Saturday, September 16, 2006


من وحي كلنا ليلى


Shokeir - Al-Bab Al-Maftouh



هو : ياسامية هي فين فردة أم الشراب المنقط
سامية من بعيد : نقطة تاخدك يابعيد وبعدين انا ماسميش سامية انا إسمي ليلى كلنا ليلى
هو : إيه بتقولي إيه ؟ ليلي مين وكلكوا مين
سامية : أنا ليلى وكلنا الستات
هو : يافتّاح ياعليم يارزاق ياكريم ، هو انتي رجعتي تاكلي كرنب تاني
سامية : إحنا عاملين حملة كلنا ليلي بتاعة فاتن حمامة في فيلم الباب المفتوح
هو : مفتوح إيه ومقفول إيه الله يخرب بيتك
سامية : ياجاهل دي رمز لكل ست
هو : رمز ؟؟ ودي بترمز لإيه بأه انشاء الله
سامية : إن احنا نعلي صوتنا وصوتنا يوصل
هو : قال يعني انتي ناقصة ، وماله علّي صوتك كمان وكمان عشان الجيران يعرفوا انك بتعلي صوتك
سامية : أيوه هانعلي صوتنا ونطالب بحقوقنا كستات ولعلمك انت كمان هاتنضم معانا
هو : أنا ؟؟ طب إزاي ؟ وبعدين انتي بتزعلي لما بقعد مع الستات
سامية : أم محاسن كونت الخلية خلاص بإسم ليلى بلاحدود وخلاص فوزي جوزها دلوقتي بيقولها ياليلى
هو : والنشاط ده بأه هاتعملوه فين ؟
سامية : هااااأو أو أو .. ماخلاص يابوالعيال إتعمل خلاص على الإنترنيت وكلهم بيقابلوا بعض ع الإستينجر
هو : إنترنت ... هو إنتي بتعرفي في الإنتر ده ؟
سامية : محاسن بنت أم محاسن بتعرف تدخل ع الشبكة وبتتكلم مع الناس المثقفين
هو : الشبكة ؟؟ والله مانا فاهم حاجة ، فين أم فردة الشراب بقولك بدل وديني وإسلامي ل
سامية : ها هاتعمل إيه ؟ ده كان زمان يابابا .. جبرنا خلاص
هو : فيه إيه ياستي إنتي مالك ع الصبح عمالة تخرفي
سامية : هو إحنا لما نتكلم عن حقوقنا يبقى إتجننا
هو : كسر حُقك ، طيب وإيه بأه مطالبكم ؟
سامية : البنت لازم تُقش
هو : نعم (بطريقة اللمبي) تقش إيه ؟
سامية : مش الولد بيقش في الكوتشينة ؟
هو : أوووف أيوه الزفت بيقش في الكوتشينة
سامية : من هنا ورايح البنت لازم هي اللي تقش
هو : والواد يتنيل يعمل إيه ؟
سامية : يقعد يتنيل جنب أخوه الشايب مايعملش حاجة
هو : منظر يعني
سامية : ده إنتوا طلعتوا مفتريين والواحدة مش واخدة بالها ، الله يكرمها البت محاسن هيا اللي قالت
هو : أهيه خلاص لقيتها فردة الشراب مش عايز منك حاجة ، شكرا ياست ليلى
سامية : مين ليلى دي بأه ؟
هو : ياخراااااابي


Shokeir - Faten Hamama


Shokeir - Faten HamamaShokeir - Faten Hamama


---------------------------------


كتبت في كوكب المريخ لافتة ... أشكو بها للطائر المحزون آهاتي
وأنت أيضا ألا تبت يداك ... إذا أثرت قتلي وإستعذبت أناتي
من لي بحذف إسمك الشفاف من لغتي ... إذاً ستمسي بلا ليلى حكاياتي

من قصيدة أنا وليلى - حسن المرواني - أُلقيت في حفل تخرج كلية التربية - بغداد عام 1987


------------- تحديث ------------

أُعيد نشرها في منتدى الدانة ومنتدى طب بنها دون إشارة للمصدر

32 comments:

  1. الحمد لله على السلامة

    لو كان الباب فعلا مفتوح لخرجنا جميعا و لم يبق احد.

    هو فيه حد بيلبس شراب منقط !!

    ما علينا.

