Thursday, January 15, 2009

معلومات إسرائيلية مؤكدة



يرضيك كده ..آه وهاتتضرب




عندما ترى عراك حادث بين طرفين يحاول كل طرف جاهداً إثبات أن الحق معه ويحاول بكل الوسائل إقناع الأطراف المراقبة بصحة موقفه، ولكن عندما يكون أحد الأطراف فتوة ولايستطيع أن يتصدى له أحد ولا حتى الشرطة ، فهو هنا لايحتاج كثيراً لإقناع الآخرين بصحة موقفه ، وده اللي حصل النهاردة واسمحولي أكتب الجزء اللي جاي بالعامية

إسرائيل بتضرب النهاردة الصحفيين الفلسطنيين المراسلين لشبكات التليفزيون ووكالات الأنباء العالمية في مبنى الشروق وقريب من المبنى الخاص بالمراسلين وسقط مراسلين من تليفزيون أبو ظبي والعربية

ومن على شاشة البي بي سي العربية ، بلاش الجزيرة ولا العربية لتطرف كليهما قليلا ... الراجل بتاع الجيش الإسرائيلي بيقول لتلفزيون البي بي سي حماس محتلة الطابق الأرضي لمبنى المراسلين ومش مخليه حد يدخل ولايخرج وبتضرب نار .. المراسل بتاع البي بي سي نزل من المبنى ومشي في الشارع ودخل وراح الشارع الجانبي وجاب عربية كارو ماشية في الشارع والناس ماشية والمحلات مقفولة ولاضرب ولاحماس ولايحزنون .. الراجل بتاع الجيش الإسرائيلي يقوله لدينا معلومات مؤكده أن حماس تحتل المبنى والدور الأرضي .. المذيع يقوله مانت شفت المراسل بتاعنا من مكان الحدث بيتحرك وداخل خارج ومافيش أي حاجة ... الراجل على كلمة واحدة لدينا معلومات مؤكدة ومن البي بي سي إن المبنى محاصر .. المذيع ماقدرش أول ماسمع البي بي سي .. راح جايب المدير الكبير بتاع البي بي سي على الهوا في الإستدويو .. مدير البي بي سي الكبير قال للمتحدث بإسم الجيش الإسرائيلي .. إنت بتقول لي من لحظات أن مدير مكتب البي بي سي في القدس بيقول إن حماس إحتلت المبنى .. وهو لسه كان معايا على التليفون بيقول ماحصلش وإن ولا إسم من الأسماء اللي قلتهالي قال إن هو قالك الكلام ده ... وقلتلي مكتب بي بي سي في لندن قالولك الكلام ده .. وأنا سألت ناس مسئولة هناك وقالوا محصلش وانت مش عايز تقول لي مين في لندن .. والراجل بتاع الجيش الإسرائيلي كأنه مركب رسالة مسجلة .. لدينا معلومات مؤكدة أن حماس تحتل المبنى ... المدير قاله يعني نعتبر ده انذار لإخلاء المبنى ... يقوله أي مكان بتضرب منه حماس هو مكان مستهدف .. يقوله يعني نروح فين ... يقوله أي مكان آمن ... يسأله زي ايه ؟.. يقوله مكان مابتضربش منه حماس .. يقوله يبقى مراسلينا في مكان آمن لأن زي ماشفت مافيش هناك حماس ولا ضرب ... يرجع يشغل الأسطوانة المسجلة لدينا معلومات مؤكدة من الجيش الاسرائيلي إن حماس تحتل المبنى .. مذيع البي بي سي أخد حبوب الشجاعة وقاله أنا باحملك مسئولية أمن مراسلينا ... بتاع الجيش يقوله أمن المراسلين مسئولية حماس .. يقولوا إنتوا بتضربوا في أماكن آمنة زي الأونروا النهاردة .. يقوله مش إحنا ده حماس اللي ضربت .. مذيع البي بي سي يقوله إزاي ؟؟ ده وزير الدفاع الاسرائيلي إعتذر وقال أن الضرب جاء نتيجة خطأ إسرائيلي غير مقصود .. الراجل يقوله حماس هي اللي ضربت موقع الأنروا ... وهكذا دواليك .. البلطجي الإسرائيلي يتعامل بمنطق .. ويريضيك كده ..؟؟ .. آه وها تتضرب

الراجل بتاع البي بي سي جاله ضغط .. وإسرئيل لاتكتفي بما تسببه من إرهاب دموي لاإنساني ولكن تسعى لزيادة مرضى الضغط في دولنا العربية

وهكذا تؤكد البلطجة أنها لايهمها توفير رسالة إعلامية تحاول أن تكون مقنعة

7 comments:

  1. يا حاج احمد اديني اسماء كده الله يكرمك.. عشان انا مش مركز، مهم مين المذيع ومين مدير البي بي سي ده وممدير مكتب القدس ده بتاع عربي ولا انجليزي ولا ايه النظام ومين الواد المتحدث ده، واحد اجنبي ولا افيخاي؟

    ReplyDelete
  2. ما هي بلطجة بقى و مش مهم تقتنع
    انت تموت من سكات

    ReplyDelete
  3. انا شوفت الكلام ده
    الصراحة اتفرست بالأوي
    ديه اسرائيل من زماااااااااااااان
    سبحان الله اسلوبهم واحد
    بيحاولوا يفنعوك ان الغلط اللى بيعملوه مش غلط و انه صح

    ياريت الناس اللى بتسلك نفس السلوك فى حياتها تاخد بالها
    انها بتقلد سلوكيات ناس مكروهه على مستوي العالم
    و ياريت الناس تفوق
    و العالم يفوق
    اسرائيل عامله زي السرطان

    بس ربنا اكبر من الكل و قادر على كل شيء

    تحياتي

    ReplyDelete
  4. سوري رجعت تاني
    ههههههههه
    المقولة اللى انت حاطتها فى مكانها صح
    ان شاء الله نخليهم يقدموا فى اجتماع الكويت
    بييييييييييييييييرل

    ReplyDelete
  5. في كلمة وحده بس تصف الموقف .. انا مبحبش اقول الكلام ده لكن لو استمروا بالطريقه ديه فعلا ممكن اغير اخلاقي من الي بسمعة

    ReplyDelete
  6. الجزاء من جنسس العمل
    انتم بتستهدفوا مدنييهم و هما بيستهدفوا مدنييكم
    زعلانين ليه؟

    ReplyDelete
  7. والله يا عم ايجيبشن تنقطنا سكوتك
    اسكت وبلاش هبل

    تحياتي للمدون شقير

    ReplyDelete