Friday, July 13, 2007

للكبار فقط


هو وهي والحب والجنس والخيانة
وحوار .... لا ينقصه الصراحة


© Photo Copyright : Ahmed Shokeir


هي : أنا بصراحة مش قادرة أفهم ، يعني إيه الراجل يحب حب حقيقي ويقدر يبص لواحدة تانية ، أو ينشغل بواحدة تانية أو يعرف واحدة تانية ، أو تثيره إمرأة أخرى ، أو تكون له صديقة ؟

هو : عشان إنتي إمرأة

هي : مش فاهمة

هو : حب المرأة يختلف عن حب الرجل ، يعني المرأة لو بتحب بجد مابتشوفش في الدنيا غير حبيبها ، وأي حد تاني يظهر أمامها مجرد التفكير فيه بتعتبره خيانة ، المرأة بتحب بكل مشاعرها وطاقتها وبتوجهه لشخص واحد هو حبيبها

هي : ده شيئ يُحسب للمرأة .. لكن مش هي دي برده طريقة حب الرجل ؟

هو : الرجل ممكن يحب حب حقيقي .. لكن ده مايمنعوش إنه يفكر في إمرأة عابرة ، أو يحاول يلفت نظر إمرأة أخرى زميلته مثلا ، فهو بالرغم من أنه في قصة حب إلا أنه يهمه أن يبدو جذاباً في عيون الأخريات ، لذلك يهتم بنفسه أمامهن ويحرص على التفاعل معهن دون أن يعتبر ذلك إنتقاصاً من حبه لحبيبته ، ولكي أن تستمعي إلى حوار الرجال وحتى العاشق منهم داخل المجتمع الذكوري لتدركي ما أعنيه

هي : يعني هو ده الفرق بين حب الرجل وحب المرأة ؟


هو : طبعا لأ .. المرأة مش بتحب بسهولة وبتكون حذرة عندما تشك في بداية علاقة حب ، وبتحتفظ بحبها لفترة بداخلها دون أن تصرح به ، وعندما يتحدد الشكل النهائي للعلاقة تنقلب حياتها بالكامل ويطغى فيض المشاعر عليها ليتملكها ، وعندها ترى في حبيبها صفات الكمال وتتحول صفاته السلبية إلى صفات حميدة بل وتصبح إحدى علامات جاذبيته وتميزه، وتتبدل عيوبه الخلقية إلى جمال جذاب لايكتشفه إلا هي ... فهي لديها القدرة أن تكتشف مواطن الجمال الدفينة وتتغاضى عن مظاهر القبح فيه .. المرأة عندما تحب .. تفكر وتطلب وتبحث عن المشاعر والإحتواء والحنان والرجولة والأمان .. في الحضن وفي التواصل بالإقتراب ، ومنها تتولد الرغبة الجنسية
لم يكن جسد الرجل يوماً سبباً في إثارة المرأة عاطفياً ، وقد إكتشف الرجل ذلك مبكراً فلايحرص على إبراز جماله بقدر إهتمامه بإبراز صفاته الذكورية من الشجاعة وحسن الخلق والثقافة والجرأة والغيرة والحنان بإعتباره واحة الأمان

هي : والرجل ؟

هو : الرجل بيحب بسهولة وبسرعة ولا يستطيع التفريق بين الحب الحقيقي والوهمي ... فالرجل دون أن يشعر أو دون أن يُقر يبحث عن الحب في كل إمراة تظهر له حتى لو كان يعيش قصة حب حقيقية ... لذلك الرجل عُرضة للإستجابة لأي علاقة حب عند أول محطة تُظهر فيها المرأة بوادر علاقة عاطفية ، ولكنه لايستطيع أن يُكملها بالشكل التي تريده المرأة لأن طريقة الحب تختلف ، وهو لايقلق من الإنسحاب في منتصف الطريق في أوج إنطلاق مشاعر المرأة العاطفية فهو لم يدرس الموضوع بنفس جدية المرأة في البداية ، أيضاً الجنس والجسد جزء لايتجزأ من علاقة الرجل العاطفية حتى وإن لم يظهر ذلك ، فجاذبية المرأة الجسدية وجمالها عامل أساسي ولكنه ليس وحيد في نمو مشاعر الرجل العاطفية بالنسبة للمرأة ، ولقد أدركت المرأة أيضاً ذلك فكان إهتمامها بنفسها دائماً مايحتل المكانة الأولى في قائمة أولوياتها
الرجل يميل أكثر لإبراز مشاعره العاطفية بالأمور الحسية من لمس وأحضان وقبلات ، في حين أن المرأة دائماً تُفضل كلمات الحب والعشق والإعجاب ، وعندما تحتويها تماماً تلك المشاعر بعاطفة الحب .. تبدأ لديها الرغبة في الأمور الحسية وبقوة أكثر من الرجل ، لذلك يبدو الرجل في البداية دائما متعجلاً وتبدو المرأة أكثر تحفظاً
المرأة لا تستطيع أن تعاشر جنسياً رجلاً لا تحبه ، لذلك ينتفض جسدها عندما يلمسها رجل لا تحبه حتى لو كان زوجها ، في حين أن الرجل لا ينتفض أبداً من ذلك بل تكفي لمسه عليه لأن يُثار جنسياً حتى ولو لم تكن هناك أي عاطفة ، لذلك هناك إمرأة داعرة ولكن لا يوجد رجل داعر يبيع جسده ، ليس لأن هذا الرجل غير موجود ولكن لعدم وجود سوق يطلبه

