Monday, July 24, 2006

يوم في الغربة


Jeddah



الثامنة والنصف صباحا
أخرج من مصعد العمارة أقابل بكير حارس العمارة الإندونيسي الشاب ببسمته المعهودة
جود مورنينج سير
جود مورنينج بكير ، كيفك ؟ جوود ؟
طيب سير ، سير أنا فيه أقول مافي ُحرمة ييجي ؟
أقول في نفسي لو سمعتك بتقول ُحرمة عمرها ماهاتيجي

في العربية
سعودي بسيارته يقترب مني ويحرك يده بمامعناه أفتح الزجاج
كيف الأحوال يالحبيب ؟ عساك طيب
أنا ؟ أنا آه طيب ، أقصد الحمد لله
وين شارع المكرونة ؟
أصف له الشارع وأعيد النظر له فلقد لفت إنتباهي شيئ ، أكتشف أنه يضع قدمه اليسرى على التابلوه من دون حذاء بجوار فتحة التكيف ، أكيد بيبرد جسمه

الساعة الثانية ظهرا يدخل جورج زميلي اللبناني
سيد أحمد وين بدك تتغدي اليوم ؟
إبن حلال أنا جعان ، إيه رأيك النهاردة ناكل أكل صيني ؟
أوكي شو رأيك في الفوود كورت بالصيرفي موول
ماشي

في العربية مع جورج يتصل بزوجته ببيروت
كيفكم شو الأخبار اليوم
.......
ماشي الحال ، مافي قصف بجوار البناية
.......
مافيكي تنزلي ....... ديروا بالكم على حالكم

في الفوود كورت ، يقترب فرد الأمن
يالغالي هنا ممنوع الجلوس ، ممكن تجلسوا في هذا المحل
ليه ؟
هذا خاص بالعائلات ، وإنتم عزاب
بس أنا متجوز
جورج : خلاص ياأحمد مافينا نجلس هون ، تعال نجلس هونيك
هونيك .. هونيك ، هانعمل إيه يعني
هناك
تعرف ياجورج الأكل الصيني ده جميل أوي
آه .. منيح

في الرجوع للعمل وعلى كوبري التحلية يوني بول إعلان كبير مكتوب عليه نورت مصر
أنظر إلى مؤشر درجة الحرارة بالشارع الحرارة تلاتة وأربعين ، إذاعة بانورما إف إم بالراديو وإعلان عن السياحة يقول إستمتعوا بصيف السعودية
أذهب لمحطة البنزين يقابلني عامل أسيوي : خلاص مافي داحين ، َسّكر صلاة

تأتيني ماسدج من مراتي ، شفت ولادك ناموا إمبارح الساعة تلاتة ونص كانوا بيتفرجوا على فيلم وإسلاماه وكانوا مبسوطين جدا
أرد عليها واقول لها : جهاد .. إنتي فين ياجهاد

قبل نهاية العمل ، زميلي شريف المصري
هاتعمل إيه بالليل ؟
مش عارف
خلاص تعال نروح الكوفي شوب
أوكي الساعة عشرة بس أنا ماليش في البلياردو
إبقى هات اللاب توب معاك فيه هناك واي فاي

أتصفح جريدة الحياة
يلفت نظري
تحقيق عن المدونين والبلوجرز اللبنانين وتأثير المدونات أثناء الحرب
صفحة أخرى كاملة إعلان يقول قبيلة قريش تجدد البيعة وترحب بالملك في الطائف

في الطريق للمنزل أقرر الذهاب ل جيان هايبر ماركت للشراء ، أرى إعلانا بالطريق يقول
تشرب ماتشرب .. عنك ماشربت ... الحكاية حكاية مزااااج
أتعجب ممن أعلن عن مشروب يسمى مزاج بهذه الطريقة اللبقة

في جيان ماركت ، في ركن الكتب والمجلات أجد كتاب شفرة دافينشي بسعر ثلاثين ريال وجميع أعمال دان براون
أتذكر فاروق حسني وأعضاء المجلس الموقرين ، ربنا يحميهم

في المنزل أفتح النت على مدونتي نضارة شمس لأفاجأ بأقصر تعليق على القصة الاخيرة المرآه من دكترة ، التعليق عبارة عن نقطة فلوستوب

الساعة التاسعة والنص مع شريف على التليفون
شريف كانسل معاد الليلة
ليه
عندي مغص جامد وبطني مقلوبة ع الآخر
ليه إنت إتغديت إيه ؟


42 comments:

