Tuesday, April 17, 2007

أنا معجبة بواحد مصري .. أعمل إيه ؟


أنا معجبة بواحد مصري .. أعمل إيه ؟


© Photo Copyright: alexdpx


ياهوو ! أنسرز ، أو إجابات ياهوو! .. موقع شهير مخصص للإجابة على أسئلة من أي نوع ممكن تيجي في بالك ويشارك القراء الآخرون على الشبكة في محاولة الإجابة ، وأنا باستعرض بعض الإسئلة والإجابات تعثرت في هذا السؤال

مورنينج ستار فتاة أجنبية يعني إمرأة حرة في مجتمع حر ، إحتارت وإحتار دليلها في صديقها المصري بعتت سؤال بتقول فيه إنها تعرفت على شاب مصري ، وإلتقوا عدة مرات والرجل عادي ومافيش أمور حدثت تقدر تبين إختلاف الثقافات ، والست هاتتجنن عايزة تعرف الراجل أكتر ، وعلى طريقة بابا ضياء بعتت لياهو أنسرز بتسأل أي فتيات لهم علاقة بشباب مصريين ممكن يفيدوها بأي معلومات عن هذا الكائن المسمى المصري ، ليس من الناحية الدينية فهي تعرف عن الإسلام ولكن من الناحية الإجتماعية تقول أنه من الأسكندرية وتتسائل هل هذه المدينة مجتمعها متحرر أم محافظ ؟

فكرت
في إجابة بطريقتي الخاصة إكتشفت إنه سؤال عويص ، وخصوصا إن اي موضوع به تعميم يربكني جدا ، فلا شك أنه لايمكن تعميم صفات خاصة على جنسية معينة ، وإن كان يمكن نعت أكثر حامليها بتلك الصفة ، ولكن يزداد الأمر صعوبة عند الحديث عن المصري حتى لو وضحت لك تصرفاته فيبدو متدينا فتجده منحرفا ، يبدو مؤذيا فتجده طيب القلب ، يبدو جاهلا فتجده مثقفا ، مثل مارأيت من
يبعث لياهوو أنسرز يطلب أن ينتقل من وزارة الكهرباء لهيئة قناة السويس ، وهو مادفع ياباني لأن يقول له إذا كان هذا أسلوبك في وسائل تغير مستقبلك فعمرك ماهتتنقل من مكانك ، بل العجيب أنه يحمل دائما الصفة ونقيضها في نفس الوقت ، ففي أول اليوم هو شخص عبوس متجهم بلا سبب واضح ، وفي وسط النهار هو شخص مرح يتمتع بخفة ظل عالية بلا سبب واضح ، وآخر اليوم هو شخص عاقل يجيد الإستماع وفمه ينطق بالحكمة أيضا بلاسبب واضح ، معظم جنسيات العالم تتحد في جزء كبير من الصفات بل والملامح وأنت إذا نظرت إلى أي إتنين مصريين سوف تجد أن أهم مايميزهم هو عدم وجود أي تشابه أو ملامح خاصة بل أحيانا يكون الإختلاف في الملامح في الشخص الواحد فنصفه الأيمن يختلف عن نصفه الأيسر

إجابات مختلفة جاءت للسيدة مورنينج ستار منها من قال لها إحذري فقد يتزوج عليكي ثلاثة آخرين دون ان تعلمي ، وآخر يقول لها سوف يعاملك كإمراة من الدرجة الثانية فأنتي موجودة للبيت وتربية العيال وثالثة تؤكد وجهة النظر ورابعة تقول ان الأسكندرية مجتمع محافظ ، ثم جاء شخص يعلنها قوية جريئة أنا من مصر وخليني أتكلم معاكي على إعتبار إني سوف أتزوج إمراة أمريكية مع إن البنت ماجبتش سيرة الجواز خالص ، قال لها لازم المرأة الأمريكية اللي هاتجوزها تكون ملابسها مغطية كل جسمها ، ولكن مافيش مانع من صداقات العمل مع الرجال لكن صداقات البيت لأ

فتاة أخرى تقول أنها كونت صداقات سابقة مع شباب مصريين ومسلمين وصعب التعمييم بينهم ، بس مش كلهم متزمتين في منهم متحررين حتى الملتزمين منهم مش بيكونوا ملتزمين بشكل عنيف ، وفيه مصريين بيستغلوا الأوربيات زي مافيه بعص الرجالة الأوربيين بيستغلوهم