هي : ده بيناقض كلامك ... فالمرأة الداعرة تعاشر كثيرين .. كيف إذن لا تعاشر المرأة إلا الرجل الذي تحبه ؟

هو : لقد أجبتي على نفسك بنفسك .. تقولين إمراة داعرة .. هي تمارس مهنة وليست علاقة عاطفية ، تؤديها مثل أي وظيفة أخرى مهمتها أن تنجزها ، بل وأحيانا تحاول إجادتها ببعض الكلمات والتأوهات المزيفة حنى تضمن العلاوة أو الحلاوة .. لايهم

هي : والخيانه ؟

هو : مالها ؟

هي : تفرق من رجل عن إمرأة ؟

هو : الرجل ممكن أن يَخون وهو في علاقة حب حقيقية معتبراً ذلك تجربة ذكورية تأخذ وقتها وتنتهي بإنتهاء الممارسة دون أن تؤثر على علاقته بمحبوبته ، لذلك المرأة الناضجة لا تقلق من حبيبها متعدد العلاقات قصيرة المدة ويدفعها حبها لأن تتغاضى عن ذلك فهي تعرف أن حبه الحقيقي لها سوف يعود به إليها في نهاية اليوم ، بعكس علاقة واحدة خاصة طويلة الأمد تقلقها وتعتبرها المرأة نهاية حبه لها وهي على حق في ذلك ، أما المرأة التي تحب فهي لا تخون حبيبها أبداً ، وعندما تخونه هنا يجب أن تتأكد أنها فقدت حبها تماماً لمحبوبها ، لذلك لاتقع المرأة في بئر الخيانة بسهولة وقوع الرجل فيه

هي : وهل ممكن أن يتولد الحب بين إثنين كانت بينما علاقة جنسية مسبقة ؟

هو : بالنسبة للرجل .. يجب أن تتمتع تلك المرأة بصفات خاصة جداً تأسر الرجل بعد أن أنهى الرجل علاقته الجنسية معها تجعله يرى فيها جمالاً وجاذبية تدفعه لحبها بعيداً عن الجنس ، أما بالنسبة للمرأة فهي لابد وأن تكون داعرة من البداية ، فقد إتفقنا على أن المرأة لا تعاشر جنسياً إلا من تحبه والرجل لايدرك ذلك في غالب الأمر ، وطالما تسألين عن الحب بعد المعاشرة فمعنى ذلك أنها عاشرته دون حب فلابد وأن تكون فتاة ليل ، ولكن عموماً ممكن وطبيعي أن تحب شخص ما بعد العلاقة ولاتختلف في حبها عن المرأة العادية

هي : إنت حبيت قبل كده ؟

هو : أنا ؟ .... لأ ... إشمعنى

هي : أُمال جبت الكلام ده منين ؟

هو
: ههههه من الحياة .. من الناس ... وإنتي ... حبيتي قبل كده ؟

هي : أنا .... آه .... بحبك

هو : (كالمعتاد) .... أنا ؟؟؟ سلاموووو عليكووووو

هي
: إستنى بس .. مش إنت بتقول إن الرجل بيستجيب بسهولة لأي مشروع علاقة خاصة

هو : إمممم ... ومين قالك إني راجل ... وهو فيه راجل ممكن يقول الكلام ده

-------------------------------

من حوارات الكبار السابقة إقرأ : عن التحرش الجنسي سألوني

--------------------------------
أعاد نشر هذه التدوينة موقع سوريا نيوز بعد تحويلها للعامية السورية ونسبها الكاتب خالد العقاد لنفسه

