Saturday, October 31, 2009

لم أكن أتوقع هذا من جريدة الدستور



طاب مساؤكم ... تتعرض تدوينات المدونة من وقت لآخر للنقل سواء في الصحف أو المنتديات او المدونات أو الفيس بوك .. غالباً بدون إستئذان ، قليل من يذكر المصدر والمعظم لا يذكره ، وتعودت على ذلك وأكتفي بالإشارة في نهاية التدوينة على ما يقع عليه نظري من نقل كنوع من التذكرة وحفظ الحق .. ولا أتوقف كثيراً أبعد من ذلك ، حتى عندما بدأت جريدة الشروق في بدايتها بالتنويه عن بعض التدوينات ، كان الإنتقاد في إختصار الموضوع بما يمكن أن يخل بالمعنى أو بالصورة الكاملة لوجهة النظر المطروحة ، وحدث هذا مع صحف عدة ليس هنا المجال للإشارة لها .. والنقل مايكون لفكرة أو رأي أو خبر

ولعل تلك هي المرة الأولى التي أشعر فيها بضيق فعلي مما حدث ، فالنقل لم يكن كما هو معتاد لفكرة أو تحليل أو رصد ولكن كان لمجهود تنظيمي فردي كامل قامت به المدونة خلال فترة زمنية محددة لإستطلاع عن
أهم عشرة شخصيات مصرية مؤثرة في المجتمع لعام 2009 ، وبناء على مشاركة المئات إستطاعت المدونة ان ترصد القائمة بنجاح كبير وبكامل الحيادية وتم رصد جميع النقاط وتوضيحها في ملف كبير يستطيع كل من قام بالمشاركة أن يجد أين تصويته وكيف تم إحتسابه ، وتم الإستعانة بالإضافة للمدونة بإنشاء صفحة على الفيس بوك وبمواقع مثل جوجول بيدجز وجوجول دوكس لتكتمل عملية شرح الفكرة والتصويت والرصد

وظهر في الموعد المحدد قائمة أهم عشرة شخصيات ، وأشار موقع
جلوبال فويسس في تقرير له عن نتيجة الإستطلاع وكذلك مدونة التأريخ المصري أو إيجبشيان كرونيكل في تدوينة بعنوان قائمة المائة المصرية لشقير

اليوم صدرت جريدة الدستور وعلى مساحة كبيرة تشير للإستقصاء ونتائجه في مقالة لمحمد هشام عبيه بعنوان طويل يقول


حجم أكبر

مفاجآت أكثر عشر شخصيات مؤثرة في مصر على الإنترنت : عمرو خالد الأول وبفارق كبير عن جمال مبارك والرئيس مبارك الثامن وزويل العالم الوحيد بالقائمة


إلى هنا والكلام جميل ولكن الصدمة كانت مع الكلمات الإفتتاحية للموضوع حيث يشير محرر المقال وهو مدون زميل فيقول

أجري الموقع غير الرسمي لبرنامج العاشرة مساء- الذي أسسه محبو البرنامج دون أن تكون له صلة رسمية بقناة دريم- استطلاعاً بين زواره لاختيار أكثر عشر شخصيات مؤثرة في مصر خلال عام 2009، وشارك في التصويت أيضاً زوار موقع الفيس بوك الشهير عبر دعوة التصويت التي نشرها مديرو الموقع

موقع إيه ؟ وعاشرة مساء إيه ؟ ومحبو برنامج إيه ؟ هل هذا يصح وهل هذا يليق ؟ بجريدة مثل الدستور أن يتم نسب مجهود لم يكن سهلاً بأي حال في فكرة الإستطلاع وتحديد خطوطه والدعوة إليه ورصد نقاطه إلى موقع أخر وشخص آخر ، هذا الشخص أو الموقع لم يكن أكثر من ناقلاً لنتيجة الإستقصاء إحتفالاً بحصول مذيعته المحبوبة على المركز الرابع
لماذا لم يتابع محرر المقال مصدر الخبر ؟ وكيف وأين تم الإستطلاع ؟ وماهي النتائج الكاملة له ؟ ليتأكد هو من جديته وحياديته عندما يشير إليه ، بل ويشير في داخل التحقيق إلى موقع
الفيس بوك الذي دعم الإستقصاء ولو أخذ جولة بسيطة على الفيس بوك وهو بالمناسبة في قائمة الأصدقاء الخاصة بي لإكتشف من هو منظم الإستقصاء

