Thursday, May 22, 2008

فكاهيات ... إتحاد المدونين المصريين



في جولة على بعض التدوينات الحديثة وصلت لتدوينة للمدون المصري محمد جرامون كتبها في 17 أيار بعنوان حقوق وواجبات المدونين ، توقعت أنها وجهة نظر شخصية تشيد أو تنتقد تقاليد تدوينية جرى عليها العرف ، ولكن كانت بداية التدوينة كالآتي

تعقيبا على طرح موضوع قانون المدونات على الرأي العام و رغبة في التفاعل مع هذا الموضوع الهام.. كان لي تواصل مع سعادة / رئيس إتحاد المدونين المصريين الأستاذ / حسن توفيق بهذا الشأن و كتبت ورقة عمل تتضمن حقوق و واجبات المدون وفقا للتشريعات
القائمة


يعني إيه ده بالظبط ... إيه إتحاد المدونين المصريين ده ؟ ومين بأه الاستاذ حسن توفيق ومين اللي خلاه رئيس ؟



المهم دخلت على إتحاد المدونين المصريين الذي يتم الإعلان عنه في غفلة من الزمن لقيت الموضوع كبير وله لجان وقوانين وميثاق شرف وحاجات تخض شبه الحاجات بتاعت الحزب الوطني زي لجنة التطوير ولجنة الإعلام وإجتماع الهيئة الإدارية واللائحة التنظيمية ، وقائمة بريدية بعشرات من أسماء وهمية لمدونين
طبعا الإتحاد ده هايشرفنا في اللقاءات الصحفية والتليفزيونية متحدثا بإسم جموع المدونين المصريين ، وشوية وينتقد تصرفات المدون فلان ويشجب تدوينة المدون علان ويوقف عضوية زيد ويعلق عضوية عبيد ويصبح فلان نطاط الحيط ، ياجماعة عايزين تعملوا إتحاد ولا جروب على الفيس بوك ولا حتى جمعية إستهلاكية إنتوا أحرار ، لكن أن تتحدثوا بإسم المدونين المصريين لا إنتوا ولاغيركوا تملكوا هذا الحق ... وأعتقد ان صمت جموع المدونين ناتج عن عدم معرفة بما يتم إعداده ولكن بعد الآن لن أعتقد ... لن أتحدث بإسم المدونين ولكني أكاد أرى بعض ردود الفعل عند أسماء بعينها ... ولا أحسبها تمر لديهم

وأخيراً وحيث أن المدونة لاتشتهر بالبذاءات فليس لدي تعليق إلا كلمة واحدة من ثلاث حروف أولها زي أخرها والحرف الأوسط حاء ، إشتهر بها مدوننا المصري أبو الليل .. عروستي !! ؟؟

ملحوظة : كلمة بلوجر بالإنجليزية مكتوبة غلط في البانر

**************************
تحديث : بجانب التعليقات .. روابط تفاعلت مع القضية

القهوة العالية - بلوستون : أحيييييه ياسوسو أحيييييه
ها أنا ذا - أريما : إتحاد المدونين
غواية - عباس العبد : حناكة المحتاجة
جلوبال فويسس أونلاين : إنشاء إتحاد المدونين المصريين
فاتيما - روح قلب ماما : خاااااالص
وجهة نظري - هذه وجهة نظري ببساطة : مدونتي وانا حر فيها

*****************************

إستطعت الوصول لمدونة الأستاذ حسن توفيق وتدوينات متميزة في

وكمان موقع الإتحاد على البلوجر وفيه تعليق من مدون كيوت بيستفسر إنه سجل في موقع مكتوب وجاتله رسالة تاني إنه يسجل على بلوجر وبيسأل هو لازم يسجل مرتين ، وكان الرد حكومي شوية ... للأسف إنت طلبت الانضمام ولكن البيانات ناقصه وهناك إستمارة عضوية نتمنى أن تكتب بها البيانات

50 comments:

