Saturday, July 12, 2008

طلقات في صدر المتخلفين


تخلف دول




بصراحة أنا مش فاهم إيه الهيافة والتفاهة اللي قايمة على الفيلم الإيراني 34 طلقة للفرعون أو إعدام فرعون ، فيلم تسجيلي قصير خايب أو حتى فيلم روائي طويل رائع .. فيلم وخلاص منتجه قطاع خاص ولا دولة .. هو إحنا رقباء على العالم .. فيلم بيهاجم ولاّ بيهادن .. هو العالم هاينتج على مزاجنا .. ماكل يوم هوليود بتنتج أفلام اللي مع وإللي ضد ، واللي بيهاجم رئيس الدولة أو بيؤيده .. أفلام بتقول الحقيقة أو بتزيفها .. ده فن .. ماينفعش نمشي الكون على هوانا ماإللي يهاجم يهاجم واللي يتهم بالخيانة يتهم .. واللي عايز يرد بفيلم يرد أو بنقد ينقد .. لكن بأه الخارجية تعملها قصة وتتمطع فيها والنواب الموقرين يستأسدوا ويضيعوا وقت المجلس الموقر أكتر ماهو ضايع .. ده بيدل أد ايه إننا بننتمي لدول العالم التالت ( وإن كنت مازلت أميل إلى تعبير الدول المتخلفة لأنها أوقع وبتحسسني بالحقيقة أكتر ) ..في دول العالم التالت الأفلام والأعمال الإبداعية فيها بتكون بأمر من الدولة ، ولما تطلع حاجة ماتعجبناش نهاجم الدولة اللي سمحت بظهور العمل عشان عندنا مبدأ أمني عسكري أصيل إن كل شيئ حتى الفن بيطلع بموافقة الدولة . مافيش لا حاجة إسمها حرية إبداع ولا حرية تفكير ولا كل واحد يقول رأيه حتى لو كان غير منصف لأننا ببساطة بنلغي بالخطأ عقلية المتفرج .. هما شايفين إن السادات خاين هما أحرار إحنا شايفين إنه بطل إحنا أحرار .. هما بيكرهوا الشاه دي مشاعرهم إحنا بنحبه دي رؤيتنا .. كل واحد حر .. لكن حرية تعبير تقف قدامها دولة بكامل مؤسساتها الرسمية .. بصراحة تهريج .. حتى لو الدولة هي اللي منتجة الفيلم وهما شايفين كده هما أحرار وإحنا كمان أحرار إننا نقول إن الفيلم تافه ومزيف وركيك .. والمبدأ مشترك إحنا كمان لو عملنا فيلم عن الخميني بنطلعه إنه سبب البلاء والتخلف إحنا أحرار واللي يعجبه الفيلم يعجبه واللي مايعجبوش هو حر لكن هما كمان يصعّدوا الموضوع ويوصل لعلاقات دول .. بصراحة ده تهريج وتسفيه لدور الأمم والشعوب وعدم فهم لدور السياسة ولدور الفن حتى لو مزيف أو مختلق أو مشبوه .. أنا عموماً أميل لحكم السادات أكثر من الحكام الآخرين ولن ينال منه فيلم أو سلسلة أفلام ولن يمجده فيلم أو سلسلة أفلام .. وهذا لايتعارض مع مقولة أن الفن له تأثير في تكوين الأراء ، ولكن ليس هو المؤثر الوحيد ولا يستطيع فيلم أن ينكر حقيقة ولا أن يثبت أكذوبة ، وموقفنا هذا هو الذي يهين السادات عندما نهب بشكل رسمي وليس شعبي لفيلم عليل ونعتقد أنه ينال منه



13 comments:

  1. احمد شقير
    *******
    الصواب هو:- ان

    رأيى صواب يحتمل الخطأ و رأى غيرى خطأ يحتمل الصواب
    ...و لما يكون الموضوع وجهة نظر فنيه لفيلم يعبر عن رأى مخرجه او منتجه او كاتبه وقد يكون وراءهم من يدعمهم ...فلماذا يبقى رد فعلنا دائما بالاقوال المتشنجه ..فماذا يمنعنا على سبيل المثال بانتاج فيلم يليق بحدث مثل حرب اكتوبر رغم مضى 25..و تشكيك البعض فى عظمتها
    وتقليل بطوله من خاضوها مع اننا نملك الادوات
    ؟؟
    دمت بكل ود ,,تحياتي

