Sunday, April 23, 2006


قبل السفر

في المطعم

ليلة سفري ذهبت أنا وصديقي وزوجاتنا إلي سيتي ستار نأخذ جولة ونتناول العشاء ووقع الإختيار على مطعم فدركرز ، بعدما جلسنا جاء من يحمل قائمة الطعام وعليه إبتسامة تسع الدنيا كلها وقدم لنا قائمة الطعام وكانت البداية مع المقبلات السلطات يعني لقيت مكتوب طبق مقبلات سبعين جنيه نظرت لمراتي وشاورت لها على السعر وبما أنها تعلم تصرفاتي في تلك المواقف نظرت لي نظرة معناها بيقول مش عايزين فضايح وقالت أيوه ياأحمد ماهي سلطة طبيعية .. إستغرقت بعض الوقت محاولا أن أفهم يعني إيه .. لم أستطع ، قلت لها آه مش تقولي كده من الأول ، عموما أنا مش جعان أنا هاشرب البيبسي ده أبو تسعة جنيه

-----------------------------------------------


في البيت

بينما إبني الأصغر يتنطط على الكنبة ينظر لي بلا مبالاة ويقول لي : بابي .. انت عارف انهم غيروا عندنا في المدرسة تحية العلم ؟
أنا : يعني ايه ؟ إيه الكلام الفارغ ده
هو : آه والله
أنا: وخلوها ايه بأه إنشاء الله ؟
هو : مش إحنا بنقول في تحية العلم تحيا جمهورية مصر العربية؟
أنا : أيوه
هو : هما بأه خلونا نقول بدل منها تحيا مصر
بعد فترة صمت غير قصيرة
أنا : آه كده بقت ملكية رسمي
هو : يعني إيه ؟
أنا : أبدا هاتلي جورنال الدستور يابني لما أقرأ ابراهيم عيسى
-------------------------------------------

في عمر أفندي

كنت على موعد زيارة احد أصدقائي قبل السفر وبما إن الوقت ضيق لإختيار هدية له وإحنا داخلين عليه مالقيتش قدامي غير مبنى مكتوب عليه عمر أفندي ، دخلت لقيت المحل خالى من الكوليسترول من الزبائن يعني، المهم ذهبت اشتري هدية من قسم الهدايا مالقيتش أي بياع قلت للبائعة هو فين البائع بتاع الهدايا؟ قالت شوية ويجي ، بعد طول إنتظار يظهر انها اتكسفت وقامت على إستحياء تتمايل وتتلكأ وبالتصوير البطئ كأنها تعاني من مشاكل شهرية وبقرف كأنها بتقول لي انت ايه اللي جايبك قالت عايز ايه ؟ قلتلها عايز اشتري لوحة من دول هدية ، ومن وسط اللوحات المتربة وجدت لوحات لها العجب يبدوا أن صاحبها رسمها فى الحمام وبصعوبة إخترت واحدة ، إكتشفت بعد الإختيار انها عبارة عن واحدة بتعيط ، عند الكاشير سألني مافيش فكة بالرغم من إن الباقي اللي أنا عايزه عايزه كان ثلاثة جنيهات ، قلت في بالي اللهم طولك ياروح
ذهبت للإستلام لم أجد اللوحة حيث لم تصل بعد بالرغم من إن المحل مافيهوش حد ، أذهب للقسم فأجد اللوحة مازالت هناك وعندما شاهدتني البائعة نادت بأعلى صوتها كييييييس وهو نداء لإستدعاء عامل التوصيل لقسم الإستلام قلتلها وعلى إيه تلاقيه مشغول هاوصلها أنا ، طلبت من موظف الإستلام ورق هدايا للف اللوحة قالي مافيش غير ورق عمر أفندي ده ، قلت له ماشي ياباشا بس ماتنساش تشيل تيكت السعر ، نظر لي نظرة محبة وقالي عنيا ، فنظرت لعينيه وجدتها تعاني من بعض الحور اللذيذ ضحكت وقلت له إيه بتدور على إيه ؟ قاللي يظهر مافيش سوليتب ، بإبتسامة غيظ قلت له خلاص ياباشاهاتها كده
وعند صديقي فتح الهدية شبه الملفوفة في ورق زفت أفندي ، يبدو أنه صعب عليه مجاملتي فى إبداء إعجابه بيها قاللي جميلة بس المرة الجاية إبقي شيل تيكت السعر