للمرة الأولى أشعر بضيق حقيقي جراء نقل مجهود لي بهذه الطريقة وما زاد من ضيقي أن المحرر هو صديق تدويني قديم وصاحب مدونة من نفسي ، بدأنا التدوين في أيامه الأولى وتبادلنا كثيراً التعليقات على تدويناتنا

أثناء كتابة تلك التدوينة إتصلت بالصحفي هشام عبيه الذي أخبرني بأنه لايعلم بأني صاحب هذا الإستفتاء ، وإعتذر عن الخطأ وأشار إلى أنه سوف يقدم توضيحاً للأمر بشكل واضح في عدد الإثنين ، ولو كنت قد أقدمت على الإتصال به قبيل ذلك لإستطاع أن ينشر التنويه في عدد باكر الأحد .. حدثته بشكي في إمكانية القيام بذلك فقدم المشيئة بأن ذلك سوف يتم


كل ما أستطيع أن أنهي به هذه التدوينة .. إني حقيقي متضايق .. متضايق أوي كمان .. فلقد تعودت على المساعدة والتضامن مع الآخرين من أجل حقوقهم .. ولكن لا أدري لماذا هو صعب علي أن أكون أنا المطالب بحقي

****************************

تحديث

شكراً جريدة الدستور

29 comments:

  1. عارفه انه شعور مؤلم
    جربته
    لكن احنا كمدونين
    زي الست اللي بتنشر غسيلها في الشارع و لازم تتوقع انه يتسرق منه حاجة
    و تلاقي حد لابسه و لما تواجهه يقولها بمنتهى البجاحة
    ايه...بتاعي

    متضامنة معك

    ReplyDelete
  2. موقفك حيكون ازاى مع منتدى منى الشاذلى

    اللى بعتبره اخد مجهودك فعلا بكل مابالكلمة من معان؟

    ReplyDelete
  3. ماعتقدش انها المفروض تعدى بسهولة ...
    غلطة المحرر جسيمة وضرورة التقصى كانت واجبة قبل نشره وخصوصا انه خبر مهم مش موضوع عادى وحيجذب قراء كتير لأنه ببساطة يجمع بين اكثر من شخصية مهمة لكل واحد على حدة شعبيته الكبيرة
    ...اتمنى يكون التصحيح مصحوب باعتذار وبنفس حجم الخبر الاولانى ونفس الاهتمام ..

    طبيعى انك تتضايق ..نقل جزء من تدوينة او نقل خبر لايوازى نقل مجهود كبير زى ده ..منطقى انك متتسامحش كالسابق ومنطقى كم الضيق ده ...
    احنا كمان متضايقين ..

    ReplyDelete
  4. مش ممكن

    مافيش فايدة .. والعذر أقبح من ذنب

    وأهلا بصحافة الكوبي بيست الجديدة الواعدة

    :-(

    ReplyDelete
  5. كلم مني الشاذلي نفسها

    ReplyDelete
  6. ooh!! :o
    طبعا حقك تتضايق و تشعر بالاسى
    مصداقية الجريدة قاعدة بتنهار اكتر و اكتر
    صحافة كلها كروتة متقدرش تصدق حدو مصادرهم مضروبة
    بس هو الكلام اللي بيتكتب عالبلوج مش بيبقى محمي قانونا؟؟و لا اي حد يقدر يسرق و ينشر في الجرايد

    ReplyDelete
  7. أستاذ احمد
    انا حاسه بالضيق الي حضرتك فيه جدا جدا فعلا
    بس انا اعرف محمد هو شخص محترم جدا
    واكيد هينزل تنويه للخطا الي حصل ده
    ولو محصلش فأنا معاك

    ReplyDelete
  8. بص متسكتش ده حق تضامن من حقوقك انت انسان محترم وليك فكرك ومحدش هيعرف يجيب حق الا الانسان نفسه

