Thursday, September 27, 2007

الملك فاروق


إحنا باين إنضحك علينا يارجالة


عصر كان له قيمة


لم أنتبه كثيرا لأحاديث والدي التي تعبر عن حبه لفترة الحكم الملكي ، وحبه للملك فاروق والملكة فريدة حبيبة الشعب وحكاياته الكثيرة عن أميرات القصر الملكي اللآتي كثيراً ماأخلط بينهن ، وكنت أعتبره نوعاً من النوستالجيا مثلما كان يحن عندما يزور القاهرة إلى شوارع وسط البلد ، وحكاياته عن وسط البلد وكيف كانت تضاهي شوارع أوروبا بمحلاتها أو بما يسمى بالديبراتمنت ستورز مثل شيكوريل وسمعان وبائعاته الجميلات المهذبات ، والنظافة والجمال المحيطين بوسط البلد ، وكيف كان يسهب في الحديث عندما تسأله من هو شريف المسمى على إسمه شارع شريف

كنت أعتبر حبه لتلك المرحلة نوع من أنواع الحنين التي تصيب الكثيرين في أربيعينات العمر ومايليها ، حيث كانت دائما الصورة المنطبعة في ذهني عندما يرد ذكر الملك فاروق هي صورة شخص بدين يحتضن إمرأتين إحدهما على اليمين والأخرى على الشمال ويشرب الخمر وأمامه طاولة طعام غالبا تحتوي ديوك رومي ، والبلد تضرب تقلب وهو غارق في ملذاته لا هم له إلا إقامة الحفلات الملكية لإصطياد الفتيات لتشاركنه الفراش ، أو على أسوا تقدير يقود سيارته في منتصف الليل ليزور إحدى عشيقاته ، هذه هي الصورة المنطبعة في أذهاننا جميعا سواء من خلال الكتب المدرسية أو الأعمال السينمائية أو الأجهزة الإعلامية



لكن يبدو أنه إنضحك علينا يارجالة ، ففي خلال الإحتفال بثورة يوليو التي أطاحت بالملك ، هذا العام بدأت تظهر نبرة جديدة تتحدث عن الثورة بشكل نوعا ما مختلف عما نعهده عليها وعلى مبادئها ، فبعدما بدأ الحديث في أعوام سابقة عن إنحراف الثورة عن مبادئها الستة ، والسلبيات التي حدثت خلال فترة الحكم الأولي للعسكر من الإستيلاء على قصور ومجوهرات العائلة المالكة ، ومصادرة ثروات الإقطاعيين لصالح مجموعة من المنتفعين ، أصبح الحديث اليوم عن هل هي ثورة فعلا أم حركة إنقلابية ، والحديث أيضاً عن تزييف تاريخنا الحديث الخاص بالفترة الملكية وبشكل خاص عن الحياة الخاصة بالملك فاروق والفساد والعهر السياسي خلال فترة حكمه

وجاءت النقرة الكبرى بمسلسل الملك فاروق والذي إستطعت بعد مشاهدة مجموعة من حلقاته حتى الآن ، أن أتفهم لماذا داخت مؤلفته د. لميس جابر السبع دوخات لمدة عشر سنوات حتى تقنع التليفزيون المصري أو قطاع الإنتاج بإنتاج المسلسل وفشلت ، فالمسلسل وللمرة الأولى يعطي صورة مغايرة تماماً للملك فاروق عن تلك التي نعرفها

لم نجده زير نساء بل لعله الأكثر إحتراماً في البلاط الملكي ،
لم نجده عميلاً كما يشاع عنه بل هو أكثر بغضا للإحتلال عن سياسيين آخرين ، لم نجده سفيهاً بل وجدناه في أشد الأمور وطأة أكثر حنكة ، لم نجده متعصبا لرأيه قط بل كان دائماً ما يستجيب لأراء من حوله مادامت مقنعة ، بالرغم من أنه كان في سن الإندفاع ولقب ملك عرش مصر يمنحه كثير من القوة

في عصره وجدنا كيف يوجد برلماناً قوياً يستطيع أن يتصدى للملك ويجبره على الإنصياع له بأمر الشعب ، في عصره وجدنا إحتراماً كاملاً للدستور وماذا تعني صفة قدسية للدستور وكيف كان الملك حانقاً على الدستور الذي يقيد صلاحياته ولكنه في النهاية يستجيب له ، في عصره وجدنا كيف يُسقط البرلمان حكومات ويفرض على القصر شروط الشعب ، في عصره وجدنا كيف أن هناك حرية صحافة تستطيع أن تصل إلى داخل القصر بخصوصياته ولا يستطيع أن يفعل الملك شيئا أكثر من محاولة إخفاء أخبار تصرفات العائلة الملكية عن الصحافة ، في عصره وجدنا ملكاً كارهاً للإحتلال رافضاً لوجوده متحالفاً مع الحكومات المختلفة للخروج من الوصاية البريطانية

وأخيراً ... وفي نهاية عصره وجدناه كيف لم يحاول الدفاع عن عرشه وسلطته حتى لايسقط دم مصري واحد في سبيل تمسكه بكرسي العرش ، وقد كان يمكنه الإستعانة بالحرس الملكي أو القوات البريطانية التي كانت على إستعداد كامل للتدخل في أي لحظة


إحنا باين إنضحك علينا يارجالة

----------------------------------------------

أعتقد أن الأجيال القادمة عندما يُذكر لها فاروق ، فسوف تكون الصورة له هي صورة تيم الحسن بكل الصفات التي قدم بها ببراعة شخصية الملك فاروق ، بدلا من تلك الصورة المزيفة التي تظهر في أفلام نادية الجندي

-----------------------------------------------

تحديث

إكتشفت في هذا الرابط والراوابط الملحقة به مايتفق مع هذا البوست

50 comments:

  1. الغالى بالأوى شوكير
    معلوم انضحك علينا يابن خالتى - طب لو احنا ماينضحكش علينا هينضحك على مين؟
    ماهو جدى و أبويا أيام الثورة انضحك عليهم - يعنى الجينات هى هى ولا هنجيبه من بره
    سيبك انت شفت التقنية السورى فى المسلسل؟ مصنعية المسلسل يعنى؟
    مووووووز
    شوكير كفاياك لغ بقى فى الكنافة السورى لحسن بتجيب كوليسترول - شفت المصنعية السورى يابن خالتى ؟