--------------هاتوحشيني يامصر--------------

46 comments:

  1. واضح جدا حبك لمصر يا أستاذ أحمد
    انت فعلا بتوحشنا
    البوست دمه خفيف جدا
    تسلم يارب

    ReplyDelete
  2. على فكرة بجدعلى الرغم من كل اللي قلته دة انا واثقة انها بجد هتوحشك
    و بجد بقا انا و بسبس نوينا نعملك مفاجأة

    ReplyDelete
  3. أكيد طبعا مصر هتوحشك:)
    بذمتك المواقف دي ممكن تحصل لك في بلد تاني؟

    ReplyDelete
  4. ^
    ^
    ^

    طبعااا

    وياما حيشووف

    :P


    ههههههههههه ولهنا على بوستاتك يا أحمد

    والنبي سُكرة

    ReplyDelete
  5. فى المطعم

    البيبسى بيهضم برضه
    بس اسعار زى دى اشك

    فى البيت

    عاش الملك عاش عاش
    ولقد قرر ملكنا المبجل التنازل عن كرسية لولى العهد جيمى

    ربنا يخلى لك ولى عهدك

    عمر افندى دى بقى مش محتاجة تعليق
    دا كلام ياراجل

    ReplyDelete
  6. ما تزعلش يابو حميد علشان كدة انا خليتهم يبيعوا محلات اللى مايتسمى سى عمر افندى والله ده حتى اسمة زى اسامى الموظفين علشان كده بعناه ببلاش
    بص انا بقول خللى زكايب الهم مربوطه


    وقبل ما تسافر ممكن تعتمدنى؟ ولا ما انفعش

    ReplyDelete
  7. والله زمان ياأحمد أفندي
    وحشنا كلامك الحلو.. أما عمر زفت أهو هايبيعوه علشان خاطرك

    ReplyDelete
  8. سيبك من دة كله أنا متأكدة ان أكتر حاجة حتوحشك في مصر ديتليف ميليس

    ReplyDelete
  9. احمد باشا ..
    سيتي ستارز و أشباهها اعتقد للفرجه و اللف فيه .. لكن لحد الدخول و اتخاذ قرار التعامل الفعلي بالشراء او تناول طعام و شراب .. قرار صعب و متهور و اكيد سيعقبه ندم شديد ..

    تحيا مصر ؟؟ بس كده ؟؟ ربنا يستر و بكره ما يقولوش تحيا حاجه تانيه و تبقي كل مدرسه تحيي الدوله اللي شهادتها تبعها و ترفع علمها عليها كمان ..

    عمر أفندي أو عمو عمر "كنت بتكسف و انا صغيره اقول عمر افندي لانه اكيد راجل كبير و محترم و كنت فاكره صاحب المحل و ما يصحش بنت صغيره زيي تناديه بأسمه المجرد !!" ده حاله اللي كلنا عارفينه و ده حال صيدناوي و شيكوريل و امثالهم .. بس برضه مش هنبيعه الا لما ناخد تمن الارض اللي المحلات عليها علي الاقل بالعند بقي .. هه

    لا أسكت الله لك حسا ولا حرمنا من سُكر تدويناتك ..

    ReplyDelete
  10. بايظ يصلحوه الادارة تعبانه يخصخصوها
    يعملوة قطاع مشترك
    يبيعوه بتمنه
    اما يدوه هديه لمستثمرين شبعانين
    والنبى حرام
    سمعت انهم فى البرازيل لما مصنع بيفلس بيملكوه للعمال
    عندنا بيملكوها للحراميه
    الواحد يشتغل حرامى اذاى؟
    مافيش كورسات فى الموضع ده؟؟؟

    ReplyDelete
  11. ستغرقت بعض الوقت محاولا أن أفهم يعني إيه .. لم أستطع ، قلت لها آه مش تقولي كده من الأول ، عموما أنا مش جعان أنا هاشرب البيبسي ده أبو تسعة جنيه

