Tuesday, July 22, 2008

من أمام مركز تراخيص المدونات


من وحي قانون البث الفضائي




في التاسعة صباحا كنت أمام مركز التراخيص التابع لوزارة الإعلام للحصول على ترخيص المدونة ، دخلت على الغرفة المعلق على بابها يافطة مكتوبة بخط اليد ويبدو أن حبر القلم قد إنتهى قبل إستكمال العبارة "ترخيص المدوات" بالطبع عرفت أن المقصود المدونات

إلتفت إلى المكتب الثاني على اليمين التي تجلس عليه مدام محاسن السمينة إلى حد ما بعد أن إرتفع صوتها أمام فتاة في منتصف العشيرينات
مدام محاسن : ماتدوخنيش معاكي قلنا مافيش حاجة إسمها مدونات طبيخ ... الليستة عندك أهي إختاري أي حاجة منها
هي : إزاي يعني أي حاجة .. أنا المدونة بتاعتي مهتمة بشؤون المطبخ وفنون الطبخ ووصفات الأكلات
مدام محاسن : تبقى مدونة دينية .. ماهو الدين بيشمل كل حاجة وخلصينا بقى .. إنت مدونتك إسمها إيه ؟
هي : حسبي الله ونعم الوكيل
مدام محاسن : مش قلتلك تبقى دينية .. ممكن سؤال
هي : إتفضلي
مدام محاسن : ياختي بعمل كل حاجة والملوخية برده بتطلع سايطة

أمام مكتب الأستاذ مدبولي وقف شاب في أوائل العشرينات يرتدي تي شيرت بترتر وبنطلون بوسط نازل يبدو منه من الخلف قطعة قماش قطنية مكتوب عليها قطونيل
الأستاذ مدبولي : والمدونة إسمها إيه ؟
هو : مش لاقي شبشبي
الأستاذ مدبولي : نعم ياخويا .. إحنا هانهرج
هو : هي إسمها كده من سنة وماقدرش أغيرها
الأستاذ مدبولي : والمدونة دي عن إيه ؟
هو : دي مدونة ساخرة

يتوقف الأستاذ مدبولي عن الكتابة ويرفع نظره للشاب مع رفع السبابة وعليه كل الجدية : أوعى تكون فيها حاجة سياسية لأن ده تزوير وممكن تتقفل ويتسحب الترخيص
كتب الأستاذ مدبولي الإيصال : روح شباك تلاتة إدفع تلاتة وستين جنيه وخمسة وسبعين قرش
هو : كام ... ده تامر صاحبي جه أول إمبارح ودفع تسعة جنية وربع
الأستاذ مدبولي : أيوة ياأستاذ . أكيد مدونته رياضية .. المدونات الرياضية أرخص حاجة
هو : بس تامر مدونته مش رياضية .. ده مدونته أسمها إخواني إبن إخواني
هو : ماتقلقش هانقفلهاله وهايتحبس

في آخر الغرفة كان الأستاذ حسونة المهندم مرتديا بدلة كاملة برباطة عنق يقف أمامه شاب مهندم هو الآخر معطراً بمايقارب من نصف كيلو وان مان شو ماداً يده بكارت للأستاذ حسونة

هو : الأستاذ بهاء باعتلك الكارت ده
الأستاذ حسونة: ومدونة حضرتك إسمها إيه ؟
هو : إسمها وطني
إنتفض الأستاذ حسونة واقفا من على كرسيه طالبا منه أن يستريح
الأستاذ حسونة : تشرب إيه ؟
هو : شكراً ولا أي حاجة أصلي مستعجل
الأستاذ حسونة: طيب ممكن ثانية واحدة بعد إذنك
لحظات وحضر مدير الإدارة فاتحاً يداه : أهلاً وسهلاً أهلاً أهلاً وبعد التحيات
مدير الإدارة : حضرتك إنت عارف الإجراءات بتاخد وقت شوية .. حضرتك إتفضل إنت وبكرة الترخيص هايكون على مكتب الأستاذ بهاء ، أنا هاوديهاله بنفسي وماتنساش تحياتنا ليه