    ReplyDelete
  2. طبعا العصر الملكي كان له سقطاته لكنه افضل الف مره من عصر مبارك بشهادة المؤرخين الاجانب الحياديين علي الاقل كان فيه ديموقراطية و احزاب و الانتخابات مكانتش بتتزور ده كفاية ان الملك معرفش يسقط محمد نجيب في انتخابات نادي الجيش
    الله يمسيك بالخير يا نور

    ReplyDelete
  3. مسلسل رائع مسلسل الملك فاروق وجميل جداً حديثك عنه
    ويمكن لأنني لست مصرياً فلم تكن لدي معلومات كثيرة عن الملك فاروق
    ولهذا وجدت بأن المسلسل يصور الملك فاروق بطريقة تتدل على شخص بعكس ماذكرت من كونه محنك أو ذكي
    بالعكس وجدت شخصاً امعه ليس له طموح
    وإنما رجل يتبع شهوات واصحابه الطليان
    والأمور من حوله تحاك وقد يتدخل لأسباب شخصية ونفسية وليثبت مكانته وليس لأن يسعى إلى استقلال مصر أو لأن يكون لها مكانها البارز
    والتحرك الحقيقي والسعي لمصلحة البلد كان للشخصيات السياسية التي من حوله
    أما هو
    فمجرد انسان وجدت نفسه ملكاً
    فكان لزاماً عليه أن يعيش الدور

    ReplyDelete
  4. تعرف يا شقير
    وانا باتفرج على المسلسل-حلقات منفصلة منه للدقة
    افتكرت برومو كان معمول بين البرامج بطريقة رديئة طبعا على احد قنوات النيل التوجيهية فى شهريوليو الماضى
    كانوا يا عزيزى راصين مبادىء الثورة زى ما حفظناها من كتاب التاريخ
    القضاء على معرفش ايه وايه وايه

    قوم ايه بأة
    لقيت ان الحقيقية الزمن دار دورته ..وانه لم يتم القضاء على اى حاجة من دول..كل حاجة موجودة بس للأسف فى ايدين اسافل الناس
    يعنى حتى رأس المال مابقاش فى قبضة الاقطاعيين الأصلاء بتوع زمان
    ولاد العائلات..لأ سيطر رأس المال على الحكم
    والاستعمار.. هل يمكن ان نعتبر انفسنا الان غير مستعمرين؟فكريا واعلاميا و...الخ
    هل فعلاً تم القضاء على سطوة السلطة واطلاق يد الناس فى الخيارات الحرة؟
    وهل فعلا ننعم بحياة ديموقراطية سليمة؟
    وهل هناك عدالة اجتماعية تحققت؟
    راقب الفجوة الهائلة بين معدومى وناهبى الدخل
    أما الجيش
    فحدث ولا حرج

    ومن اجل هذا ولهذا
    اتابع حاليا مسلسل راجل وست ستات
    وسلم لى على الريادة الاعلامية والتفوق الدرامى المصرى

    ReplyDelete
  5. لم يكن ذلك العربيد ولم يكن ملاكاً، فله مثالبه وحسناته فى كل حال وافضل ميزاته حبه للبلد واخلاصه حتى وان كان من نوعيه حب الدبه التى قتلت صاحبها

    ولكن معادلته الكليه تفوق حتماً لاحقيه جميعاً

    اما الثوره فخير ما كتب فيها الأن اتكلم لخالد محى الدين ، وتشعر مع نهايته انهم مجموعه اصدقاء غضابون على احد المقاهى يجلسون فقرروا الذهاب للملك ليبثوا همهم عنده فوجد احدهم نفسه مغلقاص غرفه على كل قيادات البلد ويجلس امام جميع خطوط الأتصال بجميع الهيئات الفاعلة فى الدولة فكانت الثوره

    ReplyDelete
  6. نسيت اقول ان تشويه السابق عاده مصريه اصيله خالصه من عهد الفراعنه حتى ان الملك منهم كان يمحو اثار من سبقه المحفوره على المعابد ليكتبها لنفسه وزياده

    ReplyDelete
  7. العزيز شقير

    جاء هذا العمل فى النهاية ليرد على كل من هاجمنى عند دفاعى عن عصر الملكية وبخاصة فترة الملك فاروق

    فاروق المفترى عليه ظلما وبهتانا
    ملك بمعنى ما تحمله كلمة ملك من أبهة وضخامة
    ولم يغير حرف واحد فى الدستور

    أنظر كتاب التاريخ صفحة 2007

    كان أقل نائب فى البرلمان له الحق فى سؤال الملك عن زيادة نفقاته المبالغ فيها من وجهة نظره على يخت المحروسة

    كذلك كانت مقالة واحدة كفيلة باسقاط حكومة كاملة
    او صورة فى جريدة

    فاروق أحب مصر بالفعل
    وعشقها من قلبه

    ويكفى ان كبرى جامعات مصر
    جامعة فؤاد الأول وهى جامعة القاهرة حاليا
    وجامعة فاروق وهى جامعة الاسكندرية
    بنيتا من تبرع أميرات الأسرة الملكية بمجوهراتهم
    فصاروا مثالا وقدوة مما جعل علية القوم وزوجات وأسر الوزراء وباقى من ينتمى لأسرة محمد على...وخرجت من بيوتهم أموال ومجوهرات التبرع
    هدية للشعب المصرى
    ونراعى فى نظرتنا لنوعية الملتحقين بالجامعات خلفيات المصريين الاقتصادية والعلمية


    دكتورة لميس جابر مثال للشخصية المصرية الجديرة بكل احترام وتقدير لنظرتها المحايدة من جهة
    و لإصرارها على تنفيذ العمل اللى هى مقتنعة به حتى لو رفضه طوب الأرض فى مصر طوال عشر سنوات

    ودى النتيجة دلوقتى

    ReplyDelete
  8. انا كان بيحصل معايا العكس
    قصدى موقف والدك
    مرة اتناقشت مع بابا و كان واخد جانب الثورة و عبد الناصر بالرغم من انه معاصرش حكم فاروق كنت باشوف رايه
    مبالغ فيه شويه
    تاريخ مصر فى الفترة ديه قريت فيه كتير و كان من ضمن الكتب اللى قريتها
    مذكرات محمد نجيب ( كنت رئيسا لمصر ) 3 مرات
    و منها برضه كتاب حافظ علوى ( المنصه )و غيرها
    تحس انهم كانوا بينهشوا فى بعض و مش همهم بس مصلحه البلد زى ما بيتقال
    بجد طول الوقت كنت بحس ان فيه ظلم واقع على الملك فاروق , ما هو مش معقول برضه الراجل كله سيئات و مفيش حاجه عدله حصلت فى عهده
    و لا مكانش الجماعه الكبار حيترحموا كل شويه على ايام زمان
    اللى حصل ان مصر اتحولت من نظام حكم ملكى لدوله ملاكى
    للاسف مش متابعه المسلسل و لا اي مسلسل غيره بس اكيد حيتعاد تانى