    :)
    واضح إن البيبسي طبيعي برضه يا شقير

    ReplyDelete
  12. يلا,,ومهما كان انتى مصر وكل خطوة بنصر :d
    ان شاء الله لما ترجع تكتب حاجة كدا زى (قبل وبعد) ويكون الحال اتغير
    iam having dreams about brighter futur, mmm,,not thinking of giving
    up,, who knows

    walaaz,,

    ReplyDelete
  13. بس متنكرش ان السلطه والبيبسي في فدركرز فيهم re-fill
    :)

    اكيد مصر هتوحشك وانت كمان هتوحشها يا احمد

    ReplyDelete
  14. هههههههه
    تصدق عندك حق...يعني تخيل الواحد بيحب حاجة بــ..-إحم- "عبلها"!!هيستحملها بكل ما فيها سواء دستور مانعرفش أصله، أو أفندية زي عمر أفندي مانعرفش مين اللي اداهم الأفندية، أو حتى بيبسي بتسعة جنيه.. وأكيد بما إنك بتسافر عارف طعم البيبسي في مصر وطعم البيبسي المحترم
    برضه بتوحشنا
    حاجة غريبة والله

    ReplyDelete
  15. تروح وترجع بالسلامة بس ما تقطعش بينا
    النت بقي موجود في العالم كله

    ReplyDelete
  16. من أول يوم بتقول

    هتوحشيني يا مصر

    هيه لسه ما وحشتكش

    ReplyDelete
  17. مصر ام الدنيا

    فى دمنا بتجرى

    بوست وحكاوى جميلة عزيزى احمد

    ReplyDelete
  18. روح وترجع بالسلامة.. كان حقك تحتفظ بورق عمر أفندي لإنه حيبقى أثر تاريخي بعد كده

    ReplyDelete
  19. طيب تتخيل ان العراق على ما فيه صرنا نحبه اكثر

    هذا مرض

    بالتوفيق في رحلتك
    :)

    ReplyDelete
  20. أنا جيت تاني يا أحمد والله علشان أقرأ بتاعه عمر أفتدي تاني .. أية رأيك بقي

    ReplyDelete
  21. اسجل حضوري مخفيا اعجابي بالبوست

    ReplyDelete
  22. هي دي مصر يا عبلة قصدي يا شوكير
    هي دي مصر بحلاوتها وبغباوتها وبشكلها العفش
    "قلتلي شغلتلك ايه ع المركب"

    وزي ما قال عمو صلاح
    بحبها بعنف و برقة وعلى استحياء
    والعنها والعن ابوها بعشق زي الداء
    واسيبها واطفش بضرب
    وتبقى هى الدرب
    وتلتفت تلاقيني جنبها فى الكرب

    وتروح وتيجي بالسلامة يبو حميد

    ReplyDelete
  23. هههههههههههه

    طب لما هو عينيه على الصلا عالنبي مش طايئين
    بعض .. و ألّك بالعربي الفصيح عنيّا
    كنت تأكدت بدل تريئة صاحبك
    :p

    سلملي على عمر افندي

    وانشالله ترجع كده تنور مصر تاني
    :)

    ReplyDelete
  24. وحشتني بوستاتك الحلوة
    مافكرتش بصراحة أدخل مكان من بتوع البيبسي بتسعة جنيه دة ... كان عندي احساس مزمن أني أكيد هانضرب بالنار .. أو جهاز انذار يضرب في المكان ويزعق قائلا .. الرصيد لايسمح ... بس ايه حكاية تحيا مصر دي؟...انت بتتكلم بجد؟!!!0
    مش بعيدة ... ومش هاندهش
    وانت بتحكي عن عمر أفندي افتكرت على طول موظفين الوزارة والمديريات الصحية وغيرها .. (كلهم سوا سوا) اللي حظ أهلنا الاسود بيجبرنا على التعامل معاهم .. كل واحد يحسسك انك متسول رزل بتشحت مصلحتك
    تروح و تيجي بالسلامة ياريس