  1. الموضوع غريب بجد... وبجد غالبا نكته، لأنها لو فزوره كانت إتحلت

    حانعيش ونموت شيوعيين هههه .... منقدرش نعيش من غير لجان منبثقه وإتحادات

    خبرات إيه إلي عايزين يتبادلوها؟؟ والا تطوير العمليه التدوينيه... أهي دي بقي جديده لانج...يعني حانكتب من اليمين للشمال مثلا؟؟

    المفروض إن "العمليه التدوينيه" زي ما بيقولوا دي عمليه عشوائيه حره تماما لا تخضع لأي قواعد او قوانين أو حتي أديان .... كل واحد يدب إلي هو عايزه بالشكل إلي هو عايزه في الوقت إلي هو عايزه

    لازم الكلام ده يتوقف تماما لأنهم بعد كده زي ما حضرتك قلت حيتكلموا بإسمنا وحيقرروا بالنيابه عننا، وإلي مش حيشترك معاهم مش بعيد يبقي خارج عن القانون

    بيفكروني بميثاق الشرف الإعلامي

    ReplyDelete
  2. معلش أزود علي تعليقي السابق لأني ماكنتش قريت مدونة محمد جرامون

    هو بيتكلم عن حقوق وواجبات المدونين وفقا للتشريعات والقوانين المصريه، طيب المدون المصري المقيم في بلد تانيه إيه علاقته بالدستور المصري؟

    طيب لو مواطن سعودي بيكتب عن مصر، إيه إلي يلزمه بالدستور والقوانين المصريه؟

    ReplyDelete
  3. اول مرة اسمع فيها عن حاجة زي كدة
    بس فعلا كوميديا بجد

    ReplyDelete
  4. ههههههههههههه
    ضحكت قوي على كلمة لقائة مع السيد رئيس الفريق القومي ولا الاتحاد دي
    مين دول ؟؟
    بجد فكاهه
    كده برضه مخليها مفاجأة انك هتييجي ان شا ءالله ومش اي مجية طيب مستنيه اشوف حضرتك بكره فيها لماضة للصبح
    :D

    ReplyDelete
  5. انا اول مرة يجيني الخبر ده
    ولما يعملوا الأتحاد ده مش لازم يبلغونا ولا احنا آخر من يعلم

    ولازم نرشح وننتخب هما فاكرينها سبهللة ده احنا اللي بننادي بالديموقراطية يقوموا ياكلوها علينا

    ReplyDelete
  6. ههههههههههههههههه

    اهو ده بقا الاستعباط بجد

    ReplyDelete
  7. بالنسبه لى التجاهل كفيل بقتله

    فأبداً سيظل المدون مدون والقافز على الرقاب والنجاحات كذلك ولن يستطيع احد كائن من كان انتزاع خصوصيتى التدوينية منى

    عاوزين يعملوا اتحاد يعملوا عاوزين يسيسوا العمليه يسيسوا عاوزين يستضيفوهم فى كل حته باسم المدونين يستضيفوا وكل من يريد ان يشارك فى مواكب الطبل الزمر فاليتفضل

    انما لن يستطيع كل ذلك طمس الحقيقة وستظل انت وانا واشقائنا فى التدوين وكل القارئين لنا يعلمون الحقيقه كما هى على ارض الواقع وستظل كذلك هذه الحقيقة متوفرة فى كل وقت لمن اراد ان يبحث عنها ما دمنا على مواقفنا

    اما

    ReplyDelete
  8. اسمه ايه ده

    اصلا المدوانات مينفعش يتعملها حاجة كده لسبب انها فى الاصل حاجة شخصيه
    ومعموله لكل فرد يكون ليه حاجة خاصه بيها
    مش من حق حد انه يفرض شكل عام للمدونيننن يعملو ايه وميعملوش ويتكلمو فى ايه مش خير ولا ايييييييييييييه؟

    العالم دى فاهمه التكنالوجيا غلط انا مش عارفه فى ايه بالظبط بحس ان وضع المدونات فى مصر غير وضعها فى بقيت العالم
    عجبى

