Tuesday, March 06, 2007

حواديت التاكسي


حواديت التاكسي


© Photo Copyright: Daniel Donnelly


واقع الحياة اليومية القاهرية المعاصرة بجميع أحوالها ومشاكلها وحلاوتها شيئ نعيشه يوميا تنجح بعض المدونات في رصده ويعجز إسلوب البعض في تحديده بشكل واضح ومؤثر

خالد الخميسي من هواة الحديث مع سائقي التاكسي الذي يعتاد ركوبه بصورة منتظمة قام بتجربة جديدة في رصد هذا الواقع لفئة من هم أسفل الطبقة الوسطى ، رصد خالد ماإستمع له من سائقي التاكسي خلال أحد عشر شهرا كاملة في كتاب أصدرته دار الشروق بعنوان تاكسي - حواديت المشاوير

صدرت الطبعة الاولى منه في ديسمبر 2006 والثانية في يناير 2007 والثالثة في فبراير 2007

الجميل في الكتاب ان خالد يحكي لنا 58 حدوتة يرويها لنا سائقي التاكسي معه تشمل رؤية ثقافية وإجتماعية وسياسية ودينية واقعية لهذه الفئة تتباين فيها تلك الرؤى بشكل واضح ، فسائق التاكسي يشعرك دائما أنه يفهم في السياسة والإقتصاد والدين والرياضة والفن .. إلخ

فمن وجهة النظر السياسية نسمع رأي سائق التاكسي في حركة كفاية وأمريكا والإنتخابات والعراق

فيقول عن مظاهرات كفاية في التحرير

السائق : الزحمة مش من المظاهرة .. وهي دي مظاهرة أصلا .. إحنا زمان كنا بننزل الشارع بخمسين ألف .. بميت ألف .. إنما دلوقتي مفيش حاجة ليها معنى .. كام واحد نازلين من بيتهم عشان حاجة ماحدش عارفها ، فيه ييجى متين واحد ماسكين لافتات وحواليهم ألفين عسكري ومتين ضابط وعربيات أمن مركزي قافلة الدنيا ، حكومة مرعوبة ركبها بتخبط .. حكومة والله نفخة وتقع .. حكومة من غير ركب

وعن أمريكا يقول السائق
السائق : الأمريكان الواحد مش فاهم لهم حاجة .. بيساعدوا مبارك وبيساعدوا الإخوان وبيساعدوا المسيحيين اللي عاملين مشاكل بره وبيدفعوا فلوس للسعودية اللي بتدفعها للإسلاميين اللي بيعملوا عمليات إرهابية بيها ضد قال يعني أمريكا ، لخبطة جامدة تخلي الواحد يتمخول


ومن وجهة النظر الإجتماعية يتناول رؤيته البسيطة لمشكلة الدروس الخصوصية وفتيات الليل والتطرف والنصب وقسط السيارة

ويقول عن سحب الرخص
السائق : والله ماأنا فاهم وزير الداخلية قبل ماينام بيفكر هو بيعمل فينا إيه ؟ بيفكر إن إحنا ولاد ناس متعلمين وأهلنا تعبوا في تعليمنا قد إيه ؟ بيفكر قد إيه بنتهان من رجالته في الشارع؟ بيفكر وهو راسه على المخدة إن إحنا خلاص مش قادرين وح ننفجر خلاص .. والله ماقادرين نستحمل والداخلية بتعاملنا كأننا مجرمين .. وطبعا كدابين ، لما إمبارح بقول له ماكنتش بتكلم في الموبايل .. قالي ماإنت ماسكه أهه وكنت بتتكلم ، مافكرش لحظة واحدة إني ممكن أكون صادق ، صادق إزاي إذا كنا كلنا كدابيين وكلنا ولاد كلب ولازم نضرب بالجزمة القديمة ، والله أنا حاسس إننا مش بني آدمين .. إننا جزم قديمة ، إيه رأيك ياأستاذ أنا بني آدم ولا جزمة ؟

وقصص سائقي التاكسي لاتنتهي فهناك من هو كل حلمه أن يذهب بالتاكسي لجنوب افريقيا ليشاهد كأس العالم 2010 ويدخر لذلك ، وهناك من يحكي كيف يعمل مهرب للسجائر في ليبيا ، وهناك من يحكي قصة بحثه عن الرخصة المسحوبة ، وهناك من يعمل بالبورصة ، وهناك من أهلكه حب واحدة شر... يقصد فتاة ليل ، وهناك من يستمع لشرائط محمد حسين يعقوب ، وهناك من أجهده توفير اللبن الذي تعشقه زوجته .. وقصص لاتنتهي

