Thursday, March 29, 2007

البلد دي مش بتاعتنا


البلد دي مش بتاعتنا


© Photo Copyright: Alex Nechiporenko


مرت نصف ساعة ولم يجئ دورها في طابور العيش ، وينزل أحد البهوات من سيارته يستقبله بائع الفرن بالترحاب وفي أقل من دقيقة يسبقه عيش سيادته إلى السيارة ، تمصمص المرأة شفتيها وهي تقول البلد دي مش بتاعتنا

من نافذة أوتوبيس 919 المزدحم يشاهد شاب في سيارة اسبور وفي أحضانه فتاة يقبلان بعضهما البعض قبلات ساخنة ، تنتبه الفتاه أن أحدا ينظرلها تعتدل وتشير لشاب الأتوبيس بأصبعها الأوسط إشارة بذيئة ، يحمر وجه الشاب ووجهه يكاد ينطق البلد دي مش بتاعتنا

يطربه صوت حكيم وحبه الأساسي له نابع من أنه مطرب شعبي جاء من الطبقات الشعبية ويغني للطبقات الشعبية ، يقرأ في الجريدة أن حكيم نزل من القاهرة إلى قريته الجدامي مركز مغاغة يوم الإستفتاء وقام بزيارة غرفة عمليات الحزب الوطني وتناول الغداء مع قيادات الحزب ، يغلق الجريدة وهو يقول البلد دي مش بتاعتنا

تقوده أقدامه في الإستفتاء إلى إحدى اللجان في الطابق الثاني من مدرسة الأشباح الإعدادية ، الهدوء المحيط بالمدرسة وقت الرابعة عصرا جعله هو الآخر يسير بهدوء ، وجد نفسه أمام شخص لم ينتبه لدخوله يقوم بملأ عشرات من إستمارات الإستفتاء ، ينتبه له عندما شرع بوضعها بالصندوق ، يعود خارجا عندما يسأله الموظف عايز إيه ؟ دون أن ينظر له يرد عليه البلد دي مش بتاعتنا

دخل الشاب الفود
كورت بسيتي ستار ، أشكال الوجبات جعلته يشتهيها ، تحسس جيبه وقد شجعه العدد الهائل من البشر يأكلون ويشربون ، دخل وسأل عن أسعار وجبات لا يعرف إسمها ، عاد أدراجه دون يشتري وإكتفى بالفرجه وشفتيه تهمهم البلد دي مش بتاعتنا

الوقت طويل ذهب شارع عباس العقاد ليتسكع فليس لديه شيئ يفعله ، تعجب لماذا هذا الشباب بالسيارات يحوم حول تلك الفتاة بالذات ، والفتاة لاتبالي بمن يعاكسها ، تبدو جميلة بريئة محترمة ، يتسائل لماذا لايتركونها وشأنها ، يخرج شاب من سيارة تسبق الفتاة بخطوات يحدثها لبضع ثواني تركب معه السيارة ، يلمح والسيارة تختفي الفتاة تخلع الحجاب ، يفتح فاه وهو يتعجب ويقول البلد دي مش بتاعتنا

كان متفوقا وترتيبه الثاني بين دفعته ، أعلنت الكلية تعيين ثلاث من دفعته بالكلية كمعيدين ، ذهب وسأل عن النتيجة وجد الأول والثالث وآخر بتقدير جيد ترتيبه متأخر جدا من المعينين ، لم يجد إسمه ولا من يقول له الأسباب ، تبول على جدار الكلية الخلفي محاولا كتابة البلد دي مش بتاعتنا

يتم القبض عليهما في ميدان التحرير للإشتباه ، بعد ان تفحص هويتهما علم الظابط أن صديقه طالبا في الجامعة الأمريكية وهو طالب في جامعة حلوان ، يترك الظابط زميله ويطلب من أفراد يرتدون ملابس مدنية أن يأخذوه في سيارة المساجين يتمتم ولسان حاله يقول البلد دي مش بتاعتنا

آخر الليل وقد غلب السكون الجميع يجلس أمام الكومبيوتر ، حظه العثر يضعه أمام تدوينة بعنوان البلد دي مش بتاعتنا ، يطرق بيده بكل قوة وغيظ وحنق عدة طرقات على المنضدة حتى أدمت يداه وهو يصرخ لأ أأأأأأأأأأأأ

البلد دي بتاعتنا

أيوه بتاعتنا والله العظيم بتاعتنا ، بتاعتنا ياولا الكلب بتاعتنا ياحرامية ، بتاعتنا غصب عن عين أبوكوا ، وأخيرا تتحرك الدمعة المتحجرة من عينيه قبل أن يغشى عليه