واحد ماليزي بقاله سنة ونص في مصر بيقول للفتاه إنه لاحظ إن المصريين مختلفين عن أي نوع بشري آخر ، وطيبين جدا وبيعرفوا يعاملوا الغرباء بشكل جميل جدا ، لكن الغريب انه بيتحولوا مية وتمانين درجة لو شفتيهم بيتعاملوا مع مصريين تانيين ، مش هاتصدقي إن دول هما اللي كانوا بيعاملوكي ، وبيقول لها عشان كده ماتستغربيش لو لقيته بعد ماتقربوا من بعض أكتر إنه اتغير فتعامله مع الأجانب يختلف

فتاة لاتينية قالتلها ويلكم تو زي كلوب ، أنا كمان متجوزة مصري بالرغم إني غير مسلمة ، وهو لم يرغمني على ذلك أمه ترتدي ملابس كاملة تغطي جسدها عدا الوجه ، هولايحب أن ينظر احد لجسدي لم يرغمني على لبس خاص واغن كنت فضلت بنفسي أن أترك الجينز و الملابس الضيقة ، فالمصريين لايحبون أن ينظر الأخرين لتفاصيل جسد من يهمونهم ، فتاة
أخرى لاتينية كاثوليكية على وشك الإرتباط بمصري تتفق على ماسبق وتقول أن زوجي المصري المستقبلي هو أحسن شيئ حدث في حياتي حتى الآن ، فهو يحترم ديانتي وأنا أحترم ديانته وأنا لايهمني ديانة أولادي بقدر مايهمني تنشئتهم الجيدة

طبقا لنظام ياهوو أنسرز عشان يقفل التيتة دي ويخلص الليلة ، يتم إختيار أفضل إجابة وكانت أفضل إجابة هي إجابة ال م ص ر ي

ولا إنت رأيك إيه ؟؟

-------------------------

تحديث : من الأسئلة التي وجدتها في هذا الموقع



41 comments:

  1. على فكره هى لازم كمان توضح المصرى اللى عاوزه تعرفه ده عايش فى مصر ولا بره مصر عشان بتختلف بالنسبه للأنسان الواحد ولو بره مصر فى بلاد عرب ام عجم لن المصرى فى كل حته بيختلف ده انا مش عاوز اقول فى الكويت ولا السعوديه عشان بتختلف بردو فعلاً تعميم

    اما عن اجابتى فأقول لهذه الفتاه
    المصرى زى البطيخه لا يمكن معرفه ما بداخلها والتأكد منه ابداً ولا حتى بعد فتحها ، ويمكن تكوين فكره عنها بعد الهضم فإن كنت من هواه المغامره فتوكلى على الله ونتمنى لك حظاً سعيداً وان لم تكونى فإبقى بعيداً افضل لك وله ولنا

    الموضوع شيق استغرقنى حتى نهايته

    ReplyDelete
  2. عزيزي احمد
    عودا حميدا
    الحكم علي واحد لم تعرفه صعب
    ولكن بنظره حولنا سنجد المصري من هو متدين من هو منحرف من هو متفوق من قانع من هو من هو
    ولكن يبقي شئ واحد ان المصري معروف بالرجوله والصبر والجلد
    انما المميزات والعيوب الاخري تظهر بالمعرفه

    ReplyDelete
  3. سؤال صعب
    :)

    it's that difference between Easterns and Westerns...! the Oriental whose emotions overrueles..and the Western whose reason is number one!

    However..some- and I stress this word- Westerns..often tend to be Orientals in that sense that in their own characteristics...their emotional part plays a role..just as us, Easterns...!

    However...the Western will remain a Western...just as the Oriental will remain an oriental..and of course..I don't allude to the stereotypiacl phases!!

