Thursday, November 23, 2006

إمسك حرامي المدونات



إمسك حرامي المدونات




بعد إنتهاء يوم العمل وقبل تصفح المدونات قررت متابعة البريد الإلكتروني الخاص بي لأجد رسالة إستغاثة من شخص إسمه أحمد لم يرسل لي مسبقا ويبدو أنه أرسلها لآخرين غيري يقول فيها بالحرف

أصدقائي
وجدت في جريدة الميدان الصادرة اليوم سبع مواضيع منقولة نقل مسطرة من مدونتي المتواضعة في صفحة واحدة تحمل عنوان "البوسطجي" لصحفي يحمل اسم باهر السليمي
السبع مواضيع وضع اربعة منهم تحت قضية سماها محاكمة القراء للإخوان
وثلاث في باقي الصفحة
والسبع مواضيع منشورين بسبع قراء مختلفين
أتمني أن تساعدوني في تلك المشكلة فهي إن كانت مشكلة شخصية ولكن كل المدونين معرضين لها بعد ذلك وخاصة اني سمعت أن البعض حدث له ذلك قبلا

مدونتي حائر في دنيا الله


إنتهت الرسالة ، إذن أحمد هذا ليس هو إلا أحمد صاحب مدونة حائر في دنيا الله ، لم أفهم ماذا يحدث ولم أجد سبباً لمبالغة أحمد الذي يبدوا أن الأمر إختلط عليه من تشابه أفكار !! ذهبت
لمدونته كي أفاجأ بسبع تدوينات له منشورة كاملة في جريدة واحدة مرة واحدة وعلى صفحة واحدة وبسبع أسماء مختلفة
أستاذ باهر السليمي بصراحة أهنيك على ذكائك الخارق الذي لايحسدك عليه أحد
بقي ياراجل ياغبي لما تسرق تنشر بالحرف ، بقى ياراجل لما تسرق تسرق من نفس الشخص ، بقى ياراجل لما تسرق من نفس الشخص تسرق سبع تدوينات مرة واحدة ، بقى ياراجل لما تسرق سبع تدوينات من نفس الشخص تنزلهم في عدد واحد ، بقى ياراجل لما تسرق سبع تدوينات من نفس الشخص وتنزلهم في عدد واحد تنزلهم في نفس الصفحة ، أهو ده اللي بيسموه الغباء الصحفي


باهر السليمي وصمة عار في جبين كل صحيفة ، باهر السليمي أصبح منتشرا إنتشار النار في الهشيم في كل صحيفة ، باهر السليمي لماذا إمتهنت مهنة لست على قدرها ؟ باهر السليمي لقد أصبحت مثال للغباء الصحفي ، باهر السليمي شيطانك الذي جعلك تتسلل ليلاً والناس نيام وتسرق كتابات غيرك يضحك الآن وفي وضح النهار مع الملايين على حماقتك وسفاهتك ، باهر السليمي بفعلتك هذه وقفت أمام القطار لتخط بيدك نهاية مستقبلك الذي لم ولن يبدأ فمع المدونين لايوجد مجال للعبث ، باهر السليمي مافعلته سيظل نقطة سوداء في تاريخك كله

ومن الآن أي صحفي غبي وفاشل سوف يحاول سرقة مايخطه المدونون سوف يقابل بالتشهير وبعد الآن لم ولن يمر هذا الأمر مرور الكرام كما حدث سابقا ، الآن وقد أصبح جميع الصحفيين من زملاء المهنة يتابعون ماتنشره المدونات

أحمد صاحب مدونة حائر في دنيا الله ، قد كنت أنت الضحية ولكن من يعلم قد تكون أنت السبب في إمتناع أي حرامي أن يقدم على تلك الفعلة مستقبلا ، مافعله باهر السليمي ودون أن يدري جعلك سبباً في وقفة جميع المدونين وإتفاقهم جميعا ولأول مرة ، إتفاقهم على التصدي والتشهير والتشهير والتشهير بكل من تسول له نفسه على أن يقدم على مثل تلك السفالات