    ReplyDelete
  9. انا لسه مكتشفة النهاردة بالصدفة
    إن تدوينة ليا اتنشرت فى جريدة العربى الناصرى
    لا حد سالنى
    و لا خد رأيى
    و لا حتى قالى بعد النشر عشان حتى
    اروح أشترى الجريدة
    و اشوف نيلوها نشروها إزاى
    و كتبوا إيه فى النسخة المطبوعة
    بص يا أستاذنا
    كلامى هيكون متحيز شوية
    بس مبنى على تجربة حقيقة
    بقالها سنوات و عمر طويل
    و للأسف مع كل هذا رأيى لم يتغير ....
    الاخوة الصحفيين تلتربعهم
    عندهم حالة إستسهال
    و لا مبالاة رهيبة فى نقل المعلومات
    دون الأشارة لمصدرها
    و الأسوأ أن المفروض يكون الواحد فيهم بحكم شغلانته
    يكون اكثر الناس إطلاع .. تكتشف إن اول حجة تسمعها أصلى معرفش
    صدقنى مشوفتش
    طيب خلاص صدقنا إنك متعرفش
    و لو إنه زى ما بيقول المراكبى عذر أقبح
    لكن ما عليناااااا
    اللى بعد كدا بقى ...ننقل عليه
    إين تصحيح الخطأ ؟؟
    تكتشف إنه ...و لا الهوا
    للأسف طبيعة الصحافة المطبوعة عموما بتخلى و تعود الصحفى على ان الفكر السائد شعاره
    إكتب و اجرى
    يعنى رص المقالة و سيب اللى قصادك يخبط دماغه فى أقرب حيط بقى
    ينكبس و يسكت
    أو يرفع قضية لو لبط شوية
    و لو طلع ذو حيثية و مسنود شوية
    ننشرله تعقيب فى سطر فى الصفحة العشرتاشر
    و خلصنا
    فكرة التدوين و حيويته و تفاعله
    مش فى دماغهم خالص
    و فكرة تصحيح الخطأ كمان .. مش فى دماغهم
    بينما انت لو بس مسيت طرفهم
    يا لهوتينى ى ى ى ى ى
    يبقوا هيولعوا فيك
    و يقعدوا يرصوا فى مصطلحات فخيمة عن حرية النشر و الرأى و الراى الاخر
    وليه قولت فى اول التعليق
    إنى متحيزة
    لأن والدى الله يرحمه كان صحفى
    عاش فى البلاط بتاع صاحبة الجلالة
    ييجى اكتر من اربعين سنة من عمره
    و من حكاياته اقدر احكم بشكل ما
    كنت فاكرة إن الاجيال الشابة
    وضع مختلف
    لكن للأسف ...تلاقيه فعلا إنسان محترم
    لكن مهنياً ... مش بنفس القدر
    للأسف
    و عجبنى قوى تعليق طهقانةو أحييها ...
    بتاع الغسيل دا

    ReplyDelete
  10. يا رب يبقي لينا تضامننا ضد حالات القص و اللزق دي

    ReplyDelete
  11. عندك حق تزعل لانها مش مجرد تدوينة عادية لأ دة مجهود ووقت وناس كتير دخلت وادلت برأيها يمكن علشان اسمك كمدون موثوق فيما يقدم عليه
    بصراحة دة خطأ مهني فادح من هشام عبية لأنه لم يتحر الدقة وهوما اعجب له فعلا لأنه صحفي كويس
    اتمنى انه يصلح ما افسده مصحوبا باعتذار ودة اقل ما يمكن عمله

    ReplyDelete
  12. الاجمل ان كلماتك تلهم الجميع و انت عارف ان دة طاقتك انت
    الاجمل انك تقعد تضحك انك المحرك لكل اللى بيحصل

    زى كدة جمال لما واحد صاحبك تلاقيه بيقول لناس كلامك اللى قلتهوله امبارح بالليل بعد سيجارة متغمسه زاد من تأثيرها قوة أفكارك

    ReplyDelete
  13. محمد هشام عبيه صحفى جيد و أمين و أتمنى الاعتذار ينشر فى الجريدة

