Monday, June 04, 2007

مؤتمرات لا بتودي ولا بتجيب


مؤتمرات لا بتودي ولا بتجيب





على اليوتيوب عثرت على هذا الفيديو الجميل ، وبالرغم من أنه فيديو من المفترض أنه سياسي بالدرجة الاولى ، إلا إنه لايمكن إلا تصنيفه تحت بند الفيديوهات الكوميدية اللاذعة ، وبالرغم من أن الحدث خطير وهو غزو العراق للكويت والذي كان من نتيجته عذابات نعاني منها كعرب حتى اليوم ، إلا أن الفيديو به من الإيفيهات الكثير ولمن لديه صعوبة في مشاهدة الفيديو نتيجة سرعة الإتصال بالنت فسأحاول أن أوجز لكم أهم مافيه

الفيديو عبارة عن الجلسة النهائية العلنية للقمة العربية الطارئة بالقاهرة عام ألف وتسعمائة وتسعين وقد شاهدته وقتها واعدت تذكره اليوم ، والجلسة هي التصويت على إدانة الغزو العراقي لدولة الكويت ويرأس الجلسة الرئيس حسني مبارك

حسني مبارك : القرار أمام حضراتكم اللي مش موافق على القرار .. السيد الأمين العام يسجل ، اللي مش موافق يرفع إيده مع ذكر البلد

همهمات في القاعة وأصوات متداخلة من طه ياسين رمضان ممثلا للعراق ومعمر القذافي ممثلا لليبيا

حسني مبارك : لو سمحتم لو كنا عايزين نتكلم كقمة لازم نتبع النظام ، لكن اذا كنا عايزين نتكلم كل واحد زي ماهو عايز مش هاتبقى قمة ، أنهي القمة ونخلص ، مش معقول أبداً .. كل واحد عايز يتكلم ، إحنا بنقول عايزين نصوت على القرار اللي إنتوا مقدمينه .. إنشا الله ترفضوه كلكم ، إحنا الموضوع مايهمناش

معمر القذافي : نقطة نظام ياسيادة الرئيس

حسني مبارك : نعم

معمر القذافي : أول حاجة كل واحد له الحق إنه يتكلم

حسني مبارك : بإنفعال وصوت عال .. أيوه ياأخ العقيد إحنا قعدنا بقالنا سبع ساعات نتكلم لم أسمع إقتراح فعال ، عشان إحتواء أزمة ، كل واحد عمال يتكلم يحكي قصة وبيدافع عن نفسه وكإن الإتهام .. إحنا عاوزين نشوف إيه الحل

معمر القذافي : لأ الكلام كده ماهو مفيد .. ماهو كويس ، القرار ماهو بالتصويت .. ياإما إجماع يامبيكونش .. وكلام آخر

حسني مبارك : مقاطعاً .. وبيني وبينكم القرار لاهايودي ولا هايجيب .. بس عاوزين نخلص .. مادام مانتوش عارفين

معمر القذافي : مقاطعاً .. ياسيادة الرئيس .. إقتراح بجلسة مغلقة بالله وندبر بقية الجلسة

حسني مبارك : توافقوا على جلسة مغلقة ؟ولانستمر بأخذ الأصوات ؟ .. اللي عاوز جلسة مغلقة يرفع إيده فوق .. أقلية ، واحد إتنين تلاتة أربعة خمسة ستة سبعة تمانية أقلية

معمر القذافي : معقباً متسائلاً .. كيف أقلية ؟

همهمات

حسني مبارك : لأ الملك حسين مارفعش .. لأ ماتزقش .. سيبه هو حر

معمر القذافي : الملك حسين موافق
ملحوظة من يشاهد الفيديو لايعرف فعلا موقف الملك حسين كما هي العادة دائما

حسني مبارك : نستمر .. هآخد الأصوات على القرار .. خلاص .. مافيش أغلبية ياأخ معمر .. بأه إحنا مش عايزين ناخد وقت .. ومافيش فايدة .. والقرارات كلها لا مودية ولا جايبة

معمر القذافي : القرار بيكون بالإجماع ولا مابيكونش؟

حسني مبارك : لأ .. أغلبية بتاع ده .. أغلبية بسيطة ... بتفكرني بمجلس الشعب

معمر القذافي : لأ

حسني مبارك : لا ياحبيبي

الجميل بأه في أخد الاصوات

حسني مبارك : ليبيا موافقة على القرار ؟

معمر القذافي : لأ ضد

حسني مبارك : يمتنع

وكذلك لايهم الموقف .. ضد القرار أو ممتنع عن القرار ،
كمان الجميل أوي بعد موقف السودان بثواني فيه صوت ظاهر بيتسائل .. إيش القرار ؟؟ إيش القرار ؟؟ .. حاولوا تسمعوه

