Wednesday, November 22, 2006

المدونون في التليفزيون


المدونون في التليفزيون


العاشرة مساء



في العاشرة مساء على قناة دريم أمس كانت الفقرة الرئيسية عن المدونين والتدوين ، بدأت الفقرة بتقرير عن التدوين ظهر فيه وائل عباس يتحدث عن التدوين ويتصفح بعض المدونات ومنهم مدونة نورا يونس ومعاه شوية كلام عادي وبعد التقرير تكلمت منى الشاذلي عن التدوين كلام تعرف به ماهية التدوين أنا كمدون مافهمتش منه حاجة دخلت في تفاصيل أصل الكلمة وبعد شوية إبتدت تقول منتديات بدل من مدونات وكله ماشي


Mona
الصورة من مدونة وائل عباس


المهم بدأت بتعريف الموجودين طبقا لترتيب الجلوس كان في الأول علاء صاحب مدونة منال وعلاء وبعدين أحد أعضاء منظمة مراسلون بلا حدود وبعدين مالك صاحب مدونة مالكوم إكس وكان لابس طاقية زعبوط وبعدين د. جهاد عودة وتم تعريفه على أنه رئيس قسم العلوم السياسية بجامعة حلوان وأول ماشفت جهاد عودة وهو عضو لجنة السياسات في الحزب الوطني ، قلت ليلتهم مش معدية وجهاد هايفركش الكلام كله كعادته في المقاطعة وحدته في الكلام والتهجم على الضيوف والمذيعين كما عهدناه على القنوات الفضائية الإخبارية وقلت يومهم مش فايت وقلت عملتها منى الشاذلي
إبتدأ الكلام الراجل بتاع مراسلون بلا حدود وكان جوهر القضية إن مصر من ضمن أسوأ ثلاثة عشر دولة بتقيد حرية التعبير على الإنترنت ودورها في الرقابة على حرية التدوين
وبعدين جه الدور على علاء بصراحة وللأمانة كان الراجل كلامه مرتب وهادي ومحدد وكان أمين في طرحه لموضوع إعتقالات المدونين وقال إن إعتقاله هو وبعض المدونين كان أساسا بسبب التظاهر ضمن مجموعة أخرى تم إعتقالها مدونين وغير مدونين ، وإن كان لم ينفي أنه من الممكن أن تكون تدويناته هي السبب حيث تم إنتقاء أشخاص بعينهم أثناء الإعتصام أمام نادي القضاه ، ثم جاء الدور على مالك مافهمتش منه حاجة وكان غير مالك المدون اللي بيكتب في المدونة بالبلدي مابيعرفش يتكلم ، أحيانا الجلوس أمام الكاميرات وعلى الهواء يقيد اللسان على التعبير ويحتاج الشخص لمرات ومرات أن يقف أمامها حتى ينطلق لسانه بطلاقة برغبة دون رهبة ، ثم جاء الدور على جهاد عودة وقلت خلاص كرسي في الكلوب بدأ بالرد على سؤال حول معرفته الشخصية بالمدونين أجاب بالنفي وإن كان يعرف علاء من خلال عائلته ولم يقرأ مدونات سوى تدونيتين أو ثلاثة لمالكوم إكس

قال إن المدونات خرجت عن طور التدوين الشخصي لتصبح أراء سياسية وإن كانت المدونات مليئة بغير الموضوعات السياسية وهناك مدونات أكثر تكتب عن الموضوعات الإجتماعية والنسائية وهناك مدونات نسائية جريئة جدا ولغاية هنا الكلام حلو والراجل لسه ماسخنش وبعدين قال الهيئات الدولية اللي بتدي تقارير دي مش حاجة ذات أهمية يجب الوقوف عندها فممكن أي تلاتة أربعة من كام دولة يعملوا هيئة وتبقى دولية وينشروا تقرير يعني حاجة بالبلدي كده وبإسلوب غير مباشر لايـُعتمد عليها وممكن تكون ليها أهداف خاصة ، الكلام إبتدي يسخن ونلتقي بعد الفاصل

