Sunday, March 11, 2007

عن التحرش الجنسي ... سألوني


عن التحرش الجنسي ... سألوني


© Photo Copyright: Sushma Sabnis


هي : يعني إيه تحرش جنسي

التحرش الجنسي ده ممكن نقول عليه في أبسط تعريفاته إنه سلسلة من المضايقات الغرض منها الحصول على منفعة جنسية دون رغبة الطرف الآخر ، وده ممكن يحصل بالنظرات بالإيماءات بالكلمات حتى يصل للملامسات والأفعال الحسية

هي : إيه ده ؟؟ ده إنت باين عليك فاهم بجد ، طيب الواحدة تعرف إزاي إنها مُتحرش بيها جنسيا ؟

دي حكاية طويلة .. بس لازم الأول أقول توضيح بسيط إن التحرش الجنسي ده ممكن يحصل بين رجل وإمرأة أو العكس أو بين إثنين من نفس الجنس ، أو الأطفال وعشان ماتوهيش مني خلينا نمسك شكل واحد وهو الشائع وليس الوحيد وهو تحرش الرجل بالمرأة

لازم تعرفي إن المرأة ممكن أن تكون عرضة للتحرش في أي وقت ، في البيت من أقاربها أو جيرانها أو حتى محارمها ، في الشارع ، في وسائل المواصلات ، وفي محل العمل

هي : برده ماجاوبتنيش ، تعرف المرأة إزاي إنها متحرش بيها جنسياً ؟

بالراحة عليا شوية .. عشان أوضحلك لازم نمسك حالة معينة لأن الموضوع بيختلف من مكان لآخر وليكن هنا محل العمل

أولاً
في محل العمل بتكون المرأة المُتحرَش بها هي مرؤوسة أو موظفة وليست مديرة حتى يسهل التحرش بها والسيطرة على أي موقف

ثانياً
المتحرش - بكسر الراء - بيكون في وظيفة قيادية وغالباً بيكون الرئيس المباشر حيث تجمعهم لقاءات كثيرة طوال اليوم وللمتحرش صفات يسهل إكتشافها ، لازم يكون أكبر منها سناً وعمره تقريباً في أواسط الثلاثينات ومافوق حيث تكون تلك المرحلة العمرية خصبة لتولد النزعات التحرشية وخصوصاً وإحنا بنتكلم عن التحرش في مجال العمل كما أن له مواصفات أهمها إنه وسيم وشيك ولبق وكلامه مرتب وذو شخصية قوية ناجح في عمله له نزعات قيادية بالرغم من إنه يبدو شخصية مرحة من آن لآخر ، بالإضافة إلى أنه على قدر كبير من الذكاء

ثالثاً
المرأة المتحَرَش بها - بفتح الراء - غالباً بتكون شخصية خجولة قليلة الكلام جميلة تحب المرح تتمتع بطيبة وقلب مفتوح وأهم صفة أنها تكون مجاملة وطبعاً أصغر منه سناً

رابعاً
لايحدث التحرش بين يوما وليلة ولكن لطبيعة العمل يحدث تدريجيا وعلى فترات متفاوتة وأحياناً متباعدة وغالبا لاتدرك الضحية أنها متحرَش بها إلا في مرحلة متأخرة

هي : مراحل .. إزاي ؟

مهم جداً إنك تعرفي إن المتحرش - بكسر الراء - باله طويل أوي ومتأني جدا فهو لايقوم بالتحرُش مرة واحدة ، فيقوم بالإعداد له على مدار شهور تطول أو تقصر حسب إستجابة الضحية وخلال تلك الفترة تتنوع التحرشات الإبتدائية

هي : برده إزاي .. إديني مثال

في البداية يقترب من الضحية ويعبر لها بإسلوب رقيق عن حسن إختيارها لملابسها أو كيفية إنتقاء ألوانها أو جمال البرفان الرائع الذي تتعطر به ، وهي بطبيعتها مجاملة فلن تحاول صده على مجاملته الرقيقة بل تشعر بسعادة غير عادية تجعلها تتروى وتنتقي بشكل أفضل وأجود ماعلق عليه

ثم ينطلق بعد ذلك في بعض الكلام عن الحياة الخاصة بها بشكل عمومي مبديا نوعاً من التعاطف مع أي كلام يقال
وإن لم يجد حديثاً يبدي فيه تعاطفه ، يبدأ في اسئلة من نوعيه .. إيه لمسة الحزن اللي في وشك دي .. إحكيلي فضفضي لو أقدر أساعدك في حاجة أو أعملك حاجة ، ومين هي المراة التي لا تشعر أنه يوجد في حياتها شيئ يضيف لمسة حزن على الوجه ولو لم تكن موجودة

بعد ذلك ينطلق المتحرش في مواجهة الضحية سريعاً بالسؤال يومياً عن ماجدٌ في ما حدثته سابقاً ، ولاينسي أنه بالرغم من أنه يبدو عاطفياً إلا أنه ذو شخصية مرحة ، فيبدأ في إلقاء بعض النكات أو القفشات والتي تبدو فعلا لذيذة ثم يستثني الضحية من المجموعة ليقول لها قفاشاته منفرداً وتنقلب القفاشات إلى نكات ثم نكات تحمل مغزى جنسي
بعد كده يقوم أثناء الأحاديث الخاصة والشخصية بإلقاء بعض الكلمات التي تحوي معنى قريب عادي ومعنى آخر جنسي فإذا إستجابت أكمل ، وإذا أبدت إندهاشها أو عدم تقبلها أصر على المعنى العادي القريب ، وغالبا هي لن تبدي عدم تقبلها بداعي الخجل فلعله فعلاً لايقصد المعنى البعيد

ثم يزاد الحوار سخونة وتزيد فيه الكلمات التي تحمل معنيين ويغلب هذا النوع من الكلام أكثر على الحديث حتى يصبح هو العادي وتتحول النكات إلى نكات شبه جنسية وتتطور الأمور يوماً بعد يوم لتصبح نكات جنسية مكشوفة حتى يتسنى اللحظة المناسبة ليذكر النكتة بمفرادتها اللفظية الأصلية

هنا تكون الضحية جاهزة لغزو من نوع جديد ومتطور وهو الملامسة يالأيدي لثواني ثم لمدد أطول ثم يقترب التلامس من الوجه والشعر والملامح حتى يصل إلى المراد في النهاية من الملامسة الجسدية وملامسة الأعضاء