ماسبق كان جزء فقط من الحوار الدائر وجدير بالذكر أن كل من الملك فهد وحافظ الأسد والملك حسين وعلى عبد الله صالح كانوا من ضمن حضور الجلسة

آخر الكلام
من يتابع الفيديو يلاحظ وقتها وبالرغم من السلبيات كيف كانت مصر بالفعل دولة قوية وقائدة ورائدة .. آه على تلك الأيام الخوالي

27 comments:

  1. ياااه

    امتى حيكون في قائد زي صلاح الدين
    مش رؤساء المعاشات دول


    اوروفوار

    ReplyDelete
  2. دة كان زمااااااااااااااااان
    احنا برضة دلوقتي في الريادة
    بس ريادة الفيديو كليب
    تحياتي واحتراماتي

    ReplyDelete
  3. انت متأكد إن دي ريادة
    !!!!
    ريادة الفصل

    ReplyDelete
  4. ههههههههههههه...أنا لسه مكتشف الفيديو ده علي اليوتيوب الشهر اللي فات و برضه كان عندي نفس الملاحظه بتاعه رياده مصر
    :)
    تحياتي لك يا أستاذ أحمد

    ReplyDelete
  5. فى كلام نُشر على لسان حسين قال فيه إن مبارك أخل بإتفاق بينهم على عدم الدعوة لقمة أو إصدار بيانات إدانة كشرط وضعه صدام للإجتماع مع حسين ومبارك وفهد بالسعودية لترتيب حل ينتهى بإنسحابه من الكويت. كلام حسين تجاه سلوك مبارك كان فيه إحساس بضيق شديد من سلوك مبارك بدعوته للقمة

    ReplyDelete
  6. كانوا عملوا كولوا باميه وخلصوا

    ReplyDelete
  7. انا افتكرتك بتهزر لما قلت "أغلبية ..بتاع دا" , لما شفت الفيديو لقيته بيقول البتاع فعلا

    دي مش جديدة بقى :))

    الفيديو كوميدي فعلا

    ReplyDelete
  8. :) فكروني بالمحاكمة اللي كانت عاملاها ملكة "الكوتشينة" في أليس في بلاد العجائب

    و ده لما كانت مصر في الريادة!!؟ امال القمة دلوقتي شكلها ايه .. ؟

    ReplyDelete
  9. تحياتي ليك يااستاذ احمد بوست جميل وموضوع اجمل علي الرغم من انه بيقلب البتاع ده...قصدي المواجع

    تحياتي

    محمد سمير

    ReplyDelete
  10. دي مش ريادة

    دي ريالة

    واضح ان البتاع قديم قوي

    هههههههههههههه

    مفروض كلمة قمة تتلغي من مفردات حياتنا نهائي ويحل محلها كلمة غمة

    بالغين

    ههههههههههههههه

    قال زعماء قال

    زعم يزعم فهو زعيم

    الو كانوا يعرفوا المعاني المختلفة لكلمة زعيم كانوا غيروا اسماءهم خالص

    ReplyDelete
  11. القمه دي كانت..................

    والقمه اللي جايه برده هاتكون .............

    علي العموم أحنا كنا واخدينها بالصيت مش بالغني دي الرياده اللي انتا تقصدها رياده موروثه من زعماء بجد وضعوا مصر في الصداره مش بني أدم مش عارف الفرق بين ضد القرار وممتنع

    ساعَـةُ الرّمــلِ بِـلادٌ
    لا تُحِـبُّ الإستِلابْ .
    كُلَّمـا أفرَغَها الوقتُ مِنَ الروحِ
    استعادتْ روحَها
    .. بالإنقِـلابْ !

    عم أحمد مطر

    علي العموم
    حسبنا الله ونعم الوكيل

    تحياتي

    ReplyDelete
  12. ده العادى والطبيعى
    وبعدين دى رياده من نوع تانى
    رياده ......
    :)))))))
    تحياتى