Dream TV


أثناء الفاصل يبدو أنه حدث حوار ساخن وإعتراض من عضو هيئة مراسلون بلا حدود والمدونان الضيفان على الإستخفاف بالهيئة وأنها ليست مش خمسة ستة أفراد كما يحاول أن يسفهها د. جهاد عودة ، وصلت مسامع هذا الحوار على المشاهد عقب العودة من الفاصل وإستطاعت بصعوبة منى الشاذلي ان توقف الحوارات الجانبية لنقطة كما تقول فرعية وهامشية وذلك بأن معها على الهواء السيد اللواء أحمد ضياء مساعد وزير الداخلية للشؤون القانونية وبدأت منى الشاذلي بسؤال عن التعريف القانوني للكتابة على المدونات ، المفهوم من الكلام المبدئي للواء أن مايكتب على الإنترنت يدخل تحت قانون النشر ثم ذكر بنود قوانين تودي في داهية يعني لو طبقت لأصبح الشعب كله في السجن ولو الواحد كلم مراته من الممكن تحويل الحوار إلي فكريهدد السلم العام ويكون مصيره السجن ، وشيئا فشيئا إرتفعت نبرة صوت السيد اللواء وأصبح كل من في الإستوديو كأنهم مجموعة من العساكر يتلقون الأوامر ويتدخل علاء في الحوار ليؤكد على واقعة تحرش وسط البلد فيشخط فيه السيد اللواء بلهجة حازمة ويقول له "ماتقاطعنيش" وكأن علاء مجرم جربان ويسود الصمت بالإستوديو وهو يعدد القوانين التي تجرم النشر وتتنقل الكاميرا على وجوه الحاضرين وجوم وسكون وصدمة في البداية حتى بدأت ضحكة سخرية تظهر على وجه مالك وعلامات تعجب وإستفهام وتنوين وضمة وفتحة وكسرة وحسرة على وجه علاء ، ونظرة دهشة على وجه د. جهاد عودة لم نراها مطلقا سابقا على وجهه في جميع مداخلاته الفضائية ، كانت قنابل السيد اللواء من العيار التقيل ونبرة حادة جافة أدت إلى نتيجة عكسية لما أراد أن يوصله ، نبرة إستطاعت قيادات الحزب الوطني أن تتجنبها منذ سنوات عندما تتكلم عن حرية الرأي والتعبير والديمقراطية والرأي والرأي الآخر ، لم يكن أمام منى الشاذلي في نهاية الحوار إلا أن تشكر السيد اللواء على توضيحاته القانونية معبرة عن تقديرها العميق جدا لما سمعته بنبرة تؤكد أن المعنى وصل إليها هيا شخصيا ، على غير المعتاد جاءت نبرة جهاد عودة بعد هذا الفاصل الرعب هادئة مؤكد أن التدوين حلو وجميل ولايجب ان يخرج عن إطاره المرسوم ويجب ألا يحمل أخبارا مغلوطة حتى لايثير بلبلة والمفروض أن المدونة شيئ شخصي يقدم أشياءا شخصية لا أشياء إن تبدو لكم تسؤكم

: قبل هذا عَقـّب علاء بشكل أعجبني عن مجموعة نقاط وهي

أولاً : ليس معنى أن المدونة شخصية أنها تقدم أموراً شخصية عن كاتبها كما يعتقد البعض ، معنى مدونة شخصية أنها تخص هذا الشخص ويكتب فيها مايراه ومايعتقد به

ثانياً : كلمة التحريض فسرها علاء بأن أي شخص له رأي خاص سلبي من وجهة نظر البعض أو إيجابي من وجهة نظر آخرين يقدمه للغير بأي وسيلة مسموعة أو منشورة أو مكتوبة هو نوع من أنواع تحريض الآخرين لتبني وجهة نظره وهو بالتالي يحرض الآخرين من هذا المنطلق مثل أي شخص صاحب رأي يعلنه

