Sunday, October 09, 2005

أول يوم صيام ... الإنتقام


Ahmed Funny Pics


عم مصطفى .. هذا الساعي اللعين .. ينظر لى من تحت لتحت وهو رايح وهو جاى ، وعلى وجهه إبتسامه واسعه كلها شماته ، وليه لأ ماهو عارف إنى أنا صايم ومش هاقدر أقرفه بطلباتى فأنا أطلب منه مالا يقل عن عشرين مشروب يوميا مابين شاى وشاى بحليب ونسكافيه ، صحيح أنا لا أشرب معظمها ولكن هو لايستطيع أن يتكلم .. عم مصطفى هو أقرب إنسان أقدر أنفث فيه جام غضبى عندما يحدث مايثيرنى فأشخط فيه لأى سبب
ياعم مصطفى .. فين أم الشاى اللى طلبته ؟
ماهو قدامك أهوه يابيه
أنظر إلى الكوب فلا أجد ماأقوله حتى إن الكوب ساخن فلا أستطيع أن أتحجج بأن الشاى بارد
ومين قال إنى عايز شاى ساده ..؟؟ أنا عايز شاى بحليب
شاى بحليب الساعة تلاته الظهر يابيه.. وبعد الغدا ؟؟
إنت شريكي ياأخي أنا حر
وأنا صايم .. عم مصطفى رايح جاى زى النحله وعليه نشاط يهد جبل وعمال يبص على ويبتسم .. أمال لما بنعوزه فى الأيام العاديه بندوخ عليه ليه؟
مافيش غير محمد صاحبى .. أطلب من محمد فى التليفون الداخلى يجيى عندى المكتب ، وأبادره عندما يدخل المكتب
شايف الزفت اللى إسمه عم مصطفى .. هايجننى الراجل مصر إن هو يغيظنى
إيه ياعم أحمد هو الصيام ضرب معاك بدرى كده ولا إيه ؟
الصيام مالوش دعوه .. بس أنا تعبان
مالك .. جعان ..؟
لأ
عطشان ..؟
برده لأ
وإنت مابتشربش سجاير يعنى مش خرمان
أيوه صح أنا خرمان .. هاجنن عايز أشرب شيشه
شيشه .. بس إنت عمرك ماشربت شيشه الصبح كده
هى طلبت معايا كده بأه .. أنا تعبان
هدى نفسك كده يابوحميد
طيب يالله ننزل
على فين بس ؟؟
نسلى صيامنا .. تعال نشترى طرشى وحاجات كده لغايه المدفع
مدفع إيه ياأحمد هانشترى طرشى من الساعه عشرة ونص الصبح لغايه المغرب
ماهو أنا مش هاقعد وشى فى وش النيله مصطفى ده وهو عمال يغيظنى
أشخط بأعلى صوتى ..عم مصطفى .. ياعم مصطفى
أيوه يأستاذ أحمد أى خدمه ؟
عايزين ننقل المكتب والدولاب ده من الجنب ده للجنب ده .. نادى كل السعاه علشان يساعدوك ونادى الكهربائى ينقل وصله التليفون والكومبيوتر ، ونادى إبراهيم يصلح قفل الدرج المخروب ده .. ولما تخلص تيجى تلمع الإزاز المنيل ده هو إيه ياعنى مش هانشتغل عشان رمضان ولا إيه .. ؟ ده حتى يبقى حراام

19 comments:

  1. اطلب من عم مصطفى شاي ..عادي وانت صايم ..على فكره الشاي مش بيفطر..دا حتى يخليك تصوم بتركيز..

    ReplyDelete
  2. لو عايز تخليه يتجنن موووووت أعمل حاجة بسيطة جدا
    أبعته مشاوير
    أنا على فكرة بأعمل كده فى عم مصطفى بتاعنا فى الشغل
    قصدى عم ممدوح
    ههههههههههههههه
    يعنى مشوار يجيب ورق
    و بعديه مشوار يجيب قلم
    و بعدين القلم مش حلو خليه يجيب واحد تانى
    و بعدين يجيب قلم رصاص
    و بعدين دسكين كمبيوتر
    و بعد كده لا , النوع ده وحش روح رجعة
    و بعد كده علبة سي دىهات من أللى بتقبل نسخ
    و لا دى ما بتقبلش مش نافعة روح غيرها
    يعنى سلى صيامك عليه
    لغاية ما تروح
    على فكرة ,, أحنا عيال سو ّ قوى باين علينا
    ههههههههههههههههههههه
    KING TOOOT

    ReplyDelete
  3. ده أنت مفترى بقا وبتحب تذل فى خلق الله
    هههههههههههههه

    ReplyDelete
  4. حرام عليك...ماهو الراجل كمان صايم زيك..لازم تفطسه يعني!!! احنا عندنا مفيش حد بيعمل حاجة لحد...اللي عايز شاي او اي حاجة يقوم يعملها لنفسه...بصراحة الراجل عنده حق يغيظك :)))

