Saturday, December 31, 2005



من وحي السياسة



هي : ممكن تتكلم بأه جد شوية
أنا : فيه إيه بس ؟
هي : مش هانصلح الشقة بأه ؟
أنا : إزاي يعني ؟
هي : يعني ندهن الشقة ونجدد الحمام ونصلح الأنتريه .. وإنت دايما تقوللي إن الإصلاح لازم يكون من الداخل
أنا : شوفي .. أنا ماحدش يقدر يفرض عليا إصلاح من بره
هي : ماإنتوا كلكم بتقولوا كده ، وفي الآخر مابتصلحوش إلا لما ينفرض عليكم
أنا : أستغفر الله العظيم .. ماهو ياحبيبتي ده لازم ييجي بالتدريج
هي : تدريج إيه ماإنت بقالك خمسة وعشرين سنة قصدى عشر سنين بتقول كده
أنا : ماهو لو حصل مرة واحدة هاتبقى فوضى
هي : طيب تقدر تفهمني بالتدريج إزاي ؟
أنا : يعني مثلا السنة دي نصلح الحنفية .. والسنة الجاية نغير مقبض غرفة النوم
هي : رجعنا نهرج تاني .. ياأحمد لازم تبدي بعض المرونة شوية ياإما ماما هاتتدخل بالرغم من إنها دايما في صفك ، من الموالاة يعني
أنا : آه .. سفيرة النوايا الحسنة
هي : طيب ماتشوف الناس اللي حوالينا عاملين إيه فى بيوتهم
أنا : مالناش دعوة بحد ، كل بيت له ظروفه الداخلية وهو أدرى بشؤونه ، إنتوا عايزين إيه تورثوني بالحيا ؟؟
هي : حد جاب سيرة التوريث دلوقتي .. وبعدين الموضوع ده إحنا إنتهينا منه من زمان
أنا : على فكرة ياحبيبتي نظام جيران بلا حدود ده مش هاينفع .. لو مشيتي وراهم مش هاتنفعي
هي : هاتهزر تاني
أنا : اعملك إيه ياحبيبتي .. ده أنا بيني وبينك فكرت أبني جدار عازل
هي : طيب قوم إفتح الباب .. دي أكيد ماما إللي على الباب
من بعيد
أنا : أهلا ياحماتي إتفضلي
هي : مين ياأحمد إللي على الباب ؟
أنا : ديتليف ميليس
--------------------------
تنويه : التدوينة أشار لها محمد الجرايحي في مدونته هنا نلتقي

39 comments:

  1. ماهو لا تصلح يا بو حميد بجد
    لا تحصل السادات وانت حر
    الشعب قصدى العيله ما بترحمش
    ههههههههههههههههه

    ReplyDelete
  2. هتاليف بفا تالى موتاكاتلى ايه هى ىتكون لغة السياسه غير كود بنحاول طول حياتنا نفكه

    ReplyDelete
  3. برغم كل إيماني المطلق بالحرية والليبرالية والحراك السياسي الدائم ، مش عارف ليه معانا دايماً بترن في دماغي جملة "الساادت" :

    الشعب المصري زي الزنبرك ، طول مانت حاطط رجلك عليه مستكين وهادي ،أول ماترفعها ينطر في وشك!


    ده مش معناه أبداً أني مع "السادات" ، بس تعمل إيه في ناس كل همها العيش إن لقوه ،ياراجل لبنان اللي احنا بنتريق علي رجالتها وبنريل علي نسوانها طلعوا أرجل مننا ، رغم برضه تحفاظتي العديدة علي اللي بيحصل

    ReplyDelete
  4. تخيل لو الصورة الجميلة دة اكتملت
    ولقيت حماتك _ بتنذرك
    إنك لو مابدأتش فى تغيير السيراميك
    ونزلت بورق الحائط
    :)
    هتعمل عليك تفتيش دورى لتكتشف مخابىء الكاش تحت أرض الشقة
    وبعدين تقول فى مؤتمر صحفى انها عثرت على قرائن
    تثبت تورطك فى المضاربة فى البورصة
    مما يضعك تحت الشبهات
    وبعدين تديلك انذار بالتخلى عن السلاطة
    والرضوخ لارادة المجتمع الدولى_ قصدى الارادة العائلية
    وبعدين تلاقيها شنت هجوم ضارى
    ينتهى بنشر صورتك هنا فى بلوجك
    وهمّا بيفتشوا فى شعرك عن اسمه ايه دة