هي : ياسلام .. طيب وهي ليه ماترفضش وتتكلم وتقول ؟

أولاً مافيش حاجة تؤكد كلامها ، ثانياً ماحدث قبل المرحلة الأخيرة لايمكن إعتباره شيئا يدين المتحرش ، ثالثاً هي هاتخاف تشوشر على سمعتها وتبان إنها فتاة لعوب إستطاعت إستدراج المدير الوسيم المتميز ذو السلطة لأن الغلط دايما بيكون على الست ويقولوا إنتي اللي شجعتيه وزميلاتك هايقولوا بينهم وبين نفسهم طيب ماإحنا أهوه إشمعنا ماعملش كده معانا ، هي اللي مش محترمة وطبعاً هن لايدرين أنهن أقل إثارة من زميلتهن ، عشان كده ماتقدرش تتكلم

هي : طيب والحل إيه .. تعمل إيه ؟

لازم المرأة تنتبه لده من البداية فترفض الكلام عن حياتها الخاصة ، مرحها لايدعها تتقبل النكات الخليعة ، تحذر من محاولات المعاكسة الأنيقة وتتجنبها ، تتفادى دائما الجلسات الثنائية ... إلخ

هي : تعرف ياأحمد بعد الكلام اللي قلته ده كله أقدر اقول عليك إنك بتتحرش بي جنسيا ومن مدة كمان وعديت مراحل كتير كمان

أنااااااااااااااااااااااااااااااااااااا !!؟؟؟ .... سلاموا عليكوا

هي : إستنى بس تعال لما أتحرش بيك شوية ... إممممممم ... جبان

59 comments:

  1. مش ممكن بوست فى منتهى الجمال

    عشان تحكى التفاصيل دى يبقى لازم كنت بنت قبل كدة فى عالم آخر

    بجد تحياتى على الشرح الدقيق المفصل والمفسر وأشكرك بالفعل

    أرجو أن تتابع بوستاتك وأن تقدم لنا عن التحرش الجنسى بوست آخر يرد فيه ما يخص التحرش بالأطفال .. موضوع خطير جدا جدا جدا .. ومنتشر للأسف .. جدا

    ReplyDelete
  2. طرح هايل لموضوع خطير ومهم زي التحرش الجنسي..أهنئك يا أستاذ أحمد و أضم صوتي لياسمين في المطالبه ببوست عن ظاهرة التحرش بالاطفال
    تحياتي لك

    ReplyDelete
  3. اكثر ما أعجبنى فى الموضوع نهايته

    واسمح لى ان اختلف معك قليلاً
    أرى انه قد غلبت على المقال صيغه التغليب رغم انه لا يحتملها من وجهه نظرى المتواضعه جداً، فما زكرته من تفاصيل حقيقى وواقعى جداً (أنت دارس رجاله بصحيح) ولكنه نموذج من عده لا يفوقهم ولا يفوقوه

    سعيد بعودتك للكتابه

    ReplyDelete
  4. العزيز احمد
    على ما يبدو من الحوار استطيع ان اصف نسبة كبيرة تصل الى 95% من رجال المحروسة بانهم متحرشون
    وليس بالاخص المحروسة ولكن بالاعم فى الرجال
    ففى مجال العمل او اى قطاع
    امتداد العلاقة لاوقات طويلة يذيب الفواصل والحدود
    والحداثة والتطور صبغت الافكار التى اعتنقناعا عبر سنوات بصبغة جديدة
    فكل من تمسكت بحاجز واضح يحدد نوع العلاقة هى معقدة وتحتاج علاج طويل للتخلص من العقلية القديمة بينما الفتاة السبور الكول يعتبر عادى جدا هذا السلوك
    اهم نقطة اشرت اليها فعلا هى عدم رضاء الطرف الاخر لان النظرة السائدة لحميمية العلاقة المشهودة على الساحة تجعل البعض يلتبس فى صورة التحرش
    خوف الضحية دائما هو العنصر الذى يلعب عليه المتحرش والنتيجة استمرارية
    يتطلب الموضوع جرأة وثقة فى النفس ورد فعل سريع مع حذر فى التعامل وبسهولة يمكن بعدها ردع المتحرش
    شكرا وعلى ما يبدو سوف تضطر لكتابة فصول عن انواع التحرش

    تحياتى

    ReplyDelete
  5. سيدى العزيز شوكير

    : مش هاقولك البوست حلو او الكلام اللى مالوش معنى ده قد مكان البوست حساس اوى

    و واقعى أوى
    و أعترض مع ياسمين لما قالت انك لازم كنت بنت قبل كده

    أنا رأيى انك كنت متحرش محترف
    خلاص خلاص
    بنكت مش أكتر

    لا بجد
    هو فعلا فى ظواهر تحرش تانيه كتير
    لكن أكترها دايما بيكون
    تحرش الرجل بالمرأه
    حضرتك اخترت هنا
    أسهل المواضيع
    العمل
    الدخول على المتحرش به بطريقه أعتبرها للثعالب أقرب
    و وصفك الدقيق لشخصيه المتحرش فعلا دقيقه
    أنا عن جد بطالب ونفسى انك تكلم أكتر
    قبل ما ندخل عن نوع تانى من التحرشات
    زى تحرش الأطفال
    أو تحرش المرأه بالرجل
    عايزة نتناقش فى الموضوع ده من جميع جوانبه
    تحرش العمل حتى لو كان اكترهم بس أخفهم فى آلامهم
    لازم نكلم عن تحرش الأقارب
    تحرش المحارم
    لازم نكلم عن الوعى
    ونقاط السلبيه

    ReplyDelete
  6. ممتاز يا شقير
    الأكثر تعقيدا ان وضع حدود بعد عدم وجودها هو صعب على كثيرات
    يعني كثير مش بيعرفوا بعد ما الأمور تتعقد و تظهر نية المتحرش انهم يبدأوا بوضع حدود محتلفة (مش عارفة كلامي مفهوم ولا لأ , أنا مش مركزة أصلا) و لذا أتفق معك في القرة الأخيرة تماما

    ReplyDelete
  7. أيوه يا بلو روز

    أنا فاهمه قصدك
    بعد ما بتفهم بتحس انها لو بدأت تعمل حدود هاتبقى سخيفه او شعور فعلا غريب كده

    بس الشعور ده أحسن ميت مرة لما تتحولى من بنى آدمه لصيده سهله

    أفتكر ان كل ده تجارب فى الحياه
    يعنى أول مرة تحرش مش زى تانى مرة تحرش مش زى تالت مره

