Wednesday, January 07, 2009

يامصر مستنية إيه .. ؟؟



يامصر مستنية إيه


يامصر .. مش عايزينك تحاربي

يامصر .. مش عايزينك تسحبي السفير

يامصر .. مش عايزينك تفتحي معبر ولا تقفليه

يامصر .. مش عايزين مؤتمرات قمة لا بتودي .. ولا بتجيب

عايزين بس لهجة قوية .. وإدانة .. وصوت غضب .. صوت بس يطفي نارنا

يامصر مستنية إيه ؟؟

فنزويلا وطردت السفير .. موريتانيا وسحبت السفير


ده حتى اليهود تظاهروا على إرهاب إسرائيل .. وتبرئوا منهم

ده مظاهرات الإدانة طلعت في إسرائيل


العالم كله بيقول وجهة نظره ومش بيهمه حد .. حتى لو بيدافع عن إسرائيل

كل واحد بيقول رأيه .. قوي ولا ضعيف

وإنتي يامصر .. إيه اللي ماسك لسانك .. إيه اللي مقيدك ؟؟ إيه اللي كاسرك ؟؟
ليه صوتك ضعيف .. وليه موقفك غريب .. إنتي عمرك ماكنتي كده

ده حتى الغاز بتديهولهم بتراب الفلوس .. وطلع بدل الحكم إتنين بيجرم التصدير

ياشيخة حرام عليكي .. قولي حاجة .. إعملي حاجة .. إحنا بشر .. إحنا هانتجنن

يامصر مستنية إيه ؟؟


14 comments:

  1. طول ما حاكمها العميل
    ما تتوقعش منها خير

    ReplyDelete
  2. أحمد: "مصر" بتتحرك بخطى ثابتة تجاه ما تبغاه.. لا هى مستنية حاجة ولا مانعها شىء

    ReplyDelete
  3. السلام عليكم

    مشكلة العرب الأزلية هي تفننهم بالحديث , ولا شئ غير الكلام..

    لذا من هذا التعليق , أعلن بأني على أتم الإستعداد على كسر هذا الحاجز , والعمل الحقيقي على مساعدة فلسطين.

    الفكرة بشكل مبدئي :
    إنشاء موقع متكامل , سيكون بإذن الله المركز الرئيس لنشر أخبار أهل غزة
    من صور , وفيديو , وقصص عن أهالي غزة

    لن يكون بالعربيه طبعا , فالعرب لن يهمنا تأثرهم أو إهتمامهم حتى
    سيكون بإذن الله بلغات عديدة : الإنجليزية , الفرنسية , الإيطالية , العبرية , الصينية .. ألخ

    طبعا لن تكون هذه الخطوة صعبة أبدا
    في أصعب الأحوال , سنحاول مراسلة طلاب الترجمة في الجامعات العربية , ليتعاونوا مع موقعنا ويترجموا لنا المقالات والفيديو أيضا

    بالإضافة , سنقوم بمراسلة مراكز الإعلام الأجنبية بكل أنحاء العالم.
    سيتم جمع تبرع من زوار الموقع , لوضع إعلان عن الموقع في المواقع الأجنبية لتتم زيارته بسهولة من الغرب.

    صدقوني , لسنا بأقل منهم بأي شي , لكن نفتقد الإصرار والعزيمة والعمل

    العرب بحثوا أسهل الطرق وهي التبرعات التي وصلت في السعودية للملاين , سؤالي هل ستنفع طفل خائف في حجرته في غزة !!


    عن نفسي , مستعدة في المساعدة في إنشاء الموقع , ونشره في جميع انحاء الإنترنت , وتزويده بالأفكار .

