Monday, December 19, 2005


حوارات هذا الإسبوع



الزوجة من المطبخ : أحمد إسمها إيه اللى بتغنى عندك في التلفزيون دي ؟
أنا : إسمه جواد العلي
الزوجة : ياخبر إسود .. دى راجل ؟
أنا بغيظ : أيوه .. المفروض كده
هى : هاها .. ومالك متغاظ كده ليه ؟

هى : إيه يأحمد اللي إنت جايبه ده .. فين الكزبرة ؟
أنا : ماهى قدامك أهي
هى : أولا دى بقدونس .. ثانيا أنا عايزة كزبرة ناشفة .. وفين مرقة الماجي ؟
أنا : ماهى قدامك أهي
هى : بذمتك دى مرقة ماجي .. دى خلطة الباشميل
أنا : أنا عارف بأه .. ماهى مكتوب عليها ماجي
هى : وده إيه ده كمان ؟
أنا : ده كيس البسلة بالجزر الى إنتي طلبتيه
هى : ده خضار مشكل
أنا : ماهو مرسوم عليها بسلة وجزر أهوه
هى : طيب إعمل حسابك نتغدى فى تشيليز النهارده
أنا : حاضر

فى الثالثة صباحا
أنا : إنتي نمتي ولا إيه ؟
هى : أيوه .. فيه حاجة؟
أنا : بقولك إيه .. هى فاتن حمامة في فيلم دعاء الكروان كان إسمها إيه ؟
هى : أستغفر الله العظيم .. معقولة ياعالم فى نص اليل
أنا : كان إسمها إيه بس ؟
هى : هنادى .. كان إسمها زفت هنادي
أنا بكل حزم : غلط كان إسمها آمنة .. هنادي أكالها الوبا
هى : حسبي الله ونعم الوكيل

هي : أحمد .. إحنا باين علينا دخلنا شارع
غلط
أنا : أكيد ... مش هوه ده الشارع
هى : طيب ممكن تنزل تسأل العسكرى اللي هناك ده
أنا : هو فين شارع إسماعيل رمزي ؟
العسكري : والله ماعرف .. يمكن الميدان اللي بعد اللي جاي
أنا : شكرا
ألمح خلف العسكري لوحة مكتوب عليها شارع إسماعيل رمزى

35 comments:

  1. This comment has been removed by a blog administrator.

    ReplyDelete
  2. شكراً قوووووووووي يا أحمد
    .إنت عارف طبعاً أنا بشكرك على إيه
    بس أنا عايزة أقولك حاجة فاتن حمامة في دعاء الكروان كان إسمها أمنة مش نعمت كان إسمها نعمت في أفواه و ارانب
    بس أنا عايزة أسألك سؤال إنت جبت صورة فاتن حمامة بتاعة دعاء الكروان دي منين؟

    ReplyDelete
  3. يعني كل الطلبات اللي جبتها غلط!!! المفروض كانت تطلب تتغدا في روسيني مش تشيليز :)))

    ReplyDelete
  4. شكرا على التصحيح ياتاتى

    ReplyDelete
  5. إيه دا.. هو دا تجربة شخصية فعلا؟
    يعنى إنت مش عارف شكل كيس البسلة!!!

    ReplyDelete
  6. ليها الجنة يا أحمد
    وأنت بقى بئس المصير

    ReplyDelete
  7. لو على موقف العسكري
    فخد من ده كتيييير
    عمري ما سألت عسكري على عنوان وجاوبني صح

    بس فعلا يا أحمد
    ربنا يكون في عونها ويصبرها

    ReplyDelete
  8. فعلاً هنادى أكلها الوبا برافو يا ابو حميد الظاهر إن الثقافة السينمائية عند الستات مش ولابد

    ReplyDelete
  9. هاي مين هناك

    وسع حبتين كده يا عم أحمد

    الا صحيح انت سبت الهندسة واشتغلت في الطب من امتى

    انا حسيت إن المدونة المره دي مليانه معلومات طبيه

    بس لي سال محيرني في الطب

    انت عرفت ازاي إن جواد مكانش بيحب هنادي في فيلم أفواه وارانب مع انه كان اختها وأكلو البسله مع عسكري المرور في بونا بيتي

    ReplyDelete
  10. هههههههههههههههه
    بجد بتعرف تضحكنى
    اولا مين اللى قال ان جواد العلي راجل؟
    لوده كلامك اثبت لي
    بقة مش عارف الكزبرة من البقدونس ولا مرقة الدجاج من الباشميل وكمان رايح تجيب خضار مشكل بدل البسلة والجزر ومش عارف علاقة هنادى بأنفلونزا الطيور
    ماهو ده بقة الوبا يا احمد