ثالثاً : رده على موضوع أن مصر من أسوأ الدول في الرقابة على الإنترنت في بداية الحلقة وتعليقه أنها ليست بهذا السوء وهو يؤكد أنه لم يحاسبه أحد عما يكتبه حتى الآن ، وهناك دول أسوا كثيرا من مصر بما يعتقد هو شخصيا أن مصر لاتستحق مثل هذه المرتبة

رابعاً : كان ذكيا في عدم التركيز كثيرا على ماحدث لكريم عامر أكثر من إشارته أنه تم إعتقاله بسبب مانشر بمدونته

خامساً : في رده في نهاية الحلقة على مايراه حلا للمشكلة بقوله "أيهَ مشكلة" نحن ليس لدينا مشاكل ونكتب بحرية إذا كانت الداخلية لديها مشاكل فهذه مشكلتهم يحلوها هما

سادساً : تفنيده لكلام السيد اللواء بتصحيحه لقوله إن المدون وائل عباس سبق أن كانت له قضية متهم فيها ، وهي لقطة ذكية توضح عدم دقة كلام المسئول الأمني - إقرأ ماكتبه وائل عباس

مالك كلامه غير مفهوم ولم تسعفه اللغة للتعبير عما يريد غير وجهة نظر وهي بإختصار "كتبت أم لم تكتب فهناك مشكلة فأحسن لك أن تقول ماتريد بدلا من أن "تكون صامتا سلبيا

إنتهت فقرة المدونين وجاءت فقرة الدكتور خالد منتصر بيتكلم فيها عن حبوب منع الحمل للرجال ، أعتقد أنها كانت على صلة بفقرة المدونين

طبعا ده اللي فاكره من الحلقة جايز أكون لخبطت شوية أنا ماسجلتش الحلقة ولاكتبت الكلام ده إلا دلوقتي بعد حوالي أربعة وعشرين ساعة ، فلو فيه حاجة خطأ صلحوها وحتى لاتكون أخبار مغلوطة تعمل على التحريض وتكدير السلم العام اللي حير مالك في تعريفه


معكم سلمى سالم – العاشرة مساء
-----------------------------

روابط للتدوينة

لحظة مع التدوين - حَلا ، تــــداوين ...الاسبوع الثالث لـ شهر نوفمبر - إلهام


20 comments:

  1. اخي العزيز احمد
    هكذا انت سباق في سرد الاحاديث قبل الجميع
    لك اشاهد الحواد لكني شفت بعض االمدونات على القناه الاولى من ثلاثه ايام و برضه ماكانوش مركزين او مش محضرين مفهمتش حاجه
    لازم نعمل منظمه لحماية حقوق المدونين و التدوين
    و يبقالنا زعيم...قصدي رئيس
    و متحدث رسمي ممكن تكون اوووووووسا
    متحدث ايه
    سيب الناس تتبيسط يا احمد
    هيه هيه هيه
    طلعو في التلفزيون ماهم بيطلعو كتير بس بيقولو ايه و مين بيسبهم يقولو اي حاجه و هل هؤلاء هم المدونين الحق
    و ليه دول دايما؟؟؟؟

    ReplyDelete
  2. اجمل ما خرجت به من هذا البرنامج هو

    أنطباعي الأيجابي وأحترامي الشديد الي

    شخص علاء

    صاحب مدونه منال وعلاء

    فقد كان منطقيا مهذبا
    لم يستعرض عضلاته كما يفعل البعض
    هادئا في طرحه للنقاط التي اراد التحدث فيها
    لم اشعر أنه يتحدث من برج عاجي
    ينظر الي الأخرين من فوق أنفه
    مدعيا بأنه المثقف الأوحد في الدنيا
    وحتي مع تهديدات بتاع الداخليه

