Monday, June 19, 2006


الشيخ صالح بيقول


عندما أعلنت قناة دريم عن برنامج في الممنوع مع الشيخ صالح كامل مش عارف ليه حاسيت إني هالاقي البرنامج مشفر، المهم في البرنامج الشيخ صالح كامل كان بيقول كلام غريب جدا بيخلي الواحد مش فاهم حاجة

الشيخ صالح بيقول

حقوق البث للعالم كان لشركة أنا مساهم فيها بنسبة عشرين في المائة قيمتها تلات آلاف مليون وكانت حصة مصر لإذاعة الماتشات تمنتاشر مليون يورو يعني مائة وستة وعشرون مليون جنيه

فيه عشرة مليون حرامي في مصر ولبنان من المقابر للأحياء الراقية بيتفرجوا بإسلوب غير شرعي

أنا قلت لمحمود سعد في البيت بيتك خليهم يبطلوا سرقة وأنا أرخص السعر

البورصة نظام طفيلي كان الغرض من تسييل أموال ، فيه شركة سعودية قيمتها كلهاخمسين مليون ريال وصل قيمتها في البورصة خمسة آلاف مليون وسبب كده الناس المغفلين

قارن نسبة الشيوخ اللي بيطلعوا من مصر بالنسبة للشيوخ السعوديين وإنت تعرف توجه قناة إقرأ

أنا فتحت قنواتي للفنانات المحجبات ولا أدري لماذا تمنع القنوات الأخرى ظهور المذيعات المحجبات

انا أكره كلمة إحتكار – ردا على سؤال مجدي مهنا ليه قناة إقرا بتحتكر عمرو خالد

أنا قدمت تليفزيون الواقع خمسة أيام في موسم الحج بدلا من السلوكيات الغير جيدة التي تتم على تلفزيون الواقع لبعض القنوات – مش برده قناة
ع الهوا سوا بتاعت الإي أر تي هي أول من أذاع تلك السلوكيات

يظل الاعلام المصري هو القوي والمسيطر – مجدي مهنا حقنة قاطعه وقاله مسيطر على إيه؟

لا أعتقد أن هناك من يبيع دنيته بآخرته .- مجدي مهنا مافوتهاش قاله لأ فيه كتير

بتحب النادي إدفعله أنا قلبي ع النادي – ردا علي تشفير مباريات الدوري المصري

ياناس إدفعوا

عمري ماحسبت أموالي من كترها ومن عدم إهتمامي بها


------- حد فاهم حاجة -------


عموما انا باكتب البوست ده وأنا باتفرج على ماتش السعودية وأوكرانيا في البيت بالألماني على قناة إس إف تو ، بس مش عارف ده شرعي ولا حرام ، ربنا يكرمك ياشيخ إتفرجنا على ماتش السعودية بالألماني


37 comments:

  1. هو صحيح الكورة مش المفروض انها تكون شيء اساسي في حياة الناس لكن لما تكون واحدة من وسائل الترفيه القليله للغلابه واللي بيطلعوا فيها غلهم وغلبهم من اللي هما شايفينه متهيالي تبقى حاجه مهمه قوي و يبقى اللي بيعمله الشيخ "طالح" ده حرام بكل المقاييس لان الرسول عليه الصلاة و السلام لعن المحتكر لحاجة الناس (لحاجة الناس ) مش بس الاكل والشرب اللي احتكارهم حرام....و بعدين اللي جاي يتكلم عن الحرام والحلال و يعمل اقرا و يجيب عمرو خالد يوجع في قلبه طول النهار يبقى يلم مراته و يصونها في بيتها احسن له في الدنيا و الاخرة

    بس عموما هيا مش فارقه مع المصريين ..خليه يشفر زي ما هو عايز ...و احنا هنتصرف زي ماحنا عارفين

    ReplyDelete
  2. طب اضحك بقة معايا

    انا كنت في النادي مع صديقة لي و كانوا جايبين الماتش بتاع السعودية و اوكرانيا

    احنا كنا سامعين الناس تصفق و تهلل كل شوية فأقول لصديقتي ان اوكرانيا دخلت جون. تقولي يا شيخة مش معقول حيشجعوا اوكرانيا و السعودية لا. قولتلها الشيخ صالح جعلهم يشجعوا الغريب

    خرجنا علي اخر الماتش كدة عدينا علي شاشة العرض لقينا ما حسبته وانت عارف بقة نتيجة الماتش
    3 -0 اوكرانيا

    بس الشعب بتاعنا ناصح عملوا العجب عشان الفرجة و مقاطعة الشيخ صالح

    اما بالنسبة لحديثه الشيق
    دي وصفة سهلة!!