    ReplyDelete
  25. انا مش هاعمل حاجة غير ان انا هاضحك هاضحك بجد ههههههههههههههههههههه
    انا كل فترة بدخل اشوف بوستاتك بتعجبنى جداااااا بس دى اول مرة اكتبلك كومنت
    تحياتى ليك

    ReplyDelete
  26. تعرف انا قاعد في كافيه نت

    ولما قريت كلامك قعدت اضحك قوي

    وفجاة اكتشفت اني مش لوحدي

    كان شاكلي عبييييط


    الله يسامحك ياعم

    ReplyDelete
  27. حتوحشنا يا احمد وترجع بالسلامة

    ReplyDelete
  28. ما قاله قضاة مصر الشرفاء لشايفنكم يوم لجنة الصلاحيه


    هشام بسطويسي....قال"الشعب عنده وعي كفايه وفاهم كويس ايه اللي بيحصل و فاهم ان قضية استقلال القضاء و نزاهته تهم كل مواطن.....القضيه مش قضيه قاضيين بيتحاكموا !!"

    و قال ايضاً" حشود الامن...جيا تحمي النظام من الشعب"

    و قال لنا الخضيري عن حشود الامن الكبيره" الحشد الامني يدل على على ان الدوله لا تفكر بالمنطق المطلوب...و ده لأنها للأسف بتفكر بعضلاتها"

    و اضاف" المسأله مش خاصه بالقضاه دي قضية الشعب المصري كله"

    و بعد ان تم الاعتداء على محمود حمزه كان لنا معه حوار كامل في مستشفى كليوباترا و هذا اهم ما ورد فيه

    قال محمود حمزه لشايفنكم مستنكراً ما تعرض له من اهانات و ضرب" القضاء ده ايه؟ ايه رمزه؟ ..العدل طبعا..و لما يهان العدل بالطريقه دي...مش دي رساله للشعب..رساله بتقول: مش هما دول اللي بتقولوا ان هما صوتكوا" شما اشار الى وجهه المصاب و قال " اهو بالجزمه ...بالجزمه"

    قال لنا ايضا محمود حمزه وهو يغالب دموعه.. " انا لما دخلت المستشفى في الطواريء...انكسرت اوي و صعبت نفسي عليا جداً..ولكن بعد ان جاءني تليفون من مواطنه تؤيدني و دعت لي لم اعد اشعر باي الم في جسدي"

    و عندما اكد حمزه ان مصر في حاجه لكل شخص و كل وسيله اعلام من اجل تدعيم حركة القضاء سالناه هل اتى لك اي تليفزيون حكومي منذ اصابتك فضحك بمراراه و قال"لم يأتي اي تليفزيون حكومي بل بالعكس دا انا لما شفت التليفزيون المصري لقيت نفسي متهم"
    و اضاف"و لما و صفوا اللي قام بالاعتداء ....كان ناقص يقولوا عليه مختل عقلياًًً!!!!!!!!"
    و عندما سألناه عن مدى ايمانه باستقلال القضاء...قال" اكيد هيستقل القضاء الرئيس وعد بكده...هل يجوز ان رئيس الجمهوريه وهو اعلى الهيئات القضائيه يوعد ما يوفيش؟؟...مش معقول..انا مش متخيل انه مويفويش بوعده!!!"

    و في نهاية حديثه وجه كلامه لرئيس مبارك قائلاً:" قانون السلطه القضائيه مش هيأثر على اي سلطه اخرى..
    ارجوك ..ارجوك...انهى الازمه...لن ينهيا غيرك!!!"

    ReplyDelete
  29. هتوحشيني يا مصر طالعة مريرة واضح :)

    أتمني أشوفك بعد ماترجع
    ده لو ليك نفس ترجع
    :)

    ReplyDelete
  30. بوست جميل وحميمي ودمه خفيف
    فعلاً عمر أفندي ده عندي من أهم معالم مصر..بسقفه العالي اللي في أركانه بيوت عناكب.. ومرواح السقف.. والتراب اللي مغطي حيطانه.. وروح الحكومة الثقيلة اللي بتغلف الجو فيه
    هتوحشك مصر وهتوحشك أكتر..علشان محدش بيعرف قد إيه بيحبها إلا لما يبعد عنها
    ربنا يوفقك وترجع لها سالم
    :)