    اللي خوفتني انا شخصيا

    وانا اعيش خارج مصر
    وبيني وبينه

    ساعات و

    ساعات بالطياره

    الا انه بجد أفزعني

    وخلاني ارتعش من علي بعد

    وكنت حا اعترف واقر علي التنظيم

    وحسيت

    انه حايجي ياخدني من قفابا
    وهات يضرب

    و حا يطلع دين امي


    رغم اني كويسه ومؤدبه وبحب الحكومه


    بس علاء مشاء الله عليه
    كان رده عليه هادي
    طمني

    ورجعت تاني تماسكت وقلت
    بلاش اعترف علي التنظيم



    اما الست مني الشاذلي فهي كعادتها دائما من استخدام جمالها كجواز مرور للأخرين ، ورغم فريق الأعداد الجيد للبرنامج
    الا أنهم باين عليهم ابتدوا يسوحوها لأنها خاطفه منهم الأضواء برغم انهم السبب في اظهارها بأتها بتفهم

    وطبعا مشكلتها انها بتنسي وما بتحفظش كويس
    واحيانا ما بتسمعش كويس الكلام اللي بيلقنوها بيه في السماعه المتخيطه في ودنها،
    وطبعا لازم تهرش في كل حته في وشها قبل ماتتكلم
    قال يعني فاهمه

    وهارشه المسأله
    وبت برم

    وياريت حد يبعت لها هديه
    حبوب للحساسيه

    علشان الهرش الكتير ده في وشها ورقبتها لحسن حا تقطعهم بضوافرها

    المهم انصحها بحبوب تلفاست
    او زيرتك
    دول ايه كده

    ميه ميه للحساسيه والجرب والأرتكاريا

    وكان من الأفضل لها لما تستضيف بلوجريه

    من العيار التقيل
    زي علاء ومالك

    كان لازم تذاكر كويس
    وتحفظ ايه الموضوع حتي لاتبدو امامهم
    وامامنا به
    بهذا الشكل العبيط
    وحياه حلاوتها الزايده
    حته

    اللي خطفوها منها معتز الدمرداش ومي الشربيني في 90 دقيقه غلي المحور

    ReplyDelete
  3. فعلا محتاجين متحدث رسمي ينوب عن المدونين......البرامج الحواريه سواء 90دقيقه أو غيره أصبحت تفتقر الى الإحترام في مناقشة القضايا المختلفه..........وشكرا

    ReplyDelete
  4. مش عارف اقول ايه ... بس الحاجه الوحيده اللي اقدر اقولها ... شكرا لمن اتاح لنا هذا البراح التدويني الجميييل
    هاني جورج

    ReplyDelete
  5. شرح جيدا جدا يا شقير
    كنت اتمني اني اشوفه بنفسي

    يبدو ان علاء حاز علي اعجاب الاكثرية
    هدوءه وترتيب افكاره يساعده علي ايصال الرسالة

    موضوع متحدث رسمي عن المدونين مسالة خلافية جدا

    قد يكون هناك نقابة للدفاع عن المدونين في موضوع الاعتقالات
    بس مينفعشي يبقي فيه مندوب عن افكار المدونين كلهم لانهم مختلفين اختلاف شديد

    ReplyDelete
  6. طيب مش حد يقول قبلها .. يعني انا دلوقتي اتعكننت جدا بسبب اني ما تفرجتش علي الحلقه دي .. و البرنامج مش بيتعاد .. و انا عمري ما تابعته لاني مش من هواة مني الشاذلي .. بس لو حد كان نوه الي ان الحلقه فيها فقرة عن التدوين كنت اتفرجت و شاركتكم ف تحليل الموقف :(

    اتفق علي ابن عبد العزيز في صعوبة ايجاد متحدث رسمي عن لسان المدونين .. ده شئ من الخيال لان مفيش واحد يقدر يعبر عن الملاك و الشيطان او قمة الاصولية و قمة الألحاد في ذات الوقت .. و كذلك مفيش واحد يقدر يكون يميني و يساري و أخوان ف ذات الوقت .. فكرة غير منطقية من وجهة نظري ايضا ..

    تحياتي علي التغطية المتميزه يا شقير باشا ..