    الموضوع المسروق فى منتدى منى الشاذلى

    ReplyDelete
  14. حركة مش لطيفة
    بس أكيد مش مقصودة من عبية
    ولا يعوضها سوى نشر الموضوع مرة اخرى بالكامل
    مع تقديمه بصورة صحيحة

    ReplyDelete
  15. طبعا متضامنه مع حضرتك يا باشمهندس

    و المفروض مايكونش مجرد اعتذار في صفحه ماحدش يقراها وخلاص

    ولاوني شايفه انه حتي لو اتنشر بالشكل اللائق مش هايكون كفايه

    ReplyDelete
  16. معلش و ربنا يجازيك خير على جهدك و يعوضك عن الموقف اللى ضايقك
    و خلاص ما تزعلش ده كل الناس متضامنة معاك و بتحبك

    ReplyDelete
  17. زى ما قالت طهقانة وفاطيما
    أهلاً بك فى صحافة الكوبى أند باست
    لكن ان كنت تستطيع مقابلة المسئولين
    عن الجريدة أو البرنامج(العاشرة مساء)فأفعل
    بأعتبارك أنك صحفى يستطيع عمل ذلك ولو على سبيل
    التجربة والمعرفة بأجراءات اتخاذ المواقف لمن لا يسعفهم
    القدرة بمقابلة أمثال هؤلاء!

    ReplyDelete
  18. شئ مخزي بكل معاني الكلمة وكان يكون العكس لو نسب الكلام لصاحبة الحقيقي بس فية ناس فعلا بتحب تحصد علي الجاهز ودة بيكون ملوش اسم غير انة لص وحرامي

    ReplyDelete
  19. العزيز أحمد .. المهنية المفقودة يا عزيزي .. نعم ضياع الأصول التي كنا نضعها في دواخلنا حين يحتكم الأمر .. واحترام الذات هي أهم أسس المهنية بل هي أساس كل شئ .. ومن لم يستحي فاليفعل ما يشاء .. ولكن عليه أن يستعد لتلقي نظرات الإشمئزاز والإحتقار . ولا يلومن إلا نفسه التي هانت عليه فهانت علي الناس ..
    أشعر بغصة في الحلق من سخافة الموقف الذي اسقط ناقله درجة .. ورفع من قدرك درجات
    فأنت تعلم يا عزيزي مدي قدرك عند الكثيرين وجميعنا يعرف مدي قامتك ورصيدك من حب الناس والرغبة الصادقة في المساعدة دون تردد وتعطي من وقتك الكثير لمن يستحق ومن لا يستحق ايضا..
    تحية لكل حرف من كلماتك المحترمة .. ولا تحزن .. فهناك أشياء لا تُشتري

    محمد فتحي
    مخرج صحفي

    ReplyDelete
  20. أستاذ أحمد
    كلنا بنتعرض للمشكلة دي ...أنا كل شوية ألاقي قصصي منشورة في منتديات عربية ...وإللي يفرس ردهم الغير مهذب
    لازم يكون في حل للمشكلة دي
    ولازم حضرتك ما تسيبش حقك
    تحياتي

    ReplyDelete
  21. هم نفسهم من صدعوا رؤسنا ليلا نهارا عن حقوق النشر والأمانة المهنيةوحقوق الصحافيين
    أى صحافيين؟؟؟
    ماهى مؤهلاتهم المهنية الآن؟؟؟؟؟؟؟؟
    لاشىء
    سوى جهد الآخرين
    وأختلف مه طهقانة فى موضوع الغسيل
    دةمعناه الاستسلام للأمر الواقع
    الحرامى بشيلته على رأى المثل الشعبى
    وطالما عرفناانه حرامى يبقا نجرسه
    اعذرنى فى تعبيراتى
    ففجاجتهم زادت عن حدها وهم كل يوم والتانى قائمون باعتصام و احتجاج شكل لحفظ حقوقهم

    حقوقهم فى القص واللزق

    لابد من العمل على طريقةلحفظ حقوقنا

    أنا جربت الاحساس القبيح دة قبل كدة قبل ما مدونتى القديمة تنسرق ولقيت نصف موضوعاتها متداولة فى المنتديات العامة وبدون ذكر المصدر