    ReplyDelete
  11. صورة مين ده يا بو حميد اللي عالفزبا حزعل قوي لو دي صورتك

    ReplyDelete
  12. جامدة أوى "لا اسمها امنه, هنادى اكلها الوبا" :) :) صباح الدماغ

    ReplyDelete
  13. حلو اوي يا احمد
    مهو لازم عشان كل اللي انت كاتبه ده لازم تعرفو قيمة الستات

    بس اقولك حاجه تكسف انا شخصيا مش بعرف افرق بين البقدونس و الكزبره

    ReplyDelete
  14. هنادي أكلها الوبا ... أنا لو منها أستناك لما تنام و أصحيك و أقولك : أحمد هو إسم رشدي أباظة في فيلم صايع بحر كان إيه؟

    ReplyDelete
  15. احمد يا شكري ... دوخت الست معاك السبع دوخات ...
    مرسي على البوست

    ReplyDelete
  16. ربنا يديها على قد صبرها عليك:)

    ReplyDelete
  17. تستاهل يا أحمد كل اللي يجري لك وكويس انها جت علي قد كدة ..وخلي بالك "نومة المطبخ" صعب قوي ياحمد اسألني انا.. ياما نمت جنب الانبوبة

    ReplyDelete
  18. يا أبو حميد ما أنت أللى غلطان ,, يعنى أنت جايبلها الخضار من تحت و هى برده زعلانه و مش عاجبها ,, و ده طبعا ً لأن الستات عموما ً ما بيعجبهمش العجب ولا الصيام فى رجب .
    أما عن موضوع فاتن حمامة و أسمها فى فيلم دعاء الكروان فأنا شايف أنها زعلت و كانت مش طايقة تتكلم معاك ولا ترد عليك علشان عايزة تنام ,, أنما هى بقى لو نايمة الظهر كويس ممكن تسهرك طول الليل و تخليك تروح شغلك مش شايف قدامك لمجرد أنك تجاوب مثلا ً على سؤال من دول : أحنا حياتنا ليه أتغيرت مع بعض , ؟ أو أحنا ليه ما بنخرجش زى زمان ؟ أو مثلا ً أنت بتحبنى ولا لا ؟ أو سؤال فلسفى من نوعية هو أنت كنت تتمنى أن مراتك تكون أذكى منك أم أغبى منك ,,, و تقعد هى تتكلم و تقعد أنت تتتاوب و تعمل حركات علشان هى تحس أنك تعبان و عايز تنام ,, و لكن لا حياة لمن تنادى , و فى الآخر تضطر تصارحها بأنك تعبان و عايز تنام و طبعا ً هى ترد عليك بخناقة من نوعية أنك خلاص ماباقتش تحب تتكلم معاها و أنها بقت شىء على الهامش و أنها أتحطت على الرف و تقلب بغم و لا تعرف تنام ولا نيلة ,, و عادة ً بتنام فى الشغل تانى يوم .
    اما بقى فى موضوع سؤال العسكرى عن العنوان فأللى حصل ده شىء طبيعى لأنه لو عرف العنوان ماكانش بقى عسكرى
    و أحب أقول للأخوة أصحاب الردود أللى هاجموا أحمد شقير ,, مًثل ,, كان قاله لى واحد صاحبى زمان و كان هو متجوز و أنا لا
    قال لى
    أللى أيده فى المياة مش زى أللى أيده فى دورة المياة
    و دمتم
    KING TOOOT

    ReplyDelete
  19. ههههههههههههههههه

    والله مراتك دي سكررررررة


    كفايه انها مستحملاك هههههههههه

    وبعدين في حد يسال السؤال البايخ ده في نص الليل..!!


    بس حلوه حكايه العسكري هههههههههه يستعبط دا والا ايه هههههه


    على فكره

    I tegged u ;D

    http://q8tya.blogspot.com/2005/12/tagged-taggedagain.html

    ReplyDelete
  20. بالك لو المدام شافت جواد العلي وهو بيغني كنت أكيد هتسألك نفس السؤال برضة..هي اللي بتغني دي اسمها إيه
    أما بخصوص العسكري ..فالأكيد العيب في اليافطة اللي وراه..هي اللي محطوطة غلط..لأن الحكومة عمرها مابتكدب..
    صباحك فل

    ReplyDelete
  21. لوووووول
    والله اني اموت بأفكارك الحلوه

    احلى شي جواد العلي

    يغربلك .. ضحكتني من قلب

    ReplyDelete
  22. شقير
    بلاشك.. ربنا معاها
    بس هم قالوا فعلا فى الفيلم ان هنادى أكلها الوبا
    ؟؟
    متهيألى هم طخوها على طول
    مش فاكرة