  1. هلا يالغالى كيفك
    انت لسه جديد فى الحواديت دى انا بقالى 3 سنين فى الخبر , تقريبا نفس اللى بتقوله ده نفس السيناريو بتاع كل يوم
    انا فهمت انك فى جده و جايز اروح جده قريب و احاول اتعرف بيك
    بالتوفيق و حكايه العوائل و العزاب دى فى الرياض مميته ده انت هناك فى جده متدلع زينا فى الخبر لكن اسأل اى حد فى الرياض هع
    سلام

    ReplyDelete
  2. بجد.. بجد.. لأ.. وكمان بجد تحفة

    قدرت تصور بالظبط يوم من هناك.. فكرتني بالآسيويين اللطاف اللي مايقلّوش في غلبهم عن المصري البسيط.. "إنتَ فيه كلام، أنا فيه معلوم"...يااااه
    وكمان طريقة السعوديين في مخاطبة الغريب؛ يالغالي، ويالحبيب وحاجات كده

    بس تاني مرة مش تبقى تاكل أكل صيني.. ممكن فخاري أو بيركس.. وربما أركوبال
    هيكون أحسن

    ReplyDelete
  3. haha:))
    i hope that you like it there.
    do you know that i downloaded dafinsih code min il link that you posted and read it all of it in like two days?:)
    my first ever experience in reading a whole book on a monitor.
    anyways, take care of yourself and have fun,
    btw what do people say about all this going in Lebanon? the general impressions and feelings of regular Saudis?

    ReplyDelete
  4. مش لو كنت في مصر دلوقتي كانت مراتك عملتلك نعناع
    ادي اخرة الغربة
    ربنا يهونها عليك
    و ترجع بالسلامة

    ReplyDelete
  5. ألف سلامه عليك
    ماله الأكل العربي لازم يعني تجرب الصيني والفخار والحاجات دي
    ما كنت روحت وكلت في بيتك أحسن
    علي العموم بوست حلو كأنك وديتني جده وقضيت اليوم هناك
    ربنا يرجعك بالسلامه لبلدك مهما كان أفضل من الغربه
    ولو اني حاسه اننا كلنا هنهج منها قريب
    ربنا يستر

    ReplyDelete
  6. الف سلامة من المغص اكيد من الاكل الصينى
    انا مرة كلت من المطعم الماليزى بتاع الحى السابع بعيد عنك ما شفتش اى حاجة وما حستش غير انى حاسس انى شربت مخدرات
    الاكل الاسيوى ده غريب

    الف سلامة

    ReplyDelete
  7. يا عيني والله فكرتني ببابا متعذب هناك كده بيتعامل معاملة العزاب بس هو اتعود خلاص ع السعودين بالنسبة لرجل الراجل جنب المكيف اما بالنسبة للاكل الحمد لله بياكل حجات غريبة واخر ما زهق بياكل بيض وحلاوة بس هو عندنا دلوقتي عاملينله كورس مكثف اكل مصري من اللي الناس كلها بتحبه عقبالك :)

    ReplyDelete
  8. بلاش الاكل الصينى يابشمهندس فماهو محظور عليك هو عندهم شىء فاتح للشهية وذلك من قبيل العقارب والفيران وهى كلمة عامية مفردها فأر ويقال عنة جرذ وجمعها جرذان
    ناهيك عن الصرصار المشوى
    هذا والله اعلم

    ReplyDelete
  9. بلاش الاكل الصينى يابشمهندس فماهو محظور عليك هو عندهم شىء فاتح للشهية وذلك من قبيل العقارب والفيران وهى كلمة عامية مفردها فأر ويقال عنة جرذ وجمعها جرذان
    ناهيك عن الصرصار المشوى
    هذا والله اعلم

    ReplyDelete
  10. سورى على الكومنت الانيمونس
    بس دة خطأفى الدخول تم تداركة لاننى عادة لا ادخل انيمونس

    ReplyDelete
  11. بلا ش موضوع الأحذية ده علشان ما توترش العلاقات الأخويه ههههههههه

    إعلان يقول قبيلة قريش تجدد البيعة وترحب بالملك في الطائف

    ده أكيد اللى كاتبه أبو لهب

    ReplyDelete
  12. أيس هدا كلام .. أنت في معلوم تاني نفر كلام
    أنا مافي جرجر كتير صديق لكن أنا سوي عمرة سوي دعا

    ReplyDelete
  13. ولا يهمك سمدله على الحلامه

    ReplyDelete
  14. انت في جده..؟
    :)

    أنا كنت ساكن في المكرونة ده عند واحد مكاوي وبعدين نقلنا قرب شارع الستين.