    My best regards

    and thanks for the post :)

    ReplyDelete
  4. مصري!! هو في زي المصري؟؟
    الراجل المصري راجل فلة بيحب بيته و مراته و يبقى زي الرجل الراقدة و لا بيتخانق و لا بينكد على مراته و لا بيبصبص برة و لا اي حاجة ابدا
    توكلي على الله يا ست بوكس و نزلي ام اس ان و امسحي الياهو ده بيودي ورااااا

    اوروفوار

    ReplyDelete
  5. المصرى زيه زى اى حد او اى جنسية فيها الكويسو فيها الوحش بس انا اعتقد ان اكتر صفة غالبة على طبع المصريين هيا الطيبة وحب الغرباء احنا بنقدر بسهولة نتكيف مع اى حد غريب

    ReplyDelete
  6. حد يقولها تنفد بجلدها يا جماعة
    ولا أقولك
    سيبوها تجرب
    سيبك إنت
    أحسن ما في الموضوع
    الخلفية

    ReplyDelete
  7. و انا اقول شقير مختفي فين اتاريك شفتلك قهوة تانية غير قهوة البلوجرية تقعد عليها

    انا مليش راي في موضوع الست دي لاني بصدق ان كل حالة و ليها ظروفها
    و مينفعش انصح حد بحاجة و انا مش متاكده منها

    ربنا يوفق كل من كان
    و متحرمناش من شوفتك
    و السلام

    ReplyDelete
  8. بما اني اسكندرانيه ممكن اقول انطباعي عن الرجالة الاسكندرانية .. هما روشين و بؤ شوية و كرماء و رجالة كويسين .. بس يكفيكوا شر العصبية و البصبصة البريئة بس اللي تحرق الدم .. و كمان حبالهم طويلة شوية .. بمعني أخر علي قلبهم مراوح !!

    علي فكرة .. جوزي مش اسكندراني و الحمد لله :)

    عودا حميدا يا باشمهندس و ما تبقاش تغيب علينا تاني .. و ميرسي علي السيت ده لاني مكنتش اعرفه و هلعب بقي و اقلب فيه كتير .. بيعجبني قوي فكرة مشاركتك للأخرين ف قراءاتك المتميزه و ابحارك علي النت برضة علي السايتات اللذيذه .. ميرسي :)

    ReplyDelete
  9. إتأخرت يا بشمهندس شقير... كنت كل يوم بدخل ما ألاقيش جديد أستغرب... بس الجديد تحفه كالعاده... التعميم كما قلت صعب... الإنسان نفسه بيكون بكذا شخصيه وفي كل موقف تلاقيه ظهر بشكل... بس المصري.. يا عيني عالمصري... هو كوكتيل عجيب من الصفات البشريه.. فيه الطيبه و الفذلكه في نفس الوقت.. كذاب وجدع وصادق في وقت تاني... كل المتناقضات تجمعها الشخصيه المصريه... وكله بينفع وقت زنقه

    سلامي ليك

    ReplyDelete
  10. على فكرة إنت سئلت السؤال و رديت على نفسك

    عمر التعميم فى مواضيع الإنسانيات ما بينفع

    لو عايز تستوعب الإجابة , تخيل البنت دى كلمتك إنت أو عدد من إصحابك اللى إنت تعرفهم كويس (لا يتعدى عددهم 5 يعنى) ... و تخيل رد فعل كل واحد منهم معاها

    مع تحياتى

    أحمد السعيد

    ReplyDelete
  11. هو اكيد مينفعش نعمم على كل المصرين او حتى الاسكندرانين بس اكيد في صفات مشتركه في الرجاله الشرقين متلاقيهاش في رجاله تانين

    متهيالي هو ده اللي كانت بتسال عليه

    ReplyDelete
  12. لا طبعا فيهم صفات مشتركة كتير و ما يشوفهاش و يحكم عليها الا اللي بيسافر كتير و يقضي فترة في بلدان مختلفة.... و هي مش محتاجة الياهو انسر...محتاجة تتعامل معاه زي أي واحد من بلدهم... ارتباط طويل و دراسته لحد ما يتأكدوا انهم بيحبوا بعض...بالضبط زي ثقافتهم.... و لا ايه؟

    ReplyDelete
  13. المصرى مهما كان هو احسن واحد بس بالنسبه للاجانب هم ليهم معايير مختلفه والاحسن ان الانسان يرتبط بالانسان المتفاهم معه واللى يلاقى نصه التانى لا يضيعه.........ممكن بما انى مدونه جديده تضيف مدونتى عندك عشان الناس تعرفنى...شكرا