    لو كنتى ساذجه فى الاول
    لازم تتعلمى الدرس صح

    ReplyDelete
  8. ممتاز يا شقير
    الأكثر تعقيدا ان وضع حدود بعد عدم وجودها هو صعب على كثيرات
    يعني كثير مش بيعرفوا بعد ما الأمور تتعقد و تظهر نية المتحرش انهم يبدأوا بوضع حدود محتلفة (مش عارفة كلامي مفهوم ولا لأ , أنا مش مركزة أصلا) و لذا أتفق معك في القرة الأخيرة تماما

    ReplyDelete
  9. ""بس الشعور ده أحسن ميت مرة لما تتحولى من بنى آدمه لصيده سهله ""


    نبيذ
    الحكاية مش حكاية شعور
    الشخصية المتحرش بها هي في الغالب أصلا يتم انتقاؤها ضعيفة , و بالتالي اتخاذ موقف حتى لو كان تغيير في طريقة التعامل مش بيكون سهل , لأن عادة المتحرش مش بيسيب التغيير يحصل بسهولة

    ReplyDelete
  10. ظريف قوى الموضوع ده
    و خاصة الشرح الى بيظهر انك محترف تحرش و عارف الانه و بتكتب عن سابق خبرة
    يعنى من الشمخ الجوانى
    تمام
    انا فخور بيك استمر
    انت على الطريق الصحيح
    يا سلام بقى لو تقولنا عن تحرش المرأة بالرجل
    يبقى ظريف برضه
    انا عندى نقطة كده احب اوضحها
    كلامك ممتاز و متناسق و موزون
    لكن ميفسرش
    وضح التحرش فى الاوتوبيس مثلا
    او فى الطريق العام او فى المولات
    انت قلت انه بيرتيله و ان الرجل وسيم و قيادى
    انا مختلف لن مواصفات الرجل لو بالطريقة دى
    يتحرش ليه لما اى بنت تتمناه
    المهم شوفلنا حل فى تحرش الاوتوبيسات
    لأنه بلا تحضيرو لا سابق معرفة
    كل الى اقدر اقوله
    ان التحرش نوع من انواع محاولة فرض السيطرة على الاخر بغرض اظهار قوة منقوصة لدى المتحرش

    ReplyDelete
  11. صحيح
    فيه سؤال فعلا جه في بالي لما لقيت اتهامات موجهة لشقير انه متحرش
    هو الناس مش بتلاحظ ؟؟
    يعني بالنسبة لي أنا باعرف شخصيات المتحرشين في أماكن العمل من تصرفاتهم , و عادة المحيطين بيفهموهم , هو فعلا العادي ان السلوك دا مش بيكون ملاحظ لدرجة ان اي حد يتكلم عنه لازم يكون مارسه بنفسه ؟؟؟

    بردو ماعرفش كلامي مفهوم ولا لأ
    أنا تركيزي النهاردة تحت الصفر

    ReplyDelete
  12. واو انت فظيع بجد
    بحييك
    و بشكرك

    ReplyDelete
  13. هههههههههههههههههه
    هههههههههههههههههه

    ايه الجمال ده

    والله احسن ما قرأت في موضوع التحرش ده

    ReplyDelete
  14. ممتاز فعلا يا شقير.. بما انى على ابواب العمل.. وعرفانى خيبة ولا بفهم
    :S
    بتصدم بس

    بس اكيد ح عيد قرائته مرة بل مرات.. عشان افهم الدنيا ماشية ازاى صح

    ياريت من دا تانى من فضلك
    واحسن حاجة فعلا انها جاية من رجل..
    ربنا يكرمك

    ReplyDelete
  15. واضح انك متحرش كبير قوي قوي
    ده ايه الخبرة الكبيرة دي , ويا تري انت وصلت لأي مرحلة
    بتهيألي انت عديت بكتير
    ولا ايه؟
    بس الموضوع كان عايز صورة اكثر تعبيرا من كده واكثر سخونه

    ReplyDelete
  16. انا سعيد جدا باتصالك وكان نفسي احضر اللقاء لكن ظروف خاصة منعتني
    لكن علي العموم تتعوض ان شاء الله
    د. خالد عزب

    ReplyDelete
  17. استاذ / احمد
    بصراحة هايل جدا انا بعتبر ده بمثابة بحث لازم كل واحدة تقراه انت كاتبه باسلوب محترم جدا وبتفاصيل هايلة شكلك كنت مدير جامد اوى
    هههههههههه

    ReplyDelete
  18. لسه كنت بفكر ف موضوع التحرش
    وكنت عايز أكتب عشان أفكر الناس بالي حصل
    واللي بيحصل كل يوم ف بلدنا
    ولقيت البوست بتاعك فإتبسطت

    التحرش ف العمل حاجة موجودة ف كل شركة ومكتب
    والمفروض البنات يبقي عندها ثقة أكتر من كده
    لازم يتعلموا ياخدوا حقهم ويواجهوا
    لازم ميسكتوش لما حاجات من دي تحصل
    إفضحوا المتحرشين
    إفضحوهم

    تحياتي لاستاذي

    ReplyDelete
  19. دا كيف تتحرش بفرد ما
    طب كيف تتحرش بشعب

    اعتقد ان الموضوع لن يختلف كثير
    بقين حلوين أو ايام السلطة وشوية ترفيه في الإعلام واقتراب من بعض الرؤوس التي تزين
    ثم

    فاصل
    من تحرش السلطة بالشعب

    مع تحياتي

    ReplyDelete
  20. دي مصيبة
    انما حقيقية

    ربنا يستر

    بس هي تحمي نفسها ازاي طول ما في بنات لسة سلبية و بتخاف من الشوشرة و الفضيحة!!

    تحياتي

    ReplyDelete
  21. رغم ان موضوع التحرش الجنسى يعتبر مادة مستهلكة الا انك تناولت الموضوع بطريقه حلوة وهيا طريقة هو وهى
    لكن بردو تناولت الموضوع من ناحية واحده وهيا تحرش الرجل بالمرأة فى العمل
    طيب والاتوبيسات والمترو والميكروباص

    وبعدين تحرش الست بالراجل هوا ده مش موجود
    حضرتك عارف ان موجود وبوفرة كمان

    وبما انك دخلت وعرفت جوة كلامن الرجل والمرأة فى البوست ده يبقى البوست الجاى مفروض يبقى على تحرش الست بالراجل
    عشان يبقى فى توازن بس
    وتقولنا ازاى ممكن الست تتحرش بالراجل والراجل المفروض يعمل ايه عشان يحمى نفسه
    عارف يا استاذ احمد
    انا حاسس انى عايش فى بلد مش بتاعتى وباكل اكل مش بحبه وبلبس لبس مش عجبنى وبشرب سجاير وانا بكرهها
    لكن بكتب كلام ساعات ببقى حسه

