Saturday, January 13, 2007

أنا والإيميل والقارئ الخفي




أنا والإيميل والقارئ الخفي






من خلال الإيميل أكتشف أن هناك كثير من مايتابع المدونات أكثر بكثير من ما يقوم بالتعليقات وبالتالي هناك قارئ خفي لاتدركه يقرأ جيداً وربما يضع إسم مدونتك في قائمة المفضلة لديه ويكاد لايمر يوماً إلا وقد فتح مدونتك ليجد تحديثاً أو فكرة أو موضوع جديد ، التالي بعض مالفت نظري من صندوق بريدي الإلكتروني وحكاوي عن الإيميل

في موضوع إحذر هؤلاء المدونين جاءني إيميل لطيف من أحد المدونين باللغة الإنجليزية يشير إلى خطأ في كتابة عنوان التدوينة حيث كتبتها خطأ إحذر هؤلاء المدونون بدلا من الصحيح وهو إحذر هؤلاء المدونين وذلك لأن كلمة المدونين في هذه الحالة مفعول به منصوب بالفتحة وقد قمت بالتصحيح ، الطريف أن إيميله كان بالحروف اللاتينية كمان إحترمت تصحيحه لي عن طريق الإيميل بالرغم من إنه لايضيرأن يصحح لي في تعليق مقروء للجميع ، بالمناسبة المدون هو صديقي العراقي خالد جرار المدون بالإنجليزية والعاشق لكل ماهو مصري

في نفس الموضوع جاءني عن طريق الماسنجر أوف لاين ماسيدج رسالة تسألني الناس دي عايزة إيه وبتعمل كده ليه وقد حاولت الرد عليه في رسالة قصيرة أنهيتها بأني لاأعرف مع من أتكلم ، فتأتيني رسالة بعدها بيوم يخبرني أنه طالب في أحد المعاهد وعمره 19 سنة من كفر الشيخ ومن المدمنين للمدونة وممكن أن أسميه شلاطة ، وهنا لاأنكر مدى جمال هذا التواصل مع شخصيات تعرفك وقد لاتعرفها

محمد السملاوي من تلك الشخصيات التي لاأعرفها ولم نتواصل سابقا ًولكن يبدوا أنها تعرفني فهي تعرف تدويناتي السابقة والحالية حيث وجدت رسالة أرسلها لي بالأمس وقرأتها اليوم تقول لي أن هناك سرقة جديدة وأنا المسروق منه هذه المرة ويشير إلى عمود اليوم وجهة نظر لصلاح منتصر في الأهرام الصادر اليوم وفيها يشير الكاتب إلى رسالة أرسلها له شخص يدعى مهندس وجيه إسحق عن تدوينة المصري هو اللي وهنا لا أستطيع أن أتهم الكاتب الكبير صلاح منتصر أبداً بالسرقة فالرجل لم ينسب الكلام لنفسه ولكن ذكر أنها وصلته في بريده وهو بذلك أمين في نقله وهو ماحدث مع نفس التدوينة يوما ما في جريدة المصري اليوم والتي وصلتني أيضاً في إيميل من عبد الرحمن صاحب مدونة ركن المصريين ، ماأقصده هنا ليست التدوينة ولا السرقة ولكن القارئ الخفي الذي لايعلق ولكنه يعرفك ويهتم بما تكتب ، هذا القارئ لاتستطيع أن تخرجه من حساباتك

هذا القارئ الخفي ظهر بوضوح في موضوع صورة أحمد ومجلة تين إستاف حيث أكد لي أحمد أن إدارة المجلة فوجئت مرة واحدة بوصول كم هائل من الإيميلات يستنكر ذلك حيث أخبرته الإدارة أن الرقم تعدى ثلاثة آلاف إيميل فبلا شك أن القارئ الخفي كان له دور كبير في ذلك ، أفتح إيميل اليوم لأجد رسالة من أحمد تحمل لي خبر جيد يرد على إستفسار لي في البوست السابق بأنه تم إعادة نشر الصورة مع مجموعة أخرى من صوره على صفحة كاملة مع ذكر إسمه ، مَن كان له هذا التأثير أكثر من ذلك القارئ الخفي ؟

