Monday, October 09, 2006

أستغفر الله العظيم



Shokeir - Prayer


إستووا .. إعتدلوا .. إستقيموا يرحمكم الله
الله أكبر

الله أكبر .. أحمد ركز بأه في الصلاة وبلاش تسرح ، طيب خلاص ، إمممم .. هو الراجل اللي جنبي ده صوابع رجليه عاملة كده ليه ؟ صباعه الكبير ده كبير أوي ، أه بمناسبة الصوابع هي صوابع زينب دي اللي هيا إيه ؟ بيتهيألي دي اللي عاملة زي الزلابية ، زلابية ؟؟ زلابية إيه بس وبتاع إيه
الله أكبر
أحمد ركز ياأحمد ، طيب ماأنا مركز أهوه ، مركز إيه طيب إنت قريت سورة إيه ؟ أنا قريت سورة اللهب شفت بأه أنا مركز إزاي ؟ لألأ دي كانت سورة الفيل
سمع الله لمن حمده
ربنا ولك الحمد ، أنا جعت ، بس مش عارف أفطر إيه النهاردة ؟ آه المطعم الجديد اللي كانوا بيتكلموا عنه إمبارح ، بيقولوا عليه أكله حلو ، بس هو في شارع إيه ؟ لما أخلص صلاة أتصل بالتليفون أعرف العنوان
الله أكبر
هيا الساعة كام دلوقتي زمانها أربعة وخمسة ، على فكرة هيا الساعة التانية الجلد كنت حطيتها فين ؟ آه ياإما في الدرج ياإما في الدولاب ، دولاب ايه بس ياأحمد ركز ياأحمد إنت بتصلي ، أستغفر الله
الله اكبر
أهوه أنا مركز أهوه ، إنظر لمكان السجود وركز في الأيات اللي بيقولها الإمام
الله أكبر
الشيطان ده أعوذ بالله بيخلي الواحد يسرح ، مش هو الشيطان بيتسلسل في رمضان ، يعني بيتسلسل تلاتين يوم ، أيوه بس هو رمضان ده تسعة وعشرين ولا تلاتين ؟ هو إبتدى إمتى ؟ تعالى نحسبها كده هو كان يوم السبت وفي مصر الأحد غريبة أوي الحكاية ؟ طيب لو واحد على الحدود ورجل بره ورجل جوه يصوم ولامايصومش ؟ أحمد شفت أهوه إنت رجعت تسرح تاني
الله أكبر
هو إحنا في الركعة الكام ؟ يعني هانقوم ولا هانقرأ التشهد ؟ لا دي التانية ، طيب أقولك إتأخر شوية وشوف الي جنبك هايقوم يقف ولا يقعد يقرأ التشهد
الله أكبر
أيوه دي الركعة التانية ، شفت بأه عشان سعادتك عمال تسرح ، لأ خلاص أعوذ بالله من الشيطان الرجيم
الله أكبر
السجادة دي مريحة ولونها حلو ، هيا سجادة ولا موكيت ، لاموكيت بنسيج السجاد ، آه على فكرة إبقى إفتكر تكنس السجادة اللي في البيت بالمكنسة ، بس لازم أنضف كيس المكنسة عشان بقالي مده مانضفتوش
الله أكبر
الراجل اللي جنبي ده ، رجليه بتزق في رجلي ، طيب أحرك رجلي شوية ، الله ده بيلزقها فيا تاني ، أستغفر الله
الله أكبر
فيه صوت موبايل ، الناس دي ليه مش بتقفل الموبايل ساعة الصلاة مش عارفين ان ممكن ده يخلي الواحد مايركزش في الصلاة مع إن فيه يافطة محطوطة على الباب مكتوب عليها إغلق الجوال من فضلك وعليها صورة موبايل عليه علامة إكس بس هو الموبايل ده كان نوعه إيه ؟ بيتهيألي سيمنس هيا إيه الرنة دي ؟ آه أنا عايز أبقى أغير الرنة ، فاكر الموضوع اللي كتبته عن رنات الموبايل
.
.
.
.
الله أكبر
الراجل اللي جنبي ده عمال يتحرك كتير ، أستغفر الله مافيش خشوع خالص ، أنا أهوه مش باتحرك
السلام عليكم ورحمة الله ، السلام عليكم ورحمة الله
إيه هيا الصلاة خلصت ؟
السلام عليكم ورحمة الله ، السلام عليكم ورحمة الله

أستغفر الله العظيم

ملحوظة : مش أنا اللي في الصورة

--------------------------------


هذه التدوينة أعادت نشرها المواقع التالية دون الإشارة إلى صاحبها

منتدي دي في دي فور أراب ، مدونة فوضى الحواس ، منتدى عيني عينك ، مندي صُناع الحياة ، منتدى مزكوني ، منتدى عمر خالد ، منتدى محبي الحبيب ، منتدى قمر العين ، منتدى شباب الإسلام ، منتدى الطلبة ، منتدى ليالي لبنان ، منتدى الضحى ، منتدى فرسان الحق ، منتدى كاش

............. وكفاية كده

70 comments:

  1. بص بقى ضحك وللصبح


    حوار مع النفس قذر جداااااااا
    وراااااااائع منك جدا
    شوفت ازاى

    الجامع اللى عندنا عامل عرض كويس

    كل اربع ركعات عليهم اربعه هديه

    الف سلام وتحيه

    ReplyDelete
  2. يخرب
    شيطانك
    يا أحمد

    ReplyDelete
  3. نهار أسود هو انت كمان بيحصلك كده؟
    بحاول بشده أجيب فى مرة الأربع ركعات بتركيز بس صعب - تحس ان دماغك عيل محبوس مش عارف يفلفص قوم تفلفص فى اى حاجه فى الدنيا لحد الصلاه ماتخلص - انت عايش جوانا ولا ايه؟

    ReplyDelete
  4. حلوه طحن..