    يا عم اتفرج بالفيومي حتة بس بال ART NO! :D

    ReplyDelete
  3. نادى؟
    قولوا نوادى
    تقريبا كل نوادى مصر فيها بدل الشاشة سبعة.. ولقناة الــ
    art
    عااادى
    وحتى اللى معندوش الديش يحوله على قناة تركيا.. اصحابى جابوا برنامج يتفرجوا ع الماتشات من على الانترنت على قناة الصين.. والتعليق بصوت ميمى الشربينى من الشباب والرياضة
    ولو فرضا فرضا الماتش ماعرفوش يجبوه اون لاين.. بينزلوه من على اى موقع
    torrents

    وبس
    يعنى نظام ح تدفعوا دا مش على المصريين

    ولو شايف ان اللى بياخد وصله من عنده من غير ما يدفع سرقة.. يبقى لا موأخذة اللى بيحتكر يبقى اسمه ايه؟؟

    فى امريكا والدول والمتقدمة حاكموا
    microsoft
    ع الاحتكار وهو ماحدش فهم هو بيقول ايه فى التلفزيون

    حاجة تفرس بصحيح

    ReplyDelete
  4. الشيخ صالح فاتح قناة اقرأ
    علشان يكفر عن سيئاتة فى قناة روتانا
    الشيخ صالح بيشترى وبيحتكر البطولات العالمية
    علشان يكفر سيئاتنا
    الشيخ صالح اتجوز صفاء ابو السعود علشان ما عرفش يتجوز سهير رمزى
    اللهم اهلك الظالمين بالظالمين

    ReplyDelete
  5. عمري ماحسبت أموالي من كترها ومن عدم إهتمامي بها

    الهي ربنا يفرس اللي فارسنا
    حسبي الله و نعم الوكيل
    حسبي الله و نعم الوكيل
    حسبي الله و نعم الوكيل

    ReplyDelete
  6. استنى و النبى يا أحمد لحسن انا جايه من بره بجرى عشان الحق أعملك كومنت فى رنات و لوجوهات ( آسفه عالتأخير) ا
    سمعتلك شوية عيال واقفة قدام سينما و تصدق الرنه بتاعت واحد منهم كانت ايه؟ واحد بصوت اذاعى رخيم بيقول : أنتبه أبوك بيتصل - أوعى ترد - هتتفشخ !!!!!ا
    البوست الجاى بتاعى ان شاءالله هيبقى فى ذالوكا الموضوع و هيعجبكوا أوى
    مقلتليش يا أحمد رأيك فيا و أنا بفن و بقول شعر زى المثقفين و المدونين القدامى و النبى طل طله عندى كده

    أما بالنسبة لعمك الشيخ صالح فأنا و للحق مافهمتش حاجة و ماليش نفس أفهم - الحكاية فيها ملايين كتير و بورصة و كورة و أنا بعيدة تماما عن الحاجات الأيّا كاسكيليا دى بس نقول اللى لينا و اللى علينا : الشيخ أبو الصلح بروح أمو يتقطع لسانو لو قال ان مصر فيها حراميه - و هو مالو يشتم في أهالينا ليه؟؟؟ لما البلد فيها حراميةو مش لادين على كيفو يروح يسوق لبضاعته فى كوالا لمبور بيقولو الناس هناك أشراف
    ماهو مصر بس (من غير لبنان ) فيها ييجى ستين مليون حرامى بس برضك مالوش دعوه - احنا أهل و دى أمورنا احنا نصتفل مع بعضينا
    اللى عايز يستغنى عن مشاهدين مصر برضك يستغنى عن رقاصين مصر ماهما الماده العلمية لمواضيع قنواته - تيك ات أور ليف ايت يا صالوحه!!!ا 0 و أنا لو من صفاء أعملها زعلة و ألم عربياتى و طياراتى و فليبنياتى و أغضب عند أبويا و ياكش تولع (سورى يا دوك) !!ا
    و لكن أنا فعلا ضد الوصلات الغير شرعيه لبث برامج القنوات - و من المؤكد ان كده أخذ شئ بدون وجه حق و حرام- يعنى عداك العيب و انت بتتفرج على قناة المانيا أس فو خص دى عالأقل بتكتسب لغه جديدة و ايفيهات بالألمانى يعنى بدل ياولد يا ولد : آينى هر أينى هر و بدل ياخبر ابيض ياخبر ابيض : آينى فايتن شونز آينى فايتن شونز و تيكين زيكس رااايخ تيكين زيبين جاى - بطلوا المحلية بتاعتكم دى - الراجل قلبوا عليكو