    ReplyDelete
  9. المنتصر هو من يكتب التاريخ
    ودا السبب ف صورة الملك فاروق
    أنا معرفش الحقيقة فين
    بس اللي أعرفه إن الحقيقة بتموت مع السنين

    تحياتي

    ReplyDelete
  10. انا لما شوفت حلقات برده من المسلسل دا جالي نفس الاحساس ان احنا انضحك علىينا رغم اني مكنتش بكره الملك فاروق و لا حاجة و كنت عارفة ان اعلام الثورة كان بيشوه صورته على أد ما يقدر

    ReplyDelete
  11. الموضوع مش عصر الثوره كان افضل ولا عصر الملكيه
    الموضوع هو هل ننظر الي الفتره بخبرات واحكام مسبقه وهل هناك حاكم طاهر اليد شجاع ووطني اصلا حكم مصر؟؟
    خبراتنا المسبقه غذتها افلام مثل رد قلبي واغاني عبد الحليم الثوريه وغيرهازى صورة صورة كلنا عاوزين صورة تحت الرايه المنصورة فوجهت مشاعر الناس ضد الملكيه باتجاه الثوره وانقلابها
    خبراتنا ومشاعرنا ايضا تم العبث بها وتوجيهها لتانى مرة في عهد ناصر حين كانت الهزيمه نكسه وقال حليم عدي النهار ووصف الهزيمه بالمغربيه
    ولتالت مره في عهد السادات ومجموعه كبيره من افلام سعاد حسني التى تصف الانقلاب علي مراكز القوي وثورة التصحيح وغيرها
    بمعني احنا مشاعرنا موجهه وجيناتنا التقيميه ملعوب فيها
    حتى ما يحدث بعد عرض المسلسل هو نوع من رفض الواقع ليس الا
    ونوع من البحث عن ماضي ربما كان افضل حنين يؤججه التمرد علي احوالنا
    تحياتي

    ReplyDelete
  12. طيب وعلي كدة
    كتب التاريخ ح تتغير

    ولا كفاية المسلسلات هي اللي تغير الصورة

    ReplyDelete
  13. والله يا ريس احمد انا بقالى فتره عمال افكر فى الموضوع دا و مضايق من مدى الانكار اللى احنا فيه للفتره دى اللى لا تساوى من قريب او من بعيد كمية الفساد اللى بنعيشه دلوقتى يعنى مثلا احتكارات عبود باشا للسكر قبل الثورة لا تساوى من قريب او من بعيد احتكارت عز للحديد على سبيل المثال لا الحصر !!!!و المصيبه الكبرى لما فكرت لمدة ثوانى ان ثورة يوليو لم تكن ثورة من اساسه لقد كانت انقلاب عسكرى استولى بموجبه رجال الجيش على السلطهلاكثر من 55 عاما !!!! بالرغم من عدم مشاهدتى المسلسل الا انى اعرف ما يدور حولى

    واحشنى اخر حاجه

    ReplyDelete
  14. اعتقادي الشخصي ان الاعمال التلفزيونيه تعكس نظره كاتبها ومقدمها بالنسبه للشخصيه التي يتم عرضها
    وكثيرا ما تدخل الحبكه الدراميه والكثير من الموقف لاظهار صور تروق للمشاهد
    هذا هو التاريخ ونظرة الكاتب له فحتي طغات العالم وجدوا من يدافع عنهم وهناك دعات السلام ومن يحاربهم
    ولاضرب لك مثل
    حرب لبنان الاخيره هل هي بعيدة عنا ؟؟
    انظر تضارب الاراء حولها وكلن يحكي ما حدث من نظرته وتوجهاتها
    فما بالك بحوادث اقدم منها
    ومن الطبيعي ان الحكم الجمهوري بحكم تواجده الحالي للبلد سيظهر الحكم الذي سبقه بصوره تلمعه هو
    لم اقصد بكلامي هذا امر معين ولكني اتحدث بصوره عامه ويمكنك ان تقيس الامر علي اي دوله اخري
    تحياتي

    ReplyDelete
  15. Today nobody if can forget:

    جمال عبد الناصر,

    15/1/1918/ - 28/9/1970

    The Great, Gamal Abdel Nasser

    David Santos

    ReplyDelete
  16. مممم
    انا لن اتجادل عن جمال الشوارع و علي عن اي شئ

    و لكنني ببساطة لم اكن لاتعلم لو لم تخفض المصروفات التعليمية و لم يكن لتتعلم امي لان عائلة ابي ميسورة و لكن امي لأ ...

    لا يهم المظهر يا سادة الاهم الجوهر ... و ليس ما نحن فيه الان هو اثم عبد الناصر او الثورة و لكن اثم الانفتاح

    عامة لكل محبي و البكائون علي عصر الملك ... عصر الملك قادم اسرع مما تتصوروا

    فالتعليم لابد ان يكون في الجامعة الالمانية او الامريكية حتي تستطيع ان تجد شغل محترم ... و البنوك قد تم بيعها مثلما كانت ايام المحاكم المختلطة و الامتيازات الاجنبية

    فمد مثل مدينتي سوف تعود بالرفاهية و الجمال الذي كان يضاهي اوروبا قريبا ...