    حاااااجة تقرف

    أسجل تضامنى العميق مع حقك المشروع

    تحياتى

    ReplyDelete
  22. موقف يغيظ فعلا يا فندم
    حضرتك راسلهم .. لو اكتشفت انهم عملوها غلط طالبهم بالاعت>ار والتصحيح
    لو عملوها مع سبق اصرار وترصد يبقا ليك حق تعمل اي حاجة شايف انها هترجعلك حقك
    وانا شخصيا هاكون اول مؤيد ومتضامن

    ReplyDelete
  23. جتهم القرف ملو البلد

    كذابين مدلسين سارقين مدعيين ارزوقيه فى كل المجالات

    ربنا يعوض عليك وقلبى معاك ويكفيك انك بينك وبين نفسك عارف الحقيقه فين

    ReplyDelete
  24. لعله صادق يا أستاذ أحمد
    خلينا ننتظر ونشوف
    يمكن ينشر التوضيح

    ReplyDelete
  25. هذا ليس مستغربا على الإطلاق من جريدة "الضصطور" .. و بكل صراحه أستغرب جدّا عدم معرفة الصحفى الذى نشر الموضوع بصاحبه الأصلى رغم نشر تنويهات عديده عنه فى المدوّنه هنا و على فيس بوك ..

    ReplyDelete
  26. انا معاك انها فعلا حاجة تضايق قوي .. بس هون عليك .. او بمعني اخر استعوض ربنا و كبر دماغك .. بس انا اللي مستغرباله بجد ازاي الصحفي او المدون ده ما يعرفش انك صاحب الفكرة و التدوينة ؟؟ هي دي اغرب حاجة !!

    ReplyDelete
  27. اقول لك ما تسكت على حقك ولازم النشر يكون بالبنط الكبير و مكان و اضح علشان يكون واضح للكل مش مجرد تنوية بصفحة داخلية و 5سم و خلاص ، حقك و تعبك و مجهودك ، السرقات الأدبية كثيرة و للأسف دول ناس بيطلعوا على أكتاف غيرهم ، و نحسبه كما قال أنه لم يكن يعرف ، و هو عذر و إن كان غير مقبول لكن ها نقبله و نقول ماشى حتى تثبت حسن النوايا ,

    ReplyDelete
  28. معلش يا استاذ احمد
    لو تسمحلى عاوزة أقول حاجة بس
    .....
    الأخ الأنونيمس
    اللى منشرح قووووووى
    بسبب إحتمالية
    إحراج الكثير من المعلقين
    المتربصين
    على حد تعبيره
    يعنى كان ييبقى عنده
    شجاعة يقول
    هو مين حتى ....و لا خايف نتربصله؟!!!
    عموماً
    كان أولى بيه
    ما دام محموق قوى
    إنه فى المقام الاول
    يطلب من أن يدقق
    كل واحد
    فى عمله
    و يكتب الخبر صحيح
    من اول مرة
    بدل ما يحرق دم الناس المجتهدة
    و يحرق دم اللى بيتضامنوا كمان
    مع الناس المجتهدة
    و انا معرفش الصحفى كاتب الخبر
    و لا فيه أى ضغينة ضده
    و الناس بتتكلم عنه بخير و ربنا يوفقه
    بس انا بتكلم عن حق مكفول
    لأى شخص بيكتب و بينشر كتاباته
    و يفترض أن فيه حاجة إسمها حقوق ملكية
    يا ريت الاخ الانونيمس
    بدل ما كان يضيع وقته فى كتابة اللينك
    و التعليق اللطيشف دا
    إنه يوجه النصيحة لأى صحفى
    و كاتب خبر
    إنه يجتهد
    و يتربص ... بالحقيقة
    بدل يا كبدى
    ما يحط نفسه فى عرض الطريق بتاع
    المدونين المتنمرين المتربصين
    و يدى فرصة للعالم
    المتربصة الوحشة دى
    تتربص بيه كدا
    عموماً
    حصل خير
    و أخذت حقك يا استاذنا
    لأنك تستحقه
    رغم أنف
    كل التربصات اللى ف الدنيا

    ReplyDelete