    وجودك وسطينا رغم انى متكلمتش كتير معاك الا انى حسيت ان فى اخ كبير قاعد
    شكرا ليك يا استاذ احمد


    ايمن فاروق

    ReplyDelete
  22. الصراحة لم تضف جديد لمعلوماتى
    لكن مش مهم ممكن تكون ضفت لناس تانية

    وبأكد على معنى مهم - بعد اذنك يعنى -
    "مفيش حد بيروح يتحرش بالمحترمة "

    بس اللى البنات بتلبسوا فى الشوارع وفى الجامعة (فى رأيى) تحرش بالأولاد .. وبعدين لما الولد ميمسكش نفسه و يتحرش هو كمان بيلوموه (انا طبعا مش ببرر موقف الولد) لكن بوضح يعنى

    ReplyDelete
  23. البوست ده إن دل على شيء فإنه يدل على إنك خبير في حاجتين : المرأة و التحرش

    يابني ده إنت كده حاتودي نفسك في داهية ههههههههه

    ReplyDelete
  24. انت كتبت الموضوع بشكل مختلف وعجبني الاسلوب
    لكن حقولك حاجة زي ما توتة قالت نسبة كبيرة على هذا الاساس
    من الرجال ممكن نعتبرهم متحرشون و
    الضحية مش بالضرورة انسانة سلبية كما قال البعض ...لكن كما ذكرت انت القناص بياخد وقت ...و دايما كلامو و حتى افعالو مش واضحة ..
    بس في اخطر بكثير ...التحرش بالاطفال ...من المحرام ...من اصحاب الاهل ..وختى ما بين الاطفال..التحرش بالاطفال كرثة
    لازم الاهل ياخدو بالهم اوي من الحكاية دي ...وكمان يعلمو اولادهم يصارحوهم باي حاجة

    قرف والله

    ربنا يعفي ....

    ReplyDelete
  25. السلام عليكم و رحمة الله و بركاتة

    اعتذر عن قطع الموضوع و الخروج عنه ... و لكن ارجو انت تزوروني علي المدونة

    خالص تحياتي للجميع

    ReplyDelete
  26. يااااااه
    قد ايه سعيده انك رجعت تكتب

    البوست اكتر من رائع
    متميز و طريقة العرض رائعه
    فكرة الحواراثارت تشويقا
    و كسرت حدة ملل القاريء

    احييك يا احمد
    و اعجبني الاشاره الى هذا النوع من التحرش
    فعلا التحرش مش بس معاكسه في الشارع
    و كل امرأه تزيل الحدود بينها و بين الرجل تسمح له التحرش بها

    نهاية البوست تحفه

    تحياتي

    ReplyDelete
  27. انا قرأت للتو تعليقك عند سهر الليالى صديقة العمر ورفيقة الطفولة

    انت عرفتنى اكتر من نفسى

    بس هى فهمتنى غلط .. انا قلتلها انى عاوزة اعتزل الحياة بس هى خافت لأحسن أنفذ فعلا الرغبة دى فكتب البوست

    لما اشوفك هأحكيلك على اللى حصل فى اليوم التالى للقاء وجعلنى امر بهذه الأزمة العاصفة

    اشكرك على اهتمامك
    انت انسان عظيم

    ReplyDelete
  28. ايه ده كله ايه ده كله ؟؟!! ما هي عندها حق .. انت علشان تسرد الموقف بالترتيب ده يبقي اكيد مجربه .. بس انهو طرف من الاتنين .. بفتح الراء او بكسرها .. الله اعلم !!

    و بعدين بناءا علي الموضوع ده يبقي كده انا فيه علي الاقل 10 مستلمني و انا ف الطراوة بقي .. و علي كده برضه 99% من الستات بيتم التحرش بيهم ليل نهار .. بداية من التليفزيون و لحد المواصلات و الشغل و الخ الخ الخ .. لآ و بعد ده كله مفيش قانون يعاقب علي التحرش .. بس فيه قانون يعاقب علي الاغتصاب .. الحمد لله !!

    ReplyDelete
  29. اولا موش شرط تكون المرأه خجوله علشان يتحرشوا بيها ممكن تكون صاحبه شخصيه قويه والكل بيعمل لها حساب ودي بقي بيموتوا يتحرشوا بيها لأنها شرسه وكل واحد بيمني نفسه انه حايقدر يروضها
    ودايما اللي ليها مخالب بيحبوها


    ثانيه انت كنت بتشرح الكلام ده لواحده موش عايشه في الدنيا والا ايه
    اكيد كمان موش عايشه في مصر والا كانت عرفت انها من اول ماتخرج من باب بيتها يبدأ التحرش بيها
    ياعم أحمد انت بتجيبهم منين
    والا هن بيمثلن عليك
    علشان تزيد وتعيد في الشرح اللي ممكن هي يتمارسه شخصيا مع أخرين كل يوم


    سلام

    ReplyDelete
  30. أعتذر على المداخلة

    مكسوفة

    ماذكرته ليس كلام عابر والسلام ، أو وجهة نظر شخصية

    كل التفاصيل الخاصة بالمتحرش بها هو نتيجة دراسات إجتماعية قام بها باحثون إجتماعيون مختلفون ولم يغفل هنا الإستعانة بالطب النفسي ، كما ان كبرى الشركات العالمية تعتمد على تلك النوعيةمن الدراسات وتقوم بإعداد دورات تدريبية على هذا النوع من التحرش بموظفيها لتعريفهم بالتحرش وكيفية إكتشافه وكيفية الإبلاغ عنه نظرا لأهمية تلك القضية بالنسبة لهم وشده العقوبات التي توقع لمن تثبت عليه تلك الواقعة
    فحتى لايقوم المتحرش بأفعال لايدري أنها تحرش ولا كي تعرف المتحرش بها الفرق بين التصرفات العادية والتحرش وكيفية الإبلاغ عن ذلك

    أما حكاية التحرش بالمرأة القوية في العمل
    فإسمحيلي ده كلام مش علمي بالمرة ولم اقرأ عنه سابقا في أية دراسة حول التحرش الجنسي في مكان العمل ، فالموضوع ليس وجهة نظر شخصية

    ***************************

    أعتذر عن هذه المداخلة العابرة وسوف أعود لاحقا للردود على التعليقات بالتفصيل

    تحياتي

    ReplyDelete
  31. بص بقي ياعم احمد شقير

    لم اقصد مطلقا أن ماكتبته عن التحرش بالمرأه لايبدوا مقنعا او منطقيا ، الا أنني أبغض أستعباط بعض النساء اللواتي يعشن أدوار الساذجات أو بعني اصح النسوان المسهتنه