    ReplyDelete
  9. ننننخخخخ
    ننننخخخخخخخخخخخخخخخخخخخخخخ
    ننننننننننننخخخخخخخخخخخخخخخخخخخخخخخخخخخخخخ

    ----- فاصل --------
    أشكرك يا أحمد علي طرح الموضوع. تفتكر لازم نبتدي من أول السطر ونعرّف ما هي المدونة؟

    ReplyDelete
  10. شكرا على الموضوع الجميل ده
    خفيف، وغريب
    انا فاكر برضو مرة قريت عن اتجاد مدوني وسط الدلتا او غرب الدلتا .. حاجة كده

    ReplyDelete
  11. اسمه إيه ده بقى
    عايزين نحطله اسم غير الفكاهة
    ده مثلا اسمه فلول الاتحاد الاشتراكي

    اقولك :لابد من تضامن قوى المدونين المناضلة لدحض هذه المحاولة للقفز على منجزات الشعب التدويني الوحدوي وموروثات الحضارة التدوينية

    ReplyDelete
  12. هو ايه الهم و وجع القلب ده
    العالم ديه هابله و لا ايه؟؟؟
    تعالوا نجمع من كل رجل كبيييييييييييييييييييلاااااااااااااه و نحدفهم بالفيروسات
    كنا عايزنك تبقي معانا امبارح :)

    ReplyDelete
  13. ده الكلام ده من زمان قوي يا راجل يا طيب!

    وفضلوا يهيبوا بالمدونين المصريين انهم ينضموا وانهم يصوتوا..استاذ حسن توفيق على فكرة منتخب :D

    وطبعا مراسلاتهم بتوصل لمن يهمه ومن لا يهمه الأمر..وحكاية ملهاش أول من آخر يعني..

    وعلى فكرة بالنسبة للبانر اللي مكتوب عليه بلوجر غلط..فده إثبات جامد لمصريتهم ههههههههه

    اللي عايز يعمل أي حاجة يعملها..هي عليها جمرك؟..ولو استضيفوا باعتبارهم قادة التدوين في الأمة المصرية فده مش مشكلة كبيرة، يستضافوا كما استضيف الذين من قبلهم، ما في ناس تانية اتعملوا آباء روحيين برضو..كله اعلام وبطيخ ياعم..

    ReplyDelete
  14. ايه يا استاذ احمد
    ايوه طبعاً اتحاد
    وفي اشتراك وبيتم الكشف علي المدونين الاول وبعدها يبعتلهم بطاقه التأمين الصحي بتاعتهم
    وبعد عمر طويل يصرفوا معاشات لما المدونه تقفل

    وكمان كارنيهات تتعلق علي الصدر مكتوب عليها اسمك واسم المدونه واللينك
    والبانر علي ظهر الكارنيه
    معلش
    اصلك مش في مصر
    والله العظيم انا ميت من الضحك
    انت كده بقي ساقط لينك
    اسف ساقط قيد
    والله عالم فاضيه

    ReplyDelete
  15. الله يمسيك بالخير يا ابو الليل

    والله الراجل دة قالها حكمة جامدة

    بس دة لا مؤاخذة استهبال بجد
    يعني ايه اتحاد مدونين مصريين

    ومين اللي عينهم ومين اللي وافق ومين البني ادم المذكور دة

    مين اللي ادالهم الحق يتكلموا باسمي او باسمنا كلنا

    طب كويس
    وهيبقي لينا نقابة بقي ولا ايه

    يعني نقابة المهن التدوينية

    حسبي الله ونعم الوكيل في الناس الفاضية دي

    ReplyDelete
  16. عروستي


    بص ياعم مش عايزك تعمل في الراجل ده خدمة وتعمل له دعاية

    لكن بالرغم من كده الفكرة جميلة

    اننا نكون جبهة واحده

    وكده يعني هتكون جميلة قوي

    ReplyDelete
  17. السلام عليكم ورحمة الله وبركاته

    سمعت قبل كده عن الموضوع ده
    كان الاستاذ حسن توفيق دخل عندي وساب تعليق كاعلان عن الاتحاد بصراحه رحت هناك مره واحده بس ما قريتش باستفاضه ولا عرفت ان الحكايه كده
    وسبت تعليق مجامله كده وخلاص ونسيت الموضوع علي اساس انها حاجه مش مهمه