    ..فعلا ده اللي بيحصل مع كله
    ..


    بس بستغرب حاجه لو الامام غلط..بتلاقي كله بلسنه وبيرد
    ...
    وانا كمان برد

    ..

    ReplyDelete
  5. احمد باشا شوقييييييير
    والله ما قدرتش امسك نفسي م الضحك يا استاذ

    انت ليك جاذبية لا تقاوم
    اوعي بقي ما تبصليش بعنيك
    هههههههههه


    بجد بجد كلامك مش عارف اقولك عليه ايه


    اكتر من رااااااائع

    ReplyDelete
  6. مش ممكن
    عمري ما شفت حد قادر على الافصاح بالحقيقة بالشكل ده
    بس بجد عامله كده زي الكوميديا السوداء
    تتضحك لدرجة البكاء
    بس مش انت قلت انه اتحبس هو خد افراج ولا ايه
    سلام

    ReplyDelete
  7. الإعتراف بالحق فضيله
    ولكن متى سنتخذ قرار التغيير
    في حياتنا
    اخي حكاوي آخر الليل
    أنت مبدع أنت صادق
    نرى الشمس بقلمك آخر الليل
    لك مني التحيه

    ReplyDelete
  8. وبعدين بقي ياأحمد الواحد ما يعرفش يصلي جنبك أبدا بعد كدة .. ح يكرشونا برة
    بركة أنك ما كنتش أمام .. كانت ولعت يا باشا

    ReplyDelete
  9. احمدالعزيز
    لكم كنت صادق مع تفسك فى هذا البوست لكن للاسف كل منا يحدث له هذا وخاصة كلما اطال الامام فى الصلاه
    وطبيعى والا مكنش نص القرأن يقول وَاسْتَعِينُوا بِالصَّبْرِ وَالصَّلاةِ وإنها لكبيرة إلا علي الخاشعين

    كبيرة فى الحفاظ على مواقيتها وفى تركيزك فى الصلاة وفى خشوعك لله عز وجل

    ربنا يهدينا ويبعد عنا وساسوس انفسنا ووساوس الشياطين

    تحياتى على مواجهة النفس

    ReplyDelete
  10. هههههه

    ما تركز ياعم احمد مش معقول كدة :p

    هو الامام صلى كم ركعة صحيح ؟!

    الفرض ولا السنة ولا التروايح ؟!
    طب وقال كم سورة وقعت الصلاة اد ايه ؟ ربع ساعة ولا كام يا عم رد عليا :p

    طب انا عندي اقتراح .. صلي في الجامع ده بكرة وحتدعيلي

    http://fromghazza.blogspot.com/2006/10/blog-post_10.html

    وتحياتي ليك يا بطل

    ReplyDelete
  11. السلام عليكم استاذ احمد

    بصراحة فكرة رائعة
    كلنا بنقع فيها وقليل مننا ما تأتيه الشجاعة ليعترف بها ويناقشها

    اسلوبك جميل

    وهادف

    نسال الله ان يرزقنا الخشوع

    ReplyDelete
  12. فكرتني بواحد كان بيصلي وفي التشهد لقيته قاعد بيبص في الساعة
    :)

    ReplyDelete
  13. جميل جدا جدا يا أحمد
    بجد لذيذ واجمل ما فيه إنه من نوعية الكتابات الي بتفضحك قدام نفسك من صراحتها ولا تجد أمامك بدا من الضحك بدلا من الضيق
    برافو يا أحمد، قليلين هم من وجدتهم يمتلكون ناصية هذا النوع من الأدب
    وإلى الأمام

    ReplyDelete
  14. كنت بافتكرك معتكف
    اتاريك بتجاهد علشان تصلى
    :)

    ReplyDelete
  15. ياه خلصت بسرعه
    ده العادى بتاعنا هههههههههه

    ReplyDelete
  16. مين مش كده ؟؟ بدون وعى منى و أنا بصلى طلعت الموبيل من جيبى لحسن يرن فى الجامع !!!!
    حسيت أده إيه أنا خاشعه مع ربنا
    بجد ربنا رحيم عشان سيبنا نعمل كده و أحنا بين إيده
    قولوا أستغفر الله العظيم

    ReplyDelete
  17. أستغفر الله العظيم
    الواحد موش عارف يعمل ايه,ركزززززززز ياحاج

