Saturday, July 19, 2008

أيها الناس .. عن مسلسل نور ومهند أحدثكم





مهند إتجوز نور غصب عنه عشان خاطر جده اللي نور قريبته من بعيد عايز كده .. بس مهند مابيحبهاش عشان كان بيحب نهال اللي ماتت في حادثة أمامه قبل كده ، عمة مهند جوزها متجوز عليها من غير ماتعرف ومخلف من الزوجة التانية ولد ، أما فجر فهو بيحب عيشة عارضة الأزياء وطبعا الجد مايعرفش عشان لو عرف هايفركش العلاقة ، أما أخت مهند فهي مهاجرة في أمريكا وعندها بنت وماحدش يعرف عشان الجد برده هايعمل مشاكل ، مهند مابيحبش نور بس نور قتلت عابدين عشان كان عايز يقتل مهند ، عشان كده مهند إتخانق مع نور على السلم ووقعها بس نور كانت حبلى ومهند مش عارف فطبعا الحمل سقط ، نهال اللي بيحبها مهند طلعت ماماتتش ولسه حية وهاتشتغل عند مهند في الشركة ، بس هو هايغير عليها من زميلها اللي في الشغل ، عشان كده نور بعد شوية هي اللي هاتشتغل في الشغل مع مهند ، المحكمة هاتطلق مهند ونهال أصلهم كانوا إتجوزوا فنور ومهند عملوا حادثة ساعة الحكم ، وبعدين يرحوا الهند وهناك تكتشف نور إنها مصابة بالسرطان لكن بعد كده يطلع مش سرطان ، الجد هايتجوز بقى واحدة ليها بنت متجوزة راجل هايطردهم من الفيلا ، ونهال طليقة نور هاتاخد إبنه الصغير مع جوزها الجديد ومهند هاياخده بالبوليس وبعدين يديهولها ، وبعدين مهند يتعرض للقتل ويدخل في غيبوبة وهيحتاج حد يتبرع بكلية ، نور هاتتبرع بالكلية وأنور هايقوله ... إلخ

هذا التهريج الذي سبق هو بعض من أحداث مسلسل جوموز التركي الذي أنتج عام الفين وخمسة بطولة كيفانش تاتليتوج أو مسلسل نور وبطله مهند ، نوعية من المسلسلات التي لاتنتهي ويمكن كتابة عشرة آلاف حلقة منها على نفس المنوال مثل برنامج عيلة مرزوق أفندي زمان ، هذه النوعية من المسلسلات ليست جديدة علينا ظهرت سابقاً في مسلسل الجرئ والجميلات أو ذي بولد أند ذي بيوتيفول ، كما يتشابه مع المسلسلات المكسيكية التي كانت من حسنات التليفزيون المصري أنه رحمنا من إذاعتها مخالفا لتلفزيونات الدول العربية الأخرى ، المسلسل قريب الشبه بمسلسلات المؤلفة منى نور الدين التي كانت تقدم زمان مع كرم مطاوع وبوسي مثل جواري بلا قيود والحرملك وهوانم جاردن سيتي

هذه الدراما العتيقة عفا عليها الزمن ولكن كيف تعود بنجاح ساحق مرة أخرى .. الإجابة ببساطة هو الجو العام المحيط بعواجيز المسلسلات المصرية ليسرا وأخواتها نادية الجندي وفيفي عبده ووسامات فاروق الفيشاوي ومحمد رياض .. الإجابة ببساطة هو الجو العام الرومانسي لمسلسل نور الذي تدعمه الصورة الهادئة والوجوه النظيفة في محاولة إستعادة حالات نفتقدها جميعاً في زخم هذه الحياة ، وليس هناك إستعداد عند مايعجب بها أن يعيشها على أرض الواقع حتى لو أتيحت له الفرصة ، فيفضل أن يعيشها في الخيال ، عموما سوف تأخذ وقتها وترحل ويبقى المشاهدين منشغلين بلقمة العيش وزحام المواصلات والتوك توك والسجل المدني والتأمينات والعلاوة وتنسى الفتاة ذاك اليوم المشؤوم الذي طلبت فيه من صبحي أن يعاملها مثل مهند

***************************

لمن دخل التدوينة بغرض البحث عن مهند
هذه صفحة مهند على الفيس بوك
ودي الريزيومي أو السي في بتاعته

وده كليب على الماشي



-------------------------------

زوج وزوجة بالثمانينات ذهبا لتركيا للسياحة بصحبة الأبن .. تاه الزوج العجوز فأبلغت الزوجة الشرطة