    تحياتي للجميع

    ReplyDelete
  17. انا مش هتكلم عن نقط معينه سواء فى حكم الملك فارووق او حتى عن الثوره
    لانى بعترف ان ثقافتى التاريخيه ضعيفه وخاصه التاريخ المصرى
    لكنى أعتقد ان صوره الملك فارووق المشوهه كان باين عليها جدا التزيف
    لسبب بسيط ان مفيش شخص شر خالص ولا شخص خير خالص
    بمعنى ان كل انسان له ملذاته وسيئاته وسقطاته
    وايضا لو فتشنا وراه هنلاقى اكيد مميزات ونجاحات
    من منا لا يوجد بداخله ذلك الشيطان مصاحبا لذلك الملاك
    كلنا انسان والملك فاروق انسان
    تحياتى على البوست يا شقير

    ReplyDelete
  18. عرفت عن هذا المسلسل من مدونة بنت القمر والآن من مدونتك وإن كان الطرح مختلف

    إعادة الإعتبار لشخص ما أمر محمود لكنى إستغربت من مدح التعليقات لتلك الفترة من تاريخ البلد متناسين أو متجاهلين أن البلد وقتها كانت تحت إحتلال عسكرى وسيطرة مباشرة على كل شىء

    بحثت على النت عن أخبار موثقة عن فاروق.. بعض ما وجدته

    كان حادثة فى 4 فبراير 1942 ملخصها أن قوات الاحتلال البريطانية قامت بمحاصرة الملك فاروق وأرغمه السفير البريطاني في القاهرة مايلز لامبسون على التوقيع على قرار باستدعاء مصطفى النحاس باشا، زعيم حزب الوفد لتشكيل الحكومة بمفرده،

    أيضاً نفى أنه كان زير نساء وسكير فهو لم يذق الخمر فى حياته والإقرار بأنه كان يلعب القمار

    إكتفيت بهذا لعله يوضح الصورة. للأسف سوء وقبح ما نحن فيه زاد عن طاقتنا وأفقدنا المقدرة على رؤية أى شىء إيجابى فى التخلص من إحتلال حقيقى بقوات أجنبية على أرض البلد إمتد 70 عاماً دمر خلالها كل شىء كى يتمكن من الإستمرار

    ReplyDelete
  19. عيب شعبنا انو بيصدق اي حاجه تتقدملوا مش بيحاول يتعب نفسه و يدور و يقرا
    الي قالوه ن الملك فاروق صقناه بس كويس ان بعد كل الوقت ده جي حد يصحينا

    ReplyDelete
  20. استاذ احمد ازيك من اول ما قريت البوست ده و انا مش عارفه اعلق اقول ايه بجد بجد قراءه ما تكتبه بيخلينى سعيده تحياتى

    ReplyDelete
  21. مسلسل الملك فاروق اكثر من رائع...فقد اظهر شخصية الملك الحقيقية التي تظهره كغيره من البشر على عكس ما سبق من اعمال والتي كانت تظهره كشيطان لا يهمه شيء سوى النساء والطعام والقمار

    كنت سأكتب عن المسلسل اليوم لكني اجلتها بسبب ذكرى عبد الناصر

    ReplyDelete
  22. فليعلم الجميع اننا ما زلنا نعيش بأفكار عسكر الثورة الى الان
    فقط الذى تغير التواريخ والاسماء
    ويجعلة عامرررررررر

    ReplyDelete

  23. يبدو اننا اتخدعنا برضة

    مالذى يدفع قناة يمتلكها اخوة حرم الملك فهد الى انتاج مسلسل بتكلفة ضخمة الهدف منة غسيل وجة الملكية القبيح والترويج
    لاساطير من نوع ان الملك فاروق كان حلو وكويس وما بيشربش الخمرة نهائى لانة مش بيحب طعمها وان
    بولى
    كان مجرد
    طباخ غلبان كان فاروق بيعطف علية باعتبارة من المؤلفة قلوبهم واهو كلة بثوابة
    وان مامة الملك فاروق كانت طاهرة وعفيفة وان أحمد باشا حسنين كان بيعلمها القران فى انصاص الليالى وفى عز البرد وبس
    كان بيحضنها (بشهادة الملك فاروق نفسة ) علشان الدنيا برد وانة ابدا لم يكن بيسقى الورد
    طبعا لا يوجد ما يمنع الاخوة فى الجمهورية العربية السعودية القيام بدور المغسلاتى او حتى الخرتى فالموضوع مفيد على اكثر
    من جهة
    فاسرة مثل اسرة محمد على يرى كل افراد عائلة المغفور لة باذن اللة تعالى الملك عبد العزيز مؤسس اسرة ال سعود انها
    كانت سندا لهم فى بدايات نشاتهم قبل موضوع الجاز دة فمجرد محاولة بعث سيرتهم بالخير ولو بالباطل وعلى حساب الحق
    والحقيقة هو نوع من رد الجميل التاريخى بالانتقام من العدو التاريخى للجهل والخرافة بمسلسل تاريخى برضة
    هل المقصود فعلا هو البحث عن حقيقة فاروق اخر ملوك مصر ام الوصول للنتيجة العجيبة التى لخصها احمد شقير فى عنوان
    البوست
    ابشرك يا احمد انك قد انخدعت
    لقد خدعت يا احمد فالملك فاروق كان بتاع نسوان والا ماذا كان يفعل
    بولى فى القصر ولماذا حرص على اصطحابة عند مغادرتة
    الى المنفى
    لقد خدعت يا احمد فالملك فاروق كذاب
    باجبارة نقابة الاشراف على اصدار
    وثيقة تثبت ان والدتة
    الملكة نازلى
    بنت عبد الرحيم
    باشا صبرى والتى ينتهى نسبها الى

    سليمان باشا الفرنساوى
    من نسل النبى الكريم
    لقد خدعت يا احمد
    فالبرلمان القوى الذى تتحدث عنة والاحزاب الكارتونية كانت لعبة السراى والسفارة الانجليزية الحاكم الحقيقى لمصر منذ

    الاستقلال الصورى بعد الحرب العالمية الاولى ة وثورة 1919 وذلك بشهادة الوثائق البريطانية
    لقد خدعت يا احمد فقتل المعارضين كانت سياسة الملك واشهر من قتلهم الملك كان حسن البنا مؤسس الاخوان المسلمين وذلك بواسطة تنظيم الحرس الحديدى الذى كان انور السادات من اعضائة
    ماذا استفاد المصريين من لعبة الديمقراطية على مدى عمرها منذ دستور 1923 وحتى نهاية المرحلة بهروب فاروق الى المنفى سوى التشرذم والصراع على المناصب وشراء الذمم وانتشار الفساد على كل المستويات
    من فكر فى هذا الرجل البسيط الذى اهملتة كل الحكومات المتعاقبة على الحكم
    اتحدث عن المصريين الذين يمشون فى الشارع الناس العاديين وليس هوانم جاردن سيتى
    اخبرك اباك انة كان يحب الملك فاروق وابى اخبرنى ان السلطان احمد فؤاد كان مدمن قمار وانة كان صايع فى دمنهور يأكل ببلاش من مطعم عاصى للفول والطعمية فى سوق السوسى لغاية ما الانجليز نضفوة وعملوة سلطان
    هل تعلم ان الملك فاروق مات من كتر الاكل فى ايطاليا
    هل تعلم ان ام الملك فاروق سليلة الحسب والنسب ماتت فى امريكا1962 مسيحية وكذلك تنصرت ابنتاها
    هل تعلم ان ولى العهد احمد فؤاد ابن فاروق تزوج من يهودية مغريبة وبهدلتة فى المحاكم 11 سنة
    مش عايز حد يقولى الرسول رهن درعة عن يهودى