على المكتب المقابل كان الأستاذ كمال منفعلاً
الأستاذ كمال : يا أستاذ الإسم الحقيقي مش المستعار .. المتعوس إيه وبتاع إيه أنا عارف إنتوا بتجيبوا الأسامي دي منين
هو : لو سمحت بلاش تريقة .. بس هو لازم يعني الأسم الحقيقي
الأستاذ كمال : ياأستاذ دي أوراق رسمية إحنا هانهرج
هو : طيب .. أحمد فاروق
الأستاذ كمال : والأي بي بتاعك إيه
هو : ماعرفش أنا بدوّن من السايبر
الأستاذ كمال : ماينفعش .. لازم أي بي
تلتفت إليه صاحبة مدونة الطبيخ وتهمس له : إكتبله أي رقم وسيب مسافة كل تلات أرقام .. أنا عملت كده
هو : طيب ممكن نتعرف
هي : ياخويا إتلهي على عينك

وهنا ظهر صوت الأستاذ مدبولي مدوياً كأنه إكتشف مصيبة
الأستاذ مدبولي : إنت متأكد إن ده إسمك
هو : آه والله .. اطلعلك البطاقة
الأستاذ مدبولي : أيوة طلعها .. ياأستاذة محاسن مش ده وائل عباس
مدام محاسن : أيوة ياخويا شبهه .. ده شبه الصورة اللي عطينهالنا
هو : البطاقة أهي
الأستاذ مدبولي : انا شاكك في البطاقة دي .. تعال بكرة يكون الأستاذ حمدي هنا هو اللي يقدر يعملك الترخيص .. ياعم أنا ماليش دعوة

مرة أخرى على مكتب الأستاذ حسونة المهندم
الأستاذ حسونة : ومدونة حضرتك إيه ؟
هو بكبرياء : ثقافية
الأستاذ حسونة : ثقافية إزاي يعني
هو : يعني نثر وزجل وشعر .. كده يعني
الأستاذ حسونة : آه .. زي المدونة اللي إسمها قشر البطاطس
هو : نعم .. لا والله ماسمعتش عنها أصل إحنا كتير والمدونات بقت بتلم
الأستاذ حسونة : طيب ماتسمعنا حاجة كده

55 comments:

  1. حسبنا الله ونعم الوكيل

    وكم فى مصر من المضحكات
    ولكنه ضحك كالبكاء

    ReplyDelete
  2. استاذ استاذ استاذ
    احسن حاجة اتكتبت عن القانون دة و الله العظيم كتابتك روعة
    موهبة بجد شكرا شكرا شكرا

    ReplyDelete
  3. الكلام ده بجد؟؟؟
    انا مش بقيت اعرف من كتر ما خوفونا و قالو انها حتتسحب؟؟؟؟
    يارب يكون سخرية من الموقف بس

    ReplyDelete
  4. لذيذة موت بجد

    بس اكيد لها جزء تانى

    منتظرين

    ليس اول مرور ولكن اول تعليق

    تقبل مرورى:)

    ReplyDelete
  5. رائعة بجد
    و واقعية جدا
    و مصرية قوى
    بجد انا مش مستبعده ان الاحاديث دى تحصل فى مصر كمان كام سنه كده
    مش بعيده على البعدا
    و ربنا يخلننا فى برطمان

    ReplyDelete
  6. أنا بقى مدونتى تندرج تحت بند إيه ؟؟
    الشئون الاجتماعية و لا محاكم الأسرة و لا إيه ؟؟
    الله يحظك يا شقير
    ضحكتنا ضحك كالبكا
    أنا بقيت بفتكر المتنبى كل يوم و الله
    و إترحم عليه
    كلامه صح ألف ى المية

    ReplyDelete
  7. هههههههه .. مين مننا ماشافش المواقف دي وهو بياخد ترخيص مدونته .. المهم حضرتك عرفت تطلع الترخيص ولا ايه ؟! هههههههههههه

    ReplyDelete
  8. طيب بقولك
    اخد معايا طوابع وقلم ازرق
    علشان لو طلبوا حاجه تكون معايا
    تفتكر يكونوا شغالين بعد الضهر
    يالا هروح واقلك عملت ايه ؟
    صح افتكرت
    طيب والكارنيه بيبقي مغلف والا لاء
    وصحيح هيتكتب في البطاقه اني مدون وهيكتبوا اللينك
    عارف اني طولت عليك بس علشان محدش يشتغلني هناك
    :))))))

    ReplyDelete
  9. ايه الكلام الجامد ده
    والله تصوير اعتقده مشابه للحقيقة جدا
    كيف من لا يعلم ان يتكلم ويحكم فيما لا يعلم

    ياتري هيعملوا مكاتب فيلا الاقاليم ولا لازم نسافر القاهرة نقف في الطابور منذ السابعة صباحا؟؟

    وياتري الفيزيتا بتاعة الرشاوي في قسم المدونات هتكون كام ؟؟
    اللي يعيش ياما يشووف

    لك ك

    ReplyDelete
  10. This comment has been removed by the author.