جاءني مرة إيميل من أحد الأصدقاء الكويتيين يعتب علي مايكتبه المدون أدهم صاحب مدونة على إسم مصر في هجومه الغير مبرر على الكويتيين وأنه يربأ بنفسه أن يرد عليه بنفس طريقته بما يعيب فيها على المصريين الذي يعتز بكثير منهم ، وحيث أنني ليس لي سلطة إلا على مايدور في مدونتي فلم أتدخل مطلقاً في هذا الشأن ، ولكن بعد فترة أجد تدوينة له يهاجم ويستنكر فيها مايحدث للسائح الخليجي في مصر من محاولات مستفزة للحصول على ماله دون خدمات حقيقة ومحاولات فرض البقشيش بالعافية وبخدمات لاتستحق ، وهنا تذكرت إيميله السابق

إيميل آخر وصلني من اليابان من مدون ياباني إسمه شنجي يخبرني بأنه تم إختياري من مصر للإشتراك في مدونة المائة وإثنين وتسعون موضوع وهي مدونة يشترك في تحريرها مائة واثنين وتسعون مدون من مائة واثنين وتسعون بلد وأنا سوف أكون فيها المدون المصري ، فكرت في أول تدوينة لي ورأيت أن تدوينة تقرير شقير النصف سنوي تصلح لأن تكون أول تدوينة لي وبالفعل نشرت التدوينة بالإنجليزية هذه المرة والغير مريح لي أن أول تعليق لي كان من المدون الإسرائيلي إيهودا يشيد بالتدوينة ويسألني كيف حصلت على تلك الإحصائية ، لم أرد ومن وقتها لم أنشر أي تدوينات

وصلني من رائد وهو صديق أردني إيميل يشير بالإثبات أن مقتدى الصدر كان ضمن من قاموا بإعدام صدام



آخر حاجة إيميل وصلني من ڤانيسا شقير تخبرني فيه أنها من كندا وكانت تبحث عن إسمها في مواقع البحث ووجدت إسمي وتعجبت حيث لم تجد إسم شقير سابقاً خارج دائرة عائلتها ، والدها من مصر وهاجر لأمريكا وتزوج والدتها ثم ذهبا إلى كندا حيث تعيش هي حاليا ، رديت عليها بس هي مارديتش تاني يظهر أبوها قالها إنسي ياڤانيسا

هذه كانت نبذة ، طبعا فيه حكاوي كتيرة أخرى لإيميلات كتيرة ولكن لنكتفي بهذا القدر مع رسالة شكر للقارئ الخفي من غالبية المدونين وأقول له لو تعلم كم يسعد من يكتب تدوينة أن يجد لك تعليقاً حتى ولوكان نقداً ، لسارعت بالتعليق فأنت بذلك تثري التدوين

30 comments:

  1. إحساس رائع اسمحلى احسدك عليه ههههههه
    بخصوص ادهم اعتقد ان ادهم دايماً بيتكلم بلسان عربى مش مصرى ولا قطرى خالص , بس يمكن الصديق الكويتى صعب يفهم اللسان ده

    ReplyDelete
  2. المدونه اكثر من رائعه وتحتوى على كثير من الافكار و انا من المتابعين لها من فتره و حكايه سرقه الموضيع دي فدي حقيقه فعلا
    بس استمر...

    ReplyDelete
  3. انا فعلاً لاحظت ان هناك الكثيرين الذين يزورون مدونتى ولا يتركون اى تعليق بنسبه قد تصل الى 90% من الزائرين وليس من القطر المصرى فقط بل من بلاد عربيه كثيره

    أثار هذا فى نفسى سؤال واحد لماذا لا يعلقون او حتى يراسلونى كما فى حالتك خاصه انهم يقضون الكثير من الوقت فى تصفح وتقليب المدونة رأساً على عقب قديمها وجديدها ، واعتقدت ان ما اكتبه تافه لدرجه انه لا يستحق التعليق

    أما مقالك هذا فأثار نقطه فى منتهى الذكاء والألمعيه ، فعلاً يجب وضعهم فى الحساب حتى وان كانوا يرون ان ما اكتبه تافه فأنهم يشكلون 90% من زوار مدونتى

    الذكاء والألمعيه غير مستغربين عليك ، واشكرك جداً على لفت النظر لنقطه غائبة عنى

    ReplyDelete
  4. والله يا كبير انت فعلا عندك حق

    انا فترة لما جيبت الكاونتر بتاع البلاد دا كونت مستغرب جدا من امه لا الله الا الله اللي كانت بتيجي وماعرفشي عنها حاجة