    اخوك مؤمن

    ReplyDelete
  2. هو باب ايه اللى مفتوح ولامؤاخذة؟
    :D
    حمد الله بسا يا فندم

    احنا هانعمل انتفاضة كلنا مرزوق ما تقلقش

    ReplyDelete
  3. ههههههههههههه

    والله كنت مستنية رد فعلك علي كلنا ليلي

    ههههههه

    بقي مطلب ليلي ان البنت في الكتشينة تقش؟؟ هههههههه و الله نظريه علمية معملية

    حمد لله ع السلامة يا باشا

    ReplyDelete
  4. احمد

    كل سنة وانت طيب بقرب حلول شهر رمضان وان شاء الله رمضان الجاى تكون محقق كل احلامك ـ تحياتى لك ولاسرتك

    ReplyDelete
  5. hehehe!
    جامدة جدا جدا

    ReplyDelete
  6. والنبى يا خويا أحنا ليلى وساميه وعواطف وعطيات , وكل الليالى السودة
    ويارب ما نجيلكم فى اى تظاهرات نسوية تانى

    ReplyDelete
  7. ضحك
    ضحك
    ضحك

    ماشي يا عم احمد


    .................
    و على فكره انا كان عاجبني البوست
    اللي فات جدا و مش فاكره معلقتش عليه ليه

    بس انا مبعملش و لا حاجه من اللي انت كاتبها
    ابقى مش مصريه؟؟

    ReplyDelete
  8. انت فين يا خويا تغيب تغيب و بعدين ترجعلنا ببوست مصيبه بس تحفه

    ReplyDelete
  9. هو فيه ايه؟
    انا مش هسألك إنت كنت فين؟
    دة سؤال إتكرر كتير
    مضش عجباك كلنا ليلى؟؟؟
    دة إحنا حتى مش محصلين ليلى
    ليلى كان حظها من السما و كان معاها صالح سليم
    قولي إحنا بقا هنجيب صالح سليم منين
    و الا حد شبهه حتى
    أو عنيه بس معنديش مانع
    :D
    حمد الله على السلامة

    ReplyDelete
  10. انا ولا هقولك حمدالله على السلامه و لا هسال كنت فين
    انت اصلك كده شكلك استحليت اللعبه دي تختفي عشان كلنا نسال عليك

    و كمان راجع تتريق علينا والله عال
    ماشي يا احمد

    ReplyDelete
  11. عندك جق
    كله من الكرنب

    ReplyDelete
  12. العزيز احمد
    فى اول زيارة لمدونتك
    الاقى سامية قصدى ليلى فى رحلة البحث عن الشراب المنقط ؟
    يعنى قصدك انك ضد حملة ليلى وعايزها تفضل سامية للابد

    بوست لذيذ وكوميدى جدا
    وبرده هو اللى جاب لنفسه الشراب وده اول درس

    تحياتى

    ReplyDelete
  13. عوداااا احمد ده انا كنت كاتبه حضرتك ف قسم المفقودين مع سويدي وابراهيم
    التلات بلوجات كانت واقعة
    حلوة قصة ليلى دي بس انا مشفتش الفيلم ده
    اه والله انا كنت عايزة اكتب موضوع الكوتشينه ده من حقوق ليلى لازم انتوا كمان تعملوا كلكم مرزوق ع راي سويدي هههههه
    حمدلله ع السلامة مرة تانية

    ReplyDelete
  14. ازيك يا باشمهندس...حمالله ع السلامه

    بس شوفت حركة ليلى دي كانت حلوة ..عملت جو كده بين المدونات

    ممكن لو سمحت تبقى تيجي تزورني ..و الله بتفائل بيك
    وكمان لوسمحت تبقى تضيفني عندك في اللينكات ..و النبي حاسه كده ان وشك حلو عليا وأول ما هتضيفني هاتجوز على طول

    ReplyDelete
  15. هممم.... ليه كل المتجوزين كده مش طايقيين بعض
    و في الخطوبة حب و غرام و هيام

    ReplyDelete
  16. ياخرابى يا احمد والله ضحكت ضحك من زمااااااااااان ماضحكتوش ، انا مش فاهمه انت مش بتألف سيناريوهات ليه؟ ده انت لو كتبت فيلم تكسر الدنيا

    حمد الله على السلامة ونورت "الحكاوى" اللى كانت مضلمة ... وكل سنه وانت طيب ...