    ReplyDelete


  13. استاذ شقير ,, يا زعيم المدونين

    ازيك وعامل ايه



    انا لاحظت حاجتين

    القذافي دايما عامل زي خليفة خلف خلف خلاف ,, يعني شريك مخالف بالغزاوي

    بس احسن من ناس قاعدة وساكتة ومش عارفة الموضوع ايه اصلا

    مش عارفة اذا كانت اجتماعات القمة كدة يبقى كيف اجتماعات القاع !؟

    وبعدين فعلا هو في فرق بين ممتنع ومتحفظ !؟

    حلو تعليق فضفضات نور : زي محاكمة ملكة مملكة العجائب ههههههه


    ReplyDelete
  14. ههههههه

    والله مسخرة

    انا شفت الفيديو دة من فترة عاليوتيوب

    بس انا معتقد ان الموضوع مش ريادة وانما كان تعليمات من ماما امريكا بطبخ الموضوع

    و الأخ العقيد معمر طبعا زي ماقالت الاخت علا هو كالعادة شريك مخالف
    معترض في كل الاحوال وفي الآخر يطلع بمفاجأة انة بيصوت عكس ماكان بيتخانق طول الوقت

    بس السؤال المهم فعلا هو كما قال الأخ اللي بيسأل "أيش القرار" تقريباً كدة الكويت اللي الموضوع يخصها اصلاً ماكانوش عارفين "أيش القرار" ؟

    بس حسني قال كلمة صح و هي ان القرار لا حايودي و لا حايجيب

    بس طالما هما عارفين كدة واجعين دماغهم و دماغنا و مجتمعين لية من الاساس طالما في الآخر ..... لا حايودي و لا حايجيب

    تحياتي

    ReplyDelete
  15. على فكرة يا احمد اليوتيوب مليان مساخر من دى كتير اوى جرب كدة بحث على سنسن وانت تشوف العجب
    وكمان لو حد عايز يعمل سيف للفايل من اليو تيوب ممكن ياخد اليو ار ال بتاعة ويلطعة
    هنا
    وبكدة ممكن تنزل اللى انت عايزة من اليوتيوب

    ReplyDelete
  16. مش عارفه لو مكانش فيه انترنت كنا حانشوف البلاوى ديه ازاى؟؟؟؟؟؟؟؟؟؟

    و يمكن كنا لسا عايشين الوهم

    ReplyDelete
  17. انا كنت فكراك بتهزر بجد في الكلام الي موجود دا
    بعد ما يمعت الفديو طلع بجد
    الموضوع ما يهموش !!! ياحلاوة
    مرسي على الفديو و بجد المفرود يتحط تحت بند مواقف وطرائف
    تحياتي

    ReplyDelete
  18. هههههههههههههههههههه

    كنت قاعد فى كوستا انا واصحابى وشغلتها وهاتك على الفضيحة واحد صاحبنا ابتدى يسمع واطلق لشكمانه العنان

    ReplyDelete
  19. أهم حاجه قالها بنفسه

    القرارات ديه كلها لا هتودي ولا تجيب


    حقيقي برافوا

    برافوا

    تحيه لجميع رؤساء وملوك الأمه العربيه

    تحيه من الجميع للجميع

    ReplyDelete
  20. bastokka طهقانة
    ههههههههه ... حلوة رؤساء المعاش دي

    A.SAMIR
    الريادة اتسحبت خلاص من تحت رجلينا
    تحياتي

    عصفور المدينة
    طبعا مش قصدي ان دي الريادة ولكن اقصد اقول ان الكلمة كانت مسموعة عن دلوقتي كتير
    لو اتكرر المؤتمر ده في زمنا ده اعتقد إن الإسلوب هايكون متغير كتير .. يمكن الفكر واحد لكن الاداء مش هايكون كده

    micheal
    يعني نفس الفكر اللي جالك يامايكل ساعة ماشوفت الكليب هو نفس الفكر وده بيؤكد الكلام اللي في آخر سطر في البوست

    عدى النهار
    ماعتقدش ان شكل اتفاق زي ده كان موجود ايامها .. انا كنت متابع جيد لكن اللي فاكره طبعا سلسلة الرسائل اليومية من مبارك إلى صدام يدعوه فيها للإنسحاب تجنبا للعواقب الوخيمة اللي لسه عايشينها لغاية دلوقتي

    Mohamed A. Ghaffar
    فعلا افضل تعليق هو المضوضوع اشبه بما يكون كيلو بامية عن إنه يكون بيحدد مش مصير دلوة لأ مصير امة

    bluerose
    انا كمان اخدت بالي من حكاية البتاع ده وقلت دي حاجة موروثة بأه مش زلة لسان

    fad-fadat nour
    ههههه .. لا اعتقد إن شكلها تغير كثير في المضمون نفس الطرح ونفس الخلاف في وجهات النظر والتوجهات وينفض المؤتمر وكله على بلده وخلاص

    غمض عينيك
    هو فعلا بقلب البتاع ده المواجع بس إذا كان ده اللي في الجلسة العلانية امال شكل الحوار في الحجرات المغلقة إيه ؟

