Sunday, March 01, 2009

وحشتيني يامصر





مناسبة غير مرتبة دعتني لنزول مصر في زيارة مؤقته قصيرة .. ياااه وحشتني مصر أوي ، في طريقي للمطار ... أتعجل الوقت

نفسي أمشي في شوارع وسط البلد .. أقابل وجوه مختلفة وروح مصرية بعدما إستهلكت نفسي في مراكز تجارية فخمة بلا روح ولا هوية

نفسي أنزل في نص الليل ألّم جرايد الغد وأقضي الليل في قرائتها بطباعتها السيئة ومحتواها الساخن ، بدلا من جرائد زاهية الطباعة وعالية الجودة وسخيفة المحتوى

نفسي أروح السينما وأمسك بكوب البيبسي بيد وباليد الأخرى كوب الفيشار ، وينتهي كوب الفيشار الخاص بي فأمّد يدي في كوب أبنائي ألتقط حبات منهم ، بدلا من الهوم ثييتر والدي في دي والإل سي دي

نفسي أقعد على قهاوي القاهرة البلدي وأشرب شاي كشري ، وأقابل ناس ماقابلتهاش من زمااان ، وأشعر بدفأ المكان بدلا من برودة مكيفات في كافيهات تعج بوجوه غامضة جامدة وشخوص سميكة بلا روح

نفسي في أكلة يوم جمعة عند حماتي معمولة بمزاج بدلا من أكلات مطاعم سريعة بلا مذاق .. تغلق بطن ولا تشبع نفس

جايلك يامصر .. في مطار القاهرة ... كانت زوجتى وأولادي في إنتظاري ... وحشتوني

في طريقنا للسيارة

أنا : إيه ده .. إيه اللي كسر الفانوس الوراني .. وخبط الإكصدام كده ؟
هي : إركب بس .. أبداً .. واحد حيوان خبطني من ورا إمبارح ولما جيت أنزل .. لقيته جري بالعربية وشتمني كمان
أنا : خير خير .. المهم إنتي إزيك واحشاني .. إيه ياأولاد بقالكم كام يوم مش بتبعتوا إيميلات ليا ليه ؟
هو : يابابي الكومبيوتر الجديد مش عايز يشتغل .. فيه سبعتشار ألف وربعماية سبعة وتلاتين فيروس
أنا : إممم .. مش مشكلة نوديه للراجل يصلحه .. إيه إنتي وقفتي العربية ليه ؟
هي : أبداً .. هاعدي بس على السباك أخليه ييجي البيت عشان موتور المية بايظ من إمبارح .. وشكل الموتور إتحرق
أنا : يعني البيت مافيهوش مية
هي : طبعا لأ .. مانت عارف المية مابتجيش من غير موتور
أنا : إممممم ... طيب بسرعة

بعد شوية في العربية

أنا : حاسبي حاسبي .. ياساتر .. كنتي هاتخبطي الراجل
هي : شفت نطّ إزاي عشان يعدي الشارع .. ربنا يشفي .. وبعدين بالراحة كده مايبقاش قلبك رهيف .. إنت خضتني
أنا : عايزين بعد مانطلع الشنط ننزل ناكل بره
هي : طيب بس الأول لازم نعدي على طنط مريم عشان نعزي
أنا : خير .. في مين ؟؟
هي : أونكل شاكر مات النهاردة الصبح
أنا : إمممم .. والولاد عاملين إيه ؟؟
هي : أنا هاقول ياولاد .. مش هاقدر أخبي على أبوكوا أكتر من كده
أنا : خير ؟؟
هي : نتيجة إمتحانات نص السنة ظهرت إمبارح وجايبين درجات زي الزفت آخر حاجة .. بالرغم من إني مش مخلية عن جهدي جهد
أنا : إمممممممم .. إيه الريحة دي ؟؟
هي : مش عارفة الجو بقاله كام يوم كده فيه الريحة الخنيقة دي
أنا : إيه ده .. الإشارة حمرا .. وبتعدي كده
هي : ياسيدي .. إنت خلاص نسيت ولا إيه ؟.. ولاّ هاتعمل نفسك خواجة ؟.. على فكرة أنا رحت أجدد الرخصة كشفت على المخالفات عايزين ألف سبعماية خمسة وتلاتين جنيه
أنا : إممممم .. خواجة .. بس حقيقي واحشاني

في البيت

هي : ياللا ياأحمد قوم إصحى إلبس .. عشان ننزل
أنا : إطفي النور .. وإقفلي باب الأوضة عليا .. ومش عايز أسمع أي دوشة

