ملاحظات على إنتخابات أوباما

ملاحظات سريعة على الإنتخابات

واحد : لم ألاحظ أي وجود لقوات الأمن .. أو الأمن المركزي ولا حتى الأمن الغذائي

إتنين : لم يكن هناك حبر فسفوري ولا تركواز

تلاتة : مافيش وزير داخلية ولا رئيس لجنة إنتخابات بيعلن النتيجة .. أنا بصراحة مش عارف النتيجة بيعرفوها إزاي

أربعة : إعلان فوز الرئيس بيتأكد بإقرار المرشح الخاسر بفوز الرئيس

خمسة : جون ماكين مش هايدخل السجن خمس سنين عشان مش بيزور توكيلات أمريكاني

ستة : مافيش ولا واحد ولا حتى أي جهة متطرفة جاب سيرة تزوير في النتيجة

سبعة : ماحدش جاب سيرة بلطجة ولا حتى خناقة واحدة .. بإستثناء الحادثة اللي في الصورة فوق ، أنا مش فاهم إنتخابات إيه دي

تمانية : الناس إنتخبوا في النهار والنتيجة طلعت بالليل ، كأنها انتخابات نقابة النقاشين

تسعة : الإتنين المرشحين إتصلوا ببعض بالتليفون فور إعلان النتيجة

عشرة : ماكانش فيه أتوبيسات بتنقل الموظفين والمواطنين عشان ينتخبوا

حداشر : لم تذيع السي إن إن ولا الإي بي سي أغنيه إخترناك الأمريكاني ولا أمريكا اليوم في عيد

إتناشر : مافيش أي حد إشتكى من عدم وجود إسمه في الكشوف الإنتخابية . . ده إذا كان فيه أصلاً

تلاتاشر : ماسمعتش كلمة بطاقة إنتخابية

أربعتاشر : نسبة المشاركين ستة وستين في المية .. أكتر من مية وسبعتاشر مليون ... إيه سفن إيه

خمستاشر : الشبه بين إنتخاباتهم وإنتخابتنا تنحصر في أن باراك تعني باللغة السواحيلية ( اللغة الكينية ) مُبارك - معلومة حقيقية

**********************

أعاد نشر التدوينة : صحيفة الوطن الكويتية ، موقع حزب العمل ، مدونة ياللا نفضحهم ، مدونة ماشي ، مدونة إيمي ، موقع وحدة العمل لكرد سوريا ، مدونة خواطر ، منتدى محاورات المصريين ، منتدى واحة العرب ، منتدى الحلم العربي ، منتديات شبكة ريال مدريد ، موقع الجالية المصرية ، ... وعشرات المنتديات الأخرى