    عايزة أراجع الفيلم

    ReplyDelete
  23. يا إبنى يا حبيبى إنت على طول تاعب نفسك وتاعب مراتك وتاعب الناس اللى حواليك
    مش معقولة كده الشكاوى كترت منك

    ReplyDelete
  24. لا لا لا لا لا والف لا
    بقى احمد باشا كبير المنطقة ينزل يجيب خضار ياخى انشاء الله (ولا بلاش لا يكون حد بيقرا البلوج بتاعك يبقى يومك مش فايت) ههههههه
    وثانيا انت اللى متساهل جدا جدا جدا
    لان لو فيه شوربة فى البيت مكانش حصل اللى حصل
    شمتهم فين بقى ؟
    يا باشا انت ناسى ان معظم البلوجرز الستات كلهم او معظمهم فى حقوق مرأة
    عاوزهم يقولو علينا ايه
    وثانيا كنت كل بره من الاول وخدها معاك علشان تحس ان خيرك عليها وان انت مش حارمها من حاجة ( خروج وفسح ) انما كده جت على دماغك وانك مقصر ولولا بتلخبط الدنيا وبتجيب حاجة مكان حاجة مكناش طلعنا ناكل بره فى البرد ده ولاايه يا باشا؟
    مش احمد باشا اللى يقع فى المطب ده
    اتحسدت اكيد اتحسدت

    ReplyDelete
  25. بصراحة انا حبيت المدام اوى، مش تخليها تدون يا عم احمد

    حاجة واحدة اللى انا معاك فيها.. مش بعرف الفرق بين الكزبرة والبقدونس :(((

    ReplyDelete
  26. التصرفات الطبيعيه لزوج من مواليد برج الجدى..... مع انهم دقيقى الملاحظه بس يجيوا لطلبات البيت وبيستغلوا قوه لاحظتهم ف تمييز الاشياء اللى مطلوبه عشان مايجيبوهاش

    ReplyDelete
  27. سؤال والنبى عالماشى احسن هتجنن وافتكر بما انك ضليع فى الحاجات دى يمكن تفيدنى
    فى مسلسل بتاع ميزو كانت فردوس عبدالحميد اسمها نفيسه حسين الشربينى كان اسمه ايه؟ وعمة ميزو كان اسمها ايه؟؟؟؟؟؟؟؟؟؟؟؟؟ تانت عنايات على ما افتكر بس مش متاكده هموت وافتكر اسم حسين الشربينى....... برجاء الافاده

    ReplyDelete
  28. برجاء الإفادة
    هىهىهىه

    لا يا إى زى... إنت أول هام تقدمى طلب إحاطة وعليه الدمغة أم خسمة جنيه وعشرين قرش دى.. وبعدين تكتبى طلب يفيد بإنك المدعوة إى زى ذات نفسها.. وترصى السؤال والرقم القومى.. وبعدين تابعى مع المختص... وفوتى علينا بكرة
    :D :D

    ReplyDelete
  29. هههههههههههههههه

    تصدق .. دنا لغاية دلوأتي عندي عؤدة من حكاية البقدونس و الكزبرة

    بس بس و الصراحة الصراحة

    موتني من الضحك .. دمك عسل
    :))

    ReplyDelete
  30. التفريق بين الكزبرة والبقدونس محتاج شويتين تركيز شوية. ولو -افترضنا- إننا لابسين عوينات وبأربع عيون، فهي محتاجة لشم قوي شوية، ولو فيه زكام فهي محتاجة للمسة حساسة..!!د
    ماعلينا..

    إنما ده سؤال يستأل نص الليل؟!!د أنا باستغرب، مع إني مجربة نوع الأسئلة اللحوحة اللي بتيجي من غير سبب وتضرب في الدماغ، بس كويس إنك لقيت حد تسأله
    أحسن ماتقعد لحالك تسأل السؤال

    ReplyDelete
  31. هههههههههه
    أبيييه يا فضيجة جواد بجلاجل

    *_^



    بس والله طلعت فنتق وعليك حركات

    يا احمد..الله يعين مراتك عليك

    :P

    ReplyDelete
  32. قاعدين تهزروا وتضحكوا ومحدش فكر يفهم الراجل الفرق بين الكسبره والبقدونس
    انا كمان موش هقولك ومعنديش فكره بس قول للمدام تبقى تيجب حاجه السوق بنفسها لو الموضوع مسببلها مشكله

