Friday, November 02, 2007

كلام .. كلام .. كلام


كــلام X كــلام



الناس بقت بتقول أي كلام .. كلام في كلام وكله في الكنافة .. لاحد بيفكر هو بيقول إيه وليه ولمين ، ولاحد بيهتم بالكلام اللي بيسمعه ، بياخده من هنا وبيخرجه من هنا أو حتى يصدقه مش هاتفرق ، واللي ماعندوش كلام بيجيب أي كلام سمعه أو بيألفه وبيقوله والناس عندها إستعداد تصدق أي حاجة .. ماحدش عنده إستعداد للتفكير ولا قدرة على فلترة الكلام .. ودايما الكلام على لسان الآخرين .. أنا سمعت .. بيقولولك .. كاتبين على النت .. واحد قريبي شغال فين بيقول إنه شافهم بيعملوا إيه .. وكلام .. كلام

مثال لكده إعلان ميلودي الأخير .. وسواق التاكسي وهو بيرغي وعمال يزيد ويعيد عن مطار الأنفاق .. أو إعلان صيانة هيونداي والميكانيكي ماسك بتاعة مدلدله في إيده بتنقط زيت وبيقوله شوف .. الكارتير بيجيب كهرباء ، أي كلام في أي كلام ياعم الحاج ، شوف الدقاق بتاع مجلة ميكي وهو بيتكلم في الفضائيات أي هلفطة وأي حاجة وغلوشة وخلاص ، ومن الشارع خد بأه كلام .. اللي يقولك دول إخترعوا موبايل ديسبوزابول تستعمله مرة واحدة وترميه ، واللي يقولك أنا أعرف واحد عضته قطة وبينزل في الشارع بالليل يهوهو ، والعروسة اللعبة اللي الست دخلت المطبخ لقت العروسة بتطبخ مسقعة فصرخت فالعروسة دلقت عليها الزيت .. وهي المسقعة بتحتاج زيت ، وحكاية الدبوس اللي موجود على كرسي السينما اللي فيه إيدز ، ولا البخاخة اللي بترسم صلبان على حجاب البنات ، وكل حاجة بتجيب السرطان وشوية وتطلع الحاجة دي بتعالج السرطان ، واللي يفتي ويقول إن اللي يحمل قربة فساء وهو متوضأ يفسد وضوئه .. مش عارف أصلا هايملوا القربة إزاي ، والكفرة اللي عاملين شعار كوكاكولا بطريقة لمّا تحطه قدام المرايا وتقراه بالعكس ماعرفش يطلع ايه

لماذا إفتقدنا القدرة على التحليل والتدقيق ؟ لماذا أصبح لدينا القدرة على تصديق أي شيئ نسمعه ؟ لماذا أصبحنا نتناقل أي كلام وكأنه حقائق موثقة ؟ لماذا نحاول أن نصرح بأرائنا في أمور نجهلها ؟

هل هو الجهل ..؟ هل هو الفقر والبؤس ..؟ هل هو اليأس ..؟ هل هو فقدان الثقة ..؟ هل هو زيادة المتناقضات في المجتمع ؟ هل هي ثقافة الفهلوة ؟


أم هو كل ذلك ؟

27 comments:

  1. إنه غياب الوعي الذي تحالف مع تغييب الحقائق وتخلي الكل عن مسؤوليتهم.. والنتيجة هي انتشار الخرافات، والتفاهات والشائعات وما إلى ذلك

    إنه السقوط المزعج الذي يرصده كل من يملك بعض الوعي بحزنٍ وأسى

    ReplyDelete
  2. والله يا استاذ احمد اجابة اسئلة حضرتك ببساطه فى كلمتين
    لاننا شعب مصرى

    ReplyDelete
  3. نعم زيادة المتناقضات وفقدان الثقة
    وتحقق نظرية المؤامرة واقعا يعني أقصد أصبح مؤكدا وجود عنصر المؤامرة
    فأدى إلى القابلية لتصديق أي شيء وشهوة الكلام أصلا والظهور بمظهر العليم ببواطن الأمور يجعل الناس تتلقف كل ما يضفي عليهم هذه الصفات

    والحقيقة أن الانشغال بالتوافه والمكذوب أكيد يحل محل هموم أخرى بل ويخدر وينسيها يعني يشغل مساحة ذهنية كان يجب أن يشغلها هم آخر يعني مثلا الكلام على مؤامرات كوكاكولا المزعومة تنسي ولاشك مؤامرات اليهود لهدم الأقصى مثلا