    اللي عاملين فيها
    بابا غنوج
    وحمص بالطحينه

    وأنت بنفسك أشرت في نهايه البوست
    انها فاهمه كل حاجه وشغاله أستعباط
    بل انها هي التي تحرشت بك
    شخصيا

    وأذا لم تثبت الدراسات أن هناك تحرشا حقيقيا تجاه المرأه القويه في مكان عملها فربما أضاف تعليقي اليك معلومه جديده لم تبحث عنها

    من قبل

    وبعدين بالراحه علينا ياعم أحمد دا احنا التلامذه وأنت الأستاذ

    ReplyDelete
  32. بوست لذيذ ودمه خفيف موت وفيه شوية فذلكة بس ومالو لذيذ برده ,,,وعلى فكرة الست هيا الى بتدى الحق للرجالة انهم يتحرشوا بيها وانا هنا مش بتكلم عن لبسها او مظهرها لا طبعا كل واحدة حرة فى طريقة مظهرها لكن تراعى حدود الاداب برده ,,انا قصدى ان طريقة كلامها او نظرتها هيا الى بتطمع الناس فيها ,,,وعلى فكرة بقى مش الرجالة هما الى وحدهم بيتحرشوا بالستات لا ده زى ما انت قولت ممكن يكون اوى من نفس الجنس وده اخطر بكتير اوى اوى لان الواحدة مبتبقاش مدية خوانة,,, شكرا

    ReplyDelete
  33. الشيئ اللى انا مستغربله إن انا برده مبشوفش الحاجات دى فى الوسط المحيط خالص ... لا أنا مرة تحرشت ببنت و طبعا مفيش بنت عامشة تحرشت بيا


    بس إثارة القضية دى مؤخرا خلت الواحد يسمع عنها فى كل حتة من غير مايشوفها خالص .... زى سفاح المعادى كده

    انا مع ياسمين فى بوست التحرش بالأطفال ... و أطفال الشوارع عموما

    الواحد باين عليه مش عايش فى الدنيا يا شقير

    ReplyDelete
  34. طب ممكن سؤال ، قد يبدو غريب ، ولكنها الحقيقه المره : طب مالعمل اذا كان المتحرش به هو الرجل ؟ وربنا !!!
    احنا في زمن انقلبت فيه الموازين ، ولم يعد من النادر او من الغريب ان تري عكس ما تعتقد...
    ممكن تحكيلنا شويه عن تحرش المرأه بالرجل في مجتمعاتنا العربيه المغلقه (نسبيا)؟
    اكيد البوست هايكون اجمل كتييييير
    تحياتي

    ReplyDelete
  35. ياريت اشوف بوست عن تحرش المرأة بالرجل
    اسلوبك رائع

    ReplyDelete
  36. استاز احمد
    او جناب العمده
    احتاج رأيك وإضافتك في بوست جديد عندي

    ReplyDelete
  37. This comment has been removed by the author.

    ReplyDelete
  38. :)

    is it that hard?:) ma ikhtala rajolon o amra2a, illa kana il shay6n thalithahoma!

    just prevent il khalwa and you will be fine wala yhimmak:)

    well, libs shar3i mo7taram, shkha9iyya jadda ma3 irriggala (wala takhda3n bil qawl), and prevent il khalwa. and you will definately be fine.

    not you, the women i mean:)

    ana kont 3awiz adeef y3ni :D

    ReplyDelete
  39. روعه واقعيتها أجمل حاجه فيها ولسه علي فكره من شويه كنت بقرأ بريد الأهرام بتاع يوم الجمعه ... علي ما إفتكرت أقراه... وواحده بتحكي حكايتها مع واحد زميل عمل وصل لكل أهدافه معها ووجدت حيله كما ذكرتها في البوست بتاعك بالظبط بالظبط....

    ReplyDelete
  40. موضوعك مميز جدا فى كتابته وطريقة شرحه
    بجد انت استاذ
    وكلامك ده ينطبق على 90 فى الميه من المتحرشين

    احييك عالموضوع وعلى الكتابه الاحترافيه وهننتظر تكمله لهذه السلسله التعليمية
    تحياتى

    ReplyDelete
  41. الغالى بالأوى شوكير
    أولا انت مش معايا فى انك تطرقت لتفاصيل مرعبة فى هذا الموضوع- لا يعلمها الا متحرش مدقدق أو متحرش به مغلوب على أمره
    شوكير احنا هنا عشان نساعدك يا ابنى ..احنا حبايبك و أهلك و جيرانك .. فلازم توضح لنا انت انهو واحد.. يعنى من دولم ولا من دوكهوما؟؟
    ايه يا غالى بضحك معاك .. المهم .. كلام مكسوفه ممكن يكون صح بس مش فى حالة المرؤوسة لأنها أكيد ليست فى وضع قوة أمام رئيسها و خاصة فى بلاد نامية نتمرغ فيها فى تراب الوظيفة .. غالبا ما يحدث تحرش لسيدات الأعمال عندما يرغبن فى انهاء مصالحهن .. فهنا تكون المرأة قوبة و يستشعر الموظف الكبير أو الظابط أو .... لهفتها على انهاء مصالحها و يتبع نفس السيناريو بتاعك ..فى وقت أقل من سيناريو مرؤسته .. و يُعتبر خنوعها هنا نوع من الرشوة..فهى ممكن تتغاضى عن بوسة ايد.. طبطبة ..مقابل انهاء مصالحها أحيات أبوك ماتغيب كتير

    ReplyDelete
  42. بشمهندس شقير
    شكرا علي محاولتك مساعدتي
    ولكن المشكلة لاتزال قائمة وقاتمة
    شريط التحكم وفيه لينك الكومبوز والاتش تي ام ال برضة مش موجود
    مش عارف اعمل ايه؟
    ؟؟؟؟؟؟؟؟؟؟؟؟؟؟؟
    ؟؟؟؟؟؟؟؟؟؟؟؟
    ؟؟؟؟؟؟؟؟؟
    ؟؟؟؟؟
    ؟؟؟
    ؟؟
    ؟

    ReplyDelete
  43. احمد
    انا بأيت اطبق الكلام ده على كل الرجاله اللي حواليا اكتشفت و الحمد لله ان كلهم يا عزيزي متحرشون

    ReplyDelete
  44. The fourth year of occupation..
    http://secretsinbaghdad.blogspot.com/2007/03/fourth-year.html