    ReplyDelete
  2. ما زلنا لم نتعلم ثقافه الاختلاف في الرأي
    ما زلنا نعبد الفرعون... يا عزيزي
    تحياتي

    ReplyDelete
  3. الله
    ده انا كاتبة عن نفس الموضوع وجبت سيرة هوليود
    بس انت بتقول احنا على اساس مين

    كل واحد حر يشوف اللي هو عايزه صح
    بس احنا مش كلنا شايفين السادات بطل
    انا شايفاه ابن وسخة
    لا حرام
    امه كانت احسن منه

    ReplyDelete
  4. انا معاك تماما في اللي قلته ، احنا لسه بنتعامل مع الامور المصيرية وكانها مشكلة وهتروح لحالها وملهاش اي اثر ولسه بنيجي في الهايفة ونتصدر
    يعني المشروع النووي اتأجل وقالولنا بنجهز وبنشوف ولسه فيه وقت واحنا سكتنا
    وارض الضبعة بتدار مؤامرة للاستيلاء عليها واحنا عاملين مش واخدين بالنا او عارفين ومابيدنا حيلة وجايين علي اللي لاهيجيب ولا هيودي وبنزعل ونهدد وناخد موقف .... ده ايه السخف ده؟؟؟؟ وايه التمثيل ده؟ وكمان مجلس الشعب باعضاؤه ثايرين جدا عشان حنه فيلم بكره هيتنسي وقاموا قال كل واحد فيهم كلمتين علا صوته شوية وهو بيقولهم عشان الكارثة اللي اتعملت بتأجيل البرنامج النووي وخلاص
    ايه ده؟ بلد بقت مستفزة بصحيح
    اسفه للاطالة لكن حضرتك اثرتني اكتر بكلامك وزي ماتقول ماصدقت
    اسفة وسعيدة بمروري لمدونتك
    لك مني التحية
    د. موني

    ReplyDelete
  5. اصل هما خلصوا المشاكل كلها بتاعه البلد
    فملاقوش غير دي

    ربنا يرحمنا

    وهاجو اوي علشان الفيلم ده
    مالدنيا كلها قايمه علي رسولنا


    ومحدش عمل حركه واحده

    لنا الله

    ReplyDelete
  6. سياسه إلهاء الشعب في معارك كلاميه لا تقدم ولا تؤخر ، ما هي المشكله في " إعدام فرعون " مجرد فيلم يحمل وجهة نظر ربما يؤيدها الكثيرين في مصر وأنا منهم بأن السادات خاصة في أواخر أيامه فقد عقله .
    كنت صغيراٌ أكرهه وأكره أم كلثوم لطول خطب الأول وأغاني الثانيه والتي كان والدي أطال الله عمره يجلس أمام التلفاز بالساعات يستمع إليهم ، وعندما كبرت قليلاٌ أحببت أم كلثوم ولم أستطع التغلب على كره السادات ليس للسبب السابق بالطبع ولكن لأسباب كثيرة لا مجال لذكرها الآن مع إعترافي بأنه أرحم على شعب المحروسه من الحالي ............ نعود لموضوعنا مات الفرعون أو قتل أو استشهد هي مجرد أشياء في علم الغيب لا تهم أحداٌ في مصر الآن في وقت مات الناس فيه في سبيل الحصول على لقمة عيش من أبو خمسه صاغ ...... معلش يا أبو حميد طولت عليك شويتين

    ReplyDelete
  7. ياريت كنا الدولة اللي بتحافظ على رموزها علشان نقول في مبرر ل كده .. لكن للأسف هي بس حالة مبررة علشان دي ايران لكن لو دولة تانية كنا قلنا حرية الفن
    دمت بكل خير

    ReplyDelete
  8. يا أستاذي .. تفتكر ان المفروض مصر كانت تعمل ايه؟ تتجاهل الفيلم .. ولا تبدي موقف منه ؟ وتفتكر أسرة السادات كانت المفروض تعمل ايه؟ تتجاهل الفيلم ولا تبدي رأيها فيه؟

    مصر أبدت رأيها في الفيلم .. وأعلنت احتجاجها على عرضه وعلى الإساءه للرئيس المصري الراحل .. بتنتقدوا ايه .. انها قالت رأيها ؟! طب أسرة السادات بتهدد وتتوعد ورافعه قضايا ؟ ايه سبب الانتقدا ؟ هو المفروض مكانتش تعمل كده ؟!