    يا عزيزى صلّح من الداخل
    صلّح صلّح يا عم الحاج

    ReplyDelete
  5. بعيدا عن السياسة

    كل سنة و انت طيب و اتمنى لك عام سعيد

    ReplyDelete
  6. ماشاء الله
    حماتك جت في الوقت المناسب
    على قولتكم
    حماتك بتحبك
    :)

    ReplyDelete
  7. أيوة يا أبو حميد بس أنت نسيت تكتب حاجة مهمة
    أنك كل شهر تاخد من المدام المرتب بتاعها بحجة أنك حاتصلح البيت و ما بتصلحش حاجة و مهرب مرتبها كله فى سويسرا ,, قصدى المرتبة يعنى
    KING TOOOT

    ReplyDelete
  8. كويس ان الموضوع موصلش للمعتقل قصدي النوم علي الكنبة

    ReplyDelete
  9. مش عارفة ليه اتصورت حماتك و هي بتقرا التدوينة دي....و ساعتها ليلتك فل

    المهم إن أنا بقى مش قادرة أفهم هوس الجنس اللطيف بترويق و تجديد البيت . يعني هو مس مكان أنا عايشة فيه و خلاص يعني لازم يبقى فيه مقومات الحياة الأساسية ( مساحة و قهوة و ثلاجة و حمام و كمبيوتر متوصل بالنت و تلفيزيون متوصل بالدش و حاجة أنام فوقها )و بس . مش لازم بقى يبقى قطعة من الللوفر الفرنسي

    مش معنى كدة إنك يبقى معاك تجددهولها و تسيبها . صدقني ريحها عشان هي مش حتريحك غير بعد ما تريحها

    وللعلم أنا في مقومات الحياة الأساسية مش ناسية المطبخ لكن متناسياه لأن معلوماتي عنه لا تتعدى معلوماتك

    كل سنة و إنت و مراتك و حماتك طيبين و منغير سياسة

    ReplyDelete
  10. جددلها البيت يا احمد و سيبك من السياسه
    صدقني مش هتنفعك لما مراتك وحماتك يقلبو عليك

    كل سنه و انت و مراتك طيبين
    وربنا يصبرها

    ReplyDelete
  11. ايها السادة اليكم موجزاً بأهم الانباء

    صرح مصدر مش مسئول أن قوات الامن قامت هذه الليلة مصحوبة ببعض أفراد القوات الخاصة قد القت القبض عل الارهابي الخطير احمد شقير المتهم بارتكاب عدة عمليات ارهابية في الفترة الاخيرة

    ويذكر ان المذكور هو المتهم الرئيسي في فضيحة السيد ناجي دواير وخمسات
    كما انه العقل المدبر لعدة عمليات أخرى تمت في الفترة الاخيرة مثل
    نضارة شمس
    والتي يستغلها لنشر أفكاره
    هذا وقد أكد مصدر طبي أن السد المذكور باضطرابات نفسية وعصبية حيث أخذ يردد حين تم القبض عليه وبصوت مرتفع


    متصلحيني يا ماما قوام يا ماما
    دا جيمي ها ياخدني بالسلامة يا ماما

    هذا وسنوافيكم باحداث ليلة الدخلة قريباً

    ReplyDelete
  12. الموضوع كبير اوى ومش حينفع فيه غير انك تاخد موقف
    وتقف لهم وقفة من حديد
    واستخدم كل اسلحتك
    وما تسيبش لهم اى منفذ
    اقولك جدد الشقة اريح
    ههههههههههههههههههههه