    ReplyDelete
  7. بس معلش يااحمد بقي
    انت ليه مضطهد
    مالك وتقول لابس زعبوط؟

    اولا ده كان لابس اللون الأحر المفضل عندي رغم اني زملكاويه
    وبسم الله مشاء الله
    منور كده ومولع الشاشه

    وبعدين هو كان بردان
    وتقريبا كانت الدنيا بترعد في القاهره

    أو يمكن كان جاي لابس هدومه كلها
    تحسبا للأعتقال
    انا يعجبني الناس اللي
    عامله حسابها علي اي حاجه ممكن تحصل

    واللي لابسه ده أسمه ايس كاب

    بلغه اهل القاهره

    موش زعبوط بلغه أهل المنصورة
    اللي انا وانت منها

    خليك روش

    ReplyDelete
  8. أه شفت جهاد عوده غريب قوى ادبه ده مع انه من يومين كان حيفتح راس خديجة فى الجزيرة انا مستغرب برضو يمكن قبل ما يطلع من باب البيت مراته قالت له انت دكتور بلاش تنسى ذى كل مره

    أه صحيح اي حكاية روز اليوسف دى انا سامع كلام من مصادر موثوقه ههههههههههههههه

    ReplyDelete
  9. على فكرة يا شقير
    علاء دايما كده
    اى حوار بيكون هو طرف فيه بتلاقى افكاره مرتبة وواضحة و"دقيقة" اعتقد ان دقيقة دى مهمة اوى واللى بيعتمد عليها علاء

    نفس الدقة اللى بيتمتع بيها لما يعلق عند اى مدون على اى تدوينة

    ReplyDelete
  10. أحمد شكرا كتير على ملخص الحلقة لأني ما عرفت اتابعها أبدا و حضرت جزء صغير منها .

    كتبت لمحة عن الموضوع في مدونتي و حاولت أدور على مدونات تانية كاتبه عشان أستوضح منها أشياء بس ما لقيت .

    شكرا كتير و هاي فرصه أحط وصلة لهاد المقال في موضوعي .

    ReplyDelete
  11. shady said...

    أه صحيح اي حكاية روز اليوسف دى انا سامع كلام من مصادر موثوقه ههههههههههههههه

    لو الكلام دة بصحيح يا احمد انا ازعل منك خالص
    وبرضة مش حاشترى روز اليوسف وحافضل زى ما انا اقراها من عند بتاع الطعمية

    ReplyDelete
  12. وكمان فية حاجة غريبة اوى انت مكتوب عندك انك قريت بوست لشادى عن لبنان ولما اجى اشوفة ما الاقيهوش
    انت بتعرف مين حيكتب اية قبل ما يحصل
    اعترف

    ReplyDelete
  13. الرائع النتألق كالعاده/ احمد
    احييك علي هذا البوست الرائع كسابقه
    فعلا انا من وجهه نظري ان البرنامج جه في صفنا ونجح علاء بهدوءه وردوده المقنعه وهدوءه المعتاد ان يسحب البساط من عم جهاد اللي معترض علي كل كلمه لهلاء ومالك
    ومالك لولا عصبيته الواضحه لكان موقفه احسن من ذلك
    ولكن يكفي ان الناس تعرف اننا لنا الحق وكفا لهم الادعاءات الواهيه التي يسبحون فيها

    ReplyDelete
  14. احمد حسستنى انى بتفرج
    تغطيه حلوه

    ReplyDelete
  15. ياجماعة ادخلوا مدونة علاء افندى سوف ترى وتسمع اقذر الالفاظ التى لايستطيع
    اى انسان ابن ناس ان يقول واحدة منها وسوف تجد مالايسر واذا كان التدوين بهذه الطريقةفسحقا للتدوين
    ولكم

