Thursday, October 26, 2006

أحلى عشرة الساعة عشرة


Shokeir - Business



إلحقني ياأبوحميد بنصايحك عندي إنترفيو بكرة الساعة عشرة لوظيفة في -
شركة كبيرة
حظك والله حلو يابني ، انت أ ُمك داعيالك إنك قابلتني ألف مبروك -
شوف ياأبو الشباب -

أولا : لازم تحسسه إن الشركة دي مش كبيرة قول له أنا مش فاهم إنتو بتعملوا إيه في الشركة دي؟

ثانيا : لازم تديله برستيجه ، قول له إنما إنت ليه مش في وظيفة أحسن من كده ؟

ثالثا : عرفه إنك بار بوالديك وإساله هو التأمين الصحي بيشمل الوالدين ولا لأ ؟

رابعا : لازم يحس إنك طموح وأكّد له إن هدفك على الأمد القصير إنك تحل محله


خامسا :
لازم يعرف ان وقتك ثمين وإطلب منه ان المقابلة تكون على الواقف

سادسا :
لازم يكون ليك أسرارك وإساله إنت ليه بتسأل على الريفرانسز بتاعتي؟

سابعا :
لازم يعرف ان عندك إنتماء قول له إنهم لو عيّنوك في الوظيفة هاترسم لوجو الشركة تاتّو على دراعك

ثامنا :
فهمه إنك مهتم بسياسة الشركة وإسأله إذا كانت سياسة الشركة بتسمح بسلفة من الشهر الأول

تاسعا :
لازم يعرف انك راجل مريح وقوله إنك ممكن تاخد أجازة في أي وقت

عاشرا :
لازم يعرفوا إنك راجل مش هايف وقول لهم إن سبب تركك الشغل القديم إنك قلبت الترابيزة على مديرك


أنا متشكر جدا ياأستاذ أحمد -
أي خدمة ياأبوالشباب ألف مبروك ومتنساش بس في دعوة حلوة -
إيه رأيك أنا عايز أعزمك بكرة عند عزت باي باي ؟ -
إممممم .. طيب ماتخليها النهاردة أحسن -


--------------------------


لمزيد من النصائح يُرجى مراجعة التدوينات السابقة

الموظف المثالي ، الوصايا الثماني الذهبية

13 comments:

  1. كل سنة و انت طيب يا باشمهندس

    لما تشوف صاحبك ابقى باركله

    او اديني عنوانه في مصحة الإكتئاب اللي هيتعالج فيها وانا اباركلو انا
    .

    مصر في امس الحاجه للنصايح الذهبية دي يا فندم

    ما تحرمناش من خبراتك

    ReplyDelete
  2. ده أكيد موظف كبير في شركة ملهاش منافس
    خصوصاً حكاية التاتو دي


    كل سنة وانت طيب

    ReplyDelete
  3. بلوج جميل جدًا وحس ساخر مـُتميز

    سؤال بس: ما شفتش الوصلات دي أو سمعت عن اللي فيهـا قبل كده؟
    http://www.darlila.com/site/index.php?option=com_content&task=section&id=7&Itemid=34

    http://www.darlila.com/forums/index.php?showtopic=2703


    تحياتي الشديدة وتمنياتي بالتوفيق

    ReplyDelete
  4. واضح انك بتعز الجدع ده اوي
    :))

    ReplyDelete
  5. حرام عليك
    دا انت ضيعته
    وباين عليه هو كمان البعيد
    غبي

    ReplyDelete
  6. احلق شنبي إذا قبلوه في الوظيفة
    :))

    ReplyDelete
  7. كل سنه وانت طيب وعيد سعيد

    ReplyDelete
  8. ya 3eeni 3la sa7bak
    rabena yewaffa2o b2a
    loooool

    ReplyDelete
  9. تصدق عمرى ما حاسألك على نصيحة فى الشغل، كويس ان كل شىء انكشفن وبان


    كل سنة وانت طيب ياباشمهندس

    ReplyDelete
  10. تاتو؟؟؟؟

    هههههههههههههه

    و راح الصديق

    انما ايه عزت باي باي ده؟؟ هههههه

    ReplyDelete
  11. يا جمااامد


    انا خلاص السنه الجاية بكالريوس

    وهحفظ نصايحك دي عن ظهر قلب

    يوووووة

    مش ظهر طاوله يا سيدي


    المهم اوعي تكون نصايح فشنك من بتعت اسماعيل ياسين لتوفيق الدقن دي


    وتحياتي

    ReplyDelete
  12. دي نصايح غاليه قوي يا ابوحميد
    والوظيفة مضمونه ميه في الميه بشرط يديلوه قلمين وشلوتين وتفه بالمره كده عالماشي

    ReplyDelete
  13. احمد شقير
    دا انت عندك دماغ رهيه ما شاء الله عليك
    قريت ياخويا نصائع العمل و الزواج
    تودي في ستين داهيه
    بقه الستات بيمشو في الشقه فرده و فرده لأ ؟؟؟
    احسن من الي بيمشو حافيين نص العمى و لا العمه كله
    و قلي الاشخان الي انت بتنصحهم بتشوف و شهم تاني؟؟؟؟
    هههههههههههههه
    زلمه خبره

    ReplyDelete