    ReplyDelete
  18. الفكرة جديدة و جريئة و بتمس الوتر الحساس
    انا بركز اكتر لما بصلي في حجرتي في ضوء خافت
    لكن في المسجد بيكون في حاجات كتير تلفت الانتباه و تشتت
    بس انت طبعا لازم تصلي في المسجد
    تعرف ركز علي نقطة ثابتة في سجادة الصلاة و متغيرش نظرك عنها
    ده حيساعدك
    ربنا يرزقنا جميعا الاخلاص و الثبات علي الحق
    خالص تحياتي
    جرب تصلي في مسجد الشاطري اخر الاربعين يمين

    ReplyDelete
  19. استغفر الله العظيم ربنا يهدينا و ميشغلناش فى الصلاه

    بوست جميل ودمك خفيف

    الا قولى انت قلت قبل كده على بوست اتنشر فى روايات نت هو انت مين فيه انا هناك عاشق منير ابقى رد عليا هنا ولا عندى فى البلوج عايز اعرفك

    ReplyDelete
  20. ya basha de moshkela kebeera 3andena kolena

    that is because when we go to pray we don't really understand the meaning of praying, we don't really understand the meaning of being on front of god, talking to him directly without anyone in between, we don't appreciate that enough

    that is because with most of us praying has become a practise that we do everyday without caring about the spritual side behind it, we loose the soul and the meaning and so we loose our focus

    ReplyDelete
  21. by the way my name is maged shafie
    ماجد شافعى

    not sherif, i don't know how many guys read it so :D

    ramadaan kareem ya basha, wish me luck in the army :::(

    FreeSoul

    ReplyDelete
  22. هههههههههههه
    بجد بتحصل بالضبط واكتر شوية كماان

    ReplyDelete
  23. طيب أقولك إتأخر شوية وشوف الي جنبك هايقوم يقف ولا يقعد يقرأ التشهد

    :D

    بتحصل كثيييييير
    البوست لذيذ خالص

    ReplyDelete
  24. السلام عليكم

    اخى الفاضل : لا توجد سورة اسمها سورة اللهب اعتقد انك تقصد سورة المسد فارجو ان تعدلها .

    مهما سهينا فى الصلاة فلن نخطىء فى اسماء السور على ما اعتقد .

    شكرا لك

    ReplyDelete
  25. أستاذ نفس بشرية
    ورئيس قسم
    يا معللللللللللللللللم
    :)

    ReplyDelete
  26. قصدك صورتك فى البوست دة ولا البوست اللى فات
    معلش بس علشان ما يحصلشى لبس

    ReplyDelete
  27. أستحضروا عظمة الله فى قلوبكم و صلوا صلاة مودع يرحمنا و يرحمكم الله


    على فكره من الو اضح ان الموضوع دا جه على الجرح
    بس الفكره عجبتنى اوي

    ReplyDelete
  28. نفس اللي بيحصللي مع اختلاف سكك السرحان ... يعني ساعة السجود اشم رائحة السجاد المعفنة والعن المصليين اللي بيتوضوا ولاينشفوا رجليهم كويس , أو انظر للكعبة المرسومة ع السجادة وافكر كم هي ركيكة وتقليدية , وبختلط الأمر في ذهني بين التركيز في طقوس الصلاة نفسها وبين السرحان همومي الشخصية اثناء الدعاء ... والغريب ان الواحد لاينتبه حقا للصلاة الا ساعة التسليم

    استغفر الله ... بس شديدة التدوينة ... كعادنك دوما يابرنس

    ReplyDelete
  29. استاذ احمد لقد استعرت موضوعك عندى بالمدونه وارجو تشريفك
    والتاكسى على حسابى
    :))

    ReplyDelete
  30. حرام عليك يا أحمد

    من ساعة ما قريت البوست دة و أنا كل ما أجي أصلي أضحك

    :) و أستعفر و أعيد من الأول

    ركز بقى

    ReplyDelete
  31. تعرف كلنا فعلا بيحصلنا كده بس محدش فينا فكر يعترف بالطريقة دي

    ReplyDelete
  32. سبحان الله كمنت هكتب بوست شبه ده بس كسلت الشيطان متسلسل طب احنا بنغلط ليه؟؟
    ممكن علشان خلاص اتعودنا فمش فارقة معانا موجود او متسلسل
    المهم حضرتك فطرت ايه ؟؟

    ReplyDelete
  33. هههههههه

    لا تعليق

    ربنا يثبتنا جميعا

    ReplyDelete
  34. تعرف يا احمد ان حكاية الشياطين اللى بتتسلسل فى رمضان دة لخبطنى شوية وخلانى ادور
    لقيت ايه بأة
    :
    إذا كانت الشياطين قد صفدت في رمضان فإن هناك أسبابا أخرى لوقوع المعاصي مثل: النفس الأمارة بالسوء التي تطيع الهوى المذموم، وشياطين الإنس، وقد يكون المراد من تصفيد الشياطين المردة منهم، وأما غيرهم فلا يقيدون

    ReplyDelete
  35. احمد
    متنساش ان الشيطان دية مهمتة وشوف فى سورة الاعراف الايات 16 و 17 الله عز وجل بيقول اية عن لسان الشيطان
    قال فبما اغويتنى لاقعدن لهم صراطك المستقيم * ثم لاتينهم من بين ايدبهم ومن خلفهم وعن ايمانهم وعن شمائلهم ولاتجد اكثرهم شاكرين ـ صدق الله العظيم