    انما ان تكون الحكاية كده فبصراحه يعني حاجه تهلك من الضحك

    سلام

    ReplyDelete
  18. ابحث عن الشهرة! وتحدث باسم الاخرين وانت استفزيت منه وشهرته اكتر!!
    ممكن تحصل نتيجه عكسيه.. وممكن تلاقي ناس راحت تبارك برضه وتسجل اسمها يمكن الاتحاد يطلع لهم معاش ولا حاجه
    :))
    فكرت اخد لينك من البوست ده عندي ياعتباره سوبر بوست بس مش ها اخد
    :( عشان ما اشهرهمش اكتر
    علي رأي محمد عبد الغفار الاهمال كفيل بقتلهم
    اشكرك
    تحياتي

    ReplyDelete
  19. معلش يا استاذ احمد انا ليا كام استفتسار وتعليق كده عشان هتخنق بجد

    الناس دي عبيطة ولا بتستعبط ؟!؟!؟!؟

    رئيس اتحاد المدونين المصرييين.؟؟؟؟؟ نعم !!!!ازاي يعني

    هم مين الناس دي .. ومين اداهم الحق يتكلموا باسم اي مدونين من الاصل
    اذا كنا مانعرفش عدد المدونين المصريين كام اصلا يقولك اتحاد مدونين ..

    هو اي هبل وخلاص ؟؟

    ازاي بمنتهى البجاحة يكتبوا
    المدونين المصريين

    الالف واللام لمن لا يعرف جامعة
    اي تعني او تشير لجميع المدونين المصريين

    يعني بسلامتهم اللي متصورين في قاعة في احد الفنادق وقاعدين على احد المقاهي في القاهرة يقدروا يؤكدوا انهم يتحدثون باسم جميع المدونين المصريين .؟؟؟؟

    هي الناس هتفهم امتى ان التدوين ده زي الايميل ..ماشوفناش ليه اتحاد مستخدمي الهوتميل في مصر ..

    ده ايه الغلاسة دي ؟؟

    ممكن يسموا نفسهم اي حاجة ويبقوا براحتهم
    اتحاد مدونين مصريين
    (وده لغويا لا يشمل كل المدونين ولكن اتحاد مفتوح يعملوا فيه اللي هم عايزينه)
    وساعتها يحطوا اخلاقيات وقواعد وقوانين التدوين واي هبل ان شالله يعملوا عقوبة بالسجن على المدون المخالف للقوانين

    بس تبقى على نفسهم .. مش علينا

    وبعدين مين بقى اللي بيمولهم ؟؟
    ده سؤال

    وفي النهاية اقول قولي هذا واتكل على الله

    NOT IN MY BLOODY NAME

    محدش بيتكلم عني ولا باسمي
    وانا مصرية وعندي مدونة ضمن شوية حاجات تانية بعملها في الحياة واضح انها بقت مش مهمة قد التدوين !!

    تحياتي يا استاذي العزيز
    واعذرني على الانفعال

    ReplyDelete
  20. يعني لينا كارنيه؟

    ReplyDelete
  21. هههههههههههه

    الله يحظك يا محمد يا مفيد

    طيب انا عاوز اعرف الكشف بتاعى امتى

    فى انتظار تشريفك لمدونتى

    تحياتى

    ReplyDelete
  22. كبر دماغك

    ReplyDelete
  23. طب جمال الدولى ..كان بيدون على الحيطة
    وبما ان الحيطة دى ملك الحكومة
    ومن مبدأ دى مش حيطتك لوحدك ..دى حيطتنا كلنا
    قاموا بمشاركته فى تدوينه ..بطلاء تدويناته