    و بعدين بدينك يا أحمد هو صاحب فكرة عالهوا سوا؟ لأ احلف ماهو لو كده يبقى فكك بقى من اقرأ و اكتب و هفقد الثقة فى حاجات كتير و أنا متلصمه
    لا حول و لا قوة الا بالله

    ReplyDelete
  7. هى دى لغة العصر و العولمه و اللى مش قادر يعيش و يتعايش معفا أو على الأقل يقبلها كأمر واقع يبقى بيدفن راسه فى الرمله

    ReplyDelete
  8. شيخ؟

    على اي اساس صار شيخ؟

    ياوحش .. كفشت الرجال .. تصدق انا من جد نسيييت ان الهوا سوا تبع الاي ار تي ..

    تصرفات صالح كامل متناقضه ..

    انا مو ضد فتح قناة دينيه من رجل مثل صالح كامل لكن ..ياليت تكون هذي القنوات ذات توجيه سليم ونية صادقه قبل كل شي

    مصر فتحت أبوابها لشاكلة صالح كامل .. فأفاد وأستفااد بنظره
    مهما حاول انه يسوي دعايه للاي ار تي .. مالها أي شعبية ..

    ReplyDelete
  9. أنا مش فاهم حاجة

    يعني ايه كورة

    ومين كامل صالح ده

    ايه الموضوع يا جماعة

    حد يفهمنا اي حاجة

    ReplyDelete
  10. انا متهيالي ان بالعند فيه محدش اشترك في ال ايه ار تي عشان الكاس واللي معندوش الوصله جابها على التركي او نزل يتفرج على القهوه
    وبالعند فيه برضه بنشجع اي فريق يلعب ضد السعوديه

    وانشاء الله هيرجعو موكوسين و هنفرح فيه اكتر واكتر

    ReplyDelete
  11. الانسة تمر حنة
    نسيتى حاجة مهمة جدا
    فيرشوزن فير ديرموسلايدن
    ولا عزاء لنجاح الموجى
    ماهو مات من زمان
    سورى يا احمد الكلمة وقفت فى زورى

    ReplyDelete
  12. بس صراحة صالح كامل حصل على شتايم و دعوات .. فعلا لا يحسد عليها !

    ReplyDelete
  13. الشيخ صالح آخر نماذج المنطقة التي قادتنا الي أقصي درجات من التخلف والذي تم تصديره لنا مع القادمين بفلوس الخليج ربنا ياخدهم كلهم
    العيب مش عليه العيب علي صفاء اللي مش عارفة تمشيه

    ReplyDelete
  14. عموما هو الراجل حيذيع النهائي وقبل النهائي مجانا على قناة عين اللي مش متشفرة

    يلا
    مبروك
    :)

    ReplyDelete
  15. ماليش أوي في حكاية الكورة ... حتى حكاية كاس العالم اللي بدأ عرفتها صدفة وأنا بتفرج ع التلفزيون (أصل احنا لامؤاخذة من طبقة الحرامية بتوع الوصلة) على رأي الشيخ المهندس الرفيق اللواء متقاعد ... اللي لم يتعسني الحظ بسماع حديثه الممتع مع مجدي مهنا ... لكنك قمت بالواجب بنشر تصريحاته الخطيرة اللي مافهمتش منها حاجة بصراحة ... الناس في كل مصر تستمتع بالماتشات أيا كانت الوسيلة (الوصلة .. الدش .. القهوة ... وغيرهم) وأي كلام يقوله بسلامته عن الاحتكار والدفع (ناقص يقول يالدفع يالحبس) كلام خايب
    وكل كاس عالم وانتوا طيبين

    ReplyDelete
  16. الراجل دة طيب أوي ياجماعة
    مصر كلها بتتابع المونديال بدون اشتراكات ولا وجع قلب
    انما صحيح حكاية راديو سوا دي؟
    فعلا كلامه غريب