    ReplyDelete
  31. انا جيت عالبلوج ده من البلوج التاني بتاعك اللي هو نضاره شمس
    مش عارف ايه اللي خلاني اتضايق لما لقيتك متوقفه عن التدوين هناك و قلت ادور يمكن الاقي مدونه تانيه ليكي طلعوا مش واحده او اتنين
    دول علي راي ثروت في يوميات ونيس
    تلااااااااته :)
    جميل اوي اللي بتكتبيه
    انتوك

    ReplyDelete
  32. This comment has been removed by a blog administrator.

    ReplyDelete
  33. لا حول و لا قوة الا بالله
    رحت فين؟

    ReplyDelete
  34. خدت بالك انت بقي من كراكيب بيقول أية..
    نحن السابقون وأنتم الاحقون .. عملها فيا برضة أدم المصري بس أدم قال فيا كلام كبير قوي كل ما أشوفة أضحك وافتكر أدم

    ReplyDelete
  35. هو شكله اتخض اول ما فتح باب الكومنت لاقى كل الناس دى جوة راح قال والنبى ما انتوا قايمين وراح ماشى تانى
    :D

    ReplyDelete
  36. والله يا زبادي انا كمان كل ما افتكر ادم و هو بيتغزل فيك اموت من الضحك

    بس على الاقل هو افتكرك بنت من اسمك رغم اني مش لاقيه علاقه بين الزبادي و البنات بصراحه

    ايه اللي يخلي اي حد يفتكر احمد شكير بنت بقى؟؟ ده الراجل حاطط اسمه واضح و صريح احمد و شكير كمان سبحان الله

    يا ترى انت غطست تاني فين يا احمد؟

    ReplyDelete
  37. راجل

    والله العظيم راجل

    لحسن يوم يقولو أبوشنب كده ولا كده

    راجل يا جماعة

    ولا مؤاخذه يا عم أحمد

    وسلامي لكل المملكة

    ReplyDelete
  38. شقير

    ضحكت لغاية ما صحيت الولاد من قدام الكارتون

    ان شاء الله مصر هتوحشك رغم كل شىء

    لأن الكلور اللى شربته فى مية النيل صعب تلاقيه فى حته تانية

    وهيرجعك تانى

    سلااام

    ReplyDelete
  39. تسلم الإيد اللي كتبت.

    ReplyDelete
  40. حلوه ديه!! بس الحمد لله مش خلوك انت بترسم اللوحة. كان كملت

    ReplyDelete
  41. يا أستاذ أحمد انت فين ؟ ما بتكتبشي ليه ؟ وما بتسألشي ليه ؟ بجد وحشتنا

    ReplyDelete
  42. بسم الله ماشاء الله .. ايه ده كله ايه ده كله
    شكرا للجميع على التعليق والسؤال واسف على التاخير للمرة الألف


    .
    .
    .


    voice of love
    أعتقد كمان يافويس انه زاد بعد السفر كتير .. تسلم انت كمان

    taty
    أكيد ياتاتي هيا واحشاني من قبل ماأسافر
    أعتقد إن المفاجأة كانت بتاعت اول مايو .. صح ؟

    free soul
    ربنا يخليك

    arabesque
    لأ طبعا ماتحصلش في حتة بس وده السر ان الواحد دايما بيحن ليها

    نون النساء
    اكيد يانون .. وميرسي على مرورك

    taher
    في المطعم
    لأ ماتشكش الأسعار دي بجد وأخدت بالي منها عشان جت ساعتها فكرة اني اكتب عنها .. بس ملتها في جدة وأكلت في نفس المطعم

    في البيت
    فعلا ده حصل وجالي الاحساس اللي كتبته

    في عمر اقندي
    انا اصلي حضرت عمر افندي في وقت كان هو من افضل المحلات الي الواحد ممكن يشتري منها مش خرابة زي دلوقتي

    asadma7bos
    ياسيدي يخلوه عمر باشا بدل عمر أفندي بس ينضفوه
    شكرا ياأسد ع المرور