    انما انا بادون فى صفحتى الاليكترونية خااااصتى
    طب يا ترى حياخدوا رأيى فى لون الطلاء!!!!!!!!!!!!!!!!!؟؟

    خاااااصتى يا قوم
    خاااااصتى يا هووووو

    ReplyDelete
  24. جمال الدولي؟
    هههههههه
    تبقي أكيد أكيد اسكندرانية :D

    ReplyDelete
  25. حسن توفيق ده منشق عن الاتحاد الحقيقي اللي هو انا رئيسه
    الشرعية معايا
    مفيش اتحاد
    انا الاتحاد :)

    =========
    من ساعة ما شفت البانر بتاعهم و الجملة اللي بتتكتب دي
    من اجل مصر
    و انا عمال ادمع ... من الضحك

    ReplyDelete
  26. لا لا انا لما ماريان قالت لي مكنتش مستوعبة بس لمااستوعبت اغمن عليا حضرتك
    ايه ده ايه ده؟؟
    يا لهوي يا لهوي يا خراشي
    اتحاد ايه بس هي دي مهنة؟؟ و مين حسن توفيق ده
    اسمه شكله مش غريب عليا
    يا خوفي يكون اللي في بالي
    بس بجد ايه الفكرة الهزلية دي و ايه الهبل ده

    احنا لازم بجد نقف لهم و نمنعهم يا اما حتبقى مصيبة و حلت علينا

    تحياتي

    ReplyDelete
  27. لا و لقاات و صور و تصريحات
    يا لهوي قمة المسخرة

    ReplyDelete
  28. ايه الهبل ده
    دى ناس بتفرض نفسها على مين وهما مين اصلا؟؟؟
    اتحاد ايه وزفت وهبل ايه

    والله انا حاسس اننا هنسمع بكره ان الاتحاد ده لجنة من جمعية جيل المستقبل!!!!!!

    ReplyDelete
  29. يا سيدى ع الدلع

    اتحاد مدونين مصريين مرة واحدة

    و احنا بقى معارضى المدونين و لا ايه

    ايوة احنا فلول العارضة

    هههههههههههه

    يا حلاوة يا ولاد

    اكيد شعارهم
    "التدوين بيتقدم بينا"

    يارب اعرف اطلع كارنيه العضوية

    عشان لو اتمسكت فى اى قسم اطلع الكارنيه بكل فخر

    و اقول للظابط خللى بالك

    انا عضو عامل بالاتحاد

    حقيقى مسخرة

    و انا اوافقك تماما فى الكلمة اللى انت عايز تقولها

    الله يمسيك بالخير يابو الليل

    كان زمانه ظبطهم ببوست فى كل اللى نفسنا نقوله و خلاهم بطلوا تدوين اساسا

    تحياتى يا احمد باشا

    هش

    ReplyDelete
  30. وأيه يعني لما يمثلونا غصب عنا واحنا من أمتي يعني بنختار الي بيمثلنا وحتي لو اخترنا يا تري مش هيخدعنا يا سيدي كبر دماغاك ما هي كده كده خربانة

    ReplyDelete
  31. و الله دا أنا لما عملت اتحاد المدونين البيطريين كنت فاكر نفسي جامد .. طلعت عبيط
    لأني كان لازم ساعتها أنتهز الفرصة و ابقى رئيس اتحاد المدونييين البيطرييين الأعظم ، و أجيب السلطنية و اتسلطن
    عموما ملحوقة .. العيال ما خدوش بالهم أن الاتحاد من غير رئيس .. هاروح اتمريس بعد التعليق


    عموما لو كنت قلقان .. اتطمن
    أخوك ليه خبرة في الجو ده

    أحنا ممكن ننفذ فكر الحزب الوطني نفسه

    ندعو للاتحاد و نلم كل زمايلنا المدونين و نخش و شوية و نعمل تكتل و نطلع أن الهيئة العليا فاسدة و نعمل انتخابات مبكرة و نكسب بشكل ديموقراطي

