Monday, September 12, 2005

عالم تانى

زهقان كالعاده عمال أتحرك مابين العربيه والجزيرة والحرة مافيش غير .. غزه .. تل عفر .. الدستور..الأكراد .. 11 سبتمبر .. كاترينا .. المحقق الدولى .. سوريا ....حاله ملل رهيبه .. أحول على قناه دريم2 ألاقى السفير الأمريكى ..بيقول إنه مبسوط مننا خالص .. لسه برده زهقان .. أروح على دريم واحد وأركز تحت فى الشاشه على الرسائل .. عالم تانى دخلته هانقله وإسمحولى اعلق عليه


ضابط 23 سنه إسكندرانى جميل وأمور عايز يتعرف ... الأمن مستتب
إيهاب يبحث عن حب حقيقى وإرتباط حقيقى فهل يجده ... فعلا المكان المناسب
مونى ..مونى .. مونى .. مونى .. مونى .. مونى
هاى انا نشوى فى تربيه ومحترمه
أنا الإسكندرانى كان فيه بنوته تايهه هنا ونفسها تتعرف راحت فين
ياكنترول ينفع أسجل إسمى دريمى .. ضاقت بيه الدنيا
بس ياواد يامحمد البنوته ردت عليا أنا .. خناقه
مونى ..مونى .. مونى .. مونى .. مونى .. مونى
الأستاذ عبد الفتاح الشافعى بيمسى على الأستاذ عصام أبو عمه
هاى ضابط 23 سنه أنا ناناى بعد شهر هابقى 24 ينفع .. ينفع ونص
وحشتينى حبيبه لو موجوده – إلحقينى .. غرقان
صلاح بالسعوديه 39 سنه ممكن أتعرف .. الغربه وحشه
الحوت .. السلام عليكم ورحمه الله .. الحوت .. من الإخوان
هاى ناناى أنا الضابط إنتى من إسكندريه وخريجه إيه .. شبكوا مع بعض
خالد الأشقر يهنئ مصباح ومنى بالخطوبه وحاب يتعرف .. كوهين ينعى ولده ويصلح ساعات
مونى ..مونى .. مونى .. مونى .. مونى .. مونى
نفسى أعرف مونى دى عايزه إيه بالظبط .... كان على لسانى نفس السؤال
دلوعه جده أبحث عن رجل شهم وجاد .. الوحده العربيه
قلب خالى للتمليك .. قلب خالى للتمليك .. 43 سنه .... لأ كتير أوى
الحوت اه يابشر ماحدش رد السلام .. إدخل فى المهم على طول
ريدج : ريم أنا متابع شوفتك بتكلمى حد تانى .. خيانه
مونى ..مونى .. مونى .. مونى .. مونى .. مونى
الحزينه : كفايه تعرف بأه ياصلاح .. مش عاتق
هاى رامى أنا ناناى تربيه موسيقيه من الشرقيه وجميله
ناناى إبعتيلى رقمك بأى طريقه وأنا هاكلمك أنا مركز
أحمد السيد يهنئ القائد مبارك بالفوز الساحق .. هوه ده وقته
مافيش بنت تستاهل تفكير لحظه من رجل أحمد يوسف .. أخد بمبه
هاى مونى أنا باسم طلعت من المنصورة أملك سنترال وشركه بث مباشر .. الرياده الإعلاميه
عاشق النساء .. 43 سنه أبحث عن حب صادق وإرتباط جاد .. أعتقد إن هوه بتاع قلب خالى للتمليك
سمراء الزقازيق .. إرسلى رقمك بأى طريقه أنا إبراهيم
وحيده ..أنا متابع بعد الساعه واحده باليل .. وحيد ... يارايق

إفتكرت إخوانا البلوجرز اللى أصروا ينزولوا ينتخبوا ويحكوا عن تجربتهم وإللى صور وإللى تابع وإللى علق وإللى راقب .. بعت رساله كتبت فيها مدون زهقان عايز يتعرف

13 comments:

  1. يا أبنى و أنت ايه بس أللى بيخليك تتفرج على النايل سات
    ما قلنا ميت مرة ده بيجيب تخلف عقلى و بله ماغولى
    و مادام عندك دش أتفرج على الهوت بيرد حاتلاقى برامج و أفلام و اخبار بتاعت بنى آدمين
    و مافيهاش الأختراع أللى بيمشى عالشاشة من تحت ده
    KING TOOOT

