Tuesday, May 27, 2008

الفلوس راحت فين


ياسلام .... الفيلم خلص والراجل عمال بيتكلم ، الفيلم في وسط الأحداث ولسه مش عارفين الإتنين مليون دولار حصل فيهم ايه ؟ والراجل الرزل قتل بنت الراجل الحرامي ولا لأ ؟ نلاقي الشريف اللي هو تومي لي جونز اللي طول الفيلم مابيعملش حاجة راح عند ست باين عليها مراته ولا مش عارف إيه ، وقعد يحكيلها حلم بايخ مالوش معنى عن واحد شكل أبوه بس أصغر منه بعشرين سنة محني وماسك بوق بيطلع منه نار زي ضوء القمر ، وكان عارف إنه لما يوصل هناك هيلاقيه .. مين هيلاقي مين مش عارف وبعدين الفيلم خلص ، وعشان الأشكال دي أنا مابحبش الافلام الأجنبي


ده فيلم لا مكان للعجائز أو لا مكان للمسنين أو نوكانتري فور أولد من .. فيلم سئيل يحتوي على عنف سميك وبطئ وراجل سايكو ثقيل وعنيد بيقتل أي حد مايعجبوش وتقريبا بيقتل أي حد بيقابله

من بجواري توقع أن الفيلم لم ينتهي بأي حال من الأحوال وأن هذا هو خلل بإسطوانة الدي في دي ، وبقية الفيلم ناقصة منه وإن أنا اللي بيشتري ديفيدهات بايظة ... لست من محترفي النقد السينمائي ولكني سريعاً دخلت عند المدون بشرى محمد أحد محترفي النقد السينمائي بشكل رفيع طلباً للإنقاذ وطمعاً في تحليل يشفي غليلي ولكن للأسف مالقيتش عنده أي إشارة للفيلم ، وكل كتابات المدونين كانت عن خبر حصول الفيلم على أربع جوائز أوسكار لأحسن فيلم وأحسن إخراج للأخوين كوهين وأحسن سيناريو وأحسن ممثل مساعد لبطل الفيلم الراجل الرخم خافير بارديم ، ده بالإضافة للجولدن جلوب أواردز عن أحسن سيناريو وأحسن ممثل مساعد لنفس الراجل اللي حاطط صورته ، وجوائز أخرى عديدة من جمعية النقاد ومن نقاد أفلام نيويورك

15 comments:

  1. أنا شوفت الفيلم دا .... بعد حوالي ساعه قلت: هوا في إيه؟؟ ضغطت علي نفسي 10 دقايق كمان لقيت الأحداث هي هي، لو قطعت نص الفيلم حطيته في الأول مش حتفرق.... وممل ملل غير طبيعي