تاكسي حواديت المشاوير لخالد الخميسي .. كتاب يأخذك في جولة معه في شوارع القاهرة المختلفة من المنيل لعباس العقاد لجاردن سيتي للدقي للجيزة للكورنيش تشعر وكأنك تركب معه التاكسي ، كتاب إستمتعت بقرائته في يوم واحد على مرتين فخالد لايظهر كثيرا في الحوارات بقدر مايترك المجال مفتوحا بالكامل بدون أي تدخل بمفردات بسيطة لنجم كتابه وهو سائق التاكسي

سبقني بالتعليق على الكتاب من المدونين كوكاية ، ربيع

25 comments:

  1. انا سمعت كتير عنه..شكلي هقراه قريب

    دائما بتقدملنا الجديد كده يا عمنا

    تحياتي

    ReplyDelete
  2. نحن شعب من الفلاسفة كلاً بطريقته

    ReplyDelete
  3. الكتاب فعلا رائع وكان لى الحظ أن أحضر مولد الفكرة والكتاب ايضا حيث ان خالد الخميسى هو صديق شخصى وكان فى قمة الحماس وهو يسألنا عن الفكرة وهى فى مهدها

    طبعا جالى الكتاب بإهداء رقيق وقبل حتى طرحه فى الأسواق

    هيفرح جدا لما اقوله انك كتبت عن الكتاب دة فى مدونتك أنت والآخرين

    تحياتى لقارىء مثقف لا تفوته فائتة

    ReplyDelete
  4. أنا لسه مخلص الكتاب
    الفكرة حلوة جدا
    والكتاب موضح كل اللي إحنا عايشينه
    وسواق التاكسي فعلا زي ما خالد وصفه
    ترمومتر الشارع

    تحياتي

    ReplyDelete
  5. الكتاب فكرته حلوة جدا , ورغم انها انداست قبل كده الا ان برضه هى تيمة ممكن يترصد منها حاجات كتير قوى

    ReplyDelete
  6. الكتاب جميل وممتع
    اشتريته من معرض الكتاب السنة دي وقريته في نفس اليوم رغم اني كنت راجعة من المعرض مهدودة الحيل

    فعلا كتاب ممتع وشيق

    ولكن لم يعجبني فيه بعض الالفاظ الخادشة للحياء

    فرغم ية الكاتب الحسنة في عدم التدخل بالصياغة الا ان دلك لايعني ان يكتب كلمات خارجة في الكتاب لانها وردت على لسان سائق ما

    لو كان اصاغ الجمل بعيدا عن الالفاظ الخارجة ربما كان افضل

    وهدا لايمنع ان الكتاب ممتع

    ReplyDelete
  7. ممكن حد يعمل عن الميكروباص

    ReplyDelete
  8. والله الكتاب ده اول مانتزل اتسحب جدا من السوق
    ونزل منه حتي الان 3 طبعات وكنت سعيد الحظ ان احصل عليه
    كتاب رائع جدا ولمس كل الناس وكمان رأي المسيري وجلال امين عنه كان علي حق

    ReplyDelete
  9. انا قريت تعليق ربيع و تعليقك و فعلا كتاب ظريف و انا فعلا عايزه اجيبه

    ReplyDelete
  10. فكرة الكتاب أكدتلي ان محتواه هيبقي شيق و لذيذ .. لاني شخصيا من هواة الكلام مع سواقين التكسيات برضة خصوصا ف المشاوير الطويلة و بكتشف برضه مدي تنوع المصريين .. تحياتي لصاحب الفكرة العبقرية ..

    أما تناولك للموضوع فكالعادة يزيد الموضوع ثقل ..

    نقطة مهمة .. فيه دربكة حاصلة ف بوست 2023 انا مش مدركاها قوي .. بس بصراحة شايفة ان موضوع الكوبي رايت ده مش انجاز لسبب .. اللي عايز يسرق صورة أو موضوع ممكن ببساطة يعمل برينت سكرين و يأيف الصورة و يسيفها و يستخدمها برضه .. و ف نفس الوقت لما بيكون النت سئ و بحاول اعمل كليك يمين علشان اختار فيو بيكتشر بلاقي كلمة كوبي رايت .. انا بحترم حريتك ف التعامل مع البلوج بتاعك يا باشمهندس و التولز اللي بتستخدمها علشان تحصنه من السرقة و الاستغلال طبعا.. بس حبيت اقول وجهة نظري و اتمني انك تحاول تحقق الامان الكافي لمدونتك بس تحل مشكلة الصور اللي ما بتتحملش دي .. ماشي ؟ و مش هقول سلام لحسن تفتكرني ادهم انا كمان ..
    :)