    زبادي
    يبيعوه ولا ينهبو الواحد ماعدش عارف يعمل ايه ..المهم سيبك انت احنا اعتقد بقينا جيران ياريت نقدر نقرب من بعض اكتر

    change destiny
    انتي لسه فاكرة ديتليف ميليس بسم الله ماشاء الله والله وحشوني

    Romantic Rose
    للفرجة بس ليه و احنا مش زي الناس اللي بتشتري دي ولا ايه

    هاها .. حلوة حكاية عمو عمر افندي دي عشان بتتكسفي انك تقولي اسمه ، امال لو كان عمر بيه كان هايبقى الوضع ايه؟

    shady
    ميزتك ياشادي انك دايما بتخش في العميق وبتجيب من الآخر

    Ahmad El-Saeed
    طيب مش تقول ياابو حميد من الاول عايز تعرف ايه عني وانا اقولهولك ، عموما ربنا يكرمك كده انا عندي ولدين
    هاها انت كنت متراهن مع فري سوول على اني مخلف ولا لأ ؟

    أبو الليل
    حلوة طبيعي دي ياأبو الليل ولو ان البيبسي له حكاية خاصة ممكن اقولها بعدين
    بس بصراحة إفتقدنا تدوينتك ياريت بس على الاقل نشوفك حتى في التعليقات ولو حتى من وقت للتاني

    Anonymous
    ولاء
    أكيد حاجات كتير هاتتغير سواء رجعت ولا لأ ماهي دي سنة الحياه
    بس الحياة حلوة برده بلاش تشاؤم اوي كده
    عموما تابعي البوست الجاي

    bosbos
    هاها .. واضح انك بتدوسي في الاماكن دي كتير .. فعلا فيه ريفيل

    Doaa Samir
    دايما يادعاء رؤيتك للمكتوب بتكون فيه وجهة نظر
    انا فعلا كنت اقصد اني آخد علامات على اوضاع قبل مااسافر
    في البيت : كنت فعلا اقصد حكاية الاصلاح السياسي والدستور والتوريث
    وعمر افندي : كانت عن الفساد الاداري
    وفي المطعم : الحالة الاقتصادية والغلاء
    حقيقي برافو عليكي

    هوميروس
    فعلا عندك حق ده النت هو اللي بيخلي الواحد فعلا يحس انه متواصل مع الدنيا ومابعدش عن مصر بس الفترة الاولانية بس الواحد بيتشغل شوية لغاية مايظبط حاله

    أبو شنب
    م الحال من بعضه واحنا مسافرين تقريبا مع بعض ، بزمتك ماوحشتكش مصر وحبايبك في مصر ؟ (؛

    mohamed yousef
    كلامك في الجول يالورد وشكرا على الكلام الحلو ده

    tamer
    تامر أفكار .. كلامك مظبوط وشك على تحياتك

    Abdou Basha
    هاها .. فكرة والله الإحتفاظ بالورق دي . عموما امانة عليك تعدي على اقرب فرع وتحتفظلنا بشوية ورق منه

    tara
    فعلا ياتارا كلنا نحب بلدنا بالرغم من كل بلاويها .. ساعات كمان بلاويها دي بتكون سبب في حبنا ليها أكتر
    ميرسي ياتارا

    زبادي
    اهلا بيك يامعلم دايما تاني وتالت وعاشر كمان

    المواطن المصري العبيط
    مش عارف ليه ياخي حاسس انك اكثرنا عقلا .. اهلا بك مخفيا او ظاهرا

    حائر في دنيا الله
    فعلا كلام صلاح جاهين جاب من الآخر .. الراجل ده كان حاسس بيها وبينا اوي
    وتسلملي تحياتك

    طائر بلا وطن
    اللي حصل ياطائر .. فعلا انا كان لازم اتاكد لكن عمر مش عارف ايه مايمنع قدر