    ما رأيكم في الفكرة؟
    هل أجد من يريد العمل معي في هذا الموقع؟

    ReplyDelete
  4. تانى هتطلبوا منه يطلع ويقول طيب لما يجيب لنا الضغط بقى
    بجد انا زيك بقوله اطلع قول كلام مفيد نفهم منه حاجه بس

    ReplyDelete
  5. السلام عليكم ورحمة الله وبركاته

    تقريبا مصر سمعت كلامك يا استاذ احمد

    واهو انهارده مبارك بيعلن عن مبادره مصريه لوقف اطلاق النار

    بس للاسف النبره لسه فيها شويه طبطبه وحنيه ، ماهياش نبره قويه غاضبه هادره آمره


    مجرد مبادره يمكن يتوافق عليها او لأ ده اقصي اللي قدروا عليه حاليا

    ReplyDelete
  6. مصر مستنية اية؟
    مستنية الفيلم يخلص علشان تقوم تنام
    اصل عندها شغل بكرة الصبح



    اوروفوار

    ReplyDelete
  7. حتى الشجب والتنديد

    بقينا بنستجديه

    لا حول ولا قوة إلا بالله

    ReplyDelete
  8. الصورة الاخيره وجعتني اوي بجد
    للأسف احنا لسه عندنا ناس بيدافعوا عنهم

    ReplyDelete
  9. ننصحكم بممارسة ظبط النفس

    الموضوع غير مطروح على الساحه دلوقتى

    يجب على أسرائيل ان تتوقف عن القتل و يجب على حماس ان تتوقف عن ارهاب جنوب اسرائيل

    انا كنا بتكلم مع الرئيس بوش امبارح و قالى انه ممكن بعد يغسل سنانه بعد بكره الصبح يحاول يتكلم مع اولمرت علشان يأمر بفتح المعبر

    انا كنت بتكلم مع العاهل السعودى اول امبارح و اتفقنا اننا حنقعد على مائدة الحوار لجمع الشعب الفلسطينى


    لما دى تكون تصريحات رئيس بلدك بينما تغتصب حياة اقرب دولة ليك توقع منه اي شئ

    ReplyDelete
  10. والله يا احمد في وسط الظلام اللى احنا فيه ده انا شايف حاجتين معقولين.

    اولها:ان مصر الدوله الوحيده العربيه اللى بادرت بجد حتى لو مبادره ضعيفه بس فيها قوه عالميه وذكاء مصرى بان اللى يرفض يقابل كل النقد وفيها وضع اشرائيل اكيد اضعف.
    يعنى ماحدش يلوم مصر تانى.

    تانيها: ان العرب* كلهم اتفقوا على حاجه واحده ودى ما اعتقدش انها حصلت من زمااااااان.

    *العرب يعنى الشعوب والحكام.

    اخيرا احساسى ان احنا هنتحاسب على اللى بيحصل ادامنا وساكتين عليه ده بيقتلنى.

    محمد من جده

    ReplyDelete
  11. دي مش مصر يا أحمد ، انت بتتكلم عن اللي خاطفينها !

    ReplyDelete
  12. مصر مستنيه خيبتها القوية
    مستنية زلزال يقلب كيانها
    مستنيه موت طاغيها
    مستنيه اننا نتحرك

    شارك في حملة الطرطرة علي اسرائيل من هنا
    www.daktara.blogspot.com

    انظر حولك
    د. خالد عزب

    ReplyDelete
  13. السيد الأستاذ/ أحمد شقير
    صاحب مدونة / حكاوي آخر الليل
    اعتذر عن الخروج من موضوع التدوينة لقد أرسلت لسيادتك الجزء الثاني من الاستمارة (7صفحات)، أرجو منك إرسال رسالة توضح أن الجزء قد وصلك وأنه ليس هناك مشكلة في إرساله أحالت وصله لسيادتك .
    تحياتي وتقديري
    شيماء إسماعيل
    باحث ماجستير- كلية الآداب جامعة القاهرة.

    ReplyDelete
  14. مدونة غزة عربية تساعدك لفعل شىء لغزة أولا كيفية التبرع بالمال و أماكن التبرع بها و كيفية التبرع بالدم وأماكنها أيضا, ثانيا مقاطعة المنتجات الامريكية والاسرائيلية , ثالثا الدعاء لهم بأن يثبتهم , رابعا توجد أرقام تليفونات للاتصال بأهل غزة, خامسا بعض الفديوهات و المقالات المؤثرة , سادسا تعريف الفوسفور الابيض وآثاره الصحية,سابعا ذنوبنا سبب تعسهم.

    ReplyDelete