    Bella
    فعلا يابيلا .. الزعامة حاجة تانية وشكل تاني مش كل رئيس هو زعيم
    تعريفات الزعيم تختلف كثيرا حتى لو لم يكن رئيسا

    alshared
    قوية اوي الكلمتين بتوع عم احمد مطر جبتهم منين دول يامعلم ؟
    أتفق معك ان الريادة دي موروثة وغالبا الغرث بيفرتك بين الورثة وشكلها فعلا كده

    REEMOO
    معاكي فعلا ريادة من نوع تاني
    دي اللي بسموها الريادة الحديثة

    عـلا - من غـزة
    قلبي معاكي والله كل ماباشوف احداث غزة على الفضائيات بافتكرك ربنا يكون في عونكم والله
    طبعا المناقشة والجدال اكيد من افضل من السكات والصمت على الاقل لو الجدال عن موقف خاطئ بيقدر يظهر ويؤكد ويدعم الراي السديد

    الحصان الأسود
    المؤتمر او القرارات لاهاتودي ولا هاتجيب وشهد شاهد من اهلها وده السبب الرئيسي اللي خلاني احط الكليب ده ولفت نظري فيه وعشان كده عنوت البوست بالعنوان ده بالرغم من ان التعليقات تفرعت اكتر لوضوع الريادة واللي قلتها على الماشي في اخر البوست كإحساس تولد عندي عند مشاهدة الكليب ولكن اللي لفت نظري انه على الملأ كده تم إعلان عدم التاثير من كلمات لاهاتودي ولاهاتجيب

    adhm
    دايما معايا كده على الخط
    فعلا اليوتيوب مليان بلاوي
    طبعا شكرا على حكاية تنزيل الفايل من اليوتيوب بس نسيت تقول ان الفايل هاينزل فلاش بالإمتداد إف إل في
    ولازم برنامج تاني يحولة الى ام بي اي جي
    لو عايز البرنامج اللي بيحول او حد عايزه يقولي وانا ابعتهوله على الإيميل

    Esmeralda
    فعلا ياازميرالدا .. السؤال ده جه في بالي اكتر من مرة لو ماكانش الانترنت ده موجود كنا هانشوف الحاجات دي ازاي
    او البلاوي على حد تعبيرك

    Rosa
    عشان كده ياروزا أنا حبيت اكتب اجزاء من الحوار بيكون الغرض اوضح من ان الواحد يترك الكليب كده من غير توضيح
    ههههههه .. إحنا الموضوع مايهمناش

    Taher
    كده برده في كوستا وعلى الملأ ياطاهر .. فرجت كوستا علينا يعني

    سندباد مصري
    ومن موقعي هذا ابعث انا الاخر بتحياتي إلى الجميع بالرغم من اني عارف غن التحيات دي لاهاتودي ولاهاتجيب

    :)

    تحياتي للجميع

    ReplyDelete
  21. لا يا حبيبى الموقع دة بينزل الملف باى طريقة انت عايزها حتى لو ثرى جى بى علشان اصحاب السعادةبتوع ال
    n70
    وطالع يشوفوة كمان

    ReplyDelete
  22. السلام عليكم ورحمة الله وبركاته


    ايييييييييييييه دنيا

    ماتقلبش علينا المواجع يا استاذ احمد

    ويجعله عامر

    ReplyDelete
  23. يانهار اسود
    ايه العبث ده

    انا كنت قريت المكتوب
    و بصراحة ماكنتش مصدقة ان ده كلام ممكن يقوله رؤساء دول او ان ده ممكن يكون موضوع إجتماع المفترض انه قمة بيتم تصويرها و بثها على الهوا للعالم كله

    منهم لله
    طب كان ايه لازمتها من الأول القمة و الفضايح دى؟

    ReplyDelete
  24. يا أمة ضحكت من جهلها الأمم
    بزمتكم ده منظر واحد بيحكم مصر من أكتر من 25 سنه
    سبحان الله
    شكلنا نستاهل اللى بيحصل لنا

    ReplyDelete
  25. أنا مش شايف أنه كان في ريادة ، لا ساعتها و لا دالوقتي.

    يمكن بس حسني يتصف بالصفاقة (ال سببها الغباء) و الوجه المكشوف أنه يقر بأنه لا فائدة و أن كلهم خايبين و راكعين و كدا.

    و عاوز يخلص و يقفل بدري و يروح زي أي مواطن أصيل :)

    ReplyDelete
  26. مت من الضحك فعلا
    وانت قلتها بنفسك
    كانت زمان
    وعايزنا نرجع زى زمان بقى
    تحياتى

    ReplyDelete
  27. the video is removed
    can u add another link

    ReplyDelete