-----------------------------------

أعاد نشرها موقع الوطن

46 comments:

  1. البوست بيعبر فعلا عن الى بنشوفه تقريبا كل يوم يا احمد,صحيح بنحس بالغربه فى بلدنا و جوه بيتنا ,بقت الحياه ماشيه بالمقلوب المؤدب : معقد,المتدين : ارهايى
    . ,الى ماشى على الصراط : منافق
    الحياه مبقلهاش طعم.... اسفه بقى لو كنت نكديه حبتين

    ReplyDelete
  2. عزيزى شقير
    يبدو أننا سنظل نحلم بالمفروض ونعانى من الواقع

    ReplyDelete
  3. اكيد بتاعتنا

    بس نحن لا نقوم بواجبات ملكيتها ، فلا نستحقها

    ReplyDelete
  4. i loved this post, really

    but you didn't tell us, do you think that it is ours or their?

    i believe it is their country., we don't own here, moreover we are owned by others here

    ReplyDelete
  5. هو لفت نظري بس اول فقرة بتاعة طابور العيش هو فيه حد عنده عربية و بيه بيروح يجيب عيش من ده الا بأى لو عنده فراخ و عايز يأكلهم

    ReplyDelete
  6. البوست جميل ولكن فيه شوية مبالغات. انا معيد في الجامعة من 1988 عمري ما شفت اي قسم قدر يتخطى واحد من الأوائل ويعين ناس ترتيبهم متأخر عنه. عادة بيعينوا كل الناس لغاية المحروس اللي ترتيبه متأخر!

    ReplyDelete
  7. طبعا بتاعتنا ..
    علي الأقل ان ده المفروض ..

    بس طول ما السلبية موقف ايجابي "حجة البليد".. يبقي خلينا ف المفروض و انسي الواااااااااااااقع بقي .. سيب الواقع لحد غيرنا يغيره علشان يعيشه و يقتل المفروض ..

    ReplyDelete
  8. لازم تعرف كويس ان البلد دى بلدنا .. بلد الناس الطيبة اللى هما احنا

    بس احنا من طيبتنا سيبناها لغيرنا اللى مش طيبين

    بس لازم نرجعها منهم لأننا طيبين بس مش عبطا

    ReplyDelete
  9. والله بتاعتنا بس احنا اللي فرطنا فيها.. يا أحمد لا ضاع حق وراؤه مطالب ولا ناله في العالمين واحد واقف يمصمص شفايفه

    ReplyDelete
  10. بوست معبر جدا يا أستاذ أحمد عن الوضع المرزي اللي وصلناله في جميع المجالات
    تحياتي لقلمك الرائع

    ReplyDelete
  11. بتاعتنا أو لأ
    ماعدتش فارقة

    ReplyDelete
  12. بتوجع اوى ياحمد

    مع سفر كتير من اصحابى كنت باكون مضايقه و مش فاهمه
    محستش بيهم غير يوم الاعتصام

    ReplyDelete
  13. من زمان
    لم تكتب بهذه الحرقة
    دائما تعلن موقفك فى صورة
    فى خبر
    لهذا تكون كتاباتك مميزة عزيزى شقير

    ReplyDelete
  14. اه بتاعتنا..بس ايه الي يثبت
    وياترى تمليك ولا ايجار جديد؟

    بتاعتنا بس مش كلها..اجزاء..اجزاء
    الجزء بتاعنا الي المجاري فيه ضاربة..والي العيش فيه في نشارة خشب واعقاب سجاير..اما الناحية التانية بتاعة الساحل وشرم الغردقة لاتمت لينا بصلة حضرتك
    اخر الكلام خلاص

    ReplyDelete
  15. بتاعتنا
    بتاعتهم
    مين احنا و مين هما
    و يا تري هما عملوا في احنا كده ليه
    و لو احنا فضلوا ساكتين تبقي بتاعتهم
    و لو هما خافوا مره واحده من احنا يبقي بقيت بتاعنا
    بس لو هما مشيوا و احنا مش عايزين تبقي بتاعتنا
    هاييجي هما تانيين و تالتين ... لأن طول ما احنا ساكتين تبقي بتاعتهم هما
    مش مهم هما مين
    المهم ان احنا اللي ساكتين

    ReplyDelete
  16. بكره الجملة دي جدا ... البلد دي مش بتاعتنا .. دي بتاعتهم

    والدي يقولها دائما ..
    ويثير غضبي في كل مرة ...