    ReplyDelete
  4. غياب العلم
    والأهم
    غياب التفكير العلمي
    في بعض المدارس الأجنبية في مصر يتم تعليم حاجة اسمها التفكير العلمي
    وللأسف دي حاجة غايبة عن العقل المصري تماما
    مفيش شفافية ولا حرية في تبادل المعلومات مع غياب العلم تماما صارت الخرافات هي الحل الأمثل
    والكل يسعى للبحث عن شماعة لفشله واحباطاته .. ربما على قوى خفية تلعب ضده دائما
    والكل يسعى لان يعرف شيء ما
    --
    بس على فكرة حضرتك المسقعة بتحتاج زيت فعلا .. امال كيف يتم تحمير الباذنجان ولو مؤاخذة :)

    ReplyDelete
  5. السلام عليكم ورحمة الله وبركاته

    الناس بيحاولوا ينسوا همومهم بانهم يغرقوا في حاجات تانيه يهتموا بيها ويتابعوها وينسجوا حواليها قصص حتي لو كانت كل الحاجات دي كذب

    وكمان في جهات معينه بتستفيد من انها تخلي كل الناس مغيبين عن الواقع مهتمين بالتفاهات والشائعات علشان مايركزوش في حاجات تانيه اهم



    تحياتي

    ReplyDelete
  6. now what really, really puzzles me is the part abotut he CocaCola :O

    walla its true ya akhy! put it infront of a mirror and it would show you " la mo7ammed la mecca " ok i am an engineer and i believe in scintific thinking etc. but y3ni i fail to explain this, its statistically, logicaly impossible that its just a 9odfa that these particular words forming one whole sentence came just 9odfa y3ni! what kind of 9odfa is that?:)

    try it, i saw it, see for yourself, and please, please give me one logical explaination!
    :O

    ReplyDelete
  7. والله يا استاذ احمد اجابة اسئلة حضرتك ببساطه فى كلمتين
    لاننا شعب مصرى

    Lamada, thats three words:P

    ReplyDelete
  8. عزيزى استاذ خالد
    انا دخلت اشوف تعليقات الاخوه لاقيت حضرتك سايبلى رساله
    فعلا عندك حق هما 3 كلمات
    بس كلمت لاننا بقت مهمله الايام دى
    اذن اعتبرهم كلمتين فعلا
    شعب مصرى

    ReplyDelete
  9. مبقاش فى وعى ثقافى
    الناس عايشه مغيبة فى عالم اللا وعى
    بدليل انك لو متغاظ من واحد وعايز تفضحه طلع عليه اشاعه
    حيتنشر الخبر اسرع من كل وكالات الانباء والجرايد
    مع ان ممكن اللى بيتناقلوا الكلام ده عارفينه كويس ومعاشرينه كمان
    بس للاسف الناس افتقدت لجانب الوعى والثقافه الاخلاق
    تحياتى

    ReplyDelete
  10. التخلف

    والتخلف ليس التخلف العقلى والمرض المصاحب له


    لا احنا عندنا تخلف اعمق

    ReplyDelete
  11. تعود الشعب علي عدم وجود حقسقة مؤكدة


    كل حاجة بنسمعها فيها شك

    ReplyDelete
  12. طيب ما ليها حق العروسة تتخض و ترمي عليها الزيت الغريب ان الست استغربت مش المفروض انها تفرح ان في حد بيساعدها
    ههههه
    الكلام مسلي و احنا بنقرؤه و عارفين انه هجس بس اهو بيسلي


    تحياتي

    ReplyDelete
  13. لا هو فرااغ
    الناس مش لاقيه حاجه تعملها خالص فبتألف كلام
    ونفسي اعرف ايه مصدره

    ReplyDelete
  14. هو كل الأسباب التى ذكرتها مجتمعة لكن بنسب مختلفة تبعاً لشرائح المجتمع.. من الرئيس للعيل إللي فى الشارع

    ReplyDelete
  15. ياسر بست

    بصراحة سعدت بمشاركتك .. وموضوعاتك عن الملك فاروق كانت اكثر من رائعة وإن كنت غير متفق في بعض ماكتبت
    لاشك ان غياب الوعي هو سبب رئيسي في ظهور تلك التفاهات والتعامل معها بجدية لاتستحقها

    لماضة
    والله الشعب المصري مظلوم ولكنه دائما جلد الذات الذي يوجهنا الى تلك الحالة
    كنا برده تفس الشعب المصري بالامس ولكن الوعي كان اعلى والثقافة كانت منتشرة بشكل افضل

    عصفور المدينة
    أتفهم وجهة نظرك من نظرية المؤامرة ودورها في زيادة الجهل وغياب الوعي عن الحقائق وعلى حد تعبيرك الغنشغال بالتوافه