    ReplyDelete
  17. عروستي!!د
    لأ.. طبعاً مافهمتش حاجة

    بس هاقول لحضرتك حاجة.. كان نفسي موت أشوف كم ماتش كده من المونديال لأني من ساعة كأس اليورو وأنا متشحتفة على ماتش كده ابن حلال أقدر أعزف على الجمل الكاملة والمرسومة اللي بتتلعب.. بس اتحرمت منه لأنهم مادخّلوش عندنا الدش ولا الغاز الطبيعي.. وكمان عندنا ثانوية عامة في البيت.. اللطيف بقى إننا في المجلة "بص وطل" خصصنا موقع عشان الحدث ده... ويتم منه إذاعة الماتش صوتاً وصورة والتعليق عليه بين الشوطين وبعد الماتش مع الكابتن أشرف قاسم.. الحالة عندنا (ج) والمحررين بتوع باب الرياضة شبه مقيمين في المجلة. اللي مش لطيف خالص بقى، إني أكون قاعدة في أمان الله باشتغل في البارتيشن بتاعي الذي يبعد ياردتين عن اللوكاشن أو الاستديو أو البلاتو -زي ما تحب-، وفجأة، ألاقي أستاذ أحمد عمار وهو زميل وأخ عزيز جداً اللي بيذيع الماتش علاّ الفوليوم جداً و.....جوه الجووووووووووووووووووول... ووالله لولا الملامة...!! بيكون هاين عليّ أقوم أهيص وأجري أتفرج ع الجول.. أصلي من النوع اللي بيتحمس أوي أثناء الماتشات مع إني مش ليّ في الكورة

    بس إنما قل لي... الأرقام الكبيرة اللي بيلعبوا بيها دي والأنصبة والأسهم وكده، بيعدوها ازاي.. وبيعملوا بالفايض منها ايه؟!!!!د
    الشيخ صالح يعني واللي زيه.. وإنما هو اسمه شيخ ليه؟ عشان كبير في السن وكده؟!د.. ماعلينا كل شيء ربما

    ReplyDelete
  18. ههههههههههههههههههههههههههه
    جابوا الحوار ده فى المصرى اليوم

    بس انت بتقول حصة مصر فى لبث كانت 126 ووزير الاعلام قال 178 هو الفرق اللى بين الرقمين زى فرق التوقيت
    !!!!

    وثانيا دا راجل عنده17 بنك (اسلامى) ومش عاوزه يشفر

    بالمناسبة واحد حسبها (بيكره الراجل ده اوى) ولقى صافى ربحه من عرض كاس العالم مليار و 400 مليون ويقولك بتسرق

    اظرف حاجة انه قال ان الناس اللى بتتفرج على القهاوى بيسرقوا وحسبهالهم بالمشروب
    انا مش بلوم عليه بس الراجل ده تاجر بافتراء

    ReplyDelete
  19. انا بقى اتفرجت علية بالفرنساوى اصلى مابحبش الايطالى المعلق جابلى صداع

    مع انى لا بفهم فرنساوى ولا ايطالى

    ReplyDelete
  20. ياجماعه الراجل ببساطة مخادع حتى فى اسمه يعنى لا هو "صالح" ولا "كامل" يبقى مش عاوزينة يهجص فى تصريحاتة.

    بس عندى سؤال بسيط هو دفع قد اية عشان يشترى حق عرض افلام ربة الصون والعفاف "صفاء ابو السعود" وخصوصا فيلم "عماشة فى الأدغال" ياترى فاكرينه ويمنع عرضها وده طبعا عشان يحاول يصون "عرضة" هو بعد ما ضمها الى حريمه الملاكى.

    كله فى الهجايص ياعزيزى

    ReplyDelete
  21. هما يسرقونا أة حلال
    أحنا نسرق الأثير لا حرام
    معلش يازمن
    واللة الناس كلها اتصرفت وجابوا القمر الأوروبي وفكوا تشفير القنوات بفرمطة السوفت وير وعلي الأقل المذيعين الأجانب بيدوا الواحد فرصة يستمتع بالماتش موش زي مذيعين الحاج صالح كامل اللي بيكلموا عمال علي بطال

    ReplyDelete
  22. كلام صحيح الشيخ دائما لما يتكلم كانه بيتكلم مع ناس مش موجودين او في موضوع تاني الظاهر مشفر نفسة خايف لا يتسرق
    و على موضوع القنوات و كاس العالم يمكن تقرا البوست بتاعي الي حيكون على العنوان الي تحت
    http://mrdiver.blogspot.com/2006/06/blog-post_114948937081750074.html