    مين هم ؟؟؟

    ولما هي مش بتاعتنا ..
    امال اللي بتاعنا فين؟؟؟

    لما هي مش بلدنا .. طيب بلدنا فين؟؟

    ReplyDelete
  17. بتاعتنا وبتاعتهم

    عشان هى مش المدينة الفاضلة
    وطبيعى يكون فيها ناس طيبة وناس ولاد ــ

    بس يظهر هم متمسكين بيها أكتر

    عشان كدا هم أوضح
    وأقوى

    ReplyDelete
  18. السلام عليكم ورحمة الله وبركاته

    بتاعتنا طبعا غصب عن عينهم
    ولازم ما نيأس و لا حاجه تكسرنا لان فيه يوم الحق فيه ها يرجع لاصاحبه
    وان شاء الله يكون قريب

    ReplyDelete
  19. it's OURS!

    WE stick to our true Egyptian identity,, we bear our heritage in our hearts

    THEY have discarded such identity, they look upon the Egyptian heritage with contempt..they don't deserve this country

    IT IS OURS!

    ReplyDelete
  20. يبدو أن البلدان العربية كلها مش بتاعتنا

    ReplyDelete
  21. يا أخى بقى .. دانا كنت بدأت أحس انها مش بتاعتى أنا بس و بتاعتكوا كلكوا
    جرى ايه ياأحمد انت مابتقولش ليه من زماان ؟
    التليفزيون مش بتاعنا و الجرانين مش بتاعتنا و رجالتنا مش بتاعتنا و ستاتنا مش بتاعتنا
    حتى عيالنا .. مش بتاعتنا
    طب ليه بقى؟
    القرش بقى هو المالك .. الأعلام الردئ المستشرى بقوة بقى هو الأم و الأب
    السلطة بقت هى الوطن
    الناس بقى شكلها غريب .. صوتها مش طبيعى ..
    أفكرها مختلفة و ألفاظها عجب ..
    أسماء و أشياء ما أنزل الله بها من سلطان
    المصيبة يا شوكير ان كل ردئ يلقى رواجا و يمحو ماقبله .. أنا كنت بدأت أشك فى نفسى .. ياااه الحمد لله ان فيه حد لسه مانساش العربى

    ReplyDelete
  22. شقير مش شايف برده اننا لازم عشان نقول انها بتاعتنا اننا نحميها .. ولا هى بتاعتنا وخلاص .. ساكتين وبنقول وانا مالى .. ونقول يا عم يعنى انا اللى هغير البلد
    لو انا وانت وهو مقولناش انا مالى وامنا اننا فعلا ممكن نغير البلد والله هتبقي بتاعتنا غصب عن عين التخين

    حبيت اقولك كل سنة وانت طيب بمناسبة المولد النبوي الشريف

    تحياتى لك يا احمد :]

    ReplyDelete
  23. حلو يا احمد البوست ده ، انا بحب اسلوب الكتابة اللي بيتكلم عن فكرة واحدة بصور كتير زي ما انت عملت

    ReplyDelete
  24. الاستاذ شقير
    يمكن تكون بتاعتنا بس احنا مين وايه حقنا فيها لو عرفنا حقوقنا يمكن يجي اليوم اللي نطلبها ويمكن كالعادة ننكر بالقلب بس هي اكيد حقنا اللي ضايع

    ReplyDelete
  25. باشا بجد والله

    بجد الموضوع رائع

    و بيوصف احوال البلد فى بساطة

    تحياتى

    ReplyDelete
  26. طبعا البلد مش بتاعتكم ...
    البلد اتباعت من زمان .. وانتم ضيوف.. و حق الضيف تلاتة ..
    ياما تلات ايام او سنين سجن .. او تلات طلقات رصاص .. بس اكيد لكم حقوق...

    ReplyDelete
  27. البلد بلدنا احنا غصب عن عين التخين فيهم

    كون الغالبية سلبية ولاتبحث عن حقوقها ولا تتمسك بها لايعني ان البلد ليست بلدنا

    مفروض نطالب بحقنا ونتمسك به

    وهناك مثل شعبي يقول

    اللى يربط في رقبته حبل الف من يجره

    وللاسف نحن لانترك لهم رقابنا يربطوا فيها الحبل ويجرونا بل نقوم عن طيب خاطر بربط الحبال ونقف في انتظار من يجر

    مطلوب إعادة تأهيل للناس وتوعية بالحقوق والواجبات

    والاهم من ذلك كله ان يطالب الناس بحقوقهم ولا ينتظروا ان تأتيهم على طبق من فضة
    فالحق ليس منحة ننتظرها بل يجب ان ننتزعه انتزاعا