    بس كانت أيام صعبة :(

    ReplyDelete
  15. جعلها الله ايام سعادة وعبادة من غير ميادة (لازم علشان القافية) وانت نازل مصر تشترى سجادة

    بس حلوة اوى حكاية التكييف دى

    ReplyDelete
  16. ما أعرف كم صار لك في جدة..
    بس مدينة جميلة..
    بكل ما فيها..
    حتى باللي حاطط رجله على فتحة التكييف :)

    الله يهوّن عليك الغربة وترجه لأهلك سالم غانم :)

    ReplyDelete
  17. Davinchie Code..w ba2y a3mal Dan Brown..bi 250 LE hena..ayam el sale beta3 ma3rad el ketab kaman!
    الحق اشتريهم بقي

    :)

    وبعدين ليه اكل صيني
    ليه كدة بس

    صحيح لسة بيعملوا التميس؟
    :)) تقريبا كان اسمه كدة

    ربنا معاك
    ويقرب البعيد
    كلوا عشان الولاد

    ReplyDelete
  18. ماكملتش لما قعدت مع جورج اللبنانى كان فى اية بالظبط
    استفهام بس مش اكتر
    وممكن تسألنا جورج عكس هونيك
    اكيد اكيد ما تقولش هوناك

    ReplyDelete
  19. هههههههه
    ربنا يقويك

    وادعيلي اسافر انا كمان

    الا قولي هو السفر حلو ؟


    تحياتي
    ادم المصري
    اول دكتور احه

    ReplyDelete
  20. كويس أن حارس البناية قال لك الحرمة مايجي ، بدل وين المرة
    وبعدين اخونا السعودي موش بيهوي رجلةولاحاجة كل أخوانا في دول الخليج بيسوقوا سيارات أتوماتيك لذلك بيستعملوا رجل واحدة للبنزين والفرامل وبيلغوا التانية علشان كدة بيرفعوها علي التابلوة

    انت لسة مابتعرف اللهجة اللبنانية منيح
    تقصد انة قالك أنا جوعان مو جعان
    وأتصل بمراتة وقال لها كيفكن موشكيفكم
    مافي قسف حدكان؟
    دخيلك ماتنزلي ديروا بالكن ععا حالكن

    واية موش اة منيح


    وتقبرني يأحمد
    ياخرب بيتك مهضوم كتير

    ReplyDelete
  21. و الله الواحد ما يدري البقاء في بلده احسن ام تحمّل الغربة ؟
    الاختيارين غير مريحين



    سلامتك ..و دير بالك من الاكل العجيب
    :)

    ReplyDelete
  22. اللي هناك نفسه يبقي هنا و اللي هنا نفسه يبقي هناك
    ابقي جرب مطعم الفيروز اكله نضيف و حلو
    قرأت ميت مدونة لم تخلوا واحدة مما يدور في لبنان
    اكيد بطنك وجعتك لما شوفت النشرة
    خالص تحياتي
    ----
    شرفونا للاشتراك في حملة اغراق اسرائيل في بحر من التفافة
    تفتك ممكن يكون لها تأثير

    ReplyDelete
  23. مرّات اتمنى اجرب احساس الغربة

    :)

    ReplyDelete
  24. اولا الف الف سلامة عليك
    ثانيا انا اعتقدت ان الفلوستوب ده هيوصل كل حاجة انا عايز اقولها
    ثالثا التعليق الكامل علي القصة اكيد جاي في الطريق بس متأخر شوية

    ReplyDelete
  25. feinak ya 3amna..wala betzorna wala benshofak..eb2a t3ala eshrab el shai m3ana!!

    ReplyDelete
  26. ده الأكل الصيني مش كدة برده :)
    شد حيلك في الغربة .. غربة برة احسن من سجن مصر

    ReplyDelete
  27. اكيد احياي حلو انك تتعامل مع ناس متعرفهمش و من بلاد متعرفهاش بس اللي وحش الغربه

    ReplyDelete
  28. انت استحليت القعدة مع جورج ولا اية؟

    ReplyDelete
  29. الظاهر القعدة هناك عجبتك ونسيتنا
    تيجي بالسلامة ان شاء الله ... في انتظارك ياريس

    ReplyDelete
  30. الغربه كربه بس انته بحدودتك دي خليت الالم اللي عندك يبئه أمل ليك وللي بيئرا كلامك

    ReplyDelete
  31. احيانا بتكون الغربه داخل حدود الوطن افظع وابشع .. ربنا يهون ايامها

    تحياتى

    ReplyDelete
  32. :) betgheeb betrou7 fein bas! ya rab 7adretek a7san delwa2ty..wel mazag 3al el 3al...! w 3ala 7adretak tag..ya 3amna..3ayzeen neshouf gedeedak..! ya rab yekon el mane3 insha Allah 7'eir!