    وفى النهاية اجد فى تجسيدوفاء عامر دور الملكة نازلى مصير تستحقة الملكية تماما

    ReplyDelete
  24. إذا قارنا وضع البلاد..وديموقراطيتها وقارناها ببعد الثورة ..فنحن نظلم ما قبل الثورة بمجرد المقارنة
    ..
    لكن على أية حال..وأنا ممن يرون الثورة انتكاسة كبيرة..لكني مقتنع صورة الملك فاروق ليست وردية على الإطلاق
    ..

    ReplyDelete
  25. كان فيه كلمة قالها الراوي في بداية فيلم brave heart
    ان التاريخ يكتبه هؤلاء الذين يشنقون الابطال

    تحياتي

    ReplyDelete
  26. كلامك مضبوط يا أستاذ أحمد لاني من ومان متأكد ان كل اللي درسناه في المدارس عن الفساد الملكي و اللي شغناه في الافلام اكيد مبالغ فيه و ذلك لتصوير الثوره بأنها أنقذت و حررت الشعب المصري...طبعا لا أنكر مميزات الثوره و لكن برضه ليها عيوب زيها زي النظام الملكي
    ع العموم موسم الهجوم علي المسلسل الناجح جدا بدأ...ٌريت حضرتك أنيس منصور و غيره كتبوا ايه؟؟
    تحياتي

    ReplyDelete

  27. وايه الفايدة من مسلسل؟

    كام مسلسل حلو ولا وحش؟ وهل يؤخذ التاريخ من مسلسلات يلعب المنتجون دورا كبيرا في تحريف الحقائق فيها

    يعني حيقدروا يطلعوا الملك وحش لو كان وحش فعلا؟

    مش عارف

    بس كل اللي أقدر أقوله أن التاريخ لازال مطموسا

    تحياتي من ماناساس البلد

    ReplyDelete
  28. واضح ان فاتني كتير للأسف

    بوستك دا فكرني بجدو الله يرحمه اللي كان شايف ان الثورة دي خدعه قام بيها مجموعه من الرعاع نهبوا البلد وفلوس الناس ..رغم ان بنته اللي هي مامتي كانت في الاتحاد الاشتراكي !!

    كان بيقولي علي رأي العقاد الشعب اللي يسكت لواحد بيقول انا الذي علمكم الكرامه يستاهل طول عمرة انه يداس بالجزم ..يمكن ايامها كنت بستغرب كلامه ..ويمكن كنت ومازلت ميولي يساريه شويه ..بس لما قريت لناس محايده كتبوا عن الملك فاروق ..فعلا اقدر اقولك ان الراجل دا اتظلم فعلا

    بس المشكله بقي اني لو سلمت بفكرة تزييف التاريخ دي .. يبقي هاشك في صوابع ايدي ورجلي كمان

    تحياتي علي البوست الرائع

    ReplyDelete
  29. عزيزى شقير انا لتفق معاك تماما فى رؤيتك اننا انضحك علينا و يبدو ان رؤيتنا لتاريخ بلدنا محتاجة الكثير من اعادة النظر لاننا لا نقرأ و نتناول ما يرسم لنا من صورة رسمية للتاريخ بواسطة اعلام حكومتنا الغراء بمنتهى الاطمئنان على اساس ان هو ده الصح و اعتقد ان الواحد عشان يفهم التاريخ اللى هو مفتاحنا لفهم الحاضر لازم يقرا و يبحث و ده مش شىء سهل ابدا

    على فكرة انا كتبت بوست عن نفس الموضوع ده بس كان الدافع ليه مش مسلسل الملك فاروق و لكن بعد ان شاهدت

    حلقات الاستاذ هيكل

    اللى اتكلم فيها عن الثورةو لم يكن يهمنى فى هذه ماذا كانت شخصية الملك فاروق و لكن ما كان يهمنى بافعل هل الشعب المصرى هو فعلا اللى قام بالثورة و لا لأ بل اكتر من كده ان الظباط اللى قاموا بالثورة و على راسهم جمال عبد الناصر لم يكون لديهم النية فى القيام بالثورة التى تطيح بالملك بقدر ماكان يهمهم فى البداية تصحيح الاوضاع داخل الجيش و لم يكن لديهم اجندة واضحة و لكن الامور كلها ادت اللى بعضها بشكل درامى الى ما اصبح بعد ذللك ثورة يوليو

    ممكن تبص على

    البوست ده

    و تقوللى رايك

    تحياتىليك على الموضوع البوست الجامد ده و احساس جميل لما اعرف ان مش انا بس اللى انضحك عليا
    :)

    ReplyDelete
  30. انحني احتراماااااااا
    واجلالا وتقديرا
    لتعليق المدون
    ADHM

    واحب اوجه شكري العميق لاصحاب السمو البرنسيسات
    واصحاب المعالي الامراء
    المصريين ولاد الفلاحين
    اللي جايين النهاردة يقولوا علي الثورة انقلاب

    انا مندهش والله

    كل المدونيين اللي علقوا علي البوست دة ابناء الطبقة المتوسطة
    اللي هيا احد اهم منجزات الثورة

    وكل واحد يسال نفسة كان هيتعلم ازاي
    ؟؟؟؟؟
    كان هيعيش ازاي
    ؟؟؟؟؟؟؟؟؟؟؟؟
    انا مستغرب

    للدرجة دي مسلسل يجبنا ومسلسل يودينا
    ؟؟؟؟؟؟؟؟؟

    بتتباكوا علي اسود فترة في تاريخ مصر

    المشكله ان الناس انبهرت بالقصور والملابس والاتيكيت الملكي في المسلسل
    وحسوا انه زمن جميل