51 comments:

  1. ماأظلمكم معشر الرجال
    وماأتعس حظنا معكم

    لااجد مااقوله بعد شهادتك في حق المرأة

    صحيح هي شهادة تريح قلب المرأة لانها أتت من رجل يعترف بظلم بني جنسه للمرأة وعدم تقديرهم ووفاءهم لحبها.
    ولكنها بقدر ماهي شهادة مريحة الا انها تنغص العقل والقلب

    فلافائدة في وجود حب حقيقي طالما لايوجد تقدير وإخلاص من الرجل

    تحياتي

    ReplyDelete
  2. تدونة رائعة
    تحياتى

    ReplyDelete
  3. حقولك ايه بس

    أتصدق بالله
    انا حاسس انى كتاب و انت بتقراه
    بجد انت وصفت الموضوع بدقة متناهيه
    انت بتهرج ولا ايه دا بوست يجنن

    تحياتى يا ريس

    ReplyDelete
  4. تحليل موضوعى جميل

    سلمت يداك

    تحياتى
    :)

    ReplyDelete
  5. والله الراجل ده برنس
    عرف يفك من البنت صح

    ReplyDelete
  6. اكتر ماعجبنى فى الحوار صراحته وواقعيته
    مع انه ممكن يجرح الكثير من النساء
    لكن هى دى الحقيقه
    على فكره انا عامله تجمع بلوجرى جامد جدا بمناسبة نجاحى وتخرجى على خير
    والتفاصيل على مدونتى الصغنونه..اللى من غير فذلكه

    ReplyDelete
  7. حوار شيق و مفيد أحييك عليه يا أستاذ أحمد
    تحياتي

    ReplyDelete
  8. يا حواراتك يا استاذ أحمد
    انت دايما كده بتصدمنا
    تحليل جميل جدا
    بس انت كده بتأكد ان المرأه عقلانيه أكتر من الراجل
    لأنها بتفكر كتير قبل ما تتخذ خطوات
    أما الراجل فا بيقع على طول

    نهاية البوست جميلة جدا

    تحياتى

    ReplyDelete
  9. تدوينة عميقة جدا
    تحليل منظم واستنتاجات قوية جدا رغم طبيعتها الصادمة ...
    اضافت لي جديدا

    تحياتي

    ReplyDelete
  10. احمد
    كالمعتاد وصف دقيق للمشاعر من داخل كل كيان

    فعلا عالم وكوكب المرأة غير كوكب الرجل كل واحد منهم يرى الامور بمنظار مختلف تماما عن الاخر
    ولا يتطلب الامر للحصول على علاقة سوية مستمرة غبر اعادة النظر الى كوكب الطرف الاخر لمعرفة ما يدور بداخله
    الحب بالمنظور المختلف كما تراه هى وكما يراه هو فعلا وصف دقيق
    مش جديد عليك الدخول فى عمق الاشياء ورصدها وانك تاخدنا معاك ولا نملك غير اننا نقول فعلا حقيقى

    تحياتى

    ReplyDelete
  11. هو فيه كلام كتير أقرب الى الصحة

    بس انا عايز اعدل حاجة بعد اذنك ::

    الراجل ممكن يحب ومع ذلك ينجذب لامراة أخرى كنزوة او كده >>> انا مش موافق

    انا اعتقد ان الراجل بيحب بجد يعنى الراجل ممكن يحب اكتر من واحدة

    يمكن علشان كده الراجل ربنا حلله انه يتجوز 4 وكمان فى الجنة بيكون ليه من الحور العين اكتر من واحدة

    لكن الست مش ينفع تتجوز اكتر من واحد وحتى فى الجنة بيكون ثوابها ناها بتعيش مع جوزها اللى بتكون سعيدة معاه لوحده

    هى دى طبيعة الرجل والمراة ...