    ReplyDelete
  5. لا ابو حميد ملكش حق عم مصطفي بيجري علي 6 عيال في مدارس لغات مطلعين عينه ومتنساس ان قطع غيار المرسيدس واسعار الشليهات علي الساحل الشمالي بقت مولعة نار ..خف علي الراجل شوية ده يا عيني غلبان

    ReplyDelete
  6. البلوج بتاعك حلو قوى ..كتابة فيها روح سخرية عاليةجدا..بجد استمتعت

    ReplyDelete
  7. يا للهول

    ايه الغتاتة اللي انتو فيها دي:p

    بلاش تضايقوا الخلق من باب للطق كده عشان ربنا يفتحا عليكو

    ReplyDelete
  8. حرام عليك اكيد عم مصطفى ده راجل عجوز وعلى اد حاله وانا اللي كنت بقول عنك طيب وحبوب لووووووووول
    بس عجبتني الحتة بتاعة" نادي كل السعاه عشان يساعدوك" ياه عالحنية انت مش عاوزه يشيل لوحده :)
    موضوع ممتع ويضحك.

    ReplyDelete
  9. الله يعينك يا عم مصطفى

    ReplyDelete
  10. عم مصطفى والله غلبان
    دا انت اكيد محتاج رمضان
    ودا يبقى بواب عمارتنا
    ومجنن كل السكان
    ********
    عمره ما قصد يضايق حد
    وكلامه دايما على الاد
    لو عدتله فى كلامك مرة
    علطول كده يبدأ يحتد
    *******
    كلمة ذكى دى شوية عليه
    والمشوار بياخد له جنيه
    صراحة يتحرج ومايكون عاوز
    بس اى خدمة يابيه
    *******
    مستنى رايك فى رمضان
    مش ابو صيام لا الشقيان
    بلاش افترى ورمضان كريم
    بدل ما يجيك واحد سعران

    ReplyDelete
  11. ya ragel ya moftary :)

    3am mostafa beta3na (AKA 3am 3ashoor) never come at ramadan, we kol sana wenta tayeb ba2a !

    by the way, I don't smoke but i still can't concentrate in ramadan but for a different reason, I can't live without coffee, all the time :( if you leave me without it for 2 mins, i sleeeeeeeeeeeeeeeeeeeeeeeeeeep

    bera7a 3ala el ragel shewaya, we kol sana wenta tayeb :)

    ReplyDelete
  12. عم مصطفي ذنبه اية بس , علي فكرة اسلوبك الساخر جميل أوي , ورمضان كريم

    ReplyDelete
  13. Hey, Where are you? are you fasting from blogging too or you taking revenge from us too. I enjoy your blog very much and it makes me feel like sitting with my friends in Egypt. Waiting to read more of your nice blogs. Best, Amr

    ReplyDelete
  14. مسكين عم مصطفى...!!

    تلاقيه يحمد الله على شهر رمضان

    ;pPpPp

    ReplyDelete
  15. إنت دماغك بتعلى صيامي ولا إيه
    شغل عالي

    ReplyDelete
  16. كل سنه وكلكم طيبين

    خجل
    ياترى إيه اخر أخبار حمله الصيام بتركيز ؟؟..فيه نتيجه ؟؟

    king tooot
    عليك أفكار تجنن .. الله يكون فة عون عم ممدوح

    shady
    ده الظاهر بس .. لكن لأعلمك بأه أنا غلبان جدا

    nerro
    مادام الراجل ليه حق ، يبقى انا كمان لي حق عليه

    sonofegypt
    أخف على الراجل .. عم مصطفى ..ده حبيبي

    radwa osama
    شرفتينا وإنتى كمان حكاياتك فى البلوج رائعه

    mindonna
    دى تسالي صيام .. ده مافيش أحن منى

    littilemo
    ربنا يكرمك

    chatterbox
    هاها أنا طيوب والله ياشاتر.. حتى أنا طلبت منه إن يخلى كل السعاة يساعدوه

    tara
    بيني وبينك .. عندك حق

    taher
    إيه الرباعيات الروعة دى .. دى عايزة بوست لوحده

    free soul
    عم عاشور بتاعكم مابيجيش .. جديده دى بالنسبه لموضوع القهوة .. ممكن تفيدك خجل فى الموضوع ده .. هى حللت الشاى لكن القهوة ماعنديش فكرة

    anonymous (amr)
    شكرا على المتابعه .. بس إنت فين خارج مصر؟

    q8tya
    هلا بالكويت .. لعلمك عم مصطفى مابيحبش حد أدى .. بس غحنا كده غاويين نشاكس بعض

    وش مكرمش
    هى بتعلى آه .. بس إنت كمان معلم كبير

    ReplyDelete
  17. اتقوا الله يا جدعان .. من لا يرحم لا يُرحم !!

    ReplyDelete