    ReplyDelete
  33. كيفك صديق

    كيف بطشا مال انتا

    انتا ما يركب اكل صيني

    انتا فيه اكل مال مصر

    واجد زين

    وما فيه سمان

    ReplyDelete
  34. whats up ahmad? nice ya man ... lol

    ReplyDelete
  35. خد نعناع

    هههههههههههههه
    لك وحشة

    ReplyDelete
  36. العزيزة حلم أرسلت لي تاج وأنا بدوري عملت لك تاج وحابب أني أشوف ردك علي الأسئلة ولك تحياتي

    ReplyDelete
  37. الغربه للرجاله اناعامله زي بنت بطوطه من الكويت للاردن لمصر للاردن لمصر ياعالم على فين بعد كده على فكره غيرت اللوجو ليه الاول كان احلى سلامتك

    ReplyDelete
  38. ياا عمو انا بعت لحضرتك التاج ممكن تعمله ف انتظاره

    ReplyDelete
  39. Anonymous
    هلا والله ، بقالك في الخُبر 3 سنين ده إنت مُعمر على كده ، سمعت برده إن في الرياض حكاية الفصل بين العائلات أو العوايل بلغتهم والعزاب فعلا أكتر
    اهلا بيك في جدة ، هاقف في المطار استناك ورافع ورقة مكتوب عليها أنينوموس

    دعاء سمير
    واضح انك خبرة محترمة في الخليج ، بس حرام عليكي عايزاني آكل بخاري وكبسة صعبة اوي بصراحة ، فيه مطعم اندونيسي ناوي اجربه بكره ، إتفضلي معانا

    khalid jarrar
    والله فرحتني ياخالد إن الدون لوود نفع وفيه ناس قريتها من على الكومبيوتر
    أما بالنسبة للبنانيين هنا فطبعا متاثرين بس مش للدرجة المتوقعة أنا كنت متابع اكتر منهم والصبح أقولهم آخر الأخبار

    taty
    هانعمل إيه باه ياتاتي ، المدام مش موجودة وإن كان على النعناع أعمله أنا، فيه حاجات تاني اهم محتاجين المدام فيها

    GoGa
    بصراحة الاكل العربي برده صعب إذا كنتي تقصدي الخليجي الشعبي او اليمني
    فيه حنيذ ، مثلوثة ، مندي ، مطبق
    بذمتك آكل إيه منهم

    m_elsewedy
    طيب في حد في مصر برده يروح ياكل اكل ماليزي ، طيب هنا ومضطرين إنما تعملها كده من غير سبب
    عموما انا عرفت غن فيه مطعم فيه اكل تركماني او تركمنستاني بيقولك اللي ياكله مش هايرجع تاني

    Nouran
    حمدالله على سلامة بابا ، في الآخر بياكل بيض وحلاوة .. ده يبقى سجن بجد بأه
    امانة إتوصوا بيه في الأكل في أجازته
    ويجعله عامر

    asadma7bos
    حمد الله على سلامتك بعد الغيبة ، بمناسبة الحاجات الغريبة في اكل الأسيوين أكلت مش هاتصدق مانجة مخللة والله

    شادي
    لأ السعوديين حبايبي ماتقلقش ، اما الغعلان فوالله شفته زي ماكتبته بالظبط من غير اي تحريف عشان كده لفت نظري

    زبادي
    اهلا بالزُمل معايا في جدة
    إنت ليه فيه جرجر واجد صديج ، أنا مافي معلوم إيش اسوي

    Anonymous
    سمدالله على الحلامة ؟
    هاها .. يرحمكم الله

    عبده باشا
    ده إنت مغترب قديم بأه ، بس مانقلتش بعيد المكرونة بعد الستين على طول، طيب كنت رحت الأربعين

    Taher
    اشتريت السجادة من دلوقتي ياطاهر
    المهم ننزل زيارة

    Jeddah Cutie
    طبعا جدة جميلة بالنسبة لبقية مدن السعودية والواحد إبتدى يتكيف مع المكان والناس

    إبيتاف
    أيوه بيعملوا التميس انا كنت فاكره فول الاول عشان بيكون عند بتاع الفول الافغاني بس طلع بعد كده عيش أو خبز بلغتهم بس إيه عبال ماتوصلي البيت يكون حطب
    ميرسي على كلامك الحلو

    adhm
    جورج ده حكاية دمه زي العسل ، اما عكس هونيك مش هوناك زي مابتقول لان هونيك دي معناها هناك وعكسها كلمة هنا بيقولوها هون