    بس انت وصفت بمدونتك وحرفنتك حال الكثير منا ودة يطمنا على ان الواحد ماشى صح لانة لو محصلناش كدة معناها ان احنا غلط فرب ضارة نافعة ـ تحياتى

    ReplyDelete
  36. ما ان صرح الرجل بوساوس النفس او الشيطان اثناء الصلاه حتى اتخذها الجميع مجالا للفكاهه والتندر بدلا من النقد الموضوعى للبوست أو التواصل بالحوار للتوصل الى طرق للتغلب على تلك الحاله التى يعانى منها الجميع اثناء الصلاه ، والادهى من ذلك ان البعض اعتبر البوست قافيه ودخل من خلالها للوصول بالحاله الفكاهيه الى ذروتها وكاننا فى حوار مسرحى عبثى مع اننى بهذا التوصيف اظلم المسرح العبثى .

    وملاحظه عامه واخيره ، ما ان ينشر بوست على اى من المدونات إلا وتجد الجميع فى حالة تشجيع حاد ومدح وإطراء للناشر ولكن ليس من باب التشجيع الموضوعى وانما من باب مجاملة الصنايعيه والورشجيه بعضهم لبعض (الله ينور..فل يامعلم .. تسلم ايدك يااسطى) .
    المفترض ان من يتعامل مع الميديا التفاعليه هذه هو على درجه معينه من الثقافه والفكر المنهجى المنطم والذى لاتنسجم معه مثل تلك السلوكيات ودون توصيف اتمنى ان نكون على قدر من المسئوليه وسعة الأفق فى حواراتنا ومناقشاتنا بما يعود على الجميع بالفائده العلميه والثقافيه.

    تحياتى للجميع وللأستاذ احمد وتعليقى على البوست انما الاعمال بالنيات اولا واخيرا واحسبها من نوايا الخير ، ولا نزكى على الله احدا.

    ReplyDelete
  37. يا جماعه انا لسه سامع الحل فى التليفزيون بيقولك لنك لازم تتوضاء صح و بهدوء و بعدين تستحضر الخشوع لله فى قلبك

    ReplyDelete
  38. ههههههههههههههههههههههههه
    بجد مش عارف اقول ايه

    ReplyDelete
  39. أغلبية اللى بيصلوا بالشكل ده
    ما هى هيا دى الصلاه المودرن
    بزنس از بزنس

    ReplyDelete
  40. intp h2ololy, that's how i pray mn ayam mkn 3ndy 8 aw 9 sneen, welmoseba iny lessa m5lsa elfagr we wana feltashahod mesh fakra iza kont slt elrak3a eltnya de asln wala la2a, howana bad2tha ah, bs kmlt, emta, mesh fakra elsara7a, we by the way elshayatien mtsalsela we kol 7aga, e7na yababa elshyaten mesh m7taga tglna asln, e7na kda 5l2a, lesa knt hdyha post bmnsbt salt elfgr elmosharefa ely ana lsa knt b2ol 3leha, bs inta omt belwagb, bs leh bnn7s belznb, we so2al fel3'ree2 b2a, howa e7na fe3lan 7asien belznb we far2a m3ana, wala de 7ala we dor bn3eysho felwa3y we akna3na beh elwa3y -7elwa el7ta elnfsawy de-? do we really care? if we did we would've don't righte melawel, yalla, law fat7t fel7ewar da htl2eny ktbalk hna post mesh comment, good after night

    ReplyDelete
  41. LOOOL!!

    أبدعت يا أحمد

    ReplyDelete
  42. موضوع واقعى بس الحلو ف الموضوع انك بتوصف بدقة كأنك مركب جهاز تجسس على كوامنك الداخلية
    وحكاية الخشوع دى صعبة واحنا بيتشرحلنا حلول ليها نظرية ولكن ما بتنفعش معانا
    مثلا فيه ناس بتقول التقوى هى الحل
    بمعنى إيه ما تعرفش
    يعنى ما احنا برضة تقاة هو احنا يعنى بنسكر م العصر ولا بناكل مال حرام
    وغيره بيقول دوام الذكر / ذكر الله هو اللى بيوصل بيك لهذا الخشوع
    اما اتهامنا للشيطان فلا محل له من الإعراب
    زى اتهامنا لإسرائيل انها السبب ف الكثير من مشاكلنا
    ع العموم الخشوع من وجهة نظرى يأتى إذا وضعنا العبادة رقم واحد فى حياتنا وبعدين تاجى اهتماماتنا النت و الرياضة والفن
    ووووو
    اما خلاف ذلك فاسمحلى
    اقولك احنا بننفخ ف قربة مقطوعة

    ReplyDelete
  43. عشان كدة الصلاة تعتبر جهاد مع النفس ربنا يقوينا عليها بقي

    ReplyDelete
  44. ههههههههههه

    الله يلعن الشيطان
    امس كنت اطالع إيد اللي بتصلي جمبي

    هيه ليه ما تئصش اضافرها
    جتك أرف

    LooooooooooooooooooooL

    ReplyDelete
  45. يا سبحان الله .. انا باقول نعمل حركة و نسميها كلنا احمدP:
    ربنا يسامحنا جميعا يا رب و يرزقنا الخشوع ف الصلاة
    يقال ان لو الانسان عايز يخشع ف الصلاة يصلي و كأنها اخر صلاة له ف الدنيا(صلاة مودع)
    شكرا علي الموضوع الواقعي جدا

