Monday, September 19, 2005



يامثبت العقل والدين - حوار عائلى جدا


الزوج : أنا هاطلب بيتزا .. عايزه حاجه ؟
الزوجه : لأ
الزوج : أوكيه
الزوجه : ولا أقوللك ...؟
الزوج : إيه .. أطلبلك معايا ..؟
الزوجه : مش عارفه
الزوج : مش عارفه إذا كنتى عايزه ولا لأ ؟
الزوجه : لأ
الزوج : إنتى جعانه ؟
الزوجه : يعنى
الزوج : يعنى إيه يعنى ..!!؟
الزوجه : يعنى معناها مش متأكده إذا كنت جعانه ولا لأ
الزوج : الواحد لما بيكون جعان بيعرف
الزوجه : أصل ممكن أجوع بعدين
الزوج : معنى كده إنى أطلبلك بيتزا معايا ..؟
الزوجه : طيب وإذا ماكنتش جعانه ساعتها !!!؟
الزوج : خلاص ماتاكليش
الزوجه : بس كده بيكون تبذير
الزوج : ممكن تاكليها بكرة
الزوجه : وإذا ماجليش نفس بكرة ..!؟
الزوج : دى حاجه مش محتاجه نفس .. البيتزا ممكن ناكلها كل يوم
الزوجه : أنا لأ .. انا ماكلش بيتزا إلا لما يكون عندى نفس
الزوج : يعنى أطلبلك حاجه تانيه .!؟
الزوجه : بس أنا مش عايزه حاجه تانيه
الزوج : يعنى عايزه بيتزا ..؟
الزوجه : إطلب ليك إنت
الزوج : أخيرا
الزوجه : بس إطلب بيتزا بالتونه
الزوج : بس أنا مابحبش التونه
الزوجه : بس أنا باحبها
الزوج : هو أنا هاطلبها ليا ولا ليكى ..!!؟؟
الزوجه : ليك طبعا
الزوج : طيب أطلب إللى أنا عايزه .. ليه بالتونه بأه .؟
الزوجه : يمكن أجوع لما يوصل الأكل
الزوج : وإيه يعنى !؟
الزوجه : يعنى تفتكر إنى أكل حاجه مابحبهاش
الزوج : ليه هو إنت عايزه تاكلى ؟
الزوجه : وليه لأ
الزوج : يعنى أنا أطلب لى بيتزا .. عشان تاكليها إنتى لو كنتى جعانه ؟
الزوجه : أيوه
الزوج : طيب وأنا أكل إيه ؟
الزوجه : أصل أنا يمكن ماكنش جعانه
الزوج : ...........؟

19 comments:

  1. النساء نساء في النهايه
    مثلها مثل الزنبرك !!
    :)

    تحياتي

    ReplyDelete
  2. عارف يا احمد لو انا كنت الزوج ده كنت ادورت ورقتعها حته دين كف
    :) :) :)~
    بهههههههزر والله والعظيم

    ReplyDelete
  3. ايوة و لأه
    و لأه و ايوة
    خمسين ستين رأى فى هفوه
    شكلها بره غير من جوّه
    جسمها يلبس ,, يدفع هوّ
    بقها ياكل ,, يطلب هوّ
    لأ و الأخر تبقى ضحية
    و هو ماعندوش أى مروّه
    عجبى على الستات و جنانهم
    المجانين بقوا بالنسبه لهم
    عاقلين و أعقل من ميت حوا
    KING TOOOT

    ReplyDelete
  4. تصدق ،أنا هكذا
    لما يصير وقت الوجبة لا اعرف اذا كنت جوعانة او لا

    بس اهلي تعودوا انهم يطلبوا لي اكل معهم
    و يقولواذا ما اكلتيها اليوم تاكليها بكرة