    اشي اسرائيليين علي امريكان علي سعوديين علي كل البلاد اللي تعرفها وماعرفهاش

    بصراحه كنت بافرح بيهم اكتر ما بافرح بعدد التعليقات نفسه


    تحياتي ياكبير

    ReplyDelete
  5. طبعا انا اكتر واحد مصدق موضوع القارئ الخفى و بحس بيه على الفليكر اكتر لان عندى صور تشافت بالالاف بس التعليقات لم تتعدى ال70 تعليق و لازم طبعا نحترم العدد الكبير دا بس لو عاييزين رائ ليه الناس دى مابتعلقش و عن خبرة كبيرة فى الموضوع دا هم طبيعتهم كدا و فى ناس منهم بتحب تاخد الفايدة و تخلع علشان تشوف موضوع تانى مع انه لوكتب رايه حيفضل فى دماغة طول عمرة بس اهو صوابعك مش زى بعضها

    شوف اخر بوست عندى

    ReplyDelete
  6. العزيز احمد
    بالطبع هناك قارئ خفى قد لا يملك القدرة على التعليق
    قد يفتقر للكلمات ويخاف ان يخونه التعبير
    قد يكون قارئ لا كاتب ولا يفضل الكتابة
    ما يؤكد ذلك هو عداد الزوار الذى يتزايد بحجم يختلف تماما مع حجم التعليقات
    اكتشفت انت البعض من خلال الميل لكن الكثير لا تستطيع ان تعرفهم لانهم ليسوا مدونون ولا يبادلونك ميل او مسنجر

    تدوينة تحمل فكرة جديدة
    تحياتى

    ReplyDelete
  7. شئ متوقع جدا .. ده انا يلي ماليش بلوج اساسا و حيالله بكتب مرات عند بنت مصرية و بعلق ف بعض البلوجات كل يوم الاقي ايميلات و ناس ضايفاني علي الماسنجر ف الايميل اللي سايباه ف البروفايل بتاعي .. ايشحال "احمد شقير" بجلالة قدره ؟ ربنا يحبب فيك خلقه كمان و كمان يا احمد يا ابن شقير ..

    بس علي فكرة .. انا واخده علي خاطري منك .. مش هقولك ليه و هسيبك تتوقع من نفسك .. ماشي ؟

    ReplyDelete
  8. عزيزي احمد شقير
    لن اعلق علي البوست هذا ولكني اريد ان اعبر عن مدي اتعجابي بتلك المدونه الرائعه والتي تحترم كل من يدخلها
    احيك علي بوست صور العام
    والي الامام ايها الرائع

    ReplyDelete
  9. ما أهظمه هذا القاريء الخفي

    على فكرة عايز أبعت تحية عبر تعليقي هنا لخالد جرار لأنه من أهم المدونين العراقيين

    القاريء الخفي، أجده في مدونتي، حتى ان لم يترك تعليقات كنت أعرفه أحيانا من مظهر بلدان الزوار الذي لايعمل حاليا

    كنت افاجأ أحيانا وانا اتصفح بزوار من دول لم يتركوا اي تعليق لدي

    القاريء الخفي، هو الصديق الخفي

    ReplyDelete
  10. لا املك يا معلمي واستاذي الا ان اقول لك اتعبت من جاء بعدك اعتقد ان لدي مهمة شاقة كد اصل لما وصلت اليه وفقك الله ولك المزيد بأذن الله لإانت تستحق

    ReplyDelete
  11. I consider myself a silent reader; I browse more than I comment... I was one to FWD your post about Egyptians via mail “without forgetting to add its source off course”. I don’t use a country/visitor counters because I think it’s a false estimate of people interested in what I write. I think the real estimate here is the participants, the comments in each post, if your post is provoking, interesting, dramatic, inspirational enough to convince the visitor to leave a comment, then the communication has been established and more horizons are broaden.

    Ahmed, I’m glad to be commenting on your posts.