    لكن لو كانت الكاميرا طلعت برة القصر ودارت في الحواري والشوارع في فترة الاربعينات

    كنا هنلاقي
    العبيد والسخرة والموظفين الغلابة والاحتلال الانجليزي والذل والمهانه
    والقلم السياسي والاعتقالات والتعذيب والفقر
    وسيطرة قله علي كل حاجة في مصر
    والاميه يا مثقفين


    كلنا نتاج مجانيه التعليم

    واللي ابوة برنس يا ريت يبقي يوضح

    طبعا تيم الممثل الرائع ادي الدور بعبقرية
    والمسلسل انتاج ضخم

    وعشان كدة طلع بالمنظر الجميل دة

    لكن دة مش معناه اننا ننخدع

    بالمناسبه

    حد فاكر مسلسل(الوسيه)لاحمد عبد العزيز

    يا ريت بعد ما تتفرجوا علي مسلسل فاروق تتفرجوا علي المسلسل دة

    عشان مننساش

    ReplyDelete
  31. انا طول عمرى لم انخدع لفكرة الثروة مع انى مش من عصرها نهائى ولكن لى حنين لعصر لاملكيه والاستقراطيه على فكرة السينما كانت تعكس الحياه فى تلك الفتره لا تجد لفظ بذئ ولا ابتذال حتى فى الافلام الى تصور الحياه الشعبيه البسيطه حتى لو كان هناك فقر بس من غير انحراف وابتذال
    بيقولوا انهم كانوا واكلين مال الشعب طيب امراء وملوك هذا الزمان اعتقد انهم يملكون اكثر بكثير ممكا كان يملكه الملك فاروق
    الرسول لما قام بدعوته لما ياخذ اموال الاغنياء ويسلبهم حقوقه ويجعلهم فقراء ولكن فرض الله الزكاه مش اكتر
    يعنى ايه نسلب من الناس اموالهم وبيوتهم هو مين علشان يعمل كدة لقد تدخل فى اقدار الله ربنا جعلنا طبقات وهو موزع الارزاق
    بجد نفسى اعرف مصير جمال عبدالنصر واعوانه ايه دلوقتى
    كل حاجه هاتنكشف يوم لا ينفع مالا ولا بنون ولا سلطان

    ReplyDelete
  32. لقطات من حياة شهيد الوطنية والشرف والكبرياء

    طلق الملك زوجتة الاولى الملكة فريدة فسارت المظاهرات المنددة بهذا الطلاق وهتفت الجماهيرخرجت الفضيلة من بيت الرذيلة
    وهكذا لم يكن الشعب بعيدا عن الاجواء داخل القصور الملكية

    وكان طلب جلالة الملك المعظم بنت
    خام وان تكون من اسرة ولادة للذكور والا تطلب كل يوم مائة فستان كما تفعل بعض اميرات اسرتة
    وتقدم جواهرجى الاسرة ببلاغ انة وجد طلب مولانا وذلك فى الفتاة ناريمان صادق التى حضرت لمحلة فى شارع ثروت فى وسط القاهرة
    المشكلة

    نصحصح شوية مع بعض

    المشكلة ان تلك الفتاة كانت مخطوبة لشاب اخر يعمل فى مجلس الدولة وكان المطلوب منة ان يسكت
    وعندما بدا الاحتفال بالزواج ابلغ القصر كل من يهمة الامر ان جلالة الملك لا يريد هدايا رمزية
    وتم تعميم هذا الاخطار على السفارات الاجنبية
    وكان شهر العسل قد امتد لعشرة اسابيع كان وسطها شهر رمضان وقد نشرت الاهرام بالصدفة خبر غداءملكى فى مطعم جراسى فيلدذ وتنبة احدهم متأخرا انة فى رمضان وجرى مصادرة عدد الاهرام

    ذهبت الملكة الام نازلى للاقامة فى امريكا وبالذات فى لوس انجليس وتعرفت هناك على ثرى امريكى اقنعها ببيع مجوهراتها والاستثمار فى بير بترول(مش عارف لية دايما البترول دة بتيجى منة كل المصايب ) ثم حدث ان نضب هذا البئر قبل الاوان وبعد بيع مجوهرات قيمتها تلاتة مليون دولار
    فراحت تستعجل ايرادات املاكها فى مصر وتتهم فاروق بالاستيلاء عليها
    وتعرفت ابنتاها الاميرة فايقة و الاميرة فتحية بشابين احدهما فؤاد صادق من القنصلية المصرية والاخر رياض غالى القبطى حفيد بطرس غالى رئيس الوزراء ايام مذبحة دنشواى
    فتقدم الملك بطلب الحجر على الملكة الام نازلى الى مجلس البلاط
    فارتدت الملكة الام عن الاسلام واعتنقت المسيحية الكاثوليكية كذلك فعلت الاميرة فائزة وفتحية
    اما الاميرة فتحية فقدانجبت ثلاثة ابناء هم‏:‏ رفيق ورانيا ورايد‏ . و قام زوجها رياض غالى باطلاق الرصاص عليها خمس طلقات بعد ان كان قد اعتاد توجية الضرب لها وللملكة الام كلما تدخلت للدفاع عن ابنتها
    روابط مفيدة
    رجاء النقاش فاروق والنساء
    جيش مجروح وشعب موجوع


    و لما عَدمْنا بمصر الملوك
    جابوك لانجليز يا فؤاد قَعَّدُوك
    تمثِّل على العرش دُور الملوك
    لا مصر استقلِّت و لا يحزنون

    وبيرم التونسى هنا بالتحديد يبين ان الامور متأصلة فى هذة العائلة الفاسدة الفاجرة الدخيلة على نسيج هذا الوطن النبيل
    -------
    الاستاذ ياسر
    العفو
    اخجلتنى بكلمات لا استحقها
    فى الغالب!