    المهم إن الفيلم في رأيي هابط تماماومياخدش حتي جايزه الجزمه المهريه لعزبة القرود

    ReplyDelete
  2. بص يا عم احمد، هو انا كمان اتفاجئت لما الفيلم خلص فجأة كده و افتكرت النسخة مقطوعة لحد ما لقيت الاسامي فعرفت انه فعلا خلص
    انا شفت الفيلم من حوالي شهرين و هو بيني و بينك مش من الافلام التقليدية اللي بتنتهي بأن المجرم يتقبض عليه أو يموت و الفلوس ترجع لأصحابها و الدنيا ترجع وردي بعد ما كانت سودا طول الفيلم، لان طبعا الواقع عمره ما بيكون كده
    انا مش بتاع نقد سينمائي و لا اي حاجة بس بصراحة انا بحب الافلام الأجنبي بالذات اللي من النوع ده، انا مش معقد و الله و لا حاجة و لا بتاع كلاكيع بس الفيلم ده فعلا مميز
    و بعدين الراجل الرخم (أنطون) فعلا عامل دور رهيب، و هو المفروض يكون رخم و يخليك تكرهه و واضح طبعا انه نجح في كده و انك كارهه جدا
    الجزء اللي في الآخر اللي انت بتحكي عنه هو اللي جاي منه اسم الفيلم، تومي لي جونز من الناس الكتير قوي اللي فاكر ان اللي بيحصل في زمنه ماحصلش في زمن اللي قبله و ان الزمن اللي قبله هو الزمن الجميل و ان الايام اللي احنا فيها دي ايام قاسية و سودا و مش مفهومة و يا ريت الواحد كان عايش ايام أبائه و أجداده لما كانت اخلاق الناس احسن (و الدنيا حلوة و احلى سنين بنعيشها و احنا يا ناس عاشقين) و الكلام ده اللي بالفعل اغلب الناس بتعتقده، لحد ما ادرك بعد ما راح لابوه و اتكلم معاه ان الدنيا اصلا كده على طول و انه ماجابش حاجة جديدة يعني، كل جيل لما بيكبر بيشوف الدنيا على حقيقتها اكتر و بتسود الدنيا في عينيه اكتر و بيتحسر على ايام زمان و هكذا دواليك، مع ان الدنيا اصلا على طول مهببة
    و في الحلم اللي بيحكيه في الآخر شاف نفسه مرة و هو ابوه بيدله فلوس و هو ضيعها، في اشارة ان اهالينا بيدونا خبراتهم و موروثهم و احنا مش بنهتم بيها و لا بنحافظ عليها و لا بنتعلم منها
    و تاني حلم انه كان راكب حصانه في طريق ظلمة و ابوه سبقه و بقى قدامه و في ايده البوق طالع منه نور بينورله بيه الطريق، و عرف وقتها انه أي حاجة حيقابلها أو يواجهها في حياته عموماابوه حيكون سابقه ليها و مر بيها قبله
    أما بقى مصير الراجل الرخم و الحادثة اللي حصلتله في الآخر فعايز يبين بيها ان الناس اللي فاكرة نفسها بتتحكم في كل حاجة في حياتها و بتتحكم في أقدار الناس التانيين و يقرروا مين يعيش و مين يموت بلعبة حظ و بمزاج، الناس دي اصلا لا تملك من أمرها شيء و في لحظة واحد بيطب عليه قدره زي القضا المستعجل
    طبعا مش مهم هو قتل البنت و لا لأ، لأن الفكرة انه بيوريلك ان ده واحد فاكر نفسه زي فرعون لما قال أنا أحيي و أميت، بيموت الناس بمزاجه و يحييهم بمزاجه، و في الآخر طبعا خد على قفاه على سهوة
    أما الفلوس فالراجل الرخم هو اللي اخدها بعدما فك فتحة المكيف اللي في اوضة لويلين بعدما مات
    بس يا سيدي، ان شالله كنت مفيد و تصبح على خير بقى عشان الساعة 2 بالليل و شكلي حتأخر على الشغل بكرة

    ReplyDelete
  3. شكرأ لdomdam
    شفت؟ أهو اختصر الفيلم فنص صفحة أهو :))))))))
    أنا برضه جبتوا دى فى دى و اتفرجت لحد ما خبى الشنطة فى فتحة التكييف و مقدرتش أكمل أكتر من كده
    فعلا ممل ملل غير طبيعى
    معرفش ازاى اخد اوسكار (يمكن جايزة أحسن ملل)
    يمكن لو رحتوا سينما كنت حستحمل و اكمله؟؟كل شىء جايز

    ReplyDelete
  4. الجوايز جوايزهم والأفلام افلامهم واحنا يدوب بنتفرج

    ReplyDelete
  5. انا كمان مش بحب الافلام الاجنبى.... جو غريب و شخصيات مهووسه و مريضة بدون داعى و كم من العنف غير المبرر و الغريب ان اغلب افلامهم كدا و انا مش عارفة دى بتعكس وجهة نظر مين بالظبط يعنى الجمهور عاوز كدا و لا المجتمع بتاعهم هوا اللى كدا و ما فيش فيه حد سوى و الا ايه !!!!! من الاخر بقى نادر جدا لما اشوف فيلم اجنبى و اعرف اتذوقه

    ReplyDelete
  6. بس انا شايف ان الفيلم اللي بيحصل في مصر اجمل

    انت ايه رايك

    ReplyDelete
  7. الفيلم شد انتباهي للفرجة عليه لغاية الآخر من غير ما أنام وأنا قاعد، وده بالنسبة لي قمة النجاح لأني غالبا ما بانام قصاد الأفلام من كتر ما اتفرجت على أفلام وبقت عندي مناعة
    اللي استغربت منه فعلا أن الفيلم ما فيهوش أي نوع من الموسيقة التصويرية! حاجة غريبة جدا والأغرب اني ما أخذتش بالي غير بعد ما خلص!
    معنى كده انه فيلم يشد فعلا!
    لكن مع ذلك وبكل حال من الأحوال، مش هو ده الفيلم اللي كان يستاهل أوسكار أحسن فيلم، في رأيي Atounment هو اللي كان يستاهلها.

    ReplyDelete
  8. واضح جدا إن العيب في الجمهور :)

    أنا الحقيقة بطلت فرجة من زمان لما لقيت إني بنام من غير فيلم أحسن من نومي بفيلم .