    ReplyDelete
  12. انت اكيد المعلومه المعروفه علي الرجال انهم دائما خائينين و عينهم زائغه و بعد كده يتهموا البنات انهم اس الاخطاء كلهم بس مش الرك علي الرجل الرك علي البنت الاي بتسمح لنفسها تخون بنات جنسها مع رجل متعدد العلاقات ربنا عادل مش ظالم و الخيانه ده نابعه من ضميرنا انا احب اذن انا لا اخون هو ده القانون في الحب و الاي نوي غير كده يبقي لا يقول انه بيحب
    ا/ احمد ده فعلا رايك و لا ده رؤيه عامه لاحوال الرجال بجد عايزه اعرف رأيك فعلا عشان لو ده كان رايك يبقي انا مصدومه
    انا متابعه كتابتك دائما بعلق لما احس اني اريد ان اضيف عندك عشان كده انا فعلا عايزه اعرف رايك الشخصي بجد

    ReplyDelete
  13. اولا تسلم دماغك
    ثانيا تسلم ايدك

    ثالثا الكلام منطقي و مفسر و مترتب بس بعفوية جميلة
    كنت هقول نفس اللي قالته هي عن انك متناقض في كلامك

    لكن لحقتني

    بيني و بينك مبسوط اني بقرا ليك

    ReplyDelete
  14. بكل صدق..هكذا الرجل في جوهره

    ربما تستغرب المرأة ما قلته وينفي الرجل ما كتبته، لكنك لامست الحقيقة

    شكرا لك ياعزيزي على هذا الصدق وتلك المصارحة

    ReplyDelete
  15. شوية حكم معلبة استحسنها الناس و من ثم صارت اكثر قانونية من قانون الجاذبية بتاع نيوتن نفسه ..
    الحياة تحاكي الفن باكثر مما يحاكي الفن الحياة على راي الرفيق اوسكار وايلد ..

    ReplyDelete
  16. كلامك حضرتك صح فعلا
    بس ليه دايما الرجل يبرر كل تصرفاته وان دة هو العادى
    وليه هرب من حب اللى كانت بتكلمه اكيد مش حلوة

    ReplyDelete
  17. اه يا شقير


    يا مدرسة

    لعب وفن

    وهندسة

    انت كده جبت م الآخر


    خللى البنات تعرف

    والرجالة تشوف

    ReplyDelete
  18. لصدقك الشديد سأعتبرك أحلى الوحشين الغدارين اللي عنيهم على طول الساعات زايغين لكن هتروحوا من عمايلكم فين
    :)

    ReplyDelete
  19. هي البنت اللي ف الصورة سانده علي العمود ولا مستخبية فيه من عيون الكاميرا و عيون الناس ؟؟

    ReplyDelete
  20. البوست جميل وصادق جدا فهل نرى من بين المندونات الحريمى حد صريح وصادق ويبرز عيوب المراءه بالموضوعيه دى وباتلصراحه دى
    اتمنى
    تحياتى

    ReplyDelete
  21. ومين قال اللي مفيش رجل داعر؟ أومال يعني إيه؟ callboy

    ومين قال اللي مفيش امرأة بتمارس الجنس لأجل الجنس أو الاستمتاع الحسي فقط
    أومال يعني إيه ؟ one night stand

    صحيح في اختلاف بين طبيعة الرجل والمرأة ونظرة كل منهما للحب والجنس ، بس اعتقد ان التربية والنشأة والمجتمع بوجه عام بيلعبوا دور كبير في تعميق الاختلاف بمعنى أننم يعملوا منه نوع من التمييز أو يجعلوه في حدوده الطبيعية والعادلة

    يعني هنا مثلا البنت ما تسمعش غير عيب ما يصحش انتي بنت. بس الواد يقدر يعمل اللي هو عاوزه لأنه راجل: خروج ، سهر، لبس، علاقات
    طبيعي جدا اللي يترسخ في وعيه اللي ده حقه لأنه راجل ومش حقها لأنها امرأة. ونفس الشيء ينطبق على المرأة
    خذ مثلا تعامل المجتمع بتعنا مع الخيانة:
    يتسامح المجتمع مع الرجل الذي يخطأ ويخون ويحتقر ويحكم بالإعدام على الست إن وقعت في الخطيئة

    ولكن لو كانت التربية ونظرة المجتمع قائمة على مبدأ المساواة التامة بين الجنسين سواء في التحليل أو التحريم، سوف تختلف الأمور

    تحياتي

    ReplyDelete
  22. بوست اوف زا ييير :D

    بجد تحفه بجد...سواء الاسلوب ...او كم الحقائق اللى طلعت فى النص معاه ...