    سابرينا
    قعدت فكرت في جملتك ماأجمل الغربة والتفكير ده خدني في الىخر لواحد شيشة سلوم عشان أقدر افهم
    تحياتي ياعسولة على قكرة أغنية كدبك حلو كتبت ليكي كلماتها واللينك بتاعها عند أعز الناس

    مكسوفة
    باه المدام ربنا يحرسها والحارس قال عليها حُرمة وقلنا ماشي لكن مَرة دي بيقى هاخد بعضي وانزل احسن
    واضح إنك خبرة في اللغات ده انا قعدت عشر دقايق افتكر الكلام اللي قاله قاله إزاي باللبناني
    عموما هانرجعلك في أي امور خاصة بالترجمة للغات المحلية وأبيتاف طبعا في الإنجليزي
    أجازة سعيدة في مصر إنشاء الله

    تارا
    سؤالك صعب لكن الحياة ماشية سواء في بلد الواحد او في الغربة
    بس برده الغربة مش وحشة هنا بصراحة
    الغربة الأصعب للواحد جوه وطنه والأصعب وأصعب غربته بينه وبين نفسه
    أما الغربة دي فنعمة بالغربات التانية

    كلبوزة لكن سمباتيك
    واضح انك مغتربة قديمة فعلا مطعم الفيروز سألت عنه قاله جميل فعلا واكله على تركي شوية يعني قريب من المطبخ بتاعنا
    تسلميلي على النصيحة بس ياترى هايخلي الواحد كلبوظ

    نون النسا
    نفسك تجربي احساس الغربة ؟
    مابلاش احسن وربنا يخليلنا الكويت جربي السياحة سفر أحسن وبلاش غربة
    تحياتي

    النوبي
    هما عملوا أسوان جمهورية خلاص
    ده انا سايب مصر بقالي كام شهر أمال لو كام سنة إيه اللي هايحصل
    مبروك عليك الرئاسة ودي كانت انتخابات ولا إستفتاء ؟

    دكترة
    بصراحة الفلوستوب ده جنني وقلت مابدهاش هاكتب عنه
    تحياتي لكل الاسماعيلية

    إبيتاف
    والله انتي عسل وشكرا على السؤال
    كله الحمد لله تمام الحين

    هيثم
    المستخبي دايما وحشتنا ياهندسة
    شكلها كده كانت من الاكل فعلا

    رشا
    فعلا التعامل مع جنسيات كتيرة مفيد جدا لافق الواحد احنا في مصر ماعندناش التنوع ده بالكثافة دي

    أدهم
    استحليت القعدة مع جورج إزاي ده جورج عيان بقاله اسبوع والله ، وفي بطنه كمان اصله لسه مغترب حديث زيي

    change destiny
    انا جيت اهوه وكتبت بوست جديد كمان

    451 فهرنهايت
    انا اقدر انساك برده بس انت عارف هنا الواحد مسئول عن نفسه عشان كده بيكون مشغول شوية

    بعدك على بالى
    كلامك صح أحيانا زي مابتقولي ، بس عشان الواحد مايكونش جاحد العملية مش صعبة اوي على فكرة انا كنت فاكر انها هاتكون اصعب من كده لكن كله بيهون

    سالفة قلب
    ربنا يخليكي على كلامك ده اللي يرفع الروح المعنوية ميرسي غلى تشريفك لينا هنا في مدونتنا المتواضعة

    Maxxed`ouT
    :(
    انت بتضحك

    ابيتاف
    خلاص بقينا تمام والحمد لله
    تقدري تقوليلنا باه انتي اللي مختفية فين مش عوايدك خالص خالص
    ربنا يطمنا عليكي

    sydalany-وش مكرمش
    ياااه والله ليك واحشة من زمان ياراجل
    انا الحمد لله كله تمام
    جايلك يامعلم

    أبو شنب
    واضح أنك اتعودت بسرعة على البلد عندك في قطر ، وبقيت لهلوبة في العربي الهندي

    إبن مصر
    ياراجل فينك فيه حد برده يختفي ست شهور
    كفارة يامعلم
    عايزين نشوفك قريب دخلت عندك مالقيتش جديد لسه حواس اللي موجود

    زبادي
    شكرا على انك افتكرتني ايوه كده ياراجل
    عموما انا حليت الواجب فوق

    أم العيال
    ربنا معاكي واله في سفرياتك الكتيرة دي
    اول مرة اعرف أنك بتسافري كتير كده
    اللوجو بس لزوم الحالة العامة وانشاء الله نشيله قريب
    اصله شغلانة

    نوران
    ميرسي على التاج ياجميل وأنا عملته على الله يعجبك


    تحياتي للجميع

    ReplyDelete