    بعدها نغير اللايحة و نقلبها مراجيح

    أنا عن نفسي بأسجل موقفي منهم من دلوقت .. دا جايب الآية بتاعت :
    وما يصدر من قول إلا لديه رقيب عتيد
    و مصدرها في وش المدونين
    زي الترزي اللي معلق على المحل :
    و كل شيء فصلناه تفصيلا

    يا عم بلا جنان


    سلام يا صاحبي
    وكان نفسي أشوفك في الحفلة

    ReplyDelete
  32. طيب انا عايزة اشترك في الاتحاد ده و يكون لي بطاقة تدوينية اقبض بيها التموين كل شهر كام بلوج صيني فاضي و كيسين زراير كي بورد و ازازتين كونكشن و لو في صابون اكون متشكرة قوي
    اهو الواحد يلاقيله معاش لما يبطل تدوين و لا يفكر يطلع
    عماش مبكر
    الله يشفيك يا ابو الليل علشان تحلنا الفزورة
    تحياتي العامرة لعمدة المدونين

    ReplyDelete
  33. جمعية أم ترتر للتدوين دى دمها خفيف
    كتاباتهم بتفكرنى بأعلان القطر الى بيتحرك و الناس قاعدين على القهوة
    " انت لسه قاعد محلك سر , ده التدوين بيتحرك "
    ههههههه
    يا ولاد الفقرية

    ReplyDelete
  34. انا فاكر زمان من 4 سنين اتكلمنا في فكرة جمعية للمدونين وانا كنت مؤيد للفكرة وبعد غيرت رايي بعد كام شهر عشان بديت احس ان الموضوع الاصلي الهدف منه هو حماية حقوق التعبير بس
    لقيت فيه ميت حاجة دخلت معاه زي النفسنة والتسييس والادلجة " من ايديولوجية " وناس بتخلص مع ناس وتصفي حساب مع اخرين

    المهم بقي مين دول ..يعني مين هو اللي ماسك الاتحاد ..واللا وهمي هو راخر؟
    حد يعرف هو مين ؟

    ReplyDelete
  35. احلي حاجة ان ولا واحد منهم معروف

    انت مين ياعم انت

    ده بقي يطلق عليه
    قلللللللللللللش


    وبعدين ايه الكلام بتاع موظفين الضرايب العقارية ده
    وانتخابات مجالس محلية

    واستمارات د/26

    واي كلام

    ReplyDelete
  36. احلي حاجة ان ولا واحد منهم معروف

    انت مين ياعم انت

    ده بقي يطلق عليه
    قلللللللللللللش


    وبعدين ايه الكلام بتاع موظفين الضرايب العقارية ده
    وانتخابات مجالس محلية

    واستمارات د/26

    واي كلام

    ReplyDelete
  37. نفسي اعرف ليه دايما فى مصر اللى بينوب عنك ميكون مع نفسه يعنى لا انت تعرفه ولا هو يعرفك ...انتخابات الواحد بيفاجأ بنائب فجاة كدا ..فى الكلية اتحاد الطلاب بيبقى انتخاباته سرية عشان الامفاجأة برضه حتى فى التدوين؟؟؟انا بصراحة مش عارفة هو دة جهل من المدونين بالاحوال لا حبا لمصر فى المفاجأت
    وبالمناسبة تدوينتك فى الكتاب تحفة عجبتنى اوى ربنا يوفقك وابقي قولى رأيك فى تدوينة مشروع وطن بتاعتى دة لو كنت جبت الكتاب ودة اكيد طبعااااا