    ReplyDelete
  23. هوا من ناحية شرعي ولا حرام هوا أكيد يجوز ....:)

    أومال لو سمعت عدنان الحمد على الجزيرة من شوية مع فيصل القاسم في الاتجاه المعاكس وهوا بيقوله إن الفقراء ليهم الأكل والشرب وملهمش فرجة ببلاش
    عدنان دا شكله ميعرفش أننا في مصر لينا الكورة والحزب الوطني خد الأكل والشرب
    سلام

    ReplyDelete
  24. سلام
    انا شفت الحلقه دي و الشيخ كامل حرق دمي لما رد على المذيع لما قال طب الناس الفقرا تشوف المتش فين اوم ايه يرد الشيخ صالح اكرر صالح مفيش فقرا خلاص في الدنيا يا سنه سوخه يا ولاد امال الشحاتين و و و الخ دول ايه؟؟؟؟؟؟؟؟؟؟؟
    حجب مراتك الاول بعدين يا صلوح تعال اتكلم

    ReplyDelete
  25. على فكره مش حرام تتفرج على المباراة على قناه المانيا ابو العيال بيعمل كده ازاي حرام و القناه موجوده اصلا احنا سرقناها لأ هي موجوده اصلا

    ReplyDelete
  26. كلام كلام فعلا من كتره الواحد بيتوه مش عارف ان كان قصدهم يتوهونا و لا هما نفسهم تايهين و مش حاسين و لا في ايه
    حتي الفرحه الصغيره تمت مصادرتها ...
    عموما هي الوصله بعشرين جنيه ... يا بلاش و لو علي الشتيمه اللي بيشتمها لنا لان مصر و لبنان من البلاد الفقيره اللي مش كل الناس تقدر تدفع فيها مبالغ كبيره علشان ماتشات اصلا كانت ببلاش يبقي نقدر نقوله ربنا يسامحك و يزيد و يبارك في فلوسك و تكتر انما هو الكفن له جيوب ؟؟
    انتوك
    انتوك

    ReplyDelete
  27. وجهة نظري الشخصية .. و الله أعلم .. ان اللي بيتفرجوا علي الماتشات بالألماني و العبري مش حرام لانهم ما بيسرقوش شئ .. دولا عندهم الديكودر و المحطه كده كده ذايعاها .. و احنا بنضطر الي سماع التعليق بالالماني .. و انا الصراحه بفصل الصوت لاني بصدع من الكلام الالماني التقيل ده و ياريت الواحد فاهم حاجه !! و ان كان فيه حرمانيه تبقي علي القائمين علي المحطات دي .. بس اعتقد انهم مسويين موقفهم مع الايه أر تي .. و لو اني اظن انهم كألمان أو أوربيون أو غيرهم مش هيفرق معاهم قوي قصة الحلال و الحرام بس من ناحية المبدأ و لانهم محترمين اكيد ساوا موقفهم معاه ..

    الشيخ صالح كامل بقي .. و الله العظيم يعتبر حفر قبره بأيده باللعبه دي .. و ان كان بيقول علي المصريين حرامية .. فالله يكرم أصله و يسامحه .. ولا تعليق ..

    الوحيد اللي مظلوم ف اللعبه دي هو عمرو خالد .. لاني أعتقد ان صالح كامل بستغله بسيف الحياء بعد ما فتحله قناة أقرأ ف الوقت اللي كان مطرود من كل مكان .. فالدنيا كلها دلوقتي بتكره صالح كامل و عمرو خالد اتاخد ف الرجلين .. ربنا أعلم بالنوايا .. و علشان كده نفسي محدش يظلم عمرو خالد ولا يشكك فيه لان غير ان ربنا اعلم بنيته .. انا اعتبر التشكيك فيه ممكن يفتن ناس كتير قربوا من ربنا لما سمعوه و يرجعوا يقولوا حتي انت يا بروتس و يقولوا مش لاعبين .. دي النقطه الوحيده اللي بخاف منها .. الفتنه ..