    ReplyDelete
  46. اى اضافه مش هاتبقى جديده عن اللى اتقال هنا
    بس فعلا انت عبقرى ببساطتك فى التعبير عن معظم الحاجات اللى بنفتكرها وبننشغل بيها فى الصلاه
    مش هاتفرق اذا كانت البنت اللى جنبى حاطه مانيكر .. مش هاتنفع صلاتها اكيد .. ولا بتستعمل نفس البرفان بتاعى ولا المشوار اللى هاعمله بعد ما اخلص الصلاه

    فعلا استغفر الله العظيم

    ReplyDelete
  47. الله اكبر
    ..... .. ...........
    .. ..... ....... .. .
    .... .
    ايه ياماما فيه ايه موش مركزه ليه,هنعمل زى شوقير ولاايه

    الله اكبر


    . ... ....... . .....
    ......... ........
    لا مينفعش خالص حركات احمد شوقير دى

    سمع الله لمن حمده



    ............ .... ..... ....
    ... ........ ........ ......
    شوفتى قفشت بردو ,زى احمد شوقير اللى كنت بتتريقى عليه

    خد عندك لحد "السلام عليكم ورحمه الله"
    طول الصلاه بفضل سرحانه
    فـــــــــــــيك

    ReplyDelete
  48. احمد ربنا انو مجاش جنبك واحد من اللى بيردوا على الموبيل وهما بيصلو
    للحين فى صلا اتصل بعدين
    واحد تانى رن الموبيل فى جيب وهو كان نوى وصبى شغال عندة مد اية فى جيبة واخد الموبيل علشان يرد هو فهمسلة فى الصلاة الاحمر كانسل يعنى

    وهلم جرا

    على فكرة جالى زياد يوم 6 اكتوبر

    ReplyDelete
  49. يشرفني ان اتقدم بخالص التهاني وأطيب التمنيات القلبية بمناسبة عيد الفطر المبارك اعادة الله علينا وعليكم وعلى مصرنا الحبيبة بكل خير .. مع خالص تحياتي وكل عام وانتم والأسرة الكريمة في أسعد حال

    ReplyDelete
  50. تعالو بسرعه ادعو معايا
    الحق اليوم الاخير ليله القدر
    وادعى معايا
    وقول امين

    ReplyDelete
  51. كالمعتاد تكتب مالا يكتبه غيرك


    رائع

    تحياتى ومودتى

    ReplyDelete
  52. صح جدا و بيحصل...كل سنة و انت
    طيب، هتعيد في مصر؟؟

    ReplyDelete
  53. احمد فوزى اصحى وركز معايا فى الكلام مافيش وقت
    ممكن تاجى عندى وتقرا الأسئلة بتاعة اختبار شهر رمضان وتجاوب عليها عندك
    وتبعتهم لخمسة مدونين للفائدة
    ياريت
    كل سنة وانت طيب

    ReplyDelete
  54. كان ردي علي البوست عند جبلاوي
    اني لما قررت يوم اني اصلي بتركيز شديد من غير ماغلط
    كانت النتيجة اني قضيت اليوم كلة باغلط علشان مركزة ازاي مافقدش تركيزي ده

    النصيحة اللي سمعتها.. لو بتصلي لوحدك اقرا سور طويلة نسبيا غير السور المعتادة ودعاء مختلف كل ركعة
    اما اذا كنت في الجامع فتخير الامام الذي ترتاح لصوتة واطالتة للصلاة

    اما عن الاسلوب ذاتة فكالعادة رااااائع

    ReplyDelete
  55. اللهم ان لي احبة قد قصرت بحقهم و انشغلت عن وصلهم فعطر ايامهم بالايمان و تقبل منهم و منا صالح الاعمال ..امين يا رب العالمين و كل عيد و انتم من السعداء المغفور لهم
    تحياتي

    ReplyDelete
  56. حلوة قوي الفكرة دي

    والجميل انك حكيت علي هيئة صلاة كاملة

    ReplyDelete
  57. يا سبحان الله كنت فاكره انا بس اللى كده .ده الشيطان بيعمل عمايل سوداء فى الناس كلها. ربنا يرحمناجميعا و يرزقنا الخشوع والاخلاص .