    ReplyDelete
  14. صداقات البيت لأ
    مستر حمش

    ReplyDelete
  15. ايه يا باشا هوا اول حد علق عندى كان انت ومن سعتها مبتعديش ولا بوستاتى متستهلش تعلق عليها عموماً انا كفايه عليا اول تعليق ده فى حد زاته شرف ليا تحياتى ليك والبوست بتاعك هايل كالعادة....سلام

    ReplyDelete
  16. المصي ما هو الا كائن بشري زيه زي اي انسان

    اي مجمتع فيه الوحش وفيه الحلو

    مش شرط انه يطون مصري شرقي عشان مش يحب ان مراته تبان علي حد
    انا اعرف اجانب بيعملوا كدة

    بس مش تعرف ليه بالذات المصري اللي بيكون محور قضية في العديد من البلدان

    جايز لانه اسطوري

    ReplyDelete
  17. هاهاهاها

    المشكله يا ريس فى قصص النصب على بنات اوربا اللى تقريبا احنا مبدعيين فى تاليفها

    انا كنت متابع العمود بتاع انيس منصور و كان كاتب انه كان هو و جماعة اصحابه قاعدين فى جنينة فى المانيا قبل كدا و دخلت عليهم واحدة المانية و كانت شايلة طفلة صغيرة على ايدها و قالتلهم انتم ملامحكم شرقية و بادت حديثها عن معرفتها بشاب مصر ى و حبها له ثم كتابة عقد عرفى ثم اختفى مرة واحدة حتى سالها احد الموجودين على العقد و لما شفوه لاقوا مكتوب فيه
    ز ر ع

    ح ص د

    ن ص ب

    هـ ر ب



    على فكرة الصورة مستفزة اوى و بتوه اللى بيقرا الموضوع

    طبعا انت فهمنى

    ReplyDelete
  18. وده على اساس ان المصرى بعشرة امثاله صح
    هههههه
    وحشتنا يا احمد باشا ووحشتنا تعليقاتك
    يهمنا رأيك على طول

    ReplyDelete
  19. انا شايف ان رأي الماليزي هو احسن {اي...احنا فعلا بنعامل الاجانب بطريقة و بنعامل بعض بطريقة تانية خالص

    والمصري بعد ما يتجوز من اجنبية معاملته ليها ممكن هتتغير على اساس انها بقت مننا وعلينا...ههه

    بس جامد قوي سؤال السمك السنجاري

    وعلى فكرة معظم الناس فاكرة ان مصر تقع في افريقيا مع انها تقع في افريقيا واسيا علي اساس ان سيناء بتتبع القارة الاسيوية

    ReplyDelete
  20. الغالى بالأوى شوكير
    ايجيبشان هيبوسنى هاى .. ايجيبشان هيبوسنى هاى
    جاتها ستين نيله و زفت و زفتون -عارفه؟ أيوه البتاع المكبب ده.. هى داقت عليها يعنى و زنقت؟
    بص يا شوكير .. الراجل المصرى بوجه عام و فى المجمل - الا من رحم ربى- زكيبة كلاكيع و طبعا ده مش عيبه ده عيب اللى ربوه.. فاهم انت طبعا : لما قالوا ده غلام انشد ضهرى و استقام و حكاوى أيوب دى
    و لكن فلنطمئن السائلة و لتهدأ و تقر عينا .. فاسمالله عليه المصرى بيعمل العوأ ده معانا احنا بس .. و لكن عندما يرتبط بغير المصرية بيبقى ملبن و الله ملبن .. لطيف و ودود و كريم شانتيه
    بيتعلم يا خويا يبقى هيلب فول و ي واش زا ديشز بعد ما كان بيدشدشها على نافوخ اللى فى البيت و بيقول بليز و شانك يو فيرى ماتش .. و تسدق يا شيكو لما بتخرج مع صحباتها بيقعد مع البيبيز و يقولّها هاف فان هانى ..
    ياخى جاته نحلة لما تبقى تقرمه ف لباليبه
    الحنيه و الطعامه و الشقاوة و الحلاوة ..تقولش بنت و اسمها تررم
    كلام فى سرك .. نحن النسوه المصريات اللى بنمرعكوا و ننفخكوا لحد ما تفرقعوا فوشنا.. و اللى فينا تقول حقى يتكسر حُقها و اكسر للمصرية ضلع يطلعلها اتنين.
    الا يا شوكير و انت بتدعبس فى السايتات المفيده دى ماتكعبلتش فى اعلان لشاب أزبانى ولا طوليانى -هو مش شاب أوى يعنى المهم يكون حى يرزق- يرغب فى الزواج من مصرية تجيد الطهو و أشغال الأبرة و تشارك فى تأسيس الشقة- ان لقيت ابقى قوللى - بس حط من عندك : و نفسها مكسورة من أحوال الايجيبشان مان
    ملحوظة : ماتجسلنا نبض الولا بتاع السمك السنجارى ده !!!ا