    ReplyDelete
  45. شكلك فاهم يا نصة
    المهم الاحتراااااام
    هو في اليومين ول غير الاحترام

    ابقى تعالى

    ReplyDelete
  46. ايةدة يا مهندس انت حطيتنا كدة على اول الطريق واعتقد انوبعد كدة كل واحد وتحرشة قصدى شطارتة

    ReplyDelete
  47. لاا والله يعني كل ده اسمه تحرش ههههههههههههههه يا فففضحتي ياعني انا متحرش بنص مصر ينهار ابيض لا لا قول كلام غيرر ده والله استفد علشان انصح الي اعرفهم بالكلام ده

    ReplyDelete
  48. يا حج شقير
    هو حد يلاقي تحرش في الزمن الاغبر دة ويقول لا

    الناس تعبانة

    ReplyDelete
  49. هلا استاز احمد شو اخبارك

    اتمنى تكون فاكر سهى


    كيف احوالك

    ReplyDelete
  50. Hi,
    This is simply an invitation to visit my blog & read the translation of the rapport issued by the Italian National Institute about the violence on women in Italy, 2006.

    http://chiccopolis.blogspot.com/

    Really interesting

    ReplyDelete
  51. ياسمين
    التحرش الجنسي بالأطفال مافيش شك إنه موضوع مهم جدا ومحتاجد توضيحات كتيرة
    إنشاء الله قريب يكون فيه بوست عنه

    micheal
    شكرا يامايكل وفعلا هو موضوع مهم بس فصلت أكتب عنه بعد الهوجة بتاعت احداث وسط البلد تخف ، عشان الكلام يكون بالراحة

    Mohamed A. Ghaffar
    طبعا أنا لا اقصد يامحمد التعميم في هذه الحالة ولكن المشكلة دايما بتكون إن الواحدة لا تدرك إنها متحرش بها في بعض الأحيان فضلا عن إن بعض المتحرشين لايدركون أن مايقمونه من أفعال بهذا الشكل تقع تحت بند التحرش

    tota
    كالعادة تعليقاتك متميزة وعميقة
    عدم رضاء الطرف الآخر هي نقطة أكيد اساسية في تعريف التحرش وإلا يمكن ان تسميتها مسمى آخر إذا كانت الحصول على منفعة حنسية بموافقة أو إغراء الطرف الآخر
    وبعد تعليقك حطيت خط في البوست تحت هذه الجملة
    ويبدو كما تقولي أن هناك فصول أخرى لأنواع أخرى من التحرش

    نبيــذ
    جميل تعليقك وفعلا هناك جوانب كتيرة زي ماذكرتي من انواع التحرش الجنسي مهمة زي التحرش بالأطفال أو غريبة زي تحرش المراة بالرجل أو تحرش من نفس الجنس ده تصنيف وفيه تصنيف تاني عن أماكن التحرش البيت العمل المواصلات الشارع ويمكن الشارع ده ماأكثر الأنواع شيوعا
    وأكيد فيه موضوعات عن كده بس أكيد بصياغة مختلفة

    BlueRose
    كل ده ومش مركزة ، فعلا نقطة مهمة جدا إن إدراك المراة بالتحرش متأخرا بيكون مشكلة في محاولة منع ذلك او رفضه حيث لم تكن هناك من البداية بالنسبة لها اي نوع من الرفض أو إبداء عدم القبول

    نبيــذ
    صدقيني مش بيكون سهل على المراة عدم الإستجابة للتحرش بعد عدم إدراكها لده من البداية لأن التدريج في الموضوع هو الأخطر بيخليها ماتقدرش ترفض لأن جرعة الزيادة بتكون قليلة جدا وأحيانا كثيرة شبه غير ملموسة

    BlueRose
    نقطة مهمة جدا هي فعلا شخصية المتحرش بها لأنها بتكون شخصية غالبا خجولة وتحب المرح وده بيغلب عليها صفة المجاملة اللي بتخليها صعب أنها تواجه اي موقف غلط بسهولة وعليه فإنها تلتمس السلامة والعذر لصاحبها حيث انه لايقصد إيذاء مشاعرها

    عباس العبد
    طبعا التحرش في حالة العمل بتختلف تماما عن التحرش في الشارع او في الأتوبيس أو وسائل المواصلات بصفة عامة الموضوع مختلف تماما والطريقة مختلفة زي مابتقول يعني مابيكونش فيه ترتيب ولا إعداد مسبق اللهم إلا قبلها بدقائق او ثواني معدودة
    لكن عموما التحرش التاني ده اكيد له موضوع وغالبا مختلف تماما من ناحية التكتيك والإستراتيجية

    اما المولات فأنت ادرى مني بها وحتى التحرش بالكلمات الموجودة في الحمامات
    :)
    تحياتي

    BlueRose
    تركيزك والله فل
    طبعا مش لازم يكون الواحد مارس ولكن ملاحظات الفرد لما يدور حوله والنظر لتجارب وحكايات الآخرين بتغنيه عن ممارسة تجارب كتيرة بنفسه

    توتة توتة
    :)
    جميل إن البوست عجبك

    شادي فايد
    شهادة اعتز بها ياشادي

    Lasto-adri *Blue
    شوفي الستو بما غنك على ابواب العمل فإسمحيلي أقولك إن شخصيتك الواضحة والجريئة والمثقفة تمنع كثيرين من محاولةذلك معك بالرغم من انها تلك الشخصية قد تكون مفاتيح جذب لهم ولكن طبيعة شخصيتك تمنع ذلك وبالرغم من ان المتحرش شخص ذكي جدا ولكن برده هو شخص جبان جدا

    daktara
    بصراحة موضوع الصورة ده شغلني شوية وطبعا كان فيه صور مباشرة كتير عن الموضوع بس أن فضلت صورة تعبيرية بتاعت الماسك لنها اقرب ماتكون لروح الموضوع

    مصر هى أمى
    شكلي كنت مدير كبير ؟ يامحمد انا من يوم ماشتغلت وأنا مدير وطبعا ما أدراك مالمدير
    بهرج طبعا بس اشكرك على تعليقك الجميل

    The Alien
    المشكلة يابيشوي إن الموضوع بيبتدي كبير وياخد وقت معين وبعدين يختفي حتى ياتي حاجة تانية بتفكرنا والمشكلة إن ساعة لما بيظهر الموضوع غالبا بتكون أرائنا إنفعالية ومافيش فيها دراسة هادية للموضوع ببالتالي النتيجة مابتكونش ناجحة
    أحسن حاجة إنك تمسك موضوع مش على الساحة وتدرسه اعتقد إن النتيجة هاتكون افضل واعمق