وطلبوا مواصفاته فقالت .. أبيض وطويل وأشقر عيناه زرقاء وشعره ذهبي .. إلتفت الأبن وقال لها هذه ليست مواصفاته

قالت : إسكت إنت .. جايز يدولنا مهند

19 comments:

  1. الحمد لله انى مش بتفرج على المسلسل ده ...هى ناقصه ...بس قريت ان له مشاهدين كتير فى دول الخليج...وقال ايه الناس متابعاه بادمان وده اوقات بيسبب مشاكل ...قولى هو امتى التليفزيونات العربيه هتتخلص من شله الممثلات دول ...ايوه دول اصحاب المبادئ و التنهدات و الاهات ...ربنا يرحمنا منهم ومن اللى بيجبهم علشان ينكدوا علينا .سلامى ليك يا افضل المدونين فى رأيى...بعد قصه نظرات الرائعه فيين الحاجات اللى تشعر باللهفه وانت بنقراها .

    ReplyDelete
  2. انا امي واخواتي بيشفوه انا الصراحة بحس بالتلزيق كدا وانا بشوفه بس على فكرة انت كدا سابق الاحداث لأنهم متابعنها على ام بي سي فور او انا معلوماتي متأخرة

    ReplyDelete
  3. متفقة معاك فى رؤيتك
    أنا محبتش أتابع المسلسل دا
    لأنى هرشته من كام مشهد
    و حسيت إنه رغاوى صابون
    بص فى الأول كدا
    تم إستفزازى
    لما لقيته بيتعرض فى أوقات كويسة
    فى قناة المفروض إنها للحلقات الأجنبية
    و بتعجبنى لأنها على درجة عالية من إحترام المشاهد
    و حسيت زى ما يكون مفروض عليا
    المسلسل دا بالعافية
    فخدتها عند
    و بعدين قولت لروحى يا بت يا فاطمة
    شوفى منه حتة
    يمكن يطلع مسلسل مجبتوش ولادة
    و إنتى اللى متسرعة و أهوجة
    اول ما لقيته مدبلج
    قولت بسسسسسس
    و غيرت المحطة
    بس فوجئت بالضجة الإعلامية اللى عليه
    هوه إكمن الولد حليوة شوية يعنى ؟؟!!
    و إيه يعنى
    ما الحلوين كتير
    بس وصلت فى النهاية لتفسير مشابه لتفسيرك
    و إفتكرت الجرىء و الجميلة
    و الفراغ النفسى و العاطفى اللى عند العرب عموماً و بدت المسألة مفسرة روحها بروحها
    كعادتك متألق
    و عين ثاقبة
    تحياتى يا شقير

    ReplyDelete
  4. أحمد واضح إنك ما إتفرجتش على المسلسل أصلا ً لأني بتابعة من الحلقة 1 ..إنت ملخبط الأحداث تماما ، الأحداث مترابطة و منطقية و الحلقات دي بتكلمك مثلا ً عن أحداث بتحصل في 5 سنين فلازم التفاصيل تكون ثقيلة أرجو أن تقرأ البوست بتاعي عن المسلسل من باب المشاركة
    ayamwayam.blogspot.com
    السوريون أبدعوا مؤخراً في الدراما و يستحقوا الإشادة..هذه الدبلجة المتقنة ليست بالأمر السهل، إحنا أصلا ً بندبلج كارتون بالعافية و بيطلع أي كلام

    ReplyDelete
  5. ليه كدة بس
    تحرق الاحداث
    اعيط انا ولا اعمل ايه

    ده انا ما بصدق افوت اسبوع ماشفوش
    اجي اشوفه حلقة
    افهم كل اللي جرا

    :D

    ويا سلاااام علي معجبين مهند
    اولهم اخواتي
    ههههههه

    غير بقي بعيد عنك
    كلهم بقي لسانهم اخد ع اللكنة السوري
    وخلاص
    يمكن دي الحاجة الحلوة شوية الدبلجة واهو نسمع حاجة غير الحروف الضايعة بتاعة ليلي علوي (دعيف جتا اي ضعيف جدا) وزميلاتها

    المشكلة يا جماعة
    دراميا
    فيه حاجة اسمها حبكة
    وليها نقطة
    Climax
    يعني الاحداث تطلع تصاعدية وتوصل عند النقطة دي
    وبعدها تبتدي العقدة في الحل
    والكل الخيوط تتضافر وتوصل للنهاية
    ولو حصل
    وساعتها بنعيب علي العمل الفني (كتاب, مسرح, فيلم او مسلسل)
    انه بعد ما العقدة انحلت
    عمل حاجة للتطويل فقط ليس الا
    اسمها
    anti-climax
    ودي تعتبر عيب كمان