    ReplyDelete
  58. كل سنة و انت طيب

    والسنة الجاية تقضي العيد في مصر ان شاء الله


    على فكرة كل شوية الاقي بوست من بتوعك مبعوتلي
    chain mail

    عم يا عم بقيت مصدر ينقل عنه . اللهم لا قر

    ReplyDelete
  59. العيد يعود
    والشعب مزيد
    الشعب بعيد عن فعل الكلمه

    والفعل قدير بالارض تميد
    الفعل قدير بالارض تميد بعروش الحكم واذناب الطغمه

    قد قال حكيم فى الكلمه :
    الكلمة نور
    ودليل تتبعه الأمة
    الكلمة زلزلت الظالم
    الكلمة حصن الحرية

    نشهد ان الكلمة نور
    وان كثير الكلمات قبور

    والفعل هو ايضا كلمه
    لكن ليس ككل الكلمات

    به تحيا أمه .. او تطعن فى القلب تموت
    به تسمو أمه .. او تهوى للدرك الاسفل
    به ترفع هامه .. او تركع فى قيد الرق مذلل
    به تنطلق الخطوه .. او تتعثر فى ذل الحاجه للأرزل

    الفعل هو ايضا كلمه
    لكن ليس ككل الكلمات

    به تنشد حرا .. او تبكى فى كهف مظلم
    به تنزع حقا .. او تترك فى ايدى لصوص
    به تحمى وطنا .. او تجبن فى وجه طـغاه
    به تغدو حرا .. أو تمسى سجينا كل صباح

    الفعل هو ايضا كلمه
    لكن ليس ككل الكلمات

    الفعل دليل على صدق الكلمه
    والصدق حياة الاحرار

    فلنفعل شيئا ولنحيا حياة الاحرار
    لنحرر وطنا من بغى وجور الاشرار
    ونهدم اسوار السجن
    ونحطم قيد الاسر وحصون الفجار

    لنفعل شيئا
    ولينهض شعب على فعل الكلمه
    ونعيد بناء الامه على صدق الكلمه
    وتعود مدينتا لتبقى مصر الاحرار

    الفعل هو حقا كلمه
    لكن ليس ككل الكلمات
    الفعل حياة او وأد حياه
    قد تشعل نارا او توقد نورا للخير طريق
    قد تقتل شعبا او تحمى امه من فعل الطامع والزنديق

    الفعل حياة او وأد حياه
    وسواه من الكلمات سكون

    فلنفعل شيئا
    فلنفعل شيئا ليعود العيد ومعه مزيد
    معه مزيد من عشاق الفعل وعلى نور الكلمه .

    وكل عام وانتم بخير
    احمد فتحى

    ReplyDelete
  60. S well all the same problem (il shittan yilaab fiena)

    ReplyDelete
  61. استغفر الله ...الله يثبتنا ان شاء الله..:)

    عيدك مبارك..:)

    ReplyDelete
  62. العزيز شقير
    ازيك يا طيب
    كل سنة وانت بخير
    وعيد سعيد على الكل يا رب


    جينا نعيدوا عليك


    وماله يعنى الجدع اللى فى الصورة؟
    اكمنه اصلع يعنى وبكرش؟؟
    ولا عشان باين انه راجل كبارة كدة وفوق الخمسين بخمستاشر سنة؟؟
    هاااة؟؟
    بس شغال برضه
    ههههههههههه
    الجدع اللى فى الصورة حليوة رغم الظلام
    وماشى الحال بيه

    كل سنة وانت طيب

    ReplyDelete
  63. حد ياجماعة يحط نفسه مكاني رديت على خمسة وستين تعليق وجيت انشر الرد البلوجر قالي انه في حالة صيانة والرد اللي كتبته على التعليقات طار في الهوا

    نرجع نرد تاني
    اولا اشكر الجميع
    ثانيا الردود مرة اخري


    Gbalawy
    عجبني تعبير حوار قذر جدا لأنه فعلا جاي من النفس الامارة بالسوء

    MAKSOFA
    يسمع منك يامكسوفة وربنا يخرب بيته فعلا

    تمر حنة
    فعلا هو عيل محبوس جوه وعيل رزل وشقي وصوته عالي فعلا
    ربنا يهدينا انشاء الله

    خجل
    لو الإمام غلط كله بيحاول يرد فعلا انا كتبت بوست السنة اللي فاتت عن الحكاية دي

    ادم المصري
    واضح اني مش لوحدي ياآدم في الحكاية دي انت طلعت منهم ولا ايه


    ام العيال
    فعلا زي ماقلتي هيا كوميديا سوداء بتخلينا ناسف على حالنا والله وربنا كريم انشاء الله

    رحال
    شكرا على كلامك الرائع واعتقد ان اظهار مدى الحال بهذا الشكل بداية لمراجعة حساب لتغير طريقة اداء العبادات

    zabady
    وانت بتقول فيها يازبادي المشكلة فعلا بتكون اكبر لما الواحد الظروف تحطه في موقف يكون فيها إمام وتظهر مشكلة عدد الركعات

    tota
    فعلا الآية الكريمة بتؤكد انها فعلا محتاجة جهاد مع النفس
    اللهم الهمنا الخشوع في صلاتنا وكل عبادتنا

    3ola
    ايه الجامع ده ، هما كمان بيقيسوها بالوقت بالشكل ده
    يعني لاتركيز وسرعة كمان
    بس ده الجامع في غزة ياعلا

    أُكتب بالرصاص
    ماخبيش عليك أنا فكرت كتير قبل مانشر البوست ده لانه في فعلا مواجهة مع النفس كبيرة

    Abdou Basha
    اللي بيبص في الساعة ده امره هين امال تقول ايه في اللي بيحط صباعه في مناخيره وبعدين يطلعها ويقعد يبص عليها

