Sunday, July 16, 2006


أحلام

Arab League


نمت ساعة العصاري والتليفزيون يدور على قناة الجزيرة وقصف بيروت والجنوب اللبناني وبعض المدن والقرى لأول مرة أسمع بإسمها لأستيقظ بعد فترة على مجموعة من الأحلام ، لم أستطع تفسيرها لأفرك عيني على إجتماع وزراء الخارجية العرب ليعلن لي أحدهم انها أحلام وردية وقبل ان استمتع بالتحليل فاجاني آخر أنها أحلام شيطانية

وبسبب هذا الإختلاف سوف يتم دعوة القمة العربية للإنعقاد العاجل لبحث إذا كان دعم المقاومة اللبنانية أحلام وردية أم أحلام شيطانية


أحلام إيه وزفت إيه ... بأه ده اسمه كلام ياعالم
لقد غرقنا في المهانة والذل وعواصمنا تدمر ، منذ ثلاث أعوام ومازال صوت المذيع يرن في أذني قصف العاصمة العراقية بغداد واليوم نفس المذيع جمال ريان بنفس الصوت الرخيم يقول قصف العاصمة اللبنانية بيروت

وبين هذا وذاك مازالنا مختلفين هل أحلامنا وردية أم شيطانية
------------------------------------

بحب الحياة عشان لسه فيها واحد فقط محترم له ثقله قادر يقف قدام إسرائيل في عصر العهر السياسي إسمه حسن نصر الله

جملة قلتها يوما ما في تدوينة ليه باحب الحياة في شهر مايو

21 comments:

  1. العرب مهانون و مستباحون في اي وقت و اي مكان ...في فلسطين في العراق في لبنان ومن بعدها سوريا حتى يأتي علينا الدور وهو قريب و ليس بعيد كما يتوهم البعض

    الحاجه اللي تموت م الضحك على غرار هم يبكي و هم يضحك هو تصريح عمرو موسى بان العرب اتضحك عليهم و ان عملية السلام فاشله و ان كل قرارات الاامم المتحده كلام فاضي....يعني هي كانت محتاجه كل الوقت ده يا عمرو يا موسى على ماتدرك الحقيقه دي اللي عارفها اصغر عيل في اصغر حارة في اي دوله عربيه؟؟؟؟؟؟

    من امتى الجامعه العربيه عملت حاجه ...يلغوها احسن
    من امتى الامم المتحده عملت حاجه...يستقيلوا بكرامتهم احسن
    من امتى الكلام و السلام كان حل اي مشكله.....ما اخذ بالقوة لا يسترد الا بالقوة

    ReplyDelete
  2. لا انا النهاردة شفت حديث للريس عن الموضوع ده الراجل شكله كبر وخرف ومش عارف يجمع كلام ولا يركبه مش لاقي حاجة تقولها
    نفسي مرة في حياتي اسمع ع مؤتمر بتاعة جامعة الدول ده وينجح وميتخنقوش من وانا ف رابعة ابتدائي وهما معذبنا ف الدراسات بالجامعة العربية دي يفضوها ونخلص

    هو الدور جه علينا ولا لسة شوية؟؟

    ReplyDelete
  3. أنا ملاحظ أنه مافيش ولا بيان صدر فيه لفظ شجب العدوان
    السعودية تدين حزب الله وش كده
    مصر والاردن من تحت لتحت
    ماحدش وقف مع لبنان غير سوريا والجزاير
    ربنا يكرمك يا بوتفليقه كان شكلنا حيبقى وحش من غيرك
    اليمن والسودان وليبيا خدوا موقف وسط مع المقاومة بس تنسق مع الحكومة
    الحكومة بتاعت السنيورة
    طب والنبى عمركم سمعتم عن سنيورة بيحارب

    كل مدى العملية بتدهور ما كانش عاجبنا الشجب اهم بطلوا يششجبوا
    ربنا يستر ومجلس الامن مايبعتش قوات تضرب حزب الله الارهابى وحسنى يبعت قوات مصريه معاهم