    ReplyDelete
  11. انا لما كتبت تاكسي عملت الفكرة مختلفة خالص

    بس الحوار اللي نت بتحكية ممتع جدا وشيق

    اكيد هدور علي الكتاب

    وياريت تبقي تقرا التاكسي عندي بس ما تقارنشي علشان ما فيش مجال للمقارنه

    ReplyDelete
  12. كانوا زمان بيقولوا لنا أن سواقين التاكسي بيشتغلوا مع مباحث امن الدوله فلما يتكلموا في السياسه أو اي حاجه ماتردوش عليهم
    بس من الواضح ان الأمر أتغير دلوقتي وبقوا اللي بيركبوا معاهم هم اللي بيلعبوا الدور ده
    تحياتي لك ياحمد باشا

    ReplyDelete
  13. لذيذة و جميله فكره ثياس نبض رجل الشارع العادي من خلال سائقي التاكسي...أنا اخر تاكسي ركبته اتكلمنا في الخصخصه بس الغريب أن السواق كان مؤيدا لها بشكل غير عادي
    مستنيين حضرتك يوم الجمعه
    تحياتي لك

    ReplyDelete
  14. ادينى قريت تعليقك على الكتاب وتقريباً حفظتة صم
    طيب ما تبعت الكتاب نفسة وانا اقدر احكم واقول رأى عن اقتناع واعتقد دار الشروق كتبها مش غالية

    ReplyDelete
  15. i liked that book too

    i loved the one about the guy who loves a prostitute too

    and the one about el metro hedeyet mobarak le sha3bo :)

    i didn't mind the language tab3an because it reflected the reality of the conversation

    nice review ya bashmohandes ya kebeer :)

    ReplyDelete
  16. I liked the book a lot! it spoke of many things I experienced myself..! very realistic..in such a good language!!

    liked how you handled that here in your post as well...masha Allah!!

    ReplyDelete
  17. بما أنى من الصعب حصولى على كتاب زى دة
    الا أنى استمتعت بنظرتك لمحتواه

    كويس ان حد أخد نظرة الغير وسجلها على صفحات ونقلها للآخرين

    نادرا ما يحدث خصوصا لمثل هؤلاء المهمشين اللى كلمعلومات الناس عنهم من الاعلام المصرى فقط كلها ألفاظ جارحة ومخدرات واغتصاب
    لا يعلمون أنهم من قواعد هذا المجتمع
    وأنهم يستحقون النظر اليهم بعين أخرى

    تحياتى

    ReplyDelete
  18. توضيح بخصوص البوست بتاعي اللي عمل قلق وزعل ناس مني انا بحترمهم وبحبهم
    تم توضيح وجهه نظري في بوست منفرد
    اقراه وقولي ليا رايك ؟
    رايك يهمني

    تحياتي
    الدبور

    ReplyDelete
  19. انا لسة قاري الكتاب الرائع ده

    بس خالد الخميسي قال انه نقل الكلام الحرفي اللي بيقوله سواق التاكسي في الشرع المصري في هذه الفترة من الزمن

    مع انه كان حزر جدا في عرض الالفاظ والسب
    ولم يكتب الشتائم كما يقولوها واكتفى بتبديلها بالالفاظ التي سبقة غيرة من الكتاب بذكرها

    كان نفسي ينقل كل حاجة بالحرف

    ده رأيي

    تحياتي و احتراماتي

    ReplyDelete
  20. فكرة حلوة جداً أصلاً!
    كل واحد فيناأكيد عنده قصص كتير من ركوب التاكسيات، بس انه يعملها فى كتاب ..فكرة جامدة

    ReplyDelete
  21. اسمي منور البوست الصراحه
    :)
    :)

    ReplyDelete
  22. somalian life
    شكرا

    frozen love
    هو فعلا يستحق .. بالتوفيق في الحفلة

    Mohamed A. Ghaffar
    وأحلى حاجة التجديد والتنوع

    ياسمين
    مفاجأة جميلة إنك تعرفي خالد وإتكلم معاكي على الكتاب وهو لسه فكرة
    الجميل حاجتين الفكرة كفكرة ثانيا الصياغة نفسها عجبتني جدا
    بلغيه تحياتي

    The Alien
    مفاجأة يابيشوي إني ألاقي حد تاني قرأ الكتاب باحس فعلا إني مش باكلم نفسي
    فعلا الجميل في الكتاب زي مابتقولي هو عرض وجهة نظر الغير حتى لو كانت مخالفة لوجهة نظرنا

    hesterua
    أهلا ببورسعيد كلها ، هي تيمة فعلا يمكن يترضد منها حاجات كتير لن عامل الزمن بيخليها متجددة دايما