    ReplyDelete
  12. السلام عليكم
    بجد ما اروع القارئ المجهول
    مش شرط تعرف هو مين او شخصيته ايه
    المهم انه بيشاركك
    انا في مرة جالي ايميل يجي خمس صفح لمجرد اني كنت كاتبة قصة حياتي الكئيبة هههههه
    وكان اللي بعتهولي نوع من المشاركة وجايبلي امثلة من الحياة
    بجد مدونتك رائعه
    والبوسست الاخير دة رائع
    شكرا ليك مرة اخري

    ReplyDelete
  13. عزيزي احمد
    اعتبر نفسي واحد من القراء المجهولين كما و صفتهم فأنا اتابع المدونين منذ اكثر من عامين و صارت قراءه المدونات عاده يوميه

    ما قالته توتا قد يكون صحيحا الي حد كبير

    مثلا انا اتابع مدونتك منذ فتره كبيره و اختلف معك اكثر مما اتفق لكن في النهايه تلك هي وجهه نظرك و هذه مدونتك و انت حر فيما تعتقد او تكتب

    موضوع التعليق لا ارتاح له مثلا عندما يعجبني شيئا مما كتبت ا و ترك تعليق من نوعيه هايل يا احمد او ايه البوست الجامد ده فلا اعتقد ان له اي فائده خصوصا انك تجد عشرين تعليق بنفس المعني
    ام الاختلاف مع ما تكتب و ترك تعليق يختلف فتجد العديد يهاجموك و بصراحه الواحد كبر و مافيش طهقان علي الخناق

    الموضوع عامل زي بريد الاهرام مش معقول الناس الي بتقراء الاهرام هي بس اللي بتبعت للبريد

    ملحوظه اخبره للاستاذ احمدايتش اللي قال
    "عن خبرة كبيرة فى الموضوع دا هم طبيعتهم كدا و فى ناس منهم بتحب تاخد الفايدة و تخلع علشان تشوف موضوع تانى مع انه لوكتب رايه حيفضل فى دماغة طول عمرة

    روح يابني ربنا يفتح عليك

    ReplyDelete
  14. أنا أيضا لاحظت أن كتير من التعليقات تأتى من غرباء عن التدوين

    وأن الكثير منهم يدخلون ويقرأون بلا تعليق

    وشكرا لك على زيارتك مدونتى وترك تعليق

    فلقد شعرت بالفخر حقا عندما زرت مدونتى وتركت تعليقك

    اشكرك

    ReplyDelete
  15. أحمد باشا
    انا كنت حاسس وانت بتكتب المدونة انك بتتكلم عليا
    انا فعلا كل يوم الصبح لازم ادخل أصبح على مدونتك ومدونة أبـو الليل

    ReplyDelete
  16. ما شاء الله يا احمد


    على فكرة انا اول مرة ازور المدونة بتاعتك


    حلوة جدا جدا .., ما شاء الله


    اكيد هتكون ليا زيارات كتيير ليك

    دى هتكون من مدوناتى المفضلة

    تحياتى

    ReplyDelete
  17. wallahy ya ahmed i am one of those readers, i rarely leave a comment anywhere, but u can't imagine how anxious i am to read anything new you write.your article this time made me write to you. i love your blogspot, and check it every morning hungry for something new you wrote.. so please don't stop
    menna wahby

    ReplyDelete
  18. طبعا كعادتك دايما رائع
    ومش محتاجين نقول كلام حلو والذي منه
    اما بالنسبه للقارئ الخفي فانا واخد بالي منه
    لأن لما تلاقي عدد الزوار في يوم مثلا ثلاثمائة واحد وعدد التعليقات لا يتعدي صوابع اليد
    يبقي اكيد في ناس دخلت وقرأت لكن لم تعلق
    هذا ناهيك عن الزيارات من الدول الاخري
    انا مره حطيت عداد الدول لمدة شهر تصور تاني اكتر بلد منها زيارات كانت امريكا
    ده غير برضه الصين ماليزيا كوريا والدول العربية ودول تانيه كتير
    يعني مش كل الزيارات للمدونين او المصريين او حتي العرب بس
    تحياتي ليك في غربتك

    ReplyDelete
  19. عزيزى احمد شقير
    بجانب القارىء الخفى هناك ايضا
    المدون الخفى
    كيف يحدث ان يكون هناك مدون خفى؟
    انة هذا المدون الذى يمتلك عنوان على الشبكة يملؤة بما لا يحمل مضمونا حقيقيا فقط اى شىء لزوم الوجاهة ويكون ضيفا دائما على المدونات يكتب اى كلام ويتبع نظرية انت تدون وانا اعلق واقول هايل يا كابتن
    فى راى انا هذا النوع اخطر من القارىء الخفى
    انة فيرس المدونات
    بس بجد انا اول مرة اعرف حكاية ان الاخ الكويتى قد استغاث بيك عموما
    انا اصطدت المدونة بتاعة الدكتور على تدوين ونشرت فيها شوية الكلام الفارغ دة واهو تسالى
    http://mrdoc6or.tadwen.net/
    -------------
    اخ شادى
    اخجلتم تواضعى