    Dr. Zeus said...
    شكرا يادكتور على تشجيعك الجميل ده اللي بيصعب كتير على الواحد وهو بيكتب بوستاته التالية

    حــــــلــم
    وانتي بتقولي فيها ياحلم دي فعلا مجاهدة بجد

    shady
    يعني مطلعتش لوحدي ياشادي امال ماحدش بيتكلم ليه؟

    daktara
    هو انت كمان كده

    Noran
    عندك حق ان ربنا رحيم بينا ان احنا بنعمل كده واحنا بين ايديه
    اللهم الهمنا الخشوع في عبادتك

    Sarwa
    يعني الموضوع مش رجالي بس ياثروة
    ركزي بأه

    كلبوزة لكن سمباتيك
    فعلا كلامك فيه بعض الحل بالتركيز على نقطة معينة
    جامع الشاطري بعيد عليا ده خمس شوارع بيني وبينه انا تقريبا على طريق المدينة

    محمد ياسر
    شكرا على كلامك الجميل
    اما ياعاشق منير حكاية المواضيع اللي بتنشر على روايات نت انا بصراحة مش مشترك في المنتدى ولا بانشرها بس هما بينششروها وانا بس باشير ليها عندي كنوع من اثبات الملكية

    free soul
    تحليلك للموضوع هايل ومعرفة الاسباب بلاشك اول خطوة للتصحيح
    واتفق معك ياماجد تماما

    free soul
    معلش على الخطا في الاسم ، الدنيا صيام باه وتم عمل اللازم وتصحيح الاسم

    shababik
    أكتر من كده كمان ياشبابيك ، هاها كده يبقى كتير بصراحة

    توتي فروتي
    هو فعلا ده اللي بيحصل ونورتينا في المدونة

    مؤمن
    وعليكم السلام بصراحة ملحوظة في الجون يامؤمن بس أنا ماغيرتهاش لانها فعلا جت في بالي كده وأنا كنت باكتب اللي في بالي
    برافو يامؤمن

    ME
    جميل اللقب ده ياست الكل تحية كبيرة أوي عليه

    adhm
    هاها .. قصدي ياأدهم الصورتين عشان مايحصلش لبس

    ahmEd_[H]
    فعلا كلام الإمام لما بيقول صلوا صلاة مودع فعلا لو كلنا ركزنا في معنى الجملة دي النتيجة هاتختلف كتير للاحسن

    451 فهرنهايت
    فعلا يادكتور أنا فعلا غزاي مااخدتش بالي من حكاية الكعبة اللي مرسومة على سجادة الصلاة فعلا دي اخدت من فكر الواحد كتير اللهم إرحم الجميع

    Gbalawy
    سعدت بتحليلك للموضوع في مدونتك واتمنى ان تكون اسباب اغاق المدونة خير وتزول الاسباب وترجعلنا بسرعة

    change destiny
    كده برده .. انتي كده هاتحسسيني بالذنب .. حرام
    انسيني خالص

    توتة توتة
    أحيانا بتكون الفكرة قريبة منا جدا ولكن غالبا لانلتفت اليها
    شرفتي المدونة

    Nouran
    شفتي بأه عشان لما تجيلك فكرة إكتبيها على طول

    Epitaph said...
    يسمع منك ربنا وكانت جميلة اوي تدويناتك النورانية في رمضان

    حــــــلــم
    فعلا ياحلم هو الكل اجمع على حكاية النفس الامارة دي لكن سياطين الانس دي اول مرة اخد بالي منها

    Gid-Do - جدو said...
    فعلا الايتين الكريمتين دول اكبر دليل على تربص الشياطين لنا من كل اتجاه
    ربنا يحفظنا جميعا انشاء الله

    احمد فتحى - بعضا من الموضوعيه يرحمكم الله
    فعلا مالفت نظري في تعليقاتك هي عمقها وتحليلها الشامل وفعلا الواحد بيكتب في موضوع جيد بطريقة خفيفة ليصل المقصود من الفكرة بطريقة سهلة
    اشكرك على تعليقك ودايما نشوفك

    ahmEd_[H]
    سعيد جدا بتواصلك وإضافاتك المفيدة والجيدة

    أجدع واحد في الشارع
    شكرا ياجميل على تواجدك ومعنى كلامك وصل

    islam yousef
    اللهم ارزقنا الخشوع وابعد الرياء في الصلاة وجميع العبادات واجعلها خالصة لوجهك

    Anonymous
    good after night
    فعلا نقطة وجيهة جدا وهو الاحساس بالذنب اعتقد ان الاحساس بالذنب شيئ جيد في هذا الموضوع وهو يعتبر مفتاح البداية لحل هذا العبث

    ~ se3loah ~
    بصراحة ياسعلوه باكون سعيد جدا لما الاقي تعليق ليكي عندي

    The Doctor !i..
    والدكتور عندنا كمان نتمنى نشوفك دايما يادكتور

    أبو أمل
    اعتقد انك مسكت بداية لحل وهو ان نجعل العبادة هي في اول اهتماماتنا وعندها تاتي التقوى ومنها يكون الخشوع والاحساس بعظمة من نقف بين يديه
    شكرا ابو امل

    sahar
    هي فعلا الصلاة لو اخدناها من زاوية جهاد مع النفس هايكون ليها نتيجة مبشرة
    بالمناسبة الاسم ساهر ولا سحر؟