    بصراحه مش فاهم

    ReplyDelete
  9. انا متفق معاك تماما. بس البلد اللي رئيسه ينسى ازمة الرغيف وينشغل بمشاكل الحضري، وارد ان حكومته تنسى الفشل وتمسك في الهيافات.
    اللي عايز يدافع يكون الدفاع من جنس الهجوم، لو دا هجوم. الفن يقابله فن.

    تحياتي

    ReplyDelete
  10. ما هو مجلس العشب اعضاؤه منتخبين من الشعب والشعب اصابته حاله من الهوس الفكري
    مابقوش بيدورا على المفيد ولا المهم. امسك الريموت وافتح الفنوات الرياضيه ساعتها هيتهيألك ان مفيش مشكله حاصله في الكون كله الا مشكله هاني سعيد ساعات من البث المباشر واللي مش مباشر علشان نعرف وقع ولا موقعش وقيس على كدة بقيه المواضيع
    لما الشعب اتحد طلعنا بالاضراب وبرفض مصنع اجريوم وغيرة. تسكت الحكومة لا فشر. توقعنا في بعض بفتنه طائفيه شوية تتحول اجهزة الدوله كلها لمتابعه الحضري ابو زمة استك شوية وبعدين الفيلم اللي بيشتم في السادات شوية وقانون تنظيم البث شوية والثانوية العامة اللي كانت بتتسرب كل سنه واللي يغيظك واحد يطلع يقول وايه الجديد في كدة
    ما هو لو الشعب فاق هيتقلبوا عليهم. انما لو فضل الشعب عايش في ميه البطيخ كدة الاشية هتبقى معدن والعمليه هتبقى في النميله والفله في الفانله
    Love,
    MishMish

    ReplyDelete
  11. أنا شخصيا كنت بحب الرئيس الراحل السادات جدا، بس مسألة الإعتراض أنا شايفة إن مفيهاش حاجة ، بس المهم إزاي نعترض و إننا نعترض علي كل حاجة غلط مش دي بس ، تحياتي لك يا أحمد، و رمحبا بك علي مدونتي (بحب الورد)

    ReplyDelete
  12. hoa 3la kedaa Amn el dawla 3andha far3 fe Iran :D

    shof elkhabr da mn 3la Masrawy

    من جهة أخري، أكد زاهر أن مباراة المنتخب المصري الودية أمام إيران قد تم إلغائها نتيجة الظروف السياسية غير المستقرة بين البلدين حاليا.

    وقال أن اتحاد الكرة استلم خطابا من وزارة الخارجية تطلب فيها الأخيرة إلغاء المباراة في الوقت الحالي.

    ReplyDelete
  13. السلام عليكم

    الظاهر ان تعليقي جاي متأخر شوية
    بس الموضوع مازال مثار بعنف حتى الآن
    وقرأت خبر عن تخصيص 20 مليون جنيه ميزانية فيلم "إمام الدم" للرد على "إعدام فرعون"ـ
    http://masrawy.com/News/Arts/Stars/2008/August/9/emamedam.aspx
    وده شيء استفزني جدا جدا

    بقيت عمال أقول يا جدعان معقول ده؟
    1- الفيلم مش انتاج الحكومة الايرانية
    2- الفيلم مافيهوش الاساءات اللي انتوا متخيلينها دي، دول مجرد 3 كلمات بالعدد بس (على ما أذكر)، غير كده الفيلم عادي
    3- الرد ما يبقاش بالطريقة العقيمة دي، عمل فيلم اقوم انا اعمل فيلم برضه، المفروض اننا أعقل من كده
    4- كده احنا عمالين نعمل خلافات دولية على الفاضي، فعلا على الفاضي
    5- وبعدين الفلوس دي يعني هترجع تاني من السنيمات مثلا، ما اعتقدش ان فيلم "إمام الدم" هيبقى الفيلم اللي شادد الشباب ويعمل أعلى مبيعات، يعني فلوس طايرة هباءً
    6- الفلوس دي مش الاولى تروح دعم ولا حتى يروحوا اي حتة فقيرة في عين شمس ولا الكيلو 4.5 ويرموا الـ20 مليون دول في الهوا كده، الناس اللي هتستفيد ساعتها هيبقوا أكتر
    7- اشمعنى الحكومة ما سخنتش اوي كده مع الإساءات إلى النبي (صلى الله عليه وسلم)، القومية المصرية بقى تعمل ايه

    ReplyDelete