    ReplyDelete
  20. الغالى شوكير
    حلو قوى و فرحت أوى عشان حكاية المدونات الأنترناشيونال دى اللى مثلت فيها المدونين المصريين و و الله و عملوها الرجالة - يعنى مش الأهلى بس فى اليابان و لكن شووكير سان فى اليابان (سان يعنى السيد)
    بقولك ايه - موضوع سرقة المدونات لطّنى يا شوكير - تصدق فيه منتدى اسمه سودانيز اون لاين دوت أورج - مزه اسمها فتنه منزله البوست كله بأسمها و حاطه صورتها
    و بتعلق و ترد على كومنتس؟؟
    نفس البوست فى ايجى هوت دوت كوم - و جريدة نهضة مصر بتاعت جود نيوز
    كده مالباب للطاق بدون استئذان

    ReplyDelete
  21. :)
    ده الموضوع كبير بقي

    انا لحظتها لما كانت بتجيلي بعهد الايميلات ساعات من ناس مش مدونين يسأل عليا او يطمن
    ولا عايز شات و لا حاجة
    ولا تعارف

    حاجة كدة جميلة خفيفة
    :))

    تحياتي للقارئ الخفي اللي اتمني انه مش يفضل خفي علي طول

    ___
    انا شفت التعليق من الرجل الاسرائيلي
    و رجعت بعديها اشوف ايه رد فعل حضرتك
    او تعليقك عليه
    :))و ايه العمل بقي دلوقتي يا كبير البلوجراوية :))

    ReplyDelete
  22. بش مهندس شكير، Abdou Basha

    اخجلتموني بلطفكم:")
    جزاكم الله كل خير!

    ReplyDelete
  23. أيوة أنا من ساعة ما نزلت برنامج كدة بيشوف الزوار و مكانهم و أسماء مدوناتهم و انا عندي حالة من الذهول من العالم الصغير اللي عايشينه,,, الأفكار بقيت بتوصل أسرع من غمضة عين
    علي فكرة أنا كنت بزور مدونتك برضو,,, أصلها ذائعة الصيت و كانت لابد تحظي بالزيارات لأنها تستحق و ارفع راسنا بقي في مدونة المائة و اتنين و تسغون مدون

    ReplyDelete
  24. التواصل بالإميل له أيضا جماله يبو حميد, ممكن شوية بنتكلم براحتنا
    مش عايز حد يعرف اللي عايز أقوله
    جايز مراسة زي زمان
    مع تحياتي

    ReplyDelete
  25. الأخ الفاضل,حاولت التواصل معك عن طريق الإيميل و لكن لا أعرف المشكلة من عندي أو من عند ميين؟ المهم هل من الممكن كتابة إيميلك في بوست ؟ لأنه هناك بضة إستسفارات أريد أن أسألك عنها. و شكرا

    ReplyDelete
  26. shady
    تحياتي ليك ، هو أدهم يمكن حاد شوية في أراؤه ولايحاول حتى ان يُغلفها وقد وقعت معي في بعض المرات ولكني لاني اعرفه فلا يضايقني هذا منه ابداً

    Memo
    مها ، سعيد بمرورك وبمجونتك بصراحة اكثر من رائعة ، وسوف تظل السرقة دائما ولكن يجب من وقت لآخر أن ننوه عنها

    Mohamed A. Ghaffar
    فعلا لايمكن ان نخرجهم من حسابتنا بمعنى ان يكونوا معنا ونحن نكتب وضعهم في الغعتبار قد يدفعنا أكثر إلى الإجادةوكلما شعر المدون بأن هناك من يقرا له لإنعكس ذلك بصورة أكبر على دفعه للإجاده
    شكرا لتحياتك الجميلة

    ادم المصري
    لا شك ان عداد الزوار ومعرفة مناطقهم وكم مدة بقائهم في مدونتك يساهم بشكل كبير في معرفة وضع مدونتك بشكل كبير
    ولاشك انك سوف تكتشف امور مدهشة

    ahmEd_H
    انا لااطلب من كل قارئ ان يعلق انا فقط أطلب إذا اعجبه شيئ أو إستفزه شيئ أن يختزل نصف دقيقة لعرض رأيه
    بمناسبة موضوع الصور عملت بوست جديد أشرت فيه للموضوع

    tota
    ماتقولينه انتي أستشعرته حتى بعد كتابه هذا البوست بعدما وصلني إيميل يتكلم بنفس إعتقادك وهو ان الخجل وعدم التكيف مع المواجهة ومن يؤاثر السلامة أسباب تمنع كثيرين من التعليق