    بس هوا ليه كل مرة بيجررى منها :D

    ReplyDelete
  23. من الأخر والله يا شكير
    لو الوقت أسعفنى إنشاءالله حارجع و أعلق تانى علشان فيه كلام كتير يتقال

    ReplyDelete
  24. ايه الصراحه دى
    كدا انت جبت من الاخر
    لا والرأى من رجل
    يبقى الرأى غير مشكوك فيه
    ياعينى علينا

    ReplyDelete
  25. ايه الروعه ده مش ممكن متتصورش أد ايه عجبتنى مش هاقول ياعينى على المرأه ولا ياعينى على الراجل كل واحد ليه طبيعته الى ربنا خلقها عليه ومحدش فيهم ليه يد فيها المشكله بس ان محدش فيهم فاهم التانى
    على فكره أنا برده عمله حورات كده مسمياها اعترافات هو وهى بحاول اشرح وجهات النظر ده
    سعدت مش قادره أقول أد ايه بوجودى هنا وهتلاقينى دايما ان شاء الله
    سلام
    شيماء

    ReplyDelete
  26. ايون ايون
    الراجل رمرام بطبعه ممكن ياخد قطمة من كل طبق يعدي عليه
    لكن الست ذواقة متاكلش الا اللي بتحبه

    بس انا مش مع هي
    و مش موافقة على وجهة نظرها
    اوروفوار

    ReplyDelete
  27. ما هو يا شقير شكلك هتودينا في داهية
    *
    *
    *
    تش
    **
    طخ
    **
    اي اي

    ****
    رحنا في داهية خلاااااااااص
    ربنا يسامحك يا بوحميد

    ReplyDelete
  28. ههههه
    خلاااص
    انت جبت من الآخر كدة
    صحيح
    مفيش راجل يقول الكلام دة

    ....
    وأنت طيب يا راجل يا طيب
    :)

    ReplyDelete
  29. من افضل ما قرأت مؤخراً

    شهادة حق غالية

    تحياتي

    ReplyDelete
  30. أنا ازاى مقرتش التدوينه دى من اول ما نزلت
    انت بتتكلم بالتفصيل عن اخر تدوينه ليا
    انا تقريبا بقول نفس الكلام ده بس بالمختصر المعتمد على مابين السطور
    الرجل حبه دائما حسى الجسد عنده بيولد المشاعر ويوقويها
    المشاعر عنده تابعه للجسد
    فى حين ان المرأه دائما الحب عندها معنوى
    المشاعر هى اللى بتقودها للجسد
    تدوينتك دى بجد رائعه
    مش عارفه اقولك ايه عليها
    بس بجد قالت كلام كتير كنت عايزه اقوله
    بجد بحييك جدا
    تحياتى

    ReplyDelete
  31. الكلام ده كبير
    اوعي يكون الاخير
    انظر حولك
    د . خالد عزب

    ReplyDelete
  32. بدون الدخول في تفاصيل اكتر
    انا لا اتفق مع الرؤية التي تم طرحها
    هنا
    انظر حولك
    د. خالد عزب

    ReplyDelete
  33. اظرف حاجه ان الكلام ده طالع من راجل
    لو ست هى اللى كانت قالته مكناش خلصنا من ردود الرجاله
    بس بجد كلام يقلق معنى كده ان الستات حيفضلوا عايشين على كف عفريت الموضوع محتاج طول نفس و ثقه شديده بالنفس

    ReplyDelete
  34. يا أستاذنا الكلام ده عفا عليه الزمن خلاص ! دلوقت الستات بقوا زى الرجاله بالظبط , ومين قالك أن مافيش راجل داعر ؟ المشكله أن الرجاله لسه عايشين فى زمن سى السىد ومش حاسيين بالتغيير اللى حصل ! تفتكر أن البنات لسه زى زمان ؟ يا أستاذى البنات بيحسبوها كويس أوى دلوقت . وما فيش مانع أنهم يعلقوا راجل وأثنين وثلاثه كمان فى نفس الوقت وفى الآخر بتتجوز المضمون اللى جيبه مليان .وبعدين حضرتك بتتكم عن الستات العربيات ولا الستات عامه ؟دى برضه تفرق كتير , والنبى فوقوا بقى يا رجاله,خلاص بح ,البنات شالت الختم اللى على قفاها ,بس أنتم شيلوا الغشاوه اللى على عنيكم وأنتم تعرفوا !!!!!!!!!!!!!!