    ReplyDelete

  33. لا اعرف ان كان من الضرورى وجود حسنات لفاروق انة لم يتصرف مع والدتة مثلماتصرفت اسرة الاميرة ديانا بسبب علاقتها بعماد الفايد
    فنحن دائما عاطفيون نكرة اعدائنا ومن يخالفوننا ما نؤمن بة لاقصى مدى فاعدائنا هم الشر المطلق فكيف لا تلاحظ قرن الشيطان فى جباههم هل عميت ام غلبك سحرهم واصدقائنا ومن نرضى عنهم هم الملائكة تمشى على الارض ويمنعنا الحياء سؤالهم عن اين ذهبت اجنحتهم

    ReplyDelete
  34. انا فعلا قريت قبل رمضان حوار لدكتورة لميس وقالت ان المسلسل مختلف لانه بيعبر عن الملك فاروق بجيع جوانب شخصيته الى محدش تناولها قبل كدا وان مفيش غير mbc
    الى قبلت تنتجه والسبب واضح دلوقتى
    بس من المعروف ان الملك ده كان فعلا بيحب مصر بس كالعاده كل واحد بيحب يظهر مساوىء الملك الى قبله عشان يبين تميزه

    ReplyDelete
  35. تعبيرا عن حبه للرئيس جمال عبدالناصر وجه الرئيس الفنزويلي هوجو شافيز دعوة رسمية إلي عبدالحكيم عبدالناصر وزوجته لزيارة فنزويلا الأسبوع الماضي. ومن جانبه أهدي عبدالحكيم نجل الزعيم الراحل إلي شافيز إحدي العملات الذهبية التي كانت مصر قد أصدرتها بعد رحيل عبدالناصر من فئة والخمسة جنيهات وتحمل علي أحد وجهيها صورة الزعيم الخالد.


    وكان شافيز قد أعرب في أكثر من مناسبة عن حبه واقتدائه بالزعيم جمال عبدالناصر، خاصة في انتمائه للفقراء، وانحيازه لهم، ولقيم العدالة الاجتماعية، ومحاربة الفساد، وقال في لقاء مع قناة «الجزيرة» أنه ناصري، يؤمن بثورة عبدالناصر والأهداف التي قامت من أجلها، ويعمل علي تطبيقها في بلاده.
    شافيز يقود مواجهة ضارية ضد الولايات المتحدة الأمريكية ومصالح الشركات الدولية التي تسيطر علي خيرات أمريكا اللاتينية وقد أعيد انتخابه ديمقراطيا لرئاسة فنزويلا رغم التحريض الأمريكي المستمر ضده. وكان نجاحه فاتحة لظاهرة الرؤساء المنتخبين المعادين لأمريكا في حديقتها الخلفية.
    شافيز استقبل عبدالحكيم عبدالناصر في مقره الرئاسي وهو يهتف «فيفا ناصر.. فيفا ناصر» .. «عاش جمال عبدالناصر».

    ReplyDelete
  36. adhm

    تحليلك ممتاز ومفيد بس في كام نقطة انا مش مقتنع بيها:

    1 بتقول ان الملكية المصرية ساعدت الملكية السعودية في الظهور. بس اللي أعرفه ان ابراهيم باشا ابن محمد علي حارب الوهابيين وآل سعود مرتين لحساب الدولة العثمانية 1819 & 1850
    فمعتقدش ان علاقتهم بقت ودية خلال زمن مش طويل لعصر فؤاد وفاروق وخصوصاً ان مش من سيم الجماعة دول انهم يتصالحوا مع حد :)

    2 الملك فاروق مات من الأكل ؟!
    أنا سمعت مرة من فترة في قناة الجزيرة ان المعلم عبد الحكيم عامر هو اللي دبر قتله مش فاكر مسموم ولا مقتول بعد ما أوهم عبد الناصر انه بيهدد حكمه.

    فياترى هل ده صح ولا كمان مضحوك علينا فيه :)

    ReplyDelete

  37. ليس حبا فى فاروق بل كرها فيمن طردوة


    السيد المحترم
    Spectrum
    نحيط سيادتكم علما انة بالنظر الى تساؤلكم بخصوص الموضوع المشار الية انفا واستغرابكم ما ذكرناة فى تعليقنا على الاحداث والملابسات المحيطة بظروف

    انتاج مسلسل باموال سعودية لتمجيد فترة حكم ملك مصرى سابق واظهارة على غير الحقيقة والصاق تهم من نوع انة كان وطنيا ومناضلا ومحبا لوطنة اكتر
    من الشمعدان اللى زى ما بتحبة وبيحبك كمان وكمان كما هو معروف للجميع
    وكان نص السؤال الذى ارق نومكم وطير الراحة من بالكم
    هو
    اللي أعرفه ان ابراهيم باشا ابن محمد علي حارب الوهابيين وآل سعود مرتين لحساب الدولة العثمانية 1819 & 1850

    طبق الاصل
    الاجابة
    بسم اللة الرحمن الرحيم
    بالبحث فى محركات البحث المعروفة ورغم ندرة المواقع التى تتحدث فى نشأة ال سعود الا انها كلها قد اجمعت ومن بينها
    المصدر
    الذى تفضلتم واشرتم الية
    الذى يعود للعام
    1179

    والتى يمكن وصفها
    بمرحلة المعيز والخيام
    ومرحلة
    السياحة فى ارض اللة مطاردا
    فى قطر والكويت و البحرين
    ومرحلة الجاز
    فى فترة المعيز كانت بلاد نجد والحجاز ولاية عثمانية مثل مصر بالضبط وكانت الحركة الوهابية تمثل حركة عصيان على الباب العالى الذى تخضع لة مصر
    ولو صوريا
    اما فى مرحلة السياحة واكتساب الخبرات الجديدة فكانت مصر خلالها قد تحولت الى محمية انجليزية
    فلم تقع اى حروب بين العائلتين فقد مرت مياة كثيرة تحت الجسور وكانت مصر ترسل الى بلاد الحجاز سنويا المحمل الذى يضم كسوة الكعبة الشريفة نظرا لضيق ذات اليد عند الاخوة السعوديون ايامها وتوطدت على اثر ذلك العلاقات بين الاسرتين لكنها ابدا لم تكن علاقة الند بالند
    فما الذى حدث وجعل الامور تتغير و يندفع السعوديون بكل هذة الحماسة للدفاع عن ملك سليل اسرة سفكت دماء الاجداد
    الذى حدث يا صديقى لم يكن لجلالة الملك فاروق اى دخل فية فقد رحل عن البلاد غير مأسوفا علية
    ليس حبا فى فاروق او هياما باسرتة
    لكنة الغيظ من هؤلاء الضباط الذين احدثوا الزلزال يهد اركان الخرافة والجهل و التبعية
    ان رسالة المسلسل واضحة ولا تحتاج بيان
    ايها المصريون
    ايها العرب من خلفهم