    ReplyDelete
  17. الحمد لله على السلامة
    والله انا كتبت كومنت كبير على الموضوع دة بس ضاع الظاهر ان انت فية ايدى مصرية

    ReplyDelete
  18. أم محاسن بتسلم عليك كتييير السلام و بتقولك ألف حمدالله عالسلامة و رمضان كريم
    و بتقولك ان حركة ليلى بلا حدود قررت تخللى الرجالة هما اللى يعملوا الكحك السنة دى و يورونا شطارتهم
    كل يوم فى رمضان هنسيبلكوا عالأستينجر قايمة الفطار و السحور - احنا مش فاضيين للحاجات دى عندنا اجتماعات و تظاهرات كتير أوى للنيل منكم يا ظلمه
    بالمناسبة : فردة شرابك المنقطة أنا لمحتها فى رجل بعدك على بالى امبارح فى اجتماع المنظمة

    ReplyDelete
  19. حمد لله ع السلامة يا كبير

    كلامك عاقل وموزون

    طبعا مش الكبير ؟

    ReplyDelete
  20. حمد الله على سلامتك يا أحمد بيه، والله ما كنتش متصور انك ممكن تستجيب لموضوع ليلى ده أو تكتب عنه، ما تيجي نعمل حركة نسيمها كلنا عبد التواب

    على العموم كل رمضان وانت طيب، وياريت لو تيجي تشقر علينا كل فترة يعني، مش كده ولا ايه يا أستاذ شقير

    ReplyDelete
  21. elnet 3ndy sy2 gdn, w elcomputer kaman msh rady yktb 3rby, anyway, 7'er ya bashmohandes? msh 3gbk youm "kolna lyla" ?? w bttetry2 ??

    3la kol 7al, 3awza post gdid f ndaret shms abl rmadan. momken ?

    ReplyDelete
  22. كل سنه وانتم طيبين وربنا يعود علينا وعليكم الايام بخير

    ReplyDelete
  23. ههههههههههههههههههههه

    قال الكوتشينة تقش قال

    طب ماهو قاللها ياليلى فى الاخر قالتله ليلى مين ؟ دى ينفع تقش

    جامدة جدا يا باشا

    ReplyDelete
  24. أول مره أجيلك
    بصراحه أم محاسن هى اللى بعتانى
    بتقولك متنساش الغسيل تلمه من على السطح
    ههههههههههههه
    لا بجد حوار جامد
    دمك شربااات
    طلعتنا مجانين

    ReplyDelete
  25. مساء الخير هو الجواز حلو كده يعني ده الصباح المعتاد ولا ده صباح سبشيل ولا ده صباح اللي بتغني
    بس عجبتني اوي

    ReplyDelete
  26. طيب هيه بعد الرغي ده كله قالت على مكان الشراب المنقط ولا اكتفت انها جابت لصاحب الشراب شخصيا نقطة؟؟؟

    ReplyDelete
  27. مؤمن
    حقيقي باسعد بتعليقاتك دايما ، والشراب المنقط دليل على خلل موجود

    m_elsewedy
    ياسويدي مالباب المفتوح ده بتاع لطيفة الزيات كان هو رمز الحملة

    Epitaph
    الله يسلمك ، حقيقي ماكنتش متوقع ان اكتب عن الموضوع ده ، بس لقيتني كتبت البتاع المنشور ده

    Dananeer
    شكرا لزيارتك

    Gid-Do - جدو
    تحياتي ليك وللعائلة ولياسمين وكل سنة وانت طيب

    Jannah
    ميرسي على تعليقك ونورتينا

    shady
    شفت ياعم شادي اهو احنا كده سايبين البلاوي وجايين في الهايفة ونتصدر

    farida
    مصرية والف مصرية كمان عشان المصري هو برده اللي مابيعملش الحاجات ولا تزعلي

    ام العيال
    والله الغياب ياأم العيال مش بايدي إنتي كمان بوست الليمبي تحفة

    taty
    خلاص اظن وضح سبب الغياب ، هو انتي بتحبي صالح سليم امركوا غريب اوي يابنات

    bosbos
    لاسمح الله وانا اقدر اتريق برده يابسبس ده بس نوع من المشاكسة لااكثر

    Maxxed`ouT
    هاها هي دي اللي لفتت نظرك الكرنب عموما تاثيره قوي وفعال جدا وسريع ايضا

    tota
    أهلا بيكي في اول زيارة
    لا طبعا انا مش ضد الموضوع هو بس نوع من انواع المعاكسة
    بس كويس انك لاحظتي اثر الحملة انه في الاخر هو اللي دور على الشراب وهو اللي جابه