    أحمد باشا .. مين هياخد كأس العالم بقي ؟؟ البرازيل ولا ألمانيا ؟؟؟

    ReplyDelete
  28. و كويس ان السعودية اتغلبت بس علشان يتقهر الشيخ صالح...وبكرة يشفروا الهوا ... اكتر حاجه عجبتنى فى البوست ده هو ذكاء الالتقاط والانتقاء، وبدون ما تتعب نفسك وتعلق ...
    جميل دائما ...

    ReplyDelete
  29. مش عارف والله انا لا بتفرج عليها بالعربي ولا بالالماني

    ReplyDelete
  30. ana gaya 3shan a3lak 3al o3'nya!! besara7a masta7meltsh el o3'nya gamda gamda gamda.,..ana bamoooooot fiha))))))) eh el sho3'l el 3aly dah! :D

    WHen I opened your blog..and the song started to play from nowhere..it had a special charm..and it threw its spell on your blog..your posts..your charachter!! and ours as well :D

    Great Choice! if not prefect! ;)

    ReplyDelete
  31. اه يااحمد
    جيت ع الوجيعه,اينعم انا موش فاهمه حاجه من الكلام بتاع المليارات ده ومين دفع كام ,اصلى بعيد عنك غبيه شويه ف اى مبلغ يتخطى العشر تلاف جنيه
    بس من هذا المزنق احب اغيظ الشيخ زعبله واشكره ف نفس الوقت ع الجهد الفزيع اللى عامله واقوله انا بتفرج بوصله غير شرعيه
    هههههههههههههههههه بتضحكنى اوى كلمه غير شرعيه دى ,بجد والله
    هو الاحتكار شرعى ياشيخ؟

    ReplyDelete
  32. سورى انا رجعت تانى
    المره دى عشان "تمر حنه" الرنه بتقول "انتبه ابوك يتصل بك,متردش" ملهاش اى علاقه بالفشخ
    عشان بحب الرنه دى اوى وطبعا حاطاها لابويا وهو عارف يااحمد عشان متقوليش هقوله

    ReplyDelete
  33. حلاوة شمسنا ايه ياعم الحاج
    الجو ولعة
    شفلنا نار يا حبيبى نار

    او حاجة ترطب الجو

    اعلان مزيل عرق مثلا حاجة كده يعنى

    ReplyDelete
  34. في البداية أحب ان ارحب بالعزيزة سعلوة أشهر المدونات السعوديات على وجودها معنا بالرغم من إلغاء مدونتها مؤخرا إلا أن زيارتها تؤكد عدم إنقطاعها عن المدونات ، كمان احب اقول إن البوست ده مش مقصود به السعوديين ولا العليقات هنا تقصد الشعب السعودي أيضا بقدر ماتقصد شخص بعينه وأنا متاكد ان دماغها كبير
    سبب المقدمة دي إتنين إيميلز وصولا لي على الميل لخاص بي

    والآن الردود

    سوسة المفروسة
    خليه يشفر زي ماهو عايز واحنا هانتصرف بطريقتنا ، اعتقد إننا كمصريين مابنغلبش بل أحيانا بنحب مثل هذه المضايقات لنثبت أن الهلوة في دمنا

    إبيتاف
    الشيخ صالح خلاهم يشجعوا الغريب ، بصراحة صعبة اننا نشجع بلد تاني لكن تأثير الشيخ باتع بصراحة ، واضح غنه فرق معانا جامد
    واضح انك روحتي من النادي بدري الماتش انتهى أربعة صفر مش تلاتة

    لستو ادري
    هيا وصلت يشوفوا الماتش على النت ، والله برده مصائب قوم عند قوم فوائد اناس اتعلمت تنزل ملفات تورنت وتشغلها
    حلوة نظام هاتدفعوا ده مش المصريين من المستحيلات الاربه سهولة إخراج المال من جيب المصري

    أدهم
    ضحكتني .. بس انت قلبك اسود اوي لسه فاكر حكاية سهير رمزي

    تاتي
    بتحسبني ع الراجل من كتر فلوسه .. عشان الجملة فرستني انا كمان كتبتها عشان مابقاش لوحدي

    تمر حنة
    انا سعيد انك بتابعي احدث الرنات اما رنة ابوك هايفشخك دي لسه جديدة .. بس بصراحة تخيلتها من وصفك

    حكاية ان مصر فيها حرامية معاكي حق احنا نقول اللي عايزين نقوله عليها ونشتم فيها زي ماإحنا عايزين لكن حد من بلد تاني يشتهمها لأ بروح امه هايتفشخ زي الرسالة مابتقول
    موضوع الجملة اللي قالها دي فيه ناس كتير بيتكلموا عنها اليومين دول