    ReplyDelete
  13. هي مراتك في البوست ده هي نفس مراتك اللي بتجيبلها بدل الكزبرة بقدونس وبدل البسلة خضار مشكلة ؟؟؟؟؟؟؟؟؟
    رأي تغيرلها الشقة وتجيبلها شقة جديدة

    ReplyDelete
  14. متهايالى كدة ان هانز بليكس وصف افضل من ديتليف ميليس دة

    ReplyDelete
  15. لوول يا استاذ شقير لكن انا متاءكده
    ان المحققه الدوليه اللي زارتكم ما تعرف عنوان
    مدونتك ولا كانت ضمتها لملف الادانه

    ReplyDelete
  16. كل سنة وانت طيب يا بو حميد شكلك كده في حالة غرام مع الفتة وقطع البهاريز وسايب الرعية بتوعك اللي هما احنا لمين؟؟

    ReplyDelete
  17. كل سنة وأنت طيب .. وخد بالك من الخلافات دى ياإما نعمل غزو لحفظ السلام ونيجى نريح عندكم قد قرنين كدة

    ReplyDelete
  18. الشعب المصرى مش زى الزنبورك
    على فكره الشعب المصرى اكبر شعب يقدر يتأقلم مع حاله وانتوا شايفين الحال عامل ازاى
    المصرى يا حبيبى بياكل فول يعنى ماينفعش يكون زى الزنبورك

    ReplyDelete
  19. باشا انت فين
    بتوضب الشقة ولا ايييييييييييييييييييييه

    ReplyDelete
  20. 2a7med basha?
    2alo?
    wa7id itnen..
    mish sam3eenak..
    2aloo?......

    ReplyDelete
  21. أحمد كل سنة و إنت طيب
    إنت رحت فين غيبت علينا قوي
    قلقتنا عليك
    إن شاء الله يكون المانع خير
    (:تعالى بقا كلامك وحشنا

    ReplyDelete
  22. This comment has been removed by a blog administrator.

    ReplyDelete
  23. eh ya 3am ? msh 2oltlak blash syasa? fenak????????

    ReplyDelete
  24. يا ترى انت فين يا احمد؟؟؟؟!!ه

    ReplyDelete
  25. يا طولة بالك...حنفية بعدين مقبض..انا كنت مقتنعة بفكرة بالتدريج دي...بس علي اساس..مرة الحمام..مرة اوضة..كدة يعني...لأ حقيقي معاك ربنا :)

    ReplyDelete
  26. دعوة للقاء بالمدونين
    في معرض الكتاب
    عكاظ الشعراء
    الجمعة 20 يناير

    الساعة الرابعة عصراً

    ReplyDelete
  27. اول مرة تغيب كل هالمدة

    ReplyDelete
  28. عسى ما شر يا أحمد

    غبت وايد عن بلوغك

    ReplyDelete
  29. احمد شقير خرج و لم يعد ولا ايه ؟؟؟؟
    لا أسكت الله لك حسا يا احمد .. ده انا ما صدقتش لما ما لقتش حاجه جديده .. عملت ريفرش 6 مرات مش مصدقه انك ماكتبتش جديد ..
    لو حد يعرف اخبار احمد يطمنا عليه رجاءا يا جماعه ..

    ReplyDelete
  30. يارب يكون اللي مانعك عننا يا أحمد خير بجد غيابك طال,طيب إكتبلنا تعليق طمنا عليك بلاش بوست كامل
    ياريت فعلا يا جماعة لو حد عارف أحمد أو بيتصل بيه يطمنا عليه
    ربنا يرجعك لينا بالسلامة

    ReplyDelete
  31. شوكيير انت فيين
    بقالك زمان مش بتكتب
    ارجع تاني بقي

    كام باك بلييييز

    ReplyDelete
  32. بص بقى انا مش عاوز افتن واقول انت فين بس الغيبة طولت اوى يا كبير
    بجد طولت
    اقول

