Wednesday, May 09, 2007

متفرقات عن الكتابة


متفرقات عن الكتابة

حوارات زوجية



في بدايات زواجي لاحظت زوجتي اهتمامي بشراء الكتب ، والتي كانت معظمها قصص قصيرة

حاولت مشاركتي هواياتي فأعطيتها كتاب اشتريته حديثا لتقرأه أثناء وقت الفراغ في عملها أنذاك الذي كان فيه وقت فراغ كبير ، وعندما عادت عصراً

وجدتها تصرخ في قائلة : إيه الهباب اللي اديتهوني ده ؟

كان الكتاب بعنوان المعابر لكاتب إسمه أمين ريان
قلتلها : ماله الكتاب ماهو زي الفل أهه ، إنتي قرتيه ؟

قالت : قريت إيه ياشيخ .. أنا قريت خمس سطور على إني افهم حاجة مش فاهمة وإديته للي معايا على إن حد يفهم حاجة مافيش ، إنت بأه فهمني بتقرأ الكلام ده إزاي

قلتلها : الثقافة كده محتاجة مجهود وتشغيل مخ عشان توصلي لمغزي الكاتب

قالت : طب والنبي خده كده وإقرأ فيه ولو فهمت حاجة من السطور الأولانية ..فهمني يامثقف

مسكت الكتاب وقرأت فيه وأطلت عسى أن أصل لشيئاً

وجدت كتابات تشبه كلام من النوع ده


لم تعد الأرض تنبت خرزاً أحمرً وكيف ذلك إذا كانت المعابر يطوف عليها خيال الظل وتتلألأ تحت ظلام الشمس المهيب خيالات الشمندورة


قلتلها : مين ده ؟


وأثناء الغداء وبعد نهاية الحدوتة قطعت الصمت بتساؤل برئ هو ياأحمد يعني إيه معابر ؟

أصحاب هذه الكتابات علق عليها سابقاً بعض المدونين منهم إياكش تولع في تدوينة
تقوقز القوقاز وأبو الليل في تدوينة تشتهينا المسافة ، وتحليل ربيع على رواية اليوم الثاني والعشرون أو إيجاد الزمن المستعار
-------------------------------

أحسن تدوينة



فيه مسابقة معمولة على البلوج سبوت عن أحسن تدوينة خلال الشهر في فروع مختلفة ، غداً آخر يوم للتصويت لمزيد من التفاصيل تابعوا مدونة أفضل موضوع

------------------------------

الفيس بووك

Ahmed Shokeir's Facebook profile


الفيس بووك موقع جديد للتعارف وتبادل التعليقات والمعلومات وعرض الصور والكليبات والكتابة على سبورة الأصدقاء والإلتقاء بأشخاص جدد والتعرف على أصدقاء فقدتهم ورفع تدويناتك وإرسال رسائل لهم وتحديد ماذا تقعل حاليا ، الموقع ينتشر بسرعة كبيرة بين متصفحي النت وبالطبع إنعكس الموضوع على المدونين ، كثير منهم على الفيس بووك وتستطيع أن تجدهم بسهولة وتتعرف عليهم بصورة أكبر وتقترب منهم بشكل أسرع

عندما تشترك بالفيس بووك سوف يقوم نيابة عنك في البداية بالبحث عن أصدقائك الموجودين في قائمة الميل ويخبرك بهم

-------------------------------------

للسر ثمن وللثمن طريق والطريق وعر




بيقولوا الكتاب بيبان من عنوانه وأحيانا من غلافه ، لفت نظري بشدة غلاف كتاب للإعلامية سحر الموجي المذيعة بالبرنامج الاوربي والأستاذة بكلية الآداب جامعة القاهرة ، د. سحر الموجي خريجة كلية الآداب قسم اللغة الإنجليزية ، والحاصلة على ماجستير في الشعر الإنجليزي والدكتوراه في الشعر الامريكي
الرواية بعنوان نون ، وغلاف الرواية يبهرك بمايحتويه من صراع شخصيات معاصرة بين عالم الداخل والخارج
سحر صدرت لها ثلاث مجموعات قصصية سابقة هي سيدة المنام ، دراية ، آلهة صغيرة
ستطرح الرواية في منتصف هذا الشهر ، نتمنى أن نجد نقداً لها على المدونات عقب صدورها لنكتشف فعلا هلى الكتاب بيبان من غلافه

--------------------------------------

14 comments:

  1. mahrgan el qera2a lel gamee3 :D

    Books gona evolve and revolve..and will remain between our hands..!!