    مش ممكن بقي مسلسل كل يوم وكل حلقة
    فيها
    climax and anti-climax
    في نفس ذات الوقت

    هو ماشي في جميع الخطوط
    وجميع المشاكل
    ويطول في كل خط
    ومفيش خط بيخدم التاني

    المهم
    قولي بقي الناس بتحبوا ليه

    عشان احنا شعبنا الحبيب
    بيحب تقريبا اللت والعجن وانهم يحسوا انهم عايشين ادق التفاصيل دي..وحاسين بالمشكلة والحل وشوية الرومانسية الحلوة..والوجوه اللي شبه مألوفة بس علي ابيضاني حبتين

    المهم ربنا معانا في ال169 بتوع المسلسل
    والمسلسل التركي التاني اللي سمعت انه شغال

    الحقيقة هذا الهوس بنور
    فاكرني بهوسي انا الشخصي بالمسلسل الكوري
    وان كان شتان برضه

    :D
    تحياتي يا استاذنا
    :)

    ReplyDelete
  6. يالهوي يا شقيرمتقوليش مهند ونوور حرام انا تعبت
    انا عايشه فى الكويت ومفيش حاجه بيتكلمو عنها غير نور ومهند ومهند ونور تصدق الدنيا بتبقي فاضيه ساعه عرض المسلسل ده غير البوسترات والتي شيرتات والشنط وازايز الميا والكولديرز اللى عليها صور سي مهند بجد فى مصر مفيش اعجاب بالمسلسل اوى لكن هنا عنهم هوووووس وجنون اسمه مهند
    ربنا يشفي
    بس المسلسل فعلا صوته حلوه والناس نضيفه وشيك وشباب صغير واحنا زهقنا من سيدات العقد الخامس والسادس اللى عاملينلنا فيها مراهقين وبيدرسو فى الجامعه
    فين ايام الشهد ولدموع وليالي الحلميه وذئاب الجبل كانت فعلا مسلسلات وكل البيت كان بيترقب معاد المسلسل وكان فيه مسلسل زمان بطوله تيسير فهمى ومصطفي فهمى كان حلو اوى اوى حد يفكرنى باسمه والنبي

    ReplyDelete
  7. السلام عليكم ورحمة الله وبركاته

    مش هاتصدقني لو اقولك اني ماكنتش اعرف ولا اسمع عن مسلسل اسمه نور الا من بعض المدونات وبعد كده من الملحق اللي عمله الدستور الاسبوعي العدد اللي فات
    ومش باطيق اصلا الفرجه علي نوعية المسلسلات الهايفه المدبلجه سواء تركي ميكسيكي او اي حاجه
    باعتبرها مجرد اشياء الالهاء الناس عن التفكير في حالهم والمشاكل اللي محوطاهم من كل ناحية
    وزيها زي المخدر الموضعي اللي بيخدر الالم شويه
    وبعدها يرجع تاني ويمكن يكون اشد من الاول

    مش قادرة اتصور ان حد يتابع مسلسل من 500 او 600 حلقه من كلام ممل ومش منطقي ويبقي مبسوط ومستني الحلقه اللي بعدها علي نار
    باشفق علي الناس دي
    ربنا يعافينا ويعافيهم

    سلام

    ReplyDelete
  8. انا بشوف المسلسل وصلت لغاية حلقة 110
    بس مش عارفة المسلسل حيخلص امتي؟؟؟

    ReplyDelete
  9. السلام عليكم
    بجد احنا شعب ....... بلاش اقول احسن
    والله انا اعرف ناس بتتفرج على المسلسل يوميا مرتين وكمان بيستنو يوم الجمعه تقريبا فيه حلقات كتير بتتعاد وبرضه يتفرجو عليه
    لك ان تتخيل التخلف الي احنا وصلناله
    لما مره واحده لقيت واحده قريبتنا بتعيط لما نور حملها سقط والدكتوره قالتلها انها مش احتمال ده يأثر على الحمل بعد كده وبما ان قريبتي ديه سقطت قبل كده قالت يبقى انا كمان زي نور وهاتك يا عياط وخناق مع جوزها
    رغم انها متلعمه ومتدينه
    مش هقدر اقول غير لنا الله

    ReplyDelete
  10. يادى مهند ونور اللى هاوس الناس انا شفت حلقتين كدا منه بس بصراحه لقيت مرارتى مش ناقصه فقلت اشترى نفسى تفاصيل مملللله على شويه رومانسيه اظنها مش واقعيه ابدا لان مفيش حد بيعمل كدا اساسا ولا اظن ان فى حد متسامح اوى لدرجه البرود بتاع نور دى