    نون النساء..
    هاها
    اهتمامات الستات بتختلف بس برده كلها بتقلل التركيز
    المانيكير فعلا حاجة ملفته للنظر غصب عن البني آدم

    Nour
    فعلا الاحساس بان الصلاة صلاة مودع بمعنى الكلمة تفرق كتير في القضية
    كلنا احمد دي جديدة

    حنيـــــــن
    الموضوع ماطلعش رجالة بس ده الستات نفس الحكاية ربنا يقويكوا ويقوينا

    فعلا استغفر الله العظيم

    Sarwa
    كده برده ياثروة محسساني بالذنب وبقيت انا كمان احد اسباب السرحان مانا قلتلك فوق ركزي باه

    asadma7bos
    لا لسه ماحصليش مقابلة اللي بيردوا على الموبايل
    الف مبروك زياد ويتربى في عزك انشاء الله

    يا مصر اكتب إليكي رسائلي
    عيد سعيد عليك وعلى كل حبايبك انشاء الله

    أجدع واحد في الشارع
    كلنا معاك في نفس واحد اللهم امين

    بعدك على بالى
    ميرسي على كلماتك الجميلة والاجمل عودتك للتدوين مرة اخري بتدويناتك المتميزة والعميقة

    Nerro
    وانتي طيبة يانرّو
    كنت امنى اقضي العيد في مصر بس الظروف ماسمحتش

    أبو أمل
    كل سنة وانت طيب ياابو امل واتمنى ارد على اسئلتك في اقرب فرصة وشكرا على الدعوة الجميلة للاسئلة الجميلة

    saso
    عجبني ردك عند جبلاوى وفعلا التركيز في نقطة مهمة جدا والنظر محل السجود حديث عن الرسول صلى الله عليه وسلم

    yellowkitty
    شكرا لتشريفك ونتمنى نشوفك دايما

    كلبوزة لكن سمباتيك
    ةكلنا بنقول امين في دعائك ياكلبوزة

    باسم شرف
    شكرا ياباسم على تعليقك

    i`m just depressed
    لا طلع بيحصل مع كتير وده اللي اكتشفته من التعليقات
    المرة الجاية مش عايزين تكون محبط واسمك يكون ايام جست هابي.

    change destiny
    وانتي طيبة ويسمع منك ربنا
    الايميلات دي جت لي برده واكتر من كده جت لي على اميل الشغل
    واللي باعتينها مايعرفوش اني صاحبها

    احمد فتحى
    الفعل هو حقا كلمه
    لكن ليس ككل الكلمات
    الفعل حياة او وأد حياه
    قد تشعل نارا او توقد نورا

    كلمات جميلة ووجهة نظر جيدة وجديدة للاحتفال بالعيد
    ليه ياحمد مش بتعمل مدونة تكتب فيها الكلام الجميل ده
    ياريت نشوف ليك مدونة قريب انشاء الله

    iamnasra
    واضح ان الغالبية كده فعلا ياايمان
    ربنا يهدي الجميع ويعينا على حسن عبادته زي مابنقول عقب كل صلاة

    Q8ya
    نستغفر الله العظيم
    وعيد سعيد عليكي وعلى كل عائلتك وماتنسيش تعيدلنا على سمايل

    شهروزة
    اخر تعليق وهو اللي خد باله من موضوع الصورة
    اصل الصورة بالرغم من اني شايفها جميلة
    لكن لما دققت في الراجل لقيته زي مابتقولي
    لكن كويس برده انه شغال
    نفسك حلوة ياشهروزة
    كل سنة وانتي طيب

    واخيرا اشكر كل اصحاب التعليقات والحمد لله انه لم يصل لي تعليق اشعر منه انه قد اسيئ فهمي لهذا البوست او يشعر اي من قرأ الموضوع ان هناك اي نوع من الاستهزاء واعتذر ان كانت هناك اي خطأ غير مقصود

    ReplyDelete
  64. ممكن تكتب الرد الاول فى اى نوت باد وبعدين تحفظة
    وتنشرة بعد كدة براحتك
    لان الانطباعات الاولى .......تدوووووم

    ReplyDelete
  65. it is avery amazing essay.walahy ele bn3mlo dah mas7'ra ,,but i think it is an awful doing ,exist and run in our blood

    ReplyDelete
  66. روووووووووووووعه

    اسلوبك جامد جدا بصراحه
    والبوست عجبني جدا جدا
    وواقعي للغايه

    اوعي تكون بتحضر شياطين وتعرف منهم الافكار اللي بيشغلونا بيها في الصلاه

    ReplyDelete
  67. كلمة بسيطه خالص لو تسمحلى مفيش سورة اسمها اللهب

    ReplyDelete
  68. Mohamed A. Ghaffar

    محمد إقرأ تعليق مؤمن وردي عليه أشار إلى هذه النقطة

    ReplyDelete
  69. الحقيقة ربنا يكرمك لاني كنت في مود امينة رزق و كنت عاوزة اضحك و علقت علي اللي ضحكت عليه.تحياتي

    ReplyDelete