    ReplyDelete
  38. ده تعيين حضرتك والا إنتخاب؟

    طب ضرب والا شتيمة؟

    طب قصة والا مناظر طيب؟؟

    طب الكارنية بتاعهم ده ..ينفع أدخل بيه سايبر ببلاش والا إيه حيثياته يعني

    طب حد يعمل إتحاد للمدونين و هو مش عارف يستهجي كلمة بلوجر

    دي إيه الوكسة دي يا رب

    ReplyDelete
  39. لااااااااااا

    كفاية حرام عليك يا شقير

    انا هقع من على الكرسى من الضحك

    رئيس الاتحاد ده طلع راجل خطير جدا جدا

    عودة اخطر رجل فى العالم

    و الناس بتوع اتحاد المدونين دول طلعوا جامدين جدا

    تفتكر مين وراهم

    هههههههههههههههههههههههه

    هش

    ReplyDelete
  40. يا سيد احمد , انت عندك مشكلة فى اللغة و نقلتها للقراء و أنا بحذرك من الموضوع ده
    السيد حسن توفيق بتاع البيومى و أم ترتر فقيه لغوى و دى حاجة لا يدركها العامة من أمثالنا و بما ان الأصل فى اللغة هو تعطيش الجيم
    فالسيد بيومى ترجمها بالأنجيليزية ( عطش الجيم هنا ) كما تقرأ بالعربية
    أى بلوجر ( بتعطيش الجيم ) و ترجمتها ( عطش الجيم برضه ) هى
    bloger
    و ليس
    blogger
    -
    و يمكن التأكد من ذلك من أصلها اللغوى فى قاموس عبد المجيد الصحاص ( لا تنسى تعطيش الجيم ) و الله الموفق

    ReplyDelete
  41. طيب، أنا هاقول لكم و أكسب فيكم ثواب بما أنكم غلابى زيي: سيبكم من اتحاد المدونين المصريين، اتحاد المدونين العرب أحسن بكثير. مميزات العضوية عندهم أن يكون لك "رقم تدويني"، و ممكن تاخد رغيف عيش زيادة بالأبونيه.

    سامي كان كتب عن الاتحادات.

    ReplyDelete
  42. يعني حنبقى قلة مندسة في عالم التدوين كمان ؟

    ReplyDelete
  43. شكرا لكم الاخوة الاعزاء اسلوبكم الراق فى الحوار والذى اثلج صدرى على المستقبل الذى تمثلونه جيل الشباب ؟
    كنت اتمنى ان نتناقش او نتحاور ويمكنك التاكد من الاسماء الوهميه التى يضمها الاتحاد بزيارة مدوناتهم والاطلاع على الشعار فى مغظمها واعتقد لو شرفنا بحضوركم الاجتماعات والنقاشات ربما لم يجرء احد على التطاول على هذا هو الاسلوب الامثل للحوار لقد قمت بعمل مدونة على البلوجر للتواصل معك وكى لا يقتصر الاتحاد على مدونى مكتوب وجيران فقط ولكن للاسف يبدو اننى اخطات الطريق
    وللعلم لو كلف احكم نفسه واطلع على ما يقوم به الزميل محمد جرامون لشكره

    لى سؤال
    هل نقابه الصحفيين تعمل على فصل الصحفيين او حبس الصحفين ؟
    على الاقل هذا هو الدور الذى نسعى له
    الوقوف صفا واحدا بجوار المدون لحمايته
    و الاستاذ محمد كلف نفسه ووضع امامكم كل المواد القانونية التى تستخدم لحبس الصحفيين كى نتجنبها ولا نقع فيها وحاول جاهدا ان يشرح لنا قانون نقابة الصحفيين ومجهوده لابد من شكره عليه
    وهناك نقطة اخرى
    نحن مجموعة تطوعت واعلنت عن تاسيس الاتحاد منذ اول نوفمبر 2007
    ولم نقل ان هناك رئيس كلنا مؤسسون
    الى ان ننتهى من التاسيس ويتم عمل انتخابات ولوقراء احدكم المقترحات لوجد اننا لا نسعى لمنصب فنحن لا ينقصنا المناصب ولا نسعى لمال كما اتهمتنى بلدياتى للاسف فنحن لسنا جمعية حقوق انسان علشان نخاطب السفارات للمعونة
    ولم نقل اننا سوف نفرض اشتراك علشان نصرف معاشات كل همنا الاساسى راى الجميع وانتم اولنا لتصور الهدف من الاتحاد وكيفية القيام بدوره شكرا لكم واسف للاطاله
    واتمنى ان تزوروا مدونتى على البلوجر
    http://elbayomy.blogspot.com
    وهناك مدونتى القديمة على مكتوب
    http://elbayomy1.maktoobblog.com
    ربما يعجبكم احد بتوع الخضار الذين يعملون على خدمة الاخر بدون مقابل او اجر الا من عند الله فقط وسعيد بالاختلاف فى الراى دون تجاوز لانى لن انزلق لهذا المنزلق