مادامت حقوق النشر غائبة في عالم التدوين فلا مجال إلا فضح المُدَّعين


----------------------------------

باهر السليمي أنت في ذمة الله

----------------- والآن وفي كل مكان -----------------





















روابط للتدوينة
مدونة مجمَّع
دوِّن ، مدونة في العمق ، مدونة ربة السيف والقلم
مدونة بنت مصرية ، مدونة لابيدو ، مدونة تخا تخا ... تخاريفي
مدونة حائر في دنيا الله (تحديث) ، مدونة فريدة
مدونة ماشي صح ، مدونة تداوين


-----------------------


نهاية القضية

36 comments:

  1. أنا أول تعليق فى واحدة من أشهر المدونات و أجملها,
    نادراً لما الواحد بيلحق أول كرسى فى الأماكن اللى لها جماهيرية عالية

    تحياتى

    ReplyDelete
  2. جزاك الله كل خير على ماكتبته

    بافكر انقل ماكتبته وابعته لمن اعرفهم

    اديني باقول لك اهو اني بافكر انقل موضوعك ده

    اوعى تتهمني بالسرقة احسن مايحصلكش كويس

    انا بقالي كتير مش باشارك في مدونتي حتى بس وضوع سرقة مدونات الحائر في دنيا الله ضايقتني جدا صراحة واعتقد ان فضح السارق افضل طريقة

    وزي ماالناس شغالة حملات كل شوية والتانية

    السطو على ابداع الغير يستحق حملة كبيرة

    وشكرا مرة اخرى على مبادرتك الطيبة

    وباقولها مرة تانية اهو

    يمكن انقل مداخلتك دي

    وماتخافش

    حقوق الملكية الفكرية سيتم التعامل معها حسب الاصول يااحمد باشا

    ادعيلي بقى ارجع ادون تاني

    حتى لو كنت ح انقل مداخلة لك

    ههههههههههههههههه

    ReplyDelete
  3. باهر هذا الباهت لاتجوز عليه الرحمة

    ReplyDelete
  4. يا جماعة: الصحفي اللي ماسك ديسك جرنال العربي الناصري ( مش فاكر اسمه دلوقتي)..الرجل دة بردة حرامي مدونات..وبينقل بالنص كوبي وبيست..
    تصدقوا اني مرة بقراله لقيت مكتوب في وسط مقالته (اضغط هنا للصور)!!..يعني حتي مش بيبص علي هو بينقل إبه!!!

    ReplyDelete
  5. إفضحوه ...

    إفضحوه في كل حتّة لكي يكون عبرة لمن لا يعتبر ...

    إشتكوه في وزارة الإعلام .. و في كل حتّة ...

    إعملوا فضيحة بجلاجل ....

    لأن سرقة دنيئة كهذه يجب أن لا تمر بسلام ...

    ReplyDelete
  6. في غياب قانون للنشر ينظم حقوق المدونين سيحدث أكثر من ذلك

    وماذا تقول في هذا الشخص المريض الذي يطاردني بأقذر الشنائم
    فقررت ان أحول التعليقات لأراها اولا ثم امررها
    ولم يكتفي بذلك أنما قام بعمل مدونه بأسمي ، ولكنها مكسوفه بالعربي
    واخذ من بوستاتي القديمه ونشرها عنده
    يعني سرق مدونه كامله وليست عده مقالات
    ولم يكتف بذلك
    بل ذهب هنا وهناك ليعلق في المدونات ويسب أصحابها بأسمس أيضا

    وبعضهم تجاوز تلك القصه بعد أن كتبت بوستا يوضح مافعله

    الا انه مازال يشتم في مدونه ابليس بأسمي واذا ضغط علي أسمه ستظهر مدونتي
    لأنه يضع اللينك الخاص بي