    451 فهرنهايت
    اللي حصل باه ياحفار ادينا دخلنا واللي كان كان ، على حد قول ابني الكلام ده حصل فعلا في المدرسة ماعتقدش الواد هايألف
    شكرا على تحياتك

    m_elsewedy
    سويدي شرفت المدونة ونحب تكون معانا دايما وانت كمان يالورد بقى ليك شعبية جامدة

    admelmasry
    ولا عبيط ولا حاجة يامعلم اهو لما تضحك احسن من مافيش وبعدين في النت كافيه الواح بيسمع وبيسوف العجب من الرواد ، دول زي مايكون قاعدين في بيتهم ده فيه واحد عرفت قصة حياته كلها وهو بيكلم اهله الله كون في عون مراته

    rubyeldaly
    ميرسي ياروبي على تحياتك

    شايفنكم
    ربنا معاكم ومع قضاة مصر بس انا بأه للأسف لاهاأعرف اروح مظاهرات ولا اعمل إعتصام
    هنا سلومة الاقرع مايعرفش اخوه

    mindonna
    هي فعلا طالعة مريرة زي مابتقولي .. عايزة تشوفيني بعد لما ارجع طب ما انا كنت موجود .. وبعدين لما هاارجع هاكون شكلي اكيد اتغير خالص .. عجزت كمان يعني

    صباحك سُكّر
    إنتي بالأخص عارفه هيا الغربة مرة اد ايه مانتي مجربة .. ربنا يعينا جميعا

    egiziano
    ان نفسك تهج من البلد ولا ايه .. ده كله ماشي ومتكل عليك انك موجود .. مصر امانة في رقبتك ده انت اسمك على اسمها

    worood
    اهلا بيك .. انت واخد بالك من حكاية مرواح السقف والتراب دي .. ليك ملاحظات جميلة

    karakib
    أنتوك
    باه ده اسمه كلام ياراجل يعني على رأي ثروت تالات مدونات واحمد شقير وفي الاخر بقيت بنت .. هاها ده انت خليتني ادخل الحمام اتاكد ياراجل
    شكرا على مرورك كمان على نضارة شمس

    taty
    أنا أهوه .. بس في الاول بس شوية مشغوليات كده لغاية ماتستقر الامور :)

    زبادي
    انت مابتفوتش حاجة .. باين عليك حقنة
    عديها بأه

    m_elsewedy
    هاها .. انت تقصدني انا ولا انتوك؟

    bosbos
    المشكلة يابسبس اني مااقدرش أقدم اثباتات اكتر من كده اني راجل

    أبو شنب
    تسلم ياهندسة على التأكيد وربنا يقدرنا كده ونقف معاك في موقف زي ده كده ونكون أده

    حلم
    تسلمي وفعلا مية الكلور دي ماتلاقيهش قي حتة تانية على فكرة الميه هنا للاستحمام وبس يعني لاشرب ولا طبخ زكله مياه معباه ويجعله عامر
    هما الولاد عندك بيحبوا كرتون ايه ؟

    ghada
    شكرا على التاجنج وهاعمل الواجب على طوول انشاء الله

    ميشيل حنا
    كاتبنا الموهوب هنا .. ياهلا ياهلا
    شكرا على مرورك ونشوفك دايما

    عطاء
    هاها .. انتي بتقولي فيها ماده اللي كان ناقص كمان اني ارسم اللوحة

    هوميروس \ المواطن المصري العبيط
    انا هوه .ز أنا جيت .. شكرا على السؤال

    ReplyDelete
  43. ياه دانا جيت متأخرة أوي
    أنت سافرت فين وسبتنا
    عزاؤنا الوحيد ان النت بيقرب البعيد
    بس مصر كده ضلمت
    عموما ترجع بالسلامه لبلدك الغاليه
    عمر أفندي
    بقي معقول يا عم تشتري برضه من عمر أفندي أنا كنت فاكرة انه أصبح من الآثار وأهو الآخر اتباع برخص التراب
    أول مرة أعرف ان في مكان بيقدم البيبسي ب9جنيه بس لازم أروح سيتي ستارز أجرب الموضوع ده هو احنا مالناش نفس ولا ايه يمكن الطعم مختلف
    في البيت
    ده لو فعلا موضوع تغيير تحيه العلم دي صحيحه يبقي يبقي باي باي علي البلد راحت لجيمي واللي كان كان
    عشانا عليك يارب

    ReplyDelete