    ReplyDelete
  2. واحد مخنوق بيتحرق دمه من الرسائل اللي بتطلع على التليفزيون..ويبحث عن قناة محترمة تظهر شاشتها كاملة ولا يضيع ثلاثة ارباعها في الرسائل واللوجوهات..
    واحد عبيط يتساءل..هي الناس دي بتجيب فلوس منين؟!
    موني موني موني موني موني ..
    تصدق عنده أو عندها حق فعلا..الحل في موني؟!1

    ReplyDelete
  3. belmonasba, had rad 3aleek lama ba3at (lol)

    Walahi e7na sha3b hayef we mokho ta2e2

    If i can I would collect the names and the numbers of all those senders and make an order to arrest them all and take the mobiles from them !!

    ReplyDelete
  4. دى بقت مشكلة ثقافة جيل ..طبعا القنوات من حقها إنها تسوق قناتها وتكسب من وراها ..والناس عاوزه تتكلم وتفضفض ويجي اسمها في التليفزيون ..الناس خلاص اتجننت ياهندسة

    ReplyDelete
  5. دى بقت مشكلة ثقافة جيل ..طبعا القنوات من حقها إنها تسوق قناتها وتكسب من وراها ..والناس عاوزه تتكلم وتفضفض ويجي اسمها في التليفزيون ..الناس خلاص اتجننت ياهندسة

    ReplyDelete
  6. طب حد يا جدعان علق ناناي ولا راحت خلاص؟

    ReplyDelete
  7. نانى الظابط ابو 23 سنه
    اقبض عليها

    ReplyDelete
  8. أهلا يا زمل، زهقان و طهقان بس، أنا حضرتك ساعات بخاف يجيللي سكر من الهيافة اللي نازلة ترف علينا من كل مكان، وليس فقط من شاشة التلفاز الفضائي، عموما هذا دليل قوي علي أنك من جيل الستينيات الصميم و بتحب أكيد البلد زي ما علمونا و كنت نفسك زمان أيام أغاني عبرنا و أنتصرنا و لفي البلاد يا صبية، إنك تمسك النجوم لما تكبر و كنت مصدق زي ما كنت مصدقة تمام

    ReplyDelete
  9. ياراجل سمراء الزقازيق دخلت
    الخينه

    ReplyDelete
  10. مسخرة كالعادة :)))

    والله ده الواحد أما حظه بيجيبه على أي قناة من إياهم بقت المرارة تتفقع 20
    مرة في الدقيقة

    ده غير اللي طالع في المقدر جديد بقى

    "هاي أنا شاب ماريني.. أبحث عن شاب مثلي"

    يا نهار أسود

    "هاي أنا فتاة سعودية أبحث عن الحب الحقيقي.. أحب البنات كتيييييييير"

    يا ليلة سوخة

    ReplyDelete
  11. بلاااش تتفرج عالهيافة يا شوكيير
    أنا عن نفسي بقيت بغير المحطة علي طول كإني مشفتهاش ، حاكم بقت بتأثر علي صدري وحش :)

    ReplyDelete
  12. كينج توت
    سمعت نصيحتك ورحت على الهوت بيرد .. لقيت كلها قنوات من عينه.. أنا إمرأه أبحث عن الحب ..إتصل الان... فتيات عربيات فى إنتظارك.. إتصل الان
    لقيت إحنا برده أفضل وأرخص

    محمد هشام عبيه
    البركه فى الفودافون .. وعلى رأى الإعلان .. فودافون حاسبها صح


    free soul
    ولا الهوا ياباشا

    هيثم
    المشكله إنه مش إسمها اللى بيطلع ده النيك هوه اللى بيطلع ..طبعا أقصد ال
    Nickname

    sonofegypt
    ناناى خلصت الرصيد بتاع الشعب

    وليد
    ياريت

    أيوب
    وشركات المحمول والقنوات كمان تعيش

    إيمان
    فعلا زمل .. صديق زمن وكفاح من أبناء الستينات .. شوفى البوست اللى فوق

    شادى
    يعنى سمراء الزقازيق هى اللى علقت معاك .. أه طبعا بلديات

    نور
    جامده أوى حكايه الشاب المارينى اللى بيدور على شاب زيه ..لأ وعلى الهوا كمان

    Mindonna
    مانازهقت من القنوات التانيه .. اعمل إيه..؟

    Casio
    فكره برده .. بس كله بتمنه

    ReplyDelete