    ReplyDelete
  4. تصريح عمرو موسى كان هم يبكي و يوجع القلب
    حسسنني انه خلاص من كتر ما فاض بيه طلع على لسانه كل اللي كان محوشه في قلبه

    الدور علينا قرب قوي
    ويا خوفي من اليوم ده

    ربنا يتولانا كلنا

    ReplyDelete
  5. والله ياأحمد أن اسم الراجل دة بس قادر علي بث الرعب في اسرائيل كلها ويكفية ثباته علي موقفه

    لي تعقيب علي سوسة
    بالنسبة لموقف عمرو موسي أنا لا أدافع عن الرجل فهو بمواقفة يحسب من العلامات في مجاله في الأوساط السياسية ويكفي الرجل أنه الوحيد الذي قال مالم ولن يقوله باقي السياسيين من أن عملية السلام أصبحت بلا معني والوحيد الذي طالب الشعوب وليست الحكومات بالتعبئة العامة وهو لسان حال الشعوب العربية أعتقد كلها ولا أعني هنا الحكومات علي الإطلاق
    وسلمت تلك اليد التي أعلنت المقاومة

    ReplyDelete
  6. هل لو كان حسن نصر الله رئيسا فعليا للبنان قد فكر فى التفكير فى هذه الهجمات؟؟
    مجرد سؤال

    مع احترامى لوجود مثل هذا الرجل فى هذا الزمان

    ReplyDelete
  7. أنا رأيى ان القصه دى ليها حسابات تانيه غير اللى احنا شايفينه، حسابات قوى اقليميه زى ايران/امريكا وايران/العراق وسوريا/لبنان وسوريا/اسرائيل ....الخ
    مع احترامى للأخ حسن نصر الله والمقاومه الفلسطينيه، الا انهم يمثلون مصلحتهم واهتمامهم فقط... الهجوم الذى أوقعته حماس ومن بعدها حزب الله على الأحتلال جزء من مخطط اقليمى لا يجب أن نندفع وراءه لأنه من غير مصلحة العرب، فاذا كنا قد قبلنا الهوان عشرات السنين فهذا لا يعنى أن نندفع فى طريق غير ممهد لنثبت أننا غير جبناء وغيرها من الألفاظ الرنانه التى تحملناها طوال عمرنا.

    ReplyDelete
  8. وغدا ستسمعه يعلن قصف العاصمة المصرية ثم الليبية و.... وبرضه وهم قاعدين يتساؤلون عل هى احلام وردية ام شيطانية ام ؟؟

    نحن فى زمن المهانة ياعزيزى والبقية تأتى...

    ReplyDelete
  9. ما أحب حزب الله

    ReplyDelete
  10. طب و بعدين

    حناخد علي دماغنا كدة كتير

    ReplyDelete
  11. انت فين يا عم الحاج
    الحرب قايمة
    وعتريس عمال يضرب نار

    وانت جاي تقول لي لبنان

    صبح صبح يا عم الحاج

    ReplyDelete
  12. This comment has been removed by a blog administrator.

    ReplyDelete
  13. من جنب النيل : مع احترامك لحسن نصر الله و المقاومة الفلسطينية , القصة ليها حسابات تانية !!!؟؟؟ا
    طيب معاك ان فيها شبهه مصالح شخصية - تفتكر حضرتك مين اللى ممكن يوقف اسرائيل ( دلوعة الباب العالى) عند حدها ؟؟ عزيزى لا أمل فى الحكومات - فالحكومات ليها حسابات تالته . ماهو ما يؤخذ على الشاطر حسن نصر الله انه لم ينسق مع حكومته - هو راح للحكومة فعلا بس كانت مش فاضية كانت بتتفرج على عرض خاص لكليب الست هيفا - طب يعمل ايه؟ راح ضرب هايفا بتاعت اسرائيل عشان يفش غلوا
    أظن مهما كانت أسبابهم فهم أنضف ميت مرة من بتوع : نشجب و نحذر و نعتذر