    أما باه عن ع الهوا سوا أيوه ياستس تبع قنوات الشبكة بتاعته وبصراحة انا كرهت البرنامج من تحت راس البت شيماء عار ع المصريين بتقل دم غير معهود عشان كده كرهت تلفزيون الواقع ودلوقتي باسمع راديو الواقع

    ماكسد اوت
    لغة العصر دي ماشي هانقبلها غصب عنا بس هانتصرف بطرقيتنا

    سعلوة
    سعيد بوجودك معانا والحقيقة الرجال هو اللي كشف نفسه ، انا بس كتبب اللي قاله يقولك انا بكره كلمة الإحتكار وهو بيمارس اقصى انواعه

    أبو شنب
    هو إنت في قطر ولا سيبيريا إنت مش معانا خالص ربنا يكون في عونك

    بسبس
    ماتوقعيناش مع السعودية ، عموما السعوديين حاجة والشيخ حاجة تانية

    أدهم
    أول مرة أعرف ان ثقافتك الماني .. المرة الجاية تخليك معايا ع التليفون عشان الترجمة

    مساعد
    بصراحة كمية الشتايم محترمة جدا تكفي وتزيد

    عشقك ندى
    بتتكلمي في حاجات عوائليني ، إنتي شايفة العيب عليها يعني مش عليه ؟

    عبده باشا
    إيه الاخبار الحلوة دي يعني كده ضمنا ماتشين بالعربي مش بالالماني

    أم المريلة كحلي
    يعني حت الشرعي واقفين عليه طوابير
    طيب يعني برده التشفير اتباع كويس مش كله كده غير شرعي

    الانينوموس
    فعلا هو ده كان المتوقع كله هايتصرف وكله هايشوف

    فهرنهايت مش عارف كام
    فعلا طيب اصل اللي ييجي ع المصرين مايشوفش خير ابدا
    قناة على الهوا سوا مش راديو سوا صحصح كده يالورد

    دعاء سمير
    بتقولي فيه حد بيعلق بالعربي .. ياريت اول مرة أحب صوت المعلق العربي بعد الالماني ده اللي خلاني شبه بسمارك
    هو لسه فيه يادعاء ثانوية .. هو انتي بتعيدي ولا ايه
    حلو اوي انهم في الشغل بيتفرجوا ع الماتش ونعم العمل بصراحة
    في معجم شقير الصحاح شيخ يعني راجل كبارة بضم الكاف

    طاهر
    كاتبين عن الموضوع ده في المصري اليوم طيب كويس لسه الواحد على تواصل
    للاسف هنا جريدة الاسبوع والخميس المسموح بيهم بس

    دووك
    فعلا عندك حق بالفرنساةي اخف من الالماني بس هلاقيه فين الفرنساوي ده

    واحد معدي
    أسئلتك خبيثة وفيها حاجات عائلية ، ماليش دعوة ياعم

    مكسوفة
    أصل الحلال والحرام ده اصبح شيئ نسبي كل واحد يحلل ويحرم على كيفه
    مشكلة تحديث السوفت وير انها بتجيب قنوات السيكو سيكو يعنى سرقة وقلة أدب

    ديفر
    عنوان البوست بتاعك لخص الموضوع كله .. ولا عزاء للفقراء وكلام الخبر مظبوط بدليل اللي احنا فيه

    صباحك سكر
    قلبك انتي وتاتي وجعكوا من الأسهم
    الاسهم دي باحس انها عاملة زي اليوفو حاجات طايرة الواحد مايعرفش عنها حاجة

    حائر في دنيا الله
    سمعته في الاتجاه المعاكس
    الراجل مبقوق قوي وكله شوية محمد سيف يقوله ده واقع والراجل يحمر ويخضر

    أم العيال
    أخيرا حد شاف الحلقة معايا ، طبعا حكاية ماعدش فيه فقرا دي كانت في اواخر البرنامج بس لولا الراجل رجع في كلامه وصلحها بعد مداخلة مجدي مهنا كنت طبعا كتبتها
    سلامي امانة لأبو العيال

    كراكيب
    انتوك ، هي الوصلة ليها تسعيرة كمان؟ طبعا على رايك كله كلام في كلام عشان كده انا قلت مش فاهم حاجة
    انا سمعت مقولة بتقول الفقير من حقه ياكل ويشرب بس لكن يتفرج على كورةدي باه رفاهية مش بتاعته