    ReplyDelete
  21. باضم صوتى للرفيقه تمر حنه التى فهمت القليل من كلامها باعجوبه
    وشكرا لك على حذف النصف السفلى للصوره
    ولا انكر انى انزعجت لان هذا حدث قبل ان اسيفها عندى
    :)

    ReplyDelete
  22. اعجبتنى جميع الاجابات لطرافتها

    لا لصدقها !!!

    ولكن بأختصار

    أعجبنى تعبير محمد جعفر

    ( المصرى زى البطيخه (

    تحياتي لك

    ReplyDelete
  23. يا سيدى أنا أضم صوتى لصوت تمر حنة
    المصرى يعامل الجنبية بطريقة مختلفة لشعوره أنه اقل منها مهما كان من كلاس مرتفع ودة أنا شفته بعينى فى كثير من العلاقات التى ارتبط فيها رجل مصرى بإمرأة مصرية ثم انفصلا ليرتبط باخرى أجنبية
    يحترمون الأجنبية حتى لو كانت من البوسنة أو أوكرانيا أو حتى افغانستان
    وهى بلاد اقل من مصر على فكرة

    لكن لو بتسألنى عن الراجل المصرى بالنسبة لى فهو بيعجبنى أكتر من أى راجل من أى دولة تانية
    ليه؟
    مش عارفة بجد
    يمكن التعود
    هو كله عيوب .. وعقد .. تربى بطريقة مش صح خالص ونظرته للمراة دونية مهما ادعى غير ذلك
    عشان كدة هو بيحترم المرأة الأجنبية .. ماحدش رباه على ان المرأة الأجنبية حقيرة
    المرأة الجنبية فى ثقافة الرجل المصرى امرأة حرة ولها ثقافة مختلفة هو بيحترمها .. للأسف
    تحياتى على البوست الرائع

    ReplyDelete
  24. حبيت اطمن على الست بوكس عملت اية؟
    اخدت الصابونة و لا لسة؟

    ReplyDelete
  25. احمد

    السلام عليكم

    بما انك متخصص فى مجال البرمجة

    انا عاوز احط صورة لحفيدتى على مدونتى ومش عاوز حد ينقل صورتها ممكن تساعدنى
    ولك الشكر

    ReplyDelete
  26. طبعا مافيش زي المصري


    بس لما يتجوز اجنبية



    طهقانة
    هوا دا العشم برضيك

    ReplyDelete
  27. حبيت أقول لك إني عديت قريته ، ونسيت أعلق :)

    .
    .
    .
    كان فيه كلاام كثيييييير عاوز أقول له ، الآن تسـرب
    .
    .
    تحياتي لك يا أستاذنـا

    ReplyDelete
  28. العزيز احمد شقير
    انا برضه من طبعي لا احب التعميم
    او الحكم الجزافي
    المصري زيه زي اي جنسيه تانيه
    ممكن يبقي حلو ممكن يبقي وحش


    بيعجبني جدا في مدونتك الاشاره الي مواقع او خبايا النت
    موقع اجابات ياهوو اول مره اسمع عنه
    شكرا لك
    تحياتي لك ووحشاني زياراتك وتعليقاتك
    وكنت اتمني مشاركتك في حمله اغراق اسرائيل في بحر من البول
    واللي كانت بعنوان
    please micturate on Israel

    ReplyDelete
  29. انا موش هتكلم يااحمد
    اهوووووووووووووه
    http://www.youtube.com/watch?v=4tfK-1oF4I8&mode=related&search=

    وشهد شااااااااااااهد من اهلها
    "اراب جايز سووووووو سيكسى"