    ReplyDelete
  11. طيب ناقص فيش و تشبيه و كشف عيلة و شهادة من 2 موظفين لا يقل مرتب الواحد منهم عن 100 جنيه .. ان محمد افندى هو نفسه ابن الست ام محمد ... ضحكتنى و الله .. من زمن و انا محتاج اضحك

    ReplyDelete
  12. جميلة جدا يا استاذ احمد فكره وموضوع
    شكلها هتضرب في دماغي وهشاركك بقيت الحلقات
    مهي لازم يكون ليها باقي مينفعش توقفها لحد هنا
    تحياتي ليك ولافكارك

    ReplyDelete
  13. ايه ده هو الكلام بجد ولا ايه ؟

    طب هيحاسبونا على القديم ولا عفا الله عما سلف ؟

    :D

    لا يا عم انا هقفلها بالشمع الاحمر لاحسن المصنفات تيجى تقفلها
    :D

    البوست رائع .. تحياتى

    ReplyDelete
  14. ويبقي لينا رقم تأميني
    ونجيب كعب عمل
    وساعتها يبقي اسمه كعب تدويني يعني؟

    هو انا صاحية الساعة واحدة ونص الصبح
    هل ده هلاوس
    ولا بحق وحقيييق؟

    :D looool

    ReplyDelete
  15. ربنا يجعل كلامنا خفيف عليهم

    ReplyDelete
  16. بصراحه أنا في الاول صدقت إن ده حقيقي...عبيطه بقى
    ربنا يستر ومتتحولش لحقيقه
    ياريت تكتب تدوينات تانيه عن الموضوع ده
    تحياتي

    ReplyDelete
  17. هاها حلوة، المفروض تضيف ليها مشهد فيه ناس جاية تسجل مدونة مشتركة و تعقيدات ده لأن زي ما أنت عارف المدونة المشتركة عايزة تصريح من الأمن الا في حالة أنهم يكونوا عائلة واحدة و دي بتحتاج قيد عائلي.

    ReplyDelete
  18. ههههههه
    والله مش بعيد كمان كام يوم يبقى البوست ده حقيقة
    ربنا يستر

    ReplyDelete
  19. مصيبه اذا المدونات لها ترخيص


    يمكن الهوا لازم نشتريه

    ReplyDelete
  20. عزيزي أحمد

    تصدق ان ممكن يجي يوم و يحصل اللي بتتكلم عنه
    ماهي المدونات بقت بتعملهم هسس زي ماتامر امين عمال بيهاجم في الفيس بوك و تلاقيه عامله اكونت عليه كله عشان مجموعه عملت جروب بتهاجمه فيه

    حوار جميل و لذيذ
    اول زياره لمدونتك بس اكيد مش الأخيره
    تقبلي مروري و تحياتي ليك

    ReplyDelete
  21. مش بعيد أبداً أبداً

    حتى لو قُضى على كل مظاهر الحرية وكل ادوات التفاعل

    فحريتى فى عقلى وقلبى

    ReplyDelete
  22. هههههههههه
    موظفين تاننننننننننننى
    و يا ترى انا هابقى ايه؟؟؟

    ReplyDelete
  23. محمد وجديJuly 23, 2008 2:01 PM

    كل الخوف أن يصبح حلمك هذا حقيقة

    سعدت بالمرور بإدراجك القيم هذا

    كن بخير

    محمد وجدي

    www.almwalon.com

    ReplyDelete
  24. السلام عليكم ورحمة الله وبركاته


    ههههههههههههه

    ربنا يستر ويجيب العواقب سليمة

    ReplyDelete
  25. عجبتني أوي مدونة مش لاقي شبشبي
    بجد ضحكتني من قلبي
    :D

    في انتظار الجزء التاني :))

    تحياتي

    ReplyDelete
  26. تحفة
    والله فكرتني بأحمد رجب
    في فيلم الوزير جاااي
    وأكتر شخصيتين مش قادر انساهم
    ظنانه بيه
    والسالك