    الغالى شوقير - وفاكر انا رديت عليك و قلت ايه فى بوست حب الحياة: انت عارف ان حسن نصر الله ده راجل كده و مش من نوعية نظمى بالمرة ده (يمكن هو و نجاد بتاع ايران ) يكونو من الأسباب القوية فعلا لحب الحياه - فاهماك يا شوقير

    ReplyDelete
  14. حسبي الله ونعم الوكيل
    يسلم حسن نصرالله يكفي انه جعل الأسرائيلين يختبئون في المخابء لأول مرة ويذوقون طعم الخوف

    ReplyDelete
  15. تمر حنه - طبعا نصر الله وحماس عندهم حق ورجاله وما يتبعه ... الخ من الكلام الجميل العظيم، بس احنا برضه بنتكلم عن حرب.. لايف مش فيديو جيم. آه حزب الله ضرب حيفا وخالا الأسرائيليين ينزلوا المخابىء... روعه وزى الفل وآخر جمال، انما فى النهايه كل ضحايا اسرائيل 30!!!

    كل يوم يضرب 50 صاروخ يوم 1 اسرائيلى بالعافيه، تقوم اسرائيل ترد ب 50 صاروخ يموت 50 لبنانى... ايه الهم دا والنبى؟؟؟ طب على ما يحرروا ال1000 اسير من اسرائيل يكون مات 2000 لبنانى وانجرح 2000 تانيين وكل لبنان اتدمرت؟؟؟ طب وليه، هيا سذاجه؟؟ انما ازاى، المقاومه والشرف والكرامه وفى الآخر تلاقى اللى فاضل فى لبنان واحد برجل ورجل وطالع يتكلم عن المقاومه!!!

    كل واحد بيتكلم عن الحرب والهوان والصمت العربى، واحنا كلنا عارفين هما بيتكلموا عن مين، كلهم عايزين رجل مصر فى الحرب بأى طريقه، كل واحد بيتكلم عن السكوت العربى ويبص لمصر ويشوف، هوا انتى تفتكرى فى حد غير مصر حايحارب يعنى؟؟؟ ما احنا شفنا وجربنا فى 73، ماحدش عندوا القدره غير مصر، وبصراحه يا نقدر نرد يا نسكت لغاية ما نقدر، انما نبهدل نفسنا؟؟؟ ماعتقدش!

    وبعدين اعلنا الحرب النهارده، حايحصل ايه بعد كده؟؟؟ حانحارب أمريكا، وايران صديقة الأسلام اول واحده حاتجرى على مصلحتها فى العراق، والأسلام حايبقى شربه، تلطيش من كل ناحيه!!

    خلينا الأول نصلح من جوا بلادنا، دوله فلسطينيه متفقه (مش فرق متفرقه) ودول عربيه أكثر نضجا ووعيا، ونشوف المصيبه اللى عندنا فى مصر الأول، وبعدين نتكلم عن حرب أمريكا مش اسرائيل.

    ReplyDelete
  16. اقول ايه بس حسبي الله ونعم الوكيل

    ReplyDelete
  17. ومين سمعك! يا ريتها جت على الحكام الفاسدين اللي ليهم مصالح بس. ده فيه ناس كتييييييييير لسه بتقول لك المدنيين والمعدنيين و"السلام" وأبراج الحمام! سلام إيه بس نفسي أفهم! هي دي ناس ينفع معاها سلام!؟

    ReplyDelete
  18. سوسة المفروسة
    مافيش شك إن الكلام اللي قاله عمرو موسى في المؤتمر الصحفي اللي بعد الإجتماع هو اكيد مش جديد علينا ولا عليهم الجديد باه المرة دي إنهم أول مرة يقوله صراحة وخصوصا لما قال بلا خريطة طريق بلا لجنة رباعية وتساعية كل ده كلام فارغ ومافيش سلام ولا كلام فاضي وإن عملية السلام ماتت وشبعت مووت