    ولا اقولك
    انت اللى تقول يا باشا
    فى الانتظار

    ReplyDelete
  33. سلاموا عليكم ... شكرا شكرا شكرا على سؤالكم ولكل من شعر بغيابي .. حقيقي وحشتوني جدا جدا ..أنا الحمد لله بخير وعقبالكم أنا كنت في الحج وكل سنة وإنتم طيبين


    shady
    أعتفد إن إحنا برده لو صلحنا هانحصله .. هاها عموما خلينا نجرب

    islam yousef
    إنت وصلت للي عايز أقوله فعلا ...هتاليف بفا تالى موتاكاتلى

    With Myself
    والله الجملة جميلة جدا وواقعية جدا وفعلا من الكلمات المأثورة تنفع الواحد يستعيرها فى عنوان المدونة بالرغم من إني عاصرت السادات كاملا بس أول مرة أسمعها

    Mohamed Yousef
    mafeesh faydaa wee ghatteenee wee sawwatee yaa safeyyaa
    هاها .. لو الحل ده هايجيب نتيجة أنا ماعنديش مانع أعملها في ميدان التحرير

    حــلم
    بأه عايزاهم ينشروا صورتي فى المدونة .. حرام عليكي والمدونين زنبهم إيه بس وبعدين ماله الواد أبو بوز اللى فى البروفايل

    ensan
    وإنت طيب ياإنسان وعام سعيد عليك ونتمنى بأه إنت تخرج من حالة الصمت الإجبارى اللي إنت عاملها دي

    @z3NaF
    حماتي وإتزعنف مع بعض ..لأ حرام بجد
    بصراحة نورتي المدونة عشان دي أول مرة أشوفك عندنا

    KING TOOOT
    بأه أنت عايزني أهرب الفلوس على سويسرا من بره بره .. إنت ناسي إن عندي في البيت البنك الدولي ولا إيه؟

    sonofegypt
    بأه بتسمي النوم على الكنبة معتقل .. هاها يبقى أنا على كده بقالي 10 سنين معتقل .. عقبالك

    صباحك سُكّر
    وإنتي طيبة والكوايتة كلهم طيبين

    change destiny
    صدقني ريحها عشان هي مش حتريحك غير بعد ما تريحها
    فعلا مقولة أؤكد لك صحتها عن تجربة بعد عشر سنين جواز
    ملحوظة : الجملة يمكن تطيقها فى جميع المعاني اللي تيجي فى بالك ;)

    bosbos
    جدد لها البيت ياأحمد .. طب منين هو انا قاعد على كنز ولا من البنك بتاع بابا ..

    أبو شنب
    إنت طلعت من بتوع الجزيرة ولا إيه إيه نشرة الأخبار الجامدة دي .. شكلي كده هافوم أقفل التلفزيون قبل ماأسمع التفاصيل قصدي الفضايح
    وبعدين إنت لسه فاكر السيد ناجى دواير

    Taher
    شكلك كده عامل زيي .. وبتعمل إعادة إنتشار

    Ahmad El-Saeed
    ودي فيها كلام وحياتك خلاص حصل

    rose
    عايزاني أنفتح على جيراني .. على العموم أنا منفتح عليهم من بعيد لبعيد .. مباحثات سرية يعنى

    chatterbox
    بصراحة تعليقك موتني من الضحك بتسأليني هي د نفسها مراتي اللى فى البوست بتاع البقدونس والبسلة
    إيه إنتي عايزاهم أكتر من واحدة .. هو أنا هاجيب لكل بوست زوجة جديدة بصراحة فكرة حلوة
    حرام عليكي طيب إزاي

    على إسم مصر
    أهو ديتليف ميليس مشي زى هانز بليكس والجديد إسمه وحش مش عارف أحفظه أفضل بأه نخليها إنجلينا ميركيل .. أصل عليها تقل دم ولا أولبرايت

    amani
    لأ طبعا ماتعرفش عنوان المدونة وإلا كان زماني نزيل في جوانتانامو

    wa7d mn el e5wat
    بأه إنت مالكش فى السياسة .. عموما مالكش فى السياسة أحسن من مايكون مالكش فى الجواز .. مدونتك تحفة تحفة