    تحياتي
    وليد

    ReplyDelete
  27. طيب واللي عايز يعمل ترخيص تجاري يعمل ايه ؟؟
    او دور تاني مثلا :))
    :))))))
    مبتكرة ومبدعة كعادة قلمك يا استاذ شقير

    والا التلاتة وستين جنيه و75قرش دول :)))
    اكيد في جزء تاني

    التعليقات مصيرها ايه ؟؟ لازم لها تصريح منفصل ولا سركي ولا ورقة ملحقة ؟؟
    طيب واللي عايز يطلع دور تاني يجدد يعني في تصميم المدونة ؟؟

    واكيد لو واحد عايز يعمل مدونة تانية تبقى اغلى :)))

    ReplyDelete
  28. أخى الكريم : أحمد
    السلام عليكم ورحمة الله وبركاته
    فعلاً وكما يقولون شر لبلية مايضحك
    فى مصر ممكن تصدق إن أى شئ ممكن يحصل
    وماكتبته أنت الآن بأسلوبك الساخر المهذب والرائع
    قد يصبح بين عشية وضحاها حقيقة واقعة
    وحسبنا الله ونعم الوكيل
    تقبل أخى كل تقديرى واحترامى
    أخوك
    محمد

    ReplyDelete
  29. أستاذ بجد ، بس حتبقى عندك مشكلة لما تيجي ترخص مدونتك ، بس إبقى إبعت لي إيميل قبل ما تروح ، أنا أعرف واحد في فحص مدونات فيصل ، حايخلص لك كل حاجة ، و المهم إنك تبقى فاحص و دافع التأمين ، و الرخصة تبقى تيجي على مهلها ..

    ReplyDelete
  30. وائل عباسJuly 24, 2008 9:05 AM

    وقعت على الارض مسخسخ لما وصلت للواد اللي شبهي
    هاهاها
    تفتكر ده ها يكون وضعنا فعلا ؟

    ReplyDelete
  31. هههههههههههه

    ازاى حضرتك جامد كده بجد....

    وصفت الوصف اللى بالفعل هنوصله قريب...

    بس هيبقى بواسطة برضه وبكارت من الاستاذ بهاء عشان ندون ونكتب اللى جوانا :D

    ReplyDelete
  32. مدام محاسن ازيك يا اختشي انا مدونتي بتتكلم عن الطهق الزوجي
    مدام محاسن: و مين سمعك يا اختي كلنا في الهوا سوا
    طهقانة: طيب ما تديني رخصى اعلقها في رقبتي بقى يا اختي
    مدام محاسن: طيب هاتي المدهول على عينه طهقان يكع خمشتاشر جنية و انا اديهولك


    طهقانة: يا دهوتييييييي

    اوروفوار

    ReplyDelete
  33. بس انا عايزة ترخيص بدورين علشان كلبوزة و طهقانة
    و عايزة بطاقة تدوينية ابقى استلم بيها التموين اول كل شهر
    مش برضه الحاجة و ستين جنيه دول مقابل التدوين المدعوم اللي حيدهولنا

    يسعد مساكم

    ReplyDelete
  34. خلاص يا سيدى
    خلعنا عليك لقب مدون نجم
    افرح يا عم وزقطط
    سؤال رفيع بس
    هو ممكن يقسطو الخمسه وستين حنيه وخمسه وسبعين قرش رسوم تراخيص المدونة
    أنا كده هايتخرب بيتى
    عندى ست مدونات.