    معذرة كنت اود التعليق على كل فقرة

    ولكن صراحة انا مكتئبة ومخنوقة من بعد التعديات الدستورية واشعر ان الشوارع اصبحت مختلفة اكثر
    وحتى الناس اصبحت وجوههم مختلفة كثيرا

    الايام القادمة حبلى بالمفاجآت

    ربنا يستر

    ReplyDelete
  28. لما كل الناس اللي ردت هنا بيقولو ان البلد بتاعتنا

    اومال مين اللي سارقها مننا بقا على كده ؟؟

    ReplyDelete
  29. تلات كلمات انتشرو اوي
    البلد دي مش بتاعتنا
    الكوسه بتاعتك مين
    انت مش عارف انت بتكلم مين؟
    كأنه مخلوق فضائي سامي نازل يأخد جوله وراجع تاني
    وحظك وقع معاه
    البلد هتفضل بتاعتنا بس المشكله ان مفاتيحها مش في ايدبنا
    وهنتعب اوي عبقال ما نجيب المفتاح دا علشان هما ميتين عليه
    اغلب الصور الي انت كاتب عنها انا عاصريت منها خصوصا حكايه التعينات في الكليات والكوسه وعشان دا ابن فلان وعلان
    انا نفسي اقتل فلان وعلان الي قرفينا دول علشان نرجع كلنا تاني بشر ولاد حواء وادم
    كلامك جه علي الجرح بس البلوج تحفه موت واسمحلي هضيفك عندي بعد اذنك
    ربنا يوفقك
    تحياتي

    ReplyDelete
  30. بتاعتنا
    بتاعتنا
    بتاعتنا
    بس احنا اللي اتنازلنا عنها ليهم

    مصر اللي عمر الجبرتي لم عرف لها عمر

    وطلع لقاها مكان مليان عوام وزعر

    جعيدية غوغاء يجيبوا تملي وجع الراس

    وخليط أفارقه هنادوة روم ملل أجناس

    والترك في القلعة والمماليك خدودهم حمر

    كان عمرها ستلاف سنة .. كلها سنين خضر

    بس الزمان يختلف زي اختلاف الناس

    ناس تبني مجد وحضارة وناس بلا احساس

    وناس تنام لما يزحف موكب الأحداث

    على اسم مصر

    احنا نمنا وماصحناش

    واقول ليه يا مصـر ولادك كـده

    يا إمـا المذله يا يتـجبـروا

    يا خوفـي يا فـرحة قـلوب الـعدا

    ويا نـدمـي لو ما يتغيـروا

    عمنا صلاح جاهين كان عبقري

    مفيش كلام تاني
    تحياتي

    ReplyDelete
  31. طب انا هسالك سوال يا احلي مدوناتي في الدنيا هي البلد دي هي اللي كانوا بيعلمونا عنها وبيدونا دروس عنها في الابيتدائي ؟

    ReplyDelete
  32. مش هاقول حاجة


    الله يحرقهم


    وحرام عليك تقليب المواجع كدا


    تحياتي

    ReplyDelete
  33. يا صديقي
    هذه بلدنا نحن، نملكها لأننا ندفع حقها من دمنا ومن روحنا
    قد يكون العقد الذي يربطنا غير واضح الآن ولكن موجود
    قد يكون مسروق
    ولكن جار ابحث عنه
    قد نكون مخطوفين من بلدنا ولكن ربك يعدلها ونرجع لبعض وولاد اللي مش عارف ايه يغوروا

    مع تحياتي

    ReplyDelete
  34. hi ahmed

    the post is great .. el mashahed elle feh shadedet el waq3ya ..

    e7na momken ne3teber el balad bta3etna bas ma2garenha ;)

    ReplyDelete
  35. والله يا استاذي انا حاولت اكتب برضه في الموضوع
    بس انته كنت استاذ طبعا كعادتك
    يمكن اللي كتبته كان عبارده عن مشاهد برضه بس غلبتني
    هههههههه
    قبل ما اقرا المقطع الاخير قلته قبل ما اشوفه وكنت عايز اكتبه في تعليق
    لا دي بلدناااااااااااا يا ولاد الكلب
    دي بلدنا احنا اللي عملناها وحررناها وبنيناها وحنخليها احسن
    تحياتي ليك يا استاذي العزيز