    بس بصراحه احلى حاجه فالمسلسل هوا شكل الممثلين ماشاء الله كلهم حلوين كدا وباين عليهم النضافه ههههههه

    ReplyDelete
  11. شقير يا أبو الحكاوى
    ليك واجب حدانا
    لو ليك يعنى فى الواجبات دى
    تعالى خده
    تحياتى

    ReplyDelete
  12. بش مهندس شقير
    انا اطالب بتفسير و يستحسن ان يكون منطقي:

    انت عرفت الكم الهائل من الهراء ده ازاي؟ ارجو من منطلق حسن ظني بك انك ما تابعتوش بنفسك

    انا سعيد و فخور بان جهازي العصبي و البصري و الفكري و النفسي خالي تماما من هذا النوع من الملوثات، ما شفتش ولا حلقة و ما عرفتش عن المسلسل من اصله الا من فترة بسيطة

    لكن اعتقد اني لا يمكن اعامل بجدية او اتزوج او اتاجر مع او ازكي احدا تابع ال 500 حلقة او مهما كان عددها
    يعني متابعي المسلسلات المماثلة لهذا هم نوعية معينة من الاشخاص
    قليلي الامكانات في الحياه، قليلي الطموح، لا يملكون هموما دينية او وطنية بشكل واضح
    الحكم العام ده مع انه كل حكم عام ظالم بالعاده لكن جرب بنفسك و ستجده ينطبق بشكل كبير على كل المتابعين المخلصين!

    تحياتي

    ReplyDelete
  13. تحياتي ليك بس فعلا انت ما تجاهلتش حاجة مهمة وهي الجو الرومانسي العام في المسلسل بغض النظر عن ضعف الحبكة الدرامية لكن فعلا المسلسل بيعكس جو جميل لاسرة محبة وزوج ذكي

    ReplyDelete
  14. احمد
    إزيك
    إنت شكلك كدة متابع المسلسل ده ومركز قوي في تفاصيله
    يعني عرفت كل الأحداث دي إزاي
    :)
    أعتقد إن فئة المراهقين فقط هما إللي متابعينه
    يا سيدي خليهم يتعلموا شوية رومانسية
    ما إنت عارف إنها شحت من الدنيا اليومين دول

    ReplyDelete
  15. تحية عزيزة على هذا النقد الدقيق
    استمر و نحن ندعمك

    تجمع المدونون النشامى

    ReplyDelete
  16. استاذ احمد
    ماجاوبت يعني عن السؤال المتكرر
    من وين عرفت الاحداث ؟
    :))
    عن نفسي انا بديت متابعة المسلسل من الحلقات الاربعين تقريبا

    وادمنت عليه
    و عاجبني جدا

    و ياأخ خالد جرار
    اعتقد حكمك متسرع
    لاني عندي طموح و ادرس و اشتغل و عندي
    هموم دينية ووطنية
    بس ما يمنع اني اشوف مسلسل رومانسي

    تحياتي و تقديري

    ReplyDelete
  17. ةىىلا ىة ة

    ReplyDelete
  18. خلاص
    العالم العربي بقى فاضي و معندوش حاجة يهتم بيها إلا سي مهند و ست نور
    مسلسلات متألفة و كلها تفاهات و زي ما بتقول يا شقير - و اسمحلي أقولك شقير حاف كده - ممكن يتألف منها آلاف الحلقات
    و كله يقولك جمال مهند و رقة مهند و شعر مهند و عينين مهند، تقولش خلاص الرجلة بقت دلوقتي بالشعر و العينين و الرقة ؟
    الإعجاب الطبيعي بأي مسلسل و أي فيلم شيء مقبول و شعور صحي لأسباب عقلانية، ممكن يعجبني فيلم لفكرته الجامدة أو تمثيل الممثلين و آداؤهم العالي إنما عشان البطلة حلوة و لا البطل أمور ؟

    عموما دي تاني مرة أدخل المدونة هنا و الصراحة عجباني جدًا جدًا جدًا و بأحس لما أقرا الكلام اللي مكتوب أني أنا اللي كاتبه، يعني بيعبر عن اللي عايز أقوله بمعنى آخر

    خالص تحياتي ليك

    عمرو عز الدين

    ReplyDelete
  19. Nadwa Arrar has a good article on the Noor Soap Opera

    http://www.arabwashingtonian.com/english/article.php?issue=21&articleID=887

    ReplyDelete