    ReplyDelete
  35. ممكن تضيف دين على اللقطات

    تقف الفتاة ذات الرداء الأسود وطلاء الأظافر الأسود وطلاء الشفايف الأسود أمام محسن عليش موظف فحص الطلبات وهى ساكنة سكون الليل، يغوص محسن بنظارته الطبية غليظة العدسات فى الطلب المقدم منها لدقائق ثم يعلو بإنسانى عينيه إليها دون أن يغير وضع وجهه ويتمتم مستغفرا الله، ثم يغوص ثانية فى الطلب
    يهمس الطفل الصغير الواقف خلفها، أبله أبله، ترد نعم يا حبيبى، هو يعنى إيه جوثيك اللى حضرتك كاتباها على التاتو اللى فى ضهرك دى، تشد بلوزتها لتغطى ظهرها وهى تتأفف ثم تنظر لمحسن وهى تهتف بعصبية
    ود يو بليز هارى آب، يرفع محسن وجهه لديها وهو يهز رأسه بتأفف، نعم يا آنسه،
    ممكن تخلص بسرعه حضرتك بتمقق فى البايبرز من ساعة تقريبا
    أيوه يا أستاذه أنا باعمل شغلى والله، حضرتك شفتينى قمت من قدامك أو رديت على تليفون ولا حتى دخلت الحمام، ده شغلى يا ستى وأنا أدرى ن ولو مستعجله سيبى الطلب وعدى بعد أسبوع،
    حضرتك أنا آلريدى جيت من اسبوع وزهقت ومشيت ولما رجعت لقيت الطلب لسه ما حدش بص فيه بحجة ان البيانات ناقصهأيوه يا ستى إنتى لازم تستوفى البيانات
    أنا مليته كله قدام المدام اللى كانت قاعده قدام حضرتك
    تمام ياستى بس هى أشرت إن المدونه لازم تعرض للفحص عشان هى شايفه ان فيها أمور مخالفه
    مفيش فيها أمور مخالفه أنا دارسه علم نفس وباحط فى المدونه معلومات عن الاكتئاب
    جميل إحنا مهمتنا نعرف حضرتك بتتناولى إيه فى المدونه وهل ده مخالف لبنود لقانون البث ولا مش مخالف وهل بيدعو لحاجات كده ولا كده ولا ماشى سليم، هو إيه اللى كده وكده وإيه اللى ماشى سليم، أنا جبت لحضرتك تلت صور طبق الأصل مطبوعه من كل البوستات وشهاده من أستاذ جامعى متخصص إن المادة المعروضة تتفق مع العلم، وإقرار منى بإزالة أى مواد تقرر حضرتك إنك تقول إنها مخالفه، ممكن بقى تشهل وتخلصنى.
    يخبط الاستاذ محسن على مكتبه بعنف
    مش معقول يا أستاذه أنا قلتلك إنى باعمل شغلى
    تندفع فتاتين محجبتين من الطابور، وتعاتبانها، إنتى كده معطلانه ممكن تسيبيه يخلص بقى شغله، طالما خلصتى اللى عليكى سيبيه بقى يعمل اللى عليه إيه ده، تنظر لهما ذات الرداء الأسود بتأفف وتحيد بناظريها عنهما، يدفعها الطفل الصغير فى مؤخرتها، تنظر إليه بتأفف، يبتسم ويسألها، أبله أبله، هو ممكن يفوتولى المذكرات بتاعتى اللى حاطيطها على مدونتى، مذكرات إيه يا شاطر، أنا حضرتك كاتب عن علاقاتى بصاحباتى فى المدرسة
    تنظر باهتمام وتسأله كاتب إيه
    لأ حاجات كده عن حبنا
    حب مين يا شاطر
    أنا وهما بنحب بعض
    إزاى مش فاهمه
    يمد لها بصورة من مدونته
    تفتح أول صفحه ثم تصرخ مندهشة

    ReplyDelete
  36. بعد إذنك ياستاذ أحمد ممكن تقولي علي عنوان مكتب التراخيص دة بالضبط واه هي الاجراءات
    أصل أنا مكتش أعرف ان المدونة لازم لها ترخيص وشكرا

    ReplyDelete
  37. من وحي البوست

    http://ahmadsfindings.blogspot.com/2008/07/blog-post_24.html

    ReplyDelete
  38. السلام عليكم ..
    هو الكلام ده حصل ؟ ولا حضرتك بتتخيل انه هيحصل ؟
    الكلام ده لو حصل هتبقى مصيبة لان ميزة المدونات انها بعيدة عن بيروقراطية (روتين) المصالح الحومية بما فيها الجرائد اليومية اللي اصبحت ايضا مصالح حكومية
    وشكرا
    http://alostazzz.blogspot.com

    ReplyDelete
  39. طيب يا اخويا والنبى تقولى رسوم مدونتى كام
    واوعى تجزرنى
    والنبى على قلبك يا شيخ تكون حونين معايا
    اصل انا ابنى فى مدرسة انترناشونال
    ومصاريفه نار