    ReplyDelete
  35. أبن فطومه , تحياتى ,أنت أكتر واحد شايل الغشاوه وحللت الموضوع صح . أما الأخ بتاع حور العين , أعتقد أن ربنا لم يحدد ماذا أعد للنساء فى الجنه ! بس لو الحكايه هترسى على جوزى هوا هوا ,دنيا وآخره ,!!!!!!!!!!! حتى لو كارهاه؟ طب لو ماتت عانس هتعمل أيه ؟ تفتكر الرجاله هيسيبوا حور العين ويبصولها؟ومين قال أن الستات ما بيحبوش يغيروا؟ هوا أحنا علشان عاقلين ومستحملين أرفكم علشان خاطر العيال؟ وبنصبر ونحتسب ونقول ربنا هايعوضنا فى الجنه ,أقوم ألاقى الراجل تانى فى الجنه ؟ده أيه الملل ده؟هوا كله ضرب ضرب ,مافيش شتيمه؟ ونفرض المحروس دخل النار ,أستنى أنا بقى لما يخلص مدته اللى ممكن توصل لكام ألف سنه؟ عجبى!!!!!!!!!!!!

    ReplyDelete
  36. ارجو ان تنضم الينا في حملة ( افضحوا تجار الكيف )

    التفاصيل في مدونتي

    سأنتظرك

    ReplyDelete
  37. بالفعل انت وصفت ودققت بالوصف فى الموضوع بشكل كبير جدا
    الاحساس بالحوار وصلنى لعقلية متميزة وفاهمه وعارفه

    انا بحييك عليها

    بس يا عزيزى معشر الرجال مختلفون

    انت وصفت الى نيتهم بتكون كويسه
    بيضا يعنى

    :d

    استاذ احمد

    تحياتى لحوارك الجميل

    ReplyDelete
  38. agmal ma feeha el 7eyadeya we el tawazon .. fe3lan ra2e3 we gameel

    a7ayeek 3la fekrak el monazzam :)

    ReplyDelete
  39. كلامك صح..الرجالة مبتفرقش معاهم الحب فى اقامة العلاقة الجنسية كتير
    عكس المراة الى بيهما الحب والمشاعر قبل اى شئ

    وعشان كده دايما المراة تاعنى من العذاب والهوان عكس الراجل الى ممكن يكون متخانق مع مراته ويروح يعمل علاقة مع واحدة تانية

    مش كل الرجالة لكن معظمهم

    سلام
    انت كده جبت المفيد

    ReplyDelete
  40. ياه لسه الموضوع ده هنا

    ReplyDelete
  41. اسمحلي بقي ولاول مرة اختلف معاك في التدوينة دي

    بس حوار جميل
    والاجمل منه انك خلعت في النهايه
    :)))

    ReplyDelete
  42. هو دا الراجل ابن المجتمع الذكوري. انا نفسي المجتمع عندنا يتعافى من مرض التميز الذكوري. الست من حقها أن تكون.

    بوست جامد وحكاية لطيفة
    تحياتي

    ReplyDelete
  43. كلام خطير جدا خصوصا انه من راجل

    ReplyDelete
  44. اسمحلى اختلف معاك خلااااااااااااااص الستات فكت مفيش واحده بتتجوز غصب عنها

    ReplyDelete
  45. كتاباتك كلها عسل زيك يا احمد

    ReplyDelete
  46. Bella
    هي ليست شهادة بقدر ماهو إختلاف بين طبيعة المراة وطبيعة الرجل

    eldoctor
    شكرا لتعليقك

    ahmEd_H
    تعليقك يدل علىإن الموضوع وصلك بروح حيادية

    إنـســانـة
    شكرا ياإنسانة

    محمد
    هههههه هو ده الي لفت نظرك إنه عرف يخلع منها

    وينكى
    هو مش بيجرح المرأة بقدر مابيقدر يبين الفرق بين الطرفين في نفس العلاقة الواحدة

    micheal
    شكرا يامايكل على تعليقك

    islam yousef
    هي مش مسألة عقلانية للمراة بقدر ماهو حذر في المرأة من البداية من أي علاقة يمكن لأنها بشكل غير مباشر تتفهم طبيعة الرجل

    bluestone
    شهادة أعتز بها كون أن التدوينةأضافت لكي

    tota
    كالمعتاد تحليلك منطقي وعميق للبوست لدرجة ان التعليق أروع واوضح النقاط اكتر من البوست

    omar مشروع بطل
    ماأعتقدش إن كلامك وتحليلك يختلف كتير عن النتيجة التي توصلت إليها فأيضا إنجذاب الرجل لإمراة أخرى بينما هو يعيش حالة حب حقيقة اقرب لكلامك ان الرجل ممكن ان يحب اكثر من إمرأة

