رسالة من إمرأة غير مجهولة

في الماضي القريب حمل لي بريدي الإلكتروني رسالة خاصة من إمرأة غير مجهولة ، الرسالة عبارة عن كلمات تعبر عن لحظة شعورية خاصة تمر بها صاحبة الرسالة ، الرسالة هي صرخة تطلقها صاحبتها كملجأ أخير .. كوسيلة أخيرة للبوح بماتشعر عندما لايشعر بها أحد ، وبعد كتابتها لم تجد لها طريق إلا بريد صاحب هذه المدونة

هذا ماتقوله الرسالة بدون تصرف


أحمد

لدي رغبة شديدة للصراخ .. أصرخ بأعلى ما في من صوت .. أسمع العالم كله صوت صراخي
وأبكي ..أبكي الى أن يغشى علي من كثرة البكاء
دموعي محبوسة .. مخنوقة .. صوتي لا أقدر على إخراجه
صعبانة علي نفسي قوي .. وزعلانة من نفسي قوي وعاتبة عليها بشدة

أنا السبب في كل الي بيحصلي
انا استحق كل اللي بيحصلي
أنا اللي رضخت للظروف..وسمحت بأمور كثيرة جدا لا أحبها ولا أريدها ولكني تغاضيت عنها على حساب نفسي وأعصابي وكرامتي ومشاعري
ضعيفة .. جبانة .. هشة قوي قوي وبسهولة بأتكسر
أريد أن أتحرر من السجن اللي سجنت نفسي فيه ودخلته بإرادتي الضعيفة
ياااااه .. قد إيه باكره نفسي
قد إيه عايزة أرتاح من نفسي
بادعي كتير .. غصب عني .. يارب تريحني من نفسي
ترحمني وتخلصني
ترحم قلبي وروحي
ترحم عيوني
تريحني من خوفي وهمي وعذابي
تريحني من وحدتي
تخلص العالم مني وتخلصني منه
مش عايزة أعيش في العالم ده
مش عايزاه
مش عايزاه
مش عايزة حاجة
عايزة الرحمة بس
هو مش ربنا قال .. وجعلنا بينكما مودة ورحمة
هما فين
فين المودة .. فين الرحمة
جرحني قوي .. قوي بدون اي رحمة
إزاي يجيله قلب يعمل فيا كده
ينتهكني وبعدها يجرحني
إزاي ... ؟
ليه ... ؟
كل أما أحاول أقف على رجليا..يجي تاني ويكسرني
ده إيه الجبروت ده ؟؟
مين اللي إداله الحق إنه يملكني بالشكل ده ويتصرف بيا كما يشاء ووقت ما يشاء
ورقة إتكتبت بينا
ورقة
بيها امتلكني .. وأعطى لنفسه كل الحق في
أنا عارفة أن ده شرع ربنا وسنة رسوله
بس لا ربنا ولا رسوله يرضيهم اللي بيحصل لي
مايرضيهمش والله
ما يرضيش حد إني أنام كل ليلة ودموعي على خدي
ما يرضيش حد أني أتحمل فوق طاقتي وأسكت وأكتم في قلبي وأداري
ما يرضيش حد إني امثل السعادة وأنا في قمة التعاسة
ما يرضيش حد إني أضحك وأنا مكوية بدموعي المحبوسة جوايا
ما يرضيش حد إني أكتم غضبي ولا أستطيع أن أعبر عنه في وقته ..ويفضل يترسب جوايا وأنا ساكتة
عايزة مساحة أتنفس فيها مش لاقية
عايزة مكان صغير قوي ..صغير قوي بس أرتاح فيه
أعيش فيه بطريقتي .. لما أحزن أبكي وأصرخ وأرتاح
ولما أفرح أغني وأرقص وأطير براحتي
مش عايزة دايما أؤجل مشاعري
نفسي أعبر عنها وأحررها في لحظتها
بس ازاي وأنا ضعيفة وجبانة ومش قادرة
أنا اللي كتبت ده على نفسي
أنا ، ويا رب تريحني من أنا

أحمد
كنت محتاجة أكتب .. وبقالي ساعة فاتحة الميل ومش عارفة أكتب حاجة
ومش عارفة أنا كتبت إيه ؟؟
ولاّ قلت إيه .. ؟؟ بس سيبت نفسي وكتبت اللي مش قادرة أقوله لحد
وعمري ما حاقوله لحد غيرك بعد ربنا
قلته كتير لربنا
من شوية وأنا ساجدة له
بكيت ..بكيت وطلبت رحمته
ويارب يسمعلي ويحققلي رجاءي

إدعيلي

إنتهت الرسالة


أسباب المشكلة لاتهم بقدر مايهم الحالة التي وصلت إليها بطلتنا ، وبالرغم من أن الرسالة تعبرعن مشكلة مُبهمة التفاصيل ولكن بين السطور تكتشف الأهم ، تكتشف مجموعة مشاعر إجتمعت في لحظة خاصة ، أجادت صاحبتها التعبير عنها ، لم تكن ترنو الإجادة بقدر ماكانت تحاول إستجداء الكلمات للتخفيف عنها ، فكانت كلماتها صادقة ، ولو حاولت هي أو آخرين التعبير في وقت لاحق عن حالتها لما شعرت أنت بنفس إحساس ماكتبته في رسالتها

يامعشر الأزواج .. إهتموا بزوجاتكم ..إسمعوا لهن .. شاركوهن أمورهن .. إبتسموا في وجوههن .. خففوا عنهن مشاعرهن المقهورة .. لاتغفلوا أحاسيس الحب والحنان .. لاتبخلوا بكلمات تحمل عاطفة حتى في أشد الظروف .. إحترموا إنسانيتهن .. لاتتجاهلوا المودة والرحمة .. قدموا لأنفسكم ..

يامعشر الأزواج .. كلمات قصيرة منكم .. مشاعر بسيطة منكم .. لمسات شاعرية منكم .. ضحكات رقيقة منكم .. كفيلة أن تتفادى آلام كثيرة .. وأحزان قاهرة .. وحياة تعيسة

يامعشر الأزواج .. أحبوا شريكات حياتكم وتفننوا في أن تجعلوهن يحبوكم

أيها الزوج .. إحترم تقدير المرأة التي إختارتك من بين رجال العالم لتكون شريكة حياتك .. لاتجعلها تندم على إختيارها لك .. لاتخيب رجائها فيك .. لاتتخلى عن مقعدك في قلبها .. لا تجعلها يوماً تكتب هذه الرسالة