    طيب انا مدونتى اسمها سبهللة
    تفتكر هايصنفوها ايه؟؟

    بجد بوست اكثر من رائع
    يسيلم خمك اللى فكر ويسلم كيبوردك اللى كتب
    سلام عليكم

    ReplyDelete
  40. لأ جامدة جامدة يعنى :)

    ReplyDelete
  41. ههههههههههههههههههههههه

    جامدددددددة

    روعة يا استاذ

    بس ربنا يستر وميبقاش بجد
    :S:S:S

    ReplyDelete
  42. عبد الجوادJuly 26, 2008 12:32 PM

    جميلة جدا
    تصوير وتشبيه اقرب للواقع
    ورنا يستر

    ReplyDelete
  43. تحفة بجد

    بس المشكلة مع كل كلمة الواحد بيضحك من المواقف وهو مرعوب من البكا ألي هيتبع تنفيذ القانون

    ومبقتش بعيدة قوي يعني

    شكلها قريب كلنا هنقف في مكتب ترخيص المدونات

    كويس على الأقل المدونين ألي لسه متعرفوش على بعض يتعرفوا

    إلا صحيح المصري ألي بيدون من بره مصر هيعملوله فروع في دول العالم ولا لازم ينزل ياخد التصريح من هنا.. وممكن يعمل التصريح بتوكيل ولا لازم يجي بصفته وشخصة :d

    طب مدونتي دي نصنفها إيه بالضبط

    ده احنا هنتعب تعب

    البلد دي بقت مسخره

    ReplyDelete
  44. يا خوفى ليسرقو الفكره و ينفذوها و تبئا حضرتك السبب

    تحياتى و عظييييييم احترامى لشخصك

    ReplyDelete
  45. حلوة اوي يا استاذ احمد
    حسستني اني انا جوه المكتب فعلا
    شر البلية

    ReplyDelete
  46. آدي صورة البطاقة
    وصورة من شهادة التجنيد
    وصورة المؤهل
    والإقرار الضريبي
    وتلات صور شخصية
    وشهادة الميلاد
    وطوابع الدمغة
    الموظف_الورق غير مستوفى
    عايزين صورة من شهادة الوفاة بتاعتك

    ReplyDelete
  47. عزيزى شقير

    من أحلى ماكتبت ..ربنا يحفظنا

    ReplyDelete
  48. حامده جدا انا ضحكت على حكايه الطبيخ دى
    ربنا يسترها على مصر

    ReplyDelete
  49. هوه بجد لازم اجراءات لتسجيل المدونة علشان تبقى رسمية ومحدش يكلمنا

    ولا المدونات اصلا حاجة غير شرعية تؤذى الحكومات

    ReplyDelete
  50. يا عم ما تشغلش بالك

    روح على طول على الواد سعيد بتاع الشاى واغمزه بسفنطاشر قرش رشوه وهو هيخلصلك كل حاجه كأنك وطنى

    وفى مصر يا كارنيهك يا قرشك يا مافيش النهارده


    تحياتى

    ReplyDelete
  51. يا نهار اسود لو جه علينا اليوم دا

    ReplyDelete
  52. رائعه جداًَ بجد يسلم مخ أنس الفقى تلميذ العادلى المطيع
    وتسلم إيدك وقلمك يافنان
    ....الصعيدى ....

    ReplyDelete
  53. والله انت عسل ... وأفكارك سودة ومقندلة بالطين

    ههههههههههههههههههههههههههههههههههههههه

    يالهوى بتخيل نفسي وانا رايح أعمل الترخيص يادى المصيبة ... انا لخمة ونيلة ولما بشوف موظف حكومى ممكن أهيس واروح مكبر دماغي عن المشوار كله

    يالهوى لو المصيبة دى بقيت حقيقية

    ساعتها هقفل المدونة وابقي أعمل أى حاجة تانية ممكن أقشر بطاطس أو أشتغل بتاع مخلل

    هههههههههههههههههههههههههههههههههههههههههههههه
    سلاموز يا جميل

    ReplyDelete
  54. عمال انت تفتح عنبن الجماعة البعدا عبنا
    والله انا مستبعدش اي حاجة في البلد دي

    ReplyDelete
  55. قليلا ما تحفزنى قصة لكتابة تعليق عليها و قصتك تلك قامت بهذا الدور سأكتفى برفع القبعة لك تعليق عليها
    تحياتي لك
    و كل عام و وأنت و كل الناس بخير

    ReplyDelete