    حائر في دنيا الله
    التحرش بفرد فعلا غير التحرش بشعب بس هنا مش لازم يكون التحرش جنسي ، التحرش بالشعب ده اللي بيسموه التحرش السياسي زي اللي بيحصل اليومين دول وكله بيتسمى تحرش طالما بدون إرادة الطرف الآخر

    Epitaph
    افضل الحلول وحماية البنت لنفسها تكون من الاول من انها لاتقبل أن تكون موضوع شبهات وترفض المساس بأي من اللتقاليد العامة في كلامها او حديثها او وجودها مع رجل وعدم تقبل أي نوع من التقرب بدعوى الهزار
    ده من الأول هايخليها تتفادى ان تصل لمرحلة تخاف منها من الشوشرة او الفضيحة زي مابتقولي

    raspoutine
    ايمن مازكرته في البوست عبارة عن حالة واحدة وفي مجتمع معين تحرش رجل بالمراة وفي مجال العمل وزي مانت بتقول فيه جوانب وفصول كتيرة في هذا الموصوع وعشان نقدر نمسك خيوط المسالة كلها لازم نمسك نوع نوع وحالة حالة ومجتمع مجتمع لان الاسباب والحل بتختلف من موضع لآخر

    omar مشروع بطل
    يمكن ماكتبته ماأصفش كتير ليك بس عموما كان توضيح لحالة خاصة جدا يتخذ فيها المتحرش اقضى درجات الحرص
    اما حكاية ان مافيش واحد ممكن يتحرش بواحدةة محترمة فإسمحلي ده يتوقف اساسا على تعريف المراة المحترمة بالنسبة لك
    المراة المحترمة بتعريفها اللي كلنا نعرفه ممكن يتحرش بها في مكان العمل وبنفس الطريقة ولكن التحر ش بالمراة غير المحترمة غالبا مابيكونش تحرش لأنه برده غالبا بيكون بموافقتها او تشجيع منها

    Anima
    من يكتب عن الحب مش لابد يكون حبيب ومن يكتب عن الفقر ليس بالطبيعة يكون فقيرا ومن يكتب عن الموت ليس بالضرورة أن يكون ميتا ومن يكتب عن التحرش ليس بالتأكيد ان يكطون متحرشا
    :))

    Nada
    طبعا الاحرش بالاطفال والمحارم دي نماذج وللأسف موجودة ويجب برده تسليط الضوء عليها
    واتفق معكي بي أن المتحرش بها لايجب أن تكون دائما شخصية سلبية على طول الخط فاحيانا كثيرة تكون شخصية إيجابية ولكن حسن إقتناص الصياد للفرصة يجعلها بلاحراك

    شــــمـس الديـن
    فعلا موضوع مهم جدا يستحق الإشارة وبرافو عليكي طرح القصية

    farida
    تسعدني تعليقاتك دايما وبتاخدي بالك من حاجات جميلة ، فعلا طريقة طرح الموضع اخدت مني شوية لأن فكرة الحوار من البداية ماكنتش على بالي بس حسيت إن الموضوع هايكون درس عشان كده فصبلت إنه ييجي على شكل حوار
    وفعلا دي حالة من حالات كتير وونموذج من نماذج مختلفة لأنواع التحرش

    ياسمين

    لأسف ماقدرتش آجي الحفلة أنا عارف غن الموضوع كبير وده بان في بوستك الأخير وفعلا متضايق جدا لأنك فعلا إنسانة ممتازة واتمنى إننا نقدر نتناقش في الحكاية دي قريب

    Romantic Rose
    الإغتصاب وهتك العرص دي حالات أعلى شوية من التحرش الجنسي وكان لازم يكون فيه قانون يجرمها بشكل قوي وواضح اما لأن التحرش الجنسي أنواعه مختلفه ولايمكن بسهولة إثباته او تأكيده فهنا تصعب القوانين تحديدها ولكن بره بصراحة الأمور دي واصحة جدا والقانون يجرمها تجريما كاملا ومحددة جدا عندهم
    إنما عندها حق ليه إنشاء الله ومش هاسالك مين اللي عندها حق

    MAKSOFA
    بقى إنتي التلامذة وإحنا الاستاذ ، ياست مكسوفة اخجلتم تواضعنا ، انا بس ونظرا لأهمية رايك حبيت أقطع التعليقات وارد عليكي لكن ابدا لم يكن غصبا من تعليقك فأنا احب التعليقالت التي تجبر الأخرين على الرد وطرح القصية
    اما حكاية التحرش بالمراة القوية فمازلت عند راي إلا إذا كتبتي عن حالة زي كده في بوست عندك اكيد هاعتقد لأن بوستاتك ليها تأثير صادق وكبير
    تحياتي

    shlapia
    معاكي مش طريقة لبس البنت وزيها هوز اللي بيدفع للتحرش وزعشان كده انا ماركزتش كتير على الأسباب دي ولن غالبا البنت اللي بيكون زيها مدعاة للتحرش بتكون هيا اصلا عايزة كده وبالتالي ينتهي مفهوم التحرش ويصبح لا معنى له يعني يمكن نسميه شيئا اخر مادام برغبتها في النهاية
    أما عن الأنواع الأخرى للتحر شفهيا كتيرة وتفاصيلها مختلفة تماما

    Ahmad El-Saeed
    يمكن يابوحميد عشان لسه ماندمكتش في الشغل جامد وخصوصا ان البوست ده وتفاصيله عن التحرش في مجال العمل وثانيا غالبا مش بتشعر فيه في جوانب الحياة لأن راجل والبنت هي اللي بتشعر بيه ومعظمهم مابيحاولش يبين حاجة زي كده
    فتح عنيك شوية وانت تشوف العجب
    :)

    باقي الردود في الرد التالي

    ReplyDelete
  52. عزيزي احمد شقير
    اشكرك علي تعليقك المستفيض
    بالنسبه لسؤالك عن مجموع النسب المئويه ، ده سؤال منطقي جدا انا سألته لنفسي عند ترجمة الإحصائيه ، ولكني استعلمت و توصلت الي ان النسب المئويه الزائده ترجع الي ان بعض النساء ممن خضعن للإحصائيه كان لهم اكثر من اجابه علي نفس السؤال ، بمعني انهم كان لديهم اكثر من سبب واحد لعدم تبليغ السلطات ، اي ان بعض ال 90% من النساء اللاتي فضلن عدم تبليغ السلطات بسبب الخجل او الإحساس بالذنب كن يعتقدن ايضا ان ما تعرضن له لم يكن من الخطوره بمكان ، وهكذا..
    يارب يكون وضح الأمر
    شكرا مره اخري