    محمد عبد الغفار
    إذن هو الجهل

    بلوستون
    اشرتي لنقطة غاية في الاهمية .. التعليم وطريقة التعليم وغياب التفكير المنطقي والعلمي في عملية التعليم التي تؤدي إلى شخص متلقي وليس مشارك برأي
    وابسط مثال على ذلك التلميذة ألاء اللي حاولت تفكر ..بدل مايشجعوها .. حققوا معاها وكانوا هايعيدوها السنة
    نظرا لأن لا اطيق المسقعة فلاتدخل البيت إلا وأنا غائب فانا جاهل بطريقة عملها
    يبقى الأوشاعة صح ومنطقية .. هههه

    خمسة فضفضة
    نقطة مهمة وهي إستفادة البعض من جعل الشعب مغيبا ومهتما بالتوافه بدلا من البحث والتدقيق

    خالد جرار
    تعليقك هو مادفعني للرد السريع على التعليقات .. لعل تعليقك هو أبسط مثال على اود ان احلله في إعمال لغة المنطق في البحث عن الأمور
    فأنت مقتنع بما يقال عن كوكاكولا وبذلت مجهودا لتقنعني بوجهة نظرك والتي اعيها جيدا ولكني أعملت لغة المنطق والتحليل ووصلت إن ده كلام مش صحيح
    ليه
    شوف ياسيدي .. كولاكولا تم غكتشافها على يد صيدلي بالصدفة في ولاية اتلانتا معقل الكوكاكولا في العالم وعندما تم اكتشافها كانت مشروب محلي لم يتوقع له منذ ظهروه أن يكون بهذا الإنتشار والقوة وعندما ظهرت للمرة الاولى كانت بنفس العلامة التجارية وطريقة كتابتها اللهم الا بعض الإختلافات البسيطة وهل تعتقد ان من إكتشفها هناك في اواخر القرن قبل الماضي كان يعرف مكة ويعرف محمد وكيف تكتب بالغة العربية وأعتقد ان معلوماته عن اللغة مثل معلوماتنا عن اللغة الكورية ولم يكن هناك هذا الصراع الديني ولم تكن هناك إسرائيل
    ومعروف ياسيدي ان اليهود تجار شطار لن يغامروا بمثل تلك الهيافات حتى يخسروا ماكسبوه دول يبيعوا دينهم في سبيل المال
    وبعد كده نجيب اللوجو بالإنجليزي مش بالعربي ونحطه قدام المرايا ونقراه بالعكس باللغة العربية عشان نشوف لامحمد لامكة وكمان مش مظبوطة ..
    وبعدين بعد أكتر من ميت سنة من كتابة اللوجو اللي ظهر على منتج محلي لم يتوقع ان يخرج خارج حدود الولاية ونقول إنه ممكن يقرا في المرايا بالعكس باللغة العربية
    ده اللي اقصده هو إعمال لغة العقل مش اكتر

    خالد / لماضة
    كلمتين ولا تلات كلمات .. ههههه المعنى في بطن الشاعر

    ديزرت روز
    كلامك صح وإن كنت فقط لااريد ان اقتصر الموضوع في تصديق الشائعات .. انا اقصد كمان الإهتمام بالتفاهات وتداولها

    شيناء الجيزي
    التخلف الثقافي والإجتماعي والإقتصادي معك حق ولكن هؤلاء يؤدون في النهاية الي التخلف العقلي الذي نعيشه

    عمرو احمد
    معك حق غياب الحقيقة يجعل الإشاعات والهيافات والتوافه هي الحقائق

    سمباتيك
    الحكاية دي سمعتها وانا في مصر والغريب انها دايما بتتحكي على المسقعة .. خلي بالك ولو عندك عروسة ابعدي عنها الزيت

    نوران
    الفراغ ... الفراغ بالفعل مسرح جيد جدا لتلك التفاهات ولإلغاء العقل

    عدى النهار
    فعلا كلهم مجتمعين والنسب تختلف بإختلاف الشخص وبإختلاف النسب تختلف العاهات والتوافه ونوعية الكلام


    تحياتي للجميع

    ReplyDelete
  16. والهل كنت لسه بتكلم فى موضوع الاشاعات العجيبه من كام يوم انا وبنت مصريه وبنت امريكانيه عايشه فى مصر بقالها مده
    الشىء اللى اذهلنا احنا التلاته اننا اكتشفنا ان الناس عندهم قدرة غير عاديه على اختلاق قصص لا اساس لها من الواقع والضحك الاكبر انها بتنتشر بسرعة البرق... فحقيقى مافهمناش ايه طبيعة النفسيه المريضه اللى تخلى صاحبها يختلق قصه من دماغه وان كنا اتفقنا على ان الناس اللى بينقلوا الكلام وبيخلوه يتنشر بسرعه هم ناس معندهمش شغل كتير ومعاهم فلوس يخرجوا يقابلوا بعض وكل واحد منهم ليه دايرة معارف بقى على التليفون بيروح يرغى معاها ويحكيلها وناس على النت بيروح يرغى معاها يحكيلها والحبه اللى بيقعدهم فى الشغل بيحكى مع زمايله فى هذه الحواديت العجيبه وكل ده على سبيل تضييع الوقت لكن بقى اللى بيخترع الحدوته بيخترعها ليه فده مالقينالوش تفسير