    ReplyDelete
  33. taty
    الصورة من اللينك ده فيه معظم فنانين الأبيض والإسود ومن اللينك إدخلى على فاتن حمامة فيه صورة كمان من دعاء الكروان مع رجاء الجداوي
    http://www.videohat.com/VideoHAT_Photos/photos.htm

    nerro
    عايزانا نتغدى في روسينى .. يبقى العشا غالبا هايكون في السيدة
    الله يكون فى عونه يانيرو

    lasto adry
    عارف طبعا .. بس إكتشفت إن البسلة والجزر كانوا واضحين جدا على كيس الخضار المشكل وطبعا ماقريتش المكتوب

    mohamed yousef
    ماهو ده اللي بيسموه رزالة آخر الليل .. على وزن حكاوى آخر الليل
    أما عن حكاية الأكياس هى قالت لى ماتشيلش هم .. انا هاجيبهم بنفسي عشان المقاس

    hera
    كده برده ياهيرا .. ماكنش العشم .. شدي حيلك بأه وإوعي تقعي فى واحد زيي

    طعمة
    موقف العسكري المفروض إنه يكون عادى لكن مش عارف هو بينظم المرور فى شارع إيه واليافطة وراه وبيفتي كمان .. لأ كتير أوى بصراحة

    صباحك سكر
    إيه الروقان ده كله .. من إسمك لتعليقك .. فعلا إنتي إكتشفتي حاجة مهمة جدا ماحدش تاني إكتشفها
    المهم إن فيه حوار .. فعلا ملحوظة جيدة

    shady
    شفت بأه .. الثقافة بتاعتنا متنيلة إزاي وده سبب تأخرنا .. المدام ماتعرفش إن هنادي أكلها الوبا وإن أختها عايزة تنتقم طول الفيلم وفى الأخر تقول إن البطلة هي هنادي
    عالم بتستهبل

    أنا الذي يمشى في الظلال
    ياأهلا .. يأهلا
    يارجل إمبارح قعدت أدور عليك فى الضلة مالاقيتكش .. إنت بتروح في أي ضل اليومين دول .. عموما ضل راجل ولا ضل ..؟
    حقيقي نورتنا ياجميل

    أبوشنب
    طب إيه الى إنت جاي تقول عليه .. قصدك كلية الزراعة بأه ؟
    إنت دخلت السلوك فى بعض وكله دخل على كله
    أشوفك في بون أبيتي

    ahmed el-saeed
    إسمحلي أهنيك على قوة ملاحظتك بالنسبة للجملة اللى تحت إسم البلوج .. طمنتني إن فيه حد بيقراها .. عموما دى بتكون من واقع حياتنا حقيقي بعد نص الليل .. أنا غيرتها تاني على فكرة

    Geronimo
    ماهما الرجالة كده ياسمسمة .. خيبة فى الحاجات دي .. بس الحاجات دي بس .. ولما يكونوا خيبة فيها أحسن مايكونا خيبة فى بلاوي تانية

    sonofegypt
    بما إنك يابن مصر مش فى مصر فمعنى كده إنك مش متابع الحركة الفنية عشان كده مافهمتش البوست بتاع رمضان بتاع آل شمشون والست أصيلة
    إسمحلي أقوللك إن اللى على الفسبا ده بسلامته جواد العلي ولو كانت دي صورتى كنت بصراحة رميت نفسي من البلكونة .. أما أنا فخليط من براد بيت على روبرت دينيرو على جينيفر أنيستون ... وعيش يامعلم

    ملك
    إنت عارف ياملك أحلى دماغ دى بتكون فين
    تحت المخدة

    bosbos
    والله عارفين قيمتكوا من غير الكزبرة والبقدونس .. ده إنتوا مقامكم غالي عندنا أكتر من كده بكتير
    أنتن رحمة لنا

    change destiny
    هاها .. رشدى أباظة كان إسمه أحمد حلمي
    بايخة .. أنا عارف

    smile
    هو أنا دوختها معايا المرة دى بس
    ده كل يوم من ده

    وهكذا هي الحياة
    "خوان شون كونري 1536 - 1824"

    chatterbox
    بتدعيلها وتسيبيني ياشاتر .. كده برده
    طبعا مانتوا ستات زي بعض

    mfm
    نومة مطبخ إيه وـنبوبة إيه .. إيه العز ده ياراجل.. أنا بنام جنب أبو غريب بنفسه بتاع بغداد

    king tooot
    ياخرابي .. لا ياعم أنا مش حمل أسئلة من النوع ده .. ده أنا أتجنن
    خلاص يبقى مافيش نوم الضهر أحسن
    على فكرة أسئلتك دى أوحتلى بفكرة بوست جميلة جدا .. هاتشوفها قريب أوى وفعلا أللى أيده فى المياة مش زى أللى أيده فى دورة المياة

    q8tya
    لأ طبعا مابيستهبلش ولا حاجة لأن هو فعلا مايعرفش حاجة .. ودي أهم ميزة بيختاروا بيها العساكر .. وإحنا مصرين برده إن نستعين بيهم
    شكرا .. على التاجنج .. هاعمله قريب