    نوران
    يااه موضوع الغياب كان نازل في النشرة ، ماكنتش متوقع ان الحكاية كبيرة كده بس الحمد لله ادينا ظهرنا اهوه قبل النشرة احنا مش نشراتك يانوران

    wanna b a bride
    تم عمل اللازم ووضع الينكات والروابط وبصراحة زرت مدونتك ومن كتر جمال البوست بتاع العريس النصاب اللي نشل التلتميت جنيه وانا مش لاقي تعليق على مفاجاة وطرافة الموضوع
    وربنا يكرمك بعريس بس انتي عايزاه ليه ؟؟؟

    Nohaz
    سؤال جميل فعلا الحياة بتتغير بعد الجواز يمكن عشان الاقنعة بتزول

    شهرزاد Shahrazad
    شكرا للزيارة ومدونتك جميلة

    بعدك على بالى
    الله يسلمك انتي كمان وحشتينا وعايزين نشوفك قريب
    سيناريوهات مرة واحدة اخجلتم تواضعنا

    asadma7bos
    ربنا يكرمك يابوحميد بس بصراحة انا ماليش ايد في موضوع الكومنتات المختفية

    تمر حنه
    بقى فردة الشراب مع بعدك على بالي طيب والله لما اشوفها ، وبعدين كحك العيد انا اللي هاعمله ده لما يبقى اسمي احمد تسيباس

    admelmasry
    آدم ربنا يكرمك الكبير كبير باللي الكبار اللي زيك

    المواطن المصري العبيط
    كلنا عبد التواب حاسس ان الاسم مش عاطفي يامواطن عموما استجابة للتعليق على الحملة ده بس ناتج من ان اللي مش هايعلق هايطلع بره الصورة وانت عارف ان كلنا كده عايزين صورة
    ومدونتك زيارتها واجبة في رمضان يامعلم


    Romantic Rose
    مش باحب العربي اللي بالانجليزي ربنا يهدي الكومبيوتر بتاعك كده في الايام المفترجة دي ونضارة شمس باه بعد رمضان ماينفعش اليومين دوول

    عمر
    وانت طيب وشكرا على التهنئة

    Taher
    هاها وصلت للمطلوب والهدف من الحكاية

    Aoossa
    شكلك كده انتي اللي بتقعدي ع الستينجر تعملي الخلايا دي وشكلي كده هابلغ عنك البوليس السياسي عشان بتشتغلي مع الأورنس

    هوميروس
    مساء الفل والله ده الصباح المعتاد الاسبيشيال ده حاجة تاني اشد واجمد

    كراكيب
    تقول لمين يالورد على مكان الشراب هو طبعا اللي جابه وعلى رايك بعد ماجابتله النقطة

    ReplyDelete
  28. It's my 1st time to rely to ur blog , i liked it evry much especially 7ewar lila da we el farda we bent el kotchina ah sa7i7 eshm3na y3ni el wald el y2osh tab leeh mosh el shayeb aw el bent !!!!!

    ReplyDelete
  29. howa eah 7kyat ana layla wana sawsan webta3 de, hya men motlkathzy el7mla elbalha2, we bnt eah elt2osh felkotshina insha2alh, law knt nas7a knt al masln, n2lbhm kolhm 7reem, elmlka, elamiera welwasefa, we tb3an elbrenziza hya elt2osh, mhy gat mkan jaky, any way ya3ny, wad7 inha welya fadya bs ana 3yza 7ad ygbly ellink bta3 mnba3 el7amla de, wana walhy mesh mn bto3 atgwez waraby el3yal, la2 3ady ya3ny bshta3'l we badawr 3ala career mesh 3ries wala 7aga, bas bto3 el7rkat dol 3latol e3rf, fe 3ndk wa7d mrkb n2s we zabato, walhy setat fadya. ya set layla: GOZEK 3ALA MA T3WEDEH, ya3ny elwa7da law 3yza tng7, htng7 we mfesh rgl hy2dr y2lha 7aga, bas da tb3an fe7alt inha testahl tewsal lely wesltlo.
    wa domtom salmien

    ReplyDelete