    ReplyDelete
  17. و الله العظيم مش فكرة شعب مصري او نيوزيلاندي او بوراندي حتي,دي طبيعة بشرية بس الموضوع بيتاصل و يتوغل و ينتشر في حالة وجود الثالوث الشهير:الفقر+الحهل+المرض
    c'est la vie.

    ReplyDelete
  18. زيادة المتناقضات وثقافة الفهلوة

    ReplyDelete
  19. للاسف السبب هو مزيج من كل ما ذكرته حضرتك في النهايه
    تحياتي

    ReplyDelete
  20. هي تقريبا الحاجات دي محتاجة دماغ فاضية شوية و على فكرة الحاجات دي موجودة من زمان مظهرتش دلوقتي يعني زي اللي يكنس بالليل بيطرد الملايكة او اللي ياخد دبوس من ايد التاني بالليل هيموت قريب و لا الشبب المقلوب لازم تعدله
    و حاجات اقدر اعد فيها تلات سنين قدام

    ReplyDelete
  21. ممكن لان معدش فى فعل ومعدش حد بيشتغل ولا يتعب واتعودنا ع الراحة فكان لازم يبقا فى بديل للفعل وهو الكلااااااام

    ReplyDelete
  22. طيب ده ان جت علي كده تبقي سهله و عقلك ف راسك تعرف خلاصك .. تصدق تصدق ما تصدقش ما تصدقش .. لكن المأساه بقي ف الميلات اللي بتحمل روايات و قصص منقوله عن الرسول عليه الصلاة و السلام او احد الرسل عليهم السلام او احد الصحابه او التابعين و تحمل من المواعظ و الحكم و القدرات الخارقة بفضل كلمة او جملة او دعاء او رؤية .. قد يكون افتراء و افتتاء علي الدين .. لان الحاجات دي بتبقي مكتوبة بدون سند للرواية .. و لحد كده و ممكن الموضوع يعدي .. تلاقي الجبروت بقي لما اللي باعت القصه يقسم عليك بالعزيز الجبار انك تفرودها و لو ما فرودتهاش يتوعدك بالثبور و عظائم الامور .. هو ده بقي الاستهبال الاصلي ..

    تحياتي

    ReplyDelete
  23. لا اجد تفسير لهذه الظاهرة الا انها منتشرة جدا...وبدأت تنتشر اكتر مع انتشار الانترنت

    منتديات كتير و ايميلات كتيرة جدا بقت تنتشر بين الناس بتنشر معلومات غلط سواء كانت معلومات دينية او علمية..وتجد ان المئات قد وصلهم الاميل قبلك وارسلوه بدورهم لمئات اخرين...ويصلك من اكثر من مصدر رغم تأكدك من ان المعلومة غير صحيحة بالمرة

    يمكن اخرها كانت ان المريخ هيقترب من الارض لدرجة ان الارض هيكون لها قمرين!!؟؟

    محدش حاول انه يدور ويعرف هل فعلا الكلام ده حقيقي ولا لأ قبل ما يبعته لغيره...مش عراف اذا كان السبب جهل ولا كسل

    ReplyDelete
  24. السلام عليكم
    ساعات بحس ان الناس معندهاش وقت تتأكد
    وساعات اقول بتستسهل
    بس الأكيد انهم غاويين كلام ورغي
    وحكايات ومواضيع

    ساعات اقول من الهموم بيدوروا على اي حاجه تنسيهم ويهربوا
    وساعات اقول يمكن عايزين حد يأكد لهم الكلام او ينفيه
    بس الكيد انه شعب محتاج اللي يبنيه

    ReplyDelete
  25. ازيك يا باشا

    ايه اخبارك في المملكة

    ومقلتش حضرت عيد القديسين فين في المملكة بالظبط

    المهم

    صوتك في اللقاء مية مية

    دا انت ما تديش عشرين سنة يا راجل

    اللهم لا حسد

    ReplyDelete
  26. هو كل ذلك فقر وبؤس وشقاء ادي الى الجهل وفقدان الثقة

    دوست ع الجرح

    ReplyDelete