33 comments:

  1. حمد الله على سلامة الوصول
    وانا باقول بقالك كام يوم مختفي
    اتاريك في مصر

    نورت ياهندسة ومرحبا بك في مصر

    عجبني جدا الحوار اللى حصل ده واللى فكرني بأول اجازة نزلتها بعد غياب برضه واندهاشي من التهريج المروري والناس بتعتبر اللى بيسافر ويندهش اصبح خواجة وهم ناسيين ان الواحد بيتعود فعلا على النظام والهدوء والنضافة اسرع مابيتعود على الهرجلة والدوشة والناس اللى بتنط فجأة في نهر الطريق ومطلوب من اللى سايق يتصرف بسرعة بدل مايقتل البهلوان اللى نط قدامه

    هههههههههههههههههه

    ياترى بعد كام يوم ح تلاقي نفسك زهقان وعايز ترجع لهناك تاني؟؟

    نورت مصر

    ReplyDelete
  2. حمد الله عالسلامة :)
    اولا من المدونة اعرف يا أحمد انت عايش فى مصر عالرغم من غرابتك من ناس انا عارفههم شخصيا
    عايشين جوه مصر :)

    ReplyDelete
  3. حمد لله على السلامه نورت مصر:))

    ReplyDelete
  4. حمد لله علي السلامة
    بس طبعا فيه فرق شاسع بين الحياة في القاهرة و الحياة في الدولة اللي انت جاي منها
    طبعا إحنا عندنا العملية زي السلطة
    كله في بعضه
    و الحياة أهي ماشية بتستمر
    تمنياتي ليك بقضاء أيام ممتعة في القاهرة الزحمة و مع المرور الخانق و السحابة السوداء
    و أهلها الطيبين

    ReplyDelete
  5. وأنا أقول بقى لك كام يوم مختفى

    حمد الله ع السلامة

    ReplyDelete
  6. نفس السيناريو بتاع بابا كل مرة بينزل فيها مصر .. اول يوم كله حماس للفسح و المصيف و الاخر ترسي ان الاجازة كلها نااااايم او قصاد التليفزيون .. بس ناقصاك المية المعدنية .. هتبتدي تهجر مية الحنفية و تشرب مية معدنية امتي ؟

    ReplyDelete
  7. يا بختك يا مان انت فى مصر ام الدنيا بس بص هى حلوة بكل ما فيها زى ما انت وصفت بتوحشنى كتير زى ما بتوحش ناس كتير

    ReplyDelete
  8. هههههههه انت لسه مشوفتش
    حمد لله على سلامتك يا رب تقضى اجازه سعيده يا رب

    ReplyDelete
  9. حمدالله عالسلامة يا أحمد وأتمنى لك وقت طيب مع أهلك وأحبابك فى بلدك

    ReplyDelete
  10. حمد الله علي السلامة
    متقلش مدام جيت مصر يبقي حتشرب يعني حتشرب

    ReplyDelete
  11. ههههههههههههههههههه... والله هم يبكي وهم يضحك
    وحمد الله على سلامتك يا أحمد :)))

    ReplyDelete
  12. صحيح .. الغربه كُربه :( حمدلله على سلامتك بس زمانك رجعت :)

    ReplyDelete
  13. الف حمد لله على السلامه .. مش ناوى تحضر حفل توقيع كتاب انا انثى طيب؟ اهو بجد تبقا مفاجأة رائعة ونتشرف بوجودك

    تحياتى

    ReplyDelete
  14. This comment has been removed by the author.

    ReplyDelete
  15. مصر هي اللي وحشها احمد شقير
    بوست مميز جداً
    احسست بمشاعرك وان ابقرأ كلماتك

    ReplyDelete
  16. يبقى إنتا اكيد
    اكيد فى مصر
    يبقى إنتا أكيييييييييييد
    أكيد فى مصر
    ....إحم احم ...لمؤاخذة يا أستاذ أحمد بس الموقف حبك
    إنت مش كنت بتقول مصر وحشتنى ...
    يبقى لازم تاخد الكورس كله
    قبل ما تروح تقعد على القهوة
    لازم تتعطل فى المواصلات
    و قبل ما تشرب من نيلها
    لازم تصلح الموتور الاول
    كدا يعنى ...
    المهم ألف حمدلله ع السلامة
    و أتارى البلد منورة اليومين الى فاتوا قوى و أنا بقول الفولت الزيادة دا جه منيييين ؟!!!
    أتارى الأستاذ احمد شقير جه المحروسة
    أتمنالك اجازة سعيدة من قلبى بجد
    و متوقعة بوستات قوية زى البوست دا و احلى
    سلامى الكبير
    نورت و الله
    فاتيما
    ام يوسف