    نوران
    فعلا من يوم مالواح غتولد وهما عمالين يقولوا لنا ع الوطن العربي الكبير والدول العربية الشقيقة التي يبدوا مما حصل في لبنان ماهياش شقيقة أبدا وهو حد برده يسيب اخته يتعمل فيها كده ويقعد يتفرج
    كان فيه مادة غسمها التربية القومية ياترى لسه موجودة لو يغيروها بحخصة تبدير منزلي او خياطة يكون احسن

    شادي
    حتى موقف الجزائر لم يتم إعلانه بالشكل الكافي ويبدوا انه تم تحجيمه بما انه ليس صادر من دولة محورية في المنطقة على حد كلامهم وعشان كده انا والله ماعرف موقف بوتفليقة إلا منك دلوقتي
    اللي مجنني غن المظاهرات طلعت في الدنيا كلها من كولزمبيا لكندا ومن البرازيل واستلااليا وأسبانيا واليمن والمغرب والخبر الوحيد اللي جه من مصر بيقول مصادمات بين الشرطة والمتظاهرين في الجامع الأزهر
    يعني العالم كله بيتظاهر وإحنا الوحيديين اللي بنقمع حتى المظاهرات

    بسبس
    فعلا كلام عمرو موسى فعلا بيبين إن الراجل طهق من الموقف العالمي المهين وطلع كل اللي جواه
    بس في الآخر برده كلام بيقوللك هانطلع هيلا بيلا على الأمم المتحدة ويقولولهم أدي المشكلة أهي اتصرفوا يعني هما مش عارفين لغاية دلوقتي ايه المشكلة

    زبادي
    طول عمرك عاقل فعلا كلامك مظبوط عن عمرو موسى في ردك على سوسة
    اما بالنسبة لحزب الله فالراجل ماطلعش لقمة سهلة زي ماكانوا فاكرين وده كله لوحده أصابهم بخيبة امل وعملهم رعب مش واخدين عليه اكتر من جميع الجيوش العربية مكتملة

    جبلاوي
    سؤالك خبيث بالطبع ولكن اؤكد لك آه كان عمل كده فهذا النوع من الرجال مخالف لما رايناه في كثير من النماذج لحكامنا العرب لذلك موقفه قد يثير الشك في نفسك لو انه كان رئيسا فعليا للبنان
    وعندك مثال جيد احمدي نجاد أهو رئيس فعلي لإيران وموقف العالم على رجل وماحدش عارف ياخد منه حاجة وكان يقدر يسهل أموره ويمشيها ويقول وانا مالي ولذلك الكل عامل حساب لإيران فالراجل عارف إمكانياته كويس وسلاح البترول والخليج الي عنده بيسيطر في على حركة الملاحة لبترول تصدير منطقة الخليج وووو

    كراكيب
    الظلم موجود ويستحق اللعنة ولكن الحق والعدل ينتزع ولا يمنح

    من جنب النيل
    من مصلحة العرب ألا ينجروا وراء ذلك
    أنا بصراحة مش شايف أي مصلحة بنحققها من ساعة الدبلوماسية إلا إننا كل يوم بتهون علينا كرامتنا اكتر هاتقول بس إحنا تجنبنا ويلات الحروب
    مين قاللك مابين يوم وليلة تم تدمير بلد بالكامل ماهو ممكن اوي بأي ذريعوة واهية كده واحد على الحدود يقتل له عسكريين إسرائليين تلاقي القاهرة بتتضرب
    وبعدين ده مش وقت كلام عن شيعة وسنة عاملوا ايه السنيين عايز اعرف اول من إبتدى مقاومة الامريكان في العراق كانوا الشيعة وهما أول من رسموا فشل التدخل الامريكي في العراق وإيران اجبرت العالم على الغستماع ليها بعدما حاولوا يهوشوها وهي تعاملت معهم بموقف الند
    وحزب الله فصيل مقاومة بث فيهم الرعب اكثر من الجيوش العربية مجتمعة
    صدقني اذا كان الطريق غير ممهد فده عشان غحنا مش عايزين نمهده بكلام زي اللي حضرتك قلته
    والإختلاف في الرأي وارد
    تحياتي