    ReplyDelete
  16. مبدئيا مبروك على التعديلات فى مدومنتك
    ثانيا : انا اضفت تعليقى على موضوع النيلة بس يا خسارة كان بعد تعليقك على المداخلات
    ثالثا و هو ما يتعلق بموضوعنا هنا و هو يمس حرية التدوين , اعتقد ان السبب الرئيسى هو عدم وجود منفس طبيعى لرأى الشباب خصوصا فيما يتعلق بما يدور حولهم من ازمات فى الوقت الحالى و ده جعل المدونة هى المنفس المتاح اماههم .
    فاذا كان من وجهت نظر السلطة ان هذا يشكل نوع من التجاوزات على هامش الحرية الوهمى المتاح , فالطبيعى توفير بيئة طبيعية للشباب فى المجتمع للتعبير عن افكارها , بس قبل كده لازم الناس تفهم اساسيات الحوار و النقاش و كيفية عرض الافكار حتى لا يختلط الامور و تصبح المدونات مرتعا لاى هجص و السلام تحت شعار اعطنى حريتى اطلق يديا.
    اخوك مؤمن

    ReplyDelete
  17. سعيدة أن التدوين أخذ كل هذا الحضور، رغم أني في الحقيقة لم أتوقع له هذا التأثير..

    حينما استضافتني قناة الجزيرة الخميس الماضي، عرفتُ أن المسؤولية أصبحت مضاعفة، وأن عليّ أن أمثل التدوين (السعودي) على وجه الخصوص أفضل التمثيل، فضلا عن التدوين العربي بشكل عام..

    أظن أنه للمرة الأولى يؤخذ النشر الإلكتروني على محمل الجد (عربيا) ، ومن قبل وسائل إعلام، وجهات رسمية لها وزنها واعتبارها..

    ReplyDelete
  18. ام العيال
    ليه دول دايما ؟
    مثلما تحتل الاخبار السياسية الصدارة دائما كذلك المدونون السياسيون يكونون في المقدمة وهذا الشأن في جميع انحاء العالم
    وإن كانوا في حوارتهم يشيرون إلى ان هناك مدونات شخصية إجتماعية على مستوى عالي جدا

    MAKSOFA
    إنطباعك عن علاء هو نفس انطباعي فعلا وأنا اشعر انه يتكلم حتى افضل مما يدون
    اما عن التنظيم فهاتعترفي هاتعترفي فافضل ان يكون بيدك لا بيد عمرو
    ماعرفش حاسس انك واخدة موقف اوي من منى الشاذلي ، الدرر اللي كاتبها دي عايزة بوست لوحده

    human
    متحدث رسمي باسم المدونين استحالة ، ده لو متحدث رسمي باسم عدد اتنين مدونين مايقدرش برده هايختلفوا على كلامه
    واديك شايف التناقض الحاد بين جموع المدونين
    مكن في الامور الحقوقية كسرقة المدونات او النشاطات الاحتماعية كحفلات ولقاءات وماشابه ذلك ممكن ان يكون هناك منسق وان كنت اشك انه سينال رضا الآخرين

    كراكيب
    هذا البراح فعلا منفذ لكثيرين لا يعرفوا كيف تجد موادهم وخواطرهم للنشر فكان هذا المنفذ الرائع

    ابن عبد العزيز
    منوّر
    طبعا استحالة متحدث رسمي للتباين الواضحفي افكار المدونين
    اما علاء فعلا فقد نقلت ماشعرت به فعلا وماوصلني من اللقاء
    أعتقد انك استطعت ان تشاهد الحلقة في تدوينة وائل عباس

    رومانتيك روز
    الحلقة شاهدتها بالصدفة البحتة وكانت على الهواء ولم يُعلن عنها مسبقا
    عشان كده فات كتير مشاهدتها
    طبعا لاينفع متحدث رسمي للمدونين لانهم جميعا من الاساس متحديثين قيصعب ان يتقبل أي منهم ان يتحدث أحد على لسانهم