    صباحك سُكّر
    مبارك عليكم وعلينا وتعازينا فى
    أميركم الوسيم البشوش

    ابن مصر
    واضح كده إنك اول واحد لاحظت غيابي

    Haitham
    غزو لحفظ السلام وتريحوا قرنين من الزمان في البيت طيب أشوف وشكوا بخير وخلوا بالكم من العيال .. سلاموا عليكوا

    مواطن مصرى
    يعني ماهوش زى الزنبرك وينفع يتقلم مع أي حاجة خلاص أوكي .. يبأه زي اليويو وكل سنة وإنت طيب

    Riyadhawi
    وعلى إيه إجبار .. ماخلاص دلوقتي فيه تعاون كامل وإلتزام بالشرعية الدولية وسلم لي على السيادة الدولية

    Ammouna
    برده الجنس الناعم بيخاف على بعضه
    بأه بعد كل ده بتقولي الله مع المدام

    ~ Saud! G!rl ~
    إزيك .. أنا فهمت كده إنك بتسألي إيه دخل صورة المحروس اللي فى البوست مع الموضوع .. بما إننا بنتكلم فى السياسة وماحدش بيفهم حاجة من السياسة فكانت دي افضل صورة معبرة

    Taher
    بتسألني أنا فين .. على فكرة إنت الوحيد وبنت مصرية اللي كنتوا عارفين الإجابة

    Anonymous
    أنا سامعك .. مين معايا .. الوووو

    taty
    أنا هنا بخير .. ميرسي على السؤال

    change destiny
    هاها .. لأ الغياب مالوش دعوة بالسياسة

    bosbos
    أنا هوه .. ميرسي على السؤال على فكرة صورك الجديدة إنتي وتاتي تحفة

    Nerro
    إنت عارفة إن الصبر حلو وبعدين إيزي كم إيزي جوو

    خجل
    أهلا أهلا .. إنت فينك من زمان .. لسه مكسوفة ولا إيه

    أبو شنب
    معلش الدعوة متأخرة شوية .. كل سنة وإنت طيب

    Lasto-adri *Blue*
    إزيك .. موضوعك بتاع الدورة الإفريقية رائع

    Tara
    ميرسي على سؤالك إنتي كمان غيبتي مدة طويلة علينا .. حمد الله على السلامة

    نون النساء
    ميرسي على سؤالك . وإنتي كمان أرجو إنك تكوني إنتهيتي من ظبط البلوج بتاعك

    Romantic Rose
    سؤالك أثر فيا جدا .. فعلا متشكر على سؤالك وكلمة فى ودنك بنت مصرية تعرف الموضوع

    taty
    الله يسلمك رجعتلكم ودعيت لكم كلكم .. ربنا يخليكم ياأعز الناس

    mindonna
    ميندونا .. متشكرين على سؤالك انتي كمان وحشتني كتاباتك

    Taher
    خلاص ياطهوور ..انا جيت بنفسي أهوه وكل سنة وإنت طيب

    ReplyDelete
  34. السلام عليكم و رحمة الله و بركاته يا حج احمد ..
    حمد لله علي سلامتك .. بس مش كنت تقول .. كنت هوصيك تدعيلي دعوه خصوصي .. مفيش حد اعرفه راح الحج السنه دي الا ووصيته يدعيلي نفس الدعوه .. يلا فلت من ايدي انت بقي .. بس العيب مش عليك .. العيب علي جزرتي اللي ما قالتليش ..

    المهم بقي .. مستنيين الجديد بكثافه ..
    تقبل الله طاعتك و ادامها نعمة عليك و رزقك المتابعه بين الحج و العمره .. امين

    ReplyDelete
  35. في موضوع من وحي السياسة
    الله عليك يا احمد فعلا حوار رائع رائع, انت فعلا فنان, بس كان لازم الحوار ده يكون علي شكل فزوره واللي يحله ياخد..., ولا بلاش اصل لو بعت اثاث البيت كله مش هيكفي حق الجوايز, الجوايز اللي انت تستاهلها كله.
    واخيرا مبروك عليك قاريء دائم اللي هو ان

    ReplyDelete