    Bella
    سبقتيني بكتير في قرايتك للكتاب وهو فعلا زي مابتقولي يقرأ مرة واحدة أو في مرتين بالكتير
    بالنسبة للغة اعتقد إن الوضع هايتغير لو أعاد صياغة بعض الكلمات بنفسه لأن أجمل مافيه هو لغة السائق ولم تكن اللمات إباحية بالشكل الكامل

    توتة توتة
    الميكروباص !! ده مش يبقى كتاب ده عايز موسوعة
    :)

    مـحـمـد مـفـيـد
    فعلا انا ماذكرتش ماكتبه عبد الوهاب المسيري عن الكتاب بس فعلا كلامه شهادة جميلة في حق الكتاب

    innominatex
    فعلا هو كتاب يستحق إنك تشتريه فيه رصد جميل لنبض الشارع

    Romantic Rose
    ياريت تشتريه ياروز أنا فعلا شايفه من النوع اللي باحبه غفي الكمتابات وخصوصا إنها حوارات حقيقة وليست مؤلفة
    حكاية اللكوبي والباست والرايت كليك بناء على رغبة كتير سوف أشيلها خلاص ياست الكل

    ادم المصري
    انصحك تقراه وخصوصا غن الحوارات الي ذكرتها في البوست عندي كانت عشوائية وليست منقاه يعني كله بنفس الدرجة
    وطبعا هاروح اشوف موضوع التاكسي عندك

    MAKSOFA
    فكرة المباحث والبوليس دي مجنناكي ومسيطرة عليكي جامد
    عموما رؤيتك صح المرة دي الراكب هو اللي كان زي بتوع المباحث بيرصد كل حاجة
    :)

    micheal
    ماهو الجميل يامايكل إنك بتكتشف وجهات نظر ليهم برده بعيدة عن توقعاتك خالص زي مابتتكلم عن سائق التاكسي والخصخصة

    asadma7bos
    الكتاب انا جيبته من كارفور بالصدفة وكان بأربعتاشر جنيه
    لو لقيت نسخة ادوبي سوفت هانزلها للتحميل
    :)

    KareemFromEgypt
    فعلا حكاية البروستسيوت جامدة الراجل كان بيتكلم بحرقة والمصيبة إنه عارف وطبعا هدية مبارك لشعبه دي حكاية لوحدها عجبتني كتير
    نورتنا ياكريم

    Epitaph
    طبعا اكيد الكتاب عجبك لأنه من طبيعتك بيرصد التفاصيل الصغيرة وبيعمل عليها حكاية وغنتي بسم الله ماشاء الله عليكي ليكي حاسة بتقدري ترصدي فيها التفاصيل الصغيرة بشكل رائع
    عجبني عرضك للكتاب داخل بوست اكثر من رائع

    ahmEd_H
    ياترى إشتريته ولا لسه ؟؟

    شــهــروزة
    ليه صعب عليكي حصول على كتاب زي ده ؟؟ ماهو في كل حتة موجود
    إذا ماعرفتيش قوليلي وانا أجيبهولك لغاية عندك

    الدبور
    أسامة البوست اللي عامل قلق اللي انت أشرت إليه مالقيتوش واصح إنك حذفته
    وده نادر إنه بيحصل في عالم التدوين

    شادي فايد
    جميل ياشادي إنك قريت الكتاب ، هو الراجل حذف كلام بس قال إنه مستشاره القانوني قاله بلاش حتى لايتعرض لقضايا قذف وسب أما الكلمات التي خرجت من السائقين فأعتقد إنه نقلها حرفيا وهي ماأغصبت البعض وطلب إنه كان يستبدلها ولست مع هذا الرأي
    تحياتي

    Eman M
    فعلا ياإيمان الجميل فعلا فكرة إنه يجمعها في كتاب على أد ماهي بسيطة لكن صعب تيجي بسهولة في دماغ حد
    نورتينا

    koukawy
    تدوينتك عن الكتاب شجعتني إني أكتب البوست ده وخصوصا غني ماكتبتش عن كتب إتنشرت قبل كده

    تحياتي للجميع

    ReplyDelete
  23. السلام عليكم ورحمة الله وبركاته
    فكرة الكتاب بجد رائعه
    كانت نفس الفكره تقريبا بتتناقش في برنامج اسمه تاكسي بيجي علي قناة
    ام بي سي

    شرفوني في خمسة فضفضة

    ReplyDelete