    مكسوفة
    لو والله مش مضهد مالك ولا حاجة انا بس شرحت ماوصل لي من خلال اللقاء بحيادية وانا قلت انه ليس كمالك المدون وهذا حتى حال كثيرين من الناس الذين لديهم فكر ولايستطيع اخراجه بالحوار مثلما يستطيع بالكتابة
    على ايامنا كان اسمه زعبوط اما الايس كاب دي ماعنديش فكرة عنها وبعدين زعبوط احسن ومعبرة اكتر

    شادي
    فعلا جهاد عودة كان مستانس على غير العادة يمكن بعد الفاصل الامني والنبرة الحادةوهو مايختلف مع النبرة النيولوك للحزب الوطني فكان هذا التحول
    بصراحة انا بقالي كام يوم بافكر في حكاية روزاليوسف دي ومافهمتش مقصود بيها ايه
    لاكون باشتغل فيها ومش واخد بالي

    بنت مصرية
    سعيد ان راي في محله حيث كانت المرة الاولى التي اراه فيها وإنطباعي يبدو انه لايختلف عن الحقيقة بشهادتك

    ايمان . م
    أرجو ان يكون السرد معبر عن جو الحلقة العام فلا اتبع هذا الاسلوب في السرد كثيرا

    حلا
    سعيد بتشريفك ليا لاول مرة
    وبالفعل ذهبت لمدونتك على جيران ويبدو ان تدويناتك لها شعبية عالية قرأت بعضا منها بصراحة جميلة
    تحياتي للأردن

    أدهم
    حتى انت يابروتس
    حتى انت ياادهم
    ياجماعة حد يفهمني ايه حكاية روزا دي وهو فيه حاجة في البلد وانا مش واخد بالي

    ادهم
    ايه حكاية الالغاز معاك ، انا علقت فين على بوست لبنان لشادي وامتى واي بوست
    ادهم .. عروستي

    محمد مفيد
    لاشك انها كانت من الحلقات الجيدة عن المدونين وخصوصا انها حلقة حوارية بها اطراف مختلفة
    ولكنهم كانوا على المستوى

    دنانير
    تعليقك جميل فلا اتمنى ان احصل على انطباع عما كتبته افضل من ذلك

    Anonymous
    علاء يستخدم اقذر الالفاظ ، عموما كل من يكتب له اسلوبه الخاص وهناك من يجد ان المصطلحات المستخدمة عادية طالما من الممكن استخدامها في الحوارات العادية
    عموما هو لم يستخدم اي من تلك الالفاظ على الإطلاق في حواره التليفزيوني

    مؤمن
    بالفعل قرات تعليقك على موضوع النيلة عقب ردي مباشرة
    أما لان موضوع التدوين حديث فبالتاكيد هناك سلبيات تنتج عنه وبعد فترة من يقرأ التدوينات سوف يستطيع تحديد الجيد من الردئ وبالتالي يرتبط بمجموعة معينة تتسق مع اهوائه سواء قارئا او مدونا
    اساسيات الحوار والمناقشة قد لاتجدها واضحة المعالم في التدوينات مثلما هيا في التلفزيون فالمعايير مختلفة والحرية مختلفة

    هديل
    سعيد بتشريفك
    شاهدت حوارك التليفوني على قناة الجزيرة بصراحة رائع وصورة جيدة للفتاه السعودية وكلماتك واضحة ومحددة في حوار الجزيرة
    لم اعرف مدونتك سابقا وان كنت متابعا دائما لما تكتبه سعلوة في مدونتها
    ولكنكم تحتاجون مجهودا اكثر كفتيات سعوديات للنتشار في عالم المدونات فمازال عددكم قليل جدا وان كان الملاحظ جودة مايكتب بالرغم من اختلافي مع بعض مايكتب

    تحياتي للجميع

    ReplyDelete
  19. ana leya ta3leek wa7ed....

    howa en elli bye7sal da yendaaf lekalemat oghneyet... "Akeed fe Masr"
    la2an da fe3lan mosh momken ye7sal gheer fe Masr...

    haye3melo 7odood leltadween kamaan..? mosh na2es ella enohom ye3melo rekaba lel a7laam kamaan...

    ReplyDelete