    Romantic Rose
    ههههههههه ، حلوة إيشحال احمد شقير دي
    أنا بس حبيت اكتب مالاحظته في صندوق البريد منذ فترة ليست بالقصيرة
    أما زعلك بصراحة فأنا ماقدرش عليه أما حكاية اني اكتشفه فانا بصراحة هاشوف حاجات كتيرة تستاهل الزعل مش حاجة واحدة
    بس عشمنا دايما في قلبك الكبير

    مـحـمـد مـفـيـد
    أشكرك جداً على كلامك الإيجابي على المجونة وأنا بصراحة اعتز براي مدون زيك في مدونتي

    Abdou Basha
    هو فعلا تقدر تسميه الصديق الخفي وده اللي حاولت اوضحه في البوست القارئ الخفي ده يعرف عنك كتير من كتاباتك وقدر يحدد شكل شخصيتك كويس واصبح صاحبك من غير ماتعرف وعشان كده ممكن مرة تفاجئ منه بإيميل عن حاجة تهمك او تخصك وتكتشف ساعتها معرفته الجيدة بيك

    كبير المتشردين
    صديقي العزيز فعلا سعيد بإطرائك واعتز انا الآخر بمدونتك وقد إقتبست منها فكرة السناب شوت للروابط الخارجية وحطيتها عندي وكله بيتعلم من كله

    Mo'men
    ههههههههه ، بأه إنت باه اللي نسخت البوست بتاع المصري اللي هو ووزعته بالبريد الإلكتروني لغاية مانتشر الإنتشار الكبير ده لفاية ماوصلني على إيميلي أنا كمان
    عموما اتفق معاك غذا كان البوست متميز وملهم وجيد فإنه يدفع الآخرين إلى التعليق ، كلام صحيح بس برده مش غالبية القراء اللي اكتشفوا ده
    فعلا لاحظت انك قارئ اكثر منك مدون وهذه فعلا متعة بالرغم من إن تعليقاتك محدودة جدا يمكن لان مش سهل إنك تلاقي تدوينة جيدة بدرجة كافية تدفعك لذلك
    من اشهر المعلقين بدون مدونات
    رومانتيك روز و مؤمن بالعربي اعتقد انه غيرك

    smraa alnil
    ماذكرتيه بالفعل ياياسمين هو ماكنت ان اريد ان القي عليه الضوء في البوست ولكن المصادفة معك واضحة جدا ولاتحتاج الى أي شرح
    هذا هو القارئ الخفي الذي اعنيه

    القارىء الخفي
    هاهاهاها
    عندما يعجبك بوست معين تجد عشرون آخرون قد علقوا وقالوا هايل وهذا يدفعك الى التزام الصمت أتفق معك ، ولكن لايعجبك شيئ ترفض التعليق لان الآخرين قد يهاجموك فبصراحة لا أتفق معك فانا والىخرون نلتفت اكثر لمن يخالفونا الرأي مادامت لهم وجهة نظر قيمة يعبرون عنها ولايهمك هجوم الآخرين مادمت مقتنعا بوجهة نظرك جرب وشوف
    حلوة تشبيه بريد الاهرام دي
    لان طول عمري كنت من متابعيه ومرة واحدة بعت له والغريبة إني وجدته منشورا بعد يومين

    ياسمين
    أكيد بالشك ان هذا النوع من التعليقات التي تأتي من اناس لاتعرفيهم تدفعك على الإجادة والإهتمام بالكتابة
    اما تدوينتك اللي علقت عليها فبصراحة اكثر من رائعة

    Anonymous
    مرحب بيك جميل اوي إن يظهر مثال واضح لما أقصدة ، سيدي اشكرك كثيراً واشكر متابعتك واهتم كثيرا بك
    بس جميل انك الصبح بتابع مدونة حكاوي آخر الليل ومدونة ابو الليل