    قل لي ماذا أفعل في شخص مريض هكذا
    تفرغ بالكامل لمطاردتي ؟

    اعرف ماذا ستقول
    عليك بالتجاهل


    وهذا ما افعله

    لكن نحن فعلا بحاجه الي قانون ينظم
    عمل المدونات وعدم الأعتداء علي حقوقنا في النشر

    ReplyDelete
  7. أولاً : أحييك على مدونتك الرائعه المحترمه والتى شرفت وشرفت مدونتى بإشارة بسيط فى موضوع سابق اسمه أيوه إحنا المصريين مختلفين عن الآخرين
    ، حضرتك فعلاً مثال يحتذى ووقدرتك على التقصى والمتابعه مزهلة وفقك الله

    ثانياً : أقول ببساطه شديدة إذا أستباح الناس القتل فلا بكاء على الضرب ، هذا صحفى سرق موضوعات من مدونه فما بال من سرق مدونة بكاملها كما اوضحت مكسوفه عاليه وما بال من يسرق كتباً بأكملها من كتاب معتبرين ويطبع وينشر ويكسب كيفما شاء ، وما بال من يسرق بحث علمى بغرض الترقى او رسالته فى الماجستير والدكتواره ، اعلم ان السرقه هى السرقه ولكن انا قبل المجتمع كل ما زكرت وانتشر وإستشرى حتى أصبح فى حكم المعتاد فلا غضاضه فيما فعل الصحفى (هكذا يقول لنفسه) ، ولا تحدثنى عن حقوق النشر وحقوق الملكية الفكريه ان كان حق الحياه الكريمة ذاته مهدور فكل ما بعد ذلك هدر ، بكل اسف نحن نعبش عصر كل المستباح والسداح مداح

    ثالثاً : اوافق على فكرتك بفضح وتجريس كل من تسول له نفسه بهذاالفعل الحقير فهذا اضعف الأيمان فى ظل غياب وتغييب كل الحقوق، وسأشارك معك فى التشهير ولكن ارجو كل من يؤيد وسيشارك بدوره هو الأخر ان يستخدم أسلوب راقى مهذب بعيداً عن الأساليب والألفاظ مثل الواردة فى مودنات مثل علاء ومنال ومالكوم أكس

    رابعاً : فى شئ لا استطيع فهمه من البعض وهو فوبيا التعليق الأول ، فى اكثر من مدونه افتح التعليقات على اى موضوع اجد اول معلق عامل فرح عشان هو الأول ثم اتابع تعليقه فلا اجده علق بشئ غير انه فرحان اوى بالصف الأول وكفى ، طب ماذافعل بموقعه المتقدم هذا أو اى شئ اضاف للموضع تعليقه لا شئ !!!! سلوك لم استطع أستيعابه

    ReplyDelete
  8. Oh my God , ya 3aib elshom ... ma2sah

    ReplyDelete
  9. خلاص ربنا لا يرحمه
    متهيألى نقابة الصحفيين
    لازم تشوفلها حل فى أمثال هذا الباهر

    ReplyDelete
  10. اعتقد هذا تخصص عند جرائدنا العربية
    ، عندنا في السعودية جريدة الرياض لطشت صورة من مدونة سواليفي
    والمصيبة انها حطت عنوان موقعهـا على الصورة وفوق رابط المدونة الموجود مسبقاً

    ReplyDelete
  11. طب وحتى لو فيه قانون يحمي المدونين تفتكروا هتفرق مع حكومة بتاخد اللي تحبه من القانون و تسيب اللي ميعجبهاش
    بنفس إسلوب ولا تقربوا الصلاة
    للأسف الموضوع ده مالوش حل إلا من داخل الأشخاص انفسهم
    يعني الضمير و طول ما الضماير ميته ولا هيفرق قانون ولا يحزنون

