأنينوموس .. بس ليه أنينوموس

    mindonna
    فعلا زي مابتقولي

    ،فعلاً المفروض لو الواحد مستعد يؤمن بالإسلام ميجادلش في شرائعها كتير

    وهوه ده اللي إكتشفته وحاولت أنقله

    bent masrya
    الله يسلمك وعقبالك كده إن شاء الله

    ReplyDelete