    يعني اقتراحي هنا
    انك تطلب لها معك اي شي مهما قالت
    و تريح مخك و تريحها

    ReplyDelete
  5. افففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففففف

    أحنا فى نعمه يا راجل اللهم دومها علينا نعمه يا رب

    ReplyDelete
  6. دي شكلها كده جوزاء...بس عادي يعني...بتحصل :))

    ReplyDelete
  7. هذا الحوار يصير كل مرة بيني وبين زوجي لووووول
    واخر شي انا اللي اكل الاكل وهو يطلب شي ثاني

    ReplyDelete
  8. إيده إيده ما ينفعش كده خالص
    دا كله تهزيق عالستات و كمان دخلتو الجوزاء في الموضوع ؟!!
    دا افترااااء

    عادي عادي يا شوكير
    المسألة كلها انها شكلها بتقرا كتير في الفلسفة اليومين دول من وراك
    :)

    ReplyDelete
  9. ظني يا أستاذ شقير (عذراً على الخطأ الكتابي لإسمك مرات عديدة) انها عاملة ريجيم، أو ضميرها مش مطاوعها تاكل بيتزايه كاملة.... فبتنكر انها جعانه....لكن هي نفسها ف البيتزا، فتقوم تقول لنفسها انها هتنقنق معاك بس ف اللي هتطلبه، لتخفيف الخطيئة

    أصل أنا ساعات بعمل كده

    ReplyDelete
  10. هما الجوزاء يعملوا كدة ؟

    انا كنت حأقول انها ميزان
    لان اصحابه يبقوا يتمرجحوا مع كفتي الميزان دون ان يستقروا على رأي ابدا

    قول لنا البرج يااستاذ شقير من فضلك

    ReplyDelete
  11. الجوزاء ممكن يعملوا كده عشان مودي اوي...و كل ثانيتين برأي.

    ReplyDelete
  12. الله .. الله .. الله واضح إن الزوجه دى مش حاله شاذه بأه ده باين كل الستات كده على رأى مو الصغير
    slim Thug
    هاها زنبرك :)
    sonofegypt
    حاسس بيك وهو ده الشعور اللى كان مقصود من البوست
    King Tout
    كالعاده رد بيكون أقوى من البوست ..إنت خسارة فينا والله
    Tara
    صريحه جدا ، فعلا هوه ده اللى حصل
    Shady
    نعمه وأى نعمه ، بس برده الجواز فيه حاجات تانيه حلوة .. دى فى سرك
    Nerro
    حوت يانيرو
    Chatterbox
    بمنتهى الهدوء .. بتعمل كده دايما
    Mindonna
    وحد يقدر يتكلم عليهم . ده هما الخير والبركه
    Ghada
    بالظبط .. تحليلك هو أكثر شيئ منطقى .. نفسها تاكل وقلبها مش مطاوعها عشان الريجيم وحساب النفس
    شكير / شقير / شوكير كله ماشى
    Tara
    طلعت حوت .. بس أنا مابهمش فى الأبراج
    Mindonna
    شكللك كده جوزاء وكل ثانيتين برأى وأبسط دليل على كده كل 5 دقايق تلعبى فى القالب بتاع البلوج بتاعك لغايه ماإختفى

    ReplyDelete
  13. طلئها يابني بلاااش وجع دماااغ

    ReplyDelete
  14. ايووه انا جوزااء يا شوكيير اي خدمة

    اه هو بيقولو الجوزاء عنده ازدواجية في الشخصية و كداب و بتاع تلات ورقات و متقلب و خاين

    يعني ملقتش فيه أيها ميزة

    و لا أنا كمان عندي ميزة الصراحة :)

    ReplyDelete
  15. بالرغم من كوني أنثى
    إلا إني باكره النوعية دي من النساء كره العمى
    ربنا يكون في عون الزوج فعلا

    ReplyDelete
  16. اخذه للبيت واكله انعل ابوه الي يوديج بعد للمطعم وارجع اني اكل البيتز بالتونه

    ReplyDelete