    ReplyDelete
  53. di 7aga fe3lan mo2zeya le masha3er ai ensan sawa2 kan mar2a aw ragol elmoshkela fi mogtama3na en e7na mesh benefham elmo3amla elkowayesa sa7 fih banat ketir betkun mo7tarama gedan aw 7ata welad we lama beyet3amlo ma3 nas le awel mara bey3amlohom kowayes zai e'7wathom we lel2asaf da beyefaham '3alat we beywasal lekol da rabena yo3ina ne'3ayar mogtama3na 3shan law da 7asal bas hane2dar net3amel 3la tabi3etna ma3 elnas men '3er ma ye2zona 3aref en da bey2ayed 7oreyetna lakn lel2asaf da el7al elwa7id 3shan manetgere7sh ...
    nasi7ty lekol walad we bent et3amel be 7ers fi awel ma3reftek/ma3reftak belnas we ba3den o7kom 3lehom we law kan da bey7ed men 7oreyetek e7tasab da 3and ALLAh

    ReplyDelete
  54. تدوينة جميلة فعلا.
    تسلم إيدك على العرض والأسلوب.

    ReplyDelete
  55. мїяάЖάгїм ™
    مافيش شك إنك موضوع تحرش المرأة بالرجل موضوع ثري جدا وخصوصا انه يحتوي على تفاصيل تكاد تكون جديدة وغريبة على كثيرين منا
    قريبا إنشاء الله

    eldoctor
    واضح إن بوست عن تحرش المراة بالرجل يروق لكثيرين
    شكرا على إطرائك

    مجهول
    أعتذر على التأخير وجايك فورا

    khalid jarrar
    طبعا صعب إذا كان الرجل يريد واحدة بعينيها
    أما ماختلى رجل وإمراة إلا كان الشيطان ثالثهما فانا معك الشيطان موجود دائما ولكن ماقدرته في وجوده مع رجل وإمرأة وحدهما ذلك يتوقف عليهما وإن كانت فرص عمل الشيطان بلاشك أكبر في هذا الوضع
    رؤيتك للحل قيمة وممكنة

    reri
    فعلا ماذكرته ياريري ناتج عن دراسات إجتماعية قام بها محللون وأطباء نفسيون قبلا ووصلوا إلى نتائج مشابهة وهاأنتي تذكرين واقعة مشابهة تم نشرها مؤخرا

    ساكاماكا نيوز
    هاها .. غنت سميتها سلسلة تعليمية
    عموما دي بس كانت حالة من حالات كتير من التحرش وموقع واحد من مواقع كتير من التحرش
    شكرا للزيارة

    تمر حنه
    هاها لا انا من دولوم ولا دولهما .. انا ياستي اللي باكون بينهم واقف في النص باتفرج واشوف وأتدخل في اللحظة المناسبة
    برده معنى كلامك إنك متفقة معايا إن حتى المتحرش بها لو رئيسة أو ذات شخصية قوية او سيدة اعمال فإنها في لحظة التحرش تكون في وضع اقل من وضعها الطبيعي ولايسمح لشخصيتها القوية ان تظهر

    daktara
    أرجو ان تكون مشكلتك إتحلت انا بعت ليك إيميل ارجو ان يكون وصلك

    توتة توتة
    هاها .. كلهم متحرشون طيب خللي بالك باه انا حذرت وقلت من الأول اهوه

    bastokka طهقانة
    طبعا المهم الإحترام .. طبعا متابعك إنتي وطهقان بصرااحة تحفة وروعة وواقعية جدا بس كله كوم وحكاية التمثيلية بتاعة التليفون والنادي كوم تاني
    من اجمل ماقرأت

    asadma7bos
    ربنا يكرمك .. كل واحد وشطارته بأه
    وكله باه واضح وفي النور

    copa
    المشكلة ياكوبا غن المتحرش مابيكونش مدرك إن ده تحرش
    عشان كده الشركات الملتي ناشيونال وعشان الجريمة دي بالنسبة لهم فظيعة جدا بتعمل دورات تدريبية تعرف الشخص إن دي تنصب تحت فعل التحرش حتى يتم إجتنابها

    ana ga3an
    ماهو لا هو عايز وهي عايزة مايبقاش تحرش يافايزة

    $ سهى $
    والله ياسهى كل ماحاول افتكرك .. الاقي صورة هيفا بتأثر عليا جامد

    мїяάЖάгїм ™
    شكرا على الدعوة وفعلا موضوع جامد وقوي واحسنت بترجمته

    мїяάЖάгїм ™
    فهمت دلوقتي حكاية النسب المغلوطة .. انا برده كنت منتوقع حاجة زي كده أصل الإحساس بالارقام يخلي حاجة زي كده محل تساؤل
    تحياتي

    Wessam
    مافيش شك انها حاجة مؤذية وعشان كده بالرغم من ان الإيذاء البدني خفيف وممكن ينعدم إلا غن الإيذاء النفسي قوي جدا وده اللي خللي عملية التحرش من الأفعال الممقوتة والمستهجنة بشدة
    طبعا نصايحك خطوة كبيرة في معالجة المشكلة

    ميشيل حنا
    شهادة أعتز بها من مدون وكاتب له ثقل

    تحياتي للجميع وكل تحرش وانتم بخير

    ReplyDelete
  56. ربنا يستر على ولايانا

    ReplyDelete
  57. و الله انا شايفه ان البنت هى المسؤله عن ده ما تروح الشغل ملتزمه فى ملبسها لابسه هدوم للشغل مش للافراح و ما تحطش مكياج و ما بتهزرش او تضحك على النكت و ما تحكيش حاجه شخصيه و تدى انطباع انها ملتزمه محدش هيتحرش بيها تحياتى و اعجابى بالبوست

    ReplyDelete
  58. رااااااااااائع يا احمد بس انا حاسه ان انا بشوف فيلم عربي ابيض واود ويمكن الوان كمان بس علي فكره الستات واعين اوي وبيبقوا فاهمين وعارفين كل حاجه هما بس اللي بيحبوا يستعبطو ولو حصل وواحد اتحرش بواحده الغلط يبقي عليها 50 في المايه لانها سمحت له بكده من الاول وسلام عليكو اصل ممكن اتضرب من اي واحده من الموجوداااااااااااات بعمل زيك

    ReplyDelete
  59. تــســلــم ايــدكـ
    مــوضــوع رائــع طــرح بــصورهـ اروعــ


    بــالــتــوفــيــقـ

    بــنــت الــكــويــت

    ReplyDelete