    ReplyDelete
  36. دى حياتنا يا أحمد
    دول جزء مننا
    الغنى صاحب النفوذ والفقير اللى مش قادر يشترى من السيتى ستارز والبنت اللى متحجبة عيرة والشاب اللى اتمسك والبنت فى العربية وبرضه الولد فى الأوتوبيس
    كلنا دول
    بس طول عمرى بقول ان مصر بلد لكل الناس .. كل الطبقات
    هى دى مصر فعلا ..بس برضه بحبها
    وعلى فكرة حكيم يبقى عمه رجل الحزب الوطنى فى الفشن - بنى سويف - وهو من أغنى أغنياء البلد هو وعيلته لأنى أعرفهم شخصيا وكنت مديرة مكتب ابن عمه عضو مجلس الشعب و رجل الرياسة محمود عبد الفضيل
    وابو حكيم واسمه الحقيقى عبد الحكيم يبقى عمدة الفشن سيادتك وهو لم يكن ابدا من طبقة شعبية
    لكنه صعيدى من أعيان الصعيد وبرضه بحبه جدا وبحب أغانيه جدا
    تحياتى على اللقطات الجميلة فى البوست

    ReplyDelete
  37. بيقال ان البلد دي ايجار جديد
    ومحدش جدد العقد
    وانهم بيحاولو يطفشونا منها

    ReplyDelete
  38. fi el7a2i2a heya maba2etsh baladna 3shan e7na faratna fiha men zaman..lazem kol wa7ed yebda2 benafso sa7i7 mesh hanshof elnatiga laken awladna isA ye3ishoha wake3 malmos...

    ReplyDelete
  39. فعلا البلد دي مش بتاعتنا ... دي بلد ناس تانيين غيرنا
    تحياتي ليك...

    ReplyDelete
  40. تحياتي لاستاذي
    وتحياتي للكلمات المعبرة جدا
    هي دي المواقف البسيطة اللي بتخلينا نقول إن البلد مش بتاعتنا
    وكلنا بتحصلنا نفس المواقف

    تحياتي

    ReplyDelete
  41. ابويا توفى لانه بعد ما اتكسرت رجله وراح مستشفى خاص عمل فيها عملية شريحةسرفنا فيها الى ورانا والى قدمنا لان حالتة الصحية متستحمل عشة الفراخ الى اسمها القصر العينى وبعد ما عمل العملية جاله التهاب رئوى فرحنا مستشفى المقطم التامين الصحى بتاعة الدكتور قال معندوش حاجة واداله حقنه ومشانا وبعد كدة الموضوع زاد وقلب بجلطة فى الرئة ولما رحنا تانى مستشفى المقطم وكان خلاص حالتة اتدهورت حجزوه فى العنايه لكن بعد فوات الاوان الحالة كانت وصلت الى مرحلة صعبه وتوفى ولما قلت انا مش هسكت على الى حصل كل اهلى قالولى دة حماس شباب ومش هتوصل لحاجة...........البلد مش بتاعت الغلبان الفقير الى معندوش نفوز

    ReplyDelete
  42. ومين كان قال انها بتاعتنا قبل كده؟
    انا علي ما اتذكر مما قرات فب التاريخ المصري ان البلد دي طوووول عمرها بتاعتهم
    ربنا عاظالم والمفتري


    انا شخصيا سيبتني مالبلد دي واللي فيها ورحت اليونان القديمه وكتبت هناك
    ابقي تعالي

    سلام

    ReplyDelete
  43. احلم بأن ارى اليوم الذي نشعر ان مصر فيه قد صارت ملكنا

    ادعو الله ان يتحقق ذلك اليوم قريباً

    تحياتي للبوست الرائع

    ReplyDelete
  44. البلد دى لا بتاعتنا ولا بتاعتهم هم بيسرقوها واحنا بنرمى الزبالة فى شوارعها هما خربوها واحنا بنلوث نيلها ونكسر ارصفتها هما واحنا منستهلهاش دى البلد دى بلد ناس تانين ناس بتعرف قيمتها وتقدرها وتحترمها بس هما مين الناس التانين دول ؟

    ReplyDelete
  45. سيأتى يوم نسطر فيه التاريخ كما أردناه..... دون أسمائهم...دون أن يكون هناك "نحن و هم"

    ReplyDelete
  46. فعلا البلد دى مابقتش بتاعتنا دا كان زمان قبل االى حصل ما يحصل وخلينا ساكتين لانتاخد فى الرجلين...على كل حال الحمد لله

    ممكن اطلب منك تضيف مدونتى عندك عشان الناس تعرفنى لانى لسه جديده

    ReplyDelete