    اسمعوا وعوا

    هو أكثر بغضا للإحتلال عن سياسيين آخرين
    وجدناه في أشد الأمور وطأة أكثر حنكة

    كان دائماً ما يستجيب لأراء من حوله مادامت مقنعة

    كان الملك حانقاً على الدستور الذي يقيد صلاحياته ولكنه في النهاية يستجيب له

    وجدنا ملكاً كارهاً للإحتلال رافضاً لوجوده متحالفاً مع الحكومات المختلفة للخروج من الوصاية البريطانية

    لم يحاول الدفاع عن عرشه وسلطته حتى لايسقط دم مصري واحد
    باختصار
    جتكم نيلة فى حظكم الهباب يا مصاروة يا بقر
    تسيبوا الملك وتجروا ورا شوية عيال ودوكم فى داهية ودوخوكم السبع دوخات

    و قد وجد انة تأثير مشاهدة الخمس حلقات الاولى لابد ان تدفع اى مواطن الى
    الخروج الى الشارع والهتاف

    إحنا باين إنضحك علينا يارجالة

    ومع ثنى الذراعين مد الكوع الى الامام

    نهاية الاجابة على الجزء الاول
    اما بخصوص ظروف موت الملك فاروق فبصراحة انا راى انة كلب وراح ومش المفروض اننا نشغل بالنا مات ازاى مسموم او مشموم او حتى فطسان من الضحك
    وكل ماذكرتة عزيزى سبكتروم يتفق مع ما اسلفتة
    انا قلت مات من الاكل
    يجوز انك تضيف من غير ما تخل بالعبارة
    مات من الاكل المسموم
    او مات من الاكل المسموم اللى دسة عبحكيم عامر

    يستوى فى ذلك كان عبحكيم معلم او حاج او حتى شيخ بلد
    وتفضلوا بقبول وافر الاحترام

    ReplyDelete
  38. ناس كتير كانت فاهمه و عارفه حقيقة ما حدث و لكنهم كانوا لا يستطيعون البوح بما في صدورهم
    و الأن و بعد مرور ما يزيد عن خمسين عام
    و بعد انتاج افلام مثل يا عزيزي كلنا لصوص التي تكلمت علي استحياء بما حدث

    نقدر نقول انه احنا ما انضحكش علينا و لا حاجة

    احنا عارفين و فاهمين كل حاجة

    عم بطاطا لذيذ و معسل
    عمره ما طاطا لغير الله
    لما الدنيا بتقسي يمثل
    انه خلاص .. سلم لقضاه

    ReplyDelete
  39. السلام عليكم
    العزيز المهندس شقير
    موضوعك ده بيفكرني بمقوله ليا في مناقشة مع واحد صاحبي ابان الاحتفالات باعياد الثورة
    قلتله انا مع الثورة تماما حتي تاني يوم الثورة الفجر اي لغاية يوم 24 يوليو
    اما بعد ذلك فانا ضد ما اصبح يسمي بالثورة تماما وهي في الحقيقة مجموعة من الاقطاعين او قول الناس معجبهمش ان البلد فيها حرامية
    فقالوا طب ليه ميكنش احنا
    وكل واحد طال حاجة كوش عليها

    ReplyDelete
  40. ثورة 23 احسن
    طريق يضحك بيها على شعب
    ال احرار ال
    بس على فكرة احنا اللى ما اخدناش بالنا كشعب هى الثورة مش كانت ثورة الظباط الاحرار طيب وبقيت الشعب هو تكملة الجملة يبقة الجملة كالاتى
    ثورة الضباط الاحرار لاستعباد هذا الشعب الجبار يا رب ارحمنا

    ReplyDelete
  41. yenfa3 el kalam da ana kont 3ayez anazelha 3andy
    bas any way,,mesh mohem men elly nazelha..el mohem en el nas tefo2 showaya ba2a...
    greetings

    ReplyDelete
  42. كل اللي انت قلته دة بقي معروف

    التاريخ بيتكتب علي مزاج ل واحد فينا
    عشان مصلحة اي حد رخيص

    جايز اكون مش شفت المسلسل

    بس الكلام عن تاريخ الملكية بقي واضح
    علي الاقل قدرت اعرفوا من اللي كنت بسمعوا

    ازاي كان ديكتاوتر وكان بيسمع كلام الشعب في تغيير الحكومة اللي مش عاجباهم

    وكل كل فترة الحكومة تتغير

    وفعلا زي مانت قلت
    كان بايده يستعين باي حرس عشان يدافع عن نفسه وعن عرشه

    مش دلوقتي

    حسبي الله ونعم الوكيل

    كل سنة وانت طيب يا استذ احمد

    علي فكرة النهاردة 11 مش 7 يعني خلاص يوم الاحتجاب خلص

    ReplyDelete
  43. كل سنه وحضرتك طيب عيد سعيد
    وتقبل الله منكم الصيام والقيام اللهم امين يارب العالمين

    ReplyDelete

  44. عيدك مبارك
    و كل عام و انتم بخير
    وتعودنه بالصحه و العافية

    ReplyDelete
  45. كل سنه و حضرتك طيب

    ReplyDelete
  46. لحية الملك فاروق

    ياسر ثابت وتدوينة هامة عن اخطاء المسلسل المضحكة

    ReplyDelete
  47. قرات المقال و التعليقات
    و لا يوجد عندي اي اضافة
    حبيت بس اثبت حضور:)


    تحياتي

    ReplyDelete
  48. القصة مش قصة باين علينا
    القصة ان احنا انضحك علينا فعلا
    ومن زمان انا بقول كدة
    الثورة كانت مجرد انقلاب عسكري لمجموعة مشتاقين للسلطة ليس اكثر ولا اقل
    بس نقول ايه
    حكمة ربنا

    ReplyDelete
  49. انا من النالس اللي تعاطفوا مع فاروق
    مش عشان انا مصدقه انه فاروق ملاك
    بالعكس المسلسل لم يطرح فاروق من هذا المنطلق ...و انما تعاطفت لان التشويه كان اكبر من الحقيقه

    يعني قد يكون فاروق نوعا ما سئ و انما التاريخ دوما يكتبه المنتصرون لذلك كانت الاساءة اكبر من ما هو عليه بالحقيقه

    ومن هذا المنطلق تولدت لدي حالة التعاطف

    ReplyDelete
  50. لدي ملاحظة صغيرة على التدوينتين السابقتين: عند فتح المدونة تنطلق الآية القرآنية وأغنية يتربى في عزو في نفس الوقت. الأفضل ألا تضع
    plugin
    لهما معاً

    ReplyDelete