    ReplyDelete
  17. نورت بيتك وحتتك وربنا يوفقك لتسعد وتسعد اهلك باجازتك ان شاء الله
    لكن عايز اقولك اني معجب اوي بوصفك للرفاهيه الخاليه من اي روح
    وايضا تعبير اشبع البطون بدون اشباع النفوس ده في محله تمام
    الله ينور يا باشا
    وانا معرفش حضرتك بتزور مدونات ولا لا
    لكن لو حضرت كان عندك وقت بعد الاجازه
    وتخطف الكي بورد بتاعتك وتيجي تشرب بيبسي عندنا

    ReplyDelete
  18. يبقى أكيد هيّ مصر
    نسأل الله أن يصلحها ويردنا إليها سالمين

    ReplyDelete
  19. اهلا بيك فى وطنك يا أحمد ... مصر بتشرفك على وزن أبوك بيشرفك! ان شالله تكون مبسوط بشوفة الولاد و مامتهم و ده المهم .. حمدلله على السلامة

    ReplyDelete
  20. حمدا لله على سلامتك
    اكيد هى مناسبة غير مرتبة فعلا عشان تنزل فى ميعاد تجديد الرخص بالذات
    :))

    نورت مصر يا فندم

    ReplyDelete
  21. اكيد مش هنتهم المدام انها تكون مرتبه كل الاحداث دى عشان تضايق حضرتك
    لكن تقدر تقول ان دى احداث شبه يوميه فى بلدنا واول ماتشوفها
    يبقى انت اكيد فى مصر
    حمد لله على
    سلامتك والبيت بيتك

    ReplyDelete
  22. لما بنقول لحد وحشتني

    بيرد يقول

    ماتشوفش وحش

    ReplyDelete
  23. بس حضرتك كده شفت الحلو والوحش

    ReplyDelete
  24. أنا كنت فاكرة حضرتك عايش في مصر
    مصر حلوة برده بكل الوحش اللى فيها
    بس هو كل ده كان مستنيك ولا إيه ؟؟
    ألف حمدلله على سلامتك

    ReplyDelete
  25. يا سلام عليك يا أستاذ أحمد
    حسستني انك بتتكلم عني بالضبط، انت شكلك عايش في الخليج زيي من كلامك عن المولات الكئيبة و الجرايد و الأماكن المكيفة
    أشكرك لأنك عيشتني للحظات في جو يوم نزول مصر في الاجازة بكل تفاصيله
    أجازة سعيدة

    أحمد عتمان

    ReplyDelete
  26. :D
    asbteny be7ala mn el de7k el hestiry :D
    for 1 sec takhilt enk 7at2olah erg3y wadiny el matar :D
    t7yaty :))

    ReplyDelete
  27. LOL, ana brdo tawq3t 7adretak 7at2ol..lefo wadony el matar tany 7a2ta3 el agaza! LOL :D

    still, nawrt masr...and enjoy your vacation! :)

    ReplyDelete
  28. مبروك نزولك الأجازة
    انا فاضل لي شهر و إسبوع و أنزل أجازتي
    ربنا يستر
    و إن شاء الله تقضي أجازة سعيدة

    هي دي مصر

    ReplyDelete
  29. هاهاهاهاهاها
    ازاي فاتتني التدوينه دي في الريدر
    ؟
    !!

    مرحبا بك في مصر يا شقير

    انت كمان كنت واحشها
    زعلانه انك قاعد بره في هدوء بعيد عن مشاكستها و مشاغبتها و إزعاجها الدائم

    نورت مصر
    يا رب تستمتع بأجازتك

    ReplyDelete
  30. من السعودية

    الأصدقاء المعلقين الأعزاء شكر من القلب على تمنياتكم الطيبة .. مصر جميلة وأنتم اجمل

    ReplyDelete
  31. بتوحشني مصر
    بتوحشني قوي
    بزبالتها
    بهرجلتها
    بكل حاجة خربانة فيها

    النظام جميل ومريح
    وتاخد حقك بسهولة
    وكل واحد عارف دوره
    ده في البلد اللي انا فيها

    لكن مفيش متعة واثارة
    يعني ماشي بالعربية في الحارة بتاعتك ولا حد بينط قدامك ولا عربية تكسر عليك
    حاجة مملة
    اه
    مملة

    وحشاني يا مصر ونفسي اشوفك

    ReplyDelete