    انا الذي يمشي في الظلال
    لا احد يقول أي تعليق والسلام بالعكس يجب ان يكون التعليق يحمل وجهة نظر ورؤية وإضافة الى التدوينة ولا فلا
    اما النسبة فأعتقد إنها كبيرة اوي اللي ذكرتها يمكن واحد كل تمانين
    وعايزينك باه تمشي فى النور بلاش الظلال دي

    zordeak
    انا اللي ليا الشرف انك تكوني من زوار مدونتي ، بس للأسف مش عارف ازور مدونتك لان صفحة البروقايل بتاعتك اللي فيها عنوان مدونتك للاسف محجوبة هنا مش عارف ليه ، كل البروفايلز اللي موجودة على البيتا بلوجر محجوبة


    Anonymous
    منه وهبي ، والله انا سعيد جداً غن التدوينة دي إستفزتك انك تعلقي معنى كده إنها فعلا كانت صادقة وقدرت تعبر عنك لاني كنت كاتبها ليكي
    شكرا ليكي على متابعتك واتمنى اشوفك دايما بتعليقاتك وبعد كده مدونة ليكي
    تحياتي

    daktara
    اكيد طبعا عداد الدول بيبين حاجات كتير الواحد ماكانش عارفها جايز معظمهم دخل غلط بالصدفة وخرج لكن فيه هناك برده من يكرر الدخول مرات اخرى بعدما وجد شيئا معينا يجذبه اليه

    adhm
    طبعا انا ماكنتش فاهم ايه اصل الموضوع وخصوصا لما عرفت بيه ماكنش فيه تفاصيل ولما دخلت مدونتك لقيتها عادية لغاية ماشبكت من كام يوم في مدونة الدكتور اللي حضرتك إقتبستها لنفسك وشفت فيها الحوارات الثلاثية بينك وبين المدون السعودي وصديقي خالد المدون الكويتي ، هنا قدرت افهم ابعاد الموضوع بشكل ماكنتش فاهمه قبل كده

    تمر حنة
    اول حد ياخد باله من موضوع المودنة العالمية دي ويعلق عليها ، ههههههه يعني مش الاهلي لوحده اللي في اليابان
    أما سرقة التدوينات فبصراحة دي شيئ لازم منه في مدونتك واللي يفكر يسرق ومايخدش من مدونتك يبقى ماعندوش نظر فكل بوستتاتك تصلح للسرقة والغنتشار الفظيع
    حقيقة سرقة التدوينات في المنتديات شائعة جدا وخدي كام كلمة من كثير من بوستاتي واعملي بحث هتلاقيهم مرطرطين في المنتديات إعملي زي واكتبي تحديث في نهاية التدوينة انك اكتشفتيها منشورة بدون إذن فب المنتديات الفلانية وإذكريهم وبعدين انا ماعرفش اي تدوينات بالظبط اللي اتاخدت انتي ماقلتليش ومالكيش ايميل كمان ، وموقع سودانيز ده سرق مني تدوينتين قبل كده بدون ذكر أي إشارة ليا إني صاحب التدوينات
    بالمناسبة تدوينة العمارة تحفة تحفة

    Epitaph
    لأ فعلا الموضوع مهم ومنتشر كمان
    وانا معاكي باوجه تحيات واتمنى زي مابتقولي انه مايفضلش خفي على طول
    أما العمل باه في موضوع التعليق ، فليس لنا حل إلا الإنتظار قليلا ليقضي الله امرا كان مفعولا

    khalid jarrar
    لاخجل ياخالد فانت تستحق الكثير من الإشادة ولتقدير فأنت صديق من فترة طويلة اعتز بك مثلما يعتز بك مدونون مصريون اخرون غيري كثيرين

    ALiaa
    ربنا يستر ياعلية في موضوع المدونة العالمية دي واللي عنده فكرة موضوع مناسب ياريت يقولي عليها ومرحب بيكي
    وباعتذر ماعرفتش ازور مدونتك لاني البروفايل اللي فيه اسم مدونتك محجوب كما الحال في جميع البروفايلز الخاصة ببلوجر بيتا

    حائر في دنيا الله
    لم اقصد من التدوينة ان الغي الايميل او اقلل من اهميته بالنسبة للتعليقات ولكن حبيت بس اشير الى ان الإيميل هو مادعاني لإكتشاف هذا القارئ الخفي
    ممالاشك فيه ان الإيمل عالم لوحده يختلف كثيرا عن التعليقات واعتقد ان الامثلة التي ذكرتها بالبوست توضح ذلك

    يعقوب
    يسعدني التواصل وايميلي سهل جدا
    ocianacafe@yahoo.com
    وربنا يستر علينامن الإسبام بعد نشر الميل بتلك الطريقة