    ReplyDelete
  9. هو ده الفيلم اللي قلتلك إني كتبت عنه

    شفته مرتين
    أول مرة زهقت منه جدا و لأول مرة من زمااان كنت بجري الفيلم عايزة أخلص و أشوف انتهى على إيه

    ملل غير طبيعي و أكتر حاجة تخنقك إنك مش عارف الملل ده جاي منين

    و بعدين في الآخر تكتشف إنه عشان مافيش موسيقى تصويرية
    تخيل كده مشهد البنت اللي بتتقتل في الحمام في فيلم "سايكو" بتاع هيتشكوك من غير موسيقى تصويرية تلاقيه ممل..المخرجين في رأيي كانوا بس عايزين يعملوا حاجة جديدة لكن أضرت بالفيلم

    تاني مرة اتفرجت على الفيلم و انا عارفه عيبه فين و ركزت على أداء خافيير بارديم حسيت إنه فعلا دور جبار

    كفاية إنه خلاك تكرهه و تنفر منه و ده نجاح..كفاية تعبيراته و هو بيخنق الشرطي في أول الفيلم

    هو على فكرة قتل البنت لأنه بعد ماخرج من عندها بص على الجزمة بتاعته و هو بيعمل كده بعد كل جريمة خصوصا إنه قالها "أنا وعدت جوزك إني أقتلك"..نهايته زي ما
    domdam
    قال ماكانش المفروض تبقى تقليدية كأن يقبض عليه و الخير ينتصر على الشر لأن الفيلم كله غير تقليدي و بيعتمد على نظرية صدمة المشاهد

    في الآخر كأنه بيقوله ..إنت فاكر نفسك بتتحكم في مصائر الناس لكن إنت نفسك حاجة تافهه ممكن تنتهي في لحظة بلعبة من القدر

    تومي لي جونز طول الفيلم و من خلال يأسه و إستسلامه و أحلامه اللي بتتحسر على زمن فات و عداه و استغرابه من أساليب الإجرام الجديدة عليه و اللي مش فاهمها و مش عارف يتعايش معاها هو التجسيد لإسم الفيلم
    "no country for old men"

    و بعدين إستهدى بالله كده و ماتنرفزش نفسك..أمال لو شفت
    there will be blood"
    كنت عملت إيه؟

    ReplyDelete
  10. سوسا: there will be blood
    فيلم رائع جدا وممتع جدا بالمناسبة.
    المشهد الأخير خرافي ، لولا اني مش عارف كان إيه لازمته انه يقتل القسيس؟

    ReplyDelete
  11. هى دى السينما لما تقع من الدور العاشر مللللللللللللللل غير منتهى شوفته وكان حاله صعبه فى كل حاجه طبعا وعلى فكرة هما لهم اعتبارات تانيه فى الجوايز
    يعنى مش علشان جوده الفيلم بص على الافلام زمان اللى بتأخد جوايز ودلوقتى وانت هتعرف الفرق

    ReplyDelete
  12. في فيلم
    There will be blood
    كان طبيعي انه يقتل القسيس في الآخر كنتيجة لقمة الضياع اللي وصله
    الفيلمين دول فعلا تحس فيهم بنفس الجو و يظهر ان الاسلوب ده في الاخراج مدرسة جديدة طالعة و يظهر انها حتنتشر ما دام الفيلمين دول أخدوا جوايز في نفس السنة
    عموما واضح ان اغلب الناس كارهة الفيلمين دول جدا
    انا بقول احسن برضه عشان نبطل نشوف افلام و نفوق للي بيحصل في بلدنا شوية
    و بالمناسبة دي احب أهني جميع الاخوة و الاخوات على تمديد العمل بقانون الطواريء و ذلك كجزء من التطبيق العملي لمقولة:
    مصر بتتقدم بينا
    و يظهر اننا زي ما محمد حسنين هيكل قال امبارح حنشوف في السنتين الجايين اللي عمرنا ما شفناه قبل كده

    ReplyDelete
  13. ابو حميد حبيب

    انا بصراحة مش شوفت الفيلم ده خالص علشان كده حاسس انى مش فاهم حاجه احم احم ههههههههههه

    بس بأمانة انا وحشتنى المدونة بتاعتك فحبيت اجى اسيبلك رد

    شكلك نستنى خلاص

    تعالى البلوج بتاعى الجديد علشان تفتكر اخوك

    تحياتى

    رئيس جمهورية اسوان العربية

    ReplyDelete
  14. هو فيلم رخم صحيح
    لكن عجبني أكتر حاجة فيه التصوير
    كان جامد موت

    ReplyDelete
  15. انا لسه مشوفتوش و عشان كده مكتبتش عنه مع ان انا بنتف ريش كل فيلم بشوفه اول مشوفه هكتب

    ReplyDelete