    :)


    or may be...-like nowadays- electronically read


    this post is not only about WRITING..but READING...in my opinion

    :)

    ReplyDelete
  2. بيبقي فيه فعلا كتب

    تجيب الضغط

    هو تقريبا المؤلف قالك اعك

    ويقولو فن سريالي

    زي اللوحة السودا اللي فيها

    نقطة حمرا

    حلوة دعوة الفيس بوك دي

    تحياتي

    ReplyDelete
  3. الفيس بوك دا طلع مصيبة
    حاسة اني بأيت مكشوفة اوي
    اخويا بأى عارف كل اصحابي و عرفتهم ازاي و مودي عامل ايه و علاقتي بيهم ازاي و اهتماماتي كل دا عشان ضيفته عندي على الفيس بوك دا غير كمان انه عارف اصحابي مصاحبين مين و بيحبو ايه و ممكن كمان يقولي احنا اخر مرة شوفنا بعض كانت امتى و فين و ليه مش اخويا بس كل الناس اللي ضايفاهم على الفيس بوك دا غير ان ممكن حد ميعرفنيش و يشوفني عند حد صاحبه يكتش ان احنا كنا اصحاب و لفة ما يعلم بيها الا ربنا
    هو طلع مصيبة و خلاص
    و بأى مفيش اسرار
    يعني بأينا مكشوفين على الاخر

    انت كاتب عنه سطرين عامل زي ما يكون بتعمل اعلان انا بأى حبيت اخلي الناس تشوف الجانب المظلم من الفيس بوك

    على فكرة بوست حلو

    ReplyDelete
  4. بوست و انت بتقراه من غير ما تعرف انه بتاع احمد شقير هو بيقول انا بتاع احمد شقير .. بحب قوي "نفسك" ف بوستاتك يا باشمهندس .. بس خليك بالجو كده و كتر البوستات و رد دايما علي الكومنتات .. بقينا فين و فين كل ما بنلاقي بوست .. ما بيهونش عليا الغياب ده بين البوست و البوست الا "بوست اوف ذا داي" .. بحب الباب ده قوي .. المهم م الاخر .. كتر البوستات شوية .. ماشي ؟

    ReplyDelete
  5. يعني إيه المعابر ؟؟؟؟وإيه علاقتها بالشمندوره ..ههههههههههههه.. معقوله دي ثقافه يا أستاذ شقير ... دي طلاسم ... معها حق زوجتك

    سلامي ليك

    ReplyDelete
  6. ياااااااااااااااه
    وحشتني جدا
    عندك بلاقي المفيد زي ما بيقولوا
    بقالي كتيير جدا و انا مش لاقيه وقت اتصفح المدونات

    طبعا محدش سأل عني
    مش مشكله

    المهم يعني

    كان عندي حق لما شبهت مدونتك يا احمد بالجريده اليوميه
    بالنسبه لي

    قريت القصه القصيره الجديده " البنك"
    عجبتني.
    بس انت كتبت اجمل منها قبل كده

    حلو قوي حكاية الكتاب اللي اديته لمراتك ده
    ضحكتني مووت
    في كتاب عندي كده و كل ما اقرا منه لجوزي يقول لي
    انجليزي ده يا مرسي؟
    :)

    تحياتي

    ReplyDelete
  7. هذا الكاتب من نوعيه المتثاقفين والمتأدبين وذكرنى بقصيده لأحمد عبد المعطى حجازى قال فيها
    أخضرت الأشجار
    واحمرت الأزهار فوق خضره الأسوار
    واتانا ريح من الصحراء حار
    وكشفت البنت عن زراعيها
    فبصت العيون وارتعت الجفون ثم توارت فى انكسار
    واتضح فى النهايه انه كان يقصد الربيع

    الكتاب بيبان من عنوانه وغلافه حتماً فهو ملخص لفكر الكاتب او المفترض ان يكون كذلك

    ReplyDelete
  8. حوار الازواج لايكفي بوست ولكنه يكفي مجلدات
    ما من كتاب تقرأه زوجتي ويدور بيننا مادار بينك وبين زوجتك
    :)

    ReplyDelete
  9. أنا كمان في كثير كتب قريتها و مش فاهمة منها حاجة

    ReplyDelete
  10. :D
    كلامك عن الطلاسم ده جه في وقته و الله
    بقالي مدة بعافر في كتاب ..في محاولات مستميتة اني افهم ..و كل يوم اقول يمكن لما اقرا اكتر افهم .. يمكن لما اكبر ..يمكن لو قريت بالشقلوب
    :P

    الله ينوّر علينا و عليك

    ReplyDelete
  11. و الله يا استاذ أحمد..بصراحه فيه كتب لما الواحد بيمسكها بيحس ان المؤلف بيكتب بالشفره لواحد صاحبه احنا منعرفوش
    بخصوص مدونه أفضل موضوع فالفكره جامده و شكرا ان حضرتك نوهت ليها في مدونتك
    تحياتي لك

    ReplyDelete
  12. لاهو إنت ماقريتش النقد المتفذلك بتاعي؟
    روح يا عم هنا و متع بصرك
    http://spring456.blogspot.com/2007/04/blog-post_29.html

    ReplyDelete
  13. تصدق بالله انت رحيتنى الهى يريح قلبك

    كنت كل ما اقرى حاجه زى كده احس بجهل ابن لذينا و انى مافهمش حاجه

    انا عندى فعلا اكونت عالفيس بوك من زمان بس و لا باعبره مركزه فى البلوج اليوميم دول

    ReplyDelete
  14. انا دخلت على الفيس بوك من خلاص الكلية واصحابى وكدة ولاقيت بالصدفة فى هناك جروب للبلوجرز

    بس جميل اوى الفيس بوك على فكرة

    عالم كبييييييير والجروبات فيه جميلة اوىىىى

    بس فعلا عيبه انك بتبقى مكشوف خالص

    يلا ربنا يستر

    سلام عليكم

    ReplyDelete