    محمد هشام عبيه
    طبعا اكيد هاتسأل نفس السؤال .. لأني بذلت مجهود فى الأول عشان أكتشف إنه راجل ولا ..... مش راجل ولا ست؟

    se3loah
    المشلكة ياسعلوة بعد ماعرفنا إنه راجل والحمد لله ، إحترت شوية يقولوا إماراتي وشوية يقولوا فلسطيني وشوية يقولوا سعودى
    الله يخرب بيته

    حلم
    إسمحيلي أقوللك إن ثقافتك السينمائية ضعيفة جدا وكده هاتزعلي منك بسبس وتاتي .. ياستى هو خالها طخها لكن عشان يبعدوا التهمة عنه قالوا إن أكلها الوبا

    كتابة
    أنا مابتعبش حد ولا حاجة .. هما كل اللي حواليا مش فاهمين ولا عايزين يفهموا .. عشان أنا مش فاهم .. فهمت ولا عايزني أفهمك كمان

    taher
    أشكر لك مشاعرك الحارة .. لكن بيني وبينك يامعلم ده سياسة لزوم الهجوم اللي حصل علي خلال الفترة اللي فاتت من إني مهاجم للمرأه
    عملنا البوست ده نهدي بيه الأمور
    لكن ماتخافش يامعلم .. ماوقعتش ولا حاجة

    bent masreya
    بأه عايزة المدام تدون يامصرية
    يبقى فى الحالة دى لازم أعتزل أنا التدوين .. أنا وديكسان لايمكن نجتمع ابدا فى مكان
    أرجوكم لاتستعملوا .... ده مبيد خطير ليا ولإخواتي المناشير

    ahmed el-saeed
    بتعرف الفرق من الكزبرة والبقدونس من الطعم .. فكرة برده .. بس تعملها إزاي ياشاطر وإنت بتشتريها لو بتاع الخضار شافك وإنت بتعملها هايقلق منك على فكرة

    az
    قصدك يعني إن إحنا بنكون عارفين الفرق فى طلبات البيت بس بنستهبل .. لا وحياتك .. إحنا بنستهبل فى حاجات تانية ، بصراحة حاجات الإستهبال فعلا فيها ينقط
    حسين الشربيني كان إسمه الأستاذ بليغ

    lasto adry
    أدينا جاوبنا أهوه من غير ورقة دمغة .. ياريت بس حاجة كده لزوم الشاى والدخان

    طائر بلاوطن
    والله إسمك ينفع عنوان جميل للبوست ده
    أهم حاجة إنك بتعاني من نفس المشكلة
    أحسن برده من إن الواحد مايعرفش الألف من كوز الدرة

    doaa samir
    بصراحة إقتراحك جيد .. وخصوصا فى حالة العوينات .. بس المشكلة فى الشم واللمسة الحساسة عند بتاع الخضار .. غنت برده عارفة يادعاء الناس دي فكرها على أدها وممكن دماغها يروح لبعيد
    فعلا أسئلة نص الليل دي لما بتزن على دماغ الواحد يبقى الواحد هايتجنن

    نون النساء
    والله يانون يبدو أن موضوع جواد ده شغل حيز تفكير ناس تانية كمان غيري
    لأ وهو بيغني هندى ، أصل هى ناقصة هنود

    sarwa
    إنتي بصراحة اللى ثروة .. فعلا ماحدش قدر يقوللى على الفرق لكن دعاء قالت ممكن بالتحسيس واللمسة الحساسة .. هانسيب شغلنا باه ونقعد نحسس

    شمهورش
    بصراحة انا متشكر لتعبك .. عشان عملت تسجيل مخصوص وتعلق عندى لأنى لاغى الجماعة الأنينوموس .. بصراحة نورتنا
    اما عن بتوع الأمن المركزى .. عندك حق هما اصلا مابيتكلموش .. بس بيسمعوا كويس على فكرة وإسألني انا

    ReplyDelete
  34. بجد موت على نفسى من الضحك انت دمك زى العسل

    ReplyDelete
  35. You have an outstanding good and well structured site. I enjoyed browsing through it Bargin travel insurance us designer handbags

    ReplyDelete