    دنــــيــــــا مـحـيـرنـي
    نقطة مهمة أثرتيها أن المرأة تنسى دائما أن الرجل عندما يخونها فهو يخونها مع إمرأة اخرى يعنى عندما يخون الرجل فده دليل على أن المرأة أخرى خائنة
    بالنسبة لرأيي فهو رأي نابع عن متابعة لأمور كثيرة شاهدتها على مدار حياتي ليس بالضرورة ان تكون طبيعيتي الشخصية وفيه نقطة هامة ان الرجل ليس دائما هو الشخص المذكور في الحوار وإنما يكون في هذه الحالة وقتما يبحث عن العاطفة فهو وغن كان مثلما قلت فليس معنى ذلك انه هو ذلك الشخص كل الوقت

    Abo Amr
    سعيد بتعليقك والتناقض الذي ذكرته على لسان المراة هو بالفعل ماشعرت به عندما وضعت نفسي مكان القارئ لذلك كان التعقيب

    Yasser_best
    سعيد بشهادة رجل محايد كما حاولت ان اكون محايدا قدرما أستطيع

    bliatsho
    هي ليست حكم ولا معلبة .. هذه مشاهدة نقلتها بكل حيادية

    رفقه عمر
    هي مش محاولة تبرير من الرجل بقدر ماهي محاولة لأن يطلب الرجل من المراة أن تفهم طبيعته
    أما هروبه منها فتقدري تقولي انها محاولة منه في النهاية للهروب من كلامه

    Geronimo
    ههههه .. يبدو ان وقع الكلام على هوا المراة بشكل كبير

    سكينة
    لمسة إنسانية منك فعلا تمنياتك أن اكون احسن الوحشين .. بس اللي عايز أقوله إن لو المراة تفهمت الرجل مش هاتعتبر ساعتها إنه وحش راجعي تعليق توتا

    ROMANTIC ROSE
    يعني انتي سبتي كل حاجة وجيتي على الصورة .. هي مش ساندة على العامود هي تقدري تقولي مستخبية فيه

    momken
    هي فكرة كويسة ان نتقدر نلاقي للمراة بوست تقدر تكتبه بحيادية زي ماإنت بتقول

    ابن فطومة
    ماعتقدش ان في مجتمعنا مايقال عليه الكول بوي .. ولو فيه تقدر تقولي فين وبياخد كام
    مافيش شك إن طبيعة الشخصيات بتختلف بإختلاف المجتمعات وعندما تتغير العادات تتغير الطباع فماقلته هنا يختلف كليا عن الرجل والمراةفي الغرب نتيجة إختلاف العادات وماذكرته عن الكول بوي والوان نايت استاند ينطبق على المجتمعات الغربية وماذكرته في باقي تعليقك كله نابع من المجتمعات الشرقية ومن هنا يبرز الخلط في تعليقك

    safa7_karmooz
    حلوة بوست اف ذي يير ... هو بيجري منها كنوع من الفكاك او الهروب من الكلام اللي قاله

    ماشى الطريق
    شكرا لتعليقك .. هو مش جاب من الآخر بقدر مانقول انه بداية الكلام بحيادية

    شجره الدر
    هو مش شهادة في حق الرجل بقدر ماهي محاولة لأن نجعل المراة تتفهم طبيعة الرجل وبالتالي تتعامل معاه من هذا المنطلق .. ساعتها مشاكل كتير هاتختفي نتيجة سوء الفهم

    واحدة من الناس
    شيماء ... سعيد إنك قدرتي توصلي للمغزى من البوست وهو محاولة كل طرف فهم طبيعة الآخر لأن بكده امور كتير يمكن تفهمها بدون حدوث مشاكل نابعة من سوء الفهم

    bastokka طهقانة
    طبعا الكلام جه على الجانب المريح ليكي .. بس مش موافقة على وجهة نظرها ماأعتقدش انك تقصديها هي لأنها ماكانش لها وجهة نظر ولكن يمكن تقصدي وجهة نظر الرجل في طبيعة المرأة بس ماقدرتش اوصل معاكي إختلافك في ايه بالظبط عشان اقدر اناقشه