    ReplyDelete
  12. بجد المشكله اللى تعبانى انى الواحد مبقاش يعرف ياخد الكلام من مين ولا يصدق مين ..لما صحفى يعنى شغلته يكتب بيسرق الكلام.. لما يبقى قاضى بيزور..لما دكتور يسرق رساله..لما علماء الدين المحترمين يقفوا يتخانقوا مع بعض ويفضلوا يعظوا فينا ..لما كل واحد يطلع يتحمق ويتكلم عن الاخلاق ونلاقيه متنيل فى ميت قاضيه ..وبعدين يعملوا عبط ويتعملوا عادى خالص كاننا مختومين على قفاناولا ليكون الواحد اتختم على قفاه وهو مش واخد باله

    ReplyDelete
  13. كويس قوي

    في كمية غريبة من الجرايد بتعمل الموضوع دة

    مش فاهمة مين اساسا اللي بيشغل صحفيين زي دول

    سؤال بقى .. هو مفيش طريقة ممكن يقاضى بيها الاستاذ دة غير فضيحة عالنت . قانونا مش المفروض يبقى فيه اسلوب لمحاسبته؟

    بس احييك على تصرفك الايجابي

    ReplyDelete
  14. يا جماعة: الصحفي اللي ماسك ديسك جرنال العربي الناصري ( مش فاكر اسمه دلوقتي)..الرجل دة بردة حرامي مدونات..وبينقل بالنص كوبي وبيست..
    تصدقوا اني مرة بقراله لقيت مكتوب في وسط مقالته (اضغط هنا للصور)!!..يعني حتي مش بيبص علي هو بينقل إبه

    بس العربى بيقول دى من المدونات وبيكتب اسم المدونة كمان انا متابع العربى يعنى وما شفتش حاجه ذى دى

    بس ايه الفضايح دى لرال ده حيبيع لبن بعد الفضيحة دى يا ابو حميد منبر شقير منبر من لا منبر له هههه ربنا يخليك لينا يا عم احمد

    ReplyDelete
  15. خليه يستاهل الفضيحه علشان يكون عبره لغيره لمن يفكر فقط بسرقه اي فكره من اي مدونه مش مقال
    اما غبي بصحيح

    انت ازيك ؟؟؟

    ReplyDelete
  16. ههههههههههههههههههههههههه

    حلوة قوي الصور يااحمد

    ربنا مايحرم المدونين منك

    روح ياشيخ

    وتعالى بسرعة

    اهو سي باهر ده بقى مش ح يعرف حتى يبيع لبن ههههههههههههههههههههههههههههههههههههه

    متصورة منظره وهو رايح يبيع لبن وبيخبط على ابواب الشقق وكل شقة تفتح يلاقي صورة من صور احمد في وشه

    باهر السليمي حرامي المنتديات

    هههههههههههههههههههههههههههههههههههههه

    ReplyDelete
  17. وصلتني أيضاً استغاثة أحمد على الإيميل
    فعلا يا شقير للغباء مذاهب و مشارب بس الغباء السباعي ده ما وردش عليا بصراحة
    ضحكتني الصور و خصوصا بتاعة أينشتاين
    تحس انه بيشرح نظرية النسبية الهطلية للصحافة الفنكوشية
    وبين إفلاس الصحافة التقليدية و زهزهة الصحافة الشعبية التدوينية,نقول: عالأصل دوِّن
    :)

    ReplyDelete
  18. طب و بعدين يعنى ؟؟ طب نروح فين؟ نعمل مدونات سريةبباس وورد؟
    طب نجيب منين عمرو خالد يحذر من سرقة المدونات زى الوصلات الغير شرعية؟
    فاكر مدونة حواديت؟ تدوينة: رز بلبن على اغنية فيروز : أنا لحبيبى سرقوه منها فى الأذاعة و بعدين لجأت لحل قانونى فى الشهر العقارى و كتبت : حقوق النشر محفوظة و فيه تعريض للمساءلة القانونية بيتهيألى ممكن تفيدنا فى الموضوع ده-
    حتى خواطرنا بتتسرق ؟ لحظات التأمل شديدة الخصوصية و الآراء الخاصة جدا؟
    طيب مانبعت للشباب اللى جم فى العاشرة مساءا أكيد يعرفوا يجيبوا منى الشاذلى و رولا خرسا تسيح لحرامية المدونات و تعمل غاغه .. وكده
    أحمد انت ليك كلمة - ابعت لعلاء و مالك يتصرفوا - مش الناس دى واصله؟