    ReplyDelete
  44. شفت ياعم
    أديك غلّطنا في الراجل
    ومش هييجي ينزلق معانا في المنزلق بتاعنا بعد كده

    و الله يا جدعان المشكلة بالنسبالي أن التدوين في حد ذاته عمل نشأ في الأساس علشان الناس تعبر في حرية بعيد عن القوالب
    طب ما دلوقتي الجرايد مالية البلد بل أن فيه كتير مننا صحفيين أو حتى بيراسلوا صحف في مصر و برة مصر

    علشان كدة كان شيء خرافي جدا أن أحنا نحط لنفسنا قيود بأيدينا

    أما موضوع الحماية فوالنبي مين اللي يقدر يحمي مين في مصر .. الناس لسة مادين قانون الطوارق سنتين و الحياة زي الفل . و لو على الشياكة و تقويم محامي و اللجوء للإعلام ففي ميت ألف جمعية حقوقية في مصر بتقوم بالكلامدة و ما بتلزمش الناس بأي حاجة

    ReplyDelete
  45. يا جماعة هو مش عم المثقف البدري فرغلي كان قال أيام الاضراب بتاع 6 ابريل و موضوع الفيسبوك ان المعارضة سبقت الحزب الوطني في استخدام الانترنت للتأثير على الشباب و ان الحزب حيتدارك هذا الخطأ و حيبدأ في اختراق عالم الانترنت السحري عشان يلموا الشباب الوطني الواعد حواليهم؟ أمال تبقى الحكومة ذكية و الكترونية ازاي؟
    و ادي الناس حتتلم حواليهم أهو
    عشان يضحكوا على العبط طبعا
    بس احنا وحشين قوي يا جدعان
    يعني بدل مانشجعهم و نصقفلهم صقفة حلوة كده نتريق عليهم و على الراجل السكرة ده؟ ده حتى مش بيحب ينزلق
    طب ده حتى كده يبقى فيه منافسة بين المدونين المتحدين و المدونين المتشرزمين و انتوا عارفين طبعا ان المنافسة بتدفع للأمام
    أمال مصر حتتقدم بينا ازاي؟

    ReplyDelete
  46. ينفع كده كفايه المراره باظت عندي عيب عيب ابقى اقري تعليقاتى عند بلوووو ستون وانت تعرف الرد كويس هههههههههه عموما انا والله قولت كده غيروا اسم الاستنحاد ده لانكم مش بتتكلموا باسمتا وان حاجاتهم عامله زي الحزن الوثني وشكر لكم لحسن تبويظ مرارتي هههههههههههههههه

    ReplyDelete
  47. هيكون لينا تأمين صحى وتخفيض عالمواصلات بموجب الكارنية ولا لاء؟؟؟

    ReplyDelete
  48. انا كنت بعيد عنهم لحد ما عملوا الدنيئه معايا قررت افتح النار معاكم عليهم ولا فائده من السكوت

    ReplyDelete
  49. انا معاهم

    مش عارف ليه بس معاهم وخلاص

    اي حاجه

    هو انا دماغي فاضي للتفكير هم بيعملوا ايه

    انا بفن ياناس بفن

    ReplyDelete
  50. هما تقريبا بيعملا كده علشان يأمموا المدونات وفي المستقبل يطالبوهم بضريبة تدوين

    ReplyDelete