    رومانتيك روز
    والله رقيقة ، الراجل يقول مصر فيها حرامية وانتي ببراءة تقولي ربنا يسامحه ، روحي يارومانتيك ربنا يكرمك
    وجهة نظرك مظبوطة طالما القنوات دي ذايعاها يبقى مش حرام نتفرج عليها فيها
    أما عن عمرو خالد فانا كمان مش باحب نقد موجه له لانه غالبا بيكون نقد غير مقنع وبيكون خالي من الدقة، يمكن لاني باشعر مع عمر خالد بالصدق وبالإقتناع

    بعدك على بالي
    ومين قالك ، اهوه ده اللي ناقص يشفروا الهوا والله حاجات كتيرة عمر ماكان الواحد يتوقع انها تحصل ماحصلت
    ميرسي عل ملحوظتك

    أدم المصري
    أمال بتشوفها بانهي لغة ؟اوعى تكون لغة العيون

    إبيتاف
    ربنا يخليكي ورافعة معنوياتي ومعايا على اللاين ع طوول ، مبسوط ان الغنية اشتغلت ومبسوط انها عجبتك وحسيتي بيها
    بس عجبتني حاكية صوت من نوهوير
    No where

    ثروة
    أخر ماتعرفيه ياخايبة عشر تلاف جنيه ده إنتي اللي زيك بيلعبوا بالفلوس لعبومعلوماتهم بتوصل لارقام اكبر من كده ييجي بميت جنيه
    إخص هو إنتي من بتوع الوصلة غير شرعية .. طيب ابقي لبسيها طرحة عيب كده
    بس انا مافهمتش الرنة دي فيها فشخ ولا مافيش

    ReplyDelete
  35. لا يا راجل ليه تظلم الشيخ صالح بس

    الراجل كلامه و اضح و بسيط و محدد

    و اليكم الترجمة

    الراجل مشارك و مكلف و رامى فلوس بالهبل فمش هايجى على اخر الزمن
    و يخسر كلم مليون بسبب بتوع الوصلة..دى حتة تبقى عيبه فى حقه

    و الغلطة اساسا غلطة محمود سعد انه ماقلهومش..لوكان قالهم ماكانش ده بقى حالنا دلوقتى

    البورصة معمولة اصلا للمختلين عقليا و الحرامية

    اقرأ....اجدع ناس

    الاحتكار كلمة مدسوسة على اللغة العربية عنوة لمحاربة الشيخ صالح

    ع الهوا سوا مدسوسة برضه

    الاعلام المصرى اجدع ناس - و عديها بقى يا مجدى

    احيينى النهاردة و موتنى بكره

    جماهير الكورة بخيلة وجلدة و ماحدش بيحب النادى بجد
    بس ماعرفناش نادى ايه؟

    اصرف ما فى الجيب...وفك تشفير الغيب

    الراجل م الاخر بيقولوكوا هوا مش محتاج فلوس ولا حاجة و موضوع
    التشفير ده بس علشان عنده و قت فراغ و حب يملاه بأنه يهزر مع الشعب العربى كله
    بأنه يغتت عليهم شوية من نفسه و رنا يكفيكم شر الفراغ و الفلوس الكتير

    شوكير باشا
    انا برضه كنت فاكر البرنامج هيبقى متشفر و رغم انه اتعرض الا انى
    برضه حسيت ان فى رياح غريبة بتهب عليا من الشاشة..رياح التشفير

    و احب اضيف انى باكتب التعليق ده و انا بقلب بين اكتر من تلاتين قناة
    متشفرة من بتوع الشيخ صالح و غيره من ال التشفير و من غير
    مايكون عندى دش ولا حاجة و بعشرين جنيه بس فى الشهر

    و دمتم

    ReplyDelete
  36. يا استاذ احمد
    عشقك ندى هو الاستاذ محمد عبدة
    والبلوج بتاعة اسمة مصر يا حتة منى
    مين المؤنث اللى انت بتخاطبة هنا بالظبط
    على فكرة انا مرة برضة غلطت نفس الغلطة دى
    http://www.blogger.com/comment.g?blogID=14882832&postID=113880624136808811

    ReplyDelete
  37. انا عاوز رنة ابوك يتصل بك متردش

    ReplyDelete