    تحياتي لك وللجميع

    ReplyDelete
  27. العزيز أحمد شقير
    كنت قادرا ان تكتب اسمي و مدونتي ايضاً
    والموضوع الذي وضعته
    ولعلك اخي الكريم لم تذكر الوقت بين الموضوع و و الحادثه

    تخيلوا معي ايها الاخوة
    عندما يقرئ مدونتكم او تعليقكم شخص غير مصري و يقول
    انا اول مره اشوف مصري بيتكلم صح

    لكم التعليق

    اما موضوعي عن السياحه في مصر
    فاتداوله المصرييون قبل اي سائح اخر
    مع اني اعتبر نفسي لست سائحاً
    و الاخ احمد شقير يعلم ذلك جيداً جيداَ جيداَ

    صح يا احمد باشا و لا انا غلطان
    اما بالنسبة للسفيه أدهم
    فاهو من السفاله ان ينسب نفسه الى مصر كلها
    كما ذكرت او ان يحتوي اسم مصر الكبير و تاريخها و شعبها الى شخصه و اسمه
    فكما كان اسلوبه الوسخ في الرد على احد مدوناتي

    اقوله له يا عم الحمير كلهم

    ReplyDelete


  28. مش عارة ليه كان بتهيألي اني علقت عندك في الموضوع ده ,, شكلي قرأته ونسيت اعلق ههههههه

    لأ بجد مش هزار ,, انا عايزة اقول ان احد اسباب اهتمام المدونين بالتعليقات "حتى ولو على سبيل العدد وليس الكيف" هو الاحساس بأن الكلام الي كتبوه وصل ,, يعني مثلا كان عندي تدوينة من اسبوع محدش علّق عليها خالص ,, وده اداني ايحاء ان الموضوع مش عاجب ,, وبالتالي يمكن ابطل اكتب في الاتجاه ده بعد كدة ,, فهمت ازاي ,, تلقائيا الواحد بيهتم بالتعليقات

    بس عايزة اشكرك يا عم شقير على اضافة مدونتي في القائمة بتاعتك ,, بجد انبسطت جدا ,,

    وتاني حاجة انا زرت البتاعة دي 192 بلد وتخيل ما لقيتش فلسطين في اللايحة ,, بعتلهم انه يا جماعة نحن هنا ,, بس محدش رد عليا لحد دلوقتي

    وكمان حاجة ,, يعني بعتذر ان تعليقي اجى بعد الاخ enter-q8
    ربنا يهدي الجميع

    تحياتي

    ReplyDelete
  29. أعترف إني من القراء الخفيين
    مشكلتي إني بسوف و أجل و كل مرة أقرأ ليك حاجة أقرر أعلق و غالبا بتشغل و يعدي الوقت و أنسى
    أو )وهو الغالب( أني بستمتع بالقراءة لكن عقلي لا يسعفني بما يناسب مستوى الموضوع و ستكون إضافتي لا لزوم لها فأصمت
    لكني اتابع جميع تدويناتك و اتمنى أن أجد يوما ما ما يعتبر إضافة وليس مجرد كلام فض مجالس :)
    و شكرا لتناولك موضوع فلة في التدوينة التالية

    ReplyDelete
  30. تحياتي استاذ احمد
    هل يفترض بمن يقرأ شيئا اعجبه ان يعلق او يبدي اعجابه؟
    ممكن من باب رد الجميل لصاحب المدونة لانه امتع وافاد
    لكن التعليق ليس مطلوبا دائما..
    بالنسبة للمدونات افيدك اني زائر يومي لكثير من المدونات المصرية..
    واول مدونة عرفتها هي حوليات صاحب الاشجار منذ ثلاث سنوات ومنذ ذلك الحين وانا ازورها باستمرار هي والمدونات الاخرى..
    ومنذ ستة اشهر تقريبا اكتشفت مدونة ربيع ثم هدوء نسبي ثم محمد علاء الدين..
    وبالامس اكتشفت مدونتك عن طريق رابط في مدونة ربيع..
    اذا اعجبتني المدونة افتح جميع موضوعاتها ولو كتبت منذ اعوام في tabs جديدة ثم اقرأها كلها في اسبوع او اكثر..
    محدثك ( صلاح عبد الصبور ) اسمي في الانترنت سعودي من المدينة المنورة..

    ReplyDelete