    أبوشنب
    في داهية حتة واحدة .. خدها من جانب انهم يعرفوا عشان يتفهموا ساعتها هاتكون النتيجة افضل

    حــلم
    واضح ياحلم إن الكلام جاي على طرف الجنس التاعم بشكل كبير بس والله مش المقصود شهادة في حق المراة ولا ضد الرجل ولكنه توضيح لطبيعة كل منهما كي يتفهمها الآخر

    صاحب البوابــة
    شهادة اعتز بها بها حقيقي

    Reemo
    فعلا فيه تشابه كبير بين البوست بتاعك والبوست ده بس يمكن أنا قلتها من منطلق محاولة تفهم كل طرف لطبيعة الآخر

    daktara
    وانا ماقدرش اتناقش معاك في إختلافك طالما من البداية رفضت ذكر إختلافك مع المكتوب

    Esmeralda
    الستات مش هايفضلوا عايشين على كف عفريت بالعكس .. ده يمكن يريح المراة كتير لما تقدر تفهم طبيعة الرجل صح ..ساعتها تصرفها هايكون بناءا على تفهم صحيح وطريقتها هاتختلف كتير

    Anonymous
    ماعرفش عفى عليه الزمن إزاي ... وبعدين فين الرجل الداعر اللي بتقول عليه ده وبيشقطوه إزاي وبيدفعوله كام وبيمارس الدعارة كام مرة .. اعتقد إن كلامك محتاج لشيئ من المنطق
    وبنات ايه اللي بيعلقوا راجل واتنين وتلاتة .. والبنت اللي كده دي بتعتبريها بنت عادية ولا حالة استثنائية ، واضح ان فيه مشكلة عندك

    شيماء الجيزى
    معشر الرجال مختلفون .. قضية مهمة جدا فعلا يمكن انا ماقلتهاش صراحة بس اشارتك ليها كويسة أنا هنا لا أقصد التعميم ولكن أقدر اقول ان ده الشائع وليس جميع الرجال بنفس الصفات في العلاقات العاطفية وليست جميع النساء كما وصفت طبيعة المرأة

    هنا الجنة
    فعلا وقتما كتبت هذه التدوينة كنت في حالة من الحيادية عالية يمكن لو كنت كتبتها في وقت تاني ماكانتش هاتكون بالحيادية دي


    البنت الشلبية
    تبسيطك للموضوع بامثلة سريعة بيأكد فعلا اللي عاوز اقوله وقدرتي تمسكيه صح

    smraa alnil
    هاعتبر رايك وتعليقك ده ناتج إنك في مرحلة حب جميلة تشاهدين اروع مافيها فلا تريدين تعكير صفوها بمثل هذا الكلام

    Samir
    المجتمع الذكوري ناتج لمجموعة من العادات والتقاليد ليس من السهل كسرها ولكن المفيد بلاشك تفهمها وهنا سوف تكون النتيجة معقولة الى حد كبير

    أميرة ويلز
    بالرغم من إني دايما اتهم باني منحاز للرجل وراجعي تعليقات نضارة شمس
    شكرا لزيارتك

    Anonymous
    مافيش واحدة بتتجوز غصب عنها .. انا ماجبتش سيرة حاجة زي كده في البوست

    Anonymous
    ميرسي ياعسل


    وتحياتي للجميع

    ReplyDelete
  47. بجد جامده أوي
    استمررر

    ReplyDelete
  48. تدوينة فوق الرائعة وبوست رائع
    وميقولشي الكلاد ده الا راجل
    وراجل بجد كمان ومش راجل عادى
    راجل متفهم عقلية المراة بشكل غير عادى وغير مسبوق
    واللى أكد انه راجل انه كت من البنوتة
    " بجمل الفرقعة الشهيرة:"
    العيب منى مش منك
    ومين قالك انى انا راجل؟؟
    ارفعلك القبعة وتحياتى

    ReplyDelete
  49. كل ما قلته صحيح تماما
    وان يصدر ذلك من رجل فتلك هى المفاجأة

    ربما يعطى هذا النساء املا
    ان الرجل يمكنة ان يكون صريح احيانا

    ReplyDelete
  50. السلام عليكم ورحمة الله

    حقيقى السؤال ده دايما كان محيرنى وللاسف

    مش لاقيه له جواب ازاى الرجل يحب ويخلص

    وفى نفس اللحظة يخون بصدق ايضا

    اه منك ايها الرجل..........

    ReplyDelete