    ReplyDelete
  19. الحقوة توتو وقع منة وبيدور علية فى المدونات
    كل واحد ياخد بالة من لغاليغة لحسن باهر يسرقها منة
    دى نهاية كل باهر

    ReplyDelete
  20. العزيز احمد

    برغم انك لست المسروق وبرغم انى لست مدونة الا ان الخبر مستفز جدا جدا
    على الرغم من ان السبق الاول فى السرقة لم يكن لباهر هذا فقد سبقه صحفيون قاموا بنفس الفعل للعديد من المدونين ولم يتخذ اى موقف حيال هذا

    وكتابة كلمة حقوق النشر محفوظة ليست مجرد كلمة واقية لكن لها اجراءات قانونية لابد من اتباعها للحصول على هذه الحماية
    هل نضب فكر الصحفيين حتى يسرقوا من المدونات ام هل برع فكر التدوين فاصبح يطغى على الصحافة

    ان ما طالب به بعض المدونون من حماية بالانضمام لنقابة الصحفيين بشروط ومعايير معينة قوبل بالرفض الشديد من قبل جميع المدونين على اعتبار انها ليست نقابة انما رقابة
    وكانت محاولة للحماية

    هلى يمكن انشاء رابطة تسمى رابطة المدونين وتسن لها تشريعة وكيان قانونى مثل الجمعيات الاهلية مثلا
    لا اعرف قانونية هذه الفكرة لكن هل الاخوة الدارسين للقانون يمكن ان يفتونا فى هذا وتتولى هذه الرابطة حماية المدونين مثلا وكيفية حدوث هذا
    لا اعرف هى مجرد فكرة

    الطريقة المتاحة حاليا كما فعلت يا احمد هو فضح السارق بنشر خبر السرقة عند العديد من المدونين واهنئك حقا على مجموعة الصور التحفة التى بذل فيها مجهود وغرض السخرية من السارق واضح
    ربما على كل من يملك مدونة ان يقتبس منك بعض الصور وينشرها مقتبسة منك ليكون السارق عبرة لمن يعتبر

    تحياتى

    ReplyDelete
  21. العزيز أحمد
    أحب أن أشكرك مرتين الأولي لتصديك القوي والشجاع لهؤلاء المتسلقين والمنتفعين بمجهود الغير بدون وجه حق والسارقين بتبجح وعين قوية .. ألم يدرك ذالك الغبي بأن هناك ألف عين وعين سوف يسقطوه من مكانته ويلقبونه بالسارق الغبي .. علينا بأن نبعث لرئيس تحريره بالدليل علي السرق بل لجميع رؤساء ومديري التحرير في كل الصحف ومن يرتضي لصحيفته أن ينتسب مثل هذا اللص يكون قد حكم علي صحيفته بالسقوط وعدم المصداقية وأنا لا أري الكثير منهم يرتضي هذا علي صحيفته

    الأمر الثاني هو تقديري العميق ومع ضيق الوقت أيضا إلا أنك تغوص في أعماق النت لتأتي لنا بكل ما هو جديد ومفيد وذلك يستحق مني الشكر وأزعم أن مثلي كثيرون يدرون هذا المجهود النابع من نفس محبه للجميع
    لك تحياتي

    ReplyDelete
  22. برافو عليك يا احمد شرد للراجل

    ReplyDelete
  23. looooooooooooooooooooool

    والله ربنا ح يكرمك ان شاء الله

    الراجل باهر ده طلع ذكي اوي
    واتفضح فضيحة بجلاجل

    :)