    النوبي
    وده جزاء بكل من يستهين بحقه ولا يدافع من اجله
    الإهانة
    بس نفسنا باه نبطل كلام ونكون على مستوى المسئولية

    بعدك على بالي
    في زمن المهانة من الممكن ان يحدث ماتقولين واكثر

    سعلوة
    رايك في حزب الله ونصر الله لايخرج من حسابات طائفية لاتهمنا في مصر كثيرا
    ولكن يبدوا ان تأثيرها يمتد في دول الخليج وفي موقف حكامها ايضا

    إبيتاف
    طول مافيه سلبية هاناخد على دماغنا وقفانا كتير
    حزب الله أخرج كثير من أسراه بالقوة وحصل عليهم وغحنا لينا هناك اسرى بالسجون ولينا جرائم حق عند إسرائيل ومجازر ومقابر جماعية من سنة سبعة وستين ومش قادرين حتى نتكلم عنها عشان ده مش وقته تفتكري هما يعني اللي هايتكلموا عليها
    آآه من السلبية آآه

    أبو شنب
    أنا فين والحرب قايمة وعمال اتكلم عن لبنان
    التركيبة مش ماشية يابو شنب
    عتريس واكل دماغك باين عليه

    تمر حنة
    من جنب النيل أنا كمان رديت عليه ومتفق مع ردك مية في المية
    بيردد كلام سمعناه من صناع القرار كتير مش من مصلحة مصر دلوقتي اننا نجر في مثل هذه الامور
    يعني هو أنا بقولك حارب فيه اسلحة كتيرة نقدر نبرزها
    ولا إحنا كمان محتلين نفسيا
    اما عن ردك على كلمة حسن نصر الله فطبعا ماقدرش انسى تعقيبك عليه يمكن انتي الوحيدة اللي ساعتها علقتي عليه ويمكن تعليقك ده اللي فكرني بالبوست كمان

    جوجا
    هو ده اللي بقوله بالظبط هما مايعرفوش غير لغة القوة
    ضعيفة وبتتكلمي حلو ولا حد هايسمعلك لا إسرائيل ولا أي دولة في العالم

    من جنب النيل
    الامور مابتتحسبش كده هما موتوا كام وإحنا موتنالهم كام
    ممكن تاثير واحد عليهم بميت واحد من عندنا وده برده عشان عندهم الانسان وحياته عالية جدا
    ماهو حتى لو اسرائيل حسبتها بالعقل كده زيك ماكنتش عملت اللي عملته شوف كام واحد مات من عندهم مقابل 2 محبوسين أسيرين وماحدش بيتكلم عن اللي مات والاقتصاد الاسرائيلي اللي بيتأثر كل يوم بطول الحرف والتكلفة العالية لان رؤيتهم هو إثبات الذات ووضع خطوط حمراء ونقاط فاصلة لايمكن تعديها
    جنب النيل مش عارف حساباتك محتاجة فلترة مرة تانية ومتبقاش تشوف برامج قطاع الاخبار في إتحاد الإذاعة والتلفزيزن المصري لانك بتتكلم زيهم بالظبط

    دكترة
    إحنا دعينا وإحتسبنا وإرتجعنا فاضل بأه نعمل حاجة عشان ربنا يتقبل


    سامية
    مشرفانا والله وده نادر جدا وجودك عندنا
    اما عن المدنيين والمعدنيين وكلام من نوعية إتخاذنا لسلام ك خيار استراتيجي واضح إن الخيار ده إحنا ماخدناهوش بس ده إحنا لبسناه كمان

    ReplyDelete