    ReplyDelete
  30. يخليلك نور عنيك
    و يطعمك ما يحرمك
    و يكفيك شر المهلبتية


    اسعدتني على الاستمورننج
    بوضعك بوستي في الفترينة

    زورني دايما
    ربنا ما يقطعلك عادة

    ReplyDelete
  31. هههههههههه

    المصري هوة المصري

    الطين حواة و الخير جواة

    تحياتي

    ReplyDelete
  32. توكلي علي الله
    و لو منفعش في زيه كتيير
    أكتر من الهم علي القلب

    ReplyDelete
  33. إلى جميع الأخوة و الأخوات
    زميلتنا المدونة وينكي تعرضت لموقف خطير أدى لحذف مدونتها، و مما تسبب لها باحباط شديد فقررت ترك الكتابة إلى الأبد و اعتبرت نفسها ميتة
    و لأننا نحن المدونون كلنا يد واحد و رزمة أقلام مجتمعة، أتمنى أن تشاركونا بهذه الحملة لاقناع وينكي العزول عن موقفها السلبي و لمعرفة ما حصل معها تماما
    رابط الحملة وينكي لن تموت من هنا
    أرجو من الجميع مساندة الأخت وينكي
    http://gayofsun.blogspot.com/2007/04/blog-post_29.html

    ReplyDelete
  34. ana awel marra ashoof feeha yahoo answers 3la fekra ..
    we ra2yee en el masry a7san mn naas kteer tanya .. 3la el a2al 3andoo shoyet 7agat koysa belfetra we msh me7tag yektasebha belwaqt .. we 3ando kaman shakhseya qaweya we 7odoor qawy

    ReplyDelete
  35. حلوه العوالم اللى بتاخد الناس فيها دى

    ReplyDelete
  36. مرحبا
    مدونة رائعة جدا بهنيك عليا
    والموضوع استوقفني يمكن لانو حسيتو بيخصني شوي
    بما اني بحب شب مصري
    وانا مش مصرية
    الرجال رجال بغض النظر عن جنسيتو يعني ما فينا نعمم انو رجال هالشعب مناح و رجال الشعب التاني بيخونوا او مش مناح او او
    وما في الواحد يجي يعمم و يقول والله المصري ما في منو بيجنن لانو صعب تحكم عشعب من شخص واحد
    انا ما بفضل العلاقة بين شخص عربي و شخص تاني اجنبي
    بغض النظر شو جنسية هالعربي مصري وله لبناني وله سعودي لانو اد ما كان منفتح و مثقف بيضل عندو عرق شرقي حيتحرك في
    العلاقة بين تنين عرب من بلدان مختلفة بحس ممكن تنجح وبتكون حلوة لانو تقريبا نفس المبادىء والقيم بغض النظر عن البلدان يعني فيا الحياة بينون ممكن تكون حلوة ونسبة نجاحها ممكن تكون اكتر من الاجني و العربي و بالنهاية بدي قول انو الرجال مش كلها متل بعضها ابدا هالشي يلي ما بيعطينا الحق نعمم كل واحد هو وحظو بقى

    بس في قول من وجهة نظر شخصية انو تقريبا المصريين رجال و نساء شعب مهضوم كتير ما في شك بهالشي
    مدونتك رائعة حتكون من اليوم من المحطات يلي لازم شوف شو الجديد فيا
    بالتوفيق

    ReplyDelete
  37. أنا كمان مش باحب التعميمات، لكن "وبيعرفوا يعاملوا الغرباء بشكل جميل جدا ، لكن الغريب انه بيتحولوا مية وتمانين درجة لو شفتيهم بيتعاملوا مع مصريين تانيين ، مش هاتصدقي إن دول هما اللي كانوا بيعاملوكي" دي صحيحة جدا و أحد آفاتنا الاجتماعية.

    ReplyDelete
  38. الرومانسى المتالمMay 16, 2010 12:35 AM

    انا شايفة الر جل المصرى اكتر راجل حمال اسيةوانةمعاملة للمراة المصرية هتختلف عن المراة الاجانبية لان المصريةتعودت على تقاليدة ام الاجانية هى يعنى من تصرفاتة فى هيضر يغير طريقة معاملة

    ReplyDelete