    اتضح فعلا ان حقوق الطبع محفوظة في التلاجة

    ReplyDelete
  24. معاكم بإذن الله يا شقير
    http://te3mah.blogspot.com/2006/11/blog-post_116448667584665593.html

    ReplyDelete
  25. الموضوع اتحل

    http://t5at5a.blogspot.com/2006/11/blog-post_25.html

    ReplyDelete
  26. يا جيمي هوود
    الموضوع لم يحل
    مين قاللك كدا
    العالم دي بتهرج فعلا

    ReplyDelete
  27. حرااااااااااااااااامىىىىى

    هى الميدان دى تبع الصحافة الحرة ولا الصفراء ولا التعبانة

    سؤال برئ

    ReplyDelete
  28. الحمد لله اني بأشهد وأنا حي أرزق أول موقف تضامني حقيقي من شأنه أن يضفي الشرعية على مجتمع المدونين

    فضيحة الصحفي الأهبل ده وجريدته الصفرا سوف تعطي للأمور وزنا جديدا، وسوف تخل بموازين القوى الصحفية التقليدية لصالح القوى الصحفية الجديدة الناشئة، بشرط استغلال هذا الموقف بشكل صحيح، لا دخل للتهليل والتكبير والصياح والمزايدة فيه

    تحياتي يا أحمد، ومعكم قلبا وقالبا

    ReplyDelete
  29. والله وعملوها الرجالة
    ده احلى حاجة تتقال عليكم
    ودائما

    ReplyDelete
  30. ربنا يكرمك

    اد ايه اللى عملته كان جميل وعبقرى فى نفس الوقت

    رغم بساطته ورغم انه المفروض انه التصرف الطبيعى

    بس فى الزمن اللى مابقيناش نعرف يعنى ايه حقنا وازاى نطالب بيه وندافع عنه

    يبقى اللى انت عملته انت وحائر فى دنيا الله عمل ايجابى جدا

    ReplyDelete
  31. روح يا شيخ ربنا ما يرمى حد في طريقك ابدا
    دنتا بهدلته وشطفته ونشفته يا مان حرام عليك تعمل فيه دا كله
    بس حقيقي برافو عليك ، لازم التعامل بحزم ما اشباه الصحفيين دول اللي مفيش عندهم وازع ولا ضمير ولا شرف مهنة

    مدونتك غاية في الجمال ومواضيعها مكلفة قوي بصراحة
    اشكرك بشده وعنف على مجهوداتك الجميلة دي
    و الى الامام دائما
    دمتم بخير

    ReplyDelete
  32. يعني انت عايز الراجل يقعد يدور في خمس ست مدونات علشان يسرقله سبع مدونات
    اهو فتح النت علي صفحة اخونا حائر و شده جمال اسلوبه و راح فاصل النت علشان الفاتورة متجيش عالية و قال هيلا هوب
    و راح مكبير البوستات كلها
    و بالهنا و الشفا
    ---
    انا بقي يا عزيزي شقير سرق مني البيتا بلوجر اعز ما املك
    لا متفهمنيش غلط
    سرق مني الكومنت
    مش عارفة اسيب كومنت باسمي خالص
    و اهو كلنا مسروقين
    ---
    نصيحة اوعوا تحولوا علي بيتا بلوجرز
    ده حرامي كبير
    ---
    كلبوزة لكن سمباتيك
    من امام مدونتها بتعيط

    ReplyDelete
  33. Hi
    i really liked ur way demonstrating the topic
    i know it's a bit late , but i like to
    participate .
    I hope u don't mind publishing ur blog on my spaces ,
    i also wanna translate it into an english version , as it's an iternational issue .
    please , contact me about it at
    the__lotus__flower@hotmail.com
    find my space at
    http://1-lotus-per-world.spaces.live.com

    ReplyDelete
  34. sry , i